ለአዲስ አበባ ሀገረ ስብከት ዋና ሥራ አስኪያጅነት እና ዋና ጸሐፊነት የውድድር ማስታወቂያ ወጣ

  • በተለይ በሥራ አመራር ወይም በሰው ሀብት አስተዳደርየመጀመሪያ ዲግሪዎችን ይጠይቃል፤
  • በአስተዳደር እና በፋይናንስ የሥራ መስኮች ቢያንስ የ5 ዓመታት የሥራ ልምድ ያስፈልጋል፤
  • ለዋና ሥራ አስኪያጅነት የሚወዳደሩ፥የአመራር ሐሳባቸውን በጽሑፍ መግለጽ ይጠበቅባቸዋል፤

***

  • የሃይማኖት ሕጸጽ የሌለባቸው፣ ጎጠኝነትን የሚጠየፉና በሙስና የማይጠረጠሩ ይወዳደሩ
  • አመልካቾች እስከ ኅዳር 21 ቀን ድረስ በቢሮ ቁጥር 303 ማስረጃቸውን ማቅረብ አለባቸው፤
  • ብቁ አገልጋይ በመሾም የሥራውን መንገድ አስተካክሎ ለመጀመር የወጣ ማስታወቂያ ነው

***

የአዲስ አበባ ሀገረ ስብከት እንደ ሌሎቹ አህጉረ ስብከት ኹሉ ራሱን ችሎ በሊቀ ጳጳስ እንዲመራ በቅዱስ ሲኖዶስ መወሰኑን ተከትሎ፣ ለጽ/ቤቱ ዋና ሥራ አስኪያጅ እና ዋና ጸሐፊ በውድድር ለመመደብ ሀገረ ስብከቱ ማስታወቂያ አወጣ፡፡

የውድድሩ ዓላማ፣ ለቦታው የሚመጥን ብቁ አገልጋይ በማግኘት እና በመሾም የሥራውን መንገድ አስተካክሎ ለመጀመር እንዲቻል መኾኑን በማስታወቂያው ያስገነዘበው የሀገረ ስብከቱ ጽ/ቤት፣ መስፈርቶቹን የሚያሟሉ አመልካቾች በውድድሩ እንዲሳተፉ አስታውቋል፡፡

በትምህርት ዝግጅት ረገድ አመልካቾች፣ ከአብነት ትምህርቶች ቢያንስ በአንዱ ምስክር ያላቸው፣ በነገረ መለኰት እና በዘመናዊው የማኅበራዊ ሳይንስ መስክ በተለይም በአስተዳደር፣ በሥራ አመራር ወይም በሰው ሀብት አመራር የመጀመሪያ ዲግሪ ሊኖራቸው እንደሚገባ በማስታወቂያው ተገልጿል፡፡ የሥራ ልምድን በተመለከተ፣ በአዲስ አበባ ገዳማት እና አድባራት በአስተዳደር እና በፋይናንስ መስኮች ለአምስት ዓመት እና ከዚያ በላይ መሥራትን እንደሚጠይቅ ተመልክቷል፡፡

ለዋና ሥራ አስኪያጅነት የሚወዳደሩ አመልካቾች፣ ሀገረ ስብከቱን እንደምን ለመምራት እንደሚፈልጉ ከሦስት ገጽ ባላነሰ እና ባልበለጠ ጽሑፍ ዐሳባቸውን ማቅረብ የሚጠበቅባቸው ሲኾን፣ ለሚመደቡበት ሓላፊነት በሚፈለገው ኹኔታ በራሳቸው ፕሮጀክት ቀርጸው የማቅረብ እንዲሁም የግጭት አፈታት ስልትን በመጠቀም ችግሮችን ፈትቶ የማስተካከል ችሎታ እና ልምድ ሊኖራቸው እንደሚገባ ተጠቅሷል፡፡

ሥልጣነ ክህነት ያላቸው እና በክህነታዊ አገልግሎትም(በቅዳሴ፣ በማሕሌት፣ በሰዓታት እና በስብከተ ወንጌል) በበቂ ኹኔታ ማገልገል ይጠበቅባቸዋል፡፡ የሃይማኖት ሕጸጽ የሌለባቸው፣ በክርስቲያናዊ ሥነ ምግባራቸው፥ ጎሠኝነትንና ጎጠኝነትን የሚጠየፉ፣ በሙስና የማይጠረጠሩ፣ በአድመኝነትና በአሳዳሚነት የማይታወቁ፣ በወንጀል ጉዳይ ተከሠው በፍርድ ቤት ያልተወሰነባቸው መኾን ይኖርባቸዋል፡፡

የተዘረዘሩትን መስፈርቶች የሚያሟሉ አመልካቾች፣ ከዛሬ ኅዳር 16 እስከ ኅዳር 21 ቀን 2013 ዓ.ም. ድረስ ማስረጃዎቻቸውን፣ በቢሮ ቁጥር 303 በአካል በመቅረብ እንዲያመለክቱ የሀገረ ስብከቱ ጽ/ቤት አስታውቋል፡፡ በሕገ ቤተ ክርስቲያን አንቀጽ 53 ንኡስ አንቀጽ 8 መሠረት፣ የሀገረ ስብከቱ ሊቀ ጳጳስ፣ በትምህርት ችሎታው እና በሥራ ልምዱ ብቁ የኾነ ሰው መርጠው ለብፁዕ ጠቅላይ ሥራ አስኪያጁ በማቅረብ እንዲሾም እንደሚያደርጉ የተደነገገ ሲኾን፣ ዕጩዎችን የመምረጫ መሳፍርትም በዚኹ ድንጋጌ ከፊደል ተ.ቁ(ሀ) እስከ (መ) በዝርዝር ሰፍረዋል፡፡

የአዲስ አበባ ሀገረ ስብከትን አጠቃላይ የአሠራር ሥርዓት ገምግሞ በማስተካከል ላይ የሚገኘው የብፁዕ አቡነ መልከ ጼዴቅ አስተዳደር፣ የጽ/ቤቱን ጊዜ አላግባብ የሚሻማውንና ለብልሽት የዳረገውን የአጥቢያ አብያተ ክርስቲያን ዐዲስ የሥራ ቅጥር፣ ዕድገት፣ ዝውውር ፈላጊዎች እና የደመወዝ ጭማሬ ጥያቄ ዎችን ጨምሮ ላልተወሰነ ጊዜ እንደማያስተናግድ ቀደም ሲል አስታውቋል፡፡

በምትኩ፣ የጽ/ቤቱን አመራር ከወዲሁ አስተካክሎ ተፈላጊውን ተቋማዊ ማሻሻያ ለማምጣት፣ ለከፍተኛ ምደባዎች(ሹመቶች) መስፈርት አዘጋጅቶ በዚኽ መልኩ የውድድር ማስታወቂያ በማውጣት የጀመረው ግልጽ እና ለተጠያቂነት የሚያመች አካሔድ፣ በሌሎችም አሠራሮች ሊበረታታ እና ሊጠናከር የሚገባው ነው፡፡ በመኾኑም፣ በሞያቸው አስተዋፅኦ ለማድረግ የሚፈቅዱ እና የሚችሉ የቤተ ክርስቲያን ልጆች ኹሉ በተግባር በመሳተፍ ሊደግፏቸው እና ሊያግዟቸው ይገባል፡፡

በብፁዕ ወቅዱስ ፓትርያርካችን ስም መነገድ ይቁም! ከጥቅመኞች፣ ከሥልጣን ጥመኞች እና ከልዩ ተልእኮ አራማጆች ቤተ ክርስቲያናችንን እንጠብቃለን!

የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ምልዓተ ጉባኤ በጥቅምቱ የመጀመሪያ ዓመታዊ መደበኛ ስብሰባ ያሳለፈውን ውሳኔ አስመልክቶ ከሰንበት ትምህርት ቤቶች አንድነት የተሰጠ ወቅታዊ መግለጫ

++++++++++++++++

የቅዱስ ሲኖዶስ ምልዓተ ጉባኤ፣ ከጥቅምት 11 እስከ 23 ቀን 2013 ዓ.ም. ባካሔደው የመጀመሪያ ዓመታዊ መደበኛ ስብሰባው በአጀንዳነት ይዞ እንዲመለከታቸው፣ ሀገር አቀፉ የሰንበት ትምህርት ቤቶች አንድነት ጉባኤ በአቀረባቸው ዐበይት ወቅታዊ ጥያቄዎች ዙሪያ ተወያይቶ ተፈላጊውን ውሳኔ መስጠቱ ይታወቃል፡፡

ለሰንበት ት/ቤቶች ግንባር ቀደም ተሳትፎ አጽንዖት በመስጠት የተላለፈው ይኸው የቅዱስ ሲኖዶስ ውሳኔ እና መመሪያ፣ ቤተ ክርስቲያናችን እየደረሰባት ያለውን ውጫዊ ተጽዕኖ እና ጥቃት በመቋቋም እና በመከላከል ጠንክራ ለመውጣት የሚያስችላት ከመኾኑም በላይ፣ ተጋላጭ ያደረጋትን የውስጣዊ አሠራር ክፍተት በመቅረፍ ሐዋርያዊ ተልእኮዋን በአግባቡ ለመፈጸም የሚያበቃት በመኾኑ፣ የልጅነት ጥያቄአችንን ተቀብለው ተገቢውን ምላሽ ለሰጡን ለብፁዕ ወቅዱስ ፓትርያርካችንና ለብፁዓን አበው ሊቃነ ጳጳሳት ያለንን ልባዊ ምስጋና እና አክብሮት አስቀድመን እናቀርባለን፡፡

ከሰንበት ት/ቤቶች አንድነት ጥያቄዎች መካከል አንዱ፣ የአዲስ አበባ ሀገረ ስብከትን አስተዳደራዊ ጉዳዮች የተመለከተ ነበር። በሀገረ ስብከቱ በሰው ሀብት አስተዳደር በኩል የሚታየው አድሏዊነት፣ ጎጠኝነት፣ የሥራ ዋስትና ማጣት እና እንግልት፤ በፋይናንስ አሠራር እና በንብረት አያያዝ ረገድ የተንሰራፋው የሀብት ብክነት እና ምዝበራ በመባባሱ፣ በተለዋዋጭ ጥቅመኞች በየጊዜው መወረሩ በአገልጋዮች ላይ ያስከተለው የሥነ ምግባር ዕጦት እና በምእመናን ላይ ያሳደረው የመንፈስ ዝለት ከቁጥጥር ውጭ ወጥቶ ጠቅላላ ውድቀት ከመድረሱ በፊት መገታት ይኖርበታል፡፡

ይህ አሳፋሪ እና አሳዛኝ ኹኔታ ሊገታ የሚችለው ደግሞ፣ ቀደም ሲል በብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት መመሪያ ሰጪነት ተዘጋጅቶ እና በቅዱስ ሲኖዶስ ጸድቆ እንዲተገበር የተወሰነው የመዋቅር፣ አደረጃጀት እና አሠራር ለውጥ ሲተገበር ነው፡፡ የለውጥ ትግበራ ቅድመ ዝግጅቱ፣ በ2006 ዓ.ም. ተጀምሮ የነበረ ቢኾንም፣ ሕገ ወጥ ጥቅማቸውን በሚያቋርጥባቸው አማሳኞች አድማ ሒደቱ እንዲሰናከል ተደርጓል፡፡ በመኾኑም፣  የሰንበት ት/ቤት አንድነት፣ በአዲስ አበባ ሀገረ ስብከት ግልጽነት እና ተጠያቂነት ያለውን አሠራር በማስፈን ኹለንተናዊ መፍትሔ ለመስጠት የሚያስችለው ጥናታዊ ለውጥ በቁርጠኝነት እንዲተገበር ምልዓተ ጉባኤውን በአጽንዖት ጠይቆ ነበር።

የቅዱስ ሲኖዶስ ምልዓተ ጉባኤም፣ ጥያቄያችንን፥ “ሕገ ቤተ ክርስቲያንን ስለማሻሻል” በሚል በያዘው አጀንዳ ውስጥ አካቶ እና በጥያቄያችን ላይ ተመሥርቶ፣ የአዲስ አበባ ሀገረ ስብከትን የብፁዕ ወቅዱስ ፓትርያርክ ልዩ ሀገረ ስብከት የሚያደርገውን የሕጉን አንቀጽ 50 ንኡስ አንቀጽ(1) ድንጋጌ መርምሯል፡፡

በዚሁ ምርመራውም፣ ሀገረ ስብከቱ በአሁኑ ወቅት ካለው የሰው ኃይል ክምችት፣ የገንዘብ እና የንብረት ሀብት አንጻር፣ ተጠያቂነትን የሚያረጋግጥ የቅርብ አመራር እና ክትትል እንደሚያስፈልገው ታሳቢ በማድረግ፤ አበ ብዙኃን የኾኑት ቅዱስ ፓትርያርኩ የቤተ ክርስቲያኒቱ ርእስ እንደመኾናቸው አጠቃላይ አመራር የመስጠት ሓላፊነት እንዳለባቸው በመገንዘብ፤ የልዩ ሀገረ ስብከት ድንጋጌው በአፈጻጸሙ፥ ለአድሏዊ አስተዳደር እና ለሀብት ምዝበራ የፈጠረውን ክፍተት ለመግታት ብሎም ለካህናት እና ለምእመናን የቆየ ምሬት እልባት ለመስጠት፣ የሕገ ቤተ ክርስቲያኑ አንቀጽ 50 ንኡስ አንቀጽ(1) ድንጋጌ እንዲሻሻል ወስኗል።

ቅዱስ ሲኖዶስ ባደረገው የድንጋጌ ማሻሻያ፣ ርእሰ መዲናዪቱ አዲስ አበባን የብፁዕ ወቅዱስ ፓትርያርኩ ልዩ ሀገረ ስብከት ያደረገው አንቀጽ፣ ወጥቶ፣ አዲስ አበባ ሀገረ ስብከት፣ እንደ ሌሎቹ አህጉረ ስብከት ራሱን ችሎ ሊቀ ጳጳስ ተመድቦለት የሚመራ ይኾናል፡፡ በዚህም መሠረት ምልዓተ ጉባኤው፣ ብፁዕ አቡነ መልከ ጼዴቅን ለሀገረ ስብከቱ ሊቀ ጳጳስ አድርጎ መድቧል።

የቤተ ክርስቲያናችን መንፈሳዊ እና አስተዳደራዊ ሕግ አውጪ እና ወሳኝ አካል የኾነው ቅዱስ ሲኖዶስ፣ በሕገ ቤተ ክርስቲያን የተደነገገን አንቀጽ፥ በከፊል ወይም በሙሉ የመለወጥ፣ የማሻሻል እና የመሰረዝ ሙሉ ሥልጣን ያለው በመኾኑ፣ የአህጉረ ስብከት ማዕከል የኾነው የአዲስ አበባ ሀገረ ስብከት፥ በስብከተ ወንጌል፣ በሰው ሀብት አስተዳደር፣ በፋይናንስ አያያዝ እና በንብረት አጠባበቅ ረገድ ውጤታማ ተቋማዊ ለውጥ በማድረግ ተጠያቂነትን እንዲያስፈንና በአርያኣነት እንዲታይ፣ አስፈላጊ እና ወቅታዊ ነው ብሎ ያመንበትን የአንቀጽ 50 ድንጋጌ አሻሽሏል።

የመንበረ ሐዋርያት ወራሽ፣ የቤተ ክርስቲያኒቱ የመጨረሻ ከፍተኛ ሥልጣን ባለቤት፣ በመዋቅሯ ኹሉ የበላይ አካል የኾነና ልዩ ልዩ ሕጎችን፣ ደንቦችንና መመሪያዎችን የማውጣት እና የመወሰን ሥልጣን ያለው ቅዱስ ሲኖዶስ ያሳለፋቸውን ውሳኔዎች፥ ኦርቶዶክሳውያን ካህናት፣ ምእመናንና ወጣቶች ኹሉ  የመቀበል፣ የመጠበቅ እና የማስጠበቅ ግዴታ አለብን፡፡ የቤተ ክርስቲያናችን ልዕልና ሊጠበቅ የሚችለው፣ በበላይነት የመምራት እና የማስጠበቅ ሓላፊነት ያለው ቅዱስ ሲኖዶስ የሚያሳልፈው ውሳኔ ሲከበር እንደኾነ አሌ የሚባል አይደለም።

ይኹን እንጂ፣ በላይኛው መዋቅር ዙሪያ የተኮለኮሉ እና መዋቅሩን የግል መጠቀሚያ በማድረግ ጥቅማቸውን ለማስቀጠል የቋመጡ፣ በተዋረድም በመዋቅር ውስጥ የተሸሸጉ፣ በአፍቅሮተ ነዋይ የሰከሩ እና ለተንደላቀቀ ሥጋዊ ኑሯቸው በኔትወርክ ተሳስረው እየደለሉ ጥቅማቸውን ከማሳደድ በቀር ሞያ የሌላቸው አማሳኞች፣ የቅዱስ ሲኖዶስን ወሳኔ ከመቀበል ይልቅ ተግባራዊነቱን በልዩ ልዩ የአድማ ቅስቀሳ ለማስተሃቀር መሰለፋቸው አያስገርምም። ለማይሞላው ቀፈታቸው እና ገደብ አልባ ፍትወታቸው ሲሉ ቤተ ክህነታችን ከብልሹ አሠራር እንዲላቀቅ አይሹም።

በባሕርይዋ ቅድስት የኾነችው ኦርቶዶክሳዊት ቤተ ክርስቲያን፣ በአስተዳደር ድክመት የተነሣ ዘመኑን ባለመዋጀቷ እየተነቀፈች መዘበቻ ብትኾን፣ ዕድሜ ዘመናቸውን በትምህርት ያሳለፉ ሊቃውንት፣ ሌት ተቀን በአገልግሎት የሚደክሙ ካህናት እና መምህራን የሚገባቸውን መብት እና ጥቅም ተነፍገው ቢንገላቱ፣ ቀናዒ ምእመናን በእነርሱ ነውር ተሸማቅቀው በዐደባባባይ ቢያፍሩ፣ ጥቂት የማይባሉትም ተሰነካክለው ወደ ሌላ ቢኮበልሉ በአጠቃላይ፣ ቤተ ክርስቲያን ከመሠረታዊው የስብከተ ወንጌል ተልእኮዋ እና ከማኅበራዊ ልማት አገልግሎትዋ ብትደናቀፍ አንዳችም አይገዳቸውም፡፡ በነባሩ የልዩ ሀገረ ስብከት ድንጋጌ፣ ቅዱስነታቸው ዕለታዊ እና ዝርዝር ጉዳዮችን በቅርበት ከመከታተል አኳያ የተፈጠረውን ክፍተት ተጠቅመው፣ ሕገ ወጥ ሀብትን ለግላቸው እያደለቡ መቀጠልን ይመርጣሉ፡፡

እነኚህ ግለሰቦች እና ቡድኖች፣ የቅዱስ ሲኖዶስ ርእሰ መንበር እና ርእሰ አበው የኾኑት ብፁዕ ወቅዱስ ፓትርያርካችን፣ ሕገ ቤተ ክርስቲያኑን ጠብቀው እና አስጠብቀው አጠቃላይ አመራር የመስጠት ሓላፊነት እንዳለባቸው በቅጡ አይረዱም፤ በአንድ ሀገረ ስብከት ሳይወሰኑ በኹሉም አህጉረ ስብከት፣ የቅዱስ ሲኖዶስን ውሳኔ እና መመሪያ ለማስፈጸም ቅዱስነታቸው በበላይነት የሚከታተሉ እና የሚቆጣጠሩ መኾኑን አያስተውሉም፡፡ እያወቁም ቢኾን፣ አዛኝ እና ተቆርቋሪ መስለው በመቅረብ፣ ቅዱስነታቸው ከሚታወቁበት መርሕ እና አባታዊ አቋም ጋራ የማይስማማ ባዕድ ዐሳብ በማንሣት ውዥንብር ሲፈጥሩ ታይተዋል። በቅዱስ ሲኖዶስ የስብሰባ ሥነ ሥርዓት በተለይ አስተዳደራዊ ጉዳዮችን በተመለከተ፣ በአባቶች መካከል የሚንጸባረቀውን ጤናማ የሐሳብ ልዩነት እና አቋም መነሻ አድርገው የራሳቸውን ቅርፅ በመስጠት፣ የማይደግፉትን ወገን ለማሳጣት የሔዱበት ርቀት፣ የገቡበትን ፅልመታዊ እንቅስቃሴ እና ድብቅ የጥፋት አዘቅት የሚያጋልጥ ነው።

የቅዱስ ሲኖዶስ ምልዓተ ጉባኤ፣ ሕገ ቤተ ክርስቲያኑን በማሻሻል አግባብ የልዩ ሀገረ ስብከት ድንጋጌ እንዲለወጥ ውሳኔ ካሳለፈበት ሥርወ ምክንያት እና አግባብ ውጪ ሌላ ትርጉም እየሰጡ፣ በቅንነት በጎ ሐሳብ ሲሰነዝሩ የነበሩ ብፁዓን አባቶችን ባልተገባ መንገድ እየፈረጁ ልዩነትንና ውዝግብን ለማስፋት ሞክረዋል። በዋናነትም ቅዱስነታቸው፣ ቅዱስ ሲኖዶስ ለሚያሳልፋቸው ውሳኔዎች ተገዢ የመኾናቸውን የማይናወጥ አቋም በተሳሳተ መንገድ በመረዳት፣ በማስረዳት እና ከፋፋይ ቅስቀሳ በማካሔድ፣ ከላይ እስከ ታች የዘረጉትን የጥቅም ትስስር ለማስቀጠል፣ ቤተ ክርስቲያንን አዳክሞ ለፀራውያን ጥቃት እና ለፖሊቲከኞች ጣልቃ ገብነት አሳልፎ ለመስጠት የደረሱበትን የድፍረት ጥግ በገሃድ ለመገንዘብ ችለናል።

በሌላው ጽንፍ ደግሞ፣ በዘመኑ የጎሠኝነት ደዌ የተመቱ፣ የቤተ ክርስቲያን አንድነት መጠበቅ ዕንቅልፍ የሚነሳቸው፣ እንደየዘመኑ የፖለቲካ ቅኝት አሰላለፋቸውን እየለዋወጡ ቤተ ክርስቲያኒቱን መቀፍደድ የሚፈልጉ፣ የመንፈስ ቅዱስን ይኹንታ በሥጋዊ መሻታቸው ለመተካት የሚያደቡ ወደረኞች፣ በልዩ ልዩ  ሚዲያዎች እና የኅትመት ውጤቶች ቅዱስነታቸውን በማጥላላት፣ ባልዋሉበት እና በማያውቁት ጉዳይ በሐሰት ለመክሠሥ የሚያደርጉት አፍራሽ እንቅስቃሴ፣ ሐዋርያዊት፣ ጥንታዊት እና ታሪካዊት የኢትዮጵያ ኦርቶዶክስ ተዋሕዶ ቤተ ክርስቲያንን ልዕልና ለመዳፈር የቃጡበት ነው፡፡

በመኾኑም፣ በኢትዮጵያ ኦርቶዶክስ ተዋሕዶ ቤተ ክርስቲያን  የሰንበት ት/ቤቶች አንድነት፦

  •  በመዋቅር ውስጥም ኾነ በውጪ ኾናችኁ፣ ቅዱስነታቸውንና ሌሎችንም ብፁዓን አባቶችን አስመልክቶ ሐሰተኛ ንግግር የምታስተላልፉ፣ ጸያፍ እና ተገቢ ያልኾነ ጽሑፍ የምታሰራጩ፣ ገጸ ሥዕሎቻቸውንና ምስል ወድምፃቸውን በመጠቀም፣ ሐሰተኛ ዘገባ በመሥራት ስም በማጥፋት ተግባር  ላይ የተሰማራችኹ አንዳንድ አካላት ከድርጊታቸሁ እንድትቆጠቡ፤ ይልቁንም የሚያቀራርብ፣ አንድነትን የሚያጸና እና ሰላምን የሚያስፍን በጎ ፍሬ ያለው ተግባር ላይ እንድትሰማሩ አጥብቀን እናሳስባለን።
  • ቅዱስ ፓትርያርኩ በፈቃደ እግዚአብሔር ለታላቋ ቤተ ክርስቲያን የተሾሙ፣ እስከ ዓረፍተ ዘመናቸው በመንበሩ የሚቆዩ የኦርቶዶክሳውያን ኹሉ አባት ናቸው። በግለሰቦች ጩኸት፣ ስሜት እና ፍላጎት  ሥልጣነ ፕትርክናውንና ዘመነ ክህነታቸውን የሚሽር እና የሚለወጥ አንዳችም ነገር አይኖርም። ይህንም በማድረግ በዘመናችን ጥቁር ታሪክ እንዲመዘገብ ከቶ አንፈቅድም።

በመኾኑም፣ በማወቅም ኾነ ባለማወቅ፣ የቤተ ክርስቲያናችንን ሰላም ለማደፍረስ እኵይ ዓላማ አንግባችኹ የተሰለፋችኹ ከአጥቢያ እስከ ከፍተኛ ሓላፊነት ያላችኹ፣ በቅዱስ ፓትርያርኩ ስም የምትነግዱ፣ “ተገፉ፤ ጫና ተደረገባቸው” ባይ የጨለማው ቡድን አጋፋሪዎች፣ ያለፈው ዘመን ይበቃልና ከዚኽ ድርጊታችኹ ታቅባችኹ ንሥሓ እንድትገቡ እንመክራለን። በደመ ክርስቶስ የተመሠረተች፣ በመንፈስ ቅዱስ የጸናች ቤተ ክርስቲያናችን፣ በእንዲህ ዓይነቱ የእናንተ ክፋት አልቆመችም፤ በእናንተም አትፈርስም። ይልቁንም፣ ያለፈው ዘመን ይበቃል፤ ወደ ልባችኹ ተመለሱ፤ ከቤተ ክርስቲያኒቱ፣ ከቅዱስነታቸው እና ከብፁዓን አባቶች ላይ እጃችኹን ሰብስቡ።

ያለው እና ተከታዩ ትውልድ የሚረከባት ቤተ ክርስቲያን፥ የጥቅመኞች፣ የጎሠኞች፣ የሥልጣን ጥመኞች እና የልዩ ተልእኮ አራማጆች መፈንጫ ስትኾን በባይተዋርነት እንደማንመለከት አስረግጠን ለመናገር እንወዳለን። ከምእመናን ቤተሰቦቻችን ጋራ በመኾን፣ ቅዱስ ሲኖዶስ ለቤተ ክርስቲያን አጠቃላይ ተቋማዊ ለውጥ ያሳለፋቸው ጥናታዊ ውሳኔዎች ሳይሸራረፉ በአፋጣኝ ተግባራዊነታቸው እንዲጀመር፣ ከቤተ ክህነታችን አመራር እና ከአስተዳደር ጎን በመቆም፣ የበኩላችንን ሞያዊ እገዛ በማበርከት እና የምልዓተ ወጣቱን ድጋፍ በማስተባበር ቤተ ክርስቲያናችንን ከምዝበራ፣ ከማንኛውም ተጽዕኖ እና ጥቃት እንታደጋለን፤ ክብሯንና ልዕልናዋን ተረክበን እናስረክባለን።

በመጨረሻም፣ የቅዱስ ሲኖዶስ ጽ/ቤት እና የመንበረ ፓትርያርክ ጠቅላይ ቤተ ክህነት ጽ/ቤት፣ የቅዱስ ሲኖዶስ ምልዓተ ጉባኤ ቀደም ሲል ባሳለፈው ውሳኔ መሠረት፣ የብፁዕ ወቅዱስ ፓትርያርክ ልዩ ጽ/ቤት፥ የመንበረ ፕትርክናውን ክብር፣ መልካም ስም እና ዝና በሚመጥን የፕሮቶኮል ሠራተኞች እና የልዩ ልዩ ዘርፍ አማካሪዎች ቡድን በማዋቀር እና በማደራጀት፣ እየተስተዋሉ የሚገኙ ችግሮች እና ክፍተቶች እንዳይደገሙ ይደረግ ዘንድ በአክብሮት እያስታወስን፣ ከቅዱስ ሲኖዶስ ውሳኔ ጎን በመቆም ለአፈጻጸሙ የሚቻለንን ጥረት እንደምናደርግ በልጅነት አንደበት ለማሳሰብ እንወዳለን።

ቸሩ እግዚአብሔር የአገራችንን ሰላም የቤተ ክርስቲያናችንን አንድነት ይጠብቅልን፡፡

የሰንበት ትምህርት ቤቶች አንድነት

ኅዳር 7 ቀን 2013 ዓ.ም.

ሊቀ አእላፍ ቀሲስ በላይ መኰንን የጠቅላይ ቤተ ክህነት ምክትል ሥራ አስኪያጅ ኾነው ተሾሙ

  • ቅዱስ ሲኖዶስ በወሰነው መሠረት በቅዱስ ፓትርያርኩ ተሹመው ተመድበዋል፤
  • የጠቅላይ ቤተ ክህነት ጽ/ቤት የ5 መምሪያዎች ዋና ሓላፊዎች ዝውውር ተደረገ፤
  • ንቡረ እድ ኤልያስ ኣብርሃ ወደ መሪ ዕቅድ ትግበራ ጽ/ቤት ተዛውረው ይሠራሉ፤

***

ሊቀ አእላፍ ቀሲስ በላይ መኰንን፣ የመንበረ ፓትርያርክ ጠቅላይ ቤተ ክህነት ጽ/ቤት ምክትል ሥራ አስኪያጅ ኾነው እንዲሠሩ በብፁዕ ወቅዱስ ፓትርያርኩ ተሾሙ፡፡

ቋሚ ሲኖዶስ፣ ከትላንት በስቲያ ረቡዕ፣ ኅዳር 2 ቀን 2013 ዓ.ም. ባካሔደው ሳምንታዊ ስብሰባ ላይ፣ ሊቀ አእላፍ ቀሲስ በላይ፣ በጠቅላይ ጽ/ቤቱ ጠቅላይ ሥራ አስኪያጅ ብፁዕ አቡነ ያሬድ በዕጩነት ቀርበው ከተመረጡ በኋላ፣ በቅዱስ ፓትርያርኩ በተፈረመ ደብዳቤ በምክትል ሥራ አስኪያጅነት ተሹመዋል፡፡

የሊቀ አእላፍ ቀሲስ በላይ መኰንን ሹመት፣ የቅዱስ ሲኖዶስ ምልአተ ጉባኤ፣ በጥቅምቱ የመጀመሪያ ዓመታዊ መደበኛ ስብሰባው፣ “የኦሮሚያ ቤተ ክህነት አደራጅ ነን” በማለታቸው ሥልጣነ ክህነታቸው ታግዶ ከነበሩት ጋራ በተደረገው ውይይት መግባባት ላይ በመደረሱ፣ ክህነታቸው የተያዘባቸው ካህናት ሥልጣነ ክህነታቸው ተለቆላቸው በቤተ ክርስቲያን መዋቅር ውስጥ የሥራ መደብ ተሰጥቷቸው እንዲያገለግሉ በወሰነው መሠረት የተፈጸመ መኾኑ ታውቋል፡፡  

በኦሮሚያ ክልል በሚገኙ አህጉረ ስብከት፣ በአስተዳደር ችግር እና በቋንቋ አገልግሎት ውስንነት ያጋጠመውን የሐዋርያዊ ተልእኮ አፈጻጸም መዳከም፣ በጠቅላይ ቤተ ክህነት ጽ/ቤት ሥር በሚቋቋም ጠንካራ አካል በኩል በአንድነት ለመፍታት ተስማምተው ወደ አሐቲ ቤተ ክርስቲያን መዋቅር የተመለሱት ሊቀ አእላፍ ቀሲስ በላይ መኰንን፣ ቀደም ሲል በዚኹ የሓላፊነት ደረጃ በመሥራታቸው ለሹመቱ እንግዳ አይደሉም፡፡

ብፁዕ አቡነ እስጢፋኖስ የጅማ እና የምዕራብ ጎንደር አህጉረ ስብከት ሊቀ ጳጳስ፣ የጠቅላይ ጽ/ቤቱ ጠቅላይ ሥራ አስኪያጅ በነበሩበት ወቅት፣ ሊቀ አእላፍ ቀሲስ በላይ፣ ለአራት ዓመት ከኹለት ወራት ምክትል ዋና ሥራ አስኪያጅ በመኾን ሠርተዋል፡፡ ከዚያም ጋራ፥ የስብከተ ወንጌል እና ሐዋርያዊ ተልእኮ መምሪያ ዋና ሓላፊ፣ በቤቶች እና ሕንፃዎች አስተዳደር እና ልማት ድርጅት፣ በሰዋስወ ብርሃን ቅዱስ ጳውሎስ መንፈሳዊ ኮሌጅ ዋና ዲን፣ የሕግ አገልግሎት መምሪያ ዋና አማካሪ እንዲሁም የአዲስ አበባ ሀገረ ስብከት ዋና ሥራ አስኪያጅ ኾነው ሠርተዋል፡፡ በትምህርት ዝግጅታቸውም፣ በሕግ የመጀመሪያ ዲግሪ እና በንግድ አስተዳደር ኹለተኛ ዲግሪ አግኝተዋል፡፡

የቤተ ክርስቲያንን የሥራ አስፈጻሚነት እና የአስተዳደር ተግባራት በከፍተኛ ደረጃ ለማከናወን ሥልጣን ለተሰጠው የጠቅላይ ቤተ ክህነት ጽ/ቤት፣ በምክትል ሥራ አስኪያጅነት የሚሾም ሓላፊ፥ ሥልጣነ ክህነት ያለው ኾኖ፣ በነገረ እግዚአብሔር ወይም በአንድ የጉባኤ ትምህርት የተመረቀ፣ በቂ የቤተ ክርስቲያን ትምህርት ያለውና በአስተዳደር ችሎታው ብቁ መኾን እንዳለበት፣ በሕገ ቤተ ክርስቲያኑ አንቀጽ 44 ንኡስ አንቀጽ (4) ተደንግጓል፤ ለምርጫውም፣ ተወዳዳሪ ዕጩዎች መቅረብ እንዳለባቸው በድንጋጌው ተመላክቷል፤ የአገልግሎት ዘመኑም፣ የጠቅላይ ሥራ አስኪያጁ የሥራ ዘመን ማለትም ለሦስት ዓመታት እንደኾነ በድንጋጌው ሰፍሯል፡፡

በሌላ በኩል፣ የጠቅላይ ቤተ ክህነት ጽ/ቤት ምክትል ሥራ አስኪያጅ ኾነው የቆዩት ርእሰ ደብር መሐሪ ኃይሉ፣ ወደ ትንሣኤ ማሳተሚያ ድርጅት ተዛውረው በዋና ሥራ አስኪያጅነት እንዲሠሩ ተመድበዋል፡፡ የትንሣኤ ማሳተሚያ ድርጅት ዋና ሥራ አስኪያጅ ኾነው ሲሠሩ የቆዩት ንቡረ እድ ኤልያስ ኣብርሃ፣  ወደ መሪ ዕቅድ ትግበራ ጽ/ቤት ዋና ሓላፊነት ተዛውረው እንዲሠሩ ተመድበዋል፡፡

የመሪ ዕቅድ ጽ/ቤትን ለማደራጀት እና የትግበራ ፕሮጀክቱን ለማስጀመር፣ የቅዱስ ሲኖዶስ ምልአተ ጉባኤ፣ የ2.5 ሚሊዮን ብር በጀት አጽድቋል፡፡ ብፁዕ ጠቅላይ ሥራ አስኪያጁ ለ39ኛው አጠቃላይ ሰበካ መንፈሳዊ ጉባኤ ዓመታዊ ስብሰባ ባቀረቡት ሪፖርት፣ የጽ/ቤቱ መተዳደሪያ ደንብ በቋሚ ሲኖዶስ እንዲጸድቅ መደረጉንና ትግበራውን የሚመራ እና የሚያስተባብር ምክትል መምሪያ ሓላፊ እንዲመደብለት ተደርጎ ሥራውን ማከናወን መጀመሩን አስታውቀዋል፡፡

ትላንት በዋና ሓላፊነት ከተመደቡት ንቡረ እድ ኤልያስ ኣብርሃ ቀደም ሲል፣ የትግበራ ጽ/ቤቱ ምክትል ሓላፊ ኾነው የተመደቡት፣ የቀድሞው የአዲስ አበባ ሀገረ ስብከት ዋና ሥራ አስኪያጅ መ/ር ይቅር ባይ እንዳለ ናቸው፡፡ ቅዱስ ሲኖዶስ በጥቅምት ወር 2011 ዓ.ም. ባሳለፈው ውሳኔ መሠረት፣ የመሪ ዕቅድ ጽ/ቤቱ፣ የትግበራ ቲሞችን በማቋቋም፣ ከይዘት ክለሳው እስከ ክንውኑ ሥራውን የሚፈጽሙ ባለሞያዎችን በአግባቡ ቀጥሮ ማሠራት ይጠበቅበታል፡፡

በተጨማሪ የዝውውር ዜና፣ የስብከተ ወንጌል እና ሐዋርያዊ ተልእኮ መምሪያ ዋና ሓላፊ ኾነው ሲሠሩ የቆዩት መጋቤ ሰላም ቀሲስ ሰሎሞን ቶልቻ፣ ወደ ሰበካ ጉባኤ ማደራጃ መምሪያ ተዛውረው በዋና ሓላፊነት እንዲሠሩ ተመድበዋል፡፡ የማደራጃ መምሪያው ዋና ሓላፊ ኾነው ሲሠሩ የቆዩት መጋቤ ሐዲስ ሐዋዘ ብርሃን ጫኔ ደግሞ፣ ወደ ስብከተ ወንጌል እና ሐዋርያዊ ተልእኮ መምሪያ ተዛውረው በዋና ሓላፊነት እንዲሠሩ መመደባቸው ተገልጿል፡፡

የዋና ሓላፊዎቹ መዛወር ዓላማ፣ “ሥራንና ሠራተኛን ለማገናኘት ሲባል” እንደኾነ፣ በብፁዕ ጠቅላይ ሥራ አስኪያጁ ተፈርሞ በየስማቸው ከደረሳቸው ደብዳቤ ለመረዳት ተችሏል፡፡ በሕገ ቤተ ክርስቲያኑ አንቀጽ 42 ንኡስ አንቀጽ 6 መሠረት፣ የመምሪያዎች እና የድርጅቶች ሓላፊዎች የሥራ ዝውውር እና ዕድገት፣ በብፁዕ ጠቅላይ ሥራ አስኪያጁ አቅራቢነት ተጠንቶ ቅዱስ ፓትርያርኩ ሲስማማበት ተፈጻሚ እንዲኾን ይደረጋል፡፡

የብፁዕ አቡነ ኤጲፋንዮስ ሊቀ ጳጳስ ሥርዓተ ቀብር ተፈጸመ

የምዕራብ ሸዋ ሀገረ ስብከት ሊቀ ጳጳስ የነበሩት ብፁዕ አቡነ ኤጲፋንዮስ ሥርዐተ ቀብር ተፈጸመ፡፡

ብፁዕነታቸው፣ ሀገረ ስብከቱን በመምራት ላይ እያሉ ባደረባቸው ሕመም ከሓላፊነት ተገልለው እና በሕክምና ሲረዱ ቆይተው፣ ትላንት ኅዳር 2 ቀን 2013 ዓ.ም. በተወለዱ በ72 ዓመት ዕድሜያቸው ያረፉ ሲኾን፣ ዛሬ ጠዋት፣ በመንበረ ጸባኦት ቅድስት ሥላሴ ካቴድራል ሥርዓተ ቀብራቸው ተፈጽሟል፡፡

ብፁዕ ወቅዱስ ፓትርያርክ አቡነ ማትያስ፣ ብፁዓን አበው ሊቃነ ጳጳሳት፣ የጠቅላይ ቤተ ክህነት ጽ/ቤት እና የአዲስ አበባ ሀገረ ስብከት ጽ/ቤት ሓላፊዎች፣ የገዳማት እና አድባራት አስተዳዳሪዎች እንዲሁም ምእመናንና ወዳጆቻቸው በተገኙበት በተፈጸመው ሥርዓተ ቀብር፣ የብፁዕነታቸው ዜና ሕይወት እና ሥራ፣ በብፁዕ አቡነ ዮሴፍ የቅዱስ ሲኖዶስ ዋና ጸሐፊ እና የሲዳማ እና ጌዲዮ አህጉረ ስብከት ሊቀ ጳጳስ በንባብ ተሰምቷል፡፡

ብፁዕ ወቅዱስ ፓትርያርኩም፣ “ብፁዕ አቡነ ኤጲፋንዮስ፣ መንፈሳዊ አገልግሎት አበርክተው በሕግ እና በሥርዓት ኖረው ወደ አምላካቸው ሔደዋል፤” በማለት የማጽናኛ ትምህርት እና ቡራኬ ሰጥተዋል፡፡

የብፁዕነታቸው በረከት ይድረሰን፤ አሜን፡፡

የዘገባ ምንጭ እና ፎቶዎች: ኢኦተቤ ቴቪ እና የኢኦተቤ ሕዝብ ግንኙነት መምሪያ

ብፁዕ አቡነ ኤጲፋንዮስ ዐረፉ

  • የቀብር ሥነ ሥርዐታቸው ነገ ጠዋት በ3፡00 በመንበረ ጸባኦት ቅድስት ሥላሴ ካቴድራል ይፈጸማል

የቀድሞው የምዕራብ ሸዋ ሀገረ ስብከት ሊቀ ጳጳስ የነበሩት፣ ብፁዕ አቡነ ኤጲፋንዮስ፣ ዛሬ ጠዋት ዐርፈዋል፡፡

ከሓላፊነታቸው ተገልለው በመንበረ ፓትርያርኩ በሚገኘው ማረፊያቸው ለረጅም ጊዜ በሥጋ ሕመም የቆዩት ብፁዕነታቸው፣ ዛሬ ረቡዕ፣ ኅዳር 2 ቀን 2013 ዓ.ም.  ጠዋት በሞተ ሥጋ ተለይተውናል፡፡

ብፁዕ አቡነ ኤጲፋንዮስ፣ በአምስተኛው ፓትርያርክ ብፁዕ ወቅዱስ አቡነ ጳውሎስ አንብሮተ እድ፣ ሐምሌ 5 ቀን 1991 ዓ.ም. ኤጲስ ቆጶስነት ከተሾሙት 16 ብፁዓን አባቶች አንዱ ነበሩ፡፡

በፊት ስማቸው አባ አምኃ ሥላሴ አሳየኸኝ ይባሉ የነበሩ ሲኾን፣ ብፁዕ አባ ኤጲፋንዮስ ተብለው ለከፋ ሸካ ሀገረ ስብከት ተመድበው ነበር ሐዋርያዊ አገልግሎታቸውን የጀመሩት፡፡

የብፁዕ አቡነ ኤጲፋንዮስ የቀብር ሥነ ሥርዐት፣ ነገ ኀሙስ፣ ኅዳር 3 ቀን 2013 ዓ.ም. ከጠዋቱ በ3፡00፣ ሊቀ ሥልጣናት ኾነው በአስተዳዳሪነት በመሩት በመንበረ  ጸባኦት ቅድስት ሥላሴ ካቴድራል፣ ብፁዕ ወቅዱስ ፓትርያርክ አቡነ ማትያስ፣ ብፁዓን አበው ሊቃነ ጳጳሳት፣ የጠቅላይ ቤተ ክህነት የመምሪያ ሓላፊዎች እና የድርጅቶቹ ሓላፊዎች፣ የአዲስ አበባ አድባራት እና ገዳማት ሓላፊዎች፣ ወዳጅ ዘመዶቻቸው በተገኙበት እንደሚፈጸም፣ የጠቅላይ ቤተ ክህነት ሕዝብ ግንኙነት መምሪያ በፌስቡክ ገጹ አስታውቋል፡፡

አረጋዊው ሊቀ ጳጳስ ብፁዕ አቡነ መልከ ጼዴቅ ዐረፉ

የብፁዕ አቡነ መልከ ጼዴቅ አጭር ዜና ሕይወት

ልደት፡-

ብፁዕ አቡነ መልከ ጼዴቅ፣ በጎንደር ክፍለ ሀገር፣ በደብረ ታቦር አውራጃ በፋርጣ ወረዳ ልዩ ስሟ መገንታ ቍስቋም በተባለች ደብር፣ ከቄስ ወርቅነህ ትኩ እና ከወይዘሮ አንጓች አታሌ በ1916 ዓ.ም. ተወለዱ፡፡

መንፈሳዊ እና ዘመናዊ ትምህርት፡

በሕፃንነት ዕድሜያቸው፥ ከደጉ አባታቸው ከቄስ ትኩ ፊደል ቈጥረው፣ ንባብ ለይተው፣ ዳዊት ከደገሙ በኋላ የቃል ትምህርት ጀመሩ፡፡ በአቅራቢያቸው ከሚገኘው ድድም ጊዮርጊስ ከመሪጌታ ወንድም ጾመ ድጓ እና ምዕራፍ ተማሩ። ቀጥሎም በዝነኛዋ ደብር አዛውር ኪዳነ ምሕረት ከታላቁ የዜማ መምህር መሪጌታ ጀንበር የዜማ ትምህርታቸውን አጠናከሩ። ከዚያም ወደ ሌላኛው ዝነኛ ደብር አትከና ጊዮርጊስ ከመሪጌታ ፈቃዱ ድጓ ተምረዋል። ቅኔ ቈጥረው የተቀኙት ደግሞ በታላቁ ደብር ቆማ ፋሲለደስ ከሚገኙት ከሊቁ መምህር መሪጌታ ዓምደ ብርሃን ነበር። ቀጥሎም፣ ወደ አማራ ሳይንት ገርት አቡነ አቢብ ተጉዘው ከመሪጌታ አበበ፣ ገርቲ ቅኔያቸውን ከነአገባቡ አጠናክረው ተቀኝተዋል።

ከታላቁ ሊቅ መምህር ሰይፈ ሥላሴ በአዲስ አበባ መንበረ መንግሥት ቅዱስ ገብርኤል ገዳም፣ የመጻሕፍተ ሐዲሳትን ትርጉም ተምረው፣ በመምህርነት በመመረቅ ወንበር ዘርግተው አስተምረዋል። ከሌላው ሊቅ ከመምህር ፊላታዎስ ደግሞ የአምስቱን ብሔረ ኦሪት ትርጓሜ፣ መዝሙረ ዳዊትን፣ መጽሐፈ ኢሳይያስን በሚገባ አጠናቀው ተምረዋል። ብፁዕ አቡነ መልከ ጼዴቅ፣ ከፍተኛ የሃይማኖት ትምህርትን፣ በአገር ውስጥ እና በውጭ ሀገር ተምረዋል።

ከመንፈሳዊው እና ትውፊታዊው ትምህርት ባሻገር፣ ዘመናዊ ትምህርትን አጠናክረው ለመማር፣ በ1939 ዓ.ም. ወደ ቅድስት ሥላሴ መንፈሳዊ ትምህርት ቤት ገብተዋል። በዚህም ለአራት ዓመታት ሲሰጥ የነበረውን ሥርዓተ ትምህርት በከፍተኛ ትጋት በመከታተል እና ከጓደኞቻቸው ብልጫን በማሳየት ለሦስት ዓመታት ደጋግመው ተሸልመዋል። በአራተኛው ዓመትም፣ ከወዳጅ ቤተ ክርስቲያን በተገኘው የከፍተኛ መንፈሳዊ ትምህርት ዕድል ወደ ግሪክ ኦርቶዶክስ ኢኩሜኒካል መንበረ ፓትርያርክ(ቍስጥንጥንያ) ተልከው ልዩ ስሙ “ሐልኪ” በሚባለው የቴዎሎጅ ትምህርት ቤት ገብተው፣ ለአምስት ዓመታት ተምረው በከፍተኛ የቴዎሎጅ ትምህርት ተመርቀዋል። የመጀመርያው ባለዲግሪ ካህን በመኾን በ1949 ዓ.ም. ወደ አገራቸው ተመልሰዋል።

ሥልጣነ ክህነት እና ማዕርገ ምንኵስና:-

1. መዓርገ ዲቁናን ከብፅዕ አቡነ አብርሃም በ1927 ዓ.ም.

2. መዓርገ ቅስናን ከብፁዕ አቡነ ይስሐቅ በ1938 ዓ.ም.

3. የመነኰሱት ደግሞ ጣና በምትገኘው ዝነኛዋ የክርስቶስ ሠምራ ገዳም ነው።

ማዕርገ ጵጵስና፡-

በፊት ስማቸው ሊቀ ሥልጣናት አባ ሀብተ ማርያም ወርቅነህ፣ ብፁዕ አቡነ መልከ ጼዴቅ ተብለው መዓርገ ጵጵስናን የተቀበሉት፣ በ1983 ዓ.ም. ከብፁዕ ወቅዱስ አቡነ መርቆሬዎስ ፓትርያርክ ርእሰ ሊቃነ ጳጳሳት ዘኢትዮጵያ ነው።

አገልግሎት፡-

በግሪክ አገር የሚሰጠውን የነገረ መለኰት ትምህርት አጠናቅቀው እንደተመለሱ መደበኛ ሥራቸውን የጀመሩት፣ በቅድስት ሥላሴ መንፈሳዊ ትምህርት ቤት በመምህርነት ተመድበው የተማሩትን በማስተማር ነበር። ከ1950 እስከ 1952 ዓ.ም. ሲያስተምሩ ቆይተዋል፡፡ የሰዋስወ ብርሃን ቅዱስ ጳውሎስ መንፈሳዊ ትምህርት ቤት ዳይሬክተር እና መምህር በመኾን ሞያቸውን በተግባር አሳይተዋል። ተዳክሞ የነበረውን ትምህርት ቤት ነፍስ በመዝራት ሥርዓተ ትምህርቱን አሻሽለው፣ መምህራንን አሟልተው፣ ግቢውን አለምልመው በአጠቃላይ የጠፋውንና የጠመመውን አቅንተው ከፍተኛ የሥራ ውጤት አሳይተዋል። ለከፍተኛ ደረጃ እንዲታጩ ያደረጋቸውም፣ በዚህ ትምህርት ቤት በጥንካሬ ያሳዩት የሥራ ፍሬ ነው።

በዚሁ ትምህርት ቤት፣ በዳይሬክተርነት እና በአስተማሪነት ከሰጡት አገልግሎት በተጨማሪ፣ በወቅቱ በክብር ዘበኛ ራዲዮ ጣቢያ ተከታታይ ፕሮግራም ያቀርቡት የነበረው ስብከተ ወንጌል ታዋቂነትን አትርፎላቸው ነበር። በ1952 ዓ.ም. የግርማዊ ቀዳማዊ ኃይለ ሥላሴ ልዩ ካቢኔ ሲቋቋም፣ ለንጉሠ ነገሥቱ የሚቀርቡትን መንፈሳዊ ጉዳዮች ለማጣራት በሓላፊነት ተመርጠው፣ የመንፈሳዊ ጉዳዮች መምሪያ ዳይሬክተር ኾነው ተሹመዋል። ወዲያውኑም፣ የመንበረ ጸባዖት ቅድሥት ሥላሴ ካቴድራል ሊቀ ሥልጣናት ኾነው ተሹመው፣ ኹለቱንም ከፍተኛ ሓላፊነቶች እስከ 1966 ዓ.ም. ድረስ ለ14 ዓመታት ከፍተኛ የሥራ ውጤት አሳይተዋል። የሠሩአቸውም ሥራዎች እጅግ ብዙዎች ናቸው።

በቅድስት ሥላሴ ካቴድራል እና በሐዋርያዊ ድርጅት ሰፊ አገልግሎት አበርክተዋል፡፡ በሰጡት ሰፊ አገልግሎትም የተሸለሙአቸው ሽልማቶች፤

ሀ) ከኢትዮጵያ መንግሥት

• የኢትዮጵያ የክብር ኮከብ ባለአምበል 1ኛ ደረጃ

• የዳግማዊ ምኒልክ የክብር ኮከብ ባለ አምበል 1ኛ ደረጃ

• የቅድሥት ሥላሴ ኒሻን የኮማንደር ደረጃ ያለፕላኩ

• የቅድሥት ሥላሴ ኒሻን የኮማንደር ደረጃ ከነፕላኩ

ለ) ከውጭ ሀገራት

• ከግሪክ መንግሥት

• ከግሪክ ቤተ ክርስቲያን

• ከእስክንድርያ ቤተ ክርስቲያን (በግሪክ)

• የላዝሩስ ኒሻን ከኦስትርያ(ቪዬና)

የተሸለሟቸው የክብር አልባሳት፤

1) ጥቄር ካባ ባለራስ ማዕርግ በሙካሽ የተሠራ

2) ቀይ ከፋይ ላይ ወርቅ የተጠለፈበት ካባ እንዲሁም በሙካሽ የተሠራ ቀሚስ

3) ከወርቅ የተሠራ የእጅ መስቀል ይጠቀሳሉ፡፡

በሰሜን አሜሪካ በኒውዮርክ ጽዮን ቅድስት ማርያምን ቤተ ክርስቲያንና በሌሎችም አብያተ ክርስቲያን በማቋቋም እና በማደራጀት ሰፊ አገልግሎት አበርክተዋል፡፡ ብፁነታቸው ለቤተ ክርስቲያን ካበረከቷቸው መጻሕፍት መካከል፤

1/ ዜና ሕይወቱ ለቅዱስ ጳውሎስ

2/ ስለ እግዚአብሔር መኖር

3/ ትምህርተ አበ ነፍስ

4/ ክብረ ድንግል

5/ ድንግልናዊ ሕይወት

6/ የእግዚአብሔር ሕገ መንግሥት

7/ እንጸልይ

8/ ማኅበራዊ ኑሮ በኢትዮጵያ

9/ ጥንታዊ የኢትዮጵያ ትምህርት

10/ የኢትዮጵያ ኦርቶዶክስ ቤተ ክርስቲያን እምነት እና ትምህርት የሚሉት መጻሕፍት በታሪክ ይዘከራሉ፡፡

ብፁዕ አቡነ መልከ ጼዴቅ፣ ከአገር ውጭም በተመሳሳይ አገልግሎት ቆይተዋል፡፡ በመንፈሳዊ እና ማኅበራዊ ዘርፍ ረጅም ዘመን ላበረከቱት አስተዋፅኦ፣ በካሊፎርኒያ ግዛት ኦክላንድን ጨምሮ በሰባት ከተሞች መታሰቢያ ይኾናቸው ዘንድ፣ በየዓመቱ በፈረንጆቹ አቆጣጠር ጁላይ 19 የልደታቸው ቀን በስማቸው፣ ”የመልከጼዴቅ ቀን” ተብሎ ተሠይሞላቸዋል፡፡

ብፁዕነታቸው በእርግና በጸሎት ተወስነው ቆይተው፣ በ97 ዓመታቸው፣ ጥቅምት 28 ቀን 2013 ዓ.ም. ከዚህ ዓለም ድካም በክብር ዓርፈዋል፡፡

የብፁዕ አቡነ መልከ ጼዴቅ አጭር ዜና ሕይወት

ልደት፡-

ብፁዕ አቡነ መልከ ጼዴቅ፣ በጎንደር ክፍለ ሀገር፣ በደብረ ታቦር አውራጃ በፋርጣ ወረዳ ልዩ ስሟ መገንታ ቍስቋም በተባለች ደብር፣ ከቄስ ወርቅነህ ትኩ እና ከወይዘሮ አንጓች አታሌ በ1916 ዓ.ም. ተወለዱ፡፡

መንፈሳዊ እና ዘመናዊ ትምህርት፡

በሕፃንነት ዕድሜያቸው፥ ከደጉ አባታቸው ከቄስ ትኩ ፊደል ቈጥረው፣ ንባብ ለይተው፣ ዳዊት ከደገሙ በኋላ የቃል ትምህርት ጀመሩ፡፡ በአቅራቢያቸው ከሚገኘው ድድም ጊዮርጊስ ከመሪጌታ ወንድም ጾመ ድጓ እና ምዕራፍ ተማሩ። ቀጥሎም በዝነኛዋ ደብር አዛውር ኪዳነ ምሕረት ከታላቁ የዜማ መምህር መሪጌታ ጀንበር የዜማ ትምህርታቸውን አጠናከሩ። ከዚያም ወደ ሌላኛው ዝነኛ ደብር አትከና ጊዮርጊስ ከመሪጌታ ፈቃዱ ድጓ ተምረዋል። ቅኔ ቈጥረው የተቀኙት ደግሞ በታላቁ ደብር ቆማ ፋሲለደስ ከሚገኙት ከሊቁ መምህር መሪጌታ ዓምደ ብርሃን ነበር። ቀጥሎም፣ ወደ አማራ ሳይንት ገርት አቡነ አቢብ ተጉዘው ከመሪጌታ አበበ፣ ገርቲ ቅኔያቸውን ከነአገባቡ አጠናክረው ተቀኝተዋል።

ከታላቁ ሊቅ መምህር ሰይፈ ሥላሴ በአዲስ አበባ መንበረ መንግሥት ቅዱስ ገብርኤል ገዳም፣ የመጻሕፍተ ሐዲሳትን ትርጉም ተምረው፣ በመምህርነት በመመረቅ ወንበር ዘርግተው አስተምረዋል። ከሌላው ሊቅ ከመምህር ፊላታዎስ ደግሞ የአምስቱን ብሔረ ኦሪት ትርጓሜ፣ መዝሙረ ዳዊትን፣ መጽሐፈ ኢሳይያስን በሚገባ አጠናቀው ተምረዋል። ብፁዕ አቡነ መልከ ጼዴቅ፣ ከፍተኛ የሃይማኖት ትምህርትን፣ በአገር ውስጥ እና በውጭ ሀገር ተምረዋል።

ከመንፈሳዊው እና ትውፊታዊው ትምህርት ባሻገር፣ ዘመናዊ ትምህርትን አጠናክረው ለመማር፣ በ1939 ዓ.ም. ወደ ቅድስት ሥላሴ መንፈሳዊ ትምህርት ቤት ገብተዋል። በዚህም ለአራት ዓመታት ሲሰጥ የነበረውን ሥርዓተ ትምህርት በከፍተኛ ትጋት በመከታተል እና ከጓደኞቻቸው ብልጫን በማሳየት ለሦስት ዓመታት ደጋግመው ተሸልመዋል። በአራተኛው ዓመትም፣ ከወዳጅ ቤተ ክርስቲያን በተገኘው የከፍተኛ መንፈሳዊ ትምህርት ዕድል ወደ ግሪክ ኦርቶዶክስ ኢኩሜኒካል መንበረ ፓትርያርክ(ቍስጥንጥንያ) ተልከው ልዩ ስሙ “ሐልኪ” በሚባለው የቴዎሎጅ ትምህርት ቤት ገብተው፣ ለአምስት ዓመታት ተምረው በከፍተኛ የቴዎሎጅ ትምህርት ተመርቀዋል። የመጀመርያው ባለዲግሪ ካህን በመኾን በ1949 ዓ.ም. ወደ አገራቸው ተመልሰዋል።

ሥልጣነ ክህነት እና ማዕርገ ምንኵስና:-

1. መዓርገ ዲቁናን ከብፅዕ አቡነ አብርሃም በ1927 ዓ.ም.

2. መዓርገ ቅስናን ከብፁዕ አቡነ ይስሐቅ በ1938 ዓ.ም.

3. የመነኰሱት ደግሞ ጣና በምትገኘው ዝነኛዋ የክርስቶስ ሠምራ ገዳም ነው።

ማዕርገ ጵጵስና፡-

በፊት ስማቸው ሊቀ ሥልጣናት አባ ሀብተ ማርያም ወርቅነህ፣ ብፁዕ አቡነ መልከ ጼዴቅ ተብለው መዓርገ ጵጵስናን የተቀበሉት፣ በ1983 ዓ.ም. ከብፁዕ ወቅዱስ አቡነ መርቆሬዎስ ፓትርያርክ ርእሰ ሊቃነ ጳጳሳት ዘኢትዮጵያ ነው።

አገልግሎት፡-

በግሪክ አገር የሚሰጠውን የነገረ መለኰት ትምህርት አጠናቅቀው እንደተመለሱ መደበኛ ሥራቸውን የጀመሩት፣ በቅድስት ሥላሴ መንፈሳዊ ትምህርት ቤት በመምህርነት ተመድበው የተማሩትን በማስተማር ነበር። ከ1950 እስከ 1952 ዓ.ም. ሲያስተምሩ ቆይተዋል፡፡ የሰዋስወ ብርሃን ቅዱስ ጳውሎስ መንፈሳዊ ትምህርት ቤት ዳይሬክተር እና መምህር በመኾን ሞያቸውን በተግባር አሳይተዋል። ተዳክሞ የነበረውን ትምህርት ቤት ነፍስ በመዝራት ሥርዓተ ትምህርቱን አሻሽለው፣ መምህራንን አሟልተው፣ ግቢውን አለምልመው በአጠቃላይ የጠፋውንና የጠመመውን አቅንተው ከፍተኛ የሥራ ውጤት አሳይተዋል። ለከፍተኛ ደረጃ እንዲታጩ ያደረጋቸውም፣ በዚህ ትምህርት ቤት በጥንካሬ ያሳዩት የሥራ ፍሬ ነው።

በዚሁ ትምህርት ቤት፣ በዳይሬክተርነት እና በአስተማሪነት ከሰጡት አገልግሎት በተጨማሪ፣ በወቅቱ በክብር ዘበኛ ራዲዮ ጣቢያ ተከታታይ ፕሮግራም ያቀርቡት የነበረው ስብከተ ወንጌል ታዋቂነትን አትርፎላቸው ነበር። በ1952 ዓ.ም. የግርማዊ ቀዳማዊ ኃይለ ሥላሴ ልዩ ካቢኔ ሲቋቋም፣ ለንጉሠ ነገሥቱ የሚቀርቡትን መንፈሳዊ ጉዳዮች ለማጣራት በሓላፊነት ተመርጠው፣ የመንፈሳዊ ጉዳዮች መምሪያ ዳይሬክተር ኾነው ተሹመዋል። ወዲያውኑም፣ የመንበረ ጸባዖት ቅድሥት ሥላሴ ካቴድራል ሊቀ ሥልጣናት ኾነው ተሹመው፣ ኹለቱንም ከፍተኛ ሓላፊነቶች እስከ 1966 ዓ.ም. ድረስ ለ14 ዓመታት ከፍተኛ የሥራ ውጤት አሳይተዋል። የሠሩአቸውም ሥራዎች እጅግ ብዙዎች ናቸው።

በቅድስት ሥላሴ ካቴድራል እና በሐዋርያዊ ድርጅት ሰፊ አገልግሎት አበርክተዋል፡፡ በሰጡት ሰፊ አገልግሎትም የተሸለሙአቸው ሽልማቶች፤

ሀ) ከኢትዮጵያ መንግሥት

• የኢትዮጵያ የክብር ኮከብ ባለአምበል 1ኛ ደረጃ

• የዳግማዊ ምኒልክ የክብር ኮከብ ባለ አምበል 1ኛ ደረጃ

• የቅድሥት ሥላሴ ኒሻን የኮማንደር ደረጃ ያለፕላኩ

• የቅድሥት ሥላሴ ኒሻን የኮማንደር ደረጃ ከነፕላኩ

ለ) ከውጭ ሀገራት

• ከግሪክ መንግሥት

• ከግሪክ ቤተ ክርስቲያን

• ከእስክንድርያ ቤተ ክርስቲያን (በግሪክ)

• የላዝሩስ ኒሻን ከኦስትርያ(ቪዬና)

የተሸለሟቸው የክብር አልባሳት፤

1) ጥቄር ካባ ባለራስ ማዕርግ በሙካሽ የተሠራ

2) ቀይ ከፋይ ላይ ወርቅ የተጠለፈበት ካባ እንዲሁም በሙካሽ የተሠራ ቀሚስ

3) ከወርቅ የተሠራ የእጅ መስቀል ይጠቀሳሉ፡፡

በሰሜን አሜሪካ በኒውዮርክ ጽዮን ቅድስት ማርያምን ቤተ ክርስቲያንና በሌሎችም አብያተ ክርስቲያን በማቋቋም እና በማደራጀት ሰፊ አገልግሎት አበርክተዋል፡፡ ብፁነታቸው ለቤተ ክርስቲያን ካበረከቷቸው መጻሕፍት መካከል፤

1/ ዜና ሕይወቱ ለቅዱስ ጳውሎስ

2/ ስለ እግዚአብሔር መኖር

3/ ትምህርተ አበ ነፍስ

4/ ክብረ ድንግል

5/ ድንግልናዊ ሕይወት

6/ የእግዚአብሔር ሕገ መንግሥት

7/ እንጸልይ

8/ ማኅበራዊ ኑሮ በኢትዮጵያ

9/ ጥንታዊ የኢትዮጵያ ትምህርት

10/ የኢትዮጵያ ኦርቶዶክስ ቤተ ክርስቲያን እምነት እና ትምህርት የሚሉት መጻሕፍት በታሪክ ይዘከራሉ፡፡

ብፁዕ አቡነ መልከ ጼዴቅ፣ ከአገር ውጭም በተመሳሳይ አገልግሎት ቆይተዋል፡፡ በመንፈሳዊ እና ማኅበራዊ ዘርፍ ረጅም ዘመን ላበረከቱት አስተዋፅኦ፣ በካሊፎርኒያ ግዛት ኦክላንድን ጨምሮ በሰባት ከተሞች መታሰቢያ ይኾናቸው ዘንድ፣ በየዓመቱ በፈረንጆቹ አቆጣጠር ጁላይ 19 የልደታቸው ቀን በስማቸው፣ ”የመልከጼዴቅ ቀን” ተብሎ ተሠይሞላቸዋል፡፡

ብፁዕነታቸው በእርግና በጸሎት ተወስነው ቆይተው፣ በ97 ዓመታቸው፣ ጥቅምት 28 ቀን 2013 ዓ.ም. ከዚህ ዓለም ድካም በክብር ዓርፈዋል፡፡

አካባቢን በንቃት በመጠበቅ ከልብ በኾነ ለቅሶ ወደ ፈጣሪ በመጮኽ ጸሎት የሚደረግበት ጊዜ ነው – ብፁዕ አቡነ አብርሃም

  • ከኅዳር 1 እስከ 7 ጸሎተ ምሕላ እንዲደረግ በቅዱስ ሲኖዶስ የታወጀውን፣ ምእመናን በየአጥቢያቸው እየተገኙ እንዲሳተፉ ጥሪ አስተላለፉ፤
  • በግድያ እና ማፈናቀል ተጎድተው በምግብ እና በሰላም ዕጦት የድረሱልን ጥሪ እያሰሙ ላሉ ወገኖቻችን፣ ሕዝብ እና መንግሥት እንዲደርስላቸው ተማፀኑ
  • በተለይ በዓመታዊ በዓላት፣ በቅርሶች እና በምእመናን ላይ ጉዳት እንዳይደርስ ወጣቱ ተገቢውን ፍተሻ በማካሔድ አካባቢውን በንቃት እንዲጠብቅ አሳሰቡ

***

የቤተ ክርስቲያን መሪዎች እና ሕዝበ ክርስቲያኑ፣ አካባቢያቸውን በንቃት እንዲጠብቁ፣ የባሕር ዳር ሀገረ ስብከት ሊቀ ጳጳስ አቡነ አብርሃም አሳሰቡ፡፡ ወቅቱ፣ ከልብ በኾነ ለቅሶ ወደ ፈጣሪ በመጮኽ ጸሎት የሚደረግበት ጊዜ እንደኾነም ብፁዕነታቸው አስታውቀዋል፡፡

ብፁዕነታቸው በሰጡት መግለጫ እንዳሳሰቡት፣ አካባቢን በንቃት በመከታተል ቤተ ክርስቲያንንና ምእመናንን ከድንገተኛ ጥቃት መጠበቅ እንደሚገባ አሳስበዋል፡፡ በመለያየት እና በጦርነት፥ ማነስ እንጂ መብዛት የለም፤ በጦርነት የበለጸገ አገር እና መንግሥትም የለም፤ ጦርነት የተሠራውን ያፈርሳል፤ የተገነባውንም ይንዳል፤ ያሉት ብፁዕነታቸው፣ ከታሪክ በመማር ወደ አንድነት መምጣት እንደሚገባም መልእክት አስተላልፈዋል፡፡ ጥላቻን በፍቅር ማረም ካልተቻለ ውጤቱ የከፋ እንደሚኾን አመልክተዋል፡፡ የዐድዋን ድል መታሰቢያ በየዓመቱ የምናከብረው፣ አገርን ነፃ ለማውጣት የተከፈለውን የአገር ፍቅር ለማንጸባረቅ እንደኾነ ለአብነትም አንሥተዋል፡፡

“ፈጣሪ የሰውን ልጅ ከሁሉ አስበልጦ የፈጠረው ታላቅ ፍጡር በመኾኑ የዘር ሐረጉ፣ ሃይማኖቱ፣ በአጠቃላይ ማንነቱ ታይቶ ሳይኾን፣ ሰው በመኾኑ ብቻ ተከብሮ ሊኖር ይገባል፤” ብለዋል ብፁዕነታቸው፡፡ የሰውን ደም በግፍ በማፍሰስ የተገነባ ሀገር የለም፤ ይልቁንም በግፍ የሚፈስሰው የንጹሐን ደም ጩኸት ወደ እግዚአብሔር ደርሶ በአገራችን ላይ መቅሠፍት እንደሚያመጣ ታውቆ የሰውን ደም በግፍ የሚያፈሱትን፣ ኹሉም በአንድነት ሊያወግዛቸው ይገባል፤ ብለዋል፡፡

የሃይማኖት አባቶች፣ ምሁራን፣ ባለሥልጣናት፣ የፖለቲካ ፓርቲዎች፣ የሰብአዊ መብት ተሟጋቾች፣ የዓለም አቀፍ እና ሀገር አቀፍ ተቋማት እንዲሁም ብዙኃን መገናኛዎች፣ ስለ ሰላም የሚያቀርቡትን አካላት ሐሳብ በመቀበል፣ ሕዝቡ በሰላም የመኖር መብቱ እንዲጠበቅ ሊሠሩ እንደሚገባም ጥሪ አስተላልፈዋል፡፡ በልዩ ልዩ የአገሪቱ ክፍሎች በደረሰው የነፍስ ማጥፋት እና ማፈናቀል የተጎዱ ወገኖች፣ በርካቶች እንደኾኑ ብፁዕ አቡነ አብርሃም አንሥተዋል፡፡ በምግብ እና በሰላም ዕጦት እስከ አኹን እየተሠቃዩ እና የድረሱልን ጥሪ እያሰሙ ያሉ ዜጎች ስላሉ፣ ሕዝብ እና መንግሥት ሊደርስላቸው እንደሚገባ አሳስበዋል፡፡

ከዚህም ጋራ ተያይዞ፣ የቤተ ክርስቲያን መሪዎች እና ሕዝበ ክርስቲያኑ፣ አካባቢውን በንቃት እንዲጠብቅ ብፁዕነታቸው ጥሪ አቅርበዋል። በተለይም ዓመታዊ በዓላት በሚከበሩበት ጊዜ፣ ወጣቱ ተገቢውን ፍተሻ በማካሔድ በምእመናንና በቅርሶች ላይ ጉዳት እንዳይደርስ ሁሉም በንቃት መጠበቅ እንዳለበት አስገንዝበዋል፡፡

ጾም እና ጸሎት የማይፈታው ችግር ባለመኖሩ፣ በቅዱስ ሲኖዶስ ምልአተ ጉባኤ፣ ከኅዳር አንድ እስከ ሰባት ቀን ድረስ፣ በኹሉም አድባራት እና ገዳማት ጸሎተ ምሕላ እንዲያዝ፣ ለኹሉም ሕዝበ ክርስቲያን ጥሪ መቅረቡን አስታውቀዋል፡፡ “ምእምናንና ካህናት፥ እንደ ነነዌ ሰዎች ከልብ በኾነ ለቅሶ ወደ ፈጣሪ በመጮኽ ጸሎት የሚደረግበት ጊዜ በመኾኑ፣ ምእመናን በየአጥቢያው በመገኘት በጸሎት እንድትሳተፉ” ሲሉ፣ ብፁዕ አቡነ አብርሃም ጥሪ አቅርበዋል፡፡

ምንጭ፡- https://www.facebook.com/AmharaMassMediaAgencyAMMA

ቅዱስ ሲኖዶስ: በምዕራብ ወለጋ፣ በጉራፈርዳ እና በቤንሻንጉል ጉምዝ በዜጎች ላይ የተፈጸመውን ጅምላ ጭፍጨፋ አወገዘ

  • መንግሥት፥ ለዜጐች አስፈላጊውን ጥበቃ እንዲያደርግ፣ ወንጀለኞችንም ለፍርድ እንዲያቀርብ አሳሰበ፤
  • መላው ኢትዮጵያውያን ለጋራ ሰላም እና አንድነት እንዲቆሙ ጥሪ አቀረበ

########

በአገራችን ኢትዮጵያ በምዕራብ ወለጋ እና በጉራፈርዳ እንዲሁም በቤንሻንጉል ጉምዝ በግፍ የተገደሉ ዜጐች አስመልክቶ

ከኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የተሰጠ መግለጫ

ስለ ዓለማት አፈጣጠር ስለ ሰው ዘር አመጣጥ ስለ ኃጢአት እና የሥቃይ ኑሮ አጀማመር፣ እግዚአብሔር ከሰው ዘር ጋራ ስላለው ግንኙነት በሚናገረው በኦሪት ዘፍጥረት መጽሐፍ፣ ምዕራፍ አንድ ቁጥር አንድ ላይ በመጀመሪያ እግዚአብሔር ሰማይና ምድርን ፈጠረ በዚያን ጊዜ ምድር ባዶ ነበረች ይላል፡፡

ከዚኽም ጋራ ለሰው ልጆች በእጅጉ አስፈላጊ የኾነውን ብርሃን፣ “ብርሃን ይኹን” በማለት ብርሃንን ከጨለማ ለየ፡፡ በዚኽም መሠረት፣ በብርሃን በሞላው ዓለም ይኖር ዘንድ፣ እግዚአብሔር ሰውን በራሱ መልክ እና በራሱ አምሳያ ፈጠረው፡፡ እግዚአብሔር አምላክ ሰውን ከፈጠረው በኋላ፣ ብዙ ተባዙ ዘራችኹ ምድርን ይሙላ፤ ምድርም በቁጥጥራችኹ ሥር ትኹን፤ በሚል የሰው ልጆች ምንም ዓይነት መልክ ይኑረን፣ የትኛውንም ቋንቋ እንናገር፣ እግዚአብሔር በፈጠረልን ምድር በየትኛውም አቅጣጫ ተከብረንና ተከባብረን እንድንኖር ምድርንም እንድናለማ እግዚአብሔር ፈጥሮናል፤ ማለትም የሰው ልጆች በዚህ ዓለም ላይ ስንኖር፣ እንግዶች እንጂ ከመካከላችን አንድም ባለአገር እንደሌለ ሊኖርም እንደማይችል ከላይ የተገለጸው የእግዚአብሔር ቃል ይነግረናል፡፡

እውነታው ይህ ኹኖ ሳለ፣ የሰው ልጅ በእጅጉ በተሳሳተ አመለካከት ውስጥ በመግባት፣ ይኼ የእኛ ያኛው የእናንተ አካባቢ እየተባባልን የመለያየት ኹሉ መሠረት የኾነውን የጠላትን መንፈስ እና አሠራር በመከተል እርስ በርሳችን በመጠላላት ወንድም ወንድሙን ሲያሳድድ እርስ በርሳችን እየተጠፋፋን እንገኛለን፡፡

በቅርቡ ጥቅምት 22 ቀን 2013 ዓ.ም.፣ በኦሮምያ ክልል በምዕራብ ወለጋ እና ጉራፈርዳ እንዲሁም በቤንሻንጉል ምንም ዓይነት የፖለቲካ አመለካከት የሌላቸው፣ ማልደው በመነሣት አምሽተው በመግባት ምድርን ቆፍረው እና አርሰው፣ ዘርተው እና አጭደው፣ በድካም ኑሮአቸውን የሚገፉ ንፁሐን ዜጐች ሽማግሌዎች፣ ሴቶች እና ሕፃናት ጭምር ሳይቀሩ፣ ጅምላ ጥፍጨፋ በማካሔድ ሕይወታቸው እንዲያልፍ መደረጉ፣ የቅዱስ ሲኖዶስ ምልዓተ ጉባኤው በዓመታዊ ስብሰባ ላይ እያለ የሰማው ሲኾን፣ ቅዱስ ሲኖዶሱንና ቤተ ክርስቲያናችንን በእጅጉ ያሳዘነ ኢሰብአዊ ድርጊት በመኾኑ፣ ቅዱስ ሲኖዶስ እንዲህ ዓይነቱን ድርጊት አውግዟል፡፡

መላው ኢትዮጵያውያን ወገኖቻችንና የመንፈስ ቅዱስ ልጆቻችን፤ ከላይ በመግቢያው እንደገለጽነው እግዚአብሔር ሰማይና ምድርን ፈጠረ፤ ሰውንም በራሱ መልክ አና አምሳያ ፈጠረው፤ እንዳለው ሁሉ፣ የሰው ልጆች በዚህ ዓለም ስንኖር፣ ሁላችን የእግዚአብሔር ፍጥረት መኾናችንን ተገንዝበን ሐሳባችንም ኾነ ተግባራችን እንደ እግዚብሔር ሐሳብ ኾኖ ሁላችን የዚህ ዓለም እንግዶች መኾናችን ተገንዝበን በወንድማማችነትና በፍቅር በአንድነት በመተሳሰብ እግዚአብሔር ፈጥሮ በሰጠን ምድር ላይ በፍቅር ልንኖር ይገባል፡፡

በርግጥ እንደ ሥጋ ለባሽነታችን በተለያየ አካባቢ ተወልደን እንደማደጋችን የተለያየ መልክ ሊኖረን የተለያየ ቋንቋ ልንናገር የተለያየ ባሕልና ሥርዓት ሊኖረን የእኔ የምንለው የራስ አመለካከትም ሊኖረን ይችላል፡፡ ይህ ማለት ደግሞ፣ ሌላው ከእግዚአብሔር የተሰጠን የጸጋ ስጦታ እንጂ ለመለያየት ምክንያት ሊኾነን አይገባም፡፡

ስለዚህ፣ አላስፈላጊ በኾነ ምክንያት በግፍ ለተገደሉት እና ሕይወታቸውን ላጡ ወገኖቻችን፣ በቤተ ክርስቲያናችን ስም ልባዊ ሐዘናችንን እየገለጽን፣ ዳግሞ እንዲህ ዓይነት ኢሰብአዊ ድርጊት እንዳይፈጸም፣ መንግሥት ለዜጐች አስፈላጊውን ጥበቃ እንዲያደርግ፣ ወንጀለኞችንም ለፍርድ እንዲያቀርብ እያሳሰብን፣ መላው ኢትዮጵያውያን ልጆቻችንም፣ ለጋራ ሰላም እና አንድነት እንድትቆሙ ጥሪያችንን እናቀርባለን፡፡

የሞቱ ወገኖቻችንን ነፍስ ይማርልን፡፡

እግዚአብሔር ኢትዮጵያንና ሕዝቦቿን ይባርክ፤ ይቀድስ

ወስብሐት ለእግዚአብሔር

አሜን!!

አባ ማትያስ ቀዳማዊ ፓትርያርክ

ርእሰ ሊቃነ ጳጳሳት ዘኢትዮጵያ

ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት

ጥቅምት 24 ቀን 2013 ዓ.ም.

አዲስ አበባ

ቅዱስ ሲኖዶስ: ከኅዳር 1 እስከ 7 በመላው አድባራት እና ገዳማት ጸሎተ ምሕላ እንዲደረግ ዐወጀ፤ ባለ11 ነጥቦች መግለጫ በማውጣት መደበኛ ስብሰባውን አጠናቀቀ

  • ጥቃትን የሚከላከሉ እና ጉዳትን የሚከታተሉ የሕግ ባለሞያዎች ኮሚቴ እንዲዋቀር አዟል
  • የአገራዊ እርቅና ሰላም ሒደትን የሚያስፈጽሙ ብፁዓን አባቶችን በአስታራቂነት ሠይሟል

##########

በስመ አብ ወወልድ ወመንፈስ ቅዱስ አሐዱ አምላክ አሜን፡፡

ከኢትዮጵያ ኦርቶዶክስ ተዋሕዶ ቤተ ክርስቲያን

ቅዱስ ሲኖዶስ የተሰጠ መግለጫ

የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ፣ በዓመት ለኹለት ጊዜያት እንዲኾን፣ በፍትሕ መንፈሳዊ አንቀጽ 5 ቁጥር 164 በተደነገገው መሠረት፣ የምልዓተ ጉባኤው የመክፈቻ ሥርዓተ ጸሎት ከተፈጸመበት ከጥቅምት 11 ቀን 2013 ዓ.ም. ጀምሮ እስከ ጥቅምት 23 ቀን 2013 ዓ.ም. ድረስ፣ ዓመታዊ መደበኛ ስብሰባውን ሲያካሒድ ሰንብቶ፣ ለቤተ ክርስቲያናችንና ለአገራችን የሚበጁ ማኅበራዊ እና መንፈሳዊ ውሳኔዎችን አሳልፏል፡፡

በዚኹ መሠረት፡-

1. ለቅዱስ ሲኖዶስ ምልዓተ ጉባኤ የቀረበው የጉባኤ መክፈቻ ንግግር፣ የበጀት ዓመቱ የሥራ መመሪያ ኾኖ እንዲያገለግል ምልዓተ ጉባኤው ተቀብሎታል፡፡

2. ለምልዓተ ጉባኤው ቀርቦ ውይይት የተካሔደበት፣ የ39ኛው አጠቃላይ የሰበካ መንፈሳዊ ጉባኤ የጋራ መግለጫን፣ ጉባኤው ተቀብሎ ያጸደቀው በመኾኑ ለሚመለከታቸው ኹሉ ተላልፎ በሥራ እንዲተረጐም ተወስኗል፡፡

3. የቤተ ክርስቲያንን ወቅታዊ ችግር አስመልክቶ፣ በጉባኤው ሰፊ ውይይት የተደረገበት ሲኾን፣ ባለፈው አንድ ዓመት፥ በአገራችን በኢትዮጵያ፣ በቤተ ክርስቲያናችንና በክርስቲያን ወገኖቻችን ላይ የደረሰው ግፍ እና መከራ እንዲቆም፤ በየምክንያቱ በክርስቲያንነታቸው ምክንያት የታሰሩ ካህናት እና ምእመናን ጉዳያቸው እየታየ ከታሰሩበት እንዲፈቱ፤ የመንግሥት የበታች ባለሥልጣናትም ለጥፋተኞች ከሚያደርጉት ድጋፍ እጃቸውን እንዲሰበስቡ ጉባኤው አጥብቆ አሳስቧል፡፡ ከዚኹ ጋራ በቤተ ክርስቲያንና በክርስቲያን ወገኖቻችን ላይ ባለፈው ለደረሰው ጥፋት እና ለወደፊትም የሕግ ክትትል በማድረግ ችግሩን የሚከላከሉ የሕግ ባለሞያዎች ኮሚቴ፣ ከመንበረ ፓትርያርክ እስከ አህጉረ ስብከት ድረስ እንዲቋቋም ተወስኗል፡፡

4. ወቅታዊ አገራዊ ሰላምን በተመለከተ፣ ጉባኤው በሰፊው ተነጋግራል፡፡ በአገራችን ያለው ወቅታዊ የሰላም ዕጦት፣ እየታየ ያለው አለመግባባት፣ ለዜጐች ተረጋግቶ አለመኖርና ለሁከት አልፎ ተርፎም ለሰዎች ሕይወት መጥፋት ምክንያት እየኾነ በመኾኑ፣ በቀጣይም አላስፈላጊ ሁከት ውስጥ እንዳይገባ ከወዲሁ እርቅና ሰላም ማምጣት አስፈላጊ እንደኾነ ጉባኤው አምኖበታል፡፡ በመኾኑም፣

5. በአገራችን ኢትዮጵያ የሕዝባችን የዘመናት ድህነት እና የኑሮ ጉስቁልና አስወግዶ፣ ለአገራችን ብልጽግና ኾነ ለሕዝባችን ዕድገት ከፍተኛ ተስፋ የተጣለበት የታላቁ ሕዳሴ ግድብ አስመልክቶ፣ ጥቅምት 13 ቀን 2013 ዓ.ም. የአሜሪካው ፕሬዝዳንት ዶናልድ ትራምፕ፣ አካባቢያዊ ጦርነት እንዲነሣ ያስተላለፉት መልእክት፣ አገራችን ኢትዮጵያን በቅኝ ግዛት ወይም በሞግዚትነት ለማስተዳደር የተደረገ ሙከራ በመኾኑ፣ ቅዱስ ሲኖዶስ በአጽንዖት ተቃውሞታል፡፡ የዓለም መንግሥታት እና ሕዝቦች፣ እንዲህ ዓይነቱን ትንኮሳ እና የቅኝ ግዛት ፍላጐት እንዲቃወሙ ጥሪውን አቅርቧል፡፡

6. በሕገ ቤተ ክርስቲያኑ አንቀጽ 50 የሚገኘው፣ በአሁኑ ጊዜ ባለው የሀገረ ስብከቱ አሠራር ላይ አመቺ ኾኖ ስለአልተገኘ፣ ከሕገ ቤተ ክርስቲያኑ እንዲወጣና የአዲስ አበባ ሀገረ ስብከት እንደማንኛውም ሀገረ ስብከት ራሱን ችሎ ሊቀ ጳጳስ ተመድቦለት እንዲመራ ቅዱስ ሲኖዶስ ወስኗል፡፡ ከዚህም ጋራ አሁን እየተሠራበት ያለው ሕገ ቤተ ክርስቲያን፣ ከወቅቱ ጋራ ተገናዝቦ መሻሻል እንዳለበት ስለታመነ፣ ይኸው እየተሠራበት ያለውን ሕገ ቤተ ክርስቲያን መርምረው እና አጥንተው መሻሻል የሚገባቸውን ነጥቦች አሻሽለው ወደፊት በቋሚ ሲኖዶስ ከሚመረጡ የሕግ ባለሞያዎች ጋራ ሕጉን አሻሽለው ለግንቦቱ ርክበ ካህናት እንዲያቀርቡ ሦስት ብፁዓን አባቶችን ጉባኤው መድቧል፡፡

7. የቅዱስ ሲኖዶስ ውሳኔ አፈጻጸምን አስመልክቶ፣ ቀደም ሲል በቅዱስ ሲኖዶስ ጉባኤ እየተወሰኑ የተፈጸሙንና ያልተፈጸሙትን በመለየት፣ ሊፈጸሙ ያልቻሉበት ምክንያት ተገልጾ ለፊታችን ግንቦት ርክበ ካህናት ውጤቱ እንዲቀርብ ጉባኤው መመሪያ ሰጥቷል፡፡

8. የብፁዓን አባቶች የሥራ ምደባ እና ዝውውር በማስፈለጉ፣ ቅዱስ ሲኖዶስ ያለውን ኹኔታ ከመረመረ በኋላ፣ በአገር ውስጥ እና ከአገር ውጭ ዝውውር እና ዐዲስ የሥራ ምደባ ተካሒዷል፡፡

9. በምሥራቅ ጐጃም ሀገረ ስብከት በቆጋ ምስካበ ቅዱሳን ኪዳነ ምሕረት ገዳም ተከሥቶ የነበረውን የዶግማ እና የቀኖና ጥሰት አስመልክቶ፣ ችግሩ በአጣሪ ልዑካን እንዲጣራ ተደርጐ በቀረበ ሪፖርት ላይ ጉባኤው ተነጋግሮ፣ ከቀኖና ቤተ ክርስቲያን ውጭ፣ “በመንፈስ ቅዱስ ጵጵስና ተሹመናል፤” ያሉት መነኮሳት የፈጸሙት ድርጊት አግባብነት የሌለው፣ ከሕገ ቤተ ክርስቲያን ውጭ ኾኖ ስለተገኘ፣ መነኮሳቱ በራሳቸው የለበሱት ልብሰ ጵጳስና እና የጵጵስና ቆብ አውልቀው፣ ንስሐ ተሰጥቷቸው በምንኩስናቸው ብቻ ተወስነው በገዳሙ በቀኖና ቤተ ክርስቲያን እንዲኖሩ ተወስኗል፡፡ ከዚሁ ጋራ፣ ተፈጸመ የተባለው ዳግም ጥምቀት እና ክህነት፣ ከቤተ ክርስቲያናችን አስተምህሮ ውጭ የኾነና ቤተ ክርስቲያናችን የማትቀበለው በመኾኑ፣ ይህን ድርጊት የፈጸሙ ሁሉ ከድርጊታቸው እንዲቆጠቡ ጉባኤው አሳስቧል፡፡

10. “የኦሮምያ ቤተ ክህነት አደራጅ ኮሚቴ ነን” ከሚሉ አባላት ጋራ በተደረገ ውይይት መግባባት ደረጃ ላይ በመደረሱ፣ የተያዘባቸው ክህነት ተለቅቆ፣ በቤተ ክርስቲያናችን መዋቅር ውስጥ የሥራ መደብ ተሰጥቷቸው እንዲያገለግሉ ተወስኗል፡፡

11. የቤተ ክርስቲያን የ2013 ዓ.ም. አጠቃላይ በጀት ላይ የተነጋገረው ምልዓተ ጉባኤው፣ ከበጀት እና ሒሳብ መምሪያ በቀረበው የበጀት ድልድል ላይ ተነጋግሮ ማስተካከያዎችን በማድረግ በሥራ ላይ እንዲውል አጽድቋል፡፡

የቅዱስ ሲኖዶስ ምልዓተ ጉባኤ፣ ከላይ በተጠቀሱት ነጥቦች እንዲሁም በወቅታዊ አገራዊ ጉዳይ ላይ በስፋት ተነጋግሯል፡፡ በአሁኑ ጊዜ በአገራችን በተለያዩ አካባቢዎች የደረሰው የጐርፍ መጥለቅለቅ እና የአንበጣ መንጋ በበርካታ ወገኖቻችን ላይ ያደረሰው ችግር ከፍተኛ መኾኑን ጉባኤው ተገንዝቧል፡፡ በመኾኑም፣ ኅብረተሰቡ ለተቸገሩ ወገኖቻችን የተለመደ ድጋፉን ከማድረግ ወደኋላ እንዳይል ምልዓተ ጉባኤው ጥሪውን አቅርቧል፡፡

በአገራችን በኢትዮጵያ እና በዓለማችን እየታየ ያለው አለመግባባት፣ የጐርፍ መጥለቅለጥ፣ የበሽታ ወረርሽኝ የመሳሰሉት ኹሉ፣ እግዚአብሔር አምላክ በምሕረቱ ተመልክቶ ሰላሙንና አንድነቱን ለዓለማችንና ለሕዝባችን ይሰጥልን ዘንድ፣ ከኅዳር 1 እስከ 7 ቀን 2013 ዓ.ም. ድረስ፣ በመላ ኢትዮጵያ ኦርቶዶክስ ተዋሕዶ ቤተ ክርስቲያን ገዳማት እና አድባራት ጸሎተ ምሕላ እንዲደረግ ተወስኗል፡፡

በመጨረሻም፤

አገራዊ ሰላምንና አንድነትን አስመልክቶ፣ የቅዱስ ሲኖዶስ ምልዓተ ጉባኤ በወሰነው መሠረት፣ የእርቅ ሒደቱን የሚቀጥልበት ኾኖ ከዚኹ ጋራ የፌዴራል መንግሥቱ፣ የየክልል መሪዎች እንዲሁም መላው ኢትዮጵያዊ ኹሉ፣ ለአገራችን አንድነት እና ሰላም፣ ለልማቱ እና ለሕዝባዊ አንድነቱ በጋራ እንዲሠራ ቅዱስ ሲኖዶስ ጥሪውን እያቀረበ፣ የቅዱስ ሲኖዶስ ምልዓተ ጉባኤ፣ ከጥቅምት 11 እስከ 23 ቀን 2013 ዓ.ም. ድረስ ለ13 ቀናት ሲያካሒድ የቆየውን ጉባኤ በጸሎት አጠናቋል፡፡

ሰላመ እግዚአብሔር ከሁላችን ጋር ይኹን

እግዚአብሔር አገራችንን ኢትዮጵያንና ሕዝባችንን ይጠብቅ፡፡

ፓትርያርኩ: የቅዱስ ሲኖዶሱን መግለጫ በንባብ ለማሰማት ፈቃደኛ አልኾኑም፤ መግለጫውን፥ የቅዱስ ሲኖዶስ ዋና ጸሐፊ በንባብ አሰምተዋል

የቅዱስ ሲኖዶሱን ጉባኤ በርእሰ መንበርነት የሚመሩት ቅዱስ ፓትርያርኩ፣ ዛሬ ከቀትር በፊት የነበረውንም የምልአተ ጉባኤ ስብሰባ እየመሩ፣ የመግለጫው ረቂቅም ሲነበብ አስተያየት እየሰጡ ውለው ነው የወጡት፡፡ መግለጫውን ለመዘገብ ለ9፡00 የተጠሩት ጋዜጠኞች፣ ከሰዓቱ ቀደምና በቁጥርም በርከት ብለው በስፍራው ቢገኙም፣ ቅዱስ ፓትርያርኩ በሰዓቱ ሳይደርሱ በመዘግየታቸው፣ ከአንድ ሰዓት ተኩል በላይ ለመጠበቅ ተገደዋል፡፡

ቅዱስ ፓትርያርኩን አግባብቶ ለማምጣት፣ ሰባት[Edit] ብፁዓን አባቶች(ብፁዕ አቡነ አትናቴዎስ፣ ብፁዕ አቡነ ቀውስጦስ፣ ብፁዕ አቡነ ማርቆስ፣ ብፁዕ አቡነ ፊልጶስ፣ ብፁዕ አቡነ ዮሴፍ ዘባሌ እና ብፁዕ አቡነ አረጋዊ) በምልአተ ጉባኤው ተመርጠው ቢላኩም፣ ቅዱስነታቸው፣ ከማረፊያቸው ወደ ቅዱስ ሲኖዶሱ መሰብሰቢያ አዳራሽ መጥተው፣ መግለጫውን በንባብ ለማሰማት ፈቃደኛ አልኾኑም፡፡ ለዚህም የተለያዩ አስተያየቶች በመንሥኤነት እየተጠቀሱ ይገኛል፡-

  1. “የምልአተ ጉባኤው መደበኛ ስብሰባ ቀትር ላይ ሲጠናቀቅ፣ መግለጫው፥ በዋና ጸሐፊው ይነበብ፤ የሚል አስተያየት በአንዳንድ ብፁዓን አባቶች ተሰጥቶ ስለነበር በዚያ ተከፍተው ይኾናል፤”
  2. “በጥብቅ የተቃወሙት እና ፊርማቸውን ያላኖሩበት፣ የአዲስ አበባ ሀገረ ስብከት የሕገ ቤተ ክርስቲያን ድንጋጌ ማሻሻያ በመግለጫው በመካተቱ ስለተከፉ ያን ላለማንበብ ይኾናል፤”
  3. አንድ መነኰስ ቀትር 5፡30 ላይ፣ የቅዱስ ሲኖዶስ ዋና ጸሐፊ በስልክ ጠርተውኝ ነው፤ እገባለኹ፤ የለም አትገባም፤ በሚል ከቅዱስነታቸው የጥበቃ ሓላፊ ኢንስፔክተር ገብረ ጻድቃንና ሌላ ባልደረባው ረዳት ኢንስፔክተር መቻል ደሴ ጋራ በፈጠሩት አለመግባባት፣ መነኰሱ በጠባቂዎቹ እንደተደበደቡ የክሥ አቤቱታ ለፖሊስ በማቅረባቸው፣ ጠባቂዎቻቸው ቃል እንዲሰጡ ወደ ኹለተኛ ፖሊስ ጣቢያ መወሰዳቸው አሳዝኗቸው ይኾናል፡፡”

ከብዙ ጥበቃ በኋላ፣ የቅዱስ ሲኖዶስ መግለጫ፣ ራብዓይ ፓትርያርክ ብፁዕ ወቅዱስ አቡነ መርቆሬዎስ እና የቅዱስ ሲኖዶስ አባላት በተገኙበት፣ በቅዱስ ሲኖዶስ ዋና ጸሐፊ ብፁዕ አቡነ ዮሴፍ በንባብ ተሰምቶ፣ የመግለጫው መርሐ ግብሩ ተጠናቋል፡፡