ባሕታዊ ዘበኅድአት ቀናዒ በእንተ ሥርዐት ብፁዕ አቡነ ጎርጎርዮስ ሣልስ: ዜና ሕይወት እና ሥራዎች

/የዩናይትድ ኪንግደም እና አየርላንድ ሀገረ ስብከት ጽ/ቤት/

~~~~~~~

ሠናየ ገድለ ተጋደልኩ ብድርየኒ ፈጸምኩ ወሃይማኖትየኒ ዐቀብኩ = ጽኑ ገድልን ተጋደልኹ፤ ሩጫዬንም ጨረስኹ፤ ሃይማኖቴንም ጠበቅኹ።

(፪ኛጢሞ. ፱፥፮)

ብፁዕ አቡነ ጎርጎርዮስ ሣልስ: የዩናይትድ ኪንግደም እና አየርላንድ ሀገረ ስብከት ሊቀ ጳጳስ – ከ፲፱፻፴ ዓ.ም. እስከ ፳፻፲፪ ዓ.ም.

ልደት እና ዕድገት

ብፁዕ አቡነ ጎርጎርዮስ፣ ከአባታቸው ከቀኝ አዝማች ከበደ መሸሻ እና ከእናታቸው ከወ/ሮ እታገኘኹ ዘለለው፣ ሚያዝያ ፲፪ ቀን ፲፱፻፴ ዓ.ም. በጥንቱ አጠራር በበጌምድር እና ስሜን ጠቅላይ ግዛት በጋይንት አውራጃ ስማዳ ወረዳ ተወለዱ። ብፁዕነታቸው የልጅነት ዕድሜያቸውን ያሳለፉት፥ ለወላጆቻቸው በመታዘዝ፤ ዕድሜያቸው ለትምህርት ሲደርስም፣ ፊደል ቆጥረው ከንባብ ጀምረው ዳዊት፣ ጸዋትወ ዜማ እየተማሩ ነበር።

ትምህርት እና አገልግሎት

ከልጅነታቸው ጀምሮ ካህን ኾኖ መኖርን ይመኙ ስለነበር፣ ግብረ ዲቁናን አጠናቀው ክህነተ ዲቁናን፣ የጎንደር ሀገረ ስብከት ሊቀ ጳጳስ ከነበሩት ብፁዕ አቡነ ሚካኤል ዘንድ በ፲፱፻፵፬ ዓ.ም. ተቀበሉ፤ በዲቁና እያገለገሉም ቅዳሴ ዜማ እና ቅኔ ተማሩ።

በመቀጠልም፣ በብፁዕ ወቅዱስ አቡነ ባስልዮስ በተመሠረተው በደብር ቅዱስ ደብረ ጽጌ ማርያም ገዳም በ፲፱፻፶፩ ዓ.ም. በመግባት፣ ቅኔ ከነአገባቡ ተምረዋል። በመጽሐፈ መነኰሳት እንደታዘዘው፣ በ፲፱፻፶፫ ዓ.ም. በተግባር ቤት ለኹለት ዓመት በአመክሮ ረድዕ በመኾን ካገለገሉ በኋላ፣ ማዕርገ ምንኵስናንና ማዕረገ ቅስናን ከመጀመሪያው ፓትርያርክ ብፁዕ ወቅዱስ አቡነ ባስልዮስ ርዕሰ ሊቃነ ጳጳሳት ዘኢትዮጵያ እጅ በደብረ ሊባኖስ ገዳም፣ ነሐሴ ፳፬ ቀን ፲፱፻፶፭ ዓ.ም. በጻድቁ አቡነ ተክለ ሃይማኖት ክብረ በዓል ተቀበሉ። በተጨማሪም በዚኹ ገዳም፥ ዜማ ከነባህሉ፣ የመጻሕፍተ ሐዲሳትንና መጽሐፈ መነኰሳትን ትርጓሜ ተምረዋል።

ብፁዕነታቸው በነበራቸው የዕውቀት ጥማት፣ የቅዳሴ ዜማ ሞያቸውን የበለጠ በማሻሻል ለማስመስከር በነበራቸው ፍላጎት ከገዳሙ ፈቃድ ተሰጥቷቸው፣ ወደ ታላቁ ደብረ ዓባይ አቡነ ሳሙኤል ገዳም ሔደው የቅዳሴ ዜማ ትምህርት በሚገባ አጠናቀዋል፡፡ ከመምህራቸው የኋላእሸት መንገሻ፣ ታኅሣሥ ፫ ቀን ፲፱፻፶፯ ዓ.ም. የመምህርነት ምስክርነት ልብን ከሚመስጥ የአባትነት ምርቃት እና ጸሎት ጋራ ተሰጣቸው። ለጥቂት ወራት በዚያው በደብረ ዓባይ ገዳም በመምህርነት አገልግለዋል። በመቀጠልም፣  ወደ ደብር ቅዱስ ደብረ ጽጌ ማርያም ገዳም በመመለስ ከስመ ጥሩው መምህር ልዑል ዘንድ የቅዳሴ መምህር ምክትል ኾነው ያስተምሩ ነበር።

በዚኹ ገዳም ለቅዱስ ተልዕኮ እየተፋጠኑ በማገልገል ላይ ሳሉ ወደ አዲስ አበባ ተጠርተው፣ በደገኛው ንጉሠ ነገሥት ዳግማዊ ዐፄ ምኒልክ መታሰቢያ ታዕካ ነገሥት በዓታ ለማርያም ገዳም፣ በብፁዕ ወቅዱስ አቡነ ባስልዮስ ፈቃድ እና ትእዛዝ፣ በቀዳሲነት እና የቅዳሴ መምህር ኾነው አገልግሎት ሰጥተዋል።

ይህ በእንዲህ እንዳለ፣ መጋቢት ፯ ቀን ፲፱፻፷፭ ዓ.ም. በኢየሩሳሌም ለሚገኘው ታላቁ የዴር ሡልጣን ገዳማችን አገልግሎት እንዲሰጡ፣ በግርማዊ ቀዳማዊ ዐፄ ኃይለ ሥላሴ ንጉሠ ነገሥት ዘኢትዮጵያ እና በብፁዕ ወቅዱስ አቡነ ቴዎፍሎስ ሊቃነ ጳጳሳት ወፓትርያርክ ፈቃድ እና ትእዛዝ፣ ከኹለት የቤተ ክርስቲያን ሊቃውንት አባቶች ጋራ ተላኩ። የገዳሙ ዋና ጸሐፊ፣ ተቆጣጣሪ፣ ሕፃናትንና ወጣቶችን አስተማሪ እንዲሁም፣ ገዳሙን ለተሳላሚዎች እና ጎብኝዎች በማስጎብኘት፤ ፩ኛ)ዕብራይስጥ፣ ፪ኛ)እንግሊዘኛ፣ ፫ኛ)ፈረንሳይኛ፣ ፬ኛ)ጀርመንኛ፣ ፭ኛ)ዐረብኛ ቋንቋዎች ተሰጥኦ ስለነበራቸው አስተርጓሚ በመኾን ሰፊ አገልግሎት አበርክተዋል። በደብረ ሥልጣን ገዳም ያሳዩት በነበረው ትጋት፣ አበምኔት ኾነው ገዳሙን በሓላፊነት እንዲያስተዳድሩ፣ ጥር ፳፯ ቀን ፲፱፻፷፯ ዓ.ም. በብፁዕ አቡነ ማቴዎስ ሊቀ ጳጳስ ደብዳቤ ተመድበዋል። 

በዚኹ የገዳሙ ሓላፊነት ላይ እያሉ በትርፍ ጊዜያቸው፣ ቋንቋ እና ዘመናዊ ትምህርት ይከታተሉም ነበር። ይህንኑ የመማር ፍላጎታቸውንና ጥረታቸውን በመገንዘብ በ፲፱፻፷፰ ዓ.ም. የነፃ ትምህርት (ስኮሊርሽፕ) በቤተ ክርስቲያን በመገኘቱ፣ በኢየሩሳሌም የኢትዮጵያ ኦርቶዶክስ ተዋሕዶ ቤተ ክርስቲያን ሊቀ ጳጳስ ብፁዕ አቡነ ማቴዎስ ፊርማ ወደ ምዕራብ አውሮፓ ተላኩ። 

በምዕራብ አውሮፓ-አየርላንድ የሞራል ቴዎሎጂ፥ የቤተ ክርስቲያን ዕድገት፣ የዓለም ታሪክ እና የተለያዩ የትምህርት ዓይነቶችን ተምረው ዲግሪ ካገኙ በኋላ ወደ ኢየሩሳሌም ገዳም የተመለሱት ብፁዕነታቸው፣ የዴር ሡልጣን ገዳም ዋና ጸሐፊ እና መምህር በመኾን ለ፲፬ ዓመታት ያህል በቀናነት እና በትጋት የተሰጣቸውን ተልዕኮ የተወጡ ታላቅ አባት ናቸው።

ከዐሥራ ሰባት ዓመታት የውጭ ዓለም ቆይታ በኋላ ጥቅምት ፳፱ ቀን ፲፱፻፹፩ ዓ.ም. ከኢየሩሳሌም ወደ ኢትዮጵያ ተጠርተው በመመለስ በነበራቸው የአስተዳደር ችሎታ እና አስተዋይነት፣ የብፁዕ ወቅዱስ ፓትርያርክ አቡነ መርቆሬዎስ ልዩ ጸሐፊ ኾነው አገልግለዋል።

ሢመተ ጵጵስና እና ኖላዊነት-በስደት

በፊት ስማቸው መጋቤ ኅሩያን አባ ኃይለ ኢየሱስ ከበደ ይባሉ የነበረ ሲኾን፣ በብፁዕ ወቅዱስ አቡነ መርቆሬዎስ አንብሮተ እድ፣ በቅድስት ሥላሴ ካቴድራል፣ ጥቅምት ፲፰ ቀን ፲፱፻፹፫ ዓ.ም. በዕለተ እሑድ፣ ብፁዕ አቡነ ጎርጎሬዎስ ተብለው የብፁዕ ወቅዱስ ፓትርያርክ ልዩ ጽ/ቤት ኤጲስ ቆጶስ ተብለው ከሌሎች አምስት ኤጲስ ቆጶሳት ጋራ ተሹመዋል። 

ብፁዕነታቸው በዚኹ አገልግሎት ላይ እያሉ በመጣው የመንግሥት ለውጥ፣ ሥልጣኑን የተቆጣጠረው የፖሊቲካ ኃይል፣ በቤተ ክርስቲያን ጉዳይ ቀጥታ ጣልቃ በመግባት፣ በሕጋዊነት እየመሩ እና እያገለገሉ የነበሩት ፓትርያርክ በግፍ ከመንበራቸው ተገፍተው እንዲባረሩ አድርጓል። ብፁዕነታቸውም፣ የጣልቃ ገብነት ድርጊቱ፣ ቀኖና ቤተ ክርስቲያንን የጣሰ እና አግባብ እንዳልኾነ በመቃወማቸው፣ በጊዜውም የቅዱስ ፓትርያርኩ ልዩ ጸሐፊ በመኾናቸው፣ ለህልውናቸው ፈታኝ የኾነ ከፍተኛ ፖሊቲካዊ ጫና ስለደረሰባቸው፣ ከሚወዷት አገራቸው ሳይወዱ በግድ ወጥተው፣ በ፲፱፻፹፬ ዓ.ም. ወርኀ ሚያዝያ የጸሎተ ኀሙስ ዕለት በስደት ወደ እንግሊዝ አገር ገቡ። 

ብፁዕ አቡነ ጎርጎርዮስ፣ በሎንዶን ከተማ ስደተኞችን ትረዳ፣ ታስተምር በነበረችው ርእሰ አድባራት ደብረ ጽዮን ቅድስት ማርያም ቤተ ክርስቲያን በመገኘት በመባረክ፣ በማስተማር፣ በጥዑም ድምፃቸው በመቀደስ እና ቡራኬ በመስጠት አገልግሎታቸውን ከአባ አረጋዊ(በኋላ አቡነ ዮሐንስ) እና ሌሎች ካህናት ጋራ በመኾን በየዕለተ ሰንበት አገልግሎታቸውን ቀጠሉ። ርዕሰ አድባራት ደብረ ጽዮን ቅድስት ማርያም የራሷ ቋሚ ሕንፃ ቤተ ክርስቲያን ስላልነበራት፣ የብፁዕነታቸው መምጣት ለችግሩ መፍትሔ ለመስጠት መልካም ዕድልን ፈጠረ። ቤተ ክርስቲያን ከነበረችበት ጠባብ ክፍል ወደ ተሻለ ሕንፃ ቤተ ክርስቲያን አዛውረው እና ቅዳሴ ቤቱን ፈጽመው ባርከው በማስገባት አገልግሎቷ የተሟላ እንዲኾን አድርገዋል። 

የአገር ቤቱ የፖለቲካ ሙቀት መጨመር፣ በቤተ ክርስቲያን ላይ ችግር ማስከተሉን የተረዱት ብፁዕነታቸው፥ “አመጣጤ የቤተ ክርስቲያን ልጆች ምእመናንን ለመከፋፈል አይደለ፤ ኹሉንም ነገር ጊዜው ሲርስ እግዚአብሔር ይፈታዋል፤” በማለት በዓታቸውን ዘግተው በጸሎት መኖርን ተያያዙት፡፡ ኾኖም በቅርበት፣ የብፁዕነቸውን ቡራኬ የሚፈልጉ፣ አበክረው አገልግሎት እንዲሰጧቸው በመጠየቃቸው፣ በወርኃ መጋቢት ፲፱፻፹፮ ዓ.ም. የስደተኛው መድኃኔዓለም ቤተ ክርስቲያንን አቋቁመው የቤተ ክርስቲያኑን ኪራይ በጋራ ከምእመናን ጋራ እየከፈሉ፤ ቅዳሴ በመቀደስ፣ ምስጢራተ ቤተ ክርስቲያንን በመፈጸም፣ ወንጌልን በማስተማር፣ ጥምቀተ ክርስትና፣ ሥርዐተ ጋብቻን በመፈጸም ሕሙማንንና ያዘኑትን በማጽናናት አባታዊ ተግባራቸውን ፈጽመዋል።

ብፁዕነታቸው፣ በአሜሪካ ልዩ ልዩ ግዛቶች ሰፊ ሐዋርያዊ አገልግሎት ሲሰጡ ኖረዋል፤ በተለይም፣ በዋሽንግተን ዲሲ በሚገኘው የደብረ ኃይል ቅዱስ ገብርኤል፣ የቅዳሴ አገልግሎት በመስጠት እና ልጆችን ለዲቁና በማስተማር ጭምር አገልግሎት ሰጥተዋል፤ እንዲሁም በውጭ በነበረው የቅዱስ ሲኖዶስ በተለያዩ የአሜሪካ ግዛቶች በመዘዋወር አዲስ አብያተ ክርስቲያን በመባረክ ከፍተኛ አስተዋፅኦ አድርገዋል።

ብፁዕነታቸው፣ የቤተ ክርስቲያናቸው ህልውና በጽኑ ያሳስባቸው ነበር። ከምንም በላይ እጅግ ጉዳት የደረሰባቸው አብያተ ክርስቲያናትን ለመርዳት ወደ ኋላ የማይሉ አባት ነበሩ። በዚኽም መሠረት፣ በአገር ቤት ለሚገኙ አብያተ ክርስቲያን የፈጸሟቸው ተግባራት፦

፩ኛ)በአገራችን ተከሥቶ በነበረው ድርቅ በ፲፱፻፺፭ ዓ.ም. ለአራት አህጉረ ስብከት፣ ምእመናንን በማስተባበር የርዳታ ገንዘብ ልከዋል።

፪ኛ)ከ፳፻፬ እስከ ፳፻፮ ዓ.ም. ለጣና ገዳም ማንእንዳባ መድኃኔዓለም ቤተ መቅደስ ሙሉ ጥገና እንዲደረግ ገንዘብ በመላክ አሳድሰዋል።

፫ኛ)ከ፳፻፬ እስከ ፳፻፮ ዓ.ም. በስማዳ ወረዳ ቋጢጥ ማኅደረ ሰላም ቅድስት ማርያም ቤተ ክርስቲያንን ከፍተኛ ገንዘብ በመላክ ሙሉ በሙሉ አዲስ ሕንፃ አሳንፀዋል።

፬ኛ)መጠነኛ ጥገና ያስፈልጋቸው የነበሩ የቋራ ቅዱስ ዮሐንስ፣ ለዳባት ጽዮን እና ለቢቸመር መዴኃኔዓለም አብያተ ክርስቲያናት ርዳታ ሰጥተዋል።

ብፁዕነታቸው በኖሩበት በምዕራቡ ዓለም ለ፳፱ ዓመታት ደከመኝ ሰለቸኝ ሳይሉ ባለማቋረጥ በማገልገል፣ ጸንተው በመጸለይ እና በማስተማር፣ “የሎንዶን ባሕታዊ” ኾነው አሠረ ምንኵስናቸውን ጠብቀው የኖሩ ናቸው። በጊዜው በቀኖና ጥሰት ምክንያት የተፈጠረው የቤተ ክርስቲያን ሲኖዶሳዊ አስተዳደር፣ ወደ አንድነቱ እንዲመለስ የዘወትር ጸሎታቸው ነበር። በሚኖሩበት ሎንዶን፣ የምዕመናኑን ሥነ ልቡና ጠንቅቀው በመገምገም የበለጠ ክፍፍል እንዳይፈጠር ኹኔታዎችን በጥንቃቄ የሚያዩ፤ አንድ ቀን ኹሉም ወደ ሌቡናው ሲመለስ በእግዚአብሔር ኃይል ይስተካከላል ብለው ተስፋን ሰንቀው የኖሩ አባት ናቸው።

ሐዋርያዊ አገልግሎት በሲኖዶሳዊ አንድነት

ይህ በእንዲህ እንዲለ፣ ጊዜው ደርሶ አዲስ ተስፋ ብቅ አለ፡፡ በኢትዮጵያ አዲስ የለውጥ መንግሥት መምጣቱ፣ በተለይ አዲሱ ጠቅላይ ሚኒስትር ቅዱስ ሲኖዶስ አንድ ይኾን ዘንድ፥ “ግንቡን እናፍርስ፤ ድልድዩን እንገንባ” በሚል መሪ ቃል፣ ሐምሌ ፳፩ ቀን ፳፻፲ ዓ.ም. ብፁዕ ወቅዱስ አቡነ መርቆሬዎስን ከአነጋገሩ በኋላ ብፁዕነታቸው ከሌሎች ብፁዓን አባቶች ጋራ በመኾን ወደ አገር ቤት በመግባት ታሪካዊው ዕርቀ ሰላም ተፈጸመ። 

ቅዱስ ሲኖዶስ አንድ በመኾኑ፣ ብፁዕነታቸው፣ በኢትዮጵያ ኦርቶዶክስ ተዋሕዶ ቤተ ክርስቲያን የዩናይትድ ኪንግደም እና አየርላንድ አህጉረ ስብከት ሊቀ ጳጳስ በመኾን፣ ጥቅምት ፳ ቀን ፳፻፲፩ ዓ.ም. ተመደቡ። ብፁዕነታቸው፣ ከቅዱስ ሲኖዶስ ስብሰባ እንደተመለሱ የተለመደ ተግባራቸውን በዐዲሱ ሓላፊነታቸው በማጠናከር ሀገረ ስብከታቸውን ለማደራጀት ጊዜ አላጠፉም፤ በርካታ አብያተ ክርስቲያናት ቢኖሩም፣ ሕገ ቤተ ክርስቲያን የተከበረ እና አገልግሎቱ የተሟላ ኾኖ ባለማየታቸው፣ በቅድሚያ ሀገረ ስብከቱን ፈቃደኛ ለኾኑ ካህናት የሥራ ሓላፊነት በማከፋፈል፣ ተዘዋውረው በመጎብኘት፣ ያሉባቸውን ችግሮች እና ተግዳሮቶች በጥንቃቄ ማጥናት እና መመሪያ መስጠት ጀመሩ።

በአንዳንዶች ዘንድ፣ የብፁዕነታቸው ሕገ ቤተ ክርስቲያንንና ቀኖና ቤተ ክርስቲያንን ማስከበራቸው በበጎ አልታየም። ብፁዕነታቸው ግን፣ ይህን በሆደ ሰፊነት እና በአርቆ አስተዋይነት ማሳለፋቸው የሚደንቅ ነው። አባታዊ ምክራቸው፣ የቤተ ክርስቲያን ቀኖናዋ ይከበር በማለታቸው፣ ከአላዋቂዎች ዘንድ ነቀፌታ ቢደርስባቸው እንኳን በጽናት ታግሠው የሚኖሩ፤ የታዘዙትን የሚፈጽሙ የቤተ ክርስቲያን አገልጋይ ነበሩ። ችግር ባለባቸው አብያተ ክርስቲያናት እየተገኙ፣ ከምዕመናን ጋራ በሚያደርጉት ስብሰባ፥ ሐሳብ በነፃነት እንዲንሸራሸር ለኹሉም ዕድል የሚሰጡ፣ በተለይ ሴት እኅቶቻችን ስለ ቤተ ክርስቲያን የሚያቀርቡት ሐሳብ ሊደመጡ ይገባል የሚሉና ሚዛናዊ ዲኝነት የሚሰጡ፣ በቤተ ክርስቲያን ሥርዓት እና በቀኖና ቤተ ክርስቲያን ላይ የማይደራደሩ፣ ጽኑ አቋም እና ጠንካራ ሰብእና የነበራቸው አባት ነበሩ።

ብፁዕነታቸው በመጨረሻ፣ ከምእመናን ጋር ባደረጉት አንድ ታላቅ ጉባኤ እንዲህ ብለው ነበር፦

“የቤተ ክርስቲያን ባለቤቷ፣ እርሱ ራሱ በደሙ ዋጅቶ የመሠረታት ኢየሱስ ክርስቶስ ነው፡፡ እኛ ደግሞ አገልጋዮች ነን፡፡ ቤተ ክርስቲያን በሰማይም በምድርም የተሠራች ነች። እኛ ግን እናልፋለን፤ ስለዚህ የኹሉ ማሠሪያ በኾነው ሰላም እና ፍቅር ቤተ ክርስቲያንን ማገልገል ይኖርብናል።”

ብፁዕነታቸው ይመሩት በነበረው ሀገረ ስብከት፣ የተሟላ አገልግሎት የሚሰጥ ቋሚ ጽ/ቤት መገንባት፣ ለኹሉም ምዕመናን የመረጃ ማዕከል እንዲሁም ለአገልግሎት የሚመጡ ሊቃነ ጳጳሳት እና አገልጋዮች ማረፊያ ጭምር የማደራጀት ታላቅ እና ሰፊ ዕቅድ ነበራቸው። ኾኖም በአገልግሎት ላይ እያሉ፣ ቀደም ሲል በነበረባቸው ሕመም ምክንያት፣ በልዊሽሃም ሆስፒታል በሕክምና ሲረዱ ቆይተው፣ መጋቢት ፳ ቀን ፳፻፲፪ ዓ.ም. ዕለተ እሑድ በሎንዶን ከተማ ዐርፈዋል። 

ምንጊዜም ቢኾን፣ ጻድቃን ካለፉ በኋላ ስለ ጽድቃቸው ይነገራል፤ እንደሚባለው ኹሉ፣ ብፁዕ አቡነ ጎርጎርዮስም በሕይወት ዘመናቸው፥ ለራሴ ይድላኝ፣ መጓጓዣ አቅርቡልኝ፣ ደመወዝ ቁርጡልኝ የማይሉ፣ አጀብ ይብዛልኝ፣ እዩኝ እዩኝን የማይወዱ፣ ለንዋይ የማይጨነቁ፣ ሰውን በእኩል ዓይን የሚመለከቱ፣ በመጠን መኖርን እንጂ ያልተገባ ነገርንና ቅንጡነትን የሚጸየፉ፤ ይልቁንም ብፁዕነታቸው፥ ሕገ ቤተ ክርስቲያን ይከበር፤ ቀኖና ቤተ ክርስቲያን ይጠበቅ እያሉ መዋዕለ ዘመናቸውን በማይዋዥቅ መንፈሳዊነት የፈጸሙ ደግ እና ቀናዒ የቤተ ክርስቲያን አባት ነበሩ።

የብፁዕነታቸው በረከት ይደርብን፡፡

ነፍሳቸውን ከቅዱሳን ጋራ ይደምርልን፤ አሜን፡፡

የብፁዕ አቡነ ጎርጎርዮስ ሣልሳዊ ሥርዐተ ቀብር: ነገ ረፋድ በደብረ ሊባኖስ ገዳም ይፈጸማል

  • ሥርዓተ ቀብሩ ለወራት የዘገየው፥ ወረርሺኙ ባስከተለው እግዳት የተነሣ ኹኔታዎች እስኪመቻቹ ድረስ ነው፤
  • መንሥኤ ኅልፈታቸው በኮቪድ-19 እንዳልኾነ፣ የሆስፒታል ማረጋገጫ ለቅዱስ ሲኖዶስ እና ለመንግሥት ቀርቧል
  • በምዕራቡ ዓለም አሠረ ምንኵስናቸውን ጠብቀው እና “የሎንዶን ባሕታዊ” ኾነው ለ29 ዓመታት በጽናት ያገለገሉ የሥርዓተ ቤተ ክርስቲያን ጠበቃ ነበሩ፤”/ሀገረ ስብከቱ/

***

ከኹለት ወራት በፊት በሎንዶን ከተማ ያረፉት የዩናይትድ ኪንግደም እና አየርላንድ ሀገረ ስብከት ሊቀ ጳጳስ ብፁዕ አቡነ ጎርጎርዮስ ሣልሳዊ ሥርዐተ ቀብር፣ ነገ ቅዳሜ፣ ግንቦት 22 ቀን 2012 ዓ.ም. በደብረ ሊባኖስ ገዳም ይፈጸማል፡፡

ሥርዐተ ቀብራቸውን በተመለከተ፣ ቋሚ ሲኖዶስ ዛሬ ባካሔደው ሳምንታዊ መደበኛ ስብሰባ፣ ኹለት ብፁዓን አባቶችን የመደበ ሲኾን፣ በከፍተኛ ጥንቃቄ እና በጥቂት የሰው ኃይል እንዲፈጸም መመሪያ ሰጥቷል፤ የሚያስፈልገው ወጪም በጠቅላይ ቤተ ክህነት ጽ/ቤት እንዲሸፈን አዟል፡፡

ቋሚ ሲኖዶሱ በጉዳዩ ላይ በተወያየበት ወቅት፣ የአስቸኳይ ጊዜ ዐዋጁን ለማስፈጸም ከተቋቋመው የብሔራዊ ግብረ ኃይል አካላት(የጤና ሚኒስቴር፣ ሰላም ሚኒስቴር እና የኅብረተሰብ ጤና ጥበቃ ኢንስቲትዩት) ጋራ ምክክር ማድረጉ ተጠቅሷል፡፡ የብፁዕነታቸውን ሞተ ዕረፍት አስመልክቶ ለተነሣው ጥያቄ፣ የዩናይትድ ኪንግደም እና አየርላንድ ሀገረ ስብከት ጽ/ቤት፣ ባለፈው ሚያዝያ 29 ቀን ለቅዱስ ሲኖዶስ ጽ/ቤት በላከው የሕክምና ማስረጃ ላይ የተመረኮዘ ገለጻ ተደርጓል፡፡

ብፁዕነታቸው በሕክምና ሲረዱ ከነበረበት የሎንዶኑ ሎዊሽሃም ሆስፒታል በተገኘው ማስረጃ፣ ለኅልፈት ያደረሳቸው፥ የቆየባቸው የስኳር ሕመም እና የልብ እክል እንዲሁም በመጨረሻ ያጋጠማቸው ኒሞኒያ እንጂ፣ ከኮሮና ቫይረስ ኹኔታ ጋራ ተያያዥ እንዳልኾነ ዝርዝር ማብራሪያ ቀርቦ ተሰምቷል፡፡ ሥርዐተ ቀብራቸውም፣ የአስቸኳይ ጊዜ ዐዋጁን ድንጋጌዎች እንዲሁም የኮቪድ-19 ቅድመ መከላከል ተግባራትን ጠብቆ በከፍተኛ ጥንቃቄ እንዲፈጸም መታዘዙ ተመልክቷል፡፡

በዚኽም መሠረት በተላለፈው ውሳኔ፣ ከወቅቱ የቋሚ ሲኖዶስ አባላት መካከል የደቡብ ጎንደር ሀገረ ስብከት ሊቀ ጳጳስ ብፁዕ አቡነ ሚካኤል እና የደብረ ሊባኖስ ገዳም የሚገኝበት የሰሜን ምዕራብ ሸዋ-ሰላሌ ሀገረ ስብከት ሊቀ ጳጳስ ብፁዕ አቡነ ቀውስጦስ፣ በጠቅላላው ከዐሥር ከማይበልጡ ወዳጆች እና የቅርብ ቤተ ሰዎች ጋራ በሥፍራው ተገኝተው፣ ነገ ቅዳሜ ረፋድ ከቅዳሴ ውጭ፣ ሥርዐተ ቀብራቸውን ያስፈጽማሉ፡፡ የአበውን ሥርዐት፣ ከአስቸኳይ ጊዜ ዐዋጁ እና የወረርሺኙ የጥንቃቄ ተግባራት ጋራ በማገናዘብ እንዲያስፈጽሙ መታዘዛቸው ተገልጿል፡፡

ትላንት ማምሻውን ቦሌ አየር ማረፊያ የደረሰውንና ዛሬ እስከ ሠርክ በካርጎ ተርሚናሉ የቆየውን የብፁዕነታቸውን አስከሬን፣ ቀን 11፡30 ገደማ መረከባቸውንና ይህ ዘገባ በሚጠናቀርበት ሰዓትም ሥርዐተ ቀብራቸው ወደሚፈጸምበት ደብረ ሊባኖስ ገዳም በማምራት ላይ እንደኾኑ፣ ጉዳዩን በመከታተል ላይ ከሚገኙ የቅርብ ቤተ ሰዎች ለማረጋገጥ ተችሏል፡፡

በተወለዱ በ82 ዓመታቸው መጋቢት 20 ቀን 2012 ዓ.ም. በሎንዶን ከተማ ያረፉት አረጋዊው ሊቀ ጳጳስ ብፁዕ አቡነ ጎርጎርዮስ፣ ጥቅምት 18 ቀን 1983 ዓ.ም. በአራተኛው ፓትርያርክ ብፁዕ ወቅዱስ አቡነ መርቆሬዎስ አንብሮተ እድ፣ የልዩ ጽ/ቤት ኤጲስ ቆጶስነት ተሹመው አገልግለዋል፡፡ የመንግሥት ለውጥን ተከትሎ ቅዱስ ፓትርያርኩ በተደረገባቸው ፖሊቲካዊ ግፊት ከመንበራቸው ሲሰደዱ፣ ብፁዕነታቸውም ለህልውናቸው ፈታኝ ኹኔታ ስላጋጠማቸው፣ በሚያዝያ ወር 1984 ዓ.ም. በስደት ወደ እንግሊዝ መግባታቸውን፣ ሀገረ ስብከቱ ለሥርዐተ ቀብሩ ያዘጋጀው ዜና ሕይወታቸው ያስረዳል፡፡

ሐምሌ 21 ቀን 2010 ዓ.ም. ሲኖዶሳዊ ዕርቀ ሰላም መፈጸሙን ተከትሎ፣ ብፁዕነታቸው፥ በኢትዮጵያ ኦርቶዶክስ ተዋሕዶ ቤተ ክርስቲያን የዩናይትድ ኪንግደም እና አየርላንድ ሀገረ ስብከት ሊቀ ጳጳስ በመኾን፣ ጥቅምት 20 ቀን 2012 ዓ.ም. መሾማቸውን አውስቷል። ጊዜ ሳያጠፉ ሀገረ ስብከቱን በፈቃደኛ ካህናት በማደራጀት፣ አብያተ ክርስቲያን በሕጉ መሠረት አገልግሎታቸው የተሟላ እንዲኾን አባታዊ ጥረት ማድረጋቸውን አስፍሯል፡፡ በሥርዓተ ቤተ ክርስቲያንና ቀኖና ቤተ ክርስቲያን መጠበቅ ላይ የነበራቸውን ጽኑ አቋም እና ጠንካራ ሰብእና በልዩነት ጠቅሷል። “የቤተ ክርስቲያን ቀኖናዋ ይከበር በማለታቸው ከአላዋቂዎች ዘንድ ነቀፌታ ቢደርስባቸው እንኳን፣ በጽናት ታግሠው የሚኖሩ፣ የታዘዙትን የሚፈጽሙ የቤተ ክርስቲያን አገልጋይ አባት ነበሩ፤” በማለት ቀናዒነታቸውን አዘክሯል፡፡

ብፁዕ አቡነ ጎርጎርዮስ ሣልሳዊ፣ ለሀገረ ስብከቱ የተሟላ አገልግሎት የሚሰጥ ቋሚ ጽ/ቤት የመገንባት፣ ለኹሉም ምእመናን የመረጃ ማዕከል እንዲሁም፣ ለአገልግሎት የሚመጡ ሊቃነ ጳጳሳት እና አገልጋዮች ማረፊያ የማደራጀት ታላቅ እና ሰፊ ዕቅድ እንደነበራቸው ጠቅሷል፡፡ ኾኖም፣ ቀደም ሲል በነበረባቸው ሕመም ምክንያት፣ በልዊሽሃም ሆስፒታል በሕክምና ሲረዱ ቆይተው፣ እሑድ መጋቢት 20 ቀን 2012 ዓ.ም. በሎንዶን ከተማ ማረፋቸውን አስታውቋል፡፡

በአጠቃላይ ብፁዕነታቸው፣ በኖሩበት በምዕራቡ ዓለም፣ ለ29 ዓመታት ደከመኝ ሰለቸኝ ሳይሉ ባለማቋረጥ በማገልገል፣ ጸንተው በመጸለይ እና በማስተማር፣ “የሎንዶን ባሕታዊ” ኾነው አሠረ ምንኵስናቸውን ጠብቀው ኖረዋል፤ በማለት ሐዋርያዊ ትጋታቸውን በስፋት አትቷል፡፡ የብፁዕ አቡነ ጎርጎርዮስ ሣልሳዊን ዜና ሕይወት ሙሉ ይዘት በቀጣይ ጡመራ እናቀርባለን፡፡

የብፁዕ አቡነ ጎርጎርዮስ አስከሬን ወደ ኢትዮጵያ ተመለሰ

  • ማምሻውን ቦሌ አየር ማረፊያ ደርሷል፤

ከኹለት ወራት በፊት በሎንዶን ከተማ ያረፉት፣ የብሪታንያ እና አየርላንድ አህጉረ ስብከት ሊቀ ጳጳስ ብፁዕ አቡነ ጎርጎርዮስ አስከሬን፣ ዛሬ ማምሻውን አዲስ አበባ ገብቷል፡፡

ብፁዕነታቸው ካረፉበት መጋቢት 20 ቀን ጀምሮ አስከሬናቸው በዚያው በሎንዶን ዐርፎ የቆየ ሲኾን፣ በሀገረ ስብከቱ እና በቅርብ ቤተ ሰዎቻቸው አማካይነት፣ ልክ በኹለት ወራቸው ዛሬ ኀሙስ፣ ግንቦት 20 ቀን 2012 ዓ.ም. ምሽት ወደ አዲስ አበባ እንዲመለስ መደረጉ ታውቋል፡፡

ዕረፍታቸውን ተከትሎ ቋሚ ሲኖዶስ አካሒዶት በነበረው ስብሰባ፣ በዓለም አቀፉ የኮሮና ቫይረስ ወረርሺኝ በተጣሉት እግዳት ሳቢያ፣ ለሥርዐተ ቀብሩ ኹኔታዎች እስኪመቻቹ ድረስ፣ ለብፁዕነታቸው ጸሎተ ፍትሐት እንዲደረግ እና ስማቸው በጸሎት እየተጠራ እንዲቆዩ፣ አስከሬናቸውን ለማቆየት አስፈላጊው ወጪ ኹሉ ሀገረ ስብከቱ በሚያቀርበው መሠረት በጠቅላይ ጽ/ቤቱ እንዲሸፈን ውሳኔ ማሳለፉ ተጠቅሷል፡፡

ቀጣይ የሽኝት እና የቀብር ሥነ ሥርዐትን በተመለከተ፣ መንበረ ፓትርያርኩ እየተነጋገረበት እንደኾነ ተገልጿል፡፡ ጸሎተ ፍትሐቱ፥ ብፁዕነታቸው ምንኵስናም ቅስናም በተቀበሉበት፣ በቀዳሽነት፣ በመጋቢነት እና በመምህርነት ባገለገሉበት በደብረ ጽጌ ገዳም፤ ሥርዐተ ቀብራቸውም በምናኔ በኖሩበት በደብረ ሊባኖስ ገዳም እንዲኾን ቀደም ሲል ተጠቁሞ እንደነበር በመረጃው ተመልክቷል፡፡

ቤተ ክርስቲያን ለምታሳድጋቸው ችግረኛ ሕፃናት ድርጅቱ የድጋፍ ጥሪ አቀረበ

  • በኮሮና ቫይረስ ወረርሺኝ ሳቢያ የበጎ አድራጊዎች ርዳታ ሊቋረጥ ወይም ሊዘገይ ይችላል
  • የመርጃ ማዕከሉን በግማሽ ቀንሷል፤ ከ39 ሺሕ በላይ ሕፃናትንና ቤተሰቦችን እየረዳ ነው፤
  • ከ1965 ዓ.ም. ጀምሮ 42ሺሕ ሕፃናትን አሳድጎ ለአገር በሚጠቅሙ ሞያዎች አሰማርቷል፤
  • በዐቅሙ ተጠናክሮ ተልእኮውን ይቀጥል ዘንድ፣ ሥራ አስኪያጁ የርዳታ ጥሪ አቅርበዋል፤
  • የምግብ ግብዓቶች፣ የጽዳት፣ የመድኃኒት እና የሕክምና መሣሪያዎች ድጋፍ ጠይቀዋል፡፡

***

logo

በኢትዮጵያ ኦርቶዶክስ ተዋሕዶ ቤተ ክርስቲያን የሕፃናት እና ቤተሰብ ጉዳይ ድርጅት፣ የኮሮና ቫይረስ ባሳደረው ተጽዕኖ ሳቢያ ችግር ውሰጥ በመግባቱ፣ ለሚያሳድጋቸው አሳዳጊ አልባ ሕፃናት እና ችግረኞች ድጋፍ ጠየቀ፡፡

ድርጅቱ ከተቋቋመበት 1965 ዓ.ም. ጀምሮ፣ በአገራችን የተለያዩ ከባቢዎች፣ 36 የሕፃናት መርጃ ማዕከላትን በመክፈት፣ 42 ሺሕ ያኽል ሕፃናትን አሳድጎ ለአገር እና ለወገን በሚጠቅሙ ልዩ ልዩ ሞያዎች ላይ አሰማርቷል፤ ጠቃሚ ዜጎች እንዲኾኑም አድርጓል፡፡

የድርጅቱ ሥራ አስኪያጅ ቀሲስ ሶምሶን በቀለ ለኢ.ቴቪ. እንደተናገሩት፣ ከበጎ አድራጊዎች የሚገኘው ርዳታ በመቀነሱ፣ 36 የሕፃናት መርጃ ማዕከላቱን ወደ 18 በመቀነስ፣ በአኹኑ ወቅት 6ሺሕ 620 ወላጆቻቸውን ያጡ ሕፃናትን በቀጥታ፣ 32ሺሕ 530 ችግረኛ ቤተሰቦችን ደግሞ በተዘዋዋሪ፣ በጠቅላላው 39ሺሕ 150 ወገኖችን እየረዳ ይገኛል፡፡

በአኹኑ ወቅት ችግሩ በኮሮና ቫይረስ ወረርሺኝ ምክንያት ተባብሶ፣ ድርጅቱ በሥሩ የሚረዳቸው ሕፃናት እና ችግረኛ ቤተሰቦች አደጋ ላይ እንዳይወድቁ ድጋፍ እንደሚያስፈልገው ሥራ አስኪያጁ ተናግረዋል፡፡ ገቢ እና ግብዓት በማሰባሰቡ ሥራ፣ ኹሉም የበኩሉን እንዲያግዝ ጠይቀዋል፡፡

ለድርጅቱ መጠነኛ ድጋፍ እያደረጉ የሚገኙት፥ በአሜሪካ፣ በጀርመን፣ በቆጵሮስ፣ በሀንጋሪ እና በኤዥያ የሚገኙ በጎ አድራጊ ተቋማት፣ በአገራቸው እየተስፋፋ ባለው የኮሮና ቫይረስ ወረርሺኝ ምክንያት ርዳታቸውን ሊያቋርጡ ወይም ሊያዘገዩ ይችላሉ ያሉት ሥራ አስኪያጁ፣ በዚኽም ድርጅቱ፥ የገንዘብ፣ የምግብ እና የንጽሕና መጠበቂያ ግብዓቶችን ከተለያዩ አካላት እና በጎ አድራጊዎች ይጠብቃል፤ ብለዋል፡፡

Kesis Samson Bekele

ሥራ አስኪያጁ ቀሲስ ሶምሶን በቀለ

የበጎ አድራጎት ልገሳዎችን በቀላሉ ለመሰብሰብ እንዲያስችል፣ ዐድዋ ድልድይ አቅራቢያ(ከሲግናል ወደ እንግሊዝ ኤምባሲ በሚወስደው መንገድ ጫፍ ላይ) ባለው እና ድርጅቱ በሚያስተዳድረው የምግባረ ሠናይ ጠቅላላ ሆስፒታል ግቢ ኹኔታዎችን አመቻችተው በመጠባበቅ ላይ እንደኾኑ ገልጸዋል፡፡ በገንዘብ ለመርዳት ለሚፈልጉም፣ በድርጅቱ የባንክ አድራሻ እንዲሁም በ6650 A ብለው በመላክ ድጋፍ እንዲያደርጉ፣ ሥራ አስኪያጁ ቀሲስ ሶምሶን በቀለ ጥሪ አቅርበዋል፡፡

#የሚፈለጉ የርዳታ ዓይነቶች

#ምግብ፡-

የጤፍ ዱቄት፣ አተር ክክ፣ ሽሮ፣ የዳቦ ዱቄት፣ ማካሮኒ፣ ስኳር፣ ሻይ ቅጠል፣ ዘይት፣ ምስር ክክ፣ በርበሬ፣ ፓስታ፣ ሩዝ፣ ጨው፤

#የጽዳት_ዕቃዎች፡-

ሳሙና፣ ኦሞ፣ አልኮሆል፣ ሳኒታይዘር

#መድኃኒት_እና_የሕክምና_መሣሪያዎች፡-

አልኮሆል፣ የፊት ጭምብል፣ ጓንት፣ ሕይወት አድን ንጥረ ነገር (ORS)… ወዘተ.

#በገንዘብ_ለመርዳት

በኢትዮጵያ ኦርቶዶክስ ተዋሕዶ ቤተ ክርስቲያን የሕፃናት እና ቤተሰብ ጉዳይ ድርጅት

የኢትዮጵያ ንግድ ባንክ ሥላሴ ቅርንጫፍ

#ሒሳብ_ቁጥር

1000010870546

#ስዊፍት_ኮድ- CBETETA

#ኤስ_ኤም_ኤስ_ኮድ፡-

6650 A (3.00 ብር ብቻ)

————————————

#ለበለጠ_ማብራሪያ፤

ስልክ ቁጥር፡- +251-111-232754

ወይም +251- 911 – 226147

ፋክስ ቁጥር፡- +251-111-232755‚

ፖ.ሣ.ቁ. 30269

ኢ.ሜይል፡- eoccfaomainoffice@yahoo.com

ሊቀ ማእምራን ፋንታሁን ሙጬ፣ የብዙኀን መገናኛ አገልግሎት ሥርጭት ድርጅት ዋና ሥራ አስኪያጅ ኾነው ተመደቡ

  • የሌሎች አምስት የጠቅላይ ጽ/ቤት መምሪያዎች ዋና ሓላፊዎች ዝውውር ተደረገ፤
  • ውጤታማዋ ወ/ሮ ጽጌሬዳ ዓለሙ፣ ወደ በጀት እና ሒሳብ ዋና ሓላፊነት ተመለሱ
  • የሊቃውንት ጉባኤ ምክትል ሰብሳቢ መጋቤ ብሉይ ዕዝራ ለገሠ፣ ዋና ሓላፊ ኾኑ፤

***

የመንበረ ፓትርያርክ ጠቅላይ ቤተ ክህነት ጽ/ቤት፣ የአምስት መምሪያዎች እና ድርጅቶች ዋና ሓላፊዎች ዝውውር እና ሽግሽግ ያደረገ ሲኾን፣ ሊቀ ማእምራን ፋንታሁን ሙጬ፣ ከሰበካ ጉባኤ ማዳራጃ መምሪያ ወደ መገናኛ ብዙኀን አገልግሎት ሥርጭት ድርጅት ተዛውረው በዋና ሥራ አስኪያጅነት ተመደቡ፡፡

በብፁዕ ጠቅላይ ሥራ አስኪያጁ አቅራቢነት እና በብፁዕ ወቅዱስ ፓትርያርኩ ፈቃድ የተመደቡት ሊቀ ማእምራን ፋንታሁን ሙጬ፣ ከሐምሌ ወር 2003 ዓ.ም. አንሥቶ ላለፉት ዘጠኝ ዓመታት፣ የሰበካ ጉባኤ ማደራጃ መምሪያን በዋና ሓላፊነት ሲመሩ ቆይተዋል፡፡

lique-maemeran-fantahun-muche (1)

ሊቀ ማእምራን ፋንታሁን ሙጬ

ማደራጃ መምሪያውን፣ “በመልካም ሥነ ምግባር እና በጥሩ ኹኔታ በመምራት” የሥራ ሓላፊነታቸውን እንደተወጡ በምደባ ደብዳቤው ተገልጿል፤ “ለሌሎች ሓላፊዎችም አርኣያ የኾነውን ቅንነታቸውንና የሥራ ትጋታቸውን ከግምት በማስገባት”፣ የብዙኀን መገናኛ አገልግሎት ሥርጭት ድርጅት ዋና ሥራ አስኪያጅ ኾነው እንዲሠሩ መመደባቸውን አስታውቋል፡፡

ሊቀ ማእምራን ፋንታሁንና የሰበካ ጉባኤ ማደራጃ መምሪያ ባልደረቦቻቸው፣ የቤተ ክርስቲያናችን መተዳደርያ ደንብ/ቃለ ዐዋዲ/ ግንዛቤ እንዲጎለብትና ምእመናን የድርሻቸውን እንዲወጡ በየሀገረ ስብከቱ ሰፊ እና ተከታታይ ስምሪቶችን አካሒደዋል፡፡ የምእመናንና የገንዘብ መሰብሰቢያ ቅጾች በአግባቡ እና በጥራት እንዲሞሉ በማድረግ፣ ከመላው አህጉረ ስብከት ለጠቅላይ ቤተ ክህነቱ የሚላከው ዓመታዊ የፐርሰንት መዋጮ፣ በእጅግ ከፍተኛ ጭማሬ አሳድገዋል፤ በሐምሌ ወር 2003 ዓ.ም. ከነበረበት 19 ሚሊዮን ብር፣ በጥቅምት ወር 2012 ዓ.ም. ወደተመዘገበው 337 ሚሊዮን ብር ነው የተመነደገው፡፡

በየዓመቱ ጥቅምት ወር በሚካሔደው የሰበካ መንፈሳዊ ጉባኤ አጠቃላይ ስብሰባ፣ የውጭ አህጉረ ስብከት ተሳትፎ ከጊዜ ወደ ጊዜ እንዲጨምር፣ የፐርሰንት መዋጮም እንዲጀምሩ አበረታታዋል፡፡ በአሰልቺነቱ የሚታወቀው የአጠቃላይ ጉባኤው የስብሰባ ሥነ ሥርዓት፣ አልፎ አልፎም ቢኾን፣ ከወቅታዊ ጉዳዮች ጋራ በተያያዘ ለታየበት አበረታች ውጥን የሊቀ ማእምራን ፋንታሁን ሚና ተጠቃሽ ነው፡፡

የቃለ ዐዋዲው ደንብ በ2009 ዓ.ም. ለአራተኛ ጊዜ ተሻሽሎ እንዲጸድቅና ለየአህጉረ ስብከቱ እንዲሠራጭ ከማድረጋቸውም በላይ፥ በአፋን ኦሮሞ(ግእዝ እና ላቲን ፊደል)፣ በትግርኛ እና በእንግሊዝኛ ቋንቋዎች ተተርጉሞ እና በባለሞያዎች ተተችቶ፣ ለኅትመት ዝግጁ እንዲኾን አድርገዋል፡፡ በተጨማሪም፣ የአኃዛዊ መረጃ ክፍሉን እስከ አጥቢያ አብያተ ክርስቲያን ድረስ በኢንፎርሜሽን ኮሚዩኒኬሽን ቴክኖሎጂ በማጠናከር፣ መረጃዎችን ለመለዋወጥ እና ወቅቱን የዋጀ ሥራ ለመሥራት ቅድመ ዝግጅቱን አጠናቀዋል፡፡ የመምሪያውን ወጪዎች በመቆጠብ በአንድ ተሽከርካሪ እና ሌሎች ቋሚ ንብረቶች ለማሟላት ተሞክሯል፡፡ የግል ገንዘባቸውንና ደመወዛቸውን እየሰጡ የሰበካ ጉባኤን ካደራጁት እና ካስፋፉት ሊቀ ጉባኤ አባ አበራ በቀለ ቀጥሎ፣ መምሪያውን ለረጅም ዓመታት መርተዋል – ሊቀ ማእምራን ፋንታሁን ሙጬ፡፡

ከማደራጃ መምሪያው በፊት፥ በሕዝብ ግንኙነት፣ ዕቅድ እና ልማት መምሪያ እንዲሁም በትምህርት እና ማሠልጠኛ መምሪያ በዋና ሓላፊነት ሠርተዋል፡፡ የሰዋስወ ብርሃን ቅዱስ ጳውሎስ መንፈሳዊ ኮሌጅ ዋና ዲን ኾነው በሠሩበት ወቅት፣ የቀኑን መደበኛ የሴሚነሪ መርሐ ግብር፣ በማታውም ክፍለ ጊዜ አስጀምረዋል፡፡ ከማኅበረ ቅዱሳን በርዳታ ባስገኟቸው በርካታ ኮምፒዩተሮች፣ ደቀ መዛሙርቱ መሠረታዊ የአጠቃቀም ክሂል እንዲቀስሙ አድርገዋል፤ ግምታቸው ከዘጠና ሺሕ ብር በላይ የኾኑ ልዩ ልዩ መጻሕፍትን በስጦታ አሰባስበው ቤተ መጻሕፍቱን አደራጅተዋል፤ መንፈሳዊ ኮሌጁ የተወረሰበትን ዳቦ ቤት እና ክበቡን በማስመለስ የራስ አገዝ አቅሙን አጠናክረዋል፡፡

ሊቀ ማእምራን ፋንታሁን፣ በምእመናንና በብዙኀኑ ሕዝብ ዘንድ በስፋት የሚታወቁት፣ የመስቀል ደመራ እና የጥምቀት በዓላት አከባበር መርሐ ግብሮችን፣ እንዲሁም ዐበይት ወቅታዊ ኹነቶችን በአማርኛ እና በእንግሊዝኛ በመምራት ባላቸው የዐደባባይ ተሳትፎ ነው፤ የውጭ አብያተ ክርስቲያን አባቶች እና ሌሎችም እንግዶች በመንበረ ፓትርያርኩ ሲስተናገዱ፣ መተርጉመ ልሳን ኾነው ያገለግላሉ፡፡

ከልዩ ልዩ ተቋማት ከፍተኛ ሓላፊነት ባሻገር፥ በሕፃናት እና ቤተሰብ ጉዳይ ድርጅት፣ በልደታ ጤና ሳይንስ ኮሌጅ፣ በቤቶች እና ሕንፃዎች አስተዳደር እና ልማት ድርጅት እንዲሁም አኹን በተሾሙበት የብዙኀን መገናኛ አገልግሎት ሥርጭት ድርጅት የቦርድ አባል ኾነው አገልግለዋል፡፡

ከቅድስት ሥላሴ መንፈሳዊ ዩኒቨርሲቲ፣ በነገረ መለኰት የመጀመሪያ ዲግሪአቸውን በከፍተኛ ማዕርግ ያገኙት ሊቀ ማእምራን ፋንታሁን ሙጬ፣ በገዳመ ኢየሱስ ደብር በምክትል አስተዳዳሪነት ቢመደቡም፣ ብዙም ሳይቆዩ ትምህርታቸውን በኹለተኛ ዲግሪ ለመቀጠል ወደ ኦስትሪያ ቬና አምርተዋል፡፡ በ650 ዓመታት የዩኒቨርሲቲው ታሪክ ውስጥ፣ የመጀመሪያው ኢትዮጵያዊ ተማሪ የነበሩት ሊቀ ማእምራን፣ በሊተርጂካል ቴዎሎጂ የማስተርስ ዲግሪአቸውን በእጅግ ከፍተኛ ማዕርግ በማጠናቀቅ ከተመለሱ በኋላ ነበር፣ የሰዋስወ ብርሃን ቅዱስ ጳውሎስ መንፈሳዊ ኮሌጅ ዲን ኾነው የተመደቡት፡፡

በዚኹ የነገረ መለኰት ዘርፍ የዶክትሬት ዲግሪአቸውን በቬና ዩኒቨርሲቲ ቀጥለው የሴሚናር ሥራቸውን ቢጨርሱም፣ የመመረቂያ ዲዘርቴሽናቸውን ሳያጠናቅቁ ወደ አገር ቤት ተጠርተው፣ የአዲስ አበባ ሀገረ ስብከት ዋና ሥራ አስኪያጅ ኾነው ተመድበው ሠርተዋል፡፡ ‘ትምህርት እስከ ዕድሜ ልክ’ ያሉ የሚመስሉትና ለመማር የማይቦዝኑት ሊቀ ማእምራን ፋንታሁን ሙጬ፣ አኹን በከፍተኛ የሥራ ሓላፊነት ላይ እያሉም፣ በመቐለ ዩኒቨርሲቲ የንግድ አስተዳደር፣ በዩኒቲ ዩኒቨርሲቲ የኦርጋናይዜሽናል ሊደርሺፕ የኹለተኛ ዲግሪ ትምህርታቸውን እየተከታተሉ ይገኛሉ፡፡ በትውፊታዊው ሥርዐተ ትምህርት፥ ቅኔውን በአስነጋሪነት፣ አቋቋሙንም በቆሜ የዜማ ይትበሃል በመምህርነት ደረጃ ጠንቅቀውታል፡፡

እንግዲህ ሊቀ ማእምራን ፋንታሁን ሙጩ፣ ለተጠቀሱት ዓመታት ያካበቱት ትምህርት እና ልምድ፣ ካለፈው በበለጠ ኹኔታ ተገልጦ የሚታይበት መድረክ፣ ከትላንት ግንቦት 10 ቀን 2012 ዓ.ም. ጀምሮ በዋና ሥራ አስኪያጅነት የተመደቡበት፣ የብዙኀን መገናኛ አገልግሎት ሥርጭት ድርጅት ነው፡፡ በብፁዕ አቡነ ማቴዎስ የበላይ ሓላፊነት የሚመራው ድርጅቱ፣ የቤተ ክርስቲያናችን ልሳን የኾነውን የኢኦተቤ-ቴቪ(EOTC-Tv.) ጣቢያ ያስተዳድራል፡፡ ድርጅቱ፥ የሥራ አመራር ቦርዱንና የውስጥ አደረጃጀቱን ገምግሞ ከፍተኛ ለውጥ ለማምጣት እየጣረ መኾኑን ገልጿል፤ የአማርኛ፣ የአፋን ኦሮሞ እና የትግርኛ ክፍሎች እየራሳቸው ተደራጅተው፣ መርሐ ግብሮችን በመደበኛነት እንዲያሠራጩ አድርጓል፡፡

EOTC Tv. pledge

ሥርጭቱን ከሦስት ዓመት በፊት ሲጀምር፣ በወር እስከ 126ሺሕ ዶላር ለሳተላይት ኩባንያ ይከፍልበት የነበረውን፣ በባለሞያዎች በታገዘ የገበያ ጥናት ወጪውን ቀንሶ፣ ከእያንዳንዱ ወርኃዊ ክፍያ ከሰባት ሺሕ ዶላር በላይ ለማትረፍ ችያለኹ፤ ብሏል፡፡ በማርኬቲንግ ክፍሉ ገቢን ለመጨመር ጥረት እየተደረገ ነው፤ የውጭ እና የአገር ውስጥ አህጉረ ስብከት በአየር ሰዓት መጋራት እንዲሳተፉ ለማድረግ ውሎች እየተፈረሙ መኾኑን አመልክቷል፡፡ በማኅበራዊ ድረ ገጽ(ፌስቡክ እና ዩቲዩብ) በመጠቀመም፣ በአጭር ጊዜ ብዙ ተከታዮችን ማፍራቱንና ለገቢ ማስገኛነት ለመጠቀም ጥረት እየተደረገ መኾኑን አስታውቋል፡፡ ከኮሮና ቫይረስ ወረርሺኝ ጋራ ተያይዞ፣ በመንግሥት እና የግል ቴሌቪዥን ጣቢያዎች የተላለፈውን የጸሎት እና ትምህርት ቀጥታ ሥርጭት፣ በጣቢያው ለማስቀጠል የሚረዱ ቴክኖሎጂዎችን ለመገንባት፣ ለበጎ አድራጊ ግለሰቦች እና አካላት ሰፊ የቅስቀሳ ጥሪዎችን እያቀረበ ይገኛል፡፡

በትላንትናው የጠቅላይ ቤተ ክህነቱ የከፍተኛ ሓላፊዎች ዝውውር፣ የሊቀ ማእምራን ፋንታሁን ሙጬ ምክትል በመኾን ሲሠሩ የቆዩት መጋቤ ሐዲስ ሐዋዘ ብርሃን ጫኔ፣ የሰበካ ጉባኤ ማደራጃ መምሪያውን በዋና ሓላፊነት እንዲመሩ በዕድገት መመደባቸው ታውቋል፡፡ የብዙኀን መገናኛ ድርጅቱ ከተቋቋመበት እና የቴሌቪዥን ጣቢያው ሥርጭቱን ከጀመረበት ከሦስት ዓመት በፊት አንሥቶ፣ በዋና ሥራ አስኪያጅነት የመሩት መ/ር ዳንኤል ሰይፈ ሚካኤል፣ ቀደም ሲል ወደ ተመደቡበት የውጭ ጉዳይ መምሪያው ተዛውረው ይሠራሉ፡፡

በተያያዘ ዜና፣ ከዓመት በፊት ከበጀት እና ሒሳብ መምሪያ ዋና ሓላፊነት ወደ ቤቶች እና ሕንፃዎች አስተዳደር እና ልማት ድርጅት ቁጥጥር ክፍል ሓላፊነት ተዛውረው የነበሩት ውጤታማዋ አካውንታንት ወ/ሮ ጽጌሬዳ ዓለሙ፣ የጠቅላይ ጽ/ቤቱን የበጀት እና ሒሳብ መምሪያ በዋና ሓላፊነት እንዲመሩ ተመልሰው ተመድበዋል፡፡ በሞዴል ላይ ብቻ የተንጠለጠለውንና ጠቅላይ ጽ/ቤቱ ለደረሰበት አሠራር እና ቁጥጥር የማይመጥነውን ነጠላ የሒሳብ እና መዝገብ አያያዝ፣ ወደ ዘመናዊው የኹለትዮሽ የሒሳብ አመዘጋገብ የቀየሩት፣ ለዚኽም የሚመቹ የተለያዩ የጥሬ ገንዘብ እና የንብረት ገቢ እና ወጪ ሞዴላሞዴሎችንና ሰነዶችን እንዲዘጋጅ ያደረጉት ወ/ሮ ጽጌሬዳ ዓለሙ ናቸው፡፡ ከዋናው መሥሪያ ቤት ባሻገር አብዛኞቹ አህጉረ ስብከት፣ በዐዲሱ የኹለትዮሽ የሒሳብ አመዘጋገብ እንዲሠሩ፣ ሥልጠና እና ድጋፍ በመስጠት መሠረቱን የጣሉት፣ ከ2003 ዓ.ም. ጀምሮ ከአዲስ አበባ ዩኒቨርሲቲ ወደ ጠቅላይ ጽ/ቤቱ የመጡት ምስጉኗ ሞያተኛ ወ/ሮ ጽጌሬዳ ዓለሙ ናቸው፡፡

በሌላ በኩል፣ የበጀት እና ሒሳብ መምሪያው ዋና ሓላፊ የነበሩት የአካውንቲንግ እና የማኔጅመንት ባለሞያው መልአከ ብርሃን ፍሥሓ ጌታነህ፣ ወደ ጠቅላይ ጽ/ቤቱ የቁጥጥር አገልግሎት መምሪያ ዋና ሓላፊነት ተዛውረዋል፡፡ በቁጥጥር አገልግሎት ዋና ሓላፊነት ለረጅም ጊዜ የሠሩት መምህር ኤርሚያስ ተድላ በጡረታ ተገልለዋል፡፡ የሕግ አገልግሎት መምሪያ ዋና ሓላፊ አፈ መምህር አባ ገብረ ሥላሴ ጌትነት፣ ወደ ቤቶች እና ሕንፃዎች አስተዳደር እና ልማት ድርጅት ተዛውረው በዋና ሥራ አስኪያጅነት ሲመደቡ፣ የድርጅቱ ዋና ሥራ አስኪያጅ የነበሩት የአካውንቲንግ ባለሞያው እና የሕግ ዐዋቂው ሊቀ ትጉሃን ሽመልስ ቸርነት ደግሞ ወደ ሕግ አገልግሎት መምሪያ ዋና ሓላፊነት ተዛውረዋል፡፡ የድርጅቱን ዓመታዊ የኪራይ ገቢ ከ29 ሚሊዮን ወደ 86 ሚሊዮን ብር አሳድገዋል፤ በአሮጌው ቄራ አካባቢ በግንባታ ላይ ያሉትን ኹለት ሕንፃዎች መሠረት በማስጣል ሥራቸውን አስኪደዋል፤ በተመለሱ ቤቶች ርክክብ አፈጻጸም ወቅት፣ የግል ካርታ የወጣባቸውንና ከቤተ ክርስቲያን የተወረሱ አይደሉም በማለት አላግባብ ለመውሰድ የሚደረገውን ሙከራ በማምከን፣ ለቤተ ክርስቲያናች ካርታ የማውጣት ሥራው እንዲፋጠን አድርገዋል፡፡

ከትላንቱ ዝውውር ሦስት ቀናት ቀደም ሲል፣ ጠቅላይ ጽ/ቤቱ በዕድገት ባደረገው ምደባ፣ የሊቃውንት ጉባኤ ምክትል ሰብሳቢ የነበሩትን መጋቤ ብሉይ ዕዝራ ለገሠን፣ የሊቃውንት ጉባኤ ዋና ሰብሳቢ ኾነው እንዲሠሩ ሲሾም፣ የቀድሞው ሰብሳቢ ሊቀ አእላፍ ያዝዓለም ገሰሰ፣ በጡረታ ተገልለው በአባልነት እንዲቀጥሉ ወስኗል፡፡ ሌላውን የሊቃውንት ጉባኤ አባል መጋቤ ምሥጢር ፍሬ ስብሐት ዱባለን፣ የሊቃውንት ጉባኤ ምክትል ሰብሳቢ አድርጎ በዕድገት መድቧቸዋል፡፡

ጠቅላይ ጽ/ቤቱ ከወር በፊት አድርጎት በነበረው ምደባም፣ በዐዲስ መልክ ለተቋቋመው የሕዝብ ግንኙነት አገልግሎት መምሪያ፣ ሊቀ ሥዩማን እስክንድር ገብረ ክርስቶስን በዋና ሓላፊነት መሾሙ ይታወሳል፡፡ ሊቀ ሥዩማን ቀድሞ ይመሩት በነበረው የዕቅድ እና ልማት መምሪያም፣ የገጠር አብያተ ክርስቲያናት ገዳማት እና የአብነት ት/ቤቶች ርዳታ ማስተባበሪያ እና ማደራጃ ዋና ሓላፊ መጋቤ ካህናት አባ ሀብተ ማርያም ዐሥራትን በዝውውር ተክቷል፡፡ በስብከተ ወንጌል እና ሐዋርያዊ ተልእኮ መምሪያ ተዘዋዋሪ ሰባኬ ወንጌል የነበሩትን መምህር አባ ለይኩን ግፋ ወሰንን፣ የገጠር አብያተ ክርስቲያናት ገዳማት እና የአብነት ት/ቤቶች ርዳታ ማስተባበሪያ እና ማደራጃ ዋና ሓላፊነት መድቧቸዋል፡፡

የቤተ ክርስቲያን በሮች እንዲከፈቱ የተላለፈውን ውሳኔ ለማስፈጸም መዘጋጀቱን የአዲስ አበባ ሰንበት ት/ቤቶች አንድነት አስታወቀ

 

FB_IMG_1589804669872

ከአካባቢው የፖሊስ አካላት ጋራ በመነጋገር ለነገ ማክሰኞ፣ ግንቦት 11 ቀን 2012 ዓ.ም. ክብረ በዓል የተዘጋጀው የደብረ ይባቤ ቅዱስ ያሬድ ቤተ ክርስቲያን

  • ውሳኔው፣ ለአህጉረ ስብከት እና ለመንግሥት ሳይዘገይ እንዲሰራጭ ግፊት እያደረገ ነው፤
  • ሀገረ ስብከቱ፣ አንድነቱን ከመንግሥት ጋራ በማወያየት አፈጻጸሙን እንዲያመቻች ጠየቀ፤
  • በአንዳንድ ክፍላተ ከተማ፣ ከፖሊስ አባላት የሚታየው አለመተባበር እንደሚያሳስበው ገለጸ፤
  • ምእመናን በየሰበካቸው፣ ጥንቃቄዎችን በመተግበር ለአስተናጋጆች ታዛዥ እንዲኾኑ አሳሰበ፤

***

  • ከሀገረ ስብከት ጽ/ቤት እስከ አጥቢያ የተደራጁ፣ 1ሺሕ189 አስተባባሪዎችን አሠልጥኗል፤
  • በ227 አጥቢያዎች፣ ከ30 ሺሕ በላይ የሰንበት ት/ቤት አባላትን በአስተናጋጅነት መድቧል፤
  • ቅዳሴ፣ ክርስትና፣ ጋብቻ፣ ቀብር እና የቢሮ አገልግሎቶች በአግባቡ እንዲፈጸሙ ያደርጋል፤
  • በኹሉም አጥቢያዎች በመመሪያው በተፈቀደው የምእመናን ብዛት ያለአድልዎ ይፈጸማሉ፤

***

የኮሮና ቫይረስ ወረርሺኝን መስፋፋት ለመግታት ቋሚ ሲኖዶስ ካሳለፈው የቅድመ ጥንቃቄ ውሳኔ ውጭ፣ በኀይል የተዘጉ የቤተ ክርስቲያን በሮች ተከፍተው መንፈሳዊ አገልግሎቱ በጥንቃቄ እንዲከናወን ቅዱስ ሲኖዶስ ያሳለፈውን ውሳኔ ለማስፈጸም መዘጋጀቱን፣ በአዲስ አበባ ሀገረ ስብከት የሰንበት ት/ቤቶች አንድነት አስታወቀ፡፡

የተቋረጠው መንፈሳዊ አገልግሎት፣ በየአጥቢያ አብያተ ክርስቲያናቱ በተመደቡ የሰንበት ት/ቤት ወጣቶች አስተናጋጅነት ጥንቃቄ በተሞላበት መንገድ እንዲከናወን፣ ቅዱስ ሲኖዶስ በርክበ ካህናት ምልዓተ ጉባኤ መደበኛ ስብሰባው የወሰነውን ለማስፈጸም፥ በሰው ኃይል አደረጃጀት፣ ሥልጠና እና ስምሪት አስፈላጊውን ዝግጅት ማድረጉን አንድነቱ አስታውቋል፡፡

FB_IMG_1589804635554

የርክበ ካህናት ምልዓተ ጉባኤው ውሳኔ፣ ከቅዱስ ሲኖዶስ ጽ/ቤት ለአስፈጻሚው የጠቅላይ ቤተ ክህነት ጽ/ቤት ባለፈው ሳምንት ዓርብ መላኩን እንደሚያውቅ የጠቀሰው አንድነቱ፣ ለተልእኮው መፋጠን ይረዳ ዘንድ በአስቸኳይ ወጪ ኾኖ ለመላው አህጉረ ስብከት እና ለሚመለከታቸው የመንግሥት አካላት እንዲሰራጭ ጠይቋል፡፡ እስከዚያው ድረስ፣ የፖሊስ ጥበቃ በተነሣባቸውና የተዘጉ በሮች በተከፈቱባቸው አጥቢያዎች ሓላፊነቱን በምልዓት ለመወጣት፣ ባልተነሣባቸው ደግሞ ግጭት እንዳይፈጠር እያረጋጋ እንደሚጠብቅ ገልጿል፡፡ በትብብር መሥራትን፣ መንፈሳዊ አገልግሎቱን በውነት ለሚናፍቁ ምእመናን በአግባቡ እንዲደርስ ማስቻልን ቅድሚያ ሰጥቶ እንደሚጥር አስገንዝቧል፡፡

የአዲስ አበባ ሀገረ ስብከት ጽ/ቤትም፣ ውሳኔው ከጠቅላይ ጽ/ቤቱ እንደ ደረሰው፣ የሰንበት ት/ቤት ማደራጃ ዋና ክፍሉንና አንድነቱን፣ ከሚመለከተው የከተማ አስተዳደሩ አካል ጋራ ፈጥኖ በማገናኘት በትብብር የሚፈጸምበትን ኹኔታ እንዲያመቻች ጠይቋል፡፡ ሀገረ ስብከቱ፣ በየደረጃው የተስፋ ልዑክ ግብረ ኃይሎችን አቋቁሜያለኹ ቢልም፣ በመመሪያው እንደታዘዘው፥ የሞያተኛ ተዋፅኦን ጠብቆ በአግባቡ ከማደራጀት፣ መዋቅራዊ ተዋረዱን አክብሮ መመሪያዎችን በትጋት ከማስፈጸም፣ ወቅታዊ መረጃዎችን በቅልጥፍና ከማስተላለፍ በተፃራሪ፣ አንዳንድ ሓላፊዎች በአዘቦታዊ አመለካከት የሚያሳዩት ግዴለሽነት በአስቸኳይ እንዲታረም አሳስቧል፡፡

“ምን እናግዛችኹ” የሚሉ ወገኖች ቢኖሩም፣ “መሽቷል አልችልም፤ ተልእኮ አለብኝ፤ አንድ ነገር ብኾን ዞር ብሎ የሚያየኝ የለም፤ ምን ይመጣል ተዉኝ እባካችኹ” በሚሉ የክፍላተ ከተማ እና የሀገረ ስብከቱ ሓላፊዎች ሳቢያ፣ ክፍተቶች በጊዜ እልባት ሳይሰጣቸው እየቀሩ፣ የረባም ሥራ ሳይሠራ ግብረ ኃይሉ ለፍርሰት መዳረሱን አስታውቋል፡፡ አንዳንድ ክንውኖች ቢጠቀሱም፣ በግለሰብ አባላት ትጋት የተሠሩ በመኾናቸው፣ ግብረ ኃይሉን በተልእኮው ለማስቀጠል አለመርዳታቸውን አስረድቷል፡፡

FB_IMG_1589763645124

ይልቁንም መዲናዪቱ፥ የወረርሺኙ ማዕከል በኾነችበትና የማኅበረሰባዊ መዛመት ምልክት እንደሚታይባት እየተነገረ ባለበት ወቅት፣ ባለብዙ ሀብቱ ሀገረ ስብከት፣ አደረግኹት የሚለው ጥረት ጨርሶ አደጋውን እንደማይመጥን ተችቷል፤ በምትኩ፣ በወትሮ ዝግጁነት(pro activeness) የተቃኘ ንቁ እና አብነታዊ የፀረ ኮቪድ-19 አመራር እንዲሰጥ ጠይቋል፤ ዋና ሥራ አስኪያጁ በቅርቡ በሰጡት መግለጫም ዐዲስ የልመና ቋት ከመክፈት አስቀድሞ፣ ያለውን ቅምጥ ሀብት አንቀሳቅሶ የተቸገሩትን የመደጎም እና ጫናቸውን የማቃለል ምግባረ ሠናይ እንዲያስቀድም መክሯል፡፡

Saris Abo

በዝጉ ሰሞን፥ የአንድነቱ አመራሮች፣ ከከተማው ፖሊስ ኮሚሽነር እና ከክፍላተ ከተማ ኮማንደሮች ጋራ መልካም ውይይት ሲያደርጉ መሰንበታቸው ተጠቁሟል፡፡ ይኸውም፣ ቀኖናዊ አገልግሎቱ ሥርዐቱንና የጥንቃቄ ተግባራቱን ጠብቆ በሚፈጸምበት፣ የአጥቢያ ሓላፊዎች ቢሮ ገብተው ሥራቸውን በሚሠሩበት፣ የሰንበት ት/ቤቶችም የኦንላየን ማስተማር አገልግሎታቸውን ከየጽ/ቤቶቻቸው ለማስተባበር በሚችሉበት ኹኔታ ላይ ያተኮረ እንደነበር ተገልጿል፡፡ በዚኽም፣ ባልቀረበ ጥያቄ የቤተ ክርስቲያን ደጇን በኃይል መዝጋትን ጨምሮ አገልግሎቷን የሚያስታጉሉና ምእመኗን የሚያስቆጡ ከፍተኛ የኃይል ርምጃዎች እና ማጥላላቶች መፈጸማቸው ታምኖ መታረም እንደሚያስፈልጋቸው መግባባቱ ቢኖርም፣ “ዝጉ ከሚለው በቀር የደረሰን መመሪያ የለም” በሚል እና በሀገረ ስብከቱ ዳተኝነት፣ ጥቃቱ እና ጫናው ሳይቃለል ባደረበት፣ ቅዱስ ሲኖዶስ የምልዓተ ጉባኤ ውሳኔውን ማሳለፉ ተዘግቧል፡፡

የቅዱስ ሲኖዶሱን መግለጫ ተከትሎ፣ የአጥቢያ አብያተ ክርስቲያንና የክፍላተ ከተማ ሰንበት ት/ቤቶች አደራጆችንና አስተባባሪዎችን፣ ከትላንት በስቲያ በሀገረ ስብከት ጽ/ቤት ጠርቶ፣ በውሳኔው አፈጻጸም ላይ መወያየቱን አንድነቱ ገልጿል፡፡ ለምልዓተ ጉባኤው ውሳኔ መሠረት የኾነውና ቀደም ሲል በቋሚ ሲኖዶስ በጸደቀው የፀረ ኮቪድ-19 ቅድመ ጥንቃቄ የውስጥ መመሪያ፣ በዚህም ላይ ተመሥርቶ አንድነቱ ባዘጋጀው የአፈጻጸም ዝርዝር እንዲሁም፣ በዝጉ ሰሞን ያጋጠሙ ችግሮችን በስፋት በማንሣት ለአፈጻጸም ያለውን ተጨባጭ ዐቅም ገምግሞ ዝግጁነቱን ማረጋገጡን አመልክቷል፡፡

400015600222_142011

ትላንት እሑድ ግንቦት 9 ቀን፣ በደብረ ምሕረት ቅዱስ ሚካኤል ቤተ ክርስቲያን

ሥርዐተ ቅዳሴው በተመደቡ ቀዳስያን ልዑካን ብቻ እንዲፈጸም፤ ቆራብያን ምእመናን የፈረቃ ተራ ወጥቶላቸው ዘርዘር ብለው በመቆም እንዲሳተፉ፤ ሌሎች ምእመናንም አካላዊ ርቀትንና ንጽሕናን ጠብቀው እንዲያስቀድሱ፤ ስብሐተ ነግህ፣ ሰዓታት፣ ቁመተ ማኅሌት፣ ጸሎተ ፍትሐት የመሳሰሉት ደግሞ ለሥርዐቱ በሚያስፈልገው ቁጥር በውሱን ሊቃውንት በየተራ እንዲፈጸሙ፣ ቋሚ ሲኖዶስ መጋቢት 14 ቀን መወሰኑን አንድነቱ ጠቅሷል፡፡ አገልጋዮች፣ የሰንበት ት/ቤት ወጣቶች እና ምእመናን፣ ውሳኔውን የሚፈጽሙበት ጥብቅ የውስጥ መመሪያ፣ በጠቅላይ ቤተ ክህነት የተስፋ ልዑክ ዐቢይ ግብረ ኃይል ተዘጋጅቶና በቋሚ ሲኖዶሱ ጸድቆ ለኹሉም አህጉረ ስብከት መላኩን አስታውሷል፡፡ አንድነቱም በበኩሉ፥ የአገልግሎቱን ዓይነት፣ ከተገልጋዩ ብዛት እና ጊዜ(በዕለተ ሰንበት እና በወርኃዊ በዓላት) ጋራ በማገናዘብ አስተናጋጆችን በመመደብ እና የምእመናን ፈረቃ(ወንዶች፣ ሴቶች፣ ሕፃናት) በማውጣት የሚስተናገዱበትን አፈጻጸም እና መርሐ ግብር በዝርዝር ማዘጋጀቱን ተናግሯል፡፡

መንፈሳዊ አገልግሎቱ ሳይቋረጥ፣ የምእመናን የምስጢራት ሱታፌ ሳይስተጓጎል፣ ካህናት እና ምእመናን ለበሽታው ሳይጋለጡ፣ በኹሉም አጥቢያዎች ካለአድልዎ ለማከናወን በሚያስችሉ ስልቶች ላይ በውይይቱ የጋራ ግንዛቤ ለመያዝ መቻሉን አስረድቷል፡፡ በይበልጥም፣ ምእመናን በብዛት ሊገኙ የሚችሉባቸው ጊዜያት ላይ ትኩረት በማድረግ፣ ከሰበካው ወጣቶች እና ተስፋ ልዑክ ጋራ ተቀናጅተው አገልግሎቱን እንደሚያሳልጡ አረጋግጧል፡፡ እንደዚኹም ኹሉ በተለይ፥ በጥምቀተ ክርስትና፣ ሥርዐተ ጋብቻ፣ ጸሎተ ቀንዲል፣ ጸሎተ ፍትሐት፣ የመታሰቢያ ጸሎት እና የቀብር አገልግሎት ወቅት፣ ከባለጉዳዮቹ ጋራ የሚመጡ ተገልጋዮች ብዛት፣ በአፈጻጸም ዝርዝር ውስጥ በተፈቀደው ቁጥር እና በደብሩ ነባራዊ ኹኔታ ስለሚወሰን፣ ምእመናን ይህን የጥንቃቄ መመሪያ በሚገባ ተረድተው በየዕለቱ ለሚመደቡ የተስፋ ልዑክ ግብረ ኃይሎች እና የሰንበት ት/ቤት አስተናጋጆች በመታዘዝ እንዲተባበሩ አሳስቧል፤ “ራሳቸውንም በክርስቲያናዊ ሥነ ምግባር የሚያስተናግዱ፣ የሚታዘዙ ሊኾኑ ይገባል፤” በማለት አማፅኗል፡፡

የሰበካ አስተዳደሩ የጽ/ቤት አገልግሎቶች፣ በሠራተኞች የአገባብ እና የቢሮ አቀማመጥ ጥንቃቄዎች የሚፈጸሙ በመኾኑ፣ ምእመናን፥ የሰበካ ጉባኤ፣ የዐሥራት በኵራት፣ የመብዓ እና ሌሎችም የአገልግሎት ክፍያዎቻቸውን በመደበኛው የሥራ ሰዓት እንደሚፈጽሙ፤ ካህናት ከንሥሓ ልጆቻቸው ጋራ በተናጠል ምክክር እንደሚያደርጉ፤ የሰንበት ት/ቤቶች አመራሮች እና አስፈጻሚ አካላት፥ ለአባሎቻቸው የርቀት(ኦንላየን) ትምህርት እንደሚያስተላለፉ እንዲሁም የአስተናጋጆችን ምደባ ጨምሮ አንገብጋቢ ጉዳዮችን በቢሯቸው በጥንቃቄ እንደሚያከናውኑ፤ የተስፋ ልዑክ ግብረ ኃይሎችም፣ ከወረርሺኙ ጋራ የተያያዙ የመከላከል ተግባራትን እንደሚያስተባብሩ ገልጿል፡፡ ለአፈጻጸም እና ተግባቦት ይረዳ ዘንድም፣ ከላይ ለተዘረዘሩት አካላት ኹሉ የመታወቂያ ካርድ ወይም ልዩ ባጅ እና ይለፍ እንደሚዘጋጅላቸው አንድነቱ ጠቁሟል፡፡

የሰንበት ት/ቤቶች አንድነቱ፣ ከአመራሩ እስከ ፈጻሚው ድረስ፣ በልዩ ልዩ ዕቅዶች ትግበራ የተፈተኑና ውጤታማነታቸውን ያስመሰከሩ በብዙ ሺሕ የሚቆጠሩ አስተባባሪዎች እና መደበኛ አባላት ያሉት በመኾኑ፣ በቅዱስ ሲኖዶስ የተጣለበትን ሓላፊነት እንደማያዳግተው አረጋግጧል፡፡ በሀገረ ስብከቱ ጽ/ቤት ደረጃ 19፣ በሰባቱ ክፍላተ ከተማ ጽ/ቤቶች 35፣ በአገልግሎት ላይ በሚገኙ 206 አድባራት እና ገዳማት እንዲሁም በምሥረታ ክትትል ላይ በሚገኙ ከ21 በላይ አጥቢያ አብያተ ክርስቲያን 1ሺሕ135፣ በድምሩ 1ሺሕ189 ሥልጡን አደራጆች እና አስተባባሪዎች እንዳሉት ገልጿል፤ በኹሉም አጥቢያዎችም፣ ከ30 ሺሕ በላይ ጠቅላላ መደበኛ አባላት በፈጻሚነት ያሉት በመኾኑ፣ ከሀገረ ስብከቱ ጽ/ቤት ጀምሮ የሚመለከታቸው መንግሥታዊ አካላት በየድርሻቸው፣ የኮረና ቫይረስን ዘመነ ወረርሺኝ የሚያሻግር የጋራ ጥረት እንዲያደርጉ ጥሪውን አቅርቧል፡፡

የሃይማኖት ተቋማት ጉባኤ: የጸሎት እና ትምህርት ቀጥታ ስርጭቱን የጋራ ስምምነት በመጣስ በቀረበው ፕሮግራም ውሳኔ አሳለፈ

  • ቤተ እምነቱ እና የቴሌቪዥን ጣቢያው ይቅርታ ይጠይቃሉ

97431643_3219965728129779_6151194982431588352_o

ጉዳዩን አስመልክቶ፣ የጉባኤው ጠቅላይ ጸሐፊ ሊቀ ትጉሃን ቀሲስ ታጋይ ታደለ በፌስቡክ ገጻቸው እንዳስታወቁት፥ የኹሉም አብያተ እምነቶች እና የሚዲያ ግብረ ኃይሎች በተገኙበት፣ ከትላንት በስቲያ በጽ/ቤቱ በተደረገ አስቸኳይ ስብሰባ፣ የጋራ ስምምነቱን በመጣስ ስለ ሌላው ቤተ እምነት አስተምህሮ አጓጉል ነቀፌታ ያስተላለፈው ቤተ እምነት እና አስፈላጊውን እርምት በወቅቱ ያልወሰደው ዋልታ ቴቪ ይቅርታ እንዲጠይቁ ተወስኗል፡፡ በቀጣይም፣ መሰል ጠብ ጫሪ ድርጊቶች እንዳይፈጸሙ ለመከላከል በሚያስችሉ አሠራሮችም ከስምምነት ላይ መደረሱን ጠቅላይ ጸሐፊው አስታውቀዋል፡፡

በመኾኑም፣ ግንቦት 5 ቀን 2012 ዓ.ም. ምሽት፣ በዋልታ ቴሌቪዥን በተላለፈው የረመዳን ወር የጸሎት (ዱዓ) ሥነ ሥርዓት ላይ፣ ኢትዮጵያዊ የአብሮነት ዕሴትንና የጋራ ስምምነቱን በመፃረር፣ የክርስትናን አስተምህሮ በማጥላላት በተላለፈው መልእክት፣ ቤተ እምነቱ እና የቴሌቪዥን ጣቢያው ይቅርታ እንዲጠይቁ ተወስኗል፡፡

፨፨፨ ለግንዛቤ ይረዳን ዘንድ፨፨፨

91699638_3109251249201228_9004327222995058688_n

የኢትዮጵያ የሃይማኖት ተቋማት ጉባኤ፣ በመላው ዓለም የተከሠተው የኮቪድ-19 ተላላፊ በሽታ ወደ አገራችን መግባቱ ከታወቀበት ጊዜ ጀምሮ፣ ኹሉም አብያተ እምነቶች በቴሌቪዥን የአየር ሰዓት ድልድል ተደርጎላቸው፣ ምእመኖቻቸው የአምልኮ ተግባሮቻቸውን በየቤታቸው እንዲፈጽሙ በማሰብ በብዙኀን መገናኛ እንዲተላለፍ እያደረገ ይገኛል።

ይኹን እንጂ፣ ከትላንት በስቲያ በዋልታ ቴሌቪዥን በተላለፈው ፕሮግራም ላይ፣ ቀደም ሲል፣ ከኹሉም አብያተ እምነቶች እና ሚዲያዋች ጋራ ስምምነት ከተደረሰበት የጋራ መግባቢያ ሰነድ ውጪ ማለትም፣ በሚተላለፈው የትምህርት ክፍለ ጊዜ፣ አንድ የሃይማኖት ተቋም የአስተምህሮ ጉዳዮችን ሲያነሣ የሌሎችን ሃይማኖትንና እምነትን መንቀፍ መተቸት እና አክብሮት አለማሳየት አይገባም፤” የሚለውን አንቀጽ የሚጣረስ እና ከሃይማኖት ተቋማቱ የጋራ ዕሴት ያፈነገጠ ፕሮግራም በቀጥታ ስርጭት ተላልፏል፡፡

ይህንም ተከትሎ ዛሬ፣ ከኹሉም አብያተ እምነቶች እና የሚዲያ ግብረ ኃይል ጋራ አስቸኳይ ስብሰባ በማድረግ ስሕተቶቹን ነቅሰን በማውጣት ከዚህ በታች በተጠቀሱት ነጥቦች ላይ የጋራ መግባባት ተደርሷል።

97210332_1154347598247698_2970587857963450368_o

  1. ስሕተት የፈጸመው ቤተ እምነት፣ ከተቋሙ የበላይ ሓላፊዎች ጋራ በመነጋገር፣ ከዚህ በኃላ ስሕተቶች እንዳይፈጸሙ እና ለተፈጸመውም ስሕተት ይቅርታ እንዲጠይቅ፤
  2. ከዚህ በኃላ የሚተላለፉ ዝግጅቶች፣ ቀድመው የተዘጋጁ እና የተገመገሙ ፕሮግራሞች ብቻ ሊኾኑ እንደሚገባ ውሳኔ ላይ ተደርሷል፤
  3. ዋልታ ቴሌቪዥንም በመግባቢያ ሰነዱ ላይ ከተቀመጠው አቅጣጫ ውጪ መልእክት ሲተላለፍ፣ አስፈላጊውን እርምት በወቅቱ ባለመውሰዱ ይቅርታ እንዲጠይቅ በጋራ ወስነናል

በተጨማሪም ሰሞኑን፣ በአዲስ አበባ እና በአንዳንድ የክልል ከተሞች፣ ”ንሰሐ ግቡ”በሚል ሰበብ፣ በታክሲ ተራ፣ በሌላ ቤተ እምነት በር አካባቢ፣ በየአውራ መንገዱ ላይ የእጅ ማይክሮፎን በመጠቀም አላስፈላጊ ግጭቶች እንዲነሡ ለማድረግ በሚሰሩ አካላት ላይ አስፈላጊውን ርምጃ እንዲወስድ ለሚመለከተው አካላት ደብዳቤ እንደሚጻፍ ተነጋግረናል ።

ከዚህ ውጪ፣ በሶሻል ሚዲያ ከዚህ ጉዳይ ጋራ በተያያዘ አላስፈላጊ ግጭት የሚያሥነሱ እና ኢትዮጵያዊ የአብሮነት ዕሴቶቻችንን የሚሸረሽሩ ሐሳቦችን ከመሰንዘር ይልቅ፣ የሚያግባቡንን የጋራ ገንቢ ሐሳቦችን እያጎለበትን እንድንሔድ በሃይማኖት ተቋማት ጉባኤ ጽ/ቤት እና በራሴ ስም የአክብሮት መልእክቴን አቀርባለኹ።

ሊቀ ትጉሃን ቀሲስ ታጋይ ታደለ

የሃይማኖት ተቋማት ጉባኤ ጠቅላይ ጸሐፊ