ሰበር ዜና – ፓትርያርኩ የጠቅላይ ቤተ ክህነት ዋና ሥራ አስኪያጅ አቡነ ዲዮስቆሮስን አገዱ

• የሠራተኛ ቅጥር እንዳይፈጽሙ እና ከፍተኛ ወጪዎችን እንዳያንቀሳቅሱ አገዱ፤
• የመሪ ዕቅድ ትግበራ ዐቢይ ኮሚቴ፣ ለጽ/ቤቱ የ5 ከፍተኛ ባለሞያዎችን ቅጥር በውድድር ለመፈጸም እየተዘጋጀ ባለበት ወቅት የተላለፈ እግድ ነው፤
• ከፍተኛ ወጪዎቹ፡- በጀታቸው በቅዱስ ሲኖዶስ የጸደቀ፣ የ2 ሕንፃዎችንና የጠቅላይ ጽ/ቤቱ አዳራሽ ዲዛይን፣ ግንባታና ቁጥጥር ሥራን እንዲሁም የአህጉረ ስብከት ተሽከርካሪዎች ግዥ አፈጻጸምን ይመለከታሉ፤
• በነውጠኞች ጥፋት ለተጎዱት የሶማሌ አብያተ ክርስቲያን እድሳት የተሰበሰበው ገንዘብም፣ ወጪ እንዳይኾን ከልክለዋል፤
• እግዱ፣ “ሀብት ያለ ሥነ ሥርዓት ለከፍተኛ ብክነት እንዳይዳረግ ጥብቅ ቁጥጥር ማድረግን” በመነሻነት ቢጠቅስም፣ ፓትርያርኩ፣ ባልቀረበ የቁጥጥር አገልግሎቱ ሪፖርት፣ ሥልጣንን አላግባብ የተጠቀሙበትና ተቋማዊ ለውጡን ለማደናቀፍ በጽ/ቤታቸው ዙሪያ ሲካሔዱ የከረሙ የጨለማ ምክክሮች ውጤት እንዳይኾን ተጠቁሟል፤
• የብፁዕ ዋና ሥራ አስኪያጁ የሦስት ዓመት የሥራ ዘመን እየተጠናቀቀ መኾኑን እግዱ ቢጠቅስም፣ በሕገ ቤተ ክርስቲያን መሠረት፣ ለመረጣቸው የቅዱስ ሲኖዶስ ምልዓተ ጉባኤ የክንውን ሪፖርት ሲያቀርቡ እንጂ በፓትርያርኩ የሚወሰን አይደለም፤ ለቀጣይ ሦስት ዓመት የሥራ ዘመን የመወዳደር መብትም አላቸውና፤

***

• ሦስት ዓመት የሥራ ዘመን ያላቸው ብፁዕ ጠቅላይ ሥራ አስኪያጁ፣ የቤተ ክርስቲያን የሰው ሀብት፣ ገንዘብ እና ንብረት አስተዳደር የበላይ ሓላፊ ናቸው፤
• ቅዱስ ሲኖዶስ ለጠቅላይ ጽ/ቤቱ በፈቀደው በጀት መሠረት፣ የሒሳቡን አያያዝና የንብረቱን አጠቃቀም ይቆጣጠራሉ፤ ማንኛውንም የቤተ ክርስቲያን ገንዘብና ንብረት ከቅዱስ ሲኖዶስ ዋና ጸሐፊ ጋራ በጣምራ ፊርማ ያንቀሳቅሳሉ፤
• ለቅዱስ ፓትርያርኩም ተጠሪ ቢኾኑም፣ በሕገ ቤተ ክርስቲያንና በቃለ ዐዋዲው መሠረት ዕቅድ እና የአፈጻጸም ሪፖርት የሚያቀርቡት፣ ለአጠቃላይ ሰበካ መንፈሳዊ ጉባኤ እና ለቅዱስ ሲኖዶስ አካላት(ለቋሚ ሲኖዶስ እና ለምልዓተ ጉባኤው) ነው፤
• ፓትርያርኩ፣ ከብፁዕ ዋና ሥራ አስኪያጁ የአፈጻጸም ሪፖርት የጠየቁባቸውንና አላግባብ እገዳ ያሳለፉበትን ደብዳቤ፣ ቋሚ ሲኖዶስም ኾነ ጽ/ቤቱ አልመከረበትም፤ የአፈጻጸም ሪፖርት መጠየቅ ቢችሉም፣ እግዱ አግባብነት የለውም፤ ሥልጣኑ የቅዱስ ሲኖዶስ ነው፤
• ጠቅላይ ጽ/ቤቱን በዋና ሥራ አስኪያጅነት እንዲመሩ፣ በግንቦት 2008 ዓ.ም. የቅዱስ ሲኖዶስ ምልዓተ ጉባኤ ተመርጠው በፓትርያርኩ የተመደቡት ብፁዕ አቡነ ዲዮስቆሮስ፣ የሥራ ዘመናቸው የሚጠናቀቀው በመጪው ግንቦት የርክበ ካህናት ምልዓተ ጉባኤ ነው፤

***