ሕይወት ሳይጠፋ ችግሮችን መፍታት ለምን ያቅታል?አሳሳቢ ኹኔታ ውስጥ ነው ያለነው!

Woldia Ethiopia in mourning

  • ሕይወት ሳይጠፋ ችግሮችን መፍታት ለምን እንደሚያቅት ግራ እያጋባ ነው፡፡ ዜጎች በተለያዩ መንገዶች ቅሬታቸውን ሲያቀርቡ ወይም ብስጭታቸውን ሲገልጹ፣ የጸጥታ ኃይሎች ሓላፊነታቸውን መወጣት ያለባቸው መረጋጋት በመፍጠር ነው፤
  • የተስፋ ቃል በተሰጠ ማግሥት የታየው የወልዲያው ክሥተት፣ ድንጋጤና ንዴት ነው የፈጠረው፡ በመንግሥት ላይ የነበረው እንጥፍጣፊ አመኔታም አብሮ ነው የጠፋው፡፡ ችግሮችን በሰላማዊ መንገድ መፍታት እየተቻለ የበለጠ ማወሳሰብ ለአገር አይጠቅምም፤
  • በሃይማኖታዊ ክብረ በዓል ላይ ፖለቲካዊም ኾነ ሌላ ስሜትን መግለጫ ዘፈኖች ሲቀነቀኑ ዝም ብሎ ማሳለፍ ማንን ይጎዳ ነበር? በወቅቱ ጸጥታ በማስከበር ላይ የነበሩ ሰዎች ቃታ ከመሳባቸው በፊት ውጤቱን ቢያስቡ ኖሮ፣ የሰው ክቡር ሕይወት በከንቱ አይጠፋም ነበር
  • ምትክ የሌለው የሰው ሕይወት እየተቀጠፈ መቀጠል አይቻልም፡፡ ሓላፊነትና ተጠያቂነት እየጠፋ ሁከት በተቀሰቀሰ ቁጥር ሰው መሞት የለበትም፡፡ የአንድም ሰው ሕይወት እንደ ዋዛ ሊጠፋ አይገባም፡፡ ሕዝብ ጥያቄ ሲያነሣም ኾነ ቅሬታውን ሲያቀርብ ምላሹ ኃይል መኾን የለበትም
  • ይህ አሳዛኝ ድርጊት በፍጥነት ታርሞ ሰላም ማስፈን ካልተቻለ ማንን ተስፋ ማድረግ ይቻላል? አሳሳቢ ኹኔታ ውስጥ ነው ያለነው፤

†††

(ሪፖርተር፤ ርእሰ አንቀጽ፤ ረቡዕ፣ ጥር 16 ቀን 2010 ዓ.ም.

Reporter CARTOON Tir 16ሰሞኑን በወልዲያ ከተማ የጥምቀት በዓል ሲከበር በተቀሰቀሰ ግጭት የዜጎች ሕይወት ጠፍቷል፡፡ ከዚህ ቀደም በተደጋጋሚ በርካታ ዜጎች በተለያዩ ሥፍራዎች በደረሱ ግጭቶች ሞተዋል፡፡ በተለያዩ ምክንያቶች የሚያጋጥሙ ችግሮችን በሰላማዊ መንገድ መፍታት እያቃተ፣ ክቡር የኾነው የሰው ሕይወት በከንቱ እየተቀጠፈ ነው፡፡ ሕይወት ሳይጠፋ ችግሮችን መፍታት ለምን እንደሚያቅት ግራ እያጋባ ነው፡፡ ዜጎች በተለያዩ መንገዶች ቅሬታቸውን ሲያቀርቡ ወይም ብስጭታቸውን ሲገልጹ፣ የጸጥታ ኃይሎች ሓላፊነታቸውን መወጣት ያለባቸው መረጋጋት በመፍጠር ነው፡፡ ችግር ባጋጠመ ቁጥር ጠመንጃ መተኮስ ሕይወት ከማጥፋት በተጨማሪ፣ በአገር ሰላምና መረጋጋት ላይ የራሱን አሉታዊ ተጽዕኖ ይፈጥራል፡፡ ላለፉት ኹለት ዓመታት በላይ፣ ኢትዮጵያ ውስጥ እየታየ ያለው የሰላም መደፍረስ፣ ከዚህ ዓይነቱ ድርጊት የመነጨ መኾኑን ማመን ይገባል፡፡ የመንግሥት ሓላፊነት የዜጎችን ደኅንነት ማስጠበቅ መኾን ሲገባው፣ በተቃራኒ በመንግሥት የጸጥታ ኃይሎች ሰዎች ሲገደሉ ሰላም ይደፈርሳል፣ አገር ይተራመሳል፡፡ እየኾነ ያለውም ይኸው ነው፡፡

በቅርቡ የገዥው ፓርቲ ኢሕአዴግ ሥራ አስፈጻሚ ኮሚቴ ለ17 ቀናት ያደረገውን ስብሰባ ሲያጠናቅቅ፣ የአራቱ ብሔራዊ ድርጅቶች ሊቃነ መናብርት በሰጡት መግለጫ፣ እስከ አሁን ለደረሰው ጥፋት ኹሉ የድርጀቱን አመራር ተጠያቂ ማድረጋቸው ይታወሳል፡፡ በአገሪቱ ብሔራዊ መግባባት ለመፍጠር ሲባልም የፖለቲካ ፓርቲ አመራሮችና አባላት እንደሚፈቱ፣ ለዓመታት የዜጎች ማሠቃያ የነበረው ማዕከላዊ ወንጀል ምርመራ ተዘግቶ ሙዚየም እንደሚኾንና ለብሔራዊ መግባባት የሚረዱ የተለያዩ ጠቃሚ ርምጃዎች እንደሚወሰዱም ገልጸው ነበር፡፡ ለሕግ የበላይነት ትልቅ ትኩረት በመስጠትም በስፋት ማብራሪያ መስጠታቸው አይዘነጋም፡፡ ይህ የእነርሱ ቃል ከተሰማ በኋላ በብዙዎች ዘንድ ጥርጣሬ ቢኖርም፣ በበጎ ጎኑ በመመልከት በተስፋ የመጠበቅ አዝማሚያ መታየቱም አይረሳም፤ ነገር ግን የወልዲያው ክሥተት ሲሰማ ግን ድንጋጤ ነው የተፈጠረው፡፡ ጭልጭል ይል የነበረው ተስፋም ተሟጦ ንዴት ነው የተንፀባረቀው፡፡ በመንግሥት ላይ የነበረው እንጥፍጣፊ አመኔታም አብሮ ነው የጠፋው፡፡ ችግሮችን በሰላማዊ መንገድ መፍታት እየተቻለ የበለጠ ማወሳሰብ ለአገር አይጠቅምም፡፡

መንግሥት በአገሪቱ ውስጥ ለሚከናወኑ ማናቸውም ድርጊቶች ሓላፊነትና ተጠያቂነት አለበት፡፡ በተለይ አስፈጻሚው የመንግሥት አካል የጸጥታ ኃይሉን መቆጣጠር ይኖርበታል፡፡ ማናቸውም ዓይነት የሕዝብ ጥያቄም ኾነ ቅሬታ በአግባቡ መስተናገድ ያለበትን ያህል፣ ሁከት ሲቀሰቀስም ከምንም ነገር በላይ በሰው ሕይወትና አካል ላይ ጉዳት መድረስ የለበትም፡፡ የጸጥታ ኃይሎች ሰላም ማስከበር ሲኖርባቸው በረባ ባረባው የሰው ሕይወት ሲያጠፉ ለሕግ መቅረብ ይኖርባቸዋል፡፡ ከዚህ በፊት በኦሮሚያና በሶማሌ ክልሎች አዋሳኝ ቦታዎች በተፈጸሙ ግድያዎችና የማፈናቀል ድርጊቶች እጃቸው አለበት የተባሉም ኾኑ፣ በተለያዩ ሥፍራዎች የዜጎችን ሕይወት ያጠፉ የመንግሥት አመራሮችና የጸጥታ ኃይሎች ሕግ ፊት ቀርበው ሊዳኙ ይገባል፡፡ ምትክ የሌለው የሰው ሕይወት እየተቀጠፈ መቀጠል አይቻልም፡፡ ሓላፊነትና ተጠያቂነት እየጠፋ ሁከት በተቀሰቀሰ ቁጥር ሰው መሞት የለበትም፡፡ የአንድም ሰው ሕይወት እንደ ዋዛ ሊጠፋ አይገባም፡፡ ሕዝብ ጥያቄ ሲያነሣም ኾነ ቅሬታውን ሲያቀርብ ምላሹ ኃይል መኾን የለበትም፡፡

ገዥው ፓርቲ ኢሕአዴግ፣ ‹‹ጥልቅ ተሐድሶ›› አድርጌያለሁ፤ ካለ በኋላ በአገሪቱ መፈጠር የነበረበት ብሔራዊ መግባባት መኾን ሲገባው፣ በተቃራኒው የበለጠ ቅራኔ የሚያባብሱ ድርጊቶች ይታያሉ፡፡ መታደስ ምን ማለት እንደ ኾነ ግራ እስከሚያጋባ ድረስ የኃይል ተግባራት ውጤት የኾኑ ሞት፣ የአካል ጉዳትና መፈናቀል በስፋት ታይተዋል፡፡ ሰሞኑን በወልዲያ፣ ወጣቶች ከጸጥታ ኃይሎች ጋራ ያጋጫቸው ጉዳይ ለሞት የሚያበቃ አልነበረም፡፡ በሃይማኖታዊ ክብረ በዓል ላይ ፖለቲካዊም ኾነ ሌላ ስሜትን መግለጫ ዘፈኖች ሲቀነቀኑ ዝም ብሎ ማሳለፍ ማንን ይጎዳ ነበር? በወቅቱ ጸጥታ በማስከበር ላይ የነበሩ ሰዎች ቃታ ከመሳባቸው በፊት ውጤቱን ቢያስቡ ኖሮ፣ የሰው ክቡር ሕይወት በከንቱ አይጠፋም ነበር፡፡ የጸጥታ ኃይሎች ሥምሪት የዜጎችን ሕይወት ከአደጋ መታደግ መኾን ሲገባው ውጤቱ ሞት ከኾነ ሕዝብ እና መንግሥት እንዴት ይስማማሉ? እንዲህ ዓይነት ድርጊቶች እየተደጋገሙ መንግሥት እንዴት አድርጎ ነው አገር የሚያስተዳድረው? ችግሮችን በሰላማዊ መንገድ መፍታት እየተቻለ በየቦታው የሞት መርዶ እየተሰማ ከሕዝብ ጋር መታረቅስ ይቻላል ወይ? ይህ ጉዳይ በአጽንኦት ሊመከርበት ይገባል፡፡

ዜጎች ለሚያነሡዋቸው ጥያቄዎች ከመንግሥት አፋጣኝ ምላሽ ሲያጡ ብስጭት ይፈጠራል፡፡ አገሪቱን ከሁለት ዓመታት በላይ እየናጣት ያለው ችግር የተፈጠረው በተጠራቀሙ ብሶቶች ምክንያት ነው፡፡ መንግሥት ሕዝብን ማዳመጥ ስለተሳነው ሁከቶች ተቀሰቀሱ፤ በርካቶች ሞቱ፤ አካላቸው ጎደለ፤ ተፈናቀሉ፡፡ ላጋጠሙ ችግሮች ዘለቄታዊ መፍትሔ ተፈልጎ መሞት ይብቃ ቢባልም፣ አሁንም ክቡር የሰው ሕይወት እንደ ቅጠል ይበጠሳል፡፡ እዚህም እዚያም ግጭቶች ሲያጋጥሙ ተመጣጣኝ ርምጃ መወሰድ ሲገባ፣ ከመጠን በላይ የኃይል ርምጃ እየተወሰደ ብዙ አደጋ ደርሷል፡፡ መንግሥት ችግሩን በማመን ተገቢን ርምጃ እንደሚወስድ ቃል ቢገባም፣ የበለጠ ሲብስ እንጂ ሲቀንስ አይታይም፡፡ ሌላው ቀርቶ የአራቱ ብሔራዊ ድርጅቶች ሊቃነ መናብርት በስሜት ውስጥ ኾነው ከአሁን በፊት ያጋጠሙ ጥፋቶች ከእንግዲህ እንደማያጋጥሙ በተናገሩ ማግሥት፣ ሌላ የሞት መርዶ ሲነገር አገርን ያስደነግጣል፡፡ ከእንዲህ ዓይነቱ አዙሪት ውስጥ መውጣት እንዴት ያቅታል? ቃል የተገባው ተኖ ሲቀር እኮ ታጥቦ ጭቃ መኾን ነው፡፡ ይህ አሳዛኝ ድርጊት በፍጥነት ታርሞ ሰላም ማስፈን ካልተቻለ ማንን ተስፋ ማድረግ ይቻላል? አሳሳቢ ኹኔታ ውስጥ ነው ያለነው፡፡

ይህች ታሪካዊት አገርና ይህ ጨዋና አስተዋይ ሕዝብ፣ አሁን የሚታየው አሳዛኝና አሳፋሪ ነገር አይመጥናቸውም፡፡ አገሪቷም ኾነች ይህ ኩሩ ሕዝብ በሥርዐት መተዳደር አለባቸው፡፡ ዴሞክራሲ የህልውና ጉዳይ መኾኑ በርግጠኝነት ሊታመንበት ይገባል፡፡ በሰላም ወጥቶ መግባት የሚቻለው የሕግ የበላይነት ሲኖር ብቻ ነው፡፡ በእኩልነት የሚኖሩበት ሥርዐት ሲፈጠር ነው፡፡ ከብሔርተኝነት በላይ የጋራ አገር መኖር ሲረጋገጥ ነው፡፡ የሕግ የበላይነት የሰፈነባት ዴሞክራሲያዊት አገር መኖር የምትችለው፣ ሕዝቧ ዳር እስከ ዳር በገዛ አገሩ የባለቤትነት ስሜት ሲፈጠርለት ነው፡፡ ይህ ደግሞ ዕውን መኾን የሚችለው የጋራ መግባባት መፍጠር ሲቻል ነው፡፡ አንድነቷ ከብረት የጠነከረ አገር እንድትኖር፣ ልጆቿ ልዩነቶቻቸውን ውበት አድርገው የጋራ ርእይ ሊይዙ ይገባል፡፡

የኢትዮጵያ አስተዋይ ሕዝብ ልዩነቶቹ ሳይበግሩት በጠንካራ አንድነቱ ዘመናትን የዘለቀው ለአገሩ በነበረው ጥልቅ ፍቅር ነው፡፡ ይህን ኩሩ ሕዝብ ይዞ አገርን በዴሞክራሲና በብልጽግና ታላቅ ደረጃ ላይ ማድረስ ሲገባ፣ ነጋ ጠባ የሞት መርዶ መስማት ያሳምማል፡፡ ከእዚህ ዓይነቱ አሳፋሪ አረንቋ ውስጥ በፍጥነት መውጣት ይገባል፡፡ ይህን አስተዋይ ሕዝብ አይመጥንም፡፡ ለዚህም ነው ሕይወት ሳይጠፋ ችግሮችን መፍታት ለምን ያቅታል ተብሎ ደጋግሞ መጠየቅ የሚገባው!

 

Advertisements

የጥምቀት በዓልን በዩኔስኮ የማስመዝገብ ማመልከቻ ‹‹በመጋቢት›› ይገባል

epiphanyaddis31

  • የቅርስ ጥናትና ጥበቃ ባለሥልጣን ባለሞያዎች ቡድን ሥራውን እያከናወነ ይገኛል
  • እስከ ኅዳር መገባደጃ ድረስ፣ የቅድመ ዝግጅቱ 70 በመቶ ሥራ ተጠናቋል – ሚኒስቴሩ
  • ጠቅላይ ጽ/ቤቱ ተባብሮ እየሠራ ነው፤“የምእመናንና የካህናት ፊርማ ተያይዞ ቀርቧል፤”
  • በዓለም አቀፍ የክብረ በዓላት መድበል፣ “የአፍሪካ ኤጲፋኒያ” እየተባለም ይተዋወቃል፤
  • ከ1ሺ500 ዓመታት በላይ፣ በትውልዶችና ሥልጣኔዎች እየተከበረ ያለ ሕያው ቅርስ…
  • የማስመዝገቢያ ሰነዱ፣ እስከ መጋቢት 22 ቀን እኩለ ሌሊት ድረስ መላክ ይኖርበታል፤

†††

/ሔኖክ ያሬድ/

በወርኃ ጥር የኢትዮጵያ ዐደባባዮች በበዓላት ደምቀው ይታዩበታል፣ ከሚያሰኘው አንዱ የጥምቀት በዓል የሚከበርበት መኾኑ ነው፡፡ በውጭ ጸሐፍት፣ ‹‹የአፍሪካው ኤጲፋኒያ›› (African Epiphany) በመባል በልዩ ልዩ ድርሳኖች የሚታወቀው የጥምቀት በዓልን በዩኔስኮ (የተባበሩት መንግሥታት የትምህርት የሳይንስና የባህል ድርጅት) በሰው ልጅ ወካይ የማይዳሰስ ባህላዊ ቅርስነት ለማስመዝገብ (Representative List of Intangible Cultural Heritage of Humanity) የቅርስ ጥናት እና ጥበቃ ባለሥልጣን በይፋ እንቅስቃሴ ከጀመረ ከርሟል፡፡

ዓመታዊው ክብረ በዓል፣ በአገሪቱ እና የኢትዮጵያ ኦርቶዶክስ ተዋሕዶ ቤተ ክርስቲያን በምትገኝበት የዓለም ክፍሎች የዋዜማውን ከተራ ጨምሮ ጥር 11 ቀን 2010 ዓ.ም. ተከብሯል፡፡ በማግሥቱም የቃና ዘገሊላ በዓልም እንዲሁ ተከብሯል፡፡ የባህልና ቱሪዝም ሚኒስቴር በቅርቡ ለፓርላማው ባቀረበው የመንፈቅ ዓመት የአፈጻጸም ሪፖርቱ፣ የሦስት ቀናት በዓል የኾነውን በዓለ ጥምቀትን በዩኔስኮ ለማስመዝገብ ቅድመ ዝግጅቱ እየተገባደደ መኾኑንና እስከ ኅዳር መገባደጃ ድረስ 70 በመቶ መጠናቀቁን ገልጿል፡፡

ጉዳዩ በቀጥታ የሚመለከተው የቅርስ ጥናትና ጥበቃ ባለሥልጣን የባህል አንትሮፖሊጂስቱ አቶ ገዛኸኝ ግርማ፣ ለሪፖርተር እንደገለጹት፣ ሥራው ከሞላ ጎደል መጠናቀቁና አንዳንድ ቀሪ ነገሮች ቢኖሩም ሁሉም ነገር በኹለት ወራት ውስጥ ተጠናቆ በዩኔስኮ ቀነ ገደብ መሠረት ከመጋቢት 22 ቀን 2010 ዓ.ም. በፊት ማመልከቻው ይላካል፡፡

epipheny

ዋዜማውን ከተራ (ጥር 10) እና ማግሥቱን (ጥር 12) ቃና ዘገሊላን ይዞ በዓለ ጥምቀት በልዩ ድምቀት ከሚከበርባቸው አካባቢዎች አንዱ በኾነውና ጎንደር ከተመሠረተችበት ከ17ኛው መቶ ክፍለ ዘመን ጀምሮ በልዩ አገባብ እየተከበረ ያለውን ሒደት ለመሰነድ የቅርስ ጥናትና ጥበቃ ባለሥልጣን ባለሞያዎች ቡድን እንደ ዓምናው ሁሉ ዘንድሮም በአቶ ገዛኸኝ መሪነት ቀሪ ሥራውን እያከናወነ ይገኛል፡፡

የጥምቀት በዓልን ለማስመዝገብ ከባለሥልጣኑ ጋራ ተባብረው እየሠሩ መኾኑን የሚገልጹት በመንበረ ፓትርያርክ የቅርስ ጥበቃና የቤተ መጻሕፍት የሙዚየም መምሪያ ሓላፊው መጋቤ ሰላም ሰሎሞን ቶልቻ ናቸው፡፡ አንዱ መሥፈርት፥ የይመዝገብልን ፊርማ በመኾኑ የምእመናንና የካህናት ፊርማ ከነማመልከቻው ተያይዞ መቅረቡን ሓላፊው አስረድተዋል፡፡

መጋቤ ሰላም ሰሎሞን የክብረ በዓሉን አንድምታ እንዲህ ይገልጹታል፡-  ‹‹ብዙ በዓላት አሉን፤ ጥምቀት የሚለይበት ከሃይማኖታዊ መሠረትነቱ ባሻገር የዐደባባይ በዓል መኾኑ ነው፡፡ ሕፃንና አዋቂ፣ ሽማግሌው ደካማውና ብርቱው የሚታይበት ሃይማኖታዊና ባህላዊ መገለጫዎቹም ለየት ያሉ ናቸው፡፡ ከማኅበረሰቡ ጋራ የሚያስተሳስሩ፣ የኢትዮጵያዊነት ወዝ ያላቸው፣ ጠቀሜታቸው የጎላና እኛነታችንን የሚገልጹ ብዙ ባህሎች አሉበት፡፡ በሃይማኖታዊነቱ፣ የጌታ መጠመቅ ለአኛ አርአያ የኾነና ጌታችን ኢየሱስ መጠመቁን የምናይበት ትልቁ በዓላችን ነው፡፡ ለክርስትና ሕይወት የጥምቀት በዓል መሠረታዊ በዓል ነው፡፡ ››

“የጥምቀት በዓልን በዩኔስኮ የዓለም ቅርስነት ማስመዝገብ ከበዓሉ የቅድመ ዝግጅት ሥራዎች ውስጥ አንዱ ነው፤” የሚሉት አቶ ወርቁ፤ መረጃዎች የማሰባሰብና ለመዝጋቢ አካላት ባህሉን የማሳየት ብሎም የማሳመን ሥራዎች በባህልና ቱሪዝም ሚኒስቴርና በኢትዮጵያ ኦርቶዶክስ ተዋሕዶ ቤተ ክርስቲያን በኩል ከፍተኛ ሥራዎች እየተሠሩ እንደሚገኙ ይጠቁማሉ፡፡

በጎንደር ከሚሰነደው አከባበር በተጨማሪ በጠቅላይ ቤተ ክህነትና በሌሎችም አማካይነት የአኩስምን የንግሥት ሳባ መዋኛ – ማይ ሹም፤ የላስታ ላሊበላን፣  የአዲስ አበባ ጃንሜዳን ጨምሮ በተለያዩ አካባቢዎች በየባሕረ ጥምቀቱ የሚኖረውን ሥርዓት ስነዳ ይከናወናል፡፡ የማስመረጫ ሰነዱ ለዩኔስኮ የሚላክ ሲኾን፣ እ.ኤ.አ. ለ2019 በዕጩነት ለማቅረብ እስከ መጋቢት 22 ቀን 2010 ዓ.ም. ሰነዱን አሟልቶ መላክ ይጠበቃል፡፡

በዓለ ጥምቀቱ ሲገለጽ

timket-festival-ethiopia

በኢትዮጵያ ኦርቶዶክሳዊት ተዋሕዶ  ቤተ ክርስቲያን የሚከበረው የጥምቀት በዓል፣ ጌታችን መድኃኒታችን ኢየሱስ ክርስቶስ በ30 ዓመቱ በኢትዮጵያ አቆጣጠር ጥር 11 ቀን 31 ዓ.ም. (5531 ዓመተ ዓለም) በአጥማቂው ቅዱስ ዮሐንስ እጅ በዮርዳኖስ ባሕር የተጠመቀበትን ዕለት የሚያስታውስ ነው፡፡ ‹‹ኤጲፋንያ›› በመባልም ይታወቃል፡፡ ጥር 10 ቀን በከተራ፣ በገጠርም ኾነ በከተማ ታቦታት ከየአብያተ ክርስቲያናቱ ወደየባሕረ ጥምቀቱ የሚያደርጉት ጉዞና መንፈሳዊ አዳር በማግሥቱ የጥምቀት ዕለት፣ “ተጠምቀ ሰማያዊ በእደ መሬታዊ፤ ሰማያዊው በመሬታዊው እጅ ተጠመቀ” የሚለውን ያሬዳዊ ዝማሬ ይዞ የሚኖር የበዓሉ ገጽታ ነው፡፡

ሥዕላዊ ከኾነው ከሃይማኖታዊና መንፈሳዊ አከባበሩ በተጓዳኝም ባህላዊ ገጽታው ይታያል፡፡ ወጣቶች የሚተጫጩበት የትዳር አጋራቸውን የሚመርጡበት አጋጣሚዎችን ከመፍጠሩም ባለፈ በከተማም ኾነ በገጠር ሰውን የሚያገናኝ ድልድይ ነው፡፡

በየዓመቱ በመላ ኢትዮጵያ የሚከበረው የጥምቀት በዓል፣ ታቦታት ከመንበራቸው ወጥተው፣ በየባሕረ ጥምቀቱ የሚከበሩ በመኾናቸው፣ አገሬውን ብቻ ሳይኾን ዓለም አቀፋዊ መስሕብነትን በመጎናጸፉ፣ ቱሪስቶችን እንደሳበ ነው፡፡ ከአዲስ አበባ እስከ ላሊበላ፣ ከአኵስም እስከ ጎንደር፣ ከሐዋሳ እስከ ጅማ፣ ከአሶሳ እስከ ጋምቤላ በሁሉም ሥፍራዎች በዚሁ ዐይነት ደምቆ ይከበራል። የምእመናኑም ኾነ የካህናትና ዲያቆናት አለባበስ በሚማርኩ ባህላዊ አልባሳት የተዋበ በመኾኑ ከውጭም ኾነ ከአገር ውስጥ ለሚመጡ ጎብኚዎች ሁልጊዜ አዲስ ነው።

ከሃይማኖታዊው ሥነ ሥርዓት በኋላ ካህኑ በሃሌታ፣ ወንዱ በሆታ፣ ሴቱ በእልልታ ታቦተ ሕጉን አጅበው፣ እንደያመጣጣቸው ወደየአጥቢያቸው ይመለሳሉ።

ሊቃውንቱ እንደሚናገሩት፣ ዘመነ አስተርእዮ የሚባለው፣ ከጥር 11 ቀን ጀምሮ እስከ ጾመ ነነዌ (ለዘንድሮ እስከ ጥር 21 ቀን 2010 ዓ.ም.) ያለው ጊዜ ነው። በዚህ ጊዜ ውስጥ ‹‹አምላክ ሰው ኾኖ በሥጋ መገለጡ፣ በዮርዳኖስ በተጠመቀ ጊዜ የአንድነት እና የሦስትነት ምሥጢር መታወቁ፣ በቃና ዘገሊላ በተደረገው ሠርግ ላይ የመጀመሪያው ተኣምር በመፈጸሙ፣ አምላካዊ ኃይሉ መገለጡ›› እየታሰበ ምስጋና ይቀርባል። ይህ ኩነት ኢትዮጵያ ብሂልን ከባህል ጋር አዛምዳ ከሌላው የክርስቲያን ዓለም በተለየ አከባበር በዓሉን ማክበሯ፣ አያሌ ቱሪስቶችን ለመሳብ አስችሏታል።

ያኔ የሎሚ ውርወራው፣ የከተራው ሽልምልም ዱላ አሁን አሁን በከፊል ሎሚው ወደ ፕሪም፣ ሽልምልሙ ዱላ ወደ ረዥም ቄጠማ (ጨፌ ላይ የሚበቅል) ተለውጦ መታየቱ፣ ከባህላዊ ጭፈራው በተጓዳኝ ወጣቱ በአመዛኙ ከመንፈሳዊ ማኅበራት (የሰንበት ትምህርት ቤቶች) መዘምራን ጋር ወደ ዝማሬ አዘንብሏል፡፡

በዓለም አቀፍ የፌስቲቫሎች መድበል፣ “የአፍሪካ ኤጲፋኒያ/ጥምቀት” (The African Epiphany) እየተባለ የጎንደሩ፣ የላሊበላው፣ የአዲስ አበባው… የጥምቀት አከባበር በዓለም የክብረ በዓላት (Festivals) ድርሳን ላይ በየጊዜው የሚተዋወቀው፣ ቱሪስቶችም እየመጡ የሚያደንቁት አንዳንዶችም ‹‹ጥምቀትን ለምን በቅርስነት አላስመዘገባችሁም?›› እያሉ ሠርክ መጠየቃቸው አልቀረም፡፡  የቅርስ ጥናትና ጥበቃ ባለሥልጣን ከኹለት ዓመት ወዲህ ትኩረት ሰጥቶ እየተንቀሳቀሰ ይገኛል፡፡

የጥምቀት በዓል በዩኔስኮ በግዙፍ ቅርስነት ከተመዘገቡት ከአኵስም፣ ከላሊበላ የጎንደሩ ፋሲል ግቢ ጋር በጥብቅ ተሳስሮ የሚከበር የማይዳሰስ ባህላዊ ቅርስ መኾኑ፣ እንዲሁም በዓሉ ከ1ሺሕ500 ዓመታት በላይ በተከታታይ የአገሪቱ ትውልዶችና ሥልጣኔዎች እየተከበረ ያለ ሕያው ቅርስ መኾኑ ይታወቃል፡፡

በዓሉ መቼ ይመዘገብ ይኾን?

ኢትዮጵያ እስከ አሁን ሦስት የማይዳሰሱ ቅርሶቿን (የመስቀል በዓል፣ ፊቼ ጫምባላላና የገዳ ሥርዓት) በዩኔስኮ አስመዝግባለች፡፡ የገዳ ሥርዓት በኅዳር 2009 ዓ.ም. አዲስ አበባ በተደረገው የዩኔስኮ ጉባኤ መመዝገቡ ይታወሳል፡፡

ዓምና ስምንት የአፍሪካ አገሮች፡- አልጀሪያ፣ ማላዊ፣ ቦትስዋና፣ አይቮሪኮስት፣ ግብፅ፣ ሞሮኮ፣ ናይጄሪያና ሞሪሸስ፣ ለዩኔስኮ የማይዳሰስ ባህላዊ ቅርሶቻቸው እንዲመዘገቡላቸው ቢያመለክቱም ዕድሉን ያገኙት ማላዊ፣ ኒስማ (Nsima, culinary tradition of Malawi) በሚባለው ባህላዊ ምግቧ፤ ሞሪሸስ ሙዚቃ፣ ዳንኪራና ዝማሬን ባካተተው ‹‹ሰጋ ታምቡር›› (Sega Tambour) በሚባለው ባህላዊ ሙዚቃዋ፤ አይቮሪኮስት ዛዑሊ በሚባለው የጉሮ ማኅበረሰብ ባህላዊ ሙዚቃና ዳንኪራ (Zaouli, popular music and dance of the Guro communities in Côte d’Ivoire) አማካይነት መኾኑን የዩኔስኮ ድረ ገጽ ያሳያል፡፡

ኢትዮጵያ፣ ለመወዳደር ያለፏትን ተከታታይ ዓመታት ዳግም እንዳያልፋት የምታደርገው፣ የጥምቀት በዓልን ለማስመዝገብ የሚያስችለውን ሰነዷን አዘጋጅታ እስከ መጋቢት 22 ቀን 2010 ዓ.ም. (ማርች 31 ቀን 2018) በፓሪስ ሰዓት አቆጣጠር እስከ እኩለ ሌሊት ስትልክ ብቻ ነው፡፡

ምንጭ፡- ሪፖርተር፣ ጥር 13 ቀን 2010 ዓ.ም.

የለገጣፎ ቅ/ዮሐንስ መቃኞ ነገ ይባረካል፤ በሊቀ ጳጳሱ፣ “ቅሩበ ሳሌም” ተባለ፤ ለሕንፃ ቤተ ክርስቲያኑ የድጋፍ ጥሪ ቀረበ

  • ለነገው ክብረ በዓል ዝግጅቱ ተጠናቋል፤ ጊዜያዊ መቃኞው ለቅዳሴ ብቻ ነው
  • ለሰፊ መቃኞ እና ለሕንፃ ቤተ ክርስቲያኑ ሥራ፣ የድጋፍ አካውንት ተከፈተ
  • በሥነ ሥርዐቱ፣ የሕንፃው ዕብነ መሠረት እንደሚቀመጥም ተጠቁሟል፤
  • የሞያም ልግስና ያሻል፤ ተጎራባቹ የፊ/ሪ አመዴ ልጅ ድርጅት ድጋፍ ተደነቀ
  • “ለሥራው ገንዘብ ብቻ ሳይኾን ሐሳብም የሚሰበሰብበት ቀን ነው”/አስተባባሪው/
  • በቅርቡ ልዩ ቤተክርስቲያን ሠርተን ቅዳሴ ቤቱን እናከብራለን”/ብፁዕነታቸው/

†††

  • በሚመደቡ ልኡካንና ሠራተኞች፣በሚቋቋሙ ኮሚቴዎች ጥንቃቄ ይደረግ ተባለ
  • መጠሪያው፡- ገዋሳ ቅሩበ ሳሌም መጥምቀ መለኰት ቅ/ዮሐንስ ቤተ ክርስቲያን
  • ቦታው በካሳ ምክንያት ተፈቅዶ ለሰላም ምክንያት ኾኗልና “ቅሩበ ሳሌም” ተባለ
  • ቦታውን በመፍቀድ የካሱት ከንቲባዋ፣“ካሰች”ተብለው በብፁዕነታቸው ተመሰገኑ
  • በዓለ ጥምቀቱን፣“እንደ ነባር ደብር ከሌሎች ጋራ አክብሮ በሰላም ተመልሷል፤”
  • ከሶማሌ የተፈናቀሉ 4አባወራዎችን በከተማው የማቋቋም ጥረት እየተሳተፈ ነው

†††

~~ የአነስተኛ ጊዜያዊ መቃኞ ሥራ ተፈጽሟል፤ ወደፊት ቤተ ልሔም በሚሠራበት በምሥራቅ አቅጣጫ ነው የተሠራው፤ ከባሕረ ጥምቀት መልስ እዚያ ነው የገባው ታቦተ ቅዱስ ዮሐንስ፤ ከድንኳን ይሻላል ማለት ቢቻልም ለመቀደስና ለመንበር ዑደት አገልግሎት እንዲመች ብቻ ነው፤ በብፁዕነታቸው በቅብዓ ሜሮን በሥርዐተ ጸሎት ተባርኮ ቅሩበ ሳሌም የሚለው ስያሜ በይፋ ይጸድቃል፤ የቅዳሴ ቤቱ መታሰቢያ ኾኖ ይከበራል፤ ከነገ በኋላ በአስቸኳይ ሰፋ ያለ መቃኞ ለመሥራት እንቅስቃሴ ይደረጋል፤ እስከ ትልቁ ሕንፃ ቤተ ክርስቲያን መዳረሻ ያገለግላል፤ የአኹኗ ለመቀደስ ያህል እንጅ ለሰዓታት እና ለማሕሌት አትበቃም፤ ማሕሌቱ፣ ሰዓታቱና ጥምቀተ ክርስትናው ከመቃኞዋ ጋራ በተያያዘ ዳስ ውስጥ ሲከናወን ነው የሚቆየው፤
 
~~ ብፁዕነታቸው፣ ከወረዳ ቤተ ክህነቱ የሥራ ሓላፊዎችና ካህናት አባቶች ጋራ ከተማከሩ በኋላ የቦታውን ስምቅሩበ ሳሌም ብለውታል፤ ይህም ስያሜ በመጀመሪያ መጥምቀ መለኰት ቅዱስ ዮሐንስን ይነካል፤ በሳሌም አቅራቢያ በሄኖን ያጠምቅ እንደነበር በወንጌል የተጻፈውን ያወሳል፤ በኹለተኛ ደረጃ፥ሳሌም ሰላም ማለት ነው፤ ቦታው በካሳ ምክንያት መፈቀዱ ለሰላም ምክንያት ኾኗል፤ ከተለያየ አመለካከት ወደ አንድ እንድንመጣ ምክንያት ኾኖናል፤ “ቅሩበ ሳሌም” – ለሰላም ቅርብ ኾነናል፤ በሚለው ምስጢርም ሰላምን ያገኘንበት፣ ልዩነትን ያስወገድንበት ነው፤ ሲሉ ብፁዕነታቸው ይህን ስያሜ መርጠዋል፤ ስያሜው መጽናቱን ብፁዕነታቸው ለካህናቱና ለወረዳ ቤተ ክህነቱ የሥራ ሓላፊዎች ገልጸውላቸዋል፤ ስለዚህም ቅሩበ ሳሌም መጥምቀ መለኰት ቅዱስ ዮሐንስ ቤተ ክርስቲያን ተብሎ ተሰይሟል፤ በዚህም ይጠራል፤
 
~~ ትላንት ከምስካበ ቅዱሳን አባ ኪሮስ፣ ከቅዱስ ሚካኤል እና እዚያ አካባቢ ካሉ አጥቢያ አብያተ ክርሰቲያናት ጋራ እንደ ነባር ደብር ታጅቦ ባሕረ ጥምቀተ አደረ፤ ዋለ፤ ባሕረ ጥምቀቱ ወደ ለገጣፎ ሪል ስቴቱ አካባቢ ነው፤ አባ ኪሮስን ያነገሠ ሕዝብ ኹሉ አንድ ሳይቀር፣ በይበልጥም በአባ ኪሮሱ አስተዳዳሪ በአባ ጴጥሮስ ገለጻ አድራጊነት፣ የአባ ኪሮስን ታቦት አስገብተው ጠቅላላው ሕዝቡና ካህናቱ፣ “ዐዲሱን ታቦታችንን” ብለው በልዩ ድምቀት ለብቻ አስገብተው ነው የተመለሱት፤
 
~~ ቤተ ክርስቲያን፣ ከሱማሌ ክልል ተፈናቅለው ለመጡና በለገጣፎ ለሚገኙ 4 አባወራዎች መኖሪያ ቤት ሠርታ ለማቋቋም ቃል መግባቷን ብፁዕነታቸው ለአዲስ አድማስ ገልጸዋል፡፡ ታቦቱ ከፖሊስ መምሪያ በመጣበት ዕለት በነበረው ቅስቀሳ ላይ፣ ለሁለት ነገር ነበር ድጋፍ የተጠየቀው፤ ከሶማሌ ክልል ለተፈነቀሉ በክብረ በዓሉ ላይ አስተዋፅኦ ሰብስቡ ተብሎ ከበላይ አካል ተጠይቆ ነበር፤ ብፁዕ አባታችን፣ “ለኹለቱም አዋጡ፤ ኹለቱም ተፈናቃይ ናቸው፤” ብለዋል፤ ሕዝባችን መቸገር፣ መራብ፣ መጠማት የለበትም፤ ከተራና ጥምቀትን ለተፈናቀሉት ግማሹን፣ ግማሹን ለቅዱስ ዮሐንስ፤ የቅዱስ ሚካኤልና ቃና ዘገሊላ ዕለትም እንደዚያው፤ ከነገ ጀምሮ ግን ገቢው ለቅዱስ ዮሐንስ ቤተ ክርስቲያን እንዲኾን ብለው መመሪያ ሰጥተው ነበር፤ ወረዳ ቤተ ክህነቱ እኩል እኩል እንዲካፈሉ ነው ያደረገው፤ ጥላ ዞሮ የተሰበሰበው ለቅዱስ ዮሐንስ፣ በምንጣፍ የተሰበሰበው ለተፈናቃዮች እንዲኾን አድርጓል፤
 
~~ ለመጀመር ያህል ግን ብፁዕነታቸው ከአንድ ለጋሽ ያገኙትን 13ሺሕ 500 ብር እዚያው አበርክተዋል፤ ምእመኑ ከዚያ ላይ ተነሥቶ እየተረባረበ መመጽወት ጀመሯል፤ ብፁዕነታቸውም፣ “ከውጭም ከሀገር ውስጥም ተባብረን በአጭር ጊዜ ልዩ ቤተ ክርስቲያን እንሠራለን፤ ልጆቼ በርቱ፤” ብለው ምእመናኑን አበረታተዋል፤ አንድ ምእመን ለቅዱስ ዮሐንስ ብለው ጥር 10 እና 11 ቀን ለብቻቸው ባዞሩት ጥላ፣ 13ሺ ብር ማስገባታቸው ተገልጿል፤ ምእመኑና በጎ አድራጊዎች ለቦታው መስፋፋት አስተዋፅኦ ለማድረግ በከፍተኛ ደረጃ መዘጋጀታቸውን ያሳያል፤ “በጥላ አንድ ሺሕ ብርም ብዙ ነው፤” ያሉ አስተያየት ሰጪ፣ የአሰባሳቢውንም የሰጪዎቹንም ተነሣሽነት ያስረዳል፤ ይላሉ፡፡ ሕዝቡ ቤተ ክርስቲያኑን ለመሥራት በመጣም ተነሣስቷል፤ በዚህ መልኩ ከነገ ጀምሮ በተለያየ አቅጣጫ የሚመጣው ገቢ በአግባቡ ተቆጥሮ መመዝገብና መያዝ አለበት፤ መነሣቱ፣ መነቃቃቱ በጣም ልዩ ነው፤
 
~~ ቦታው ገናና ኾኗል፤ ጠበልም አካባቢው ላይ እንዳለ ይታወቃል፤ ተኣምራት የሚደረግበት ቦታ ነው የሚኾነው፤ ሀገረ ስብከቱ የሚሾመው አስተዳዳሪ፣ የሚመድባቸው ልኡካንና የጽ/ቤት ሠራተኞች እንዲሁም የሚቋቋሙ የሕንፃ አሠሪና የልማት ኮሚቴዎች፣ የምእመናኑ ተስፋ ለመፈጸም የሚበቁና የሚችሉ እንዲኾኑ ጥንቃቄ ማድረግ አለበት፤ የግል ጥቅምን ከማካበት የራቁ ቀልጣፋ፣ ትጉሃንና ታማኞች አገልጋዮች መኾን አለባቸው፤ ምእመኑ ገና ከወዲሁ የሚመጣልን አባትና አገልጋይ ማን ይኾን? ብሎ መጠየቅ ጀምሯል፡፡ ቦታው ላይ ከነበሩት ካህናት የሸሹ፣ ሌሎች ሥራዎችን ደርበው የሚሠሩ አሉ፤ ዳግም ወደ መዋቅር ለማስገባት የጽ/ቤቱንና የመቅደሱን ሥራ ራሱን ችሎ እንደ ዐዲስ የሚያደራጁ ካህናትና ሠራተኞች ያስፈልጋሉ፤
 
~~ አኹን ለጊዜው የሕንፃ አሠሪ ኮሚቴ ይቋቋማል፤ አስተዳዳሪ በቋሚነት እስኪመደብና ሰበካ ጉባኤ እስኪመረጥ ድረስ ኮሚቴው በወረዳ ቤተ ክህነቱ የቅርብ ክትትል ይመራል፤ እስከዚያው ሁለት ተወካዮች ይንቀሳቀሳሉ፤ የወረዳ ቤተ ክህነቱ ሥራ አስኪያጅ የበላይ ኾነው ይከታተላሉ፤ የባንክ ሒሳቡ በኹለቱ ሰዎች ስም ወጥቷል፤ የተከፈተው በኢትዮጵያ ንግድ ባንክ ኾኖ ለለገጣፎ ለገዳዲ ገዋሳ ቅሩበ ሳሌም መጥምቀ መለኰት ቅዱስ ዮሐንስ ቤተ ክርስቲያን፤ በሚል ነው የባንክ ሒሳብ ቁጥሩ፤
 
ገዋሳ ቅዱስ ዮሐንስ ቤተ ክርስቲያን
የኢትዮጵያ ንግድ ባንክ
የሒሳብ ቁጥር፡-1000233872893
~~ 3ሺሕ ካሬ የተባለው ዋናው የቤተ ክርስቲያን ይዞታ እንደተጠበቀ ኾኖ ተዳፋታማ/ገደላማ ቦታና የጨረቃ ቤቶች የሚነሡበት ተስፋ አለ፤ እነርሱ ሲካተቱ በትክክል ዐሥር ሺሕ ይሞላል፤ ሳይት ፕላኑ ላይ ተካቷል፤ በመግቢያው ላይ የፊታውራሪ አመዴ ለማ ልጅ፣ የከብት ርባታ ኢንቨስትመንት አለው፤ ታቦቱና ሕዝቡ በእዚያ በርና ግቢ አልፎ ነው የዘለቀው፤ እምነታቸው ሌላ ቢኾንም እስከ አሁን በሚደረገው ሥነ ሥርዐት ቅሬታ አላሳየም፤
 
ከብፁዕ አቡነ ቀውስጦስ አንደበት፡-
 
~~ ታቦቱ ከፖሊስ መምሪያው በክብር ወጥቶ ከተፈቀደለት ዐዲሱ ሥፍራ ሲደርስ፣ ብፁዕ አቡነ ቀውስጦስ፣ “ዛቲ ዕለት እንተ ገብረ እግዚአብሔር” የሚለውን ከቅዱስ ዳዊት መዝሙር መነሻ አድርገው በጥዑም እና እንባ በሚተናነቀው አንደበታቸው፣ “ያለፈቃድ ነው የተተከለው” ተብሎ የፈረሰው ቤተ ክርስቲያን ከሰባት ወራት በኋላ ዛሬ ወደተፈቀደለት ምቹና ሰፊ ቦታ ሲገባ፣ ደስታው ዕድሜን የሚጨምር ነው፤ በማለት የተሰማቸውን ገልጸዋል፡፡ እንዲህ ብለዋል፡-
 
“በዚህ ቀን በመሪዎችና በተመሪዎች መካከል፣ ዲያቢሎስ የፈጠረው እልክ የተወገደበት፤ በምትኩ ሰላም ፍቅር አንድነት ትክክለኛ ፍትሕ የተገኘበት የሰላም ቀን የፍጹም ደስታ ቀን ነው፤ እግዚአብሔር ቸር ነው፤ መዓት አስመስሎ ነበር ያመጣው፤ ታቦት ሲወረወር፣ ቤተ ክርስቲያን ሲፈርስ መዓት ነው፤ ኤልያስ ንግሥቲቱ ስታሳድደው ተበሳጭቶ፣ “እምኵሉሰ መከራ ንስኣ ለነፍስየ፤ ጌታዬ፥ አሁንስ አይበቃኝም፤ ከዚህ ኹሉ መከራ ነፍሴን ከሥጋዬ ለያት” እንዳለው እኔም እግዚአብሔር ሆይ፣ አንተ እያለህ በዚህ ዘመን ይህን ኹሉ መከራ ማየት ይገባኛል? ምናለ፣ ይበቃኛል እኔም፤ ነፍሴን ከሥጋዬ ለያት፤ ነበር ያልኩት፡፡ እርሱ ግን፣ ተው እንዲህ አትበል፤ በዕድሜ ላይ ዕድሜ ጨምሬ ጸጋዬን አሳየሃለሁ አለኝ፤ አሳየኝ!
 
የተሰጠን ቦታም ለአቅመ ደካሞች የተመቸና ከበፊቱ የተሻለ ነው፤ በወቅቱ በመፍረሱ ብንበሳጭም ፈቃደ እግዚአብሔር ነው ብለን እንቀበለው፤ በአጠቃላይ የእግዚአብሔር ድንቅ ሥራ ነው፤ እዚያ ወንዝ ውስጥ የነበረን ይዞታ 1000 ካሬ ሜትር ብቻ ነበር፤ አሁን ግን 3ሺሕ ካሬ ሜትር በመንግሥት ተፈቅዶ በመሰጠቱ በጣም ደስ ብሎኛል፤
 
~~ ካሳ የሚኾን ከ3ሺሕ ካሬ ሜትር በላይ ምቹ ቦታ እንዲሰጥ አስተዋፅኦ ላደረጉ ከክልሉ መንግሥት እስከ ከተማው ከንቲባ ጽ/ቤት ድረስ የሚገኙትን የመንግሥት ሓላፊዎች ያመሰገኑ ሲኾን፣ እንዲሁም በጽናትና በትዕግሥት ኹኔታውን ሲከታተሉና ሲያስፈጽሙ የነበሩትን ካህናትና ምእመናን አመስግነዋል፤በጥምቀት በዓል ማግሥት የቤተ ክርስቲያኑ ህንፃ የመሠረት ድንጋይ እንደሚጣልም ጠቁመዋል፡-
 
የትዕግሥታችሁን ፍሬ ጣዕም ቀመሳችሁት ዛሬ፤ በቅርብ ጊዜ ልዩ ቤተ ክርስቲያን ሠርተን ቅዳሴ ቤቱን እናከብራለን፤ እንኳን ደስ አላችሁ፤ ተባረኩ፤ እናንተ በምክረ ካህን በፈቃደ ካህን የምትሔዱ፣ የአባታችሁን ቃል የምትሰሙ፣ የምመካባችሁ ጥሩ ኦርቶዶክሳውያን ምእመናን ናችሁ፤ መርቄአችኋለሁ፤ ጸጋውን ያብዛላችሁ፡፡ ያለፈው ነገር ኹሉ ለበጎ ነው ብለን እግዚአብሔርን በማመስገን ኹላችንም ተረባርበን ሰፊና ለአገልግሎት አመቺ ቤተ ክርስቲያን ለማነፅ በአንድነት መትጋት ይገባናል፤ብለዋል፤
 
~~ ብፁዕ አባታችን ከንቲባዋን በዐደባባይ አመስግነዋታል፤ የተሻለ ቦታ በመስጠት ችግሩን ስለፈታች “ካሰች” ብለዋታል፤ “ካሰች” ብዬሻለሁ ብለዋታል፤ መልካም ግብሯን ለመግለጥ ነው፤ በካርታው ርክክብ ዕለት በቢሮዋ ሲያስረዷት፣ ሐረር እያለሁ ከዘመዶችሽ በፍቅር ነበር የቆየሁት፤ ብለው ብዙ ታሪክ ነግረዋት ነበር፤ እርሷም የሐረሩን ታሪክ አውቃለሁ፤ አንዳንድ ካህናት ነን ያሉ ግለሰቦች፣ “ርምጃሽ ትክክለኛ ነው፤ እዚህ አባ ኪሮስ አለ፤ ኪዳነ ምሕረት አለች፤ ሌሎችም አብያተ ክርስቲያናት አሉ፤ ቤተ ክርስቲያን በዝቷል፤ ሕገ ወጥ ነው፤ ትክክለኛ ርምጃ ነው የወሰድሽው፤” ብለው ቢሮዬ ድረስ መጥተው አስረድተውኝ ነበር፡፡ እርስዎን ቅድሚያ አለማግኘቴ ነው እንጅ ጉዳዩ እዚህ ደረጃ አይደርስም ነበር፤ ያለመጠያየቃችን ነው እንጅ ብላ ቁጭቷን ገልጻለች፤ ከከንቲባዋ ጋር ተነጋግረው ፍፁም እርቅ አውርደዋል፤
 
~~ በቀጣይ ሕዝቡ፤ በሃይማኖቱ ጸንቶ ወደፊት ነው መቀጠል ያለበት፤ መብቱን ለማስከበር ሃይማኖቱን ለመጠበቅ፤ የቤተ ክርስቲያን አመራር ቢኖር ኖሮ ይህ ኹሉ ጥፋት፣ ይህ ኹሉ መንከራተት፣ ይህ ኹሉ መናቅ አይኖርም ነበር፤ በዚህ በኩል ብዙዎችን ታዝቤያለሁ፤ ደብዳቤ ይጻፍልኝ ስል ተጽፎልኛል፤ ግን በቂ አይደለም፤ በዚህስ ሳላመሰግናቸው የማላልፈው ብፁዕ ወቅዱስ አቡነ ጳውሎስን ነው፤ በቤተ ክርስቲያን ዙሪያ ለሚፈጠሩ ችግሮች ቤተ ክርስቲያን ልትናገር የሚገባትን በግልጽ ነው የሚናገሩት፤ ይከራከራሉም፤ ያሳምናሉም፤ በዚህ ሒደት እኮ ሕዝብንና መንግሥትን ሊያጣላ ነው፤ እየተባልኩ ብዙ ተብዬአለሁ፤ አርፎ አይቀመጥም ወይ፤ መንግሥትን እኮ እያስቸገሩ ነው፤ ይሉኝ ነበር፤ በአጠቃላይ የእግዚአብሔር ድንቅ ሥራ ነው፤ እዚያ ወንዝ ውስጥ የነበረን ይዞታ 1000 ካሬ ሜትር ብቻ ነበር፤ አሁን ግን 3ሺሕ ካሬ ሜትር በመንግሥት ተፈቅዶ በመሰጠቱ በጣም ደስ ብሎኛል፤ ሕዝቡንም አመሰግናለሁ::
 
የምእመናኑ እና የወረዳ ቤተ ክህነቱ ሓላፊዎች፡-
 
~~ ምእመናኑም በአጭር ጊዜ ውስጥ መጠነኛ መቃኞ እንደሚሠሩ በመግለጽ ደብሩን በሒደት እንደሚያስፋፉ አስታውቀዋል፡፡ ከቀድሞው ጀምሮ ጉዳዩን የተከታተሉና በስፍራው የነበሩ ምእመናን ለኢኦተቤ ቴቪ እንደሚከተለው ደስታቸውን ገልጸዋል፡-
 
የቅዱስ ዮሐንስ ቤተ ክርስቲያን ከሚፈርስ የእኔ ቤት ለምን አልደረሰም ብዬ አልቅሻለሁ፤ ምክንያቱም የእኔ ቤት የአንድ ሰው ቤት ነው፤ የትም ሔጄ ሠርቼ መኖር እችላለሁ፤ ቤተ ክርስቲያኑ ግን የኹሉም ኦርቶዶክሳውያን ቤት ስለኾነ በጣም አልቅሼ አዝኜ ነበር፤ እንባዬን እግዚአብሔር አብሶልኛል፤ በጣም ደስ ብሎኛል፤ ከዚያን ጊዜ ጀምሮ እንዳዘንን እንዳለቀስን ነበር፤ መቼም እግዚአብሔር እንደ ሰው አይቸኩልም ግን የሚቀድመው የለም፤
 
ደስ በሚል ኹኔታ ወደ ቦታው ተመልሶ የከተማው መስተዳድሩም መልካም ፈቃዱ ኾኖ የክልሉ መንግሥትም ጉዳዩን በትኩረት አይቶት ሕዝብን ከማገልገል፣ ፍላጎትን ከማሟላት አንጻር ዛሬ እንባችንን አብሶልናል፤ ደስታን አጎናጽፎናል፤ በእውነት ኹሉንም ባለሥልጣናት ከልቤ አመሰግናለሁ፤ በእውነቱ ከተወለድኩ እኔ እንደዛሬ ተደስቼ አላውቅም፤ ከአኹን ደቂቃ ጀምሮ ብሞት ምንም አይቆጨኝም፤
 
~~ በስፍራው የተገኙት የወረዳ ቤተ ክህነቱ ሥራ አስኪያጅ እና ምእመናን፣ ስለተደረገው ነገር እግዚአብሔርን በማመስገን በሒደቱ ኹሉ አስተዋፅኦ ላደረጉት ምእመናን ምስጋና አቅርበዋል
 
ለስምንት ወራት ያክል ስንደክም፣ ስንወጣ ስንወርድ የቆየንበት ጉዳይ ዛሬ ፍሬያማ ኾኖ ይህን የመሰለ ቦታ አግኝተን ታቦተ ሕጉን አምጥተን ስናሳርፍ ከዚህ የበለጠ ደስታ የለም፤ በእውነት በጣም አዝነን ነበር፤ ብፁዕ አባታችንም አዝነዋል፤ ስንወጣ፣ ስንወርድ ብዙ ቆይተናል፤ በትዕግሥት በጽናት እስከ አኹኗ ድረስ ጠብቀን ይኸው በዛሬው ዕለት ይኼን የመሰለ ደስታ ልናይ በቅተናል፤ እግዚአብሔር የተመሰገነ ይኹን ነው የምለው፤
 
በእኛ ሐሳብ፣ በእኛ ጥረት፣ በእኛ ጉልበት ብቻ የሚኾን ነገር የለም፤ እግዚአብሔር በፈቀደበት ቀን፣ እግዚአብሔር በወሰነበት ቀን ሥራውን በዛሬው ዕለት ሠርቷል፤ ከምንም በላይ ብፁዕ አባታችን አቡነ ቀውስጦስ ከልብ ማመስገን እፈልጋለሁ፤ ደከመኝ ሰለቸኝ ሳይሉ ከእኛ ጋራ ሲወጡ ሲወርዱ ሲንከራተቱ የነበሩ አባት ናቸው፤ እነኾ ደግሞ ከትላንት ጀምሮ በአካል ተገኝተው አልተለዩም፤ ለዚህ እንድንበቃ ዋናው አስተዋፅኦ የብፁዕነታቸው ነውና በዕድሜ በጸጋ ይጠብቅልን ነው የምንለው፡፡ ከዚያ በመቀጠል የወረዳ ቤተ ክህነቱ ከሰንዳፋ ጀምሮ ሲመላለሱ ለነበሩ ወንድሞቻችን፣ ለአካባቢው ምእመናን እንኳን ደስ አላችሁ ነው፤ የምለው፡፡ 3ሺሕ ካሬ ሜትር እንድናገኝ፣ ቤተ ክርስቲያኑን ሠርተን እንድንገለገልበት አድርጎ ለሰጠን ለለገጣፎ ለገዳዲ ከተማ አስተዳደር ልባዊ ምስጋናዬን አቀርባለሁ፤
 
ቤተ ክርስቲያኑ በሕገ ወጥ መንገድ ሲፈርስ ኹሉም ሰው ኢካቦድ ያለበት ዘመን ነበር፤ የእግዚአብሔር ክብር ጎድሏል፤ የእግዚአብሔር ክብር ቀንሷል፤ የተባለበት ጊዜ ነበር፤ “ቅቤ ሲገፋ ነው” እንደሚባለው፣ ቀድሞ ጉድጓድ ከነበረው ቦታ ፈቃደ እግዚአብሔር ኾኖ በዛሬው ቀን ከፍ ወዳለ ቦታ የእግዚአብሔር ክብር የታየበት ኾኗል፤ ይህችን ቀን በጤና ጠብቆ ላሳየን እግዚአብሔር ክብር ምስጋና ይግባው፡፡ ደከመኝ ሰለቸኝ ሳይሉ ከወጣቶች፣ ምእመናን ጋራ ሲወጡ ሲወርዱ የነበሩት የሰሜን ምዕራብ ሸዋ ሰላሌ ሀገረ ስብከት ሊቀ ጳጳስ ብፁዕ አቡነ ቀውስጦስና ለዚህ አገልግሎት ዋጋ የከፈሉ ኹሉም ምእመናን ሊመሰገኑ ይገባቸዋል፤ ጥሩ ምላሽ የሰጡንን የክልሉን ባለሥልጣናትም አመሰግናለሁ፡፡

የጃንሜዳ ባሕረ ጥምቀት ዕጣ ፈንታ ቤተ ክርስቲያኒቱን አሳስቧል

 

26904361_1787817367916798_7420253898425600329_n

  • “በኮንስትራክሽኖች ሳቢያ ታሪካዊነቱን በሚያሳዝን መልኩ እያጣ ነው፤”
  • ቅ/ሲኖዶስ የጃንሜዳን ጉዳይ በቋሚነት የሚከታተል ኮሚቴ አቋቁሟል፤
  • “የጥምቀት በዓልን በዩኔስኮ ለማስመዝገብ የመጨረሻ ዝግጅት ተጠናቋል፤”

/የጠቅላይ ጽ/ቤቱ ቅርስ መምሪያ ዋና ሓላፊ/

(ዓለማየሁ አንበሴ፤ አዲስ አድማስ፤ ቅዳሜ ጥር ፲፪ ቀን ፳፻፲ ዓ.ም.)

JanMeda Behre Timket

የጥምቀት በዓልን በዩኔስኮ ለማስመዝገብ አስፈላጊ መረጃዎችን በሙሉ ለቅርስ ጥናትና ጥበቃ ባለሥልጣን ማስረከቧን የኢትዮጵያ ኦርቶዶክስ ተዋሕዶ ቤተ ክርስቲያን የገለጸች ሲኾን፤ በሌላ በኩል፣ በአዲስ አበባ በዓሉ በዋናነት የሚከበርበት የጃንሜዳ ባሕረ ጥምቀት ዕጣ ፈንታ እንደሚያሳስባት አስታውቃለች፡፡

የጥምቀትን በዓል በዩኔስኮ ለማስመዝገብ ባለፈው ዓመት እንቅስቃሴ መጀመሩን ያስታወሱት የመንበረ ፓትርያርክ ጠቅላይ ቤተ ክህነት የቅርስ ጥበቃ ቤተ መጻሕፍትና ቤተ መዘክር ዋና ሓላፊ መጋቤ ሰላም ቀሲስ ሰሎሞን ቶልቻ፤ የጥምቀት በዓል አከባበር ታሪካዊ አመጣጥን፣ በየዘመናቱ ያሳለፈውን ሒደትና ለሀገር ያበረከተውን አስተዋፅኦ ያካተተ በአማርኛ እና በእንግሊዝኛ የተጻፈ ሙሉ ሰነድ፣ ቤተ ክርስቲያኒቱ አዘጋጅታ ሰሞኑን ለቅርስ ጥናትና ጥበቃ ባለስልጣን ማስረከቧን ለአዲስ አድማስ አስታውቀዋል፡፡

የበዓሉን አከባበር ገጽታ የሚያሳዩ የምስል ወድምፅ ትዕይንት፥ ከአኵስም፣ ከጎንደር፣ ከላሊበላና ከጃንሜዳ ተሰብስበው ለሚመለከተው አካል መቅረባቸውን የጠቆሙት መጋቤ ሰላም ቀሲስ ሰሎሞን፤ በተጨማሪም ከተለያዩ የኅብረተሰቡ ክፍሎች የተሰባሰበ የ300 ሰዎች ፊርማ መቅረቡንም አውስተዋል፡፡ ሰነዶቹን፣ በመጪው መጋቢት ወር ዩኔስኮ በሚያደርገው ስብሰባ ላይ ጉዳዩ የሚመለከተው የባህልና ቱሪዝም ሚኒስቴር ያቀርባል ተብሎ እንደሚጠበቅም ዋና ሓላፊው ጠቁመዋል፡፡

የጥምቀት በዓል በዩኔስኮ ከተመዘገበ፣ ዓለም አቀፍ ጥበቃ ይኖረዋል፤ የቱሪስት ፍሰቱም ስለሚጨምር ለሀገሪቱ ከፍተኛ ገቢ ያስገኛል፤ ተብሏል፡፡

በሌላ በኩል፣ የጥምቀት በዓል የሚከበርባቸውን ታሪካዊ ቦታዎች እኩል ጠብቆ ማቆየት እንደሚገባ የጠቆሙት ቀሲስ ሰሎሞን፤ አንዳንድ አህጉረ ስብከት ቦታዎቹን ባለበት ለማቆየት፣ በይዞታው ላይ ቤተ ክርስቲያን መገንባት መጀመራቸውን ጠቅሰው፣ በአገር አቀፍ ደረጃ በዓሉ በዋናነት የሚከበርበት የጃንሜዳ ባሕረ ጥምቀት ጉዳይ ግን አሳሳቢ መኾኑን አስታውቀዋል፡፡

“ጃንሜዳ ታሪካዊነቱን በሚያሳዝን መልኩ እያጣ ነው፤” ያሉት ቀሲስ ሰሎሞን፤ “ከነገሥታቱ ዘመን ጀምሮ የከተራ እና የጥምቀት በዓል አከባበርን ጨምሮ በየመንግሥታቱ በርካታ ታሪካዊ ክንውኖችን ማሳለፉን አስታውሰው፣ ቦታው በራሱ በቅርስነት ሊያዝ ሲገባው፣ ተቆነጣጥሮ ሜዳነቱን አጥቷል፤” ሲሉ ስጋታቸውን ገልጸዋል፡፡

ጃንሜዳ፣ በኮንስትራክሽኖች ሳቢያ እየጠበበ መምጣቱ ለቤተ ክርስቲያኒቱ እጅግ እንደሚያሳስባት የጠቆሙት ዋና ሓላፊው፤ ቅዱስ ሲኖዶስም ከኹኔታው አሳሳቢነት የተነሳ የጃንሜዳን ጉዳይ በቋሚነት የሚከታተል ኮሚቴ አቋቁሟል፤ ብለዋል፡፡ “ጃንሜዳ የአዲስ አበባ ብሎም የሀገሪቱ ታሪካዊ ቅርስ ነው፤” ያሉት ቀሲስ ሰሎሞን፤ በግንባታዎች ሳቢያ እየተሸራረፈ ይዞታው ማነሱ በበዓል አከባበሩ ላይ አሉታዊ ተጽዕኖ እያሳረፈ መኾኑን በመጠቆም፣ መንግሥት በጉዳዩ ላይ በጽኑ ሊያስብበት እንደሚገባ አሳስበዋል፡፡

በዓለ ጥምቀት እና አዲሱ ትውልድ

  • ዐዲሱ ትውልድ፥ በሥልጣኔ፣ በዘመናዊ ቴክኖሎጂ፣ በጠንካራ ክርክርና ምክንያታዊ በኾነ አስተሳሰብ የሚመራ፣ በዘመኑ ሉላዊነት በዚህም በዚያም ጎታችና ጎትጓች በበዛበት ኹኔታ ውስጥ ኑሮውን የሚመራ ቢኾንም፤ ሃይማኖቱን፣ ሥርዐቱንና ትውፊቱን ጠብቆ ቀደምት አባቶቹ ሲያከብሩ የኖሩትን የጥምቀት በዓል ከመቹውም ጊዜ በተሻለና ባማረ መልኩ እንዲከበር የሚያሳየው ትጋትና ጥረት የሚያስመሰግነው ነው፡፡

 

  • ከብዙ ዓለማዊ ተግዳሮቶችና ፈተናዎች መሀል ራሱን አውጥቶ፣ በመንፈሳዊ ቀናዒነት ለሃይማኖታዊ በዓላት በድምቀት መከበር ጊዜውን፣ ጉልበቱን፣ ገንዘቡንና ዕውቀቱን በመለገስ በተለይ የጥምቀት በዓላችን ተናፋቂና ተወዳጅ እንዲኾን ያደረገው፤ በዘላቂነትም የበለጠ ሥራ ለመሥራት በመንቀሳቀስ ላይ ያለው ዐዲሱ ትውልድ በቤተ ክርስቲያን በኩል ተገቢው ድጋፍና ክትትል ሊደረግለት ይገባል፡፡

†††

/ሊቀ ሥዩማን እስክንድር ገብረ ክርስቶስ/

ጥምቀት ወደ እግዚአብሔር መንግሥት ለመግባት እና የእግዚአብሔር ልጅ ለመኾን ከመንፈስ ቅዱስ የምንወለድበት ታላቅ ምስጢር ነው፡፡… ጌታችን መድኃኒታችን ኢየሱስ ክርስቶስ በእደ ዮሐንስ ሊጠመቅ ወደ ባሕረ ዮርዳኖስ ሲገባ ባሕር አይታ ሸሽታለች፤ ዮርዳኖስም ወደኋላው ተመልሶአል፤ ተራሮችም እንደ ጊደሮች ዘለዋል፤ ጌታም ተጠምቆ ከውኃው ሲወጣ፡- ሰማይ ተከፍቷል፤ መንፈስ ቅዱስም በአምሳለ ርግብ በራሱ ላይ አርፎበታል፤ እግዚአብሔር አብም፥ “የምወደው የምወልደው ልጄ ይህ ነውና እርሱን ስሙት፤” በማለት በደመና ድምፅ አሰምቷል፡፡

በዚህም አምላካዊ ሥራው፡- ጌታችን መድኃኒታችን ኢየሱስ ክርስቶስ በጥምቀቱ ውኃውን ለእኛ ባርኮና ቀድሶ መስጠቱ፤ ጠላት ዲያቢሎስ በዮርዳኖስ ቀብሮት የነበረውን የዕዳ ደብዳቤ መደምሰሱና የሰው ልጅ ከውኃና ከመንፈስ ቅዱስ ካልተወለደ በቀር ወደ እግዚአብሔር መንግሥት ሊገባ እንደማይችል ማሳየቱ መኾኑን እያሰብን የጥምቀትን በዓል እናከብራለን፡፡

ተቀደሰት ማይ በጥምቀቱ

ይህን መነሻ በማድረግም፣ የኢትዮጵያ ኦርቶዶክስ ተዋሕዶ ቤተ ክርስቲያን፣ በታላቅ ሃይማኖታዊ ሥነ ሥርዐት የጥምቀትን በዓል ታከብራለች፡፡ የጥምቀት በዓል፥ ታቦታት ከመንበራቸው ወጥተው በወንዝ ዳር ወይም ለበዓሉ ተብሎ ወደተዘጋጀው ባሕረ ጥምቀት በመጓዝ የአከባበሩ ሥነ ሥርዐት የሚከናወን ሲኾን፤ በዓሉም ከአኃት አብያተ ክርስቲያናት መካከል በኢትዮጵያ ኦርቶዶክስ ተዋሕዶ ቤተ ክርስቲያን ብቻ ሕዝብ በዐደባባይ ተሰብስቦ የሚያከብረው ታላቅ በዓል መኾኑ ይታወቃል፡፡

ይህ የቤተ ክርስቲያናችን ተወዳጅ በዓል በኢትዮጵያ ሲከበር፥ አባቶችና እናቶች፣ ወጣት ወንዶችና ሴቶች ሕፃናቱም አምረውና ደምቀው የሚታዩበት፣ ለታቦታቱ ክብርና ለበዓሉ ድምቀት አስቀድመው በመዘጋጀት በደስታና በሆታ የሚያከብሩበት፤ ያለው አዲስ ገዝቶ የሌለው ያለውን በሚገባ አጽድቶ፣ አምሮና ደምቆ የሚታይበት፤ “ለጥምቀት ያልኾነ ቀሚስ ይበጣጠስ” የሚለው ብሂል በተግባር የሚገለጽበት ፍጹም ሃይማኖታዊ በዓል ነው፡፡

26733752_946979415451931_8138481050151677625_n

በዚህ ታላቅ በዓል ላይ በየዘመናቱ የነበሩ ወጣቶች እንደ ዘመኑ ኹኔታ በዓሉን ለማድመቅና ለማክበር ከሚያደርጉት እንቅስቃሴ በተጨማሪ፣ ታቦታቱን በማጀብ በሆታና በእልልታ ወደ ባሕረ ጥምቀት የሚደረገውን ጉዞ በማድመቅ፣ ከከተራ እስከ ቃና ዘገሊላ ታቦታቱ የሚያድሩበትን ድንኳን በማዘጋጀት፣ ሕዝበ ክርስቲያኑን በማስተናገድና በማስተናበር በአጠቃላይ በዓሉ ፍጹም ባማረና በደመቀ መልኩ እንዲከበር የሚያደርጉት ጥረት እንደ ጊዜው ተጨባጭ ኹኔታ እየተጠናከረና እያማረ መጥቷል፡፡

በመላው ሀገሪቱ በታላቅ ድምቀት የሚከበር በዓል ከመኾኑ ጋራ በተያያዘ፣ በገጠር ያሉ ወጣቶችም፣ ፍጹም ሃይማኖታዊ ሥርዐትን በተላበሰ መልኩ እንዲከበር ለማድረግ ታቦታቱ ከመንበረ ክብራቸው ወጥተው እስከሚመለሱ ድረስ መንፈሳዊ መዝሙሮችን በመዘመር፤ ከዚያም በኋላ ሌሎች ባህላዊ ጭፈራዎችንና ጨዋታዎችን እንደየአካባቢያቸው ወግ በማቅረብ በደስታ እንደሚያሳልፉና በዚህ ወቅትም ወጣቶች የሚተጫጩበት ዕድል እንደሚፈጠር ይታወቃል፡፡

በከተሞችም የክት በመልበስ እንደየአካባቢው የአለባበስና የባህላዊ ጨዋታ ሥርዐት አምረውና ደምቀው የሚታዩበት በአጠቃላይ ኢትዮጵያዊ ባህል፣ ወግና ሥርዐት በአንድ ሥፍራ ተካቶ የሚታይበት በዓል ነው ቢባል ማጋነን አይኾንም፡፡ ኹሉም እንደ ባህሉ ሲጫዎት፣ በዓሉን በድምቀት ለማክበር ሲሯሯጥ፥ ፍጹም በመከባበር፣ አንዱ የአንዱን ባህልና ጨዋታ በመደገፍ እንደኾነ በስፍራው እየተገኙ የሚያከብሩት ኹሉ የሚያስተውሉት ሐቅ ነው፡፡ በአብሕርተ ምጥማቃት፣ መንፈሳዊ ሥርዐቱ ከተጠናቀቀና ታቦታቱ ወደ የማደሪያቸው ከገቡ በኋላ ባህላዊ ጨዋታዎች በሰፊው እንደሚከናወኑ ይታወቃል፡፡

menagesha genete tsige sunday school

ከዚህ በተጨማሪ በየዘመናቱ የጥምቀት በዓል አከባበር ሥርዐት፣ ሥነ በዓሉን ከማሸብረቅ አንጻር የወጣቶች ተሳትፎ በግንባር ቀደምነት የሚጠቀስ ሲኾን፤ በገጠርም በከተማም ቤተ ክርስቲያን በዘረጋቻቸው የሰንበት ት/ቤቶች አደረጃጀት(መዋቅር) አማካይነት የበዓሉን ታላቅነትና ሃይማኖታዊ ፋይዳ የሚገልጹ መዝሙሮችን በማቅረብ፤ ታቦታቱን በማጀብና ሕዝበ ክርስቲያኑን በማስተባበር በዓሉን በድምቀት እንዲከበር የሚያደርጉት አስተዋፅኦ የሚመሰገንና የሚበረታታ ኾኖ ይታያል፡፡

ዐዲሱ ትውልድ በዘመን ቅብብሎሽ እያማረና እየደመቀ በመከበር ዛሬ ያለበት ደረጃ ላይ የደረሰውን የጥምቀት በዓል አከባበር ሥርዐትን በክብር ተቀብሎ የበለጠ ለማድመቅና ለማስከበር፣ ከዓመት ዓመት ዐዲስ ፈጠራዎችን በማካተት የሚያደርጋቸው ጥረቶች ለቤተ ክርስቲያንና ለመላው ምእመናን ኩራት ከመኾን አልፎ ዓመታዊ ተግባራዊ የስብከተ ወንጌል አገልግሎት ተደርጎ የሚወሰድ ነው፤ ያላመኑ ስለ ቤተ ክርስቲያኒቱ እንዲጠይቁ፣ ወደ ቤተ ክርስቲያን እንዲሳቡና እንዲማረኩ የማስገደድ ኃይል ያለው ተግባራዊ እንቅስቃሴ ነው፡፡

ዐዲሱ ትውልድ፥ በሥልጣኔ፣ በዘመናዊ ቴክኖሎጂ፣ በጠንካራ ክርክርና ምክንያታዊ በኾነ አስተሳሰብ የሚመራ፣ በዘመኑ ሉላዊነት በዚህም በዚያም ጎታችና ጎትጓች በበዛበት ኹኔታ ውስጥ ኑሮውን የሚመራ ቢኾንም፤ ሃይማኖቱን፣ ሥርዐቱንና ትውፊቱን ጠብቆ ቀደምት አባቶቹ ሲያከብሩ የኖሩትን የጥምቀት በዓል ከመቹውም ጊዜ በተሻለና ባማረ መልኩ እንዲከበር የሚያሳየው ትጋትና ጥረት የሚያስመሰግነው ነው፡፡

timket2010

እንደ ቀደመው ትውልድ አምሮና ደምቆ ታቦታቱን በሆታና በእልልታ ከማጀብና በሰንበት ት/ቤት ተደራጅቶ በትምህርትና በመዝሙራት ከማገልገል በተጨማሪ በራሱ ተነሣሽነት በየመንደሩ በመደራጀት፣ ሕዝበ ክርስቲያኑን በማስተባበርና ራሱም የአቅሙን ድጋፍ በማድረግ፤ ሥነ ሥርዐት በማስከበር፣ ታቦታቱ የሚያልፉባቸውን መንገዶች በማጽዳት፣ በማስዋብና በማስጌጥ፤ ምንጣፍ በማንጠፍ፣ ከግርግር ነጻ በማድረግ ለታቦታቱ ተገቢውን ክብር በመስጠት ለሃይማኖቱ ያለውን ፍቅር፣ ለበዓሉ ያለውን ክብር እየገለጸ ይገኛል፡

ታቦታቱ የሚያርፉባቸውን ቋሚ ቦታዎች በመወሰንና መቋሚያዎቹን በማስዋብ በዚያውም ትምህርተ ወንጌል የሚሰጥበትን ኹኔታ በማመቻቸት ምእመናን ተጨማሪ ዕውቀት የሚያገኙበትን፣ ያላወቁ የሚያውቁበትን ዕድል ያሰፋል፡፡ ማረፊያዎቹ፣ ታቦታቱ ወደ ባሕረ ጥምቀት ከመድረሳቸው በፊትና ከደረሱ በኋላ ስብከተ ወንጌል የሚሰጥባቸው ቦታዎች ኾነው ስለሚያገለግሉ ጠቀሜታቸው የጎላ ነው፡፡

ሃይማኖታዊና ማኅበራዊ ፋይዳው እጅግ በጎላው የጥምቀት በዓል፣ መንገዶችንና ዐደባባዮችን በማስዋብ፣ በማስጌጥና ሃይማኖታዊ መልእክቶች በምስልና በጽሑፍ የሚተላለፉበትን ዕድል በሚፈጥር መልኩ መከናወኑ፣ ጠቀሜታው ከፍተኛ እንደኾነ አያጠያይቅም፡፡ ወጣቱ በፍጹም ፈቃደኝነትና በራስ ተነሣሽነት የሚያከናውነው እያንዳንዱ ተግባር፣ በበዓሉ ላይ ለመሳተፍና ሀገር ለመጎብኘት ወደ ኢትዮጵያ የሚመጡ ቱሪስቶችንም ቀልብ እንደሳበ፣ በካሜራቸው ለማስቀረት የሚያደርጉት መሯሯጥ ያረጋግጣል፡፡

ከብዙ ዓለማዊ ተግዳሮቶችና ፈተናዎች መሀል ራሱን አውጥቶ፣ በመንፈሳዊ ቀናዒነት ለሃይማኖታዊ በዓላት በድምቀት መከበር ጊዜውን፣ ጉልበቱን፣ ገንዘቡንና ዕውቀቱን በመለገስ በተለይ የጥምቀት በዓላችን ተናፋቂና ተወዳጅ እንዲኾን ያደረገው፤ በዘላቂነትም የበለጠ ሥራ ለመሥራት በመንቀሳቀስ ላይ ያለው ዐዲሱ ትውልድ በቤተ ክርስቲያን በኩል ተገቢው ድጋፍና ክትትል ሊደረግለት ይገባል፡፡

ለጥምቀት በዓል አከባበር የሚያደርገውን ተሳትፎ ለማሳደግ ይቻል ዘንድ ትምህርታዊ ሴሚናሮችን፣ ሥልጠናዎችንና ተደጋጋሚ የምክክር መርሐ ግብሮችን በማዘጋጀት ሃይማኖታዊ ግንዛቤውን ማጎልበት ከቤተ ክርስቲያን የሚጠበቅ ዐቢይ ሥራ ይኾናል፡፡ በራሱ ተነሣሽነት ለቤተ ክርስቲያን ክብርና ልዕልና የሚሠራ ወጣት ሲገኝ በክብር ይዞና ተንከባክቦ እምቅና ትኩስ አቅሙን መጠቀም ብልህነት ነው፡፡

አዲሱ ትውልድ፣ የቀደሙ አባቶቹ ያቆዩለትን ሃይማኖታዊና ባህላዊ እሴቶች ከመጠበቅ ባሻገር፣ ለታቦታቱ ተገቢው ክብር በሚሰጡ የተለያዩ አግባቦች ተናፋቂና ተወዳጅ በዓል ኾኖ እንዲከበር ለማስቻል እየሠራ ያለው ሥራ ይበል የሚያሰኝ ነው፡፡ ስለኾነም መንፈሳዊ ተነሣሽነቱና ዝንባሌው እንዲጎለብት፣ በዓሎቻችንም ሥርዓታቸውንና ትውፊታቸውን እንደጠበቁ ዘመን ተሻጋሪ ኾነው እንዲቀጥሉ የሚመለከታቸው ኹሉ እጅ ለእጅ ተያይዘው መሥራት ይጠበቅባቸዋል፡፡ መልካም የጥምቀት በዓል ይኹንልን፡፡

ምንጭ፡- ተቀደሰት ማይ በጥምቀቱ በሚል ርእስ የመንበረ ፓትርያርክ ጠቅላይ ቤተ ክህነት የበዓለ ጥምቀት የሥነ ጽሑፍ ኮሚቴ የአዘጋጀው የ2010 ዓ.ም ልዩ እትም መጽሔት

ቀውስጦስ – የበረሓ ምንጭ

  • በለገጣፎ መጥምቀ መለኰት ቅዱስ ዮሐንስ ጉዳይ፣ኹለት ቆራጦች ተሰልፈውበት ነበር፤ በሰማይ፥ ሄሮድስን ያልፈራው መጥምቀ መለኰት ቅዱስ ዮሐንስ፣ በምድር፥ ይግባኝ ለክርስቶስ ብለው የሚሞግቱት ቆራጡ ብፁዕ አቡነ ቀውስጦስ!
  • እንደ እከ የማይተኙት፣ ላይጨርሱ የማይጀምሩት፣ ላያጸኑ የማይገነቡት ብፁዕ አቡነ ቀውስጦስ፥ በትምህርትም፣ በሙግትም፣ በጸሎትም፣ በጥብዐትም፣ በዕንባም ታግለው ለፍሬ አደረሱት፡፡

†††

  • የቤተ ክርስቲያን ጉዳይ ከኾነባቸው፥ ክብር፣ ፕሮቶኮል፣ ስምና ዝና አይገድባቸውም፤
  • በሃይማኖት ድርድር አያውቁ፤ ግድየለሽነት አያጠቃቸው፤ ለአፍታም አይዘነጉት፤
  • እንደርሳቸው በሃይማኖት የሚደሰት፣ኑፋቄን የሚጸየፍ፣ ለወንጌል የሚተጋ አላየሁም፤
  • ዕንባቸው ከባድ፣ ጸሎታቸው ሥሙር፣ ቃላቸው ሰይፍ፣ መሐላቸውም ክቡር ነው፤
  • ቤተ ክህነታችን በሙስና እና በጎሠኛነት በናወዘበት ዘመንእንደ በረሓ ምንጭ ተገኙ!
  • የአባቶቻችን አምላክ ዛሬም ከእኛ ጋራ እንደኾነ አሳይተውናልና ኑሩልን አባታችን፡፡

†††

/ዲያቆን ዳንኤል ክብረት/

his-grace-abune-kewustos

ሲያምኑ እንደ አብርሃም ነው፣ ሲሠሩ እንደ ላሊበላ፡፡ ሲያስተምሩ እንደ ዮሐንስ አፈ ወርቅ ነው፤ ሲተጉ እንደ ቅዱስ ጳውሎስ፤ ከቆረጡ እንደ አቡነ ጴጥሮስ ናቸው፤ ከሞገቱ እንደ ሳዊሮስ፡፡ ከመረቁ የሚጠቅሙትን ያህል ከረገሙም ይጎዳሉ፤ የቤተ ክርስቲያን ጉዳይ ከኾነባቸው ክብር፣ ፕሮቶኮል፣ ስምና ዝና አይገድባቸውም፡፡ ከቀበሌ እስከ ቤተ መንግሥት ይሞግታሉ፤ በፍትሕ ዐደባባይ መፍትሔ ካጡ ይግባኝ ለክርስቶስ ብለው ለሰማያዊው ፍርድ ቤት ያቀርባሉ፡

አረጋዊ ናቸው፣ ግን እንደ ወጣት ይሠራሉ፤ ሊቀ ጳጳስ ናቸው፣ ነገር ግን እንደ የሰንበት ተማሪ ይሮጣሉ፤ የአንድ ሀገረ ስብከት ሊቀ ጳጳስ ናቸው፣ ግን በኹሉም ይወደዳሉ፤ ትምህርታቸው ከሰው ልብ፣ እንባቸው መንበረ ጸባኦት ይደርሳል፡፡ በርሳቸው ዘንድ ትንሽ የለም፣ ትልቅም የለም፡

የርሳቸውን ስም የያዘው ቅዱስ፣ የዛሬ 700 ዓመት እንዲሁ እንደርሳቸው ነበር፡፡ ቅዱሱ የአቡነ ተክለ ሃይማኖት ደቀ መዝሙር ሲኾን ያስተምራል፤ ገዳማትን ይተክላል፤ ደቀ መዛሙርትን ያፈራል፤ ነገሥታትን ይገሥጻል፤ ለእምነቱ ጥብቅና ይቆማል፤ ግፍንና በደልን ይጸየፋል – ቅዱስ ቀውስጦስ ዘመሐግል፡፡ በሰማዕትነትም ያረፈው ንጉሥ ዓምደ ጽዮን ከክርስትናው ወጥቶ፣ ሁለት ሚስት አግብቶ፣ የተቃወሙትን ቅዱሳን በግፍ ባሳደደ ጊዜ ነው፡፡ በንጉሡ ፊት እውነቱን ተናግሮ፣ ስሕተቱን ገልጦ በተናገረ ጊዜ ከቤተ መንግሥቱ አውጥተው በጨለማ ቤት አሠሩት፤ በኋላም ከጨለማው እስር ቤት አውጥተው ዛሬ በሰሜን ሸዋ እንሣሮ በሚባለው ቦታ ወስደው በግፍ ገደሉት፡፡ እርሳቸውም ስሙን ብቻ ሳይኾን ግብሩንም ወርሰውታል፡፡

ከዐሥራ አምስት ዓመታት በፊት፡፡ ትጉህ ብፁዕ አቡነ ናትናኤል፣ መዶሻው ብፁዕ አቡነ ቄርሎስ፣ ሐዋርያዊው ብፁዕ አቡነ ኤልያስ አንድ ኾነው ወደ ሐረር ዘምተው ነበር፡፡ መልአከ ሰላም ኃይለ ኢየሱስ ከበደም አጅበዋል፡፡ የደብረ ጽጌ ቅዱስ ዑራኤል እና የታዕካ ነገሥት በኣታ ለማርያም የሰንበት ትምህርት ቤቶች መዘምራንም ሐረር ከትመዋል፡፡ መልአከ ሰላም ቀሲስ ደጀኔ ሺፈራው፣ ሊቀ መዘምራን ኪነ ጥበብ ወልደ ቂርቆስም ተከትለዋል፡፡ እኔም እድል ገጥሞኝ በቦታው ነበርኩ፡፡ ተሐድሶ ሐረርጌን ከምዕራብ በአሰበ ተፈሪ፣ ከምሥራቅ በሐረር በኩል ሰንጎ ይዟታል፡፡ በወቅቱ ብፁዕ አቡነ ቀውስጦስ የምሥራቅ ሐረርጌ ሊቀ ጳጳስ ነበሩ፡፡ እርሳቸው እቴ፣ በሃይማኖት ድርድር አያውቁም፤ ግዴለሽነት አያጠቃቸውም፤ ኖላዊነታቸውን ለአፍታም አይዘነጉት፡

በረከታቸው ይደርብንና አቡነ ናትናኤል የሐረርጌ መሬት በሚል ርእስ ከዚያም በፊት ከዚያም በኋላ ሰምቼው የማላውቅ ድንቅ ትምህርት አስተማሩ፤ የሐረርጌን መሬት ጠይቁት፤ ይመስክር፤ እስኪ ቆፍሩና ጠይቁት፣ ካህኑ ታቦቱን እንደያዘ ዐፅሙን ታገኙታላችሁ፤ መሬቱኮ ክርስቲያን ነው፡፡ አባቶቻችን የተጋደሉበት ነው፤” አሉ ትጉሁ ብፁዕ አቡነ ናትናኤል፡፡ መዶሻው ብፁዕ አቡነ ቄርሎስም “ምንጊዜም ዐዲስ የኾነው እምነታችን ምኑ ይታደሳል? ማንስ ችሎ ያድሰዋል?” የተሰኘውን ትምህርት አወረዱት፡፡ መዝሙርን ከትምህርት የሚያስተጋብሩት ብፁዕ አቡነ ኤልያስም በረከታቸው ይደርብንና፡-

መጀመሪያ፡-

ኢኮነ ነግደ ወፈላሴ

ሀገሪቶሙ ለቅዱሳን አትዮጵያ

ሀገሪቶሙ ለቅዱሳን ምድረ ሐረርጌ

የተሰኘውን መዝሙር፣ ቀጥለውም

አደሬ ጢቆ ሥላሴ

እኔ እወድሻለሁ እስኪወጣ ነፍሴ

የተሰኘውን መዝሙር አሸበሸቡት፡፡ ቅዱስ ያሬድን በአካል ያላየን ሰዎች ብፁዕ አቡነ ኤልያስን አይተናልና አይቆጨንም፤ ሕዝቡ ያለበትን ቦታ እስኪረሳ ድረስ፣ ከምድር ክንድ ስንዝር ከፍ ያለ እስኪመስል ድረስ አብሯቸው ዘመረ፡፡ ይኼኔ አቡነ ቀውስጦስ መልአኩ ከመንበሩ ተነሡ፡፡ ከቤተ ክርስቲያን በላይ ምን ክብር አለ፤ ከሃይማኖትም በላይ ምን ታላቅነት አለ፤ ከክርስቶስም በላይ ምን ፕሮቶኮል አለ፡፡ መስቀላቸውን ይዘው በዚያ እንደ መላእክት በተመስጦ በተነጠቀው የሐረር ሕዝብ መካከል እያሸበሸቡ ገቡ፡፡ ሕዝቡ ምድሪቱን ለቀቀ፡፡ ሔደ ወደ አርያም፤ የታዕካ ነገሥት በዓታ ለማርያም እና የቅዱስ ዑራኤል የሰንበት ተማሪዎች እንደ ቅዱስ ያሬድ እግራቸውን ቢወጉት እንኳን አይሰሙም ነበር፡፡ ብፁዕ አቡነ ቄርሎስ እና ብፁዕ አቡነ ኤልያስ ያለቅሳሉ፡፡ ብፁዕ አቡነ ናትናኤል ምድር ላይ የሉም፡፡ መልአከ ሰላም ኃይለ ኢየሱስ መድረክ ላይ መኾናቸውን ረስተውታል፤ እያሸበሸቡ ከሕዝቡ ጋራ ሔደዋል፡፡ መላእክት በዲበ ምድር፡፡ እንደ ብፁዕ አቡነ ቀውስጦስ የዘመረ፣ እንደ እርሳቸውም ያሸበሸበ፣ እንደ እርሳቸውም ለሰማያዊ ክብር ሲል ምድራዊውን ክብር የዘነጋ፣ እንደ እርሳቸውም በሃይማኖት ይህን ያህል የሚደሰት፣ እንደ እርሳቸውም ኑፋቄን የሚጸየፍ፣ እንደ እርሳቸውም ለወንጌል የሚተጋ ከዚያም ወዲህ አላየሁም፡፡

እኒህን አባት የሚያውቅ ሰው ታላቅ ሰው ነው፡፡ የሚንቅ ደግሞ ራሱን የናቀ፡፡ እንደ ጻድቁ ቀውስጦስ የሚያምኑ ብቻ አይደሉም፡፡ እንደ መልአኩ ቀውስጦስ የሚቀስፉም ናቸው፡፡ ዕንባቸው ከባድ ነው፣ ጸሎታቸው ሥሙር፣ ቃላቸው ሰይፍ ነው፤ መሐላቸው ክቡር፤ ከጀመሩ ሳይጨርሱ፣ ካነሡ ሳያደርሱ፣ ከጨበጡ ሳያጠብቁ፣ ከወረወሩ ሳያርቁ አይመለሱም፡

በሕገ ወጥ ግንባታ ሰበብ በግፍ የፈረሰው የለገጣፎ መጥምቀ መለኰት ቅዱስ ዮሐንስ ቤተ ክርስቲያን ታቦት እና ንዋያተ ቅድሳት፣ ላለፉት ስምንት ወራት አላግባብ ከተጣሉበት የለገጣፎ ለገዳዲ ከተማ አስተዳደር ፖሊስ መምሪያ ከሚገኘው ኮንቴይነር ፣ ትላንት ጥር 9 ቀን 2010 ዓ.ም በብፁዕ አቡነ ቀውስጦስ ክክለኝነታቸው እየተረጋገጠ በክብር ሲወጡ ይታያል

በለገጣፎ ለገዳዲ ከተማ የመጥምቀ መለኰት ቅዱስ ዮሐንስ ቤተ ክርስቲያን ተሠራ፡፡ ሰውን የማያፍሩ ፈጣሪን የማይፈሩ ባለሥልጣናት ተነሡና አፈራረሱት፤ ንዋያተ ቅድሳቱንም ወረወሩ፡፡ አላወቁትም እንጂ በጉዳዩ ላይ ኹለት ቆራጦች ተሰልፈውበት ነበር፡፡ በሰማይ ሄሮድስን ያልፈራው መጥምቀ መለኰት ቅዱስ ዮሐንስ፣ በምድር ይግባኝ ለክርስቶስ” ብለው የሚሞግቱት ቆራጡ ብፁዕ አቡነ ቀውስጦስ፡፡ በእነዚህ በሁለቱ እጅ የተያዘ ጉዳይ በስተመጨረሻው በለማ መሬት ላይ መውደቁ አይቀሬ ነበረና፡፡ በለማው ለማ እጅ ወደቀ፡፡ እነኾ እንደ እከ የማይተኙት፣ ላይጨርሱ የማይጀምሩት፣ ላያጸኑ የማይገነቡት ብፁዕ አቡነ ቀውስጦስ በትምህርትም፣ በሙግትም፣ በጸሎትም፣ በጥብዐትም፣ በዕንባም ታግለው ለፍሬ አደረሱት፡

አባታችን

“ረድኤቴ ከወዴት ይመጣልኛል?” እያለ ምእመናኑ በተስፋ ሰማዩን በሚያዩበት በዚህ ዘመን፣ እንዲህ እንደርስዎ የልብ መጠጊያ የሚኾን አባት ማግኘት መታደልም፣ መመረጥም ነው፡፡ ቤተ ክህነታችን በሙስና፣ በጎሠኛነት፣ በአስተዳደር ልምሾ ናውዞ ምእመናኑ የመከራ ወሬ በሚሰሙበት በዚህ ዘመን፣ እንደ እርስዎ ተኣምር የሚነግር አባት ማግኘት፣ በበረሓ እንደተገኘ ምንጭ ነው፡፡

እንኳን በዓይን አየንዎት፤ እንኳን በታሪክ አልሰማንዎት፡፡ ለልጆቻችን የምንተርከው ታሪክ ሰጥተውናል፡፡ የአባቶቻችን አምላክ ዛሬም ከእኛ ጋራ መኾኑን የሰማነውን አሳይተውናል፡፡

ኑሩልን አባታችን፡፡

YeKidus Yohannes Tabot KeLegetafo Police container siwota

ለለገጣፎ ለገዳዲ መጥምቀ መለኰት ቅዱስ ዮሐንስ ሕንፃ ቤተ ክርስቲያን መሥሪያ የተሰጠው የ3ሺሕ ካሬ ሜትር(በቀጣይ የሚካተተውን ሳይጨምር) ይዞታ ሳይት ፕላን፤

 

የለገጣፎ ቅ/ዮሐንስ ታቦት ከፖሊስ ጣቢያ ወደ ማደሪያው እያመራ ነው፤“በካርታ የተረከብነው 3ሺሕ ካ.ሜ ነው፤ቀሪው በማስፋፊያ የተጠየቀ ነው”

  • እሑድ ጥር 13 ቀን ልዩ በዓለ ንግሥ ይደረጋል፤

ብፁዕ አቡነ ቀውስጦስ፣ የለገጣፎ ገዋሳ መጥምቀ መለኰት ቅዱስ ዮሐንስን ታቦትና ንዋያተ ቅድሳቱን በፖሊስ ጣቢያው ከተቀመጠበት ኮንቴይነር ጧት 2፡00 ላይ ተረክበዋል፤ በካሜራ መቅረፅ ተከልክሏል፤ የተቀመጠበት ኮንቴይነር ኹኔታ በጣም ልብ ይነካል፤ በኤግዚቢት ከተያዘ የጦር መሣሪያ፣ ዱቄት፣ የዘይት ጄሪካንና ቀለም ጋራ መቀመጡ ክብረ ነክ ነው፤ በዚህም ምክንያት ርክክቡ እንዲቀረፅ አልተፈቀደም፤

አሁን እጅግ በጣም በርካታ ምእመናን፣ ታቦቱን ያከበሩትን ካህናትና ሊቃውንት በእልልታና በሽብሸባ አጅበው፣ ረጅም ሰንደቅ ዓላማ ይዘው ከፖሊስ ጣቢያው ወደ አባ ኪሮስ እየተጓዙ ናቸው፤ አባ ኪሮስ ሲደርስ ስብሐተ እግዚአብሔር ተደርሶ ወደ ዐዲሱ ይዞታ ያመራሉ፤ ከዋናው መንገድ ወደ መታጠፊያው ሲገባ ምንጣፍ እየተነጠፈ ታቦቱን ያከበሩት ካህናት በእግራቸው ይዘልቃሉ፤

የጸጥታ አካላትም መንገዱን እያስከበሩ ነው፤ ጥበቃው ጠንከር ያለ ነው፤ ተዘጋግቷል፤ ለሥራ የሚሔደው ኦርቶዶክሳዊ ኹሉ ከመኪናው እየወረደ ለታቦቱ ክብር እየሰገደና ደስታውን እየገለጸ ይታያል፤ ከምእመናኑ ብዛትና ከዝማሬው አንጻር ራሱ በዓለ ጥምቀትን መስሏል፤ “ቅዱሱስ መንገድ ጠራጊ አይደለ!”

ስፍራው እዚያው ገዋሳ ሲኾን፣ ሜዳማና መንገድ ዳር ነው፤ በተጨባጭ የተረከብነው 3ሺሕ ካሬ ሜትር እንደኾነ በካርታው ሰፍሯል፤ ቀሪው በማስፋፊያ የተጠየቀና በተስፋ የሚጠበቅ ነው፤ “የምንሠራው ቤተ ክርስቲያን ታላቅና ታሪካዊ ነው፤ ይኼ ብቻ አይበቃንም፤ ተጨማሪ እንጠይቃለን፤” ብለው ሲያመለክቱ “ስለማስፋፊያው እንማከራለን፤” የሚል ምላሽ ከአስተዳደሩ ተሰጥቷል፤ ለመካስ የሚደረግ ጥረት ስለኾነ፡፡

ታቦቱ ዛሬ በመጠነኛ መቃኞ ገብቶ ያድራል፤ በዓለ ጥምቀትም ይከበራል፤ እሑድ ጥር 13 ቀን ደግሞ ልዩ በዓለ ንግሥ ይደረጋል፤ ከሥፍራው ሲደረስ ብፁዕ ሊቀ ጳጳሱ የደብሩን ስያሜ እንደሚሰጡ ይጠበቃል፡፡