Category Archives: Uncategorized

የልማትና ክርስቲያናዊ ተራድኦ ኮሚሽን: የፕሮጀክት አጋሮቹን ለምክክር ሊጠራ ነው

  • የማኅበረሰብ ተጠያቂነት አጋርነት ማሕቀፍ ትግበራ፣ ከአጋሮች ጋራ ግንኙነቱን አጠናክሮታል
  • በዘላቂ ልማት እና የአገልግሎት ጥራት፣ የምርጥ ተሞክሮ ግምገማ በተከታታይ ተሸላሚ ኾኗል
  • የበጎ አድራጎት ሕጉ፣ በኮሚሽኑ የውጭ ለጋሽ ድርጅቶች ርዳታ አሰጣጥ ላይ ተጽዕኖ ፈጥሯል
  • የገቢ ምንጭ መምሪያ በማደራጀት፣ የገንዘብ አቅሙን በሀገር ሀብት ለማጠናከር እየሠራ ይገኛል
  • ከውጭ ጥገኝነት አላቅቆ ራስን ለመቻል ይረዳናል ያልነውን ጥናት አዘጋጅተናል”/ሊቀ ጳጳሱ/

***

ብፁዕ አቡነ ሳሙኤል፤ የልማትና ክርስቲያናዊ ተራድኦ ኮሚሽን ሊቀ ጳጳስ

በኢትዮጵያ ኦርቶዶክስ ተዋሕዶ ቤተ ክርስቲያን የልማትና ክርስቲያናዊ ተራድኦ ኮሚሽን፣ ከውጭ የርዳታ ጥገኝነት ለመላቀቅ የሚያስችለው ሕግና ደንብ ማዘጋጀቱን የገለጸ ሲኾን፤ ከፕሮጀክት አጋሮቹ ጋራ በቀጣይ ስለሚኖረው የሥራ ግንኙነት ለመምከር ማቀዱን አስታወቀ፡፡

የዓለም አቀፍ ለጋሾች ርዳታ፣ ለተወሰነ የሽግግር ጊዜ ከመርዳቱ በቀር በዘላቂነት የሚጠቅም እንዳልኾነ ለሳምንታዊው ሰንደቅ ጋዜጣ የተናገሩት የኮሚሽኑ ሊቀ ጳጳስ ብፁዕ አቡነ ሳሙኤል፣ ለልማትና ተራድኦ የሚውል ሀብት ከሀገር ውስጥ ለማሰባሰብ የሚያስችል ሕግና ደንብ በኮሚሽኑ መዘጋጀቱን ገልጸዋል፡፡

“ጥናቱ ከውጭ ጥገኝነት አላቅቆን ራሳችን እንድንችል የሚረዳን ይኾናል፤” ያሉት ብፁዕነታቸው፣ የአዲስ አበባ ዩኒቨርስቲን ጨምሮ ሌሎች ምሁራንን በማሳተፍ መዘጋጀቱንና ለቅዱስ ሲኖዶስ ቀርቦ ሲጸድቅ በሥራ ላይ እንደሚውል ጠቁመዋል፡፡

ከ10 በመቶ በላይ ከውጭ ለጋሾች ገንዘብ መቀበል እንደማይቻል የሚከለክለው (የ10 በ90) የበጎ አድራጎት ሕጉ፣ የሀገሪቱንና የረጂዎችን ኹኔታ ግምት ውስጥ ያስገባ ባለመኾኑ ተጽዕኖ እየፈጠረ እንዳለ የኮሚሽኑ ሊቀ ጳጳስ ተናግረዋል፡፡

ይህ 10 በ90(ከ10 ከመቶ በላይ ከውጭ ለጋሾች ገንዘብ መቀበል አይቻልም) የሚለውን፣ የውጭ ለጋሽ ድርጅቶች ብዙም አልተቀበሉትም። እርሱ ነው ተጽዕኖ እየፈጠረ ያለው። ሕጉ፥ የሀገሪቱንና የረጂዎችን ኹኔታ ግምት ውስጥ ያስገባ አይደለም።

ያም ኾኖ፣ ከዓለም የኢኮኖሚ ቀውስና ረጂዎች በዓለም ዙሪያ ቅድሚያ የሚሰጧቸው ችግሮች በመብዛታቸው፣ የውጭ ርዳታ እየቀነሰ በመምጣቱ፣ ኮሚሽኑ ከውጭ ከሚያገኘው የርዳታ ድጋፍ በተጨማሪ የገቢ አቅሙን የሚያጠናክርባቸውን የተለያዩ ዕቅዶች ማዘጋጀቱን ብፁዕ አቡነ ሳሙኤል ጠቅሰዋል፤ የኮሚሽኑ የገቢ ምንጭ መምሪያ መደራጀቱንና የተጀመሩ ሥራዎችም እንዳሉ አመልክተዋል፡፡

የልማትና ክርስቲያናዊ ኮሚሽኑ፣ በአኹኑ ወቅት ከለጋሽ አካላት ጋራ ስላለውና በቀጣይ ስለሚኖረው ግንኙነት ሰንደቅ የጠየቃቸው ብፁዕ ሊቀ ጳጳሱ፣ የኮሚሽኑ እንቅስቃሴ ግልጽነትና ተጠያቂነት ያለበት በመኾኑ በየጊዜው ከለጋሽ ድርጅቶች አዎንታዊ ምላሽ እያገኘ እንዳለ ተናግረዋል፡፡ በተገበራቸውና ዘላቂነታቸው በተረጋገጡ የልማት ተቋማትና ለኅብረተሰቡ በሚሰጣቸው አገልግሎቶች ጥራት፣ በክርስቲያን በጎ አድራጎትና ልማት ድርጅት ጥምረት(CCRDA) በተደረገው የምርጥ ተሞክሮ ግምገማ፣ በአገሪቷ ከሚንቀሳቀሱ የበጎ አድራጎት ድርጅቶች መካከል ለሦስት ተከታታይ ዓመታት በቀዳሚነት አሸናፊ ኾኖ ለመሸለም መብቃቱን በዐብይ አስረጅነት ጠቅሰዋል፡፡


  • በተለያዩ ክልሎች 27 የማኅበረሰብ ልማት ፕሮጀክቶች፤

  • ከ10ሺሕ በላይ አሳዳጊ አልባ ሕፃናት ክብካቤ፤
  • በ18 የመጠለያ ጣቢያዎች ከ801ሺሕ በላይ ስደተኞች፤

በተለይ ኮሚሽኑ፣ የማኅበረሰብ ተጠያቂነት አጋርነት(Humanitarian Accountability Partnership) ማሕቀፍ አዘጋጅቶና አጽድቆ በመተግበሩና የሕፃናት ፖሊሲን ቀርፆና አጽድቆ በሥራ ላይ በማዋሉ ከአጋር ድርጅቶች ጋራ ያለው ግንኙነት የበለጠ ተጠናክሯል።

ከኹሉም የፕሮጀክት አጋሮች ጋራ ኮሚሽኑ ባለው የጋራ አጀንዳና በቀጣይ ስለሚኖረው የሥራ ግንኙነት በተመለከተ ከተወካዮቻቸው ጋራ በቅርቡ ለመወያየት ዕቅድ መያዙን በምላሻቸው የጠቆሙት ብፁዕነታቸው፣ የምክክር ቅድመ ዝግጅቶች በመጠናቀቅ ላይ እንደሚገኙ አስታውቀዋል፡፡

“ዋናው ጉዳይ፣ የታለመለትን ፕሮጀክት በጥራትና ዘላቂ ጥቅም በሚሰጥ መልኩ በጽናት ማከናወን ነው፤” ያሉት ብፁዕ ሊቀ ጳጳሱ አያይዘው እንደገለጹት፥ የክልል፣ የዞንና የወረዳ መንግሥታዊ መሥሪያ ቤቶችም፣ ኮሚሽኑ የተገበራቸውን የልማት ሥራዎችና በተጠቃሚው ኅብረተሰብ ላይ ያመጣውን ተጨባጭ ለውጥ በመመልከት ምስጋናና ዕውቅና እየቸሩት ይገኛሉ፤ ብለዋል፡፡

ከዛሬ 46 ዓመታት በፊት የተመሠረተውና በእንቅስቃሴውም አብዛኛውን የኢትዮጵያ አካባቢዎች(ክልሎች) በመሸፈን ላቅ ያለ ማኅበራዊ አገልግሎት በመስጠት ላይ የሚገኘው የልማትና ክርስቲያናዊ ተራድኦ ኮሚሽን፣ በኢ.ፌ.ዴ.ሪ የበጐ አድራጐት ድርጅቶችና ማኅበራት ኤጄንሲ ማቋቋሚያ ዐዋጅ ቁጥር 621/2001 መሠረት፣ በኢትዮጵያዊ ነዋሪዎች በጐ አድራጐት ድርጅትነት በምዝገባ ቁጥር 1560 ተመዝግቦ የማኅበራዊና የልማት ሥራዎችን በማከናወን ላይ ይገኛል፡፡

ሰንደቅ ጋዜጣ፣ በትላንት፣ ሚያዝያ 18 ቀን 2009 ዓ.ም. እትሙ ያስነበበውና ከኮሚሽኑ ሊቀ ጳጳስ ብፁዕ አቡነ ሳሙኤል ጋራ ያደረገው ቃለ ምልልስ ሙሉ ይዘት የሚከተለው ነው፡፡


በሀገር ውስጥ የሀብት ማሰብሳብ ከውጭ ጥገኝነት ለመላቀቅ እየሠራ ያለ ተቋም

የኢትዮጵያ ኦርቶዶክስ ተዋሕዶ ቤተ ክርስቲያን የልማትና ክርስቲያናዊ ተራድኦ ኮሚሽን፣ ከዛሬ 46 ዓመታት በፊት የተመሠረተና በእንቅስቃሴውም አብዛኛውን የኢትዮጵያ አካባቢዎች(ክልሎች) በመሸፈን ላቅ ያለ ማኅበራዊ አገልግሎት በመስጠት ላይ የሚገኝ ነው።

ኮሚሽኑ ከሚያደርጋቸው መጠነ ሰፊ የልማትና የርዳታ ሥራዎች ጋራ በተያያዘ፣ ለሦስት ተከታታይ ዓመታት በክርስቲያን በጎ አድራጎትና ልማት ድርጅት ጥምረት (CCRDA) በተደረገው የምርጥ ተሞክሮ ግምገማ፣ በአገራችን ከሚንቀሳቀሱ የበጎ አድራጎት ድርጅቶች መካከል በቀዳሚ አርኣያነት አሸናፊ ኾኖ ለመሸለም በቅቷል። በዚኽና መሰል ጉዳዮች ከኮሚሽኑ ሊቀ ጳጳስ ብፁዕ አቡነ ሳሙኤል ጋራ ባልደረባችን ፍሬው አበበ ያደረገው ቃለ ምልልስ እንደሚከተለው ተጠናቅሮ ቀርቧል።


ሰንደቅ፡- ኮሚሽኑ በቤተ ክርስቲያኒቱ መዋቅር ውስጥ ያለውን አደረጃጀት ቢገልጹልን?

ብፁዕነታቸው፡ የኢትዮጵያ ኦርቶዶክስ ተዋሕዶ ቤተ ክርስቲያን የልማትና ክርስቲያናዊ ተራድኦ ኮሚሽን፣ በሕግ ክፍል ማስታወቂያ 415/1964 በነጋሪት ጋዜጣ፣ ከታኅሣሥ 26 ቀን 1964 ዓ.ም. ጀምሮ በቤተ ክርስቲያን አስተዳደር ውስጥ ራሱን የቻለ መሥሪያ ቤት በመኾን ተቋቁሞ የሚሠራ ሲኾን፤ በኢትዮጵያ ፌደራላዊ ዴሞክራሲያዊ ሪፓብሊክ መንግሥት፣ የበጐ አድራጐት ድርጅቶችና ማኅበራት ኤጄንሲ ማቋቋሚያ ዐዋጅ ቁጥር 621/2001 መሠረት፣ በኢትዮጵያዊ ነዋሪዎች በጐ አድራጐት ድርጅትነት በምዝገባ ቁጥር 1560 ተመዝግቦ የማኅበራዊና የልማት ሥራዎችን በማከናወን ላይ የሚገኝ የበጐ አድራጐት ድርጅት ነው። ድርጅቱ፥ ጠቅላላ ጉባኤ፣ ቦርድና የአመራር አባላት ያሉት ኮሚሽን ነው።

በመኾኑም የልማት ኮሚሽን፣ ቤተ ክርስቲያን፣ የወገን ደራሽነቷን ለማረጋገጥ በድርቅ ለተጎዱ ወገኖች የነፍስ አድን ርዳታ በማድረግ ብሎም መልሶ በማቋቋምና በልማት በማገዝ ፈርጀ ብዙ አገልግሎት ሲሰጥ ቆይቶአል፤ አኹንም እየሰጠ ይገኛል።

ሰንደቅ፡- በአኹኑ ሰዓት የልማትና ክርስቲያናዊ ተራድኦ ኮሚሽን ዋና ዋና ትኩረቶች ምንድን ናቸው?

ብፁዕነታቸው፡- የምግብ ዋስትናን ለማረጋገጥ፥ የገጠር ኑሮ ማሻሻያ ፕሮጀክቶች የሚስፋፉበትን መንገድ መቀየስ፤ በገጠር የሚኖሩ ዜጐች የንጹሕ መጠጥ ውኃ ተጠቃሚ የሚኾኑበትን መንገድ መቀየስና መሥራት፤ የኤች.አይ.ቪ/ኤድስ በሽታን በመከላከልና በመቆጣጠር ረገድ የተቀናጀና የተጠናከረ ሥራ መሥራት፤ በሥነ ተዋልዶ ጤና ላይ የበኩሉን የሥራ ድርሻ ማበርከት፤ በእናቶችና ሕፃናት ሥርዓተ ምግብ ላይ ትርጉም ባለው መንገድ መሳተፍ፤ ስደተኞችን የመቀበልና ማስተናገድ ሥራን አጠናክሮ መቀጠል፤ ችግር ፈቺ የኾኑ የልማት ሥራዎችን በማጥናትና በፕሮጀክት በማካተት ሥራ ዐጥ ወጣቶችንና ችግረኛ ሴቶችን ተጠቃሚ በማድረግ ኢኮኖሚያዊና ማኅበራዊ ኑሮአቸው የተሻሻለ እንዲኾን ማገዝና የመሳሰሉት ናቸው።

በዱከም ከተማ በዘላቂ የአካባቢና የግል ንጽሕና አጠባበቅ ላይ ከተከናወኑ ሥራዎች

ሰንደቅ፡- በልማት የተለያዩ ዘርፎች በኮሚሽኑ የተከናወኑ ተግባራትና ተጨባጭ ውጤቶች ምን ምንድን ናቸው?

ብፁዕነታቸው፡- ኮሚሽኑ ከበርካታ ሀገር አቀፍና የውጭ በጎ አድራጐት ድርጅቶች ጋራ አጋርነት በመፍጠር፣ በአገሪቷ የተለያዩ ክልሎች የሚኖሩ አያሌ ማኅበረሰቦች ካሉባቸው ችግሮች እንዲላቀቁ በማድረግ ከመንግሥትና ከሕዝብ ጎን በመኾን አመርቂ ውጤቶችን ማስመዝገብ ችሏል።

ይኸውም በበርካታ ወረዳዎች የገጠር ልማት ፕሮጀክቶችን በመተግበር፥ በመስኖ፣ በንጹሕ መጠጥ ውኃ፣ የተሻሻሉ የግብርና ዘዴዎችን በማዝለቅ፣ በገቢ ምንጭ ተግባራት፣ በአቅም ግንባታ፣ የአካባቢ ጥበቃ፣ በማኅበረሰብ የአደጋ ጊዜ መቋቋሚያና መጠባበቂያ ፈንድ ማኅበራትን በመመሥረትና በማጠናከር፣ በሥርዓተ ምግብ አጠቃቀም፣ በሥነ ተዋልዶ ጤና፣ በፀረ-ኤች.አይ.ቪና በመሳሰሉት የበኩሉን አስተዋፅኦ በማበርከት ላይ ይገኛል።


በሌላ በኩል፣ በኮሚሽኑ ሥር ባለው የስደተኞችና ከስደት ተመላሾች መምሪያ አማካይነት፣ ከጐረቤት ሀገራት ተሰደው የሚመጡትንና ከስደት ተመላሾችን፣ ኮሚሽኑ ባቋቋመው የስደተኛ ካምፖች በመቀበል አስፈላጊውን ሰብአዊና ማኅበራዊ አገልግሎቶች እንዲያገኙ አድርጓል። ለዚህም፣ ልማት ኮሚሽኑ በተገበራቸው ዘላቂነታቸው በተረጋገጡ የልማት ተቋማትና ለኅብረተሰቡ በሚሰጣቸው አገልግሎቶች ጥራት፣ በክርስቲያን በጎ አድራጎትና ልማት ድርጅት ጥምረት(CCRDA) በተደረገው የምርጥ ተሞክሮ ግምገማ፣ በአገሪቷ ከሚንቀሳቀሱ የበጎ አድራጎት ድርጅቶች መካከል ለሦስት ተከታታይ ዓመታት በቀዳሚነት አሸናፊ ኾኖ ለመሸለም መብቃቱ በዐብይ አስረጅነት ሊጠቀስ ይችላል።

በተጨማሪም በመንግሥት የክልል፣ የዞንና የወረዳ መሥሪያ ቤቶች የልማት ኮሚሽናችን በተገበራቸው የልማት ሥራዎች፣ በተጠቃሚው ኅብረተሰብ ላይ ያመጣውን ተጨባጭ ለውጥ በመመልከት ምስጋናና ዕውቅና እየቸሩን ይገኛሉ።

ሰንደቅ፡- በክርስቲያናዊ ተራድኦ ረገድ፣ በተለይም ከአየር ንብረት ለውጥና ከድርቅ ጋራ በተያያዙ የተፈጥሮ አደጋዎች ኮሚሽኑ የፈጸማቸውን ጉዳዮች ቢዘረዝሩልን?

ብፁዕነታቸው፡- ልማት ኮሚሽኑ፣ በአኹኑ ሰዓት ለዓለም አስጊ ለኾነው የአየር ለውጥ ችግር ከፍተኛ ትኩረት በመስጠት፣ የአየር ለውጥ አሉታዊ ተጽዕኖዎችን ለመቋቋም የሚያስችሉ የልማት ሥራዎችን በፕሮጀክት ጥናቶቹ በማካተት ተግባር ላይ እያዋለ ነው። ይኸውም ለተጠቃሚ አርሶ አደሮች የአየር ለውጥ መቋቋም የሚችሉ የሰብል ዝርያዎችን በማቅረብና በማከፋፈል፤ የመስኖ ልማትን በማስፋፋት፤ የተፈጥሮ ሀብት ክብካቤና ጥበቃ ሥራን በማጠናከር የጎላ ተግባር እያከናወነ ነው።

ልማት ኮሚሽኑ ለቤተ ክርስቲያን ደን ልማትና ጥበቃ ከምንጊዜውም በላይ ትኩረት በመስጠት፣ የቤተ ክርስቲያን ደን ፕሮጀክት አጥንቶ በአጋርነት የሚሠራ ድርጅት በማግኘቱ፣ በተመረጡ ገዳማት ላይ የደን ጥበቃና ማስፋፋት ሥራን መሠረት በማድረግ፣ የተራቆቱ መሬቶች በደን የሚሸፈኑበትን ኹኔታ ለማስቻል ደረጃ በደረጃ የተለያዩ ተግባራትን እያከናወነ ይገኛል።

በተጨማሪም ኮሚሽኑ፣ የባዮ ጋዝ ቴክኖሎጅና የሶላር መብራት ተከላ፣ በ15 ገዳማት ያከናወነ ሲኾን፣ ለወደፊቱም በሰፊው የሚሠራበት የልማት መስክ ኾኖ የሚቀጥል ይኾናል።


የልማት ኮሚሽኑ፣ በድርቅ ለተጎዱ አካባቢዎች የንጹሕ መጠጥ ውኃ ተቋማትን በመገንባትና የመስኖ ልማት በማስፋፋት ወደፊት በድርቅ ሳቢያ የሚከሠቱ ችግሮችን ለመቋቋም የሚያስችሉ ሥራዎችን በአፋር እና በሰሜን ሸዋ የአፋር አዋሳኝ ወረዳዎች እና በሌሎችም ላይ በሰፊው በማከናወን ላይ ይገኛል።

ሰንደቅ፡- በኮሚሽኑ የማኅበረሰብ ልማት ሥራዎች ውስጥ፣ የሕዝቡ ተሳትፎ ምን ይመስላል?

ብፁዕነታቸው፡- ልማት ኮሚሽኑ ሥራውን እስከ ታች አውርዶ ለመሥራት የሚያስችል የልማት ማስተባበሪያ ጽ/ቤቶች በክልል እና በዞን ከተሞች ስላሉት በእነርሱ አማካይነት ሥራውን ማኅበረሰቡን መሠረት አድርጎ ለማከናወን ምቹ ኹኔታ ተፈጥሮለታል።


በመኾኑም ኮሚሽኑ በሚንቀሳቀስባቸው የፕሮጀክት ወረዳዎችና ቀበሌዎች ሥራውን ለማስተዋወቅም ኾነ ከሕዝብ ጋራ ለመሥራት ምቹ መንገድ በመኖሩና ኮሚሽኑ በሕዝብ ዘንድ ከፍተኛ ተቀባይነት ስላለው የማኅበረሰቡ የልማት ተሳታፊነት በጣም ከፍተኛ ነው። የልማት ሥራዎቻችን በዘለቄታዊነት አገልግሎት እየሰጡ ያሉት፣ የማኅበረሰቡ ተሳትፎ ስለታከለበት ነው፤ ይህም በግልጽ የሚታይ እውነት ነው።

ሰንደቅ፡- የስደተኞችንና ከስደት ተመላሾችን፣ መሠረታዊ ፍላጎት በማሟላትና መልሶ በማቋቋም በኩል በኮሚሽኑ ሥራዎች የተገኙትን ውጤቶች ቢያብራሩልን?

ብፁዕነታቸው፡- የኢትዮጵያ ኦርቶዶክስ ተዋሕዶ ቤተ ክርስቲያን የልማትና ክርስቲያናዊ ተራድኦ ኮሚሽን፣ ስደተኞችንና ከስደት ተመላሾችን በመቀበልና አስፈላጊውን ርዳታ በማድረግ በሀገሪቱ ቀደምት ታሪክ ያላት ስትኾን ከአምስት ዐሥርት ዓመታት በላይ አገልግሎቱን እየሰጠች ትገኛለች። የሀገሪቱ መንግሥትና የተባበሩት መንግሥታት ድርጅት ለስደተኞችና ከስደት ተመላሾች በተቀናጀ ኹኔታ አገልግሎት መስጠት ሳይጀመሩ፣ ቤተ ክርስቲያኒቱ ይህን አገልግሎት በቀዳሚነት መስጠቷን ያሳያል። በነበሩት የድጋፍ ጊዜያትም ለሰው ልጅ ሕይወት አስፈላጊ የኾኑና መሠረታዊ ፍላጎቶችን ያማከለ ድጋፍና ርዳታ መስጠት ተችሏል።

በሒደትም የቤተ ክርስቲያንዋ የማኅበራዊ ረድኤት ክንፍ የኾነው የልማትና ክርስቲያናዊ ተራድኦ ኮሚሽን፣ በ1964 ዓ.ም. በሕግ ሲቋቋም፣ የስደተኞችና ተመላሾች ጉዳይ እንደ አንድ የሥራ ዘርፍ በማካተት በርካታ ተግባራትን ለመፈጸም በቅቷል።የስደተኞችና ተመላሾች ጉዳይ መምሪያ፣ በልማትና ክርስቲያናዊ ተራድኦ ኮሚሽን ሥር በመኾንና የራሱን አስተዳደር በማቋቋም የተለያዩ ተግባራትን በማከናወን ላይ ይገኛል።

በዚኽም መሠረት ኮሚሽኑ፥ ከመንግሥት፣ ከተባበሩት መንግሥታት ድርጅትና ከሌሎች ዓለም አቀፍ በጎ አድራጎት ድጋፍ ሰጪ ድርጅቶችጋ በጋራ በመኾን በዐዲስ አበባና አካባቢዋ ባሉ ከተሞችና በአራቱም የሀገሪቱ አቅጣጫ በሚገኙ 18 የመጠለያ ጣቢያዎች አማካይነት ቁጥራቸው በየጊዜው የሚለያይ ቢኾንም፣ በአኹኑ ሰዓት ከ801 ሺሕ በላይ ለሚኾኑ የተለያዩ ሀገር ስደተኞች ማለትም፦ ከደቡብ ሱዳን፣ ከሶማልያ፣ ከየመን፣ ከኤርትራ፣ ከኮንጎ፣ ከሱዳን፣… ወዘተ ለመጡ ስደተኞች የተለያዩ ድጋፎችን በመስጠት ላይ ይገኛል።

ኮሚሽኑ ለስደተኞች፥ የመጠለያ፣ የምግብ፣ የአልባሳት፣ የገንዘብ፣ የጤና፣ የማኅበራዊና የሥነ ልቡና ምክር፣ የትምህርትና የሞያ ክህሎት ሥልጠና ድጋፍና የመሳሰሉትን አገልግሎቶችን ይሰጣል። በተጨማሪም ስደተኞች ቤታቸው እንዳሉ ኾነው እንዲሰማቸው ለማድረግ የሚኖሩበት መጠለያና አካባቢው ምቹ እንዲኾን ከፍተኛ ጥረት ያደርጋል። የአካባቢ ክብካቤ፣ የአካባቢና የግል ንጽሕና እንዲጠበቅ እንዲኹም የመጡበትን ዐዲስ አካባቢ እንዲላመዱ የማስተማርና የማሳወቅ ሥራዎች በሰፊው ይከናወናሉ።


በመኾኑም ስደተኞች በሚሰጣቸው የትምህርትና የሞያ ክህሎት ድጋፍ የበርካታ ሞያዎች ባለቤት ኾነው የተለያዩ የገቢ ምንጮች የሚያስገኙ ሥራዎች ላይ ተሰማርተው ራሳቸውን በማቋቋም ላይ ይገኛሉ። በተጨማሪም ስደተኞችን ከቤተሰብ ጋራ በማገናኘት ከፍተኛ ጥረት የሚያደርግ ሲኾን፣ ለዚህም አስፈላጊውን ድጋፍ ይሰጣል።

በአራቱም የሀገሪቱ ክፍሎች ለሚገኙ ስደተኞች የተለያዩ ቁሳቁሶች ድጋፍ፤ በኤች.አይ.ቪ/ኤድስ ድጋፍና ክብካቤ፣ በግጭት አፈታት፣ በፆታ ጥቃት ዙሪያ የተለያዩ የግንዛቤ ማስጨበጫ ሥራዎችንም ይሠራል።

ሰንደቅ፡- ኮሚሽኑ ከቤተ ክርስቲያኒቱ የተለያዩ አካላትና ከመሰል አገራዊና የውጭ ተቋማት ጋራ ያለው ቅንጅትና መተባበር ምን ይመስላል?

ብፁዕነታቸው፡- የልማት ኮሚሽኑ በሚተገብራቸው የልማት ሥራዎችና በሚሰጣቸው አገልግሎቶች ጥራት ከሌሎች ልቆ እስከ መሸለም የበቃው ከሌሎች የልማት አጋሮች ጋራ ተናቦ፣ ተቀናጅቶና ተባብሮ በመሥራቱ ነው። ዘላቂ ልማትን ማምጣት የሚቻለው ከኹሉም ባለድርሻ አካላት ጋራ ተቀናጅቶና ተባብሮ መሥራት ሲቻል እንደኾነ የታወቀ ነው። 

ኮሚሽኑ ይህን መርሖ በዋናነት በመከተል በግልጽነትና በተጠያቂነት በመንቀሳቀስ በአነስተኛ በጀት ታላላቅ የልማት ሥራዎችን በመገንባት እውን እያደረገ ይገኛል። በመኾኑም ኮሚሽኑ የከፈታቸው የልማት የማስተባበሪያ ጽ/ቤቶችም ኾነ የፕሮጀክት ጽ/ቤቶች በሚሠሩባቸው አካባቢዎች፣ ከኹሉም የልማት ባለድርሻ አካላት ጋራ መልካም ግንኙነት ያላቸው ከመኾኑም በተጨማሪ፣ በፕሮጀክት ሥራ መልክአ ምድራቸው አስቸጋሪ በኾኑ ሥፍራዎች ኹሉ የተለያዩ የልማት ተግባራትን በማከናወንና ተጨባጭ ለውጥ በማምጣት የካበተ ልምድ ስላላቸው በየፎረሙም በተምሳሌነት የሚቀርቡ ኾነዋል።

ሰንደቅ፡- የኮሚሽኑ ፕሮጀክቶችና እንቅስቃሴዎች፣ በሀገራዊ ሽፋን ያላቸው ሥርጭት የተመጣጠነ ነው?

ብፁዕነታቸው፡- አዎን! በእኛ በኩል ሙሉ በሙሉ ባይኾን እንኳ ፕሮጀክቶች ያላቸው ሥርጭት በአብዛኛው የተመጣጠነ እንደኾነ እምነታችን ነው። ኮሚሽኑ በአኹኑ ሰዓት በሚያካሒዳቸው 27 የሚኾኑ የልማት ፕሮጀክቶችና በ18 የስደተኞች መቀበያ ካምፕ አማካይነት በኹሉም ክልሎች በሚገኙ የፕሮጀክት ወረዳዎች ላይ እየሠራ ይገኛል።

ይኸውም በጋምቤላ ክልል፥ ጋምቤላ ዙሪያ ወረዳ፣ ፊኝዶ፣ ተርኪዲ፣ ኩሌ፣ ሆኮቡ፤ በቤሻንጉል ጉሙዝ ክልል፥ በከማሽ፣ በኩርሙክ፣ በሸርቆሌ፣ በባምፓሲ፣ በቶንጎ፤ በአፋር ክልል፥ በአርጎባ ልዩ ዞን፣ ሰሙ ሮቢ፣ ዱለቻ፤ በኦሮሚያ ክልል፥ በጉርሱም፣ በጃርሶ፣ በአርሲ ሮቤ፣ በቄለም ወለጋ፤ በሶማሌ ክልል፥ በጅግጅጋ፣ በሸደር፣ በቀብሪበያህ፣ በአውበሮ፣ በኮቤ፣ በመልካ ጂዳ፣ በሔለወይኒ፣ በቆልማንዩ፤ በአማራ ክልል፥ በሊቦ ከምከም፣ በአንኮበር፣ በጊሼ ራቤል፣ በዳውንት፣ በበርኸት፤ በትግራይ ክልል፥ በክልተ አውላዕሎ፣ በእንደርታ፣ በሽመልባ፣ በአደ አርሹ፣ በእፀጽ፤ በደቡብ ክልል፥ በጉራጌ፣ በሙዑር፣ በቡታጀራ፣ በወልቂጤ፣ በሲዳማ፣ በጌዲዮ፣ በይርጋ ዓለም፣ በአለታ ወንዶ፣ በሃላባ፣ በአርባ ምንጭ በ10 ወረዳዎች የኤች.አይ.ቪና የሥነ ተዋልዶ ጤና ሥራዎች፤ ከዚህ በተጨማሪ ኮሚሽኑ በኹሉም ክልሎች በ150 ወረዳዎች ላይ የኤች.አይ.ቪ እና የሥነ ተዋልዶ ጤና ሥራዎች ያከናውናል።

ሰንደቅ፡- ኮሚሽኑ በተለያዩ ክልሎች ሲያከናውናቸው የቆያቸው የልማት ፕሮጀክቶች እየተዘጉ እንደኾነ ይነገራል፤ ፕሮጀክቶቹ የሚዘጉበት አልያም የሚቋረጡበት ምክንያት ምንድን ነው?

ብፁዕነታቸው፡- ፕሮጀክቶች በተፈጥሮአቸው የጊዜ ገደብ አላቸው፡፡ ይኹንና በኮሚሽኑ የሚቀረፁ ፕሮጀክቶች እስከ ታች የሚዘልቁትን የልማት ማስተባበሪያ ጽ/ቤቶችን፤ የፕሮጀክት ጽ/ቤቶችንና የማኅበረሰብ ማኅበራትን በመጠቀም ኅብረተሰቡን ያሳተፈ የፕሮጀክት አፈጻጸም ሒደት በመከተል ኅብረተሰቡ የተለያዩ ሕግጋትንና ደንቦችን እንዲያወጣ በማገዝ ፕሮጀክቶቹ በዘለቄታነት የሚቀጥሉበትን ኹኔታ እያመቻቸ በራሱ በኅብረተሰቡ እየተመራ የሚከናወኑ የፕሮጀክት ዓይነቶች ናቸው።

ፕሮጀክቶች ዘላቂ በኾነ መልኩ እንዲቀጥሉ የሚከተሉት ዝርዝር ተግባራት ይከናወናሉ። ተጠቃሚው ኅብረተሰብ፥ በፕሮጀክት ጥናት፣ ዕቅድ፣ ክንውን፣ ክትትልና ግምገማ እንዲሳተፉ ይደረጋሉ። በዕቅድ ዝግጅት ወቅት የኅብረተሰቡ ማኅበራዊ ድርጅቶች፣ በየደረጃው የሚገኙ የአካባቢ አመራሮች… ወዘተ በፕሮጀክት ሒደት ውስጥ ያላቸው ድርሻ በግልጽ እንዲቀመጥ ይደረጋል። የፕሮጀክቱን መጀመር የሚያበሥር ዓውደ ጥናት ይዘጋጃል፡፡ ከዚህም ጋራ ተያይዞ የእያንዳንዱ የሥራ ድርሻ በግልጽ ለውይይት ይቀርባል። የፕሮጀክት ተግባራትም እንደተጠናቀቁ የሚመለከተው ባለድርሻ አካል በወቅቱ በሕጋዊ የርክክብ ሰነድ ተረክቦ እንዲያስተዳድራቸው ይደረጋል።

ሰንደቅ፡- አንዳንድ ምግባረ ሠናይ ድርጅቶች፣ የበጎ አድራጎት ማኅበራት ሕግ አላሠራ እንዳላቸው ይጠቅሳሉ፤ በዚኽ ረገድ ኮሚሽኑ የገጠመው ችግር ይኖር ይኾን?

ብፁዕነታቸው፡- ኮሚሽናችን ከ46 ዓመታት በላይ በሥራ ላይ የቆየ ነው። በዕድሜው ሦስት መንግሥታት ተፈራርቀዋል። በእነዚህ ዘመናት ሕጎች ተለዋውጠዋል። ኮሚሽኑ ኹሉንም እንደ አመጣጡ አስተናግዷል። ፈቃድ ሰጪው አካል ቀድሞ በፍትሕ ሚኒስቴር ነበር፡፡ አኹን ራሱን የቻለ ኤጀንሲ ተቋቁሞ የራሱን ሕግ ይዞ እየሠራ ነው።

በእኛ በኩል ቀድሞውንም እንቅስቃሴያችን፥ ተጠቃሚውን መሠረት ያደረገ በመኾኑ የገጠመን የጎላ ችግር የለም። 70 በ30 የሚለውን ሕግ ቀድመን ተግብረነዋል፤ ነገር ግን ይህ 10 በ90(10 ከመቶ በላይ ከውጭ ለጋሾች ገንዘብ መቀበል አይቻልም) የሚለው የውጭ ለጋሽ ድርጅቶች ብዙም አልተቀበሉትም። እርሱ ነው ተጽዕኖ እየፈጠረ ያለው። ሕጉ፥ የሀገሪቱንና የረጂዎችን ኹኔታ ግምት ውስጥ ያስገባ አይደለም።

ለእኛ ግን ትልቁ ተጽዕኖ ይህ አይደለም። የእኛ ትልቅ ተጽዕኖ፣ ሕዝባችን ከተረጂነት መላቀቅ አለመቻሉ ነው። የውጭ እጅ ማየት የትም አያደርስም። የጠባቂነት መንፈስ ያሳድራል። ከጠባቂነት መንፈስ ተላቅቀን ባለን ሀብት መጠቀም መጀመር አለብን።

የረጂዎችንም ኹኔታ ስንመለከት፣ ቅድሚያ የሚሰጧቸው ችግሮች በዓለም ዙሪያ እየበዙ መጥተዋል። ሩቅ ሳንሔድ እዚኹ ጎረቤቶቻችን ሱዳንና ሶማልያ በየዕለቱ ሰዎች እየሞቱ፣ እየተሰደዱ ረጂዎች ለእኛ ቅድሚያ ሰጥተው እጃቸውን ሊዘረጉልን አይችሉም። በዚህ ምክንያት ከልመናና ከፈረንጅ ጥገኝነት ለመላቀቅ መሥራት ይኖርብናል። ዓለም አቀፍ ርዳታ ለተወሰነ ጊዜ ከችግር ለመውጣት ሊጠቅመን ይችላል፤ ለሽግግር ጊዜ ሊረዳን ይችላል፤ በዘላቂነት ግን የሚጠቅመን አይደለም።

ሰንደቅ፡- ለልማትና ለርዳታ የሚውል ሀብት ከሀገር ውስጥ ለማሰባሰብ ዕቅድ አላችኹ?

ብፁዕነታቸው፡- በትክክል፤ ምንም ዓይነት የውጭ ተጽዕኖ የሌለበት ሕግና ደንብ አውጥተናል። የአዲስ አበባ ዩኒቨርሲቲን ጨምሮ ከሌሎች ምሁራን ጋራ በዚኽ ጉዳይ ሕግና ደንብ አዘጋጅተናል። በቀጣይ ለቅዱስ ሲኖዶስ ቀርቦ ውሳኔ ሲያገኝ በሥራ ላይ የሚውል ይኾናል። ይህ ጥናት ከውጭ ጥገኝነት አላቅቆን ራሳችን እንድንችል የሚረዳን ይኾናል ብለን እናስባለን።

በአኹኑ ሰዓት የኢትዮጵያ ኦርቶዶክስ ተዋሕዶ ቤተ ክርስቲያን ወደ 10ሺሕ ያኽል ሕፃናትን ትከባከባለች። ከሕፃናቱ መካከል አሳዳጊ አልባዎች አሉ። ቤተሰቦቻቸውጋ እንዳሉ የሚረዱ አሉ። ለእነዚኽ የምናገኘው ርዳታ በአኹኑ ሰዓት በግማሽ ቀንሷል። ምን እናድርግ ብለን አይተነዋል። በሐሳብ ደረጃ፥ አንድ ምእመን አንድ ልጅ በፈቃደኝነት ቢይዝ ብለን ብዙ ሕፃናትን መርዳትና መደገፍ እንደሚቻል አይተናል። በአኹኑ ወቅት በጉዲፈቻ ወደ ውጭ የሚሔዱ ሕፃናት ምን አሳዛኝ ኹኔታ እየደረሰባቸው እንደኾነ እናውቃለን። ይህ ችግር እንዲቆም እዚኹ በሀገራችን ልንረዳዳና ልንደጋገፍ ይገባናል።

ሰንደቅ፡- ኮሚሽኑ በአኹኑ ወቅት ከለጋሾች ጋራ ያለውን ግንኙነትና የወደፊት ዕቅዱን ቢጠቁሙን?

ብፁዕነታቸው፡- የልማት ኮሚሽኑ በአኹኑ ወቅት ከለጋሽ ድርጅቶች ጋራ ያለው ግንኙነት በመልካምና በተሻለ ኹኔታ ላይ ይገኛል። ዋናው ጉዳይ፣ ለሚረዱን ድርጅቶች፣ ለመንግሥትና ለተጠቃሚ ማኅበረሰብ ታማኝ ኾኖ በመገኘት የታለመለትን ፕሮጀክት በጥራትና ዘላቂ ጥቅም በሚሰጥ መልኩ በጽናት ማከናወን ነው።

የልማት ኮሚሽኑም ዋነኛ ዓላማ፣ የኅብረተሰቡ ኑሮ ተሻሽሎ ማየትና ለተሻለ ዕድገት ማብቃት በመኾኑ በዚኹ ረገድ ጠንክሮ እየሠራ ይገኛል። ግልጽነትና ተጠያቂነት ባለበት ኹኔታ የሚንቀሳቀስ በመኾኑ በየጊዜው ከለጋሽ ድርጅቶች አዎንታዊ ምላሽ ሲያገኝ ቆይቷል፤ አኹንም እያገኘ ይገኛል።

በተለይ ኮሚሽኑ፣ የሕፃናት ፖሊሲን ቀርፆና አጽድቆ በሥራ ላይ ማዋሉና የማኅበረሰብ ተጠያቂነት አጋርነት(Humanitarian Accountability Partnership) ማሕቀፍ አዘጋጅቶና አጽድቆ በመተግበሩ ከአጋር ድርጅቶች ጋራ ያለውን ግንኙነት የበለጠ አጠናክሯል።

ኮሚሽኑ በቅርቡ፣ የኹሉንም የፕሮጀክት አጋሮች ተወካዮችን በመጋበዝ ባለን የጋራ አጀንዳና በቀጣይ ስለሚኖረው የሥራ ግንኙነት በተመለከተ ለመወያየት ዕቅድ በመያዝ ቅድመ ዝግጅቶችን በማጠናቀቅ ላይ ይገኛል።

ሰንደቅ፡- ኮሚሽኑ በአኹኑ ሰዓት የራሱ የኾነ የገቢ ምንጭ ለማጠናከር ምን እየሠራ ነው?

ብፁዕነታቸው፡- ኮሚሽኑ ከውጪ ከሚያገኘው የርዳታ ድጋፍ በተጨማሪ በገቢ ራሱን ለማጠናከር እንዲቻል ዓላማው አድርጎ እየተንቀሳቀሰ ነው፤ ይልቁንም በአኹኑ ጊዜ በዓለም ዙሪያ በተከሠተው የኢኮኖሚ ቀውስ ምክንያት የውጭ ርዳታ በእጅጉ እየቀነሰ የመጣ ስለኾነ የተለያዩ የገቢ ምንጭ ዕቅዶችን ማዘጋጀትና መሥራት ግዴታ ኾኗል። በዚኹ መሠረት ኮሚሽኑ የገቢ ምንጭ መምሪያ አደራጅቶ ሥራ ጀምሯል።

በቃሊቲ አካባቢ ከሚገኘው የኮሚሽኑ ጋራዥና መጋዘን እንዲኹም የከርሰ ምድር መቆፈሪያ ሪግ ማሽንን ጨምሮ ለዚኹ ተግባር በማዋል የገቢ አቅሙን ለማሳደግ ጥረት እያደረገ ነው።

የከርሰ ምድር መቆፈሪያ ሪግ ማሽን

በተጨማሪም፣ አንድ የሻማ ማምረቻ ፋብሪካና በኹለት ቦታዎች ላይ የታሸገ የንጹሕ የመጠጥ ውኃ የሚያመርቱ ፋብሪካዎችን ለማቋቋም መሠረታዊ ጥናቶችን በማድረግ ላይ ይገኛል።

ሰንደቅ፡- ኮሚሽኑ በእንጦጦ አካባቢ የሆስፒታል ግንባታ ዕቅድ እንዳለው ይታወቃል፤ ሒደቱ በምን ደረጃ ላይ እንዳለ ማወቅ ይቻላል?

ብፁዕነታቸው፡- ቤተ ክርስቲያን፣ ከ46 ዓመት በፊት የልማት ኮሚሽኑን ስታቋቁም፥ ወደ ኢትዮጵያ የሚመጡ ስደተኞችን ለመርዳት፣ አባት እናት የሌላቸውንና ጧሪ ቀባሪ የሌላቸውን ምእመናን ከውጭና ከውስጥ በሚገኝ የገንዘብና የቁሳቁስ ድጋፍ እንዲያገኙ ማድረግ ነው።

ቤተ ክርስቲያን፥ በገዳማት፣ በአድባራትና በገጠር አብያተ ክርስቲያናት አካባቢ ጥቅም ላይ ያልዋለ ብዙ መሬት ስላላት መሬቱን በማልማት ገዳማቱና ኅብረተሰቡ ከልማቱ ውጤት እንዲጠቀሙ ማድረግ፤ እንዲኹም በየአካባቢው የትምህርት ቤትና የጤና አገልግሎቶች እንዲሰጡ ከመንግሥት ጋር በመተባበር መሠረተ ልማት ማካሔድ አንዱ ተግባሯ ነው። ይህን የጤና አገልግሎት ለማስፋፋትና ለማዳበር በቅርቡ በእንጦጦ አካባቢ አንድ ራሱን የቻለ ከፍተኛ ሆስፒታል ተቋቁሞ በዓይነትና በጥራት አገልግሎት እንዲሰጥ ዕቅድ ወጥቷል።

ሆስፒታሉ በዓይነቱም ኾነ በባሕርይው የተለየ ከመኾኑም ባሻገር የግንባታው ወጪ ከ370ሺሕ የአሜሪካን ዶላር በላይ ሲኾን፣ በኢትዮጵያ ብር ሲተመን ደግሞ ከ8 ነጥብ 5 ቢሊዮን ብር በላይ ግምት ተይዞለታል። ሥራው በሚጀምርበት ጊዜም ለ2ሺሕ100 ቋሚና ለ369 ጊዜአዊ በጥቅሉ ለ2ሺሕ469 ሰዎች የሥራ ዕድል ይፈጥራል።

ሆስፒታሉ፣ የልዩ ልዩ በሽታዎች መታከሚያና ማገገሚያ ክፍሎችና መሣሪያዎች ይኖሩታል፡፡ የዓለም አቀፍ ድርጅቶችን፣ የዲፕሎማቲክና የኤምባሲ ሠራተኞችንና ከልዩ ልዩ አካባቢዎች የሚመጡ ሕመምተኞችን ለማከም ከ200 በላይ አልጋዎች ይኖሩታል።

ቅድመ ጥናቱ እንደሚያሳየው፣ ይህ በቀጥታ በኢትዮጵያ በኦርቶዶክስ ተዋሕዶ ቤተ ክርስቲያንና በአሜሪካን ሀገር ከሚገኝ ሌዠንደር ኮርፕ ከተሰኘ ድርጅት ጋራ በአጋርነት የሚቋቋመው ሆስፒታል፣ የውጭ ምንዛሬን በማስገኘትና በአገሪቱ ውስጥ የቱሪዝምን አገልግሎት ለማስፋፋት እንደሚረዳ ይታመናል።

የአሜሪካ መንግሥትና በአሜሪካ ውስጥ ያሉ አበዳሪ ድርጅቶች፣ ብድሩንም ኾነ ለብድሩ ዋስትና ለመስጠት ሓላፊ እንደሚኾኑ ቃል ገብተዋል። በኢትዮጵያ በኩል፣ ግንባታውንና ከውጭ የሚገኘውን መዋዕለ ነዋይ እውን ለማድረግ፣ በእንጦጦ አካባቢ ያለውና ለዚኹ ጉዳይ የተከለለው መሬት ለአገልግሎቱ እንዲውል ከሚመለከተው አካል ፈቃድ ለማግኘት በሒደት ላይ እንገኛለን።

 

ጠቅላይ ቤተ ክህነት: የ100ሺሕ ብር ካሳ ይከፈለኝ በሚል በሰንደቅ ጋዜጣ ላይ በመሠረተው የፍትሐ ብሔር ክሥ ተረታ


የፌዴራል የመጀመሪያ ደረጃ ፍ/ቤት ቂርቆስ ምድብ ኹለተኛ ፍትሐ ብሔር ችሎት፣ በከሣሽ የኢትዮጵያ ኦርቶዶክስ ተዋሕዶ ቤተ ክርስቲያን መንበረ ፓትርያርክ ጠቅላይ ቤተ ክህነት ጽ/ቤት እና በተከሣሽ የሰንደቅ ጋዜጣ ዋና አዘጋጅ አቶ ፍሬው አበበ መካከል፣ በስም ማጥፋት ክሥ ጉዳይ የነበረውን የፍትሐ ብሔር ክርክር ሲመለከት ቆይቶ፣ ዛሬ፣ ሚያዝያ 17 ቀን 2009 ዓ.ም. ውሳኔ ሰጠ፡፡

ፍ/ቤቱ የግራና ቀኙን ክርክር በመመርመር፣ በቤተ ክርስቲያን ላይ የደረሰ የስም ማጥፋት የለም፤ ስለዚኽም ተከሣሹ አቶ ፍሬው አበበ የሚከፍሉት ካሳ የለም፤ በማለት ተከሣሽን በነጻ አሰናብቶታል፡፡

ለክሡ መነሻ የኾነው፣ በሰንደቅ ጋዜጣ፣ 11ኛ ዓመት ቁጥር 551፣ ረቡዕ መጋቢት 21 ቀን 2008 ዓ.ም፣ «ፓትርያርኩ ለኢትዮጵያ የደኅንነት፣ ለምእመናን የድህነት ስጋት» በሚል ርእስ በዲያቆን ዳንኤል ክብረት የተጻፈውን ጹሑፍ ጋዜጣው በማተሙ ምክንያት፣ ጠቅላይ ቤተ ክህነቱ፣ ጹሑፉ፥ የፓትርያርኩን መልካም ሰምና ዝና ያጠፋ ነው፤ በማለት ዋና አዘጋጁ የ100 ሺሕ ብር የኅሊና ጉዳት ካሳ እንዲከፍላቸው ክሥ መመሥረታቸው ነው፡፡

ተከሣሽ ለፍ/ቤቱ ካቀረባቸው የመጀመሪያ ደረጃ መቃወሚዎች መካከል፣ «የጠቅላይ ቤተ ክህነት ጽ/ቤት፣ ፓትያርኩን ወክሎ የስም ማጥፋት ክሥ ሊመሠረት አይችልም፤ አያገባውም» በሚል ያቀረበውን መቃወሚያ ፍ/ቤቱ ተቀብሎ፣ በክሡ ውስጥ ፓትርያርኩን የሚመለከት ጉዳይ ወጥቶና ክሡ ተሻሽሎ እንዲቀርብ በሰጠው ብይን መሠረት ክሡን አሻሽሎ አቅርቧል፡፡

ዳኛ ዮሲያድ አበጀ የተሠየሙበት ፍ/ቤት፣ በክሡ ላይ ግራና ቀኝ ወገኖችን ሲያከራክር ከቆየ በኋላ ተከሣሽ በጋዜጣው ላይ ያቀረበው ጹሑፍ፣ የስም ማጥፋት ይዘት የለውም፤ በዚኽም ምክንያት የሚከፍለው ካሳ የለም፤ በማለት ውሳኔ ሰጥቶ ጋዜጠኛውን በነጻ አሰናብቷል፡፡

ቀደም ሲል፣ የፌዴራል የመጀመሪያ ደረጃ ፍ/ቤት ቂርቆስ ምድብ 2ኛ ወንጀል ችሎት፣ በጠቅላይ ቤተ ክህነቱ የቀረበለትን የስም ማጥፋት ወንጀል ክሥ ሲመለከት ቆይቶ፣ ጥር 17 ቀን 2009 ዓ.ም በሰጠው ውሳኔ፣ የጠቅላይ ቤተ ክህነቱን ክሥ ውድቅ በማድረግ ጋዜጠኛ ፍሬው አበበን በነጻ እንዳሰናበተ መዘገቡ የሚታወስ ነው፡፡

ዳኛው፣ በንባብ ያሰሙት የችሎቱ ውሳኔ ከ15 ገጾች ባላነሰ የተዘጋጀ ሲሆን፣ በቀጣይ ዝርዝር ዘገባ የሚቀርብበት ይኾናል፡፡

ፓትርያርኩ ተሸነፉ? “ሙስናን ተዉ፤ ማለት ከአንበሳ አፍ ሥጋ እንደ መንጠቅ ነው፤ አቅሙም ጉልበቱም የለንም” አሉ

  • ሙስናን ለማስቀረት፣ በቤተ ክርስቲያን ምንም እንዳልተደረገ መናገራቸው አጠያያቂ ነው
  • የአንድነት ዕጦት፣ የአሠራሩ መሥመር አለመያዝና ቸልታ ፕትርክናውን አክብዶባቸዋል
  • ለቤተ ክርስቲያን የሚያስብ እንደሌለና ኹሉም በገንዘብ መሸጡንና መለወጡን ጠቅሰዋል
  • ባለጉዳዩ ኹሉ ወደ በላይ አካል መሮጡ፣ የመዋቅሩንና አደረጃጀቱን ውድቀት አመላክቷል
  • መነኵሴ ዘመድ እንደሌለውና “በመንፈሳዊነት” ቢታወሱ ደስ እንደሚያሰኛቸው ጠቁመዋል

*                     *                 *


ብፁዕ ወቅዱስ አቡነ ማትያስ፣ ከአራት ዓመት በፊት ወደ መንበረ ፕትርክናው በመጡበት በዓለ ሢመት ባሰሙት ቃለ በረከት፥ በቤተ ክርስቲያን ዙሪያ የሚሠራው ሥራ፣ እግዚአብሔር እና ምእመናን በደስታ የሚቀበሉትና የሚወዱት፤ በመንፈሳዊነት የተደገፈ፤ ሓላፊነትን፣ ተጠያቂነትን፣ ብቃትን፣ ንቃትን፣ ጥራትን፣ ታማኝነትን፣ ሐቀኝነትን፣ ፍትሐዊነትን የተጎናጸፈ ፍጹም ጤናማ የኾነና እንከን የሌለበት መኾን እንደሚኖርበት ተናግረዋል፡፡

ቤተ ክርስቲያን፥ የእውነትና የሐቅ አስተማሪ እንጅ ተማሪ መኾን እንደሌለባት ከጠቆሙ በኋላ፣ “ሐቀኝነት፣ ታማኝነትና መልካም ሥነ ምግባር ከቤተ ክርስቲያን ካልተገኙ ከየት ሊገኙ ይችላሉ?” ሲሉም ጠይቀዋል፡፡

ቅዱስነታቸው፣ በዚያው ዓመት፣ ለመጀመሪያ ጊዜ በርእሰ መንበርነት በመሩት የርክበ ካህናት ቅዱስ ሲኖዶስ ምልአተ ጉባኤ መክፈቻ ባሰሙት ቃለ ምዕዳን ደግሞ፦ ከቤተ ክርስቲያን ክብርና ቅድስና ጋራ የማይጣጣመውን ሙስና ለማጥፋትና ቤተ ክርስቲያንን ለመታደግ ሥር ነቀል የለውጥ ርምጃ በቆራጥነትና በአስቸኳይ ተግባራዊ እንዲኾን አሳስበዋል፤

“ሥር ሰዶ የሚታየው አሳፋሪና አሳዛኝ ብልሹ አሠራር ሳይታረም ቢቀጥል፣ ቤተ ክርስቲያን ከፍተኛ ችግር ላይ እንደምትወድቅ በግልጽ እየታየ ነው፤” ያሉት ቅዱስነታቸው፣ ሊወሰዱ ይገባል ያሏቸውን ሦስት መሠረታዊ ርምጃዎች ጠቁመዋል፡፡ እነርሱም፡-

  1. ብልሹ አሠራርን ለማረምና ለማስወገድ፡- የፀረ ሙስና ዐቢይ ኮሚቴ፣
  2. አስተዳደሩን በዐዲስ መልክ ለማዋቀር፡- የአስተዳደር መሻሻል ዐቢይ ኮሚቴ፣
  3. የፋይናንስ አያያዝና አጠቃቀም ሥርዓት፥ ዘመናዊ፣ ግልጽነትና ተጠያቂነት ባለው መልኩ ለማደራጀት፡- የገንዘብ አያያዝ ሥርዓት ማሻሻያ ዐቢይ ኮሚቴ፤

እንዲቋቋምና ከጠቅላይ ቤተ ክህነት እስከ አጥቢያ ቤተ ክርስቲያን ድረስ አንድ ወጥ የኾነ ሥርዓት ለመዘርጋት እንዲቻል ሐሳብ አቅርበዋል፡፡

እጅግ የተንዛዛ ቢሮክራሲ፤ ከቤተ ክርስቲያን መሠረታዊ ተልእኮ ጋራ ያልተቀናጀ የሰው ኃይል ምደባ፤ ዕውቀትና የሥራ ችሎታ ሳይኾን ሙስና፣ ወገንተኝነትና የሥነ ምግባር ብልሽት በስፋት የሚንጸባረቅበት አሠራር፣ በካህናትና በምእመናን ላይ ቅሬታንና እምነት ማጣትን እያስከተለ እንዳለ ገልጸው፣ “በፍጥነት ማስተካከል ካልቻልን፣ በቅድሚያ በእኛ ላይ የሚፈርድ የገዛ ራሳችን ኅሊና ነው፤ በይቀጥላልም እግዚአብሔርም ሌላውም ይፈርድብናል፤” ሲሉ አስጠንቅቀዋል፡፡

ቅዱስነታቸው አክለውም፣ “በአጭር ጊዜ የተፈለገውን ለውጥ ለማምጣት ቢያዳግት እንኳ፣ የለውጡን መሠረት ግን በአስቸኳይ ማስቀመጥና አቅጣጫውን መቀየስ እጅግ አስፈላጊ መኾኑ ሊሠመርበት ይገባል፤” በማለት ነበር፣ የብፁዓን አባቶችን አጋርነት የተማፀኑት፡፡

ቅዱስ ሲኖዶስም፣ በዚያው ዓመት (ማለትም በ2005 ዓ.ም.) የርክበ ካህናት ምልአተ ጉባኤው፣ የቅዱስነታቸውን ማሳሰቢያ ተቀብሎና በአጀንዳ ቀርጾ ከተወያየ በኋላ ባወጣው መግለጫ ኹለት ዐበይት ውሳኔዎችን አሳልፏል፡፡ እነርሱም፡-

  • የመጀመሪያውብልሹ አስተዳደርና አሠራር፤ ዘመኑን ያልዋጀና ጥራት የጎደለው የፋይናንስ አያያዝ፣ እንደዚኹም ለሙስናና ብክነት የተጋለጡ አሠራሮችን ኹሉ ወሳኝ በኾነ መልኩ ለመቅረፍና ለማድረቅ፤ ከዚኽም ጋራ ቤተ ክርስቲያን በመሪ ዕቅድ መሥራት የምትችልበትን አሠራር ለመቀየስ፥ ብፁዓን ሊቃነ ጳጳሳት፣ ሊቃውንተ ቤተ ክርስቲያንና ምሁራን የተካተቱበት ዐቢይ ኮሚቴ ተቋቁሞ ጉዳዩን የማጥራትና የማጥናት ሥራ እንዲቀጥል፤
  • ኹለተኛው፡- የአዲስ አበባ ሀገረ ስብከት ለሌሎች አህጉረ ስብከት በመልካም አስተዳደርና በፋይናንስ አያያዝ፣ እንደዚሁም በስብከተ ወንጌልና በአገልግሎት አሰጣጥ ለሌሎች አህጉረ ስብከት በሞዴልነት የሚጠቀስ ሀገረ ስብከት መኾን ስለሚገባው፣ በአንድ ሀገረ ስብከት፣ በአንድ የቅዱስ ፓትርያርክ ረዳት ሊቀ ጳጳስ እየተመራ እንደዚኹም በመልካም አስተዳደር፣ በፋይናንስ አያያዝና በሰው ኃይል አመዳደብ የሕግ የበላይነትን አክብሮ እንዲሠራ አስፈላጊው ክትትል ኹሉ በቋሚ ሲኖዶስና በመንበረ ፓትርያርኩ እንዲደረግ፤ የሚሉ ከፍተኛ ውሳኔዎች ነበሩ፡፡

በዚኽም መሠረት፣ ዐበይት ኮሚቴዎቹ ተቋቁመው፣ መዋቅራዊ አደረጃጀቱና የአሠራር ሥርዓቱ ዘመኑን በዋጀና ስትራተጅያዊ በኾነ መልኩ ለማሻሻል የሚያስችሉ ወሳኝ ጥናቶች ተዘጋጅተው ከአተገባበር ስልታቸው ጋራ ለምልአተ ጉባኤው ቀርበው ከመጽደቃቸውም በላይ፣ የማስፈጸሚያ በጀትም ተመድቦ እንደነበር የሚታወስ ነው፡፡

በተለይ አዲስ አበባን በተመለከተ ቀርቦ የነበረው፥ የመዋቅር፣ የአደረጃጀትና የአሠራር ለውጥ ጥናት፣ በምልአተ ጉባኤው አቅጣጫ መሠረት፣ በሀገረ ስብከቱ ማኅበረ ካህናትና ማኅበረ ምእመናን ለውይይት በተዘረጋበት ወቅት፣ የብዙኃኑን ጠንካራ ድጋፍ ከማረጋገጡም ባሻገር፣ “የቤተ ክርስቲያንን ትንሣኤ ተስፋ ያየንበት ነው” በሚል በአስቸኳይ ተግባራዊ እንዲኾን በብርቱ ሲጠይቅ መቆየቱ አይዘነጋም፡፡

ይኹንና፣ ለውጡ ተግባራዊ ሲኾን የሚሰፍነው የግልጽነትና የተጠያቂነት አሠራር፣ ሕገ ወጥ ጥቅማቸውን የሚያስቀርባቸው አማሳኝ የአጥቢያ ሓላፊዎች እና በለውጡ፥ የሐዋርያዊ ተልእኳችን መጠናከር ያስደነገጣቸው መናፍቃንና አድርባይ ፖሊቲከኞች ግንባር ፈጥረው በነዙት ውዥንብር፣ ሒደቱ ለጊዜውም ቢኾን ተስተጓጉሏል፡፡

በእጅጉ አሳዛኝ የነበረውና ለታሪክ ትዝብት የሚቀመጠው ግን፣ የፓትርያርኩ አቋም 180 ዲግሪ መዞሩና አማሳኞቹ በሽፋን የተገለገሉበት መኾኑ ነበር፡፡ የመዋቅር፣ የአደረጃጀትና የአሠራር ለውጥ ጥናቱ፣ ቅዱስነታቸው ራሳቸው በሰጡት ቀጥተኛ መመሪያ ጭምር እንዳልተዘጋጀ ኹሉ፣ በአማሳኞች ውዥንብር የአፈጻጸም ሒደቱ ሲታጎልና ሲታገት፣ ቅዱስነታቸው ለማስተካከል ያደረጉት በይፋ የሚታወቅ ግፊትና ጥረት አልነበረም፡፡

ከዚያም በኋላ ሌሎች መለስተኛ ጥረቶች የተሞከሩ ቢኾንም፣ የቤተ ክርስቲያናችንን ክብርና ልዕልና ጠብቆ ለማቆየትና የበለጠ አጠናክሮ ለማስቀጠል የሚያስችል ችግር ፈቺ ሕግ፣ ደንብ፣ መመሪያ፣ መዋቅራዊ አደረጃጀትና የአሠራር ሥርዓት ለመዘርጋት አልተቻለም፤ የመልካም አስተዳደር ዕጦቱ፣ የሀብት ብክነቱና የፍትሕ መዛባቱ እንደቀጠለ ይገኛል፡፡

በተለይ፣ “የፓትርያርኩ ልዩ ሀገረ ስብከት” የኾነው አዲስ አበባ፣ በቅዱስ ሲኖዶሱ ውሳኔ እንደተመለከተው፣ ለሌሎች አህጉረ ስብከት በሞዴልነት በሚጠቀስበት መልኩ መደራጀቱ ይቅርና ዋና ክፍሎቹ እንኳ የሚያከናውኗቸው ተግባራት በዝርዝር አልተለየላቸውም፤ ዐቅዶ ለመሥራትና ለመገምገም የሚያስችል የአሠራር ሥርዓት የለውም፡፡ እንዲያውም፣ “የቅዱስ ፓትርያርኩ ልዩ ሀገረ ስብከት” የሚለው ድንጋጌ ግልጽ ባለመኾኑ የበርካታ ውዝግቦች መነሻ ኾኗል፡፡ ይህን በመጠቀምና “ተጠሪነታችን ለፓትርያርኩ ነው” በሚል ከሕግና ሥርዓት ውጭ በመኾን የጠቅላይ ቤተ ክህነቱን አመራር ያለመቀበል አዝማሚያ ይታያል፡፡

የሚመለከተውን አካል በማግለል፣ በጎሠኝነትና በጥቅመኝነት ላይ ተመሥርቶ፣ ከሠራተኛ አስተዳደር ደንቡ ውጭ የመቅጠር፣ የማሳደግ፣ የማዛወር፣ የማገድና የማሰናበት አሠራር ተባብሶ የውስጥ ደላሎች ሽሚያና ፉክክር ይታይበትም ጀምሯል፡፡ ይህም፣ ከመሠረታዊ ተልእኳችን ጋራ ሳይቀናጅ፣ የእምነት አቋሙና የሥነ ምግባር(ዲስፕሊን) ይዞታው በቅጡ ሳይፈተሽ ወደ መዋቅር የሚገባው የሰው ኃይል ቁጥር ከልክ በላይ እንዲከማች ከማድረጉም ባሻገር፣ ለአጥቢያ አብያተ ክርስቲያናቱ የፋይናንስ ሥርዓት መናጋት መንሥኤ እየኾነ ነው፡፡


በዚኽ መሰሉ አጠቃላይ ሥርዓታዊ ቀውስ ውስጥ በምንገኝበት በአኹኑ ወቅት፣ ብፁዕ ወቅዱስ ፓትርያርክ አቡነ ማትያስ፣ ለሸገር ኤፍኤም 102.1 ሬድዮ፣ የጨዋታ እንግዳ ፕሮግራም፣ የሰጡትና ባለፉት ኹለት ተከታታይ ሳምንታት የተላለፈው ቃለ ምልልሳቸው ፀለምተኛነትና ተስፋ መቁረጥ በግልጽ የተንጸባረቀበት እንደኾነ ብዙዎች የተገነዘቡት ኾኗል፤ ሙስናንና ብልሹ አሠራርን በአስቸኳይ ስለማረምና መልካም አስተዳደርን ስለማስፈን አስፈላጊነት በየመድረኩ ከሚያስተጋቡት አቋም ፍጹም የተለየ፤ የተደረጉ ጥረቶችን እንዳልተደረጉ የሚቆጥርና ድካም የተጫጫነው ድምፅ ኾኖ ተገኝቷል፡፡

መንበሩ ላይ እንደተቀመጡ፣ “ሙስና መጥፋት አለበት” በማለታቸው የተሣቀቁ እንደነበሩና ስለ ሙስና በገሃድ እንዳያነሡባቸው ይሹ እንደነበር ያወሱት ቅዱስነታቸው፣ “አኹን አኹን ለምደውታል” ብለዋል፡፡ የቃሉ መለመድ ግን የተግባር ለውጥ አላመጣም – ስለ ቤተ ክርስቲያን የሚያስብ የለም፤ ኹሉም ሰው በገንዘብ ተሽጧል፤ ተለውጧል፤ ጭልጥ ብሎ ሒዷል፤” ያሉት ቅዱስነታቸው፣ ሙስናን ተዉ ማለት ከአንበሳ አፍ ሥጋ የመንጠቅ ያኽል አደገኛ እንደኾነ ተናግረዋል – ይኼን ተዉ ማለት፥ ከአንበሳ አፍ ሥጋ እንደ መንጠቅ ነው፡፡ ያ ኾኖ ነው ያለው፡፡ ጨርሶ አይሰማም ሰዉ፤ ጆሮ የለውም፤ ጨርሶ፡፡”

ሌላው አነጋጋሪው የፓትርያርኩ ምላሽ፣ ሙስናን ለማስቀረት በቤተ ክርስቲያን ምንም የተደረገ ነገር የለም፤ ማለታቸው ነው፡፡ ሌላውን ትተን፣ በቅዱስ ሲኖዶሱ ውሳኔና በራሳቸው መመሪያ ጭምር፣ ሊቃውንቱና ባለሞያዎቹ በትሩፋት የደከሙባቸው፣ ለትግበራ የተመቹ ጥናቶች አልቀረቡምን? ካህናትና ምእመናን፥ ሙስናን፣ ብክነትንና ብልሹ አሠራርን በማጋለጣቸው ለእስርና እንግልት፣ ለእግድና ስንብት አልተዳረጉምን? ጠንካራ ሰበካ ጉባኤያትና የሰንበት ት/ቤቶች እንዲዳከሙና እንዲበተኑ አልተደረገምን?

ቤተ ክርስቲያን፥ የእውነትና የሐቅ አስተማሪ እንጅ ተማሪ መኾን እንደሌለባት በመጠቆም፣ “ሐቀኝነት፣ ታማኝነትና መልካም ሥነ ምግባር ከቤተ ክርስቲያን ካልተገኙ ከየት ሊገኙ ይችላሉ?” ማለታቸውን ፈጽሞ የዘነጉ የሚመስሉት ፓትርያርኩ፣ በቃለ ምልልሱ፣ ቤተ ክርስቲያን የመንግሥትን ያኽል እንኳ ጥረት እንዳላደረገች ነው የገለጹልን፡፡ ይብሱኑ፣ እኛ ደግሞ ይኼን ለማድረግ ኃይሉ የለንም፤ ጉልበቱ የለንም፤” ብለው እጅ መስጠታቸው ሳይበቃ፣ ጉልበትና ኃይል ያለው ተጠቃሚ የኾነው አካል ነው በማለት አማሳኙ ኃይል ከቁጥጥር ውጭ የኾነ አቅም መፍጠሩን ጠቁመዋል፡፡

ለፓትርያርኩ ምላሽ መነሻ የኾነው ጥያቄ፣ በዓለም ላይ እየተሸረሸሩ ከመጡ ነገሮች አኳያ ቤተ ክርስቲያን ለመጪው ትውልድ ዝግጅት አድርጋ እንደኾን የሚያነሣ ነው፡፡ ከእንግዲኽ በኋላ ተስፋ በማድረግ እንጅ እስከ አኹን ድረስ፣ ሰፊ የኾነና ጥንቃቄ የተመላበት በቂ ዝግጅት አለ ለማለት እንደማይደፍሩ የተናገሩት ፓትርያርኩ፣ “ወደፊት የሚመጣውን አብረን እናያለን፤” ሲሉ ነው የመለሱት፡፡

ከዕለት ተዕለት የሥራ መርሐ ግብራቸው ጋራ በተያያዘ ለቀረበላቸው ጥያቄ ፓትርያርኩ የሰጡት ምላሽም ቢኾን፤ ከመዋቅርና አደረጃጀት ችግር አኳያ የሕግና ሥርዓት መዛባቱን፣ የመልካም አስተዳደር ዕጦቱን በሌላ በኩል የሚያሳይ መጽሔት ነው የኾነው፡፡ ከጠዋት እስከ ምሽት ባለጉዳዮችን ሲያስተናግዱ እንደሚውሉ የጠቀሱት ፓትርያርኩ፣ ጉዳዮች ወደየሚመለከታቸው መመሪያዎች ከመሔድ ይልቅ ወደ በላይ የመሮጥ መጥፎ ባህልና ልምድ እንዳለ ቢገልጹም፣ ግን፣ የሚሳካላት ነገር የለም፤ብለዋል፡፡  

ሰዉ ይመጣል፤ ተገድግዶ ይውላል፤ በየዲፓርትመንቱ አይሔድም፤ ወደ በላይ ነው የሚሮጠው ሰው ኹሉ፡፡ ግን የሚሳካላት ነገር የለም፡፡ እያንዳንዱ በየቦታው በየዲፓርትመንቱ ቢኾን ኖሮ ጉዳዩ ይፈጸምለት ነበር፡፡ ግን እሺ አይልም፤ ባህሉ ልምዱ ጥሩ አይደለም፤ ወደ በላይ መሮጥ ነው፡፡ እና ሰዉ ተገድግዶ፣ መሽቶብኛልና ልሒድ ማለት አይቻልም፡፡ ተራ አስገብቶ ማነጋገር አለ፤ እና በዚኹ እዘገያለኹ፤ በጣም እዘገያለኹ፡፡ ማታ፣ በጣም አምሽቼ ነው የምገባው፡፡

ቅዱስ ፓትርያርኩ፣ ለሓላፊነት ደረጃቸው በማይመጥኑ በዝርዘር ጉዳዮች ላይ ሳይቀር እንደሚሰማሩና ውሳኔ እንዲሰጡ የኾነበት በርካታ አጋጣሚዎች ታይተዋል፡፡ ይህም ለሥራ መደራረብ፣ ለሓላፊነትና ለተጠያቂነት ክፍተት፣ በሚገባ ላልታሰበበትና ላልተመከረበት ቅጽበታዊ ውሳኔ፣ ለአሠራር ሥርዓት መፋለስ፣ ለሀብት ብክነት፣ ለአገልጋዮች ወቅታዊ ውሳኔ አለማግኘት፣ መንገላታትና መጉላላት ለመሳሰሉት የመልካም አስተዳደር ችግሮች ምክንያት ሊኾን በቅቷል፡፡

በዚኽ ረገድ የፓትርያርኩ ልዩ ጽ/ቤት በቀዳሚነት ተወቃሽ እንደኾነ ጥናቶችና ዘገባዎች ያሳያሉ፡፡ ልዩ ጽ/ቤቱ፣ ለቅዱስ ፓትርያርኩ የአስተዳደር አገልግሎት ድጋፍና ለጽሕፈት ነክ ሥራዎች የታሰበ መዋቅር ቢኾንም፣ ራሱን፣ ከፍተኛ የመዋቅርና የሥልጣን አካል አድርጎ የሚሠራ ኾኗል፡፡ ይህም፣ ለሕግና ሥርዓት መዛባት፣ ለመልካም አስተዳደር ዕጦትና ለመሳሰሉት ችግሮች ቀዳዳ የከፈተ አሠራር ኾኖ ታይቷል፡፡

በአጠቃላይ፣ የፕትርክናውን ሓላፊነት፣ አስበውትና አልመውት ሳይኾን በእግዚአብሔር ጥሪ እንደተቀበሉት ያወሱት ብፁዕ ወቅዱስ አቡነ ማትያስ፣ ሓላፊነቱ ከባድ እንደኾነ ተናግረዋል፡፡

በሕልሜም የለ፤ ፍላጎትም የለ፤ ኧረ እንደው እባክዎትን፤ እንደው አስቸጋሪ የኾነ ነገር የኾነው፤ ምን ይደረግ?

ሓላፊነቱን ከባድ ያደረገውም፥ የአሠራራችን መሥመር አለመያዝ፣ የእርስ በርስ አንድነት አለመኖርና የሓላፊዎች ቸልተኝነት እንደኾነ አስረድተዋል፤ በተለይም፣ በአጥቢያ አብያተ ክርስቲያናት ደረጃ የሚታየውን የሓላፊዎች ቸልተኝነት ጠቅሰዋል፡፡

ሓላፊነቱማ ከባድ ነው፤ የሚከብደው ደግሞ የራሳችን አንድ አለመኾን አለ፡፡ አንድነትና አኹን ደግሞ ከነጠቅላላ እንዲያው ቸልተኝነትም መጥቷል፡፡ በአጥቢያ አብያተ ክርስቲያናት ያለ ነው፤ ሓላፊዎች ቸልተኛነትም እየመጣ ነው፤ በእውነቱ ቀላል አይደለም፡፡

ቃለ ምልልሱን የተከታተሉ አድማጮች በቅዱስነታቸው ምላሽ ውስጥ የሚያነሷቸውና መታለፍ አልነበረባቸውም ያሏቸው ሌሎችም በርካታ ነጥቦች አሉ፡፡ ሙሉ ቃለ ምልልሱን ከጣቢያው ድረ ገጽ እንድትከታተሉ እያስታወስን፣ ከላይ በተጠቀሱትና ከዚኽ ቀደም ከተሰሙት ለየት ባለ መልኩ የቀረቡትን የቃለ ምልልሱን ክፍሎች እንደሚከተለው አቅርበነዋል፡፡

************************************

ሸገር ኤፍ.ኤም 102.1፡- የኢትዮጵያ ኦርቶዶክስ ተዋሕዶ ቤተ ክርስቲያን፣ ከሃይማኖት መሪነት በተጨማሪ የታሪክና የቅርስ፤ የባህልና የትውፊት፤ የሥነ ጽሑፍ፣ የዜማ፣ የፍልስፍና ጠባቂ ናት፡፡ ከፍተኛ ሓላፊነት ይመስለኛል፡፡ የሀገራችን መነኰሳት ትልቅ የሀገር ቅርስ የኾኑ ንብረቶችን እስከ ዛሬ ጠብቀው አቆይተውልናል፡፡ ምንም ሳይፈልጉ፤ ምንም ሳያምራቸው፡፡ እነርሱ ጥብቅ አድርገው ባይዙት ኖሮ ዛሬ ምንም አይተርፈንም ነበር፡፡ አኹን ዘመኑ እየተለወጠ ይመስለኛል፡፡ የኢትዮጵያ ኦርቶዶክስ ተዋሕዶ ቤተ ክርስቲያን ያሉትን ቅርሶች በጥሩ ኹኔታ ለመጠበቅ ተዘጋጅታለች ወይ? ይህ ሓላፊነት ከባድ ነው፣ ብዬ ነው፡፡

ቅዱስነታቸው፡- ከአኹን ቀደም ቅርሶቹ ብዙ ባክነዋል፡፡ ቅርሶቹ ያሉባቸው ገዳማትና አብያተ ክርስቲያናት፣ ቅርሱ ቁም ነገር አይመስላቸውም፡፡ ጥንቃቄ ይጎድለዋል፡፡ እንደገና ደግሞ ደንበኛ የኾነ ሙዝየም ወይም ቤት የለም፡፡ ከፊሉ አይጥ ይበላዋል፡፡ የውኃ ፍሳሽ ያበላሸዋል፡፡ እንዲያ እንዲያ እየኾነ ብዙ ባክኗል፡፡ ቁም ነገር መኾኑ ከማይገባቸው ሰዎች የሚሸጡም አሉ፡፡ በእነኚህ ምክንያቶች ኹሉ ብዙ አልቋል፤ ብዙ ጥፋት ደርሷል፡፡

አኹን፣ አኹን ግን ያ ኹሉ ብዙ የተሻለ ይመስለኛል፡፡ ደኅና ነው አኹን፡፡ መሸጥ፣ መለወጥና ነገሩን ኹሉ ችላ ብሎ ማበላሸት ትንሽ የተሻለ ነው፡፡ ግን እስከ አኹን ድረስ ያልተደረሰባቸው ቦታዎች አሉ፡፡ በመሀል ከተማና በከፍተኛ አካባቢዎች ያሉ፣ ለምሳሌ፡- እንደ አኵስም እንደ ላሊበላ ያሉት ታላላቅ አድባራት አኹን ተጠብቀዋል፤ ነገር ግን ያልተደረሰባቸው ደግሞ በየዋሻው ያሉ ቅርሶች አሉ፡፡ መንገድም የሌላቸው፤ የድሮዎቹ አባቶቻችን ከጠላትም ለመሰወር፣ ከጥፋትም ለመዳን መሰለኝ ዋሻ ቆርቁረው እዚያ ውስጥ ነው የሚያስቀምጡት፡፡ ዋሻ ውስጥ የተቆረቆሩ ገዳማትም አሉ፤ ገና ያልተደረሰባቸው አሉ፤ በአጠቃላይ፣ ጥንቃቄ ተደርጎባቸዋል ለማለት አያስደፍርም እንጅ ከነበረው መቼም ይሻላል ብዬ ነው የምገምተው፡፡

ሸገር ኤፍ.ኤም 102.1፡- የኢትዮጵያ ኦርቶዶክስ ተዋሕዶ ቤተ ክርስቲያን ባላት ረዥም ታሪክ፣ ብዙ አስቸጋሪ ኹኔታዎች ውስጥ አልፋለች፡፡ ካለፉት ጋራ ሲነጻጸር ይኸኛው ቀላል ሊመስል ይችላል፡፡ ወጣቶች ለሚጠይቋቸው ጥያቄዎች፤ በዓለም ላይ ኹሉም ነገር እየተሸረሸረ የመጣበት ጊዜ ይመስለኛል፡፡ ግን ቢኾንም ቤተ ክርስቲያኒቱ ተከታይ አላጣችም፡፡ ጥያቄው፥ ለመጪው ትውልድ ዝግጅት አለ ወይ ነው? በእርስዎ በኩልስ ምን ያስባሉ?

ቅዱስነታቸው፡- በቂ ዝግጅት አለ ለማለት አልደፍርም፡፡ ምክንያቱም፣ ቤተ ክርስቲያኒቱ እስከ አኹን ድረስ ብዙ ዝግጅት አላደረገችም፡፡ ሀብቷንም፣ ቅርሷንም በስፋትና በጥንቃቄ መሰብሰብ አልቻለችም፡፡ የአቅም ማነስ አለ፡፡ ኹላችንም እንደምናውቀው በድኅነት የኖረ አገር ነው፡፡ እኛም ካህናቱም ከዚያው ከድኃው ማኅበረሰብ ነው የተገኘነው፡፡ ትምህርት፣ ዕውቀት፣ ሰፊ የኾነ አስተሳሰብ የለም፡፡ ለብቻ ተኣምር መሥራት አይቻልም፡፡ ድካም አለ፡፡ ከአኹን በኋላ ተስፋ እናደርጋለን እንጅ፣ እስከ አኹን ድረስ ጥንቃቄ ነበረ ለማለት አያስደፍርም፡፡

እንደ አኹኑ አእምሮ ሰፋ ባለበት ወቅት ቢኾን ብዙ ሀገሮችን መስበክ፣ ማስተማር፣ ተከታይ ማፍራት እንችል ነበር፡፡ ነገር ግን፣ ያ ኹሉ አልተደረገም፡፡ ሌላው ቀርቶ እዚኹ ሀገራችን እንኳ በቤተ ክርስቲያናችን ውስጥ ብዙ ችግሮች አሉ፡፡

አኹን ደግሞ፣ የማናውቀው ታሪክ መጥቷል፡፡ የማናውቀው ታሪክ ማለት ይኼ ሙስና የተባለው፥ ገንዘብ ዘረፋ፣ ስለ ቤተ ክርስቲያን የሚያስብ የለም፤ ኹሉም ሰው በገንዘብ ተሽጧል፤ ተለውጧል፤ ጭልጥ ብሎ ሒዷል፤ ጭልጥ ብሎ ሒዷል፡፡ የሚያሳዝን ነው፣ ይኼ ራሱ፡፡ ሌላ አደጋ ነው ደግሞ የተደቀነባት ቤተ ክርስቲያኒቱ፡፡ መልካም አስተዳደር የሚባል ነገር የለም፡፡

ሙስና የቤተ ክርስቲያን ቋንቋ ነው፡፡ ማሰነ፥ ጠፋ ነው፡፡ ሙስና፥ ጥፋት ነው፡፡ እኔ እዚህ መንበር ላይ ስቀመጥ፣ በመጀመሪያ፣ ሙስና መጥፋት አለበት፤ እያልኩ አንዳንድ ነገር ስናገር፣ ይኼን ቃል አታንሣብን፤ ይሉኝ ነበር፡፡ ለምን ስል፣ በገሃድ መነገር የለበትም፤ ይሉኛል፡፡ ቋንቋው እኮ የቤተ ክርስቲያን ነው፤ ጥሩ ትርጉም ነው ያለው፤ ገንዘብን መስረቅ፣ ማማሰን፥ ማጥፋት ማለት ነው፡፡ ግሩም የኾነ ትርጉም ነው የተሰጠው በእውነቱ፡፡ ኧረ አታንሣብን ማለት ጀምረው ነበር፤ አኹን አኹን ለምደውታል፡፡

እንዲኽ ዓይነት አደጋ በቤተ ክርስቲያን ላይ መጥቷል፡፡ እግዚአብሔር ያድነን በእውነቱ፡፡ በቤተ ክርስቲያን ላይ ብቻ ሳይኾን በጠቅላላ በሀገሪቱም ያለ ነገር ነው፤ የኾነው ኾኖ መንግሥት ይኼን ለማስቀረት ይታገላል፡፡ በቤተ ክርስቲያናችን ግን ምንም የተደረገ ነገር የለም፡፡ እኛ ደግሞ ይኼን ለማድረግ ኃይሉ የለንም፤ ጉልበቱ የለንም፤ ጉልበትና ኃይል ያለው ተጠቃሚ የኾነው አካል ነው፡፡ ይኼን ተው ማለት፥ ከአንበሳ አፍ ሥጋ እንደ መንጠቅ ነው፡፡ ያ ኾኖ ነው ያለው፡፡ ጨርሶ አይሰማም፤ ሰዉ፤ ጆሮ የለውም፤ ጨርሶ፤ ጨርሶ፡፡ ይኼ አደገኛ የኾነ ጉዳይ ነው፡፡ ወደፊት የሚመጣውን አብረን እናያለን፡፡

ሸገር ኤፍ.ኤም 102.1፡- ብዙ የወጣትና የጉልምስና ዕድሜዎን በገዳም ነው ያሳለፉት፤ በኢትዮጵያ ወደፊት ይኼ የሚቀጥል ይመስሎታል?

ቅዱስነታቸው፡- ገዳማቱ እየተዳከሙ ናቸው፡፡ ለምን? ድሮ መሬት ነበራቸው፡፡ በመሬት ነው የሚተዳደሩት፡፡ በመሬት ሲተዳደሩ፥ እያሳረሱ፣ እያረሱ መሬታቸው በደርግ ተወረሰ፡፡ መሬት ለአራሹ ተባለ፤ መሬታቸው ተወረሰ፡፡ አኹን ባዶአቸውን ነው የቀሩት፡፡ እና ብዙ ገዳማት ተዳክመዋል፡፡ አንዳንድ ገዳማት ደግሞ ራሳቸውን አትክልት እየተከሉ፣ ተግባረ እድ እያደረጉ የሚኖሩ አሉ፡፡

ሸገር ኤፍ.ኤም 102.1፡- እነርሱ በተዳከሙበት ጊዜ፣ የአብነት ት/ቤቶችም ችግር ይገጥማቸዋል፤…

ቅዱስነታቸው፡- ታድያስ፣ ታድያስ፤ በሀገራችን የአብነት ትምህርት መምህራንና ተማሪዎች በጣም ብዙ ናቸው፡፡ እነርሱን መርዳት አልቻለችም፤ ቤተ ክርስቲያኒቱ፤ አቅም የላትማ፡፡ ከየት ታመጣለች? እንዴት አድርጎ? እንጅ፣ ትምህርት ቤቱ በሰፊው ነው ያለው እስከ አኹን ድረስ፡፡ የትርጓሜ መጻሕፍት፣ የዜማ፣ የቅኔ፣ የአቋቋም በሰፊው ነው ያለው፡፡ ግን፣ ምግብ የሚመግባቸው የለም፤ እየለመኑ ነው፡፡ ልመና ደግሞ ተሰልችቷል፡፡ አንዳንድ አካባቢዎች ሠለጠን እያሉ፥ አንተ ተማሪ ሠርተኽ አትበላም እንዴ? ማለት ተጀምሯል፡፡ ድሮ ተማሪ ክቡር ነው፤ መንደር እየተካፈለ ነበር የሚማረው፤ ለምሳሌ፥ መአት የቅኔ ተማሪ በአንድ ጉባኤ ቤት ይቀመጣል፤ ከዚህ ወዲህ ላንተ ከዚህ ወዲያ ላንተ እየተባለ መንደሩን ይካፈላል፤ ምእመናን ደግሞ እንደ ራሳቸው ቤተሰብ አድርገው ነው ምግቡን የሚሰጡት፡፡ እንግዲህ ድሮ መምህራንም ደመወዝ የላቸውም፤ ተማሪውም ደመወዝ የለውም፤ መምህራኑ ራሳቸው ያለደመወዝ ነው የተማሩት፤ ሲያስተምሩም እየተለመነላቸው ነው፤

ሸገር ኤፍ.ኤም 102.1፡- ያ እንግዲህ ራስን ዝቅ ከማድረግ፣ ወደ መንፈሳዊነትምኮ የሚያስጠጋ መንገድ ነው፣ በችግር ውስጥ ማለፍ፤ እርሱም አንድ ቁም ነገር ይመስለኛል፤

ቅዱስነታቸው፡- አዎ፣ መናኒ አለ፤ ማስተማሩን የእኔ ብሎ ይዟል፤ መምህራኑ፥ ለምን ደመወዝ አላገኘንም አይሉም፤ በቃ፣ እንደ ተማሪዎቻቸው መንደር ተካፍለው ለምነው ያመጡላቸዋል፤ ይህችን ትንሽ ቁራሽ ካገኙ ይህን እየተመገቡ ነው የሚያስተምሩት፡፡

ሸገር ኤፍ.ኤም 102.1፡- ቅዱስነትዎ ባሉበት ሓላፊነት፣ ከጠዋት ጀምሮ እስከ ማታ ሥራው ምን ይመስላል? ሰፊ ሓላፊነት ይመስለኛል፤ 35ሺሕ አብያተ ክርስቲያናት፤ 1ሺሕ500 ገዳማት፤ 50 ጳጳሳት፤ 400ሺሕ ቀሳውስት፤ 20ሺሕ ተማሪ ቤቶች አሉ፡፡ የእነኚኽ ኹሉ አባት እርስዎ ነዎት፤ ምን ይመስላል ቀኑ?

ቅዱስነታቸው፡- አይ፣ እንግዲህ፤ ችግሩ ምንድን ነው፤ መሥመር አልያዘም፤ ሥራችን አሠራራችን መሥመር አልያዘም፡፡ ለምሳሌ፡- እነዚኽን ኹሉ አጥቢያ አብያተ ክርስቲያናት ይዘን በደንብ መሥመር ማስያዝ አልቻልንም፡፡ ገዳማቱም ደግሞ፣ ገዳማዊ ሕይወታቸውን ይዘው ይኖራሉ፡፡ አንዱ ደካማ ነው፤ ሌላው ብርቱ ነው፡፡ የተለያየ ኑሮ ነው ያላቸው፡፡ የሚተዳደሩት በመሬት ነበር፡፡ መሬቱ ሲወሰድ ደግሞ መድከም መጥቷል፡፡

እና ሓላፊነቱ ከባድ ነው፤ ሓላፊነቱማ ከባድ ነው፤ የሚከብደው ደግሞ የራሳችን አንድ አለመኾን አለ፡፡ አንድነትና አኹን ደግሞ ከነጠቅላላ እንዲያው ቸልተኝነትም መጥቷል፡፡ በአጥቢያ አብያተ ክርስቲያናት ያለ ነው፤ ሓላፊዎች ቸልተኛነትም እየመጣ ነው፤ በእውነቱ ቀላል አይደለም፡፡

ሸገር ኤፍ.ኤም 102.1፡- ጠዋት ስንት ሰዓት ይነሣሉ?

ቅዱስነታቸው፡- እኔ እንግዲኽ አምሽቼ ነው የምተኛው፤ በአራት ሰዓት፣ በአራት ሰዓት ተኩል እንደዚኽ እተኛለኹ፡፡ ለሦስት ሰዓት ያህል እተኛና እነቃለኹ፡፡ ከዚያ በኋላ የራሴን ጉዳይ እሠራለኹ፤ የጸሎቱን፣ የሚነበብ እንዳለ፤ ከዚያ በኋላ በእንቅልፍ ትንሽ አሳልፋለኹ፡፡ ኤክሰራይስ አደርጋለኹ፡፡ ያው ሥራ የምንገባው ጠዋት በሦስት ሰዓት ነው፡፡ አስቸኳይ ነገር ከሌለ በቀር በዚኹ መልክ ነው እንግዲኽ የምንነሣው፡፡

ሸገር ኤፍ.ኤም 102.1፡- ቀኑን ሙሉ ሲሠሩ ይውላሉ…

ቅዱስነታቸው፡- አዎ

ሸገር ኤፍ.ኤም 102.1፡- ከሥራ ስንት ሰዓት ይወጣሉ?

ቅዱስነታቸው፡- ኡ ኡ…(ሣቅ) እስከ ምሽቱ አንድ ሰዓት የምቆይበት ጊዜ አለ፡፡

ሸገር ኤፍ.ኤም 102.1፡- መኖርያዎም እዚኹ ነው?

ቅዱስነታቸው፡- እዚኹ ነው፤… እና ሰዉ ይመጣል፤ ተገድግዶ ይውላል፤ በየዲፓርትመንቱ አይሔድም፤ ወደ በላይ ነው የሚሮጠው ሰው ኹሉ፡፡ ግን የሚሳካላት ነገር የለም፡፡ እያንዳንዱ በየቦታው በየዲፓርትመንቱ ቢኾን ኖሮ ጉዳዩ ይፈጸምለት ነበር፡፡ ግን እሺ አይልም፤ ባህሉ ልምዱ ጥሩ አይደለም፤ ወደ በላይ መሮጥ ነው፡፡ እና ሰዉ ተገድግዶ፣ መሽቶብኛልና ልሒድ ማለት አይቻልም፡፡ ተራ አስገብቶ ማነጋገር አለ፤ እና በዚኹ እዘገያለኹ፤ በጣም እዘገያለኹ፡፡ ማታ፣ በጣም አምሽቼ ነው የምገባው፡፡

ሸገር ኤፍ.ኤም 102.1፡- ብቸኛ ነዎት፣ እዚኽ?

ቅዱስነታቸው፡- መነኰሳት አሉ፡፡

ሸገር ኤፍ.ኤም 102.1፡- እንደው ዐረፍ ብላችሁ እስር በርስ የምትጫወቱበት ጊዜ አለ?

ቅዱስነታቸው፡- አይ…

ሸገር ኤፍ.ኤም 102.1፡- እርስዎ የሚወዱት ምንድን ነው? መጽሐፍ ማንበብ…

ቅዱስነታቸው፡- ምምም… መጽሐፍ ማንበብ… አኹንማ፣ ሆሆሆ..

ሸገር ኤፍ.ኤም 102.1፡- ጊዜ የት ተገኝቶ?

ቅዱስነታቸው፡- አኹንማ የት ተገኝቶ… ወይ ጉድ… አኹንማ ሆሆ.. ከተወሰነ ጊዜ በኋላ ቆይቶ መሥራቱ አግባብ ነው ብዬ ሳይኾን፣ ሰዉ ዝም ብሎ እዚህ ተገትሮ ውሎ እንዲያው ዝም ብሎ ሒድ ማለቱ ስለሚከብድ ነው እንጅ በአግባቡ መሥራቱ ነው ጠቃሚ የሚኾነው፤ እንግዲህ አልቻልኩም፡፡ ያው ሰዉን ስናስተናግድ እንውላለን፤ እንደዚያ ነው፡፡

ሸገር ኤፍ.ኤም 102.1፡- ምን ዓይነት መጽሐፍ ማንበብ የሚወዱት? ከሃይማኖት፣ ከጸሎት መጽሐፍ ሌላ፤ ታሪክ ያስደስትዎታል?

ቅዱስነታቸው፡- አዎ፣ እንዴታ! ታሪክ ያስደስተኛል፤ የታሪክ መጻሕፍት አሉኝ፤ ቅዱሳት መጻሕፍት፣ ራሱ መጽሐፍ ቅዱስ፤ ትርጓሜ መጻሕፍት፣ አንድምታዎቹ፣ እነርሱ፣ እነርሱን አነባለኹ፡፡ ግን ጊዜው ዛሬ ምንም አልቻልኩም፤ ድሮ ነበረ፤ እዚህ ከመግባቴ በፊት ነጻነት ነበረኝ፡፡

ሸገር ኤፍ.ኤም 102.1፡- ከመጽሐፍ ቅዱስ ጥቅስ የሚወዱት የትኛውን ነው? ኹሉንም ይወዳሉ፤ የሚያስበልጡት ማለቴ ነው፤

ቅዱስነታቸው፡- መቸም ቤተ ክርስቲያናችን የምትመራበት፡- ቀዳሚሃ ለጥበብ ፈሪሃ እግዚአብሔር፤ የጥበብ ኹሉ መጀመሪያ እግዚአብሔርን መፍራት ነው፤ ይላል፡፡ ትልቁ ጥቅሳችን፡፡ ሰው ፈሪሃ እግዚአብሔር ከሌለው ዋጋ የለውም፡፡ እንደው፣ ፈጣሪውን ካላወቀ፣ እግዚአብሔር አለ፤ ካላለ፤ ኃጢአት ብሠራ እግዚአብሔር ይፈርድብኛል፤ ካላለ ልጓም የሌለው ፈረስ ነው፤ ዋጋም የለውም፡፡ እና የጥበብ ኹሉ መጀመሪያ እግዚአብሔርን መፍራት ነው፤ የሚለው ነው፤ ሌሎችም አሉ፡፡

ሸገር ኤፍ.ኤም 102.1፡- እርስዎ ቅድም ብዙ ሥራ እንደሚበዛ ነግረውኛል፤ የቤተ ክርስቲያኒቷ መሪ ነዎት፤ ግን ሌላ ሊሠሩ፣ ሊያስተምሩ የሚፈልጉት ነገር አለ? ስለ ተፈጥሮ ጉዳይ ያሳስብዎታል፤ የተፈጥሮ ሀብትን በሚመለከት፤ ርግጥ የሰላም ጉዳይ አንዱ ሥራዎት ነው፤…

ቅዱስነታቸው፡- አዎ፣ በጣም… የተፈጥሮ ማለት ዕፀዋት…

ሸገር ኤፍ.ኤም 102.1፡- ዕፀዋት…አዎ፣ እርስዎ በገዳም ስለኖሩ…፤

ቅዱስነታቸው፡- በጣም፤ እንግዲኽ ለሰውም ኾነ ለምድር ጌጧ ደን ነው፡፡ ለምድር የደም ሥሯ ዕፀዋት ናቸው፡፡ ዕፀዋት እንዲከበሩ፣ እንዳይቆረጡ፣ እንዲተከሉ፤ ዕፀዋት ከሌሉ ምድሪቱ እንደሌለች፤ ሰው የደም ሥሩ ከተቆረጠ ሕይወት እንደሌለው፣ ይኼን ይኼን በተቻለኝ አጋጣሚ አስተምራለኹ፤ በየአብያተ ክርስቲያናቱ፤ በየእሑዱ፣ በየወርኃዊ በዓላቱ፣ በየዐበይት በዓላቱ፤ ከዚኽ ሌላ ደግሞ ስለ ሰላም፣ ስለ ፍቅር፣ ስለ አንድነት፤ አንድነትና ሰላም ከሌለ ሀገር እንደሌለ፤ ይኼን ይኼን ነው የምናስተምረው፡፡

ሸገር ኤፍ.ኤም 102.1፡- እንግዲኽ፣ በተለያየ ምክንያት የፖሊቲካውም ጉዳይ እየገባ፣ ውጭ ያሉ ኢትዮጵያውያንም እንዲሁ የእርስ በርስ መከፋፈል አለ፤ በመላው ዓለምና በሀገር ውስጥ ላሉት ኢትዮጵያውያን በጉዳዩ ላይ ማለት የሚፈልጉት ነገር ካለ? የሚጠይቁት፣ የሚመክሩት ካለ?

ቅዱስነታቸው፡- መቼም፣ ቤተ ክርስቲያን ልታደርግ የምትችለው፣ ማንንም ማንንም ሳትል ሰላምን መስበክ ነው፤ የሚበጀው፣ በውስጥ ያለውንም በውጭ ያለውንም የምታስተምረው፥ ስለ ሀገር ሰላም፣ ስለ ፍቅር፣ ስለ አንድነት፣ ስለ ሃይማኖት ጽናት ነው ምንጊዜም ቢኾን በሰፊው ነው የምናስተምረው፡፡ አኹን ደግሞ እንደ ዘመኑ ስለ ልማት ደግሞ እናስተምራለን፤ እንግዲኽ ሚዲያው ብዙ ደጋፊ የለውም እንጅ እኛ የምንለው፣ እኛ የምናስተምረው ትምህርት በሙሉ ቢሰበክ፣ በሚዲያ ቢተላለፍ ይጠቅም ነበር፡፡ ያው ይኼን ያህል አትኩሮት የሚሰጠው የለም፡፡ ስለ ፍቅር፣ ስለ አንድነት፣ ስለ ሀገር ሰላም፣ ተቻችሎና ተረዳድቶ ስለ መኖር፣ በሃይማኖት ጸንቶ ስለ መኖር ስለዚኽ ኹሉ እናስተምራለን፣ የተቻለውን ያህል፡፡ እኔ በሔድኩበት ኹሉ ሥራዬ እርሱ ነው፡፡

ሸገር ኤፍ.ኤም 102.1፡- ከሀገር ውስጥ ቋንቋዎች በተጨማሪ ሒብሩ፣ እንግሊዝኛ ይናገራሉ፤ ዐረብኛ ይናገራሉ፤ ሌላስ አልጨመሩም? ነው የረሳኹት አለ፣ እዚኽ ውስጥ?

ቅዱስነታቸው፡- አይ፣ የለም፤ ዕብራይስጡ እየተረሳ እየሔደ ነው፤ ዐረብኛ እንኳ ድሮም ብዙ አልነበረም፤ ዕብራይስጥ ትንሽ ትንሽ ዐውቅ ነበር፤ እየተረሳ ሔደ፤

ሸገር ኤፍ.ኤም 102.1፡- ቤተሰቦችዎን ያገኛሉ? እርግጥ እናት አባትዎ በሕይወት ላይኖሩ ይችላሉ፤

ቅዱስነታቸው፡- የሉም

ሸገር ኤፍ.ኤም 102.1፡- እርስዎ እዚኽ ደረጃ መድረስዎን እናት አባትዎ አላዩም? ጳጳስ በኾኑ ጊዜ አይተዋል?

ቅዱስነታቸው፡- የለም፤ የት ተገናኝተን፤

ሸገር ኤፍ.ኤም 102.1፡- አኹን ዘመዶችዎ ይጠይቅዎታል?

ቅዱስነታቸው፡- አይ፣ አንዳንድ ሰዎች እየመጡ አይተውኝ ይሔዳሉ፤ ርግጥ፣ በከተማም ያሉ ሰዎች አሉ፤ የቅርብ ዘመድ እንኳ ብዙ የለኝም፤ አልፎ አልፎ ከሀገር ቤት ይመጣሉ፤ አይተውኝ ይሔዳሉ፤

ሸገር ኤፍ.ኤም 102.1፡- መነኵሴ ዘመድ የለውም?

ቅዱስነታቸው፡- አዎ፤ የለውም

ሸገር ኤፍ.ኤም 102.1፡- ኹሉ ዘመዱ ነው፤

ቅዱስነታቸው፡- አዎ፣ ልክ ነው

ሸገር ኤፍ.ኤም 102.1፡- አንድ የመጨረሻ ጥያቄ፤ ወጣቱ ካህሳይ፣ አንድ ቀን፣ የኢትዮጵያ ኦርቶዶክስ ተዋሕዶ ቤተ ክርስቲያን ፓትርያርክ ይኾናል ብሎ አስበው፣ ተመኝተው ያውቁ ነበር? ወይስ ሕልም አይቼሎታለኹ ያለ ሰው ነበር?

ቅዱስነታቸው፡- ኧረ በጭራሽ፤ ኧረ በጭራሽ፤ እኔ ምንም ስለዚኽ የማውቀው ነገር የለም፡፡ ርግጥ ገዳም ውስጥ ቅኔ ቤት ሳለሁ፣ አንድ ሕልም አይቼ ለአስተማሪዬ ነገርኋቸውና ገረማቸው፡፡ ያኔ ተራ መነኵሴ ነኝ፤ ግን የቅኔ ተማሪ ነኝ፤ የዜማም ተማሪ ነኝ፤ ሕልሙ ምንድን ነው፥ የቀድሞው የትግራይ ሊቀ ጳጳስ የነበሩት የብፁዕ አቡነ ዮሐንስ ጎርድ ምስል፣ ፀሐይዋ ላይ ቁጭ ብለው ፀሐይዋ ትታየኛለች፡፡ በእጃቸው፣ ና ይሉኛል፡፡ እርሱን፣ ዬኔታ ዕንቈ ባሕርይ ለሚባሉት አስተማርዬ ነገርኋቸው፡፡ ስነግራቸው ተገረሙና፣ እንዴ፣ ይኼ ምንድን ነው? ጳጳስ ትኾናለህ እንዳንል ከየት ወዴት?(ሣቅ)

.. እንደገና ደግሞ አስተማሪዬ፣ ዬኔታ አየለ ዓለሙ፣ እዚያ ጉባኤ ቤት ምን ይሉ ነበር.. እኔ መነኵሴ ነኝ፤ ጉባኤውን በየጠዋቱ በጸሎት የምከፍተው እኔ ነኝ፤ እርሳቸው በሌለኹበት ጊዜ፣ ጳጳሱ የት ሔዱ? ይሉ ነበር፡፡ ይህን እዚያ አካባቢ የነበረ ሰው ኹሉ ያውቀዋል፡፡ ከሹመት በኋላ፣ እዚያ ጉባኤ ተማሪ የነበሩ ኹሉ፥ የዬኔታ ዶ/ር አየለ ዓለሙ ትንቢት ደረሰ፤ ብለዋል፡፡ ይኼ ይኼ ነው እንጅ እኔ ሕልምም፣ ነገርም አልነበረኝ፡፡

የፓትርያርክ ምርጫው እስከተካሔደበት ወቅት ድረስ ኢየሩሳሌም ነው የነበርኩት፡፡ የመጨረሻው ስብሰባ እንደ ዛሬ ኾኖ በሳምንቱ ደግሞ ፓትርያርክ እንዲሾም ተወስኖ ተጠራኹና መጣኹ፡፡ በጭራሽ በሕልሜም ያልነበረ እኮ ነው፡፡ በሲኖዶሱ ተጠራኹና፣ ውድድሩ ውስጥ አስገብተነሃል፤ አሉኝ፡፡ ኧረ ብዙ ፈላጊ አለ፤ እባካችሁ ለምን እኔን? እኔ አልችለውም ይህን ጉዳይ፤ እኔ ጵጵስናም ስሾም አልፈለግኹም፤ ቅድም እንደተነጋገርነው፣ ወደ ግሪክ ሔጄ ትምህርት መቀጸል ነው እንጅ የማስበው የነበረው እንጅ መኾን አልፈለግኹም፤ አኹንም የፓትርያርክነት ጉዳይ ተመሳሳይ ነው፡፡ አንደኛ፡- ጉዳዩ በሕልሜ የለም፤ ኹለተኛ፡- ብዙ ፈላጊዎች አሉ አይደለም ወይ፤ እነርሱን አታወዳድሩም እንዴ? ብል፣ አይ አስገብተነሃል አሉ፤ እና ደግሞ የእግዚአብሔር ጥሪ ኾኖ መሰለኝ እኔ አለፍኩ፤ ከአምስት ተወዳዳሪዎች እኔ አለፍኩኝ፤ ከ806 መራጮች 500 ድምፅ አግኝቼ እንጅ በሕልሜም የለ፤ ፍላጎትም የለ፤ ኧረ እንደው እባክዎትን፤ እንደው አስቸጋሪ የኾነ ነገር የኾነው፤ ምን ይደረግ?

ሸገር ኤፍ.ኤም 102.1፡- ሓላፊነቱን ተሸክመዋል አኹን እንግዲኽ፤

ቅዱስነታቸው፡- ኡ ኡ ኡ… ቀላል አይደለም፤ ቀላል አይደለም፤

ሸገር ኤፍ.ኤም 102.1፡- ብርታቱንም ይስጥዎት፤ ትክክለኛውን መንገድ ያሳይዎት፤

ቅዱስነታቸው፡- አሜን፤ አሜን

ሸገር ኤፍ.ኤም 102.1፡- በጣም ነው የማመሰግነው፤ ቅዱስነትዎ፣ መዝሙር ያዳምጣሉ?

ቅዱስነታቸው፡- መዝሙር፣ አዎ፤ ብዙ ጊዜ ከሚያጥረኝ በቀር፤ እንዲያውም ብዙ ትርጓሜ መጻሕፍትና ዜማ የያዘ አይፓድ ነበረኝ፤ አኹን ተበላሸብኝ፤ አንዳንድ ጊዜ እርሱን አዳምጥ ነበር፤ ወሬ(ዜና) አዳምጣለኹ፤ እርሱ አያመልጠኝም፡፡ ሬድዩ ግን ከነጭራሹ የለኝም፤ የእናንተን ሬድዮ እንዴት እንደማዳምጥ አላውቅም፤(ሣቅ) እንዲያውም ጎንደር ሳለሁ ሬድዮ አዳምጥ ነበር፡፡ እዚኽ ግን ዜናውን ብቻ በቴሌቭዥን እመለከታለኹ፤ ከዚያ በኋላ ወደ ሥራዬ ነው፤ በቃ፡፡

ሸገር ኤፍ.ኤም 102.1፡- ፖፕ ፍራንሲስን አግኝተዋቸው ያውቃሉ፤ ከሌሎችም ጋራ እንደዚኹ፤

ቅዱስነታቸው፡- አዎ፣ እርሳቸው አንዱ ናቸው፤ የግብጹ ፓትርያርክንም ጎብኝቻለኹ፤ እርሳቸውም እዚኽ መጥተው ጎብኝተዋል፤ የሕንድ ኦርቶዶክስ ፓትርያርክንም ባለፈው ሔጄ ጎብኝቻለኹ፤ ሊባኖስ ያሉት የአርመን ፓትርያርክንም እዚያው ሔጄ ተገናኝተናል፤ የሶርያውን፥ ችግር ስለነበር በሀገሩ፣ አንዱ ዐርፈው ሌላው ሲሾሙ መሔድ ሲገባኝ አልሔድኩም፤ ኢየሩሳሌም ደግሞ ብዙ ፓትርያርኮች አሉ፤ የግሪክ ኦርቶዶክስ፣ የላቲን(ማለትም የካቶሊክ)፣ የአርመን ፓትርያርኮች አሉ፤ አብረን ኖረናል፡፡

ሸገር ኤፍ.ኤም 102.1፡- ብፁዕ ወቅዱስ አቡነ ማትያስ፥ በምን ቢታወሱ ይሻልዎታል? ስናስታውስዎት?

ቅዱስነታቸው፡- በምን ቢታወሱ!? ኧሃ.. በቃ፣ በመንፈሳዊነት፤ ሌላ ምን አለኝ፡፡

ሸገር ኤፍ.ኤም 102.1፡- በዚያ ቢታወሱ ደስ ይልዎታል፤

ቅዱስነታቸው፡- አዎ፤

ሸገር ኤፍ.ኤም 102.1፡- እግዚአብሔር ይስጥልኝ፤

ቅዱስነታቸው፡- እግዚአብሔር ይስጥልኝ፤ እናንተም ስለመጣችኹ አመሰግናለኹ፡፡

በዓለ ትንሣኤ: ከድል ዅሉ የበለጠ የድል ቀን ነው፤ ለመጨረሻው ተግባራዊ ፍጻሜ በእምነትና በሥነ ምግባር መገስገስ ነው – ቅዱስ ፓትርያርኩ

  • ኃጢአት፣ ፍትሐ ኵነኔና ሞተ ነፍስ ተወግደው፣ በክርስቶስ ቤዛነት፥ ጽድቅን፣ ይቅርታንና ሕይወተ ነፍስን የተቀዳጀንበት ነው፤
  • የነፍሳተ ሰብእ ጉዞ ወደ ዲያብሎስ ከተማ – ወደ ሲኦል መኾኑ ቀርቶ፣ ወደ እግዚአብሔር ከተማ – ወደ ጽዮን መንግሥተ ሰማያት ኾነ፤
  • የትንሣኤ ዕድል በክርስቶስ ቤዛነት ለዅሉም ተሰጥቶአል፤ ዐዋጁ በክርስቶስ ትንሣኤ ጸድቆአል፡፡ ወደዚያው በእምነትና በሥነ ምግባር መገስገስ ነው፤
  • እግዚአብሔርን በመከተል የአባታችንን ተቀዳሚ፣ መደበኛና ቀዋሚ ሥራ የኾነውን ሰውን የማዳን ሥራ ሳናቋርጥ የማስቀጠል ግዴታ አለብን፤
  • ለሥነ ልቡና ውድቀት፣ ለቀቢፀ ተስፋና ለስሑት ትምህርት ተጋልጠው ሃይማኖታቸውንና ታሪካቸውን በመፃረር የሚገኙትን መመለስ የምእመኑና የመምህራን ግዴታ ነው፤
  • በአእምሮ የላቁ ኾኖ መገኘት በራሱ እውነተኛ ትንሣኤ ነው፤

 

*                     *                   *

ቃለ በረከት ዘብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት ዘተናገረ በእንተ በዓለ ትንሣኤ ቅድስት ዘእግዚእነ ወአምላክነ ወመድኃኒነ ኢየሱስ ክርስቶስ ሎቱ ስብሐት

በስመ አብ ወወልድ ወመንፈስ ቅዱስ አሐዱ አምላክ አሜን
  • በአገራችን በኢትዮጵያ በገጠርና በከተማ የምትኖሩ፤
  • ከአገር ውጭ በተለያዩ አህጉር የምትገኙ፤
  • የአገራችንን ዳር ድንበር ለመጠበቅና ለማስከበር በየጠረፉ የቆማችኹ፤
  • በሕመም ምክንያት በየጠበሉና በየሆስፒታሉ ያላችኹ፤
  • እንዲሁም የሕግ ታራሚዎች ኾናችሁ በየማረሚያ ቤቱ የምትገኙ ኢትዮጵያውያንና ኢትዮጵያውያት፤

በትንሣኤው ኃይል በመቃብር ውስጥ በስብሶ መቅረትን ሽሮ፣ ትንሣኤ ሙታንን ያበሠረ፣ ጌታችን አምላካችንና መድኃኒታችን ኢየሱስ ክርስቶስ፣ እንኳን ለኹለት ሺሕ ዘጠኝ ዓመተ ምሕረት በዓለ ትንሣኤው በሰላም አደረሳችኹ!!

‹‹ወሰበረ ኆኃተ ብርት ወቀጥቀጠ መናሥግተ ዘሐፂን = የናስ ደጆችን ሰባበረ፤ የብረት መወርወሪያዎችንም ቀጥቅጦ ቈራረጠ፤›› (መዝ. ፻፯፥፲፮)፡፡

ይህ አምላካዊ ኃይለ ቃል፣ ወልደ እግዚአብሔር የኾነ ኢየሱስ ክርስቶስ በመሥዋዕትነቱ ብቃት እንደ ናስ የጠነከሩትን የኃጢአት ደጆች እንደሚሰባብር፤ እንደ ብረት የጸኑትን የሞት ብረቶች ቀጥቅጦ በመቈራረጥ እንሚያስወግድ መንፈስ ቅዱስ በዳዊት አንደበት የተናገረው ቃለ ብሥራት ነው፡፡ የኃይለ ቃሉ ምስጢራዊ ይዘት፥ በጠንካራ ነገር የተዘጉና በጽኑ መወርወሪያዎች ክርችም ብለው የተዘጉ ደጆች መኖራቸውን ጠቁሞ፣ እነዚኽን ሰባብሮና ቀጥቅጦ በሩን የሚከፍት አንድ ኃያል መሢሕ እንደሚመጣ የሚያመለክት ነው፡፡

በመጀመሪያው የመጽሐፍ ቅዱስ ክፍል እንደምናነበው፥ የሰው መኖሪያ የነበረው ገነተ ኤዶም፣ በኃጢአተ ሰብእ ምክንያት በፍትሐ እግዚአብሔር ሲዘጋ፣ በሰይፈ ነበልባል እንደ ተከረቸመ፤ ኪሩባውያን ኃይላትም በጥበቃ እንደ ተመደቡበት በግልጽ ተመዝግቦአል፡፡ ይህ የጽድቅ፣ የክብርና የሕይወት ደጅ በዚኽ ኹኔታ ሲዘጋ፣ ለሰው ልጅ የቀረለት መኖሪያ፥ ለሰይጣንና ለሠራዊቱ የተዘጋጀው፤ እሳቱ የማይጠፋ፣ ትሉ የማያንቀላፋ የእቶነ እሳት ከተማ ነበረ፡፡

ለመለኮታዊ ሱታፌና ለዘለዓለማዊ ሕይወት ታድሎ የነበረው የሰው ልጅ፣ ለእግዚአብሔር ባለመታዘዙ ምክንያት ለአምስት ሺሕ አምስት መቶ ዓመታት ያህል የተጋዘው፣ ከላይ በተጠቀሰው የዲያብሎስ ከተማ ነበር፡፡ የዚኽ ከተማ ደጆችና በሮች፣ መዝጊያዎችና መወርወሪያዎች፥ ኃጢአት፣ ፍትሐ ኵነኔ እና ሞተ ነፍስ ወሥጋ ነበሩ፡፡ የሰው ልጅ ኃጢአትን ስለ ሠራ እግዚአብሔር የቅጣት ፍርድን ፈረደበት፤ ቅጣቱም የነፍስና የሥጋ ሞት ነበረ፡፡ እነዚኽ ነገሮች እርስ በርስ እንደ ሰንሰለት ተያይዘው የዲያብሎስን ከተማ የናስና የብረት ያኽል ጠንካራ ደጅ እንዲኾን አድርገውታል፡፡

ይህን በር ሰብሮና ፈልቅቆ፣ የሰዎችን ነፍሳት ከዲያብሎስ ከተማ መዝዞ ለማውጣት፣ ለፍጡር ፈጽሞ የማይቻል ነበረ፤ ሦስቱም ነገሮች ከፍጡራን ዓቅም በላይ በመኾናቸው አምላካዊ ኃይል የግድ አስፈላጊ ኾነ፡፡ በዚኽም ምክንያት ጌታችን ሥጋችንን ተዋሕዶ በዚኽ ዓለም በመገለጥ እኛ ከኃጢአት፣ ከፍትሐ ኵነኔ ከሞተ ነፍስ የምንድንበት መንገድ እርሱ ብቻ መኾኑን በአጽንዖት አስተማረ፡፡

በመጨረሻም፣ እንደ ትምህርቱና እንደ ቃሉ፣ በመስቀሉ ኃይል ወይም በመሥዋዕትነቱ  ብቃት ሦስቱ ነገሮች ማለትም፦ ኃጢአት፣ ፍትሐ ኵነኔ እና ሞተ ነፍስ ከሰው ጫንቃ ላይ እንዲወገዱ አደረገ፡፡ ለሰው የማይቻል የነበረ ይህ ግብረ አድኅኖ፣ በተዋሕዶ፥ አምላክም ሰውም ለኾነ፣ ለጌታችን ለአምላካችንና ለመድኃኒታችን ለኢየሱስ ክርስቶስ የሚቻል ነበርና በእርሱ መሥዋዕትነት እውን ኾነ፡፡

ጥንቱንም ለሰው ልጅ ሕይወትና ክብር ጠንቆች የነበሩ እነዚኽ ሦስቱ ነበሩና፣ እነርሱ ተሰባብረውና ተቀጥቅጠው ሲወገዱ በሲኦል ይኖሩ የነበሩ ሰዎች ነፍሳት በአጠቃላይ ዓለም ከመፈጠሩ በፊት ወደ ተዘጋጀላቸው ወደ መንግሥተ እግዚአብሔር ተመልሰው ገቡ፡፡ ከክርስቶስ ሞት በኋላ የነፍሳተ ሰብእ ጉዞ ወደ ዲያብሎስ ከተማ – ወደ ሲኦል መኾኑ ቀርቶ፣ ወደ እግዚአብሔር ከተማ – ወደ ጽዮን መንግሥተ ሰማያት ኾነ፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት፤

እኛ ኦርቶዶክሳውያን ክርስቲያኖች፣ በዓለ ትንሣኤን ከምንም በላይ በላቀ ኹኔታ የምናከብርበት ምክንያት፥ ኃጢአት፣ ፍትሐ ኵነኔ እና ሞተ ነፍስ ወዲያ ተሽቀንጥረው በምትካቸው በክርስቶስ ቤዛነት፥ ጽድቅን፣ ይቅርታንና ሕይወተ ነፍስን የተቀዳጀንበትና ከድል ዅሉ የበለጠ የድል ቀን በመኾኑ ነው፡፡ ዅላችንም መገንዘብ ያለብን ዓቢይ ነገር፣ የክርስቶስ ድርጊቶች በሙሉ ለሰው ድኅነት ሲባል ብቻ የተደረጉ እንጂ ለእግዚአብሔር የሚፈይዱት አንዳች ምክንያት የሌላቸው መኾኑን ነው፤ ይህም ማለት በክርስቶስ የተፈጸሙ ድርጊቶች በሙሉ ለእኛ ሲባል የተደረጉ መኾናቸውን መገንዘብ አለብን ማለት ነው፡፡

ክርስቶስ ተሰቀለ፤ ሞተ፤ ተቀበረ፤ ተነሣ ሲባል፣ እኛ ተሰቀልን፤ ሞትን፤ ተቀበርን፤ ተነሣን ማለት እንደ ኾነ ልብ ብለን ልናስተውል ይገባል፡፡ እኛ ተሰቅለን ሞተንና ተቀብረን የኃጢአታችንን ዕዳ የመክፈል ዓቅም ስላጣን ለእኛ ያልተቻለውን ጌታችን ስለ እኛ ብሎ፣ በእኛ ምትክ ኾኖ ለኃጢአታችን መከፈል የነበረበትን ዋጋ ዅሉ ከፍሎ አድኖናልና ነው፡፡ እኛ በክርስቶስ ቤዛነት ነጻነታችንን ተቀዳጅተን ወደ እግዚአብሔ መንግሥት ዳግመኛ መግባት የቻልነው ክርስቶስ የከፈለው መሥዋዕትነት ለእኛ ተብሎ፣ ስለ እኛ የተደረገ በመኾኑ ነው፡፡

የክርስቶስ ትንሣኤ የእርሱ ትንሣኤ ብቻ እንደ ኾነ አድርገን የምንገነዘብ ከኾነ ታላቅ ስሕተትም ነው፤ ኃጢአት፣ ኵነኔ እና ሞተ ነፍስ የሌለበት እርሱማ ምን ትንሣኤ ያስፈልገዋል? ትንሣኤ ለሚያስፈልገን ለእኛ ተነሣልን እንጂ፡፡ ሐዋርያው ቅዱስ ጳውሎስ ይህንን አስመልክቶ ሲያስተምር፣ ‹‹እግዚአብሔር በምሕረቱ ባለ ጸጋ ስለ ኾነ በኢየሱስ ክርስቶስ አስነሣን፡፡ ከእርሱ ጋርም በሰማያዊ ሥፍራ አስቀመጠን፤›› ብሎአል (ኤፌ.፪፥ ፬-፯)፡፡ ከዚኽ አኳያ የቀን ጉዳይ ካልኾነ በቀር የትንሣኤያችን ጉዳይ በክርስቶስ ትንሣኤ የተረጋገጠና ያለቀለት ነገር እንደ ኾነ ማስተዋል፣ መገንዘብ፣ መረዳትና ማመን ይገባናል፡፡

የጌታችን ትንሣኤ ለሰው ልጅ ተብሎ የተደረገ በመኾኑ የእኛ ትንሣኤ ነው ብለን ዅሌም መውሰድና መቀበል አለብን፤ ምክንያቱም የክርስቶስ ትንሣኤ የመጨረሻ ግቡ የሰው ልጆች ትንሣኤን ማረጋገጥ ነውና፡፡ የትንሣኤ ዕድል በክርስቶስ ቤዛነት ለዅሉም ተሰጥቶአል፤ ዐዋጁም ሕጉም በክርስቶስ ትንሣኤ ጸድቆአል፡፡ የቀረ ነገር ቢኖር የመጨረሻው ተግባራዊ ፍጻሜ ነው፤ እርሱም ቀነ ቀጠሮ የተያዘለት ስለ ኾነ ወደዚያው በእምነትና በሥነ ምግባር መገስገስ ነው፡፡ ሰውን ለዚህ ዐቢይ ጸጋና ዕድል ላበቃ ለእግዚአብሔር አምላካችን ክብርና ምስጋና ለእርሱ ይኹን፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት

ጌታችን አምላካችንና መድኃኒታችን ኢየሱስ ክርስቶስ የሠራውና ያስተማረው ዅሉ ምን ለማግኘት ነበረ? ተብሎ ቢጠየቅ በአጭር ዐረፍተ ነገር ‹‹ሰውን ለማዳን ነዋ!›› ብሎ መመለስ ይቻላል፡፡ እውነቱም ሐቁም ይህና ይህ ብቻ ነው፡፡ ይህን ያህል ውጣ ውረድ፣ ይህን ያህል ዋጋ ያስከፈለ የሰው መዳን በእግዚአብሔር ዘንድ ምን ያኽል ተፈላጊ እንደ ኾነ በአድናቆት መመልከትና መቀበል ታላቅ አስተዋይነት ነው፡፡

በዚኽ ሰውን የማዳን የእግዚአብሔር ክንውን፣ እኛ ሰዎች የእግዚአብሔር ልጆች ለመኾን በቅተናል፤ ልጆቹም ኾነናል፡፡ ታድያ ልጅ በጠባይም፣ በመልክም፣ በሥራም አባቱን ቢመስል ጌጥም የክብር ክብርም ነውና በዅሉም ነገር አባታችንን መከተልና መምሰል ከእኛ ይጠበቃል፡፡ እግዚአብሔር አባታችን እንደ መኾኑ፣ እኛም ልጆቹ እንደ መኾናችን መጠን የአባታችንን ተቀዳሚ፣ መደበኛና ቀዋሚ ሥራ የኾነውን ሰውን የማዳን ሥራ ሳናቋርጥ የማስቀጠል ግዴታ አለብን፡፡

ዛሬም ዓለማችን፥ የሚያድናትን፣ እስከ ሞት ድረስም ደርሶ ቤዛ የሚኾናትን፣ ሰላምንና ነጻነትን የሚያቀዳጃትን የእግዚአብሔርን ልጅ ትፈልጋለች፡፡ የጌታችን ትንሣኤ ከመቃብር በመነሣትና ሙታንን በማስነሣት ብቻ የሚገለጽ አይደለም፡፡ ጌታችን ከመሞቱና ከመነሣቱ በፊት ብዙ ሰዎችን ከረኃብ፣ ከበሽታ፣ ከሥነ ልቡና እና ውድቀት አስነሥቷል፤ ከተሳሳተ አመለካከት፣ ከጭካኔ ከመለያየት አባዜም በተኣምራትም በትምህርትም አድኗል፡፡ ጌታችን ሰውን ለማዳን ሥራ በእርሱ ብቻ ተሠርቶ እንዲቀር አላደረገም፤ እኛም እንድንሠራውና እንድንፈጽመው አዘዘን እንጂ፡፡

ከዚህ አንጻር፣ በክርስቶስ ዘመን እንደ ነበረው ዅሉ ዛሬም፣ ብዙ በሽተኞች የሚያድናቸው አጥተው በየጎዳናው፣ በየሰፈሩ፣ በየመንገዱ ወድቀው ይሠቃያሉ፤ እነዚኽን ማን ያድናቸው? የተመጣጠነና በቂ ምግብ አጥተው ብዙ ሕፃናት፣ እናቶችና አረጋውያን በረኃብ አለንጋ ይገረፋሉ፤ ኅብስቱን አበርክቶ እነሱን ማን ይመግባቸው? በተሳሳተ አመለካከት ለሥነ ልቡና ውድቀት፣ ለቀቢፀ ተስፋ እንደዚሁም ለስሑት ትምህርተ ሃይማኖት ተጋልጠው ሃይማኖታቸውንና ታሪካቸውን በመፃረር የሚገኙ ብዙ ናቸው፤ እነዚኽን ማን አስተምሮ ወደ እውነቱ ይመልሳቸው? በእግዚአብሔር ዘንድ እነዚኽን ሥራዎች መሥራትና ማስተካከል የሕዝበ ክርስቲያኑና የመምህራነ ወንጌል ግዴታዎች ናቸው፡፡

በማኅበረሰቡ ሥር ሰደውና ተስፋፍተው የሚታዩትን እነዚህን መሰል ሃይማኖታዊና ማኅበራዊ ችግሮች በወሳኝነት ለመቋቋም፣ ትምህርትና ልማት መተኪያ የሌለውን ሚና ይጫወታሉ፤ ለአገራችን ደህንነት መወገድ ቍልፍ መፍትሔ፥ ሃይማኖትና ልማትን አጣምሮ ለመያዝና በእነርሱ ጸንቶ መኖር አማራጭ የሌለው ነው፡፡ ከእነዚኽ ውጭ የኾነ ኑሮ፣ ምንም ቢኾን ምሉዕ አይደለም፤ ጣዕምም የለውም፡፡ የሰውን ዅለንተናዊ ሕይወት ለማዳን ኹለቱንም በተግባር መተርጐም ያስፈልጋል፡፡

አገራችን ኢትዮጵያ ከጥንት ጀምሮ በእነዚኽ ነገሮች የታደለች እንደ ነበረችና እነዚኽን አጣምራ በመያዝ የት ደርሳ እንደ ነበር በአገሪቱ ውስጥ ያሉ የሚታዩና የማይታዩ መረጃዎች ምስክርነታቸውን በመስጠት ዛሬም አልተገቱም፡፡ በአኹኑ ጊዜ አገራችን የተያያዘችውን የልማትና የሰላም ጉዞ አጠናክራ እስከ ቀጠለች ድረስ ሕሙማን የሚፈወሱባት፣ ሩኁባን ጠግበው የሚኖሩባት፣ በመንፈሳዊና በዘመናዊ ዕውቀት የበለጸጉ ዜጎች የሚታዩባት አገር የማትኾንበት ምክንያት ምንም የለም፡፡

መላው የአገራችን ሕዝቦች በኑሮአቸውና በሕይወታቸው መሠረታዊ ለውጥ ማምጣት የሚችሉት በሌላ ሳይኾን፣ እነርሱ ራሳቸው እንደ ቀድሞ አባቶቻቸው በራስ በመተማመንና በልበ ሙሉነት፣ በትጋትና በቅንነት፣ በፍቅርና በስምምነት፣ በእኩልነትና በወንድማማችነት፣ በሰላምና በአንድነት፣ በመቻቻልና በአብሮነት ኾነው በሚያስመዘግቡት የልማት ውጤት እንደ ኾነ መርሳት የለባቸውም፡፡ አገርን ለማልማትና የጠላትን ጥቃት በብቃት ለመመከት በአንድነት ኾኖ ከመታገል የተሻለ አማራጭ የለም፤ ስለዚኽ ሕዝባችን እነዚኽን እስከ መቼውም ቢኾን በንቃት ሊከታተላቸውና ሊጠብቃቸው ይገባል፡፡ በአእምሮ የላቁ ኾኖ መገኘት በራሱ እውነተኛ ትንሣኤ ነውና፡፡

በመጨረሻም፤

የጌታችን ትንሣኤ ሰውን የማዳን የእግዚአብሔር ዓላማን ያሳካ ፍጻሜ እንደ ኾነ ዅሉ፣ የትንሣኤ ልጆች የኾንን እኛም፣ ሰውን ለማዳን በሚደረገው መንፈሳዊና ልማታዊ ርብርቦሽ ተሳትፏችንን አጠናክረን እንድንቀጥል መንፈሳዊና አባታዊ መልእክታችንን በእግዚአብሔር ስም እናስተላልፋለን፡፡

መልካም በዓለ ትንሣኤ ያድርግልን፡፡

እግዚአብሔር ኢትዮጵያንና ሕዝቦቿን ይባርክ፤ ይቀድስ፡፡

ወስብሐት ለእግዚአብሔር፤ አሜን፡፡

አባ ማትያስ ቀዳማዊ

ፓትርያርክ ርእሰ ሊቃነ ጳጳሳት ዘኢትዮጵያ

ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት

ሚያዚያ ፰ ቀን ፳፻ወ፱ ዓ.ም

አዲስ አበባ፤ ኢትዮጵያ

በግብጽ ኹለት አብያተ ክርስቲያናት የቦምብ ጥቃቶች ከ40 በላይ ኦርቶዶክሳውያን ተገደሉ

  • ራሱን፣ እስላማዊ መንግሥት የሚለው ቡድን፣ ለጥቃቱ ሓላፊነት ወሰደ
  • ሟቾችና ተጎጅዎች የሚታሰቡበት፣ የሦስት ቀናት ብሔራዊ ሐዘን ታወጀ


ጌታችን መድኃኒታችን ኢየሱስ ክርስቶስ፣ በአህያ ውርንጭላ ኹኖ፣ “ሆሣዕና በአርያም” እየተባለ ወደ ቤተ መቅደስ የገባበትን ዕለት በምናስብበትና በሕማማቱ ዋዜማ በምንገኝበት በስምንተኛው የዐብይ ጾም ሰንበት(የፀበርት እሑድ)፣ ዛሬ፣ በሰሜናዊ ግብጽ የታንታ ቅዱስ ጊዮርጊስ እና በአሌክሳንደርያ የቅዱስ ማርቆስ ካቴድራል ደጃፍ፣ በአሸባሪዎች በተፈጸሙ ተከታታይ የቦምብ ጥቃቶች፣ ከ40 በላይ ኦርቶዶክሳውያን ክርስቲያኖች
ተገደሉ፤ ከመቶ ያላነሱ ቆሰሉ፡፡

ከሟቾቹ 29ኙ፣ በናይል ዴልታ በሚገኘው የታንታ ቅዱስ ጊዮርጊስ ቤተ ክርስቲያን ውስጥ፣ በምእመናኑ መቀመጫ የፊት ወንበሮች በተጠመደው ቦምብ የተገደሉቱ ሲኾኑ፤ 71ዱ ደግሞ በፍንዳታው የተጎዱ ናቸው፡፡

ከጥቂት ሰዓታት በኋላ፣ መንበረ ፕትርክናው በሚገኝባት በወደብ ከተማዋ የእስክንድርያ ቅዱስ ማርቆስ ካቴድራል በራፍወደ ቤተ ክርስቲያኑ ዘልቆ ለመግባት ከሞከረ አጥፍቶ ጠፊ መታጠቂያ(suicide vest) የነጎደው ቦምብ፣ ቢያንስ 18 ሰዎችን መግደሉንና ከ40 ያላነሱትን ማቁሰሉ ተጠቅሷል፤ ከተገደሉት ሦስቱ፣ አጥፍቶ ጠፊው ወደ ካቴድራሉ ዘልቆ እንዳይገባ ያስቆሙት ወንድና ሴት ፖሊሶች መኾናቸው ታውቋል፡፡

ጥቃቱ ሲፈጸም፣ በካቴድራሉ ጸሎተ ቅዳሴውንና የበዓለ ሆሣዕናውን ሥነ ሥርዓት የመሩት የኮፕቱ ፖፕና የእስክንድርያው ፓትርያርክ ብፁዕ ወቅዱስ አቡነ ታዎድሮስ፣ በካቴድራሉ ውስጥ እንደነበሩ ተገልጿል፡፡ “እንዲኽ ያሉ እኵይ ድርጊቶች፣ የግብጽን ሕዝብ አንድነትና ስምምነት አያዳክመውም፤” ብለዋል ቅዱስነታቸው፣ ለሀገሪቱ ቴሌቭዥን ሲናገሩ፡፡

ኦርቶዶክሳውያን ክርስቲያኖችን፣ በከፍተኛ ቁጥርና በጅምላ ለመፍጅት የታቀደበትን ይህንኑ ጥቃት፣ ያቀናበርኹት እኔው ነኝ፤ ሲል፣ ራሱን እስላማዊ መንግሥት ብሎ የሚጠራው ዓለም አቀፉ አሸባሪ ቡድን በድረ ገጹ አስታውቋል፡፡

25 ምእመናን ከተገደሉበትና 49 ከቆሰሉበት ካለፈው ታኅሣሥ የካይሮ ጥቃት ወዲኽ፣ በአምስት ወራት ውስጥ ለኹለተኛ ጊዜ የተፈጸመው የዛሬው ፍጅት፣ ከጠቅላላው ሕዝብ 10 በመቶ የሚኾኑት ኦርቶዶክሳውያን ክርስቲያኖች፣ በቀላሉ ተጋላጭ የአሸባሪዎች ዒላማ(the softest targets) እየኾኑ እንዳሉ አረጋግጧል፡፡ ከሆሣዕና ክብረ በዓል ጋራ በተያያዘ፣ የጸጥታ ጥበቃው በተጠናከረበት ይዞታ ውስጥ መፈጸሙ ደግሞ፣ የክርስቲያኖችን መፃኢ ሕይወት ይበልጥ አሳሳቢ አድርጎታል፤ ተብሏል፡፡

ከዛሬው የታንታ ቅዱስ ጊዮርጊስ ፍንዳታ ቀደም ብሎ፣ በዚያው ከተማ አንድ መስጊድ ውስጥ የተጠመደ ቦምብ፣ በጸጥታ ኃይሎች እንዲከሽፍ መደረጉና እስላማዊ ቡድኑም በክርስቲያኖች ላይ አስከፊ ጥቃት እንደሚያደርስ በግልጽ ሲዝት መቆየቱ፣ በቂ ማስጠንቀቂያ የሚሰጥ ኾኖ ሳለ፣ የዛሬው ተከታታይ ፍጅት መፈጸሙ፣ የጸጥታና የደኅንነት አካሉን አስተማማኝነት ጥያቄ ውስጥ እንደሚከተው ተመልክቷል፡፡

በታንታ፣ ጥቃቱ የተፈጸመበት ግዛት የደኅንነት ሹም፣ ከሓላፊነታቸው እንዲገለሉ የተደረገ ሲኾን፣ የጦር ሠራዊቱም ከፖሊስ ኃይሉ ጋራ በመቀናጀት የሀገሪቱን ወሳኝ ተቋማት ጥበቃ እንዲያጠናክር፣ በፕሬዝዳንት አብዱል ፈታሕ ኤል-ሲሲ ከተመራው የወታደራዊ ምክር ቤቱ አስቸኳይ ስብሰባ በኋላ፣ በተላለፈ ትእዛዝ መሠማራቱን አኸራም ኦንላየን ዘግቧል፡፡

ድረ ገጹ ቆይቶ እንዳስታወቀው፣ በጥቃቱ የተገደሉና የተጎዱ ወገኖች የሚታሰቡበት፣ የሦስት ቀናት ብሔራዊ ሐዘን፣ በፕሬዝዳንቱ ጽ/ቤት ታውጇል፤ የአስቸኳይ ጊዜ ዐዋጅም ሊጣል እንደሚችል ተጠቁሟል፡፡


የሰላም ምልክት የኾነውን የተባረከ የሆሣዕና ዘንባባ(ፀበርት)፣ እንደመስቀል እየሠራን በየቤታችን፣ በራሳችንና እንደቀለበት በጣታችን ሰቅለንና ሰክተን በምንታይበት በዛሬው ሰንበት፣ በአሸባሪው የአይ ኤስ ቡድን የተፈጸመው አሠቃቂ ጥቃት፣ በዓለም አቀፍ ደረጃ እየተወገዘ ነው፡፡

ሐዘናቸውንና አጋርነታቸውን ለግብጽ ሕዝብና መንግሥት እየገለጹ ካሉት የሀገርና የሃይማኖት መሪዎች መካከል አንዱ የኾኑት የካናዳው ጠቅላይ ሚኒስትር፥ የሆሣዕና ዘንባባ፣ ትእምርተ ሰላም መኾኑን ማስታወስ እንደሚገባና ጽንፈኞች፥ የሕዝቡን ማኅበራዊ ዕሴትና ትስስር በመበጣጠስ ሊፈጥሩ የሚመኙትን ዕልቂት ለመመከት፣ ተደጋግፎ በጋራ መዋጋት እንደሚያስፈልግ አሳስበዋል፡፡


በኦስትርያ ታቦታቱንና ንዋያተ ቅድሳቱን መዝብረው የኮበለሉት አስተዳዳሪ እያወዛገቡ ነው

  • ለመንበረ ፓትርያርኩ ሪፖርት እንዲያደርጉ ቢጠሩም፣ ለመታዘዝ ፈቃደኛ አልኾኑም
  • ለ19 ዓመታት የተከማቸውን የደብሩን ገንዘብ፣ የማኅበር ሀብት ነው፤ በማለት ክደዋል
  • መድቦ የላካቸውን ቅዱስ ሲኖዶስ፥ “አላውቅም” ብለው ከማዕከላዊ አስተዳደር ተለይተዋል
  • ውጭ ስምሪታችን፣ ሲኖዶሳዊ አሠራሩን አክብረው፣ ለተልእኮ ብቁ ለኾኑት ትኩረት ይሰጥ

*                                       *

(አዲስ አድማስ፤ ቅጽ 16 ቁጥር 899፤ ቅዳሜ፣ መጋቢት 30 ቀን 2009 ዓ.ም.)


በኦስትርያ – ቪየና፣ የኢትዮጵያ ኦርቶዶክስ ተዋሕዶ ቤተ ክርስቲያን ምእመናንን በመክፈልና የቤተ ክርስቲያኒቱን ኹለት ታቦታት ከንዋያተ ቅድሳታቸው ጋራ በማውጣት፣ የኢትዮጵያን ቅዱስ ሲኖዶስ አላውቅም፤ በማለት ኮብልለዋል የተባሉት የቀድሞው የደብር አስተዳዳሪ፣ መጋቤ ስብሐት አባ ብርሃኑ ደበበ ጉዳይ እያነጋገረ ነው፡፡

አስተዳዳሪው የኮበለሉት፣ ከቅዱስ ሲኖዶስ ለተላለፈላቸው መመሪያ ባለመታዘዝ ከሓላፊነታቸው ከተነሡና በሌላ አስተዳዳሪ መተካታቸውን ተከትሎ እንደኾነ ተገልጿል፡፡


በኦስትርያ – ቪየና በምትገኘው የደብረ ሲና ቅድስት ኪዳነ ምሕረት ቤተ ክርስቲያን፣ ላለፉት 12 ዓመታት በአስተዳዳሪነት የቆዩት መጋቤ ስብሐት አባ ብርሃኑ፣ ከአስተዳደር ሥራዎች ጋራ በተያያዘ፣ ባለፈው ዓመት ጥቅምትና ኅዳር ወራት፣ በደብሩ ሰበካ ጉባኤና በምእመናን ተደጋጋሚ አቤቱታ የቀረቡባቸው ሲኾን፤ ችግሩን ለመፍታትና የተጓደለውን አገልግሎት ለማሟላት እንዲቻል፣ ንብረቱን ለሰበካ ጉባኤው አስረክበው ወደ አዲስ አበባ እንዲመለሱና ለመንበረ ፓትርያርክ የውጭ ግንኙነት መምሪያ ሪፖርት እንዲያደርጉ፣ ከቅዱስ ሲኖዶስ አስቸኳይ ትእዛዝ ተላልፎላቸው እንደነበር ተጠቅሷል፡፡

ይኹንና፣ “ለጠቅላይ ቤተ ክህነቱ የተላከው ደብዳቤ ለእኔም ይላክልኝ” የሚል ተገቢ ያልኾነ ጥያቄ በመጠየቅ፣ በትእዛዙ መሠረት ወደ ሀገር ቤት ባለመመለሳቸው፣ ካለፈው ዓመት መጋቢት ጀምሮ ከአስተዳዳሪነታቸው ተነሥተው፣ መጋቤ ብሉይ አባ ዘተክለ ሃይማኖት ገብረ መስቀል በተባሉ ሌላ ሓላፊ መተካታቸው ታውቋል፡፡

በቅዱስ ሲኖዶስ የተመደቡት አዲሱ አስተዳዳሪ ወደ ስፍራው ቢጓዙም፣ መጋቤ ስብሐት አባ ብርሃኑ፣ የደብሩን ንዋያተ ቅድሳትና ንብረት ለሰበካ መንፈሳዊ ጉባኤው ለማስረከብ ፈቃደኛ ባለመኾናቸው በተፈጠረው ውዝግብ፣ ቤተ ክርስቲያኒቱን አዘግተው፣ ቍልፉን እስከማስወሰድ ደርሰው እንደነበር ተነግሯል፡፡

ብፁዕ ወቅዱስ ፓትርያርክ አቡነ ማትያስ፣ በኦስትርያ – ለካቶሊክ ቤተ ክርስቲያን ካርዲናልና የጳጳሳት ጉባኤ ሓላፊ በጻፉት የትብብር ጥያቄ፤ ቤተ ክርስቲያኒቱን መልሶ ለመክፈት የተቻለ ቢኾንም፣ የቀድሞው አስተዳዳሪ፣ የደብሩን የቅድስት ኪዳነ ምሕረትና የቅዱስ ገብርኤል ታቦታት ከንዋያተ ቅድሳታቸው ጋራ በማውጣትና ምእመናኑን በመክፈል ከቤተ ክርስቲያን ማዕከላዊ አስተዳደር ተለይተው ኮብልለዋል፤ ተብሏል፡፡ ላለፉት 19 ዓመታት ከተለያዩ የገቢ ምንጮች አስተዋፅኦ እየተደረገ የተቀመጠውን፣ ከ75ሺሕ ዩሮ በላይ የቤተ ክርስቲያኒቱን የባንክ ሒሳብ፣ ‹‹የማኅበር  ሀብት ነው፤›› በሚል ፍጹም ክሕደት መፈጸማቸውም ተጠቁሟል፡፡


[እንደ ምእመናኑ መረጃ፣ ለደብሩ በአስተዳዳሪነት የሚመደቡት ካህናት፣ በቪየና የካቶሊክ ቤተ ክርስቲያን ድጋፍ የሚሰጠውን የከፍተኛ ትምህርት ስኮላርሽፕ የመከታተል ዕድል ያገኙ ናቸው፡፡ በሓላፊነቱ ላይም የሚቆዩት፣ ትምህርታቸውን እስኪያጠናቅቁ ድረስ ባሉት የተወሰኑ ዓመታትና በየጊዜው ስለትምህርት ክትትላቸውና የአገልግሎት አፈጻጸማቸው በሚያቀርቡት ሪፖርት እየተመዘኑ ነው፤ በመንበረ ፓትርያርኩ ሲጠሩም ወደ ሀገር ቤት መመለስ ይኖርባቸዋል፡፡

በዚኽም መሠረት፣ መጋቤ ስብሐት አባ ብርሃኑ ደበበ፣ የከፍተኛ ትምህርት ዕድሉን አግኝተው ቢላኩም፣ በአግባቡ እንዳልተከታተሉትና ስለአስተዳደራቸውም ይኹን ስለትምህርት ይዞታቸው አንዳችም ሪፖርት ሳይልኩ ለዓመታት እንደቆዩ በፓትርያርኩ ደብዳቤ ተጠቅሷል፡፡

ከጊዜ በኋላ በተፈጠሩ ውዝግቦች ሳቢያ አስተዳዳሪውን ከቦታቸው አንሥቶ፣ በምትኩ፣ ትምህርቱን እየተከታተለ ተልእኮውን በአግባቡ ሊፈጽም የሚችል ሌላ ሓላፊ መተካት እንዳለበት ታምኖበታል፤ ብለዋል – ፓትርያርኩ፡፡ ይህም፣ ሰላምን በመፍጠርና በማረጋጋት የቤተ ክርስቲያኒቱ ሉዓላዊነትና ክብር እንዳይጣስ፣ የአጥቢያው ምእመናን አንድነት እንዳይፈርስ አስፈላጊ እንደኾነ አስገንዝበዋል፡፡

ከቤተ ክርስቲያኒቱ ምሥረታ ቀደም ሲል፣ በኪዳነ ምሕረት ስም በአቋቋሙት የጽዋ ማኅበር እየተገናኙ እምነታቸውን ሲያጸኑ እንደቆዩና በየሦስት ወሩ ከተለያዩ የአውሮጳ ሀገራት ካህናትን በመጋበዝ የጸሎተ ቅዳሴና የክርስትና አገልሎት በማግኘት የተወሰኑ ዓመታት ማሳለፋቸውን ምእመናኑ አውስተዋል፡፡ በመንፈሳዊ ፍቅር የወንድማማችነትና የእኅትማማችነት አንድነትን በመፍጠር ክርስቲያናዊ ፍላጎታቸው እየጠነከረ በመሔዱም፣ በብዙ ትጋትና ጥረት ከካቶሊካዊው አስተዳደር በተፈቀደው የስኮላርሽፕ ድጋፍ አማካይነት፣ ካህናት ተልከው ትምህርታቸውን እየተማሩ ምእመናኑን እንዲያገለግሉ ኹኔታዎች መመቻቸቱን አስረድተዋል፡፡

በወቅቱ ስኮላርሽፑ የተፈቀደው ለአንድ ካህን ብቻ ነበር፡፡ በዚኽም፣ የመጀመሪያው አስተዳዳሪ በቅዱስ ሲኖዶስ ተመድበው የኪዳነ ምሕረትን ታቦት ይዘው በመሔዳቸው፣ ቤተ ክርስቲያኒቱ አገልግሎትዋን ጀምራለች፡፡ ከጊዜ በኋላም፣ የቅዱስ ገብርኤል ታቦት ከጠቅላይ ቤተ ክህነቱ ተፈቅዶ ሲጨመር፣ የስኮላርሽፕ ዕድሉም ከአንድ ካህን ወደ ኹለት በማደጉ፣ ምእመናኑ በተሻለ መልኩ እየተገለገሉ በሰላምና በፍቅር ኖረዋል፤ የሚመደቡ ካህናትም፣ ትምህርታችውን እየተከታተሉ እናት ቤተ ክርስቲያን የጣለችባቸውን አደራ ሲወጡ ቆይተው፣ ከቅዱስ ሲኖዶስ ጥሪ ሲደረግላችውም እየታዘዙ ይመለሱ እንደነበር ተገልጿል፡፡

መጋቤ ስብሐት አባ ብርሃኑ ደበበ  ግን፣ ለቅዱስ ሲኖዶስ ጥሪ ካለመታዘዛቸውም በላይ፣ በካቶሊኩም ሓላፊ ቢመከሩም፥ “አልመለስም፤ ብሔድም ያስቀሩኛል፤” ብለው እምቢተኛ በመኾናቸው፣ የኹለተኛውን ካህን የስኮላርሽፕ ዕድል አዘግተዋል፤ የደብሩን ምእመናን በመከፋፈል ለዓመታት የነበራቸውን ሰላም አደፍርሰዋል። ይባሳችኹ ብለውምንም ዓይነት ሥርዓተ አምልኮ እንዳይፈጸም፣ ታቦታቱንና ንዋያተ ቅድሳቱን ከግብረ አበሮቻቸው ጋራ መዝብረው ከቤተ ክርስቲያኒቱ በመውሰድ ያልተለመደ አስነዋሪ ድርጊት ፈጽመዋል፤ እንዲመልሱ ቢጠየቁም አሻፈረኝ ብለዋል።

የተወሰደው በሕግ እስኪመለስ፣ ምእመናኑ ተስፋ እንዳይቆርጡ፣ በቅርቡ የፓትርያርኩ የአውሮፓ ጉብኝት አጋጣሚ፣ ዐዲሱ አስተዳዳሪ ሌላ የኪዳነ ምሕረት ታቦት የተረከቡ ሲኾን፤ ከዐዲስ አበባ የተላኩት ንዋያተ ቅድሳትም ደርሰው አገልግሎቱ መቀጠሉንና በስኮላርሽፑም፣ ሲደረግ የቆየው አስተዳደራዊ ትብብርና ፋይናንሳዊ ድጋፍ፣ ለዐዲሱ አስተዳዳሪም እየተደረገላቸው እንዳለ ተመልክቷል፡፡]

በቀድሞው አስተዳዳሪ የተፈጸመው የምዝበራ ድርጊት፣ በሕግ ተይዞ በሒደት ላይ የሚገኝ ሲኾን፣ አስተዳዳሪው በችሎት ቀርበው፣ ‹‹የኢትዮጵያን ቅዱስ ሲኖዶስ አላውቅም፤ የምንመራውም በማኅበር ነው፤›› በማለት፣ ቤተ ክርስቲያኒቱን ስም አልባ ማድረጋቸውና ክሡን መካዳቸው ታውቋል፡፡ 


ይኸው የቀድሞው አስተዳዳሪ አቋም፣ ከየሀገሮች ውስጠ ደንብ ጋራ የሚጣጣም መምሪያ የሌለን መኾኑን፣ የተለመደ ክፍተት እንደ መልካም አጋጣሚ በመጠቀም የተያዘ ይመስላል፡፡ በዚኽ ሳቢያ፣ “ቤተ ክህነቱ አይመራንም፤ ሲኖዶሱ አያዘንም” የሚሉ የማፈንገጥ ድርጊቶች እያደጉ መምጣታቸውን፤ የቤተ ክርስቲያኒቱን ተቋማዊ አደረጃጀት፥ ለፖሊቲካ፣ ለንግድ፣ ለግልና ለቡድን ጥቅም ለማዋል የሚንቀሳቀሱ ኃይሎች መበራከታቸውን የጠቅላይ ጽ/ቤቱ ሪፖርት ያመለክታል፡፡

የውጭ ግንኙነታችን፣ ቤተ ክርስቲያናችን በመላው ዓለም በምትገኝበት ስፋት ልክ፣ አገልጋዩንና ምእመኑን ለመምራት በሚያስችላት ስልትና ዝግጅት ሊጠናከር እንደሚገባው ሪፖርቱ ያሳስባል፡፡ አብያተ ክርስቲያናትን ማነፅና አገልጋይ ካህናትን መመደብ አንድ ጉዳይ ኾኖ፣ በማዕከላዊ አስተዳደሩ፥ በባለቤትነት መመራትን፣ መቆጣጠርንና መከታተልን የሚያጠናክር የውጭ ግንኙነት ፖሊሲ፣ በሞያዊ ኹኔታ ተዳሶ እንዲዘጋጅና ሥራ ላይ እንዲውል በቅዱስ ሲኖዶሱ መመሪያ ተሰጥቷል፡፡

የውጭ ምደባችን፣ በአመዛኙ በትውውቅና በጥቅመኝነት ላይ የተመሠረተ መኾኑ የዐደባባይ እውነት ነው፡፡ ይህም ውሎ አድሮ በመዋቅራዊ አንድነታችንና በምእመናኑ ፍቅርና ሰላም ላይ የሚያስከትላቸው ችግሮች ግልጽ ናቸው፤ ችግሮቹን ማስወገድ የሚቻለው፥ በውጭ ግንኙነት ፖሊሲው ማሕቀፍ፣ የቤተ ክርስቲያናችንን ሲኖዶሳዊ አሠራር ጠንቅቀውና አክብረው ለተልእኮዋ በተመረጡ አገልጋዮች ምደባና ስምሪት በመኾኑ፣ በቅዱስ ሲኖዶሱ የተላለፈው መመሪያ ተግባራዊነት ትኩረት ሊሰጠው ይገባል፡፡


 

በፈረሰችው የቅ/አርሴማ ቤተ ክርስቲያን ጉዳይ: ፓትርያርኩ፥ የአ/አበባ ከተማ ከንቲባን አሳሰቡ፤ የአቡነ ገብረ መንፈስ ቅዱስ ቤተ ክርስቲያንም ፈረሰ

  • የደንብ ማስከበር ጽ/ቤቱ፥ቀኖናን ጥሷል፤ ምስጢራትን ደፍሯል፤ ንዋያተ ቅድሳትን መዝብሯል
  • ደብሩ፣ በወረዳው ሥራ አስፈጻሚ እና በደንብ ማስከበር ጽ/ቤቱ ሓላፊዎች ላይ ክሥ መሠረተ
  • ተመሳጥሮ በማፍረሱ፥ ግንባር ቀደም ተጠያቂ ነው የተባለው፣ ‘አባ’ ኃይለ ሚካኤል ካሳ ታገደ
  • ጸሎቱ እና ትምህርቱ አልተቋረጠም፤ ኹሉም እንደ ልቅሶ ደራሽ እንባውን አፍስሶ ይሔዳል

***

  • ሮሮው ተባብሶ አቅጣጫ ሳይለውጥ ፍትሕ ርትዕ የተሞላበት ዳኝነት ይታይ”/ፓትርያርኩ/
  • ይዞታ፣ በስጦታ ተገኘ፤ በሚል ብቻ ቤተ ክርስቲያን ሊሠራ አይችልም”/የከንቲባው /ቤት/
  • “የይግባኝ ሰሚ ፍ/ቤቱን የእግድ ትእዛዝ እያሳየናቸው ማፍረሳቸው ሕጉን መናቅ ነው”/ደብሩ/
  • ታቦቱ ባለበት በንብረቱ ላይ ተራምደው ከነጫማቸው ገቡ፤ መንበሩንም ጭነው ወሰዱ/ምእመኑ/

***

(ሰንደቅ፤ ፲፪ኛ ዓመት ቁጥር ፮፻፬፤ መጋቢት ፳፯ ቀን ፳፻፱ ዓ.ም.)


በአዲስ አበባ፣ የካ ክፍለ ከተማ፣ ወረዳ 12፣ አባዶ ቁጥር 1 እየተባለ በሚጠራው አካባቢ የተሠራችው፣ የደብረ ልዕልና ቅድስት አርሴማ ቤተ ክርስቲያን፥ ድፍረት በተመላበት ኃይልና ሥልጣን፣ በወረዳው የደንብ ማስከበር ጽ/ቤት እንደፈረሰች ፓትርያርኩ የጠቀሱ ሲኾን፤ ሕዝበ ክርስቲያኑ የሚያሰማው ሮሮ ተባብሶ አቅጣጫውን ከመለወጡ በፊት፦ ፍትሕ ርትዕ የተሞላበት ዳኝነት ታይቶ፣ የፈረሰው ተጠግኖ፣ የጎደለው ተሟልቶ አገልግሎት እንዲሰጥ የሚያስችል አመራር ለሚመለከተው ክፍል እንዲተላለፍ ከንቲባ ድሪባ ኩማን አሳሰቡ፡፡

የደብሩ ይዞታና ግንባታ፣ ሕገ ወጥ ነው፤ በሚል ቤተ ክርስቲያኒቱ እንድትፈርስ በሥር ፍርድ ቤት የተሰጠው ውሳኔ፣ የይግባኝ ቅሬታ ቀርቦበት እንዳይፈጸም ታግዶና በቀጠሮ ላይ እያለ፣ መጋቢት 18 ቀን 2009 ዓ.ም.፣ በሚያሳዝን ኹኔታ፣ ታቦተ ሕጉ ያለበት መቃኞ ቤተ ክርስቲያን በመፍረሱ፥ ንዋያተ ቅድሳቱ ተመዝብሯል፤ ምስጢራተ ቤተ ክርስቲያንም የድፍረት ሥራ ተፈጽሞባቸዋል፤” ብለዋል ፓትርያርኩ፣ ባለፈው ሳምንት ማክሰኞ፣ ለከንቲባው በጻፉት ደብዳቤ፡፡


የከተማው አስተዳደር ይግባኝ ሰሚ ፍርድ ቤት የሚሰጠው ውሳኔ ሳይታወቅና ጉዳዩ በቀጠሮ ላይ እያለ፣ በወረዳው ደንብ ማስከበር ጽ/ቤት ሠራተኞች የተፈጸመው ድርጊት፣ አፍራሽ ተልእኮ ያለውና ሕዝበ ክርስቲያኑን ያሳዘነ የቀኖና ቤተ ክርስቲያን ጥሰት መኾኑን የገለጹት ቅዱስነታቸው፣ “ለሕግ የበላይነት ትኩረት አለመስጠትን ያመለክታል፤” ሲሉም ተችተዋል፡፡

ምእመናን ከመንፈሳዊ አገልግሎት እንዳይርቁ፣ በየአቅራቢያቸው ሥርዓተ አምልኮ የሚፈጽሙበት ቤተ ክርስቲያን እያቋቋሙ፣ ከርቀት ጉዞ በመታደግ የሥራ ተነሣሽነት እንዲኖራቸው ማስቻል፣ ቤተ ክርስቲያኒቱ ለሀገራዊ ልማት ባላት አስተዋፅኦ ኅብረተሰቡን የምትደግፈበት አገልግሎትዋ እንደኾነ ፓትርያርኩ አስገንዝበዋል፡፡

ይኹንና መንግሥት ለዜጎች ባመቻቸው የየካ አባዶ ቁ.1 ኮንዶሚኒየም አካባቢ፣ ከበጎ አድራጊ ግለሰቦች በተሰጠ ቦታ ላይ ተሠርታ ላለፉት አራት ወራት አገልግሎት ስትሰጥ የቆየችው የደብረ ልዕልና ቅድስት አርሴማ ቤተ ክርስቲያን፣ ሕገ ወጥ ግንባታ በሚል በመፍረሷሕዝበ ክርስቲያኑ የሚያሰማው ሮሮ ተባብሶ አቅጣጫውን ከመለወጡ በፊት ፍትሕ ርትዕ የተሞላበት ዳኝነት እንዲታይ፣ ፓትርያርኩ በደብዳቤአቸው ጠይቀዋል፡፡ “የፈረሰው ተጠግኖ፣ የጎደለው ተሟልቶ አገልግሎት እንዲሰጥ የሚያስችል አመራር” ለሚመለከተው ክፍል እንዲተላለፍላቸውም ከንቲባውን በቤተ ክርስቲያኒቱ ስም አሳስበዋል፡፡

ፓትርያርኩ ለጻፉት ማሳሰቢያ፣ ባለፈው ሳምንት ዓርብ፣ በከንቲባው ጽ/ቤት በኩል ምላሽ እንደተሰጣቸው የጠቀሱት የደብሩ ካህናትና ምእመናን፦ የቤተ ክርስቲያኒቱ ግንባታ ሕገ ወጥ እንደኾነና ቤተ ክርስቲያን ሊባል እንደማይችል፤ ይዞታው ከግለሰቦች የተላለፈበት የስጦታ ውልም፣ በውልና ማስረጃ ያልተረጋገጠ በመኾኑ ተቀባይነት እንደሌለው በሓላፊው በኩል እንደተነገራቸው አስታውቀዋል፡፡

አክለውም፣ የፈረሰችውን የቅድስት አርሴማ ቤተ ክርስቲያን ጨምሮ በወረዳው በቅርቡ ከተሠሩ ስምንት አብያተ ክርስቲያናት ጋራ በተያያዘ፣ በክፍለ ከተማ ቤተ ክህነቱ አዘጋጅነት በቅርቡ የተካሔደው የሽልማት መርሐ ግብር፣ ተገቢ እንዳልነበረ ሓላፊው መተቸታቸውንና “በዚኽ ጉዳይ የሚጠየቅ አካል ይጠየቃል፤” ማለታቸውን ተናግረዋል፤ የይዞታ መብት በስጦታ ተገኘ በሚል ብቻ ቤተ ክርስቲያን ሊሠራ እንደማይችልና የከተማውን ማስተር ፕላን በጠበቀ መልኩ ከሚመለከተው የከተማው አስተዳደር አካል ጋራ በመነጋገር የግንባታ ፈቃድ አስቀድሞ ማግኘት እንደሚያስፈልግ ተገልጾልናል፤ ብለዋል፡፡

ነገር ግን፣ ማሳሰቢያው የተጻፈው በቤተ ክርስቲያኒቱ ፓትርያርክ እንደመኾኑና ባለአድራሻውም የከተማው ከንቲባ እንደመኾናቸው ጉዳዩ ደረጃውን ጠብቆ ምላሽ ሊሰጠው ይገባ እንደነበር ቅሬታቸውን የገለጹት ካህናቱና ምእመናኑ፣ በጽ/ቤቱ የተስተናገዱበት ኹኔታ “ክብረ ነክ ነው፤” ሲሉ አማርረዋል፤ “እናንተን ማስተናገድ አይገባኝም፤ እንዲያውም ውጡ” መባላቸውን ተናግረዋል፡፡

በሌላ በኩል፣ ከይዞታና ከግንባታ ሕጋዊነት ጋራ በተያያዘ፣ ባለፈው ሳምንት ሰኞ፣ መጋቢት 18 ቀን ጠዋት የፈረሰችው የየካ አባዶ ደብረ ልዕልና ቅድስት አርሴማ ቤተ ክርስቲያን አስተዳደር፥ ለይግባኝ ሰሚው ፍ/ቤት የእግድ ትእዛዝ አለመከበር ተጠያቂዎች ናቸው ባላቸው፦ የወረዳ 12 የደንብ ማስከበር ጽ/ቤት ሓላፊ አቶ ዳዊት ሙሉጌታ፤ የአስተዳደሩ ሥራ አስፈጻሚ ሓላፊ አቶ ደመላሽ ጎሣ እና በሌላ የመዝገብ ቤት ሠራተኛ ላይ ክሥ መሥርቷል፡፡

“ቤተ ክርስቲያኒቱ እንድትፈርስ በሥር ፍ/ቤት በተላለፈው ውሳኔ ላይ፣ በደብሩ የቀረበው የይግባኝ ቅሬታ ተመርመሮ ትእዛዝ እስኪሰጥ ድረስ ተፈጻሚ እንዳይኾን የታዘዘበትን እግድ እያሳየናቸው ቤተ ክርስቲያኒቱን ማፍረሳቸው፥ የሕግ የበላይነትን አለማረጋገጥና ሕጉን መናቅ ነው፤” ይላሉ፣ የደብሩ ካህናትና ምእመናን፡፡ ችሎቱ፣ የተከሣሾችን መልስ ለመስማት፣ ለሚያዝያ 2 ቀን 2009 ዓ.ም. መቅጠሩ ተገልጿል፡፡


በዚያው በየካ አባዶ፣ ቁጥር 13 የሚገኘው፣ የጻድቁ አቡነ ገብረ መንፈስ ቅዱስ ቤተ ክርስቲያን፣
ከትላንት በስቲያ፣ መጋቢት 25 ቀን ረፋድ ላይ፣ በደንብ ማስከበር ጽ/ቤቱ ግብረ ኃይል መፍረሱ ታውቋል፡፡ ጽላቱ በአቅራቢያው ወደሚገኘው ዋሻ መዛወሩ ተገልጧል፡፡ የቤተ ክርስቲያኑ የቆርቆሮ ክዳንም የተነሣ ሲኾን፣ ንዋያተ ቅድሳቱ እዚያው ሜዳ ላይ ተቀምጠው እንደሚገኙ ተጠቅሷል፡፡ ኹኔታው፣ ለሀገረ ስብከቱ ጽ/ቤት ሪፖርት ቢደረግም፣ እዚኽ ግባ የሚባል እንቅስቃሴ አለመኖሩ ተጠቁሟል፡፡

ባለፈው ሳምንት ከፈረሰችው የደብረ ልዕልና ቅድስት አርሴማ ቀጥሎ የጻድቁ አቡነ ገብረ መንፈስ ቅዱስ ቤተ ክርስቲያን፣ በአካባቢው በደንብ ማስከበር ጽ/ቤቱ የፈረሰ ኹለተኛው ቤተ ክርስቲያን ነው፡፡ የየካ አባዶ ደብረ መድኃኒት መድኃኔዓለም ቤተ ክርስቲያንም፣ እንዲፈርስ በሥር ፍርድ ቤት ቢወሰንም፣ የይግባኝ ቅሬታ በመቅረቡ፣ ውሳኔው ከመፈጸም ታግዶ በቀጠሮ ላይ ይገኛል፡፡


በተያያዘ ዜና፣ የአሠራር ክፍተቱንና ከወረዳው የደንብ ማስከበር ጽ/ቤት ጋራ የተፈጠረውን ውዝግብ በመጠቀም፣ የደብረ ልዕልና ቅድስት አርሴማ ቤተ ክርስቲያን እንድትፈርስ፣ ግንባር ቀደም ተጠያቂ ነው፤ የተባለው፣ ‘አባ’ ኃይለ ሚካኤል ካሳ፣ በክፍለ ከተማ ቤተ ክህነቱ ጽ/ቤት፣ ከሥራና ከደመወዝ መታገዱ ታውቋል፡፡


‘አባ’ ኃይለ ሚካኤል፣ በአቅራቢያው የምትገኘው የጽርሐ አርያም ቅድስት ማርያም “ጥብቅ አስተዳዳሪ” ሲኾን፣ በተሰጠው ሓላፊነት፣ ቤተ ክርስቲያን እንድትስፋፋና እንድትጠናከር መደገፍና መርዳት ሲገባው፣ በተቃራኒ መልኩ፣ ከሃይማኖታችን ውጭ ከኾኑ አካላት ጋራ በመመሳጠር የቅድስት አርሴማ ቤተ ክርስቲያን እንድትፈርስ ማድረጉ ተገልጿል፡፡

በክፍለ ከተማ ቤተ ክህነቱ ጽ/ቤት ሥራ አስኪያጅ መልአከ ገነት ሙሴ ዘነበ ተፈርሞ፣ በቁጥር 403/35/09፣ ባለፈው ሳምንት ዓርብ በወጣው እግድ እንደሰፈረው፥ ‘አባ’ ኃይለ ሚካኤል ካሳ፣ በአስገዳጅ ኹኔታዎች ሳቢያ፣ በሰበካው በዐዲስ መልክ የሚቋቋሙ አብያተ ክርስቲያናትን፣ “እንደ ሙዳይ ምጽዋት ወደረኛ/ተቀናቃኝ” ነው የሚያያቸው፡፡

በአንዳንድ ምንጮች መረጃ፣ በአካባቢው የተለያዩ ሳይቶች፣ በዐዲስ መልክ ለማቋቋም የተሞከሩ ከአምስት በላይ አብያተ ክርስቲያናት እንዲፈርሱ ከፍተኛውን ሚና ተጫውቷል፤ የተወሰኑት ጽላት ከሚመራው ደብር ጋራ ሲደርቡ፣ ጠፍተው የቀሩ መኖራቸውም ተጠቅሷል፡፡ በዚኽ መነሻ፣ ‘አባ’ ኃይለ ሚካኤል፣ በሥርዓተ ቤተ ክርስቲያን መሠረት ተደጋጋሚ ምክር ቢሰጠውም ሊታረም እንዳልቻለ፣ በእግድ ውሳኔው ተመልክቷል፡፡

በቤተ ክርስቲያን መዋቅር መሠረት ለክፍለ ከተማው እንደማይታዘዝና በሀገረ ስብከቱ ጽ/ቤትም፣ የመጨረሻ ማስጠንቀቂያ እንደተሰጠው፣ የክፍለ ከተማ ቤተ ክህነቱ አስታውሶ፣ ነገር ግን ሊስተካከል ባለመቻሉ፣ ከመጋቢት 22 ቀን ጀምሮ፣ ከጽርሐ አርያም ቅድስት ማርያም ጥብቅ አስተዳዳሪነት መወገዱንና ከደመወዝ መታገዱን አስታውቋል፤ ጉዳዩንም በሀገረ ስብከቱ ጽ/ቤት እንዲከታተል አሳስቦታል፡፡

‘አባ’ ኃይለ ሚካኤል፣ ዐዲስ አብያተ ክርስቲያናት እንዳይቋቋሙ ብቻ ሳይኾን፣ በሓላፊነት የተቀመጠበትንም ደብር አስተዳደርና አገልግሎት በአግባቡ እንደማያስፈጽም፣ የአጥቢያው ምእመናን በምሬት ይናገራሉ፡፡ ሌሎች አብያተ ክርስቲያናትን ባስፈረሰ ቁጥር፣ በሚመራው ደብር ባልነበረና ባልተሠራ ሥርዓት፥ “ንግሥ” እያለ ታቦት ያወጣል፤ በያዝነው ዐብይ ጾም ውስጥ ብቻ፣ ቅዳሴ ቤቱ” ብሎ የካቲት 19 ቀን፤ “ንግሥ” ብሎ የደብረ ዘይት እሑድ፣ የቅዱስ ገብርኤልንና የእመቤታችንን ታቦታት አውጥቷል፡፡ በጥምቀት በዓል፣ ከሌሎች ታቦታት ጋራ ወደ ባሕረ ጥምቀት ላለመውረድ፣ ቦታ እስከ መቀየር ሙከራ አድርጎ የተከለከለው በጸጥታ ኃይሎች ነበር፡፡

ዐውደ ምሕረት ላይ በወጣ ቁጥር፣ የኾኑ አርቲስቶችን ሳያስከትል አይወጣም፤ ታቦቱን አቁሞ ነገረ ዘርቅ ያወራል፤ ያስወራል፤ ጨረታ እያለ ብር ከሰበሰበ በኋላ እብስ ይላል፤ ያልተፈቀዱና ሕጸጽ ያለባቸውን መዝሙር ተብዬዎች ይከፍታል፤ የዙሪያውን አብያተ ክርስቲያናት አስተዳዳሪዎችና ካህናት፥ “አወናባጆችና ሥራ ፈቶች” እያለ ያጥላላል፤ ይዘልፋል፤ ከስብሐተ እግዚአብሔሩም ኾነ ከትምህርተ ወንጌሉ የለበትም፡፡

በግል ሕይወቱም፣ ለሥርዓተ ምንኵስና የታዘዘውን በመፃረር፣ እንደ ባለትዳር እየኖረ ሲኾን፣ የልጅም አባት ነው፡፡ ብዙዎች በተጨባጭ እንዳረጋገጡት፣ ቆብና ቀሚሱን እንደለበሰ የምሽት ክበቦችን የሚያዘወትር ዋልጌ ነው፡፡ ይኸው አነዋወሩ፣ ገና በሺንሺንቾ ወረዳ ቤተ ክህነት ሳለ፣ ከኹለት ዐሥርት ዓመታት በላይ የሚታወቅና በቀኖናዊና አስተዳደራዊ ርምጃዎች ለማስተካከል ቢሞከርም የሚያርመው አልኾነም፤ ይህም ኾኖ፣ በቅርቡ ለደቡብ አፍሪቃ ሀገረ ስብከት፣ በቋሚ ሲኖዶስ ከተመደቡትና ለጉዞ ከተዘጋጁት ልኡካን አንዱ መኾኑ በርካታ ወገኖችን እያሳዘነ ነው፡፡

በወረዳ ቤተ ክህነት ደረጃ፣ ለቤተ ክርስቲያን መስፋፋትና መጠናከር ጠንቅ ነው ተብሎ ርምጃ የተወሰደበትን ብቃቱ ይኹን ሕይወቱ የሌለውን ግለሰብ፣ ይባሳችኹ ብሎ፣ ቤተ ክርስቲያኒቱን በብዙ ተስፋ ወደሚጠብቋትና የላቀ ሐዋርያዊ አገልግሎት ወደሚሹ ወገኖቻችን መላክ፣ ትልቅ ምፀት ነው፤ በመንፈሳዊ ሕይወታቸው ላይም ከመሣለቅ ተለይቶ አይታይም!!

የ‘አባ’ ኃይለ ሚካኤል ምደባ ዳግመኛ ሊጤንና በጥብቅ ሊታሰብበት የሚገባ ኾኖ፣ ቤተ ክርስቲያናቸው የፈረሰባቸው የደብረ ልዕልና ቅድስት አርሴማ ቤተ ክርስቲያን ምእመናን ሮሮም፣ ብፁዕ ወቅዱስ ፓትርያርኩ እንዳሉት፣ ፍትሕ ርትዕ የተሞላበት ዳኝነት በአፋጣኝ ሊታይለት ይገባል፡፡


በመቃኞ የነበረችው ቤተ ክርስቲያን ብትፈርስም፣ የኪዳኑ ጸሎትና የሠርክ መርሐ ግብሩ፣ ዛሬም በአውላላ ሜዳ ላይ እየተካሔደ እንዳለና እንዳልተቋረጠ ተገልጧል፡፡ የቅድስት አርሴማ ጽሌ፣ በምእመናን እንባና እናቶች በእንብርክክ እየዳኹ ጭምር አጅበው፣ በአቅራቢያው ለሚገኘው ለደብረ መድኃኒት መድኃኔዓለም ቤተ ክርስቲያን በአደራ ተሰጥቷል፡፡


በታቦቱ ላይ በንብረቱ ላይ ከነጫማቸው ገብተው፣ ገነጣጥለው ጥለው ወጡ፤ በቃ፥ ታቦቱ ይውጣ ተብሎ ነው መንበሩ በድጅኖ የተሠበረው፤ መንበሩ ከተሠበረ በኋላ ምን እናደርጋለን? መንበሩን ጭነውት ሔዱ፣ ቤተ ክርስቲያኑም ፈረሰ፤ ሕዝቡን ለጊዜው ዞር በሉልን ብለን አገለልንና፣ ጽላቱን አንሥተን ወደ መድኃኔዓለም ቤተ ክርስቲያን ወሰድን፤ ምንም እንኳ በላዩ ላይ ቢፈርስበትም፣ ከዚኽ በኋላ ማረፊያ ቦታ ማመቻቸት አለብን ብለን በመድኃኔዓለም ቤተ ክርስቲያን ነው ተዳብሎ ያለው፤

ሌሎች ንብረቶች፡- መስቀል፣ ጽንሐሕ፣ መቋሚያ፣ ጸናጽል፣ ከበሮ፣ ሥዕለ አድኅኖ፣ ጻሕሉ፣ ጽዋው፣ ቅዱሳት መጻሕፍቱ… እነኚኽ ኹሉ፣ ሕዝቡ፣ ከቦታው ላይ መነሣት የለባቸውም፤ ብሎ ሜዳ ላይ ሸራ ለብሰው ፀሐይና ዝናም እየተፈራረቀባቸው ነው ያሉት፤ ሸራውን መወጠርም፣ ሕገ ወጥ ግንባታ ነው፤ ስለተባለ እንደ ልብስ ነው ጣል ያደረግንበት፤


ሕዝቡ፣ ከቅዳሴ ውጭ፣
መንፈሳዊ አገልግሎት ሊቋረጥ አይገባውም፤ ብሎ፥ ኪዳን፣ የሠርክ ፕሮግራም እየተሳተፈና የጥበቃውን ሥራ እየሠራ ነው፡፡ ቅዳሴው አይቀደስ እንጂ፣ በቅዳሴ ሰዓት ተገኝቶ በቅዳሴ መውጫ ሰዓት ነው ወደ ቤቱ የሚሔደው፤ ለካህናቱ የሚገባውን ሠርከ ኅብስት ይዞ እየመጣ ከቦታው አልተለየም፤ በየዕለቱ፣ ልክ እንደ ልቅሶ ደራሽ እየመጣ እንባውን እያፈሰሰ ነው ያለው፡፡