የመንበረ ፓትርያርክ ጠቅላይ ቤተ ክህነት የፀረ ኮቪድ-19 ተስፋ ልዑክ ዐቢይ ግብረ ኃይል ለቅዱስ ሲኖዶስ ምልዓተ ጉባኤ ያቀረበው ሪፖርት

  • አህጉረ ስብከት እና ጠቅላይ ቤተ ክህነት፣ የገጠር አብያተ ክርስቲያንንና ዝቅተኛ አቅም ያላቸውን የከተማ አድባራት፣ ከካዝናቸው እንዲደጉሙ ሐሳብ አቅርቧል

***

የኮሮና ቫይረስ/ኮቪድ-19 ወረርሺኝ፣ በቤተ ክርስቲያንና በአገር ደረጃ የሚያስከትለውን ጉዳት ለመቀነስ እና ለመከላከል ይቻል ዘንድ፣ በጠቅላይ ጽ/ቤት ደረጃ በቋሚ ሲኖዶስ የተቋቋመው የተስፋ ልዑክ ዐቢይ ግብረ ኃይል፣ ካለፈው መጋቢት አጋማሽ አንሥቶ ሲያከናውን የቆየውን ተግባር ለምልዓተ ጉባኤው አቅርቧል፡፡

በስምንት ዐበይት ነጥቦች ተለይቶ እና በ14 ገጾች ተጠናቅሮ፣ ዛሬ ረቡዕ፣ ግንቦት 5 ቀን 2012 ዓ.ም. ከቀትር በፊት የቀረበው ሪፖርቱ፣ ግብረ ኀይሉ በቋሚ ሲኖዶስ ከተቋቋመበት ካለፈው መጋቢት 12 ጀምሮ በማዕከል እና በአህጉረ ስብከት በየዘርፉ የተከናወኑ ወረርሺኙን የመከላከል ተግባራትን አትቷል፡፡

45638652_508617682990021_5161937265382916096_n

የብዙኀን መገናኛን የጸሎት እና የትምህርት አገልግሎት አጠቃቀምን ጨምሮ በንዑስ ግብረ ኃይሎቹ የተፈጸሙ ልዩ ልዩ ተግባራትን ያካተተው የዐቢይ ግብረ ኃይል ሪፖርቱ፣ በስምንት ዐበይት ነጥቦች የተለየ እና በ14 ገጾች የተጠናቀረ ነው፡፡

ግብረ ኀይሉ፣ “ያልተጠየቀ” በማለት የተቸው የፖሊስ ጣልቃ ገብነት እና በዚኹም ሳቢያ የቤተ ክርስቲያን ቀኖናዊ አገልግሎት መቋረጥ፣ አህጉረ ስብከት ግብረ ኃይሉን በየደረጃው በአግባቡ አደራጅተው ፈጥነው ወደ ተግባር ከመግባት አኳያ ያሳዩት ድክመት፣ ከዚህም ጋራ ተያይዞ ዝቅተኛ ዐቅም ያላቸው የገጠር እና የከተማ አብያተ ክርስቲያን ለካህናት ደመወዝ ለመክፈል መቸገራቸው፣ በሪፖርቱ ከዘረዘራቸው ችግሮች ተጠቃሾቹ ናቸው፡፡

የገጠር አብያተ ክርስቲያንና አዲስ አበባን ጨምሮ በከተሞች ዝቅተኛ አቅም ያላቸውን አጥቢያዎች ካህናት ደመወዝ በተመለከተ፣ አህጉረ ስብከት በሥራቸው ካሉ የወረዳ አብያተ ክህነት ጽ/ቤቶች ጋራ በመነጋገር በአስቸኳይ መረጃ በማሰባሰብ ከራሳቸው ካዝና በመክፈል ድጋፍ እንዲያደርጉ የመፍትሔ ሐሳብ አቅርቧል፤ ይህን ለማድረግ አቅም ለሌላቸው አህጉረ ስብከት ደግሞ፣ ጠቅላይ ቤተ ክህነት በጥናት ላይ የተመሠረተ ልዩ ድጋፍ ያደርግ ዘንድ ምልዓተ ጉባኤውን ጠይቋል፡፡

የፖሊስን አላስፈላጊ ጣልቃ ገብነት በተመለከተ፣ ከኹሉ በፊት ግብረ ኃይሉ፣ በቤተ ክርስቲያን ከፍተኛ አካል ወረርሺኙን ለመዋጋት የተቋቋመ አካል እንደኾነ ተገንዝቦ ዕውቅናውን ያከብርለት ዘንድ በቅዱስ ሲኖዶሱ ትእዛዝ እንዲተላለፍለት ጠይቋል፡፡ ፖሊስ በር በገትዳጅ እየዘጋ ለጥበቃ መቆሙም አግባብ ባለመኾኑ፣ ጥበቃውን የአጥቢያ ሰበካ መንፈሳዊ ጉባኤ አስተዳደር ሓላፊነት ወስዶ፣ በሰንበት ት/ቤቶች እና በአካባቢ ወጣቶች አማካይነት ይከናወን ዘንድ ምልዓተ ጉባኤው ውሳኔ እንዲያሳልፍ አመልክቷል፡፡

ይህ የማይቻል ከኾነ ደግሞ፣ የእምነቱ ተከታይ የኾኑና የቤተ ክርስቲያንን ሥርዓት ጠንቅቀው የሚያውቁ የፖሊስ አባላት ብቻ እንዲጠብቁ ቢደረግ፤ እነዚህ የፖሊስ አባላትም ቢኾኑ፣ የቤተ ክርስቲያኑን ዙሪያ ከመጠበቅ በዘለለ ፖሊስ በጭራሽ ወደ ቅጽረ ቤተ ክርስቲያን እንዳይገቡ፤ መጠበቅ አለባቸው ከተባለ እንኳን፣ በምእመናን ላይ ምንም ዓይነት የኃይል ርምጃ መውሰድ የሚችልበት አሠራር እንደሌለ ከተማ አስተዳድሩ ለፖሊሶች ትእዛዝ ቢሰጥ፤ የሚገጥሙ ችግሮችም ካሉ ከጠቅላይ ቤተ ክህነት እስከ አጥቢያው ከተቋቋመው ግብረ ኃይል ጋራ በመነጋገር እንዲፈቱ ቢደረግ፣ የሚሉ አማራጭ መፍትሔዎችን አቅርቧል፡፡ አያይዞም፣ እስከ አሁን ድረስ ጥፋት ያጠፉ የፖሊስ አካላትም፣ እንደ ጥፋታቸው መጠን ተገቢው ርምጃ በሚመለከተው አካል እንዲወሰድ ይደረግ ዘንድ ምልዓተ ጉባኤውን በሪፖርቱ ጠይቋል፡፡

ሪፖርቱን ተከትሎ፣ የቤተ ክርስቲያንን መዘጋት በተመለከተ፣ ምልዓተ ጉባኤው ቋሚ ሲኖዶሱ ማብራሪያ እንዲሰጥ ጠይቋል፡፡ በተለይም ፖሊስ፣ አስቸኳይ ዐዋጁን በማስፈጸም ሰበብ እናቶችንና አረጋውያንን በመገፍተር እና በመደብደብ፣ የተመደቡ ልዑካን እንዳይገቡ በመከልከል፣ አልፎም የቤተ ክርስቲያኒቱን ሥርዐተ አምልኮ በማጥላላትም የፈጸማቸው ድርጊቶች በስፋት ያነጋገረ፣ ምልዓተ ጉባኤውንም በእጅጉ ያሳዘነ እንደነበር ተገልጿል፡፡

“ቀኖና ለማሻሻል አልያም ለመጣስ አትችሉም፤” በሚል የቋሚ ሲኖዶሱ አባላት በብርቱ መተቸታቸው ተጠቁሟል፡፡ የቋሚ ሲኖዶስ አባላት በበኩላቸው፣ ርምጃው በእኛ ስም የተደረገ እንጂ እኛ አናውቀውም፤ የእኛ ውሳኔ፣ ምእመኑ ርቀቱን ጠብቆ በተመደቡ ልኡካን ብቻ አገልግሎቱ እንዲፈጸምለት ያስተላለፍነው ነው፤ በማለት ትችቱን ተከላክለዋል፡፡

ከዚህም አያይዞ ምልዓተ ጉባኤው ባሳለፈው ውሳኔ፣ የተዘጉ የቤተ ክርስቲያን በሮች ተከፍተው፣ መንፈሳዊ አገልግሎቱ፣ በፀረ ኮቪድ-19 ጥንቃቄ ተግባራት መሠረት እየተመራ እንዲፈጸም ትእዛዝ ሰጥቷል፡፡ ይህንኑም፣ የጠቅላይ ቤተ ክህነቱ ጽ/ቤት ከሚመለከተው የመንግሥት አካል ጋራ በመነጋገር ለአህጉረ ስብከት እንዲያሳውቅ መመሪያ ሰጥቷል፡፡

የመመሪያውን አፈጻጸም በተመለከተ፣ የአጥቢያ አብያተ ክርስቲያን የሰበካ መንፈሳዊ ጉባኤ አስተዳደር ሓላፊነቱን ወስደው፣ የሰንበት ት/ቤቶችንና የአካባቢ ወጣቶችን በማስተባበር፣ አገልግሎቱ እንዲከናወን ያደርጉ ዘንድ ምልዓተ ጉባኤው አዟል፡፡ በዚህም መሠረት፣ ጥምቀተ ክርስትናው፣ ምስጢረ ቊርባኑ፣ ምስጢረ ተክሊሉ እና ሥርዐተ ጋብቻው እንዲሁም፣ ጸሎተ ፍትሐቱ፣ ምእመናን ተራቸውንና ርቀታቸውን ጠብቀው፣ ልዑካኑም በምድባቸው የሚፈጽሙት እና የሚያስፈጽሙት ይኾናል፡፡

የዐቢይ ግብረ ኃይሉን ሪፖርት ሙሉ ቃል ከዚህ በታች የሰፈረው ነው

Tesfa Leuk GebraHail Report Holy Synod Gin2012መግቢያ

ከሁሉ አስቀድሞ የኢትዮጰያ ኦርቶዶክስ ተዋሕዶ ቤተ ክርስቲያን ቋሚ ቅዱስ ሲኖዶስ የኮቪድ-19 (የኮሮና ቫይረስ) ወረርሽኝን ለመከላከል አፋጣኝና ግንባር ቀደም ርምጃ በመውሰድ፣ መሠረተ እምነትንና ቀኖና ቤተክርስቲያንን ጠብቆ አስፈላጊውን መመሪያ በማስተላለፍ፣ ወቅታዊ ውሳኔዎችን በማውጣትና ተገቢውን አመራር በመስጠት የሚጠበቀውን ሁሉ እያደረገ በመሆኑ ቅድስት ቤተ ክርስቲያን ለሰው ልጅ ሁሉ ሁለንተናዊ ደኅንነት ያላትን ኃላፊነትና ጠባቂነት በተግባር ለማሳየት ተችሏል፡፡

ከብፁዕ ወቅዱስ አባታችን አቡነ ማትያስ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጰስ ዘአክሱም ወእጨጌ ዘመንበረ ተክለሃይማኖት ጀምሮ ብፁዓን አበው ሊቃነ ጳጳሳት ጌታችን ለሐዋርያቱ በጎቸን ጠብቅ፣ ጠቦቶቸን ጠብቅ፣ ግልገሎቸን ጠብቅ ብሎ የሰጠውን አደራ ለመወጣት ምእመናንን በነፍስም በሥጋም ደኅንነታቸው እንዲጠበቅ እያከናወኑት ያለው ሐዋርያዊ ተልዕኮ በታሪክ የማይረሳ ተግባር ነው፡፡ ከዚህም በተጨማሪ ቅድስት ቤተ ክርስቲያን ሉዓላዊነቷ በማስከበር ከየትኛውም የውጭ ጣልቃ ገብነት ወሰኗ ጠብቃ በራስዋ ማድረግ የሚገባትን ቀድማ በመተግበር የመመሪያ አስፈጻሚ ሳትሆን በራስዋ መመሪያ የምትመራ ለመሆኗ የሚስመሰክር ሥራን ሠርታለች፡፡

እንደሚታወቀው የወረርሽኙ በመላው ዓለም ሥጋት መሆን እየቀነሰ ሳይሆን እየጨመረ የሟቾች ቁጥር ከ291000 ከሁለት መቶ ዘጠና አንድ ሺህ በላይ፣ በበሽታው የተያዙት ቁጥር ወደ አራት ሚሊየን ሶስት መቶ ሺህ በላይ እየሆነ መመጣቱን በየዕለቱ የምናየው ዜና ሲሆን በሀገራችንም እስከ አሁን የጠበቀንን አምላክ እያመሰገንን ወደፊትም እንደሚጠብቀን እያመንን አሁን ባለው መረጃ መሠረት በበሽታው የተያዙ ወገኖች ቁጥር ከ ሁለት መቶ ሃምሳ መብለጡ፣ በሰሞኑ የሚያዙትም ቁጥር ከፍ ማለት መጀመሩ፣ከውጭ ሀገር ከሚመጡት በተጨማሪ በማኅበረሰባችን ውስጥ የቫይረሱ ሥርጭት እየተከሰተ መሆኑ ሁላችንም በቅርብ እየተከታተልን እንገኛለን፡፡

ይሁን እንጅ ከበሽታው ሥርጭት በተጨማሪ በሽታን ለመከላከል የሚደረጉት የጥንቃቄ መርኆዎች በርካታ ማኅበራዊና ኢኮኖሚያዊ ግንኙነቶችን በመገደብ የንግድ ልውውጦችን፣ የተለመዱ ሠርቶ ማግኝትና አትርፎ ማደርን በማስቆም የሰው ለሰው ማኅበራዊ ግንኙነት ላይ ተጽዕኖ በመፍጠርና የሥነ ልቦና ጫናው በላይ የዕለት ኑሮን ለማሸነፍ የሚደረጉ ጥረቶችን በከፍተኛ ደረጃ የጎዳ በመሆኑ በሕዝቡ ዘንድ እጅግ ከባድ የሆነ በቀላሉ የማያታለፉ የኑሮ ሸክሞችን መፍጠሩ ግልጽ ጉዳይ ነው፡፡

የኢትዮጵያ ኦርቶዶክስ ተዋሕዶ ቤተ ክርስቲያን ከሁሉ አስቀድማ የሕዝብን ሕይወት የመጠበቅ ሐዋርያዊ ተልእኮዋን በግንባር ቀደምነት ለመወጣት አስፈላጊ የሆኑ፣ በታሪክ ተደርገው የማያውቁ፣ ከፍተኛ ውሳኔዎችን በመወሰን የሕዝብን ሕልውና የሀገርን ደኅንነት ለመጠበቅ የሚገባትን ስታደርግ ቆይታለች ወደፊትም በሽታው ከመላው ዓለም ሥጋት መሆኑ እስኪቆም፣ ሀገራችንም ደኅንነቷ እስኪረጋገጥ መሠረተ እምነትንና ቀኖና ቤተ ክርስቲያንን በመጠበቅ ድረስ ሊደረጉ የሚገባቸውን የቅድመ ጥንቃቄ፣ የሰው ለሰው መረዳዳት፣ የበሽታ መከላከል፣ ድርጊቶችን አጠናክራ ትቀጥላለች፡፡ መንግሥት የወሰደው የመለከላከል ርምጃና ሀገርን የመጠበቅ እንቅስቃሴ እያደነቅን በሀገር ደረጃ በከፊል የሥራ እንቅስቃሴ እንዲቆም በመደረጉ መንግሥት ከራሱ ጀምሮ የሚፈጸሙትን የመከላከል ሥራዎች ቅድስት ቤተ ክርስቲያንም በሙሉ አቅሟ እያገዘች ትገኛለች፡፡

 የኢትዮጵያ ኦርቶዶክስ ተዋሕዶ ቤተክርስቲያን ቋሚ ሲኖዶስ የኮቪድ 19 ኮረና ወረሽኝን በኢትዮጵያ መከሰቱን ተከትሎ ወረሽኙ በቤተክርስቲያንና በሀገር ደረጃ የሚያስከትለውን ጉዳት ለመቀነስና ለመከላከል ይቻል ዘንድ በቤተክርስቲያን ደረጃ የሚሠራ ግብረ ኃይል ማቋቋም እንደሚያስፈልግ በማመን የኮቪድ 19 ኮረና ቫይረስ የተስፋ ልዑክ ግብረ ኃይል እንዲቋቋም መወሰኑን ተከትሎ ከመንበረ ፓትርያርክ ጠቅላይ ጽ/ቤት መምሪያ ኃላፊዎች፣ ከሕክምና ባለሙያዎችና ከህብረተሰቡ በጠቅላይ ቤተክህነት ም/ሥራ አስኪያጅ የሚመራ ግብረ ኃይል በማቋቋም ወደ ሥራ እንዲገባ ተደርጓል፡፡

ግብረ ኃይሉም ከቤተክርስቲያኒቱ የተጣለበትን ከባድ ታሪካዊ ኃላፊነት በብቃት ለመወጣት ያስችለው ዘንድ ሥራዎቹን የሚያከናውንበትን እቅድ በማዘጋጀትና በዕቅዱ ላይ ውይይት በማድረግ ያጸደቀ ሲሆን በግብረ ኃይሉ ሥር የተቋቋሙት አራት ንዑሳን ግብረ ኃይሎችም የየራሣቸውን እቅድ በማዘጋጀት ተግባራዊ እንቅስቃሴዎችን እያደረጉ ይገኛሉ፡፡

     ግብረ ኃይሉ በተቋም ደረጃ መከናወን የሚገባቸውን ዋና ዋና ተግባራትንም በመለየት በቋሚ ሲኖዶስ ውሳኔና አፈጻጸም አቅጣጫዎች እንዲሰጥባቸው በማድረግ የተጣለበትን ታሪካዊ ኃላፊነት በመወጣት ላይ ይገኛል፡፡ በዚህም መሠረት በግብረ ኃይሉ የተከናወኑ ዋና ዋና ተግባራትን በሚከተለው መልኩ አቅርበናል፡፡

 በግብረ ኃይሉ የተከናወኑ ዋና ዋና ተግባራት

  1. ጽ/ቤት ደረጃ የተከናወኑ ዋና ዋና ተግባራት
  • ሁሉም ንዑስ ግብረ ኃይሎች የሚያከናውኗቸውን ዋና ዋና ተግባራት በተመለከተ ዕቅድ በማዘጋጀትና ዕቅዱን በዐቢይ ግብረ ኃይሉ በማጽደቅ ወደ ሥራ ገብተዋል፡፡
  • በየጊዜው በንዑስ ኮሚቴዎች የተከናወኑ ተግባራት ከእቅድ አንጻር በተያዘላቸው ጊዜ መሰረት መከናወናቸውን ገምግሟል፣ማስተካከያ የሚያስፈልጋቸውን ሥራዎች ማስተካከያ ሰጥቷል፡፡
  • በሚዲያ አጠቃቀም፣በሰባኪያን አመዳደብና በሚተላለፉ መልዕክቶች ዙሪያ ግምገማ በማድረግ አቅጣጫ ሰጥቷል፡፡
  • በመ/ፓ/ጠ/ጽ/ቤቱ የንጽህና መጠበቂያ ቁሳቁሶች እንዲገዙና እንዲሰራጩ አድርጓል፡፡
  • የፌዴራልና የክልል መንግሥት የሥራ ኃላፊዎች፣ የፌዴራል ፖሊስ፣ የአዲስ አበባ ፖሊስ አመራሮች በተገኙበት በግብረ ኃይሉ የሥራ እንቅስቃሴ በመንግሥት ድጋፍና አብሮ በመስራትና በሚዲያ አጠቃቀም ዙሪያ ውጤታማ ውይይት አድርጓል፡፡ በዚህም በቤተክርስቲያኒቱን ከኮረና ወረሽኝ ጋር ተያይዞ የሚስተዋሉ የአፈጻጸም ችግሮችና መፍትሔዎች ዙሪያ ግንዛቤ ማስጨበጥ ችሏል፡፡
  • ከፌዴራል ግብረ ኃይሉ ከሚዲያ ተቋማት፣ከሃይማኖት ተቋማት ጉባኤና ከባለ ድርሻ አካላት ጋር ተደጋጋሚ ውይይቶችን በማድረግ በቤተክርስቲያኒቱ ግብረ ኃይል የተሰሩ ሥራዎችን መሰረት በማድረግ ግልጽ ግምገማዎችን ያደረገ ሲሆን የቤተክርስቲያኒቱን መብት በሚያስከብሩ ነጥቦች ዙሪያ የጋራ መግባባትን መፍጠር ችሏል፡፡
  • ምንም እንኳን ተግባራዊነቱ ላይ ክፍተት ቢኖርም ጠቅላይ ጽ/ቤቱ ከቫይረሱ ስርጭት ስጋት ነጻ ሊሆን የሚችልበትን ስልት በማዘጋጀት ባቀረበው ጥናት መነሻነት ጠቅላይ ጽ/ቤቱ ከንክኪው ነጻ በሆነ መልኩ በጥንቃቄ ሥራውን እንዲያከናውን፣ እንዲሁም ጠያቂዮች እና ጎብኚዎች ወደ አባቶች እንዳይገቡ በመገደብ አባቶች ከውጪ ከሚመጡ ሰዎች ጋር ያለን ንክኪ እንዲቀንሱ በማድረግ የቫይረሱን ስርጭት ለመግታት ቢሞከርም ከአባቶች አካባቢ አካሌ ይግባ የሚል ትዕዛዝ ለጥበቃ ሠራተኞች በመሰጠቱ  ውጤታማ ሥራ መስራት አልተቻለም፡፡
  • በግብረ ኃይል ደረጃ የተከናወኑና ያልተከናወኑ ተግባራት ተለይተው እንዲቀርቡና ያልተከናወኑና ጊዜ የማይሰጡ ተግባራት በአፋጣኝ እንዲከናወኑ የማድረግ ሥራ ተሰርቷል፡፡
  • የቋሚ ሲኖዶስ ውሳኔዎች በአስቸኳይ ጊዜ አዋጁ ሰበብ መሸራረፋቸው አግባብ አለመሆኑን በመገምገም አሁን በከተማዋ የሚታየውን የህዝብ እንቅስቃሴ በአብያተ ክርስቲያናት ያለውን ያልተጠየቀ የፖሊስ ጣልቃ ገብነትና የቤተክርስቲያን ቀኖናዊ አገልግሎት መቋረጥን በተመለከተ ቋሚ ሲኖዶስ ውሳኔ መስጠት እንዲችል ለማድረግ አራት ገጽ ያለው የውሳኔ ሀሳብ ለብፁዕ ወቅዱስ ፓትርያርክና ለጠቅላይ ሥራ አስኪያጁ አቅርቧል፡፡
  1. ቴክኒክ፣አደጋ ዝግጁነት እና ትንበያ ንዑስ ግብረ ኃይልን በተመለከተ፡-
    • በከፍተኛ የህክምና ስፔሻሊስት ሀኪሞች ስለ ኮቪድ 19  በሽታ መከላከል በቤተክርስቲያን እንዴት ይተገበራል የሚል የስልጠና ማሰልጠኛ መመሪያ አዘጋጅቷል
    • በአዲስ አበባ የደብር አስተዳዳሪዎችን እና የስብከተ ወንጌል ኃላፊዎችን በሽታው በቤተክርስቲያን እንዳይከሰት እና እንዳይስፋፋ የቤተክርስቲያን አባቶችንም በችግሩ እንዳናጣ የሚያግዝ የግማሽ ቀን ስልጠና በባለሞያዎች ተሰጥቷል፡፡ በድጋሚ ለሁለተኛ ዙር የሰባኪያነ ወንጌል ስልጠናና ውይይት በባለሞያዎች ተሰጥቷል፡፡የማሰልጠኛ ሰነዱ ወደ አጥቢያ ቤተክርስቲያን እንዲደርስ ተደርጓል፡፡
    • የምግባረ ሰናይ ሆስፒታልን የለይቶ ማከሚያ (Isolation and Treatment Center) በሚያስፈልገው መስፈርት መሠረት ገምግሟል፡፡ ኮቪድ 19 በሽታን ለማከምም ሆነ ለይቶ ለማቆያ በጣም ብዙ የሚጎድለው ነገር ስላለ እንዴት እንደሚሻሻል የራሱን ፕሮፓዛል ሰርቶ አቅርቧል፡፡  በተጨማሪ ሆስፒታሉ በላቀ ደረጃ ጠቅላላ አገልግሎቱን የሚሰጥበትን ጥናት እና የበጀት ቀመር አዘጋጅቷል፡፡
    • ለአባቶች ጊዚያዊ ለይቶ ማቆያ (quarantine center) የሚያስፈልግውን ዝግጅት ሰርቷል፡፡ ሊቃነ ጳጳሳት (አባቶች) ከውጪ ሀገር ከጉዞ ሲመለሱ ወይንም የህመም ምልክት ሲታይባቸው አሁን እየተለዩ ያሉት በሆቴሎች ልክ እንደ ሌላው ኅብረተሰብ ነው፡፡ይህም ለመንፈሳዊ አገልግሎት የተመቸ ካለመሆኑም በላይ የሚሰጠው አገልግሎት አባቶችን ያማከለ አይደለም፡፡ ለዚህ የሚሆን ቦታ መረጣ እና ማቆያው ሊያሟላ የሚገባውን ዝርዝር ጉዳዮች ግብረ ኃይሉ ሰነድ አዘጋጅቶ አስገብቷል፡፡
    • ሞት እና ፍትሃት ጋር ተያይዞ ሊነሱ የሚችሉ ጉዳዮችን በተመለከተ በአለም ጤና ድርጅት እንዲሁም የኢትዮጵያ መንግስት ካዘጋጃቸው ሰነዶች ጋር የተገናዘበ እንዲሁም ቀኖና ቤተክርስቲያንን ያገናዘበ ሰነድ አዘጋጅቷል፡፡ ሰነዱም አባቶች በፍትሃት ጊዜ በበሽታው እንዳይያዙ ሊያደርጉት ስለሚገባ ጥንቃቄ፣የቀብር ቦታ በተመለከተ፣ እግዚአብሔር ያርቅልን እና በከፍተኛ ሁኔታ ሞት ቢከሰት ሊደረግ የሚችል አማራጭ ተግባራት የያዘ ነው፡፡
    • ምእመናን እና ካህናት (በአጠቃላይ ኅብረተሰቡ) ቤቱ ተቀምጦ የራሱን ጤንነት የሚፈትሽበት የ eotccovid 19 bot የኮቪድ 19 በሽታ ጠቋሚ እና ምክር የሚሰጥ መተግበሪያ (self-screening tool) ሰርቶ አጠናቋል፡፡ይህም ለሀገር በከፍተኛ ሁኔታ የሚጠቅም መተግበሪያ ሲሆን በጥቅም ላይ ሲውል ወረርሽኙን በቶሎ ለማወቅ እና ለመከላከል ከፍ ያለ ጥቅም ይኖረዋል፡፡
    • የቤተክርስቲያናችንን ምእመናን እና አባቶች ለወረርሽኙ ተጋላጭነት እና ወረርሽኙ በስፋት ቢከሰት የመቋቋም አቅም የመገምገሚያ እና የመረጃ መሰብሰቢያ ቅጽ (portal) ተዘጋጅቶ ተጠናቅቋል፡፡ ይህንንም በመጠቀም በሚሰበሰበው መረጃ በከፍተኛ ሁኔታ ሊጠቁ የሚችሉ አድባራትንና ገዳማትን በመለየት አስቸኳይ መፍትሄ ለመስጠት ይረዳል፡፡
    • በዚህ ፖርታል ስለ ወረርሽኙ ለአገልጋዮች እና ኅብረተሰቡ መረጃ መስጠት፣ ማስተማር፣ ከሀገር ውጪ እንዲሁም ከሀገር ውስጥ ድጋፍ ማሰባሰብ ይቻላል፡፡
  1. የድጋፍ አሰባሳቢና ፋይናንስ ንዑስ ግብረ ኃይልን በተመለከተ፡-
    • ንዑስ ክፍሉን በሰው ኃይል አደራጅቷል፤ በዕቅዱ መሰረትም ስራዎችን አከፋፍሎ እየሠራ ይገኛል።
    • የእርዳታ ማሰባሰቢያና መረካከቢያ ቅጽ ተዘጋጅቷል። ይህም በኢንተርኔት አማካይነት ገንዘብ ለመሰብሰብ እንዲረዳ ከICT ቲሙ ጋር ስራዎች ተሠርተዋል። ከዚህ በተጨማሪ የገንዘብ እርዳታ ማሰባሰቢያ የባንክ አካውንቶች በሶስት ባንኮች እንዲከፈቱ ውሳኔ ተሰጥቶበታል።
    • የተለየ ድጋፍ የሚያስፈልጋቸውንና ቅድሚያ የሚሰጣቸውን አካላት ለይቷል። በዚህም መሰረት እንደቅደም ተከተላቸው ገዳማት፣ አብነት ትምህርት ቤቶች፣ አቅም የሌላቸው አድባራት፣ ቤተክርስቲያኒቱ በምታስተዳድራቸው የህጻናትና አረጋውያን መርጃዎች ውስጥ ያሉ ህጻናትና አረጋውያን እና ቤተክርስቲያንን ተጠግተው የሚኖሩ ነዳያን ድጋፍ የሚያስፈልጋቸው አካላት እንደሆኑ ተለይተዋል።
    • በተለየ ሁኔታ ሊጎዱ ይችላሉ የተባሉ ገዳማት ከቤተክርስቲያኒቱ ልማትና ተራድኦ ኮሚሽንና ከገዳማት መምሪያ ጋር በመሆን ተለይተዋል።
    • ለደረቅ ምግቦችና ለጽዳት ግብኣቶች መግዣ የሚሆን 4.2 ሚሊዮን ብር እርዳታ ከልማት ኮሚሽኑና ከሌሎች አካላት ጋር በመሆን ለ 51 ገዳማት ተደልድሎ ተግባራዊ እየሆነ ነው።
  1. የትምህርት፣የሚዲያና የሕዝብ ግንኙነት ንዑስ ግብረ ኃይልን በተመለከተ
    • የትምህርት፣ ሚዲያና ሕዝብ ግንኙነት ንዑስ ኮሚቴ የኮቪድ 19 የተስፋ ልዑክ ግብረ ኃይል በቤተ ክርስቲያኒቱ ደረጃ መቋቋሙንና የሚያከናውናቸውን ዋና ዋና ተግባራት በመግለጽ ህዝበ ክርስቲያኑ መረጃ ይኖረው ዘንድ በቤተክርስቲያኒቱ መገናኛ ብዙኃንና በመንግሥት የመገናኛ ብዙኃኑ አማካኝነት ተደጋጋሚ መግለጫ ሰጥቷል፡፡
    • በወረርሽኙ ስርጭት ዙሪያ በቤተ ክርስቲያን እና በህዝበ ክርስቲያኑ ዘንድ መደረግ ስለሚገባቸው ጥንቃቄዎች በአባቶች በኩል ተደጋጋሚ መግለጫ እንዲሰጥ አድርጓል፡፡
    • የግብረ ኃይሉ አካላት ለተለያዩ ሥራዎች በሚንቀሳቀሱበት ጊዜ ችግር እንዳይገጥማቸው ጊዜያዊ መታወቂያና የመኪና ይለፍ አዘጋጅቶ ሰጥቷል፡፡
    • በወረሽኙ ዙሪያ ሃይማኖታዊ መልዕክት የሚያስተላልፉ አባቶች፣ ሊቃውንተ ቤተክርስቲያን እና ሰባኪያነ ወንጌልን በማዘጋጀት የግንዛቤ ማስጨበጫ መልዕክቶች በኢትዮጵያ ኦርቶዶክስ ተዋሕዶ ቤተክርስቲያን መገናኛ ብዙኃን አማካይነት እንዲሰጥ አድርጓል፡፡
    • በኢትዮጵያ የሃይማኖት ተቋማት ጉባኤ አማካኝነት የታወጀውን የአንድ ወር የጸሎት መርሐ ግብር ተከትሎ በቴሌቪዥን ያሚያስተምሩ ሰባኪያንን ከብፁዕ አቡነ ማቴዎስና ከስብከተ ወንጌልና ሐዋርያዊ ተልዕኮ መምሪያ ኃላፊ ጋር በመሆን ሁሉንም የቤተ ክርስቲያኒቱን አገልጋዮች በአዲስ አበባ እና ከአዲስ አበባ ውጭ ያሉ ሊቃውንትን ጨምሮ አሳታፊ በሆነ መልኩ የመምህራን ድልድል ተደርጓል፡፡
    • ለአንድ ወር የታወጀውን የጸሎት መርሐ ግብር ተከትሎ የቀጥታ ሥርጭት የሚተላለፍባቸውን አብያተ ክርስቲያናት ከበዓላት አንጻር ጭምር በመደልደል ቀረጻ እንዲከናወንና በቀጥታ ሥርጭት አማካይነት እንዲተላለፍ ተደርጓል፡፡
    • ሕዝበ ክርስቲያኑ አስቀድሞ የጸሎት መርሐ ግብር የሚካሔድባቸውን አብያተ ክርስቲያናትና ሰባኪያነ ወንጌሉን እንዲያቅና መርሐ ግብሩን በጉጉት እንዲጠባበቅ ማድረግ ይቻል ዘንድ በመገናኛ ብዙኃንና በግብረ ኃይሉ ማኅበራዊ ድርገጽ አማካኝነት የማስተዋወቅ ሥራ ተሠርቷል፡፡
    • በቋንቋ የሚተላለፉ የስብከት መርሐ ግብሮች በየቋንቋቸው በቂ ክሂሎትና ተቀባይነት ያላቸው ስባኪያነ ወንጌል እንዲሳተፉበት አድርጓል፡፡
    • ከመንግሥት ከፍተኛ የሥራ ኃላፊዎች ከሃይማኖት ተቋማት ጉባኤና ከመገናኛ ብዙኃን የሥራ ኃላፊዎች ጋር ቀጥተኛ ግንኙነቱን የሥራ ግምገማ በማካሔድ በሚዲያው ዘርፍ ቤተክርስቲያኒቱ የተሻለ ሥራ እንዲትሠራ አድርጓል፡፡
    • የጸሎት ሥነ-ሥርዓት እንዲያስተላልፉ ከተመደቡ የሚዲያ ተቋማት ጋር በስምምነት በመስራት የተጣለበትን ኃላፊነት ተወጥቷል፡፡
    • የቀጥታ ሥርጭትና የፕሮዳክሽን የጸሎት የትምህርት መርሐ ግብሮችን እንዲያስተባብሩ በተመደቡ የንዑስ ኮሚቴው አባላት አማካኝነት ውጤታማ ሥራዎችን ከመሥራቱም ባሻገር የሚሰጡት ግብረ መልሶች በመገምገምና ወቅታዊ ማስታወቂያዎችን በማድረግ የማስትካከያ ሥራዎችን ሰርቷል፡፡
    • የማታውን የጸሎት የትምህርት መርሐ ግብር በተመለከተ በስብከተ ወንጌል አገልግሎት እንዲሰጡ በብፁዕ አቡነ ያሬድ የመንበረ ፓትርያርክ ጠቅላይ ጽ/ቤት ዋና ሥራ አስኪያጅ፣ የሰበካ ጉባኤ ማደራጃ መመሪያና የአርሲ ሀገረ ስብከት ሊቀ ጳጳስ እና በብፁዕ አቡነ ማቴዎስ የስብከተ ወንጌል እና የሐዋርያዊ ተልእኮ መምሪያ የመገናኛ ብዙኅን ድርጅት የበላይ ሊቀ ጳጳስ አባታዊ መመሪያ መሠረት ከስብከተ ወንጌል መምሪያ፣ ከሊቃውንት ጉባኤ፣ ከግብረ ኃይሉ ጋር በመሆን በሁሉም ሚዲያዎች የሚያስተምሩ መምህራንን ዝርዝር በማውጣት ዐሥር ብፁዓን አባቶች የመምሪያ ኃላፊዎች፣ ከሊቃውንት ጉባኤ፣ ከስብከተ ወንጌል ሐዋርያዊ ተልእኮ መምሪያ፣ ከሦስቱ መንፈሳዊ ኮሌጆች፣ ከአዲስ አበባ ሀገረ ስብከት፣ ከማኅበረ ቅዱሳን እና ከበጎ ፈቃድ መምህራን ሁሉንም ባሳተፈ መልኩ አማረኛን ጨምሮ በልዩ ልዩ የሀገራችን ቋንቋዎች በአጠቃላይ በ30 ቋንቋዎች ማለትም(ሴማዊ፣ ኩሻዊ፣ ናይላዊና ኦሟዊ ከሆኑት ኢትዮጵያዊ ቋንቋዎች፤ በአማርኛ፣ በኦሮምኛ፣ በትግርኛ፣ በጋሞኛ፣ በወላይትኛ፣ በጉራጊኛ፣ በሶማሌኛ፣ በሲዳምኛ፣ በሶዶ ክስታኔኛ፣ በጉምዝኛ፣ በከምባትኛ፣ በአገውኛ፣ በአዊኛ፣ በዶርዝኛ፣ በከፍኛ፣ በሐዲይኛ፣ በቡርጂኛ፣ በጌዲዮኛ፣ በዛይኛ፣ በአፋርኛ፣ በየምኛ፣ ማሌ፣ ቤንችኛ፣ ሐመርኛ፣ ዳሰነችኛ፣ አሌኛ፣ በናኛ እና በአሪ በኮንሶ እና በደራሽኛ) ከውጪ ቋንቋ ደግሞ በእንግሊዝኛ ቋንቋ የስብከተ ወንጌል አገልግሎት እንዲሰጥ ተደርጓል፡፡ በዚህም ቅድስት ቤተ ክርስቲያን ላዕለ ኩሉ የሆነች፣ የሁሉም እናት መሆኗን መላው ዓለም እንዲረዳ በማድረግ ትልቅ ኃላፊነትን ተወጥቷል፡፡ በቀጣይ ፈረንሳይኛ፣ አረብኛን ጨምሮ ከአምስት በላይ በሆኑ በውጭ ቋንቋዎች እና ከዐሥር በላይ በሆኑ ብሔራዊ ቋንቋዎች ለመስበክ ተዘጋጅተናል፡፡
    • የቀጥታ ሥርጭትን በተመለከተ በኒቆዲሞስ እሁድ ጀምሮ ያለማቋረጥ በየሰንበቱ ሥርዓተ ቅዳሴን በቀጥታ ሥርጭት፣ ሙሉ ሰሙነ ሕማማትን፣ (በባላገሩ፣ በኢ/ኦ/ተ/ቤ/ ዋናው ቴሌቪዥን፣ በማኅበረ ቅዱሳን) የጸሎተ ሐሙስ፣ የዐርብ ሥቅለት ትንሣኤ፣ እና እስከ አሁን ያሉ ሰንበታትን በአዲስ ቴሌቪዥን፣ በመንበረ ፓትርያርክ ቴሌቪዥን እና በማኅበረ ቅዱሳን ቴሌቪዥን በመላው ዓለም በማሠራጨት በሀገር ውስጥም በውጭ ሀገርም ያሉ ምእመናንን ለማገልገል ተችሏል፡፡
    • ከጤና ሚንስትር ጋር በመተባበር እስከ 400 000 (ዐራት መቶ ሺህ) ብር የሚያወጣ 20 000 (ሃያ ሺህ) ብዛት ያለው የማስተማሪያ ፖስተሮችን በሁሉም አህጉረ ስብከት ለማሠራጨት ዝግጅት አጠናቀናል፡፡
    • ከጥንት ጀምሮ በሀገራችን ልዩ ልዩ ወረርሽኝ ሲከሰት ቅድስት ቤተ ክርስቲያን ምን ዓይነት የመከላከል፣ የመፈወስ፣ የማጽናናት፣ የማስተማር ድርሻ እንደነበራት የሚያሳይ ጥናታዊ ዘጋቢ ፊልም አጠናቀን በልዩ ልዩ ክፍሎች ይቀርባል፡፡
    • የበሽታው ሥርጭት እያደገ ከመጣ አስፈላጊ በሆኑ የጤና ጉዳዮች እና መንፈሳዊ ጉዳዮች መረጃ ለመስጠት የሚያስችል አጭር ነጻ የስልክ ቁጥር ከቴሌኮሙኒኬሽን በመጠየቅ መልስ እየጠበቅን እንገኛለን፡፡
    • በዚህም በሚዲያ የተደገፈ ለአድባራት እና ገዳማት መርጃ የሚሆን ዕቅድን በተጨማሪ አዘጋጅተናል፡፡
  1. የአህጉረ ስብከት አስተባባሪን ንዑስ ግብረ ኃይልን በተመለከተ፡-

5.1. ንዑስ ኮሚቴውን በሰው ኃይል በማደራጀት እና አህጉረ ስብከትን በመከታተል ድጋፍና ክትትል የሚያደርግ ቡድን በማቋቋም ወደ ሥራ ከመግባቱም በላይ ተግባራቱን በየጊዜው እየገመገመ ይገኛል፡፡

5.2. የአህጉረ ስብከትን የሥራ ክንውን ለመከታተል የሚያስችለውን የመከታተያ ቅጽ   አዘጋጅቷል፡፡

5.3. በአህጉረ ስብከት ደረጃ የአህጉረ ስብከት ግብረ ኃይል እንዲቋቋም አድርጓል፡፡ ድጋፍም ሰጥቷል፡፡

5.4. አብዛኛውን አህጉረ ስብከት ያካተተ የቴሌግራም ግሩፕ በመፍጠር በቋሚ ሲኖዶስ የሚሰጡ ውሳኔዎችን እና የተለያዩ መረጃዎችን በፍጥነት እንዲደርሳቸውና በውሳኔው መሰረት ወደ ሥራ እንዲገቡ የማድረግ ሥራ ሰርቷል፡፡

  1. ያጋጠሙ ችግሮች፡-  

    6.1. አንዳንድ አህጉረ ስብከት ግብረ ኃይል ለማቋቋም መዘግየታቸው እና በራሳቸው ለመንቀሳቀስ መወሰናቸው ለምሳሌ ጋምቤላ፣ ጊምቢ እና ከፋ አህጉረ ስብከት በዚህም የተነሳ ሥራዎችን በፍጥነት ለማከናወን ችግር ፈጥሯል፡፡   

6.2. የአዲስ አበባ ሀገረ ስብከት ዋና ሥራ አስኪያጅ የግብረ ኃይሉ አካል ቢሆንምአንድም ጊዜ በሥራ ላይ አለመገኘታቸው የሀገረ ስብከቱን ግብረ ኃይል ተቋማዊ በሆነ መንገድ አለመምራታቸውና በቋሚ ሲኖዶስና በግብረ ኃይሉ የሚሰጡ የሥራ መመሪያዎችን በአግባቡና በስፋቱ ተግባራዊ አለማድረጋቸው፡፡

6.3. በአዲስ አበባ ሀገረ ስብከት በኩል የሚታየው ዳተኝነትና ሥራውን ተቋማዊ በሆነ መልኩ ለመሥራት ፈቃደኛ አለመሆን በአዲስ አበባ ሀገረ ስብከት ባሉ አድባራትና ገዳማት ዙሪያ ለሚታዩ የአፈጻጸም ችግሮች እርሱን ተከትሎ ለሚነዙ መሰረተ ቢስ አሉባልታዎችና ዘለፋዎች እንዲሁም አላስፈላጊ ህገ-ወጥ መደራጀቶች ምክንያት ሆኗል፡፡

6.4. የግብረ ኃይሉ የድጋፍ አሰባሳቢ እና ፋይናንስ ኮሚቴ ሥራውን በወቅቱ እንዳይጀምር የባንክ አካውንት በወቅቱ አመለከፈቱ፡፡

6.5.  ከግብረ ኃይሉ የሥራ እንቅስቃሴ ጋር በተያያዘ በተለይም የአብያተ ክርስቲያናት መዘጋት እና ፖሊስ መቆምን ግብረ ኃይሉ ሆን ብሎ እንዳደረገው በማስመሰል ከፍተኛ የስም ማጥፋት ዘመቻ መካሔዱ፡፡

6.6. የጸሎትና የስብከተ ወንጌል መርሐ ግብር እኔ ከማስተዳድረው ደብር ለምን አይተላለፍም በሚል መርሐ ግብሩን ራስን ለማስተዋወቂያ ለማዋል መፈለግ እንዲሁም ለምን እከሌ አልሰበከም፣ለምን እኔ አልሰበኩም የሚሉ ጥያቄዎቸን በማንሳት በወጣው መርሐ ግብር እንደሚካሄድ ሲነገራቸው ማስፈራራትና የስም ማጥፋት ዘመቻዎች በግብረ ኃይሉና በግብረ ኃይሉ አባላት ላይ መድረጉ፡፡

  • በቋሚ ሲኖዶስ ውሳኔ የተቋቋመውን ግብረ ኃይል በመንግሥት በጎ ፈቃድ እንደተቋቋመና ከቤተክርስቲያን ይልቅ ለመንግሥት ውክልና ይዞ እንደሚሰራ በማስመሰል የግብረ ኃይሉን አባላት ሞራል ለመንካትና ሥራቸውን ተረጋግተው እንዳይሰሩ ለማድረግ ከፍተኛ የሐሰት የስም ማጥጋት ወንጄል መካሔድ ዋና ዋናዎቹ የግብረ ኃይሉ ፈተናዎች ናቸው፡፡
  • መንግሥት የአስቸኳይ ጊዜ አዋጅ ካወጀበት እና ተግባራዊ ማድረግ ከጀመረበት ጊዜ ጀምሮ ማንም እገዛ ሳይጠይቃቸው የፖሊስ ኃይሎች በቤተ ክርስቲያን በር ላይ በመቆም የቤተ ክርስቲያኒቱ ሃይማኖታዊ ሥርዓተ አምልኮ በሚጻረር መልኩ ጥንቃቄ አድርገው የሚያገለግሉ የዘወትር ልዑካን ወደ ቤተ ክርስቲያን ገብተው በተወሰነው ቁጥር መጠን አገልግሎት እንዳያከናውኑ፣ ምእመናንም በአጸደ ቤተ ክርስቲያን ተገኘው ቅድስት ቤተ ክርስቲያን ከምትሠጠው ምሥጢረ ቁርባን እንዳይሳተፉ፣ የክርስትና (ጥምቀተ ክርስትና)፣ ሌሎች ምሥጢራት፣ ሥርዓተ ፍትሐት እንዳያገኙ ከፍተኛ የሆነ የኃይል እርምጃዎች እየወሰዱ፣ እየተሳደቡ፣ እየደበደቡ ምእመናኑን እያስቸገሩ ይገኛሉ፡፡ ይህንንም የሚያደርጉት በራሳቸው ተነሳሽነት እና ቤተ ክርስቲያናችንን ዝቅ ያደረጉ በመሰላቸው የሌላ እምነት ተከታዮች ነው፡፡ ለማሳያ ያህል ከጸሎተ ሐሙስ እስከ ትንሣኤ ባሉት ሦስት ቀናት ብቻ በአንዳንድ አጥቢያዎች የተፈጠሩ አግባብነት የሌላቸውን ድርጊቶች እንደሚከተለው እናቀርባለን፡፡

 ላፍቶ ደ/ት/ቅዱስ ሚካኤል ቤተ ክርስቲያን

በ09/08/2012

የደብሩን ዋና ጸሐፊ መጋቤ ሥርዓት ሀብቱ መረሳ በዋናው በር ላይ የተመደበው ፌደራል ፖሊስ አላስገባም ብሎ መልሷቸዋል። አስቸኳይ መውጣት ያለበት ደብዳቤ እንዳለ ቢያስረዱም በዱላ እጃቸውን መቶ አባሯል።

በዕለቱ ሌሎች ብዙ የተደበደቡ ምእመናንም አሉ

በ10/08/2012

ከቤተ ክርስቲያን ቅጽር ውጪ ቄጤማ የሰጡ ቄሰ ገበዝ ኪዳነ ማርያም ለምን እንዲህ ታደርጋላችሁ በሚል በፖሊስ በመኪና ተጭነው ከወሰዷቸው ከተወሰነ ሰዓት በኋላ በማስጠንቀቂያ ተለቀዋል። እንዲሁም በዕለቱ የተደበደቡ እና የተገፈተሩ እናቶችም እንዳሉ የዐይን እማኞች አሉ።

በደብሩ በር ላይ ሱቅ ውስጥ የሚሠራ ዲ/ን ኤፍሬም የተባለ ልጅ ለምን እንዲህ ታደርጋላችሁ በማለቱ በዕለቱ እንደታሰረ እስከ አሁን አልተፈታም (ላፍቶ 1ኛ ደረጃ ት/ቤት ይገኛል)

እንዲሁም በዚያኑ ዕለት ለፍትሐት የመጣ አስክሬን ሁሉ አናስገባም ባሉ የፖሊስ ኃይሎች ተመልሷል።

በ12/08/2012

ምንም ምእመን ወደ ቅጽረ ቤተ ክርስቲያን አልገባም፤ ነገር ግን እየተሳለመ የሚመለሰውን ሰው መባዕ እና ስእለት ለመቀበል የወጡ ቄስ ብርሌ የሚባሉ አባት ሲሆኑ በሰዓቱ የመጡት ፖሊሶች በር ላይ ያገኙትን ሰው በከፊል ደብድበው ካባረሩ በኋላ አንዱ ሳጅን (የዕለቱ ሺፍት ኃላፊ ሳይሆን አይቀርም) የቅዱስ ሚካኤልን ሥዕል በዱላው ይመታዋል በቦታው የነበሩት ቄስም “ተው እባክህ እንዲህ አታድርግ” ቢሉትም ድጋሚ በዱላው ወደ መሬት ወርውሮታል።

ይህ ሲሆን ያዩ ምእመና በለቅሶ እና ዋይታ ሐዘናቸው ሲገልጡ ጭራሽ ቄሱን “አንተ ነህ ሕዝቡን የምታሳምፅ፣ ገና አለቅህም” ብሎ ወደ ፖሊስ ጣቢያ ወስዷቸዋል። በመቀጠልም ሕዝበ ምእመኑ በብዛት ወደ ፖሊስ ጣቢያው በመሄድ አስፈትተዋቸዋል።

በወቅቱ ሥዕሉን የደበደበው ፖሊስ በጣም ጠጥቶ እንደነበር አፉ ሁሉ ይተሳሰር እንደነበር በወቅቱ ያናገሩት ሰዎች ገልጸዋል።

በአጠቃላይ በደብሩ አካባቢ እየተደረገ ያለው ጉዳይ ሕግ ከማስከበር በላይ ወደ መብት ጥሰት የገባ ተግባር ነው።

ሐመረ ኖኅ እንጦጦ ኪዳነ ምሕረት ቤተ ክርስቲያን

በ10/08/12

በእንጦጦ ኪዳነ ምሕረት ማታ ለመቁረብ የመጡ ምእመናንን ላይ አላስፈላጊ በሆነ ውክቢያና ግፍተራ  ከመፈጸሙ ባሻገር ወደ ቅጽሩ አትገቡም በማለት ከአዋጁ ውጪ ተጽዕኖ በማሳደራቸው ምእመናን እንዳይቆርቡ ተከልክለዋል። በተጨማሪም አገልጋይ መነኮሳትና ዲያቆናት እንዲሁም ክርስትና የሚያስነሡ ምእመናንን ወደ ውስጥ እንዳይገቡ ተደርጓል።

በ15/08/12

በዚሁ ገዳም እናትና ልጅ ላይ ከፍተኛ ወከባ ከመፈጸሙም በላይ አገልጋዮችን እንዳይገቡ አግደዋል የተስፋ ግብረ ኃይሉን ባለመስማት ቤተ ክርስቲያኒቱ ላይ ጫና ፈጥረዋል።

መንበረ ልዑል ቅዱስ ማርቆስና ቅዱስ ሚካኤል ቤተ ክርስቲያን

በ09/08/12

ቀዳሽ አገልጋዮችን ወደ ቅጽረ ቤተ ክርስቲያን እንዳይገቡ ከልክለዋል። በወቅቱ ከቤተ ክርስቲያኑ በር ላይ ለጥበቃ የቆመው አንደኛው ፖሊስ የፕሮቴስታንት መዝሙር በስልኩ እያደመጠ ምእመናንን አትገቡም በማለቱ በምእመናን ዘንድ ከፍተኛ ተቃውሞ የተነሣ ሲሆን በወቅቱ ኮሚሽነር ጌጡ ጋር ተደውሎ ሁኔታውን በቦታው የነበሩ የተስፋ ልኡክ ግብረ ኃይሉ እንዲረግብ አድርገውታል። ሆኖም በነጋታው ወደ ጣቢያ በመሄድ በአዳር ላይ የነበሩ ፖሊሶችን አስቀርበው ጥፋት የፈጸመውን ፖሊስ ጠቁመው ፖሊሳዊ እርምጃ እንደሚወሰድበት ተነግሯቸው ተመልሰዋል። እስካሁን በፖሊሱ ላይ የተወሰደ ርምጃ ስለ መኖር አለመኖሩ በጉዳዩ ላይ ይፋ የወጣ መረጃ አልደረሰንም።

ማኅደረ ስብሐት ቅድስት ልደታና መድኀኔ ዓለም ቤተ ክርስቲያን

በ08/08/12

በተፈጠረው አላስፈላጊ ሁካታ አንድ የፌዴራል ፖሊስ እስከ ጫማው ወደ ቤተ መቅደስ በመግባት ሥርዓተ ቤተ ክርስቲያንን መናቁን በግልጽ አሳይቷል።

ላፍቶ ፈለገ ብርሃን ቅድስት ሥላሴ ቤተ ክርስቲያን

በ08/08/2012 ዓ.ም

በቦታው የተመደቡት ፖሊሶች ለቁርባን የመጡ ምእመናን ወደ ቅጽረ ቤተ ክርስቲያን እንዳይገቡ በመከልከልና ድብደባም ለመፈጸም በመነሣሣት ሕዝበ ክርስቲያኑ ላይ ጫና ሲፈጥሩ ነበር።

አያት ጣፎ ቅዱስ ገብርኤል ቤተ ክርስቲያን

በ08/08/2012 ዓ.ም

በቦታው የተመደቡት ፖሊሶች ለቁርባን የመጡ ምእመናን ወደ ቤተ ክርስቲያን እንዳይገቡ በመከልከላቸው በአንዳንዶችም ላይ የመገፍተርና የማባረር ድርጊቶችን በመፈጸማቸው ምእመናን ቅዱስ ቁርባን በሰንበት ት/ቤት አዳራሽ ለመቀበል ተገደዋል።

በአጠቃላይ በጥበቃነት የተመደቡት አንዳንድ የፖሊስ አካላት የታዘዙበትን ዓላማ በመተው ምእመናን ለቁጣ የሚጋብዙ ድርጊቶችን ሲፈጽሙ እንደነበር ከላይ በተጠቀሱት አጥቢያዎች የተከሰቱት ሁነቶች ማሳያዎች ናቸው። ስለሆነም የፖሊስ ኃይልን የሚያሰማራው አካል ከመጣብን ወረርሽኝ በተጨማሪ ተጨማሪ ችግር የሚሆኑ ጉዳዮች ከመከሰታቸው በፊት በአግባቡ ማጤን ያለበት ጉዳዮች አሉ። የሚመደቡበት ቦታ ቤተ ክርስቲያን እንደመሆኑ መጠን ሌላ እምነት ያላቸው ፖሊሶች መመደባቸው እንኳን በምእመናን ዘንድ ትልቅ ቅሬታን ሊፈጥርና ሆን ተብሎ እኛን ለመጉዳት እየተሠራ ነው የሚል አንድምታ እየተሰጠው ስለሆነ ከዚህ ጀምሮ ጥንቃቄ የሚያሻቸውን ጉዳዮች በአጽንዖት ተመልክቶ መፍትሔ መሻት ያስፈልጋል።

  • የገጠር አብያተ ክርስቲያናት እና አንዳንድ ዝቅተኛ አቅም ያላቸው የአዲስ አበባ አጥቢያዎች ካህናት ደመወዝ

የወረርሽኙ ጠባይ በሰዎች መሰባሰብ እና በጋራ መሆን እንዲሁም በንክኪ የሚተላለፍ በመሆኑ የወረርሽኙን መዛመት ለመቆጣጠር እና ምእመናን እና ካህናት አባቶች ላይ ሊደርስ የሚችለውን ትልቅ ጉዳት ለማስቀረት በእለቱ ምሥጢራተ ቤተ ክርስቲያንን ከሚካፈሉ ምእመናን በስተቀር ሌሎች በቤታቸው እንዲጸልዩ መወሰኑ በገጠር እና በአንዳንድ በከተማዎች ዳር ላሉ አድባራት ፈተና ሆኖባቸዋል፡፡

ለማሳያ ያህል በምሥራቅ ሸዋ አገረ ስብከት አድአ አካባቢ ያሉ አጥቢያዎች ላይ የተደረገውን ጥናት ማየቱ ብቻ ችግሩ ምን ያህል አሳሳቢ እንደሆነ ይጠቁማል፡፡

የአድዓ ወረዳ ቤተክህነት 59 አቢያተ ክርስቲያናት ያሉት ሲሆን ቢያንስ በከተማ 420 በላይ አገልግይ እና በገጠር ደግሞ ከ360 በላይ በድምሩ 749 አካባቢ የሚሆኑ አገልጋዮች አሉ፡፡

 

ተ/ቁ

 

መክፍል የሚችሉት ወር ብዛት

 

የቤ/ክን ብዛት

 

ወር

 

የድጋፍ አይነት

1 ሶስት ወር ደሞዝ መክፈል የሚችሉ  ቤተ ክርስቲያናት  

4

ከሚያዚያ- ሐምሌ ገንዘብ፤እህል፤ጥራጥሬ፤የንጽህና ቁሳቁስ
2 ሁለት  ወር ደሞዝ መክፈል የሚችሉ  ቤተክርስቲያናት  

7

ከሚያዚያ- ግንቦት ገንዘብ፤እህል፤ጥራጥሬ፤የንጽህና ቁሳቁስ
3 አንድ  ወር ደሞዝ መክፈል የሚችሉ  ቤተክርስቲያናት  

18

የማዚያ ወር ብቻ ገንዘብ፤እህል፤ጥራጥሬ፤የንጽህና ቁሳቁስ
4 ግማሽ (1/2) ወር ደሞዝ መክፈል የሚችሉ  ቤተክርስቲያናት 14 የሚያዚያን ወር (1/2)መክፍል የሚችሉ ናቸው ገንዘብ፤እህል፤ጥራጥሬ፤የንጽህና ቁሳቁስ
5 ሚያዚያን ወር መክፍል የማይችሉ አቢያተክርስቲያናት  

16

የሚያዚያን ወር መክፈል የማይችሉ ናቸው ገንዘብ፤እህል፤ጥራጥሬ፤የንጽህና ቁሳቁስ
  1. ግብረ ኃይሉ የወሰዳቸው መፍትሔ፡-
  • ግብረ ኃይሉ በቋሚ ሲኖዶስ አማካኝነት ቤተክርስቲያኒቱ የጣለችበትን ከፍተኛ ታሪካዊ ኃላፊነት ከወረሽኙ መስፋፋትና አደጋ አንጻር ብቻ በመመልከት ሥራውን ማዕከል በማድረግ በተጠናከረ፣ተቋማዊ በሆነና የቤተክርስቲያኒቱን ሉዐላዊነት ማዕከል ባደረገ መልኩ በማከናወን ለተራ አሉባልታዎችና ውዥንብሮች ሳይንበረከክ ተግባራቱን በማከናወን ውጤታማ ሥራ ሰርቷል፡፡
  1. ወደፊት ቢደረጉ ብለን የምናቀርበው ምክረ ሐሳብ
    • ግብረ ኃይሉ በቀጣይ የሚሰራቸው ሥራዎች ላይ አባታዊ መመሪያ እና ቡራኬ እንዲሰጠን
    • ወረርሽኙ በጣም ፈጣን እንደመሆኑ ለውሳኔ የሚቀርቡ ጉዳዮችን በአስቸኳይ ቢወሰኑ
    • ለግብረ ኃይሉ አባታዊ ክትትል እና ድጋፍ ቢደረግለት እንዲሁም በየጊዜው ሪፖርት እንዲያቀርብ ቢደረግ
    • በሽታውን ለመከላከል እና ማህበራዊ ቀውሶችን ለመቋቋም በየአህጉረ ሰብከቱ እስከ አጥቢያ ድረስ ሊደራጁ የሚገባቸው ግብረ ኃይሎች ባልተደራጁበት ተደራጅተው ሕዝቡን እና ካህናቱን በማስተባበር የሥራ እንቅስቃሴ እንዲያደርጉ እና የሥራ እንቅስቃሴ ሪፖርት በቶሎ እንዲልኩ መመሪያ ቢሰጥ
    • በከፋ ሀገረ ስብከት ያለው ችግር ከፍ ያለና ሀገረ ስብከቱ ውስጥ ብዙ ሥራ አስኪየጆች ያሉበት እና ስራን ለማስፈጸም በጣም ፈታኝ የሆነበት፤ የሀገረ ስብከቱም ሊቀ ጳጳስ በተደጋጋሚ የጤና እክል በሀገረ ስብከታቸው ስለማይገኙ ግብረ ኃይሉን ለማቋቋም እና ሥራዎችን ለመከወን ትልቅ ችግር ፈጥሯል ይኸም ጉዳይ አስቸኳይ እልባት ቢሰጠው
    • የወረርሽኙ ማእከል አዲስ አበባ እንደመሆኑ መጠን የአዲስ አበባ ሀገረ ስብከት ጉዳይ በአስቸኳይ መፍትሄ ቢሰጠው
    • በየአጥቢያው በፖሊሶች የሚፈጠረውን ችግር ለመቅረፍ
      • ቤተ ክርስቲያን ምእመናንን ግንዛቤ የምታስጨብጥበት ተከታታይ መርሐ ግብራትን በመዘርጋት በሚዲያ ማድረስ
      • በተቋቋመው የተስፋ ግበረ ኃይል አማካኝነት ምእመናን ቀድመው ለመቁረብ እንዲመዘገቡ በማድረግ በዕለቱ ያለ ችግር እንዲገቡ ቢደረግ አሊያ አለባበሳቸውን ተመልክቶ የሚያስገባ ሰው ቢመደብ
      • የተስፋ ልዑክ ግብረ ኃይሉን የፖሊስ አካላት ዕውቅናውን እዲያከብሩለት ጥብቅ ትዕዛዝ እንዲተላለፍለት ቢደረግ
      • በቤተ ክርስቲያንም በጥበቃነት መቆማቸው አግባብ ስላልሆነ እነሱ መጠበቃቸው ቀርቶ ጥበቃውን አጥቢያው ኃላፊነት ወስዶ በ ሰንበት ት/ት ቤት ወጣቶች እና በአካባቢው ወጣቶች እንዲከናወን ቢጠየቅ
      • ይህ የማይቻል ከሆነ ደግሞ የእምነቱ ተከታይ የሆኑ እና የቤተ ክርስቲያኗን ሥርዓት ጠንቅቀው የሚያውቁ የፖሊስ አባላት ብቻ እንዲጠብቁ ቢደረግ
      • እነዚህ የፖሊስ አባላትም ቢሆኑ የቤተ ክርስቲያኑን ዙሪያ ከመጠበቅ በዘለለ ፖሊስ በጭራሽ ወደ ቅጽረ ቤተ ክርስቲያን እንዳይገቡ፣
      • መጠበቅ አለባቸው ከተባለ እንኳን በምእመናን ላይ ምንም አይነት የኃይል ርምጃ መውሰድ የሚችልበት አሠራር እንደሌለ ከተማ አስተዳድሩ ለፖሊሶች ትእዛዝ ቢሰጥ፣ የሚገጥሙ ችግሮችም ካሉ ከጠቅላይ ቤተ ክህነት እስከ አጥቢያው ከተቋቋመው ግብረ ኃይል ጋር በመነጋገር እንዲፈቱ ቢደረግ
      • እስካሁን ድረስ ጥፋት ያጠፉ የፖሊስ አካላት እንደጥፋታቸው መጠን ተገቢው ርምጃ ቢወሰድባቸው
    • የገጠር አብያተ ክርስቲያናት እና አንዳንድ ዝቅተኛ አቅም ያላቸው የአዲስ አበባ አጥቢያዎች ካህናት ደመወዝ በተመለከተ
      • ሀገረ ስብከቶች በሥራቸው ካሉ ወረዳዎች ጋር በመነጋገር በጣም በአስቸኳይ ተመሳሳይ ችግር ያለባቸውን አጥቢያዎች መረጃ ቢሰበስቡ
      • በተሰበሰበው መረጃ መሠረት አህጉረ ስብከት ለችግሩ ተጋላጭ የሆኑ አጥቢያዎችን ከራሳቸውም ካዝና ቢሆን በመክፈል ድጋፍ ቢያደርጉ
      • ይህን ማድረግ ለሚቸገሩ አቅም ለሌላቸው አህጉረ ስብከት ደግሞ ጠቅላይ ቤተ ክህነት በጥናት ላይ የተመሠረተ ልዩ ድጋፍ ቢያደርግ

ወስብሐት ለእግዚአብሔር

ቅዱስ ሲኖዶስ: የተዘጉ የቤተ ክርስቲያን በሮች ተከፍተው አገልግሎቱ በፀረ ኮቪድ-19 የጥንቃቄ ተግባራት እየተመራ እንዲፈጸም አዘዘ

EOTC Vs AA Police

  • ጠቅላይ ቤተ ክህነት ከመንግሥት ጋራ በመነጋገር ትእዛዙን እንዲያስፈጽም መመሪያ ሰጠ፤
  • አገልግሎቱን በጥንቃቄ ተግባራቱ መሠረት ለማስፈጸም አጥቢያዎች ሓላፊነቱን ይወስዳሉ
  • የሰንበት ት/ቤቶችን በማስተባበር፣ መንፈሳዊ አገልግሎቱ በአግባቡ እንዲከናወን ያደርጋሉ፤
  • ጥምቀቱ፣ ቊርባኑ፣ ተክሊሉ፣ ፍትሐቱ፥ርቀትን ጠብቆ በተገቢ የልኡካን ቁጥር ይፈጸማል፤

***

  • የቤተ ክርስቲያን በር በግድ እየተዘጋ በፖሊስ የሚደረገውን ጥበቃ ተቸ፤ ቋሚ ሲኖዶሱ፥ “በስሜ የተደረገ እንጂ የእኔ ውሳኔ አይደለም፤” ሲል አስተባብሏል፤
  • የጠቅላይ ቤተ ክህነት ፀረ ኮቪድ-19 የተስፋ ልኡክ ዐቢይ ግብረ ኀይል፣ ሪፖርቱን ለምልዓተ ጉባኤው አቅርቧል፤
  • አስቸኳይ ዐዋጁን በማስፈጸም ሰበብ ፖሊስ በአገልጋዮች እና ምእመናን ላይ የፈጸማቸው ጥቃቶች እና ማጥላላቶች ቅዱስ ሲኖዶሱን አሳዝኗል
  • ማንም እገዛ ሳይጠይቃቸው በበሯ ቆመው እየተሳደቡ እና እየደበደቡ ከፍተኛ የኀይል ርምጃ ከመውሰዳቸውም በላይ ሥርዐቷን የሚያጥላሉ የሌላ እምነት ተከታይ ፖሊሶችም እንዳሉበት በሪፖርቱ ተገልጿል፤
  • ከጸሎተ ሐሙስ እስከ ትንሣኤ ባሉት ሦስት ቀናት፣ ጥቃቱ እና ማጥላላቱ ተፈጸመውባቸዋል ያላቸውን ስድስት የአዲስ አበባ አድባራትንና ገዳማትን ሪፖርቱ በአስረጅነት አቅርቧል
  • የፖሊስ ኀይልን የሚያሰማራው አካል፥ መሰል ችግሮች እና ቅሬታዎች እንዳይደገሙ፣ ከዛሬ ጀምሮ ጥንቃቄ የሚያስፈልጋቸውን ጉዳዮች በአጽንዖት ተመልክቶ መፍትሔ እንዲሻ አሳስቧል፤
  • የአዲስ አበባ ሀገረ ስብከት፣ በቋሚ ሲኖዶሱ ውሳኔ መሠረት ግብረ ኃይሉን በወቅቱ አቋቁሞ ወደ ተግባር ባለመግባት ያሳየው ዳተኝነት፣ ለችግሩ አስተዋፅኦ ማድረጉን በሪፖርቱ የገለጸው ግብረ ኃይሉ፣ ምልዓተ ጉባኤው አስቸኳይ መፍትሔ እንዲሰጠው ጠይቋል፡፡

‡‡‡‡‡‡‡‡‡‡‡

የቅዱስ ሲኖዶስ ምልዓተ ጉባኤ፣ ዛሬ ረቡዕ፣ ግንቦት 5 ቀን ባካሔደው የቀትር በፊት ስብሰባው፣ በቋሚ ሲኖዶስ አማካይነት የቀረበውን፣ የጠቅላይ ቤተ ክህነት የፀረ ኮቪድ-19 ተስፋ ልዑክ ዐቢይ ግብረ ኀይል ሪፖርት አዳምጧል፡፡

በስምንት ዐበይት ነጥቦች ተለይቶ እና በ14 ገጾች ተጠናቅሮ የቀረበው ሪፖርቱ፣ ግብረ ኀይሉ በቋሚ ሲኖዶስ ከተቋቋመበት ካለፈው መጋቢት 12 ጀምሮ በማዕከል እና በአህጉረ ስብከት በየዘርፉ የተከናወኑ ተግባራትን አትቷል፡፡ በፖሊስ ተፈጽመዋል ያላቸውን አላስፈላጊ የኀይል እና የማጥላላት ድርጊቶችን በተመለከተም፣ በተ.ቁ. 6.8 እና 6.9 ከገጽ 9 እስከ 12 ድረስ እንደሚከተለው አስፍሯል፤


… መንግሥት የአስቸኳይ ጊዜ አዋጅ ካወጀበት እና ተግባራዊ ማድረግ ከጀመረበት ጊዜ ጀምሮ ማንም እገዛ ሳይጠይቃቸው የፖሊስ ኃይሎች በቤተ ክርስቲያን በር ላይ በመቆም የቤተ ክርስቲያኒቱ ሃይማኖታዊ ሥርዓተ አምልኮ በሚጻረር መልኩ ጥንቃቄ አድርገው የሚያገለግሉ የዘወትር ልዑካን ወደ ቤተ ክርስቲያን ገብተው በተወሰነው ቁጥር መጠን አገልግሎት እንዳያከናውኑ፣ ምእመናንም በአጸደ ቤተ ክርስቲያን ተገኘው ቅድስት ቤተ ክርስቲያን ከምትሠጠው ምሥጢረ ቁርባን እንዳይሳተፉ፣ የክርስትና (ጥምቀተ ክርስትና)፣ ሌሎች ምሥጢራት፣ ሥርዓተ ፍትሐት እንዳያገኙ ከፍተኛ የሆነ የኃይል እርምጃዎች እየወሰዱ፣ እየተሳደቡ፣ እየደበደቡ ምእመናኑን እያስቸገሩ ይገኛሉ፡፡ ይህንንም የሚያደርጉት በራሳቸው ተነሳሽነት እና ቤተ ክርስቲያናችንን ዝቅ ያደረጉ በመሰላቸው የሌላ እምነት ተከታዮች ነው፡፡ ለማሳያ ያህል ከጸሎተ ሐሙስ እስከ ትንሣኤ ባሉት ሦስት ቀናት ብቻ በአንዳንድ አጥቢያዎች የተፈጠሩ አግባብነት የሌላቸውን ድርጊቶች እንደሚከተለው እናቀርባለን፡፡ 

ላፍቶ ደ/ት/ቅዱስ ሚካኤል ቤተ ክርስቲያን

በ09/08/2012

የደብሩን ዋና ጸሐፊ መጋቤ ሥርዓት ሀብቱ መረሳ በዋናው በር ላይ የተመደበው ፌደራል ፖሊስ አላስገባም ብሎ መልሷቸዋል። አስቸኳይ መውጣት ያለበት ደብዳቤ እንዳለ ቢያስረዱም በዱላ እጃቸውን መቶ አባሯል። በዕለቱ ሌሎች ብዙ የተደበደቡ ምእመናንም አሉ፡፡

በ10/08/2012

ከቤተ ክርስቲያን ቅጽር ውጪ ቄጤማ የሰጡ ቄሰ ገበዝ ኪዳነ ማርያም ለምን እንዲህ ታደርጋላችሁ በሚል በፖሊስ በመኪና ተጭነው ከወሰዷቸው ከተወሰነ ሰዓት በኋላ በማስጠንቀቂያ ተለቀዋል። እንዲሁም በዕለቱ የተደበደቡ እና የተገፈተሩ እናቶችም እንዳሉ የዐይን እማኞች አሉ።

በደብሩ በር ላይ ሱቅ ውስጥ የሚሠራ ዲ/ን ኤፍሬም የተባለ ልጅ ለምን እንዲህ ታደርጋላችሁ በማለቱ በዕለቱ እንደታሰረ እስከ አሁን አልተፈታም (ላፍቶ 1ኛ ደረጃ ት/ቤት ይገኛል) እንዲሁም በዚያኑ ዕለት ለፍትሐት የመጣ አስክሬን ሁሉ አናስገባም ባሉ የፖሊስ ኃይሎች ተመልሷል።

በ12/08/2012

ምንም ምእመን ወደ ቅጽረ ቤተ ክርስቲያን አልገባም፤ ነገር ግን እየተሳለመ የሚመለሰውን ሰው መባዕ እና ስእለት ለመቀበል የወጡ ቄስ ብርሌ የሚባሉ አባት ሲሆኑ በሰዓቱ የመጡት ፖሊሶች በር ላይ ያገኙትን ሰው በከፊል ደብድበው ካባረሩ በኋላ አንዱ ሳጅን (የዕለቱ ሺፍት ኃላፊ ሳይሆን አይቀርም) የቅዱስ ሚካኤልን ሥዕል በዱላው ይመታዋል በቦታው የነበሩት ቄስም “ተው እባክህ እንዲህ አታድርግ” ቢሉትም ድጋሚ በዱላው ወደ መሬት ወርውሮታል።

ይህ ሲሆን ያዩ ምእመና በለቅሶ እና ዋይታ ሐዘናቸው ሲገልጡ ጭራሽ ቄሱን “አንተ ነህ ሕዝቡን የምታሳምፅ፣ ገና አለቅህም” ብሎ ወደ ፖሊስ ጣቢያ ወስዷቸዋል። በመቀጠልም ሕዝበ ምእመኑ በብዛት ወደ ፖሊስ ጣቢያው በመሄድ አስፈትተዋቸዋል። በወቅቱ ሥዕሉን የደበደበው ፖሊስ በጣም ጠጥቶ እንደነበር አፉ ሁሉ ይተሳሰር እንደነበር በወቅቱ ያናገሩት ሰዎች ገልጸዋል። በአጠቃላይ በደብሩ አካባቢ እየተደረገ ያለው ጉዳይ ሕግ ከማስከበር በላይ ወደ መብት ጥሰት የገባ ተግባር ነው።

ሐመረ ኖኅ እንጦጦ ኪዳነ ምሕረት ቤተ ክርስቲያን

በ10/08/12

በእንጦጦ ኪዳነ ምሕረት ማታ ለመቁረብ የመጡ ምእመናንን ላይ አላስፈላጊ በሆነ ውክቢያና ግፍተራ  ከመፈጸሙ ባሻገር ወደ ቅጽሩ አትገቡም በማለት ከአዋጁ ውጪ ተጽዕኖ በማሳደራቸው ምእመናን እንዳይቆርቡ ተከልክለዋል። በተጨማሪም አገልጋይ መነኮሳትና ዲያቆናት እንዲሁም ክርስትና የሚያስነሡ ምእመናንን ወደ ውስጥ እንዳይገቡ ተደርጓል።

በ15/08/12

በዚሁ ገዳም እናትና ልጅ ላይ ከፍተኛ ወከባ ከመፈጸሙም በላይ አገልጋዮችን እንዳይገቡ አግደዋል የተስፋ ግብረ ኃይሉን ባለመስማት ቤተ ክርስቲያኒቱ ላይ ጫና ፈጥረዋል።

መንበረ ልዑል ቅዱስ ማርቆስና ቅዱስ ሚካኤል ቤተ ክርስቲያን

በ09/08/12

ቀዳሽ አገልጋዮችን ወደ ቅጽረ ቤተ ክርስቲያን እንዳይገቡ ከልክለዋል። በወቅቱ ከቤተ ክርስቲያኑ በር ላይ ለጥበቃ የቆመው አንደኛው ፖሊስ የፕሮቴስታንት መዝሙር በስልኩ እያደመጠ ምእመናንን አትገቡም በማለቱ በምእመናን ዘንድ ከፍተኛ ተቃውሞ የተነሣ ሲሆን በወቅቱ ኮሚሽነር ጌጡ ጋር ተደውሎ ሁኔታውን በቦታው የነበሩ የተስፋ ልኡክ ግብረ ኃይሉ እንዲረግብ አድርገውታል። ሆኖም በነጋታው ወደ ጣቢያ በመሄድ በአዳር ላይ የነበሩ ፖሊሶችን አስቀርበው ጥፋት የፈጸመውን ፖሊስ ጠቁመው ፖሊሳዊ እርምጃ እንደሚወሰድበት ተነግሯቸው ተመልሰዋል። እስካሁን በፖሊሱ ላይ የተወሰደ ርምጃ ስለ መኖር አለመኖሩ በጉዳዩ ላይ ይፋ የወጣ መረጃ አልደረሰንም።

ማኅደረ ስብሐት ቅድስት ልደታና መድኀኔ ዓለም ቤተ ክርስቲያን

በ08/08/12

በተፈጠረው አላስፈላጊ ሁካታ አንድ የፌዴራል ፖሊስ እስከ ጫማው ወደ ቤተ መቅደስ በመግባት ሥርዓተ ቤተ ክርስቲያንን መናቁን በግልጽ አሳይቷል።

ላፍቶ ፈለገ ብርሃን ቅድስት ሥላሴ ቤተ ክርስቲያን

በ08/08/2012 ዓ.ም

በቦታው የተመደቡት ፖሊሶች ለቁርባን የመጡ ምእመናን ወደ ቅጽረ ቤተ ክርስቲያን እንዳይገቡ በመከልከልና ድብደባም ለመፈጸም በመነሣሣት ሕዝበ ክርስቲያኑ ላይ ጫና ሲፈጥሩ ነበር።

አያት ጣፎ ቅዱስ ገብርኤል ቤተ ክርስቲያን

በ08/08/2012 ዓ.ም

በቦታው የተመደቡት ፖሊሶች ለቁርባን የመጡ ምእመናን ወደ ቤተ ክርስቲያን እንዳይገቡ በመከልከላቸው በአንዳንዶችም ላይ የመገፍተርና የማባረር ድርጊቶችን በመፈጸማቸው ምእመናን ቅዱስ ቁርባን በሰንበት ት/ቤት አዳራሽ ለመቀበል ተገደዋል።

በአጠቃላይ በጥበቃነት የተመደቡት አንዳንድ የፖሊስ አካላት የታዘዙበትን ዓላማ በመተው ምእመናን ለቁጣ የሚጋብዙ ድርጊቶችን ሲፈጽሙ እንደነበር ከላይ በተጠቀሱት አጥቢያዎች የተከሰቱት ሁነቶች ማሳያዎች ናቸው። ስለሆነም የፖሊስ ኃይልን የሚያሰማራው አካል ከመጣብን ወረርሽኝ በተጨማሪ ተጨማሪ ችግር የሚሆኑ ጉዳዮች ከመከሰታቸው በፊት በአግባቡ ማጤን ያለበት ጉዳዮች አሉ። የሚመደቡበት ቦታ ቤተ ክርስቲያን እንደመሆኑ መጠን ሌላ እምነት ያላቸው ፖሊሶች መመደባቸው እንኳን በምእመናን ዘንድ ትልቅ ቅሬታን ሊፈጥርና ሆን ተብሎ እኛን ለመጉዳት እየተሠራ ነው የሚል አንድምታ እየተሰጠው ስለሆነ ከዚህ ጀምሮ ጥንቃቄ የሚያሻቸውን ጉዳዮች በአጽንዖት ተመልክቶ መፍትሔ መሻት ያስፈልጋል።

ከወረርሽኙ ቀውስ ለመውጣት ምእመናንና መላው ዜጎች መደማመጥንና መተባበርን እንዲያስቀድሙ ቤተ ክርስቲያን ጥሪ አቀረበች

  • የቤተ ክርስቲያን መዘጋትና ያስከተላቸው ጫናዎች፣የቅዱስ ሲኖዶሱ የማይቀር አጀንዳ ነው፤
  • በወረርሽኙ ጫና ቀኖናዊ ጉባኤው እንዳይታጎል፣ በአጭሩ እንደሚካሔድ ቅዱስነታቸው ገለጹ፤
  • ለመሳተፍ ያልቻሉ ብፁዓን አባቶችም፣ በያሉበት በጸሎት እንዲበረቱ ፓትርያርኩ አሳሰበዋል፤

***

ከኮቪድ-19 ወረርሺኝ የሕዝብ ጤና ችግር ባሻገር ካጋጠመን ኹለንተናዊ ቀውስ ለመውጣት፥ ምእመናንና መላው ዜጎች መደማመጥንና ኅብረትን በማስቀደም እንዲተጋገዙ ቤተ ክርስቲያን ጥሪ አቀረበች፡፡

የቅዱስ ሲኖዶስ ኹለተኛ ዓመታዊ መደበኛ ስብሰባ የኾነው የርክበ ካህናት ምልዓተ ጉባኤ መክፈቻ ጸሎት፣ በመንበረ ፓትርያርክ ቅድስተ ቅዱሳን ማርያም ገዳም በተካሔደበት ወቅት ትምህርት የሰጡት፣ የሰሜን ወሎ እና ከሚሴ አህጉረ ስብከት ረዳት ሊቀ ጳጳስ ብፁዕ አቡነ ኤርሚያስ፥ የኢትዮጵያን ዕድገት እና ለውጥ የሚሹ ዜጎች ኹሉ፣ ኅብረትን በማስቀደም አንድነታቸውን እንዲያጸኑ ጥሪ አቅርበዋል፡፡

Abune Ermias.jpg

በመርሐ ግብሩ ላይ በተነበበውና ጌታችን “… ከእናንተ ኹለቱ በምድር በማናቸውም ነገር በሚለምኑት ነገር ኹሉ ቢስማሙ፣ በሰማያት ካለው ከአባቴ ዘንድ ይደረግላቸዋል፤” /ማቴ.18፥19/ ባለው ቃሉ መሠረት፥ ኅብረት፣ መደማመጥ እና መተባበር፣ ለጥያቄአችን ኹሉ ከእግዚአብሔር መልስ የሚያስገኝልን ወሳኝ ኀይል እንደኾነ ገልጸዋል፡፡

እግዚአብሔር በመካከላችን ይኖር ዘንድ፣ የሚያስፈልገንን ከእግዚአብሔር ጠይቀን ለማግኘት፣ በፍቅር እና ጤናማነት “አንድ ወደ መኾን እንምጣ” በማለት አስገንዝበዋል፡፡ ምእመኑ፣ ብዙ ነገሮችን ከቅዱስ ሲኖዶሱ እንደሚጠብቅ አክለው የጠቀሱት ብፁዕነታቸው፣ በጸሎት ብንተጋገዝ እግዚአብሔር በአባቶች አድሮ በጎ ነገሮችን ያሰማናል፤ ብለዋል፡፡

ስለተፈጸሙ በደሎች እርስ በርስ በበጎ በመወቃቀስ ወንድም ወንድሙን ገንዘብ እንዲያደርግ በተነበበው ወንጌል መታዘዙን ብፁዕ አቡነ ኤርሚያስ አውስተዋል፤ ከዚያም ሲያልፍ፥ “ለቤተ ክርስቲያን ንገራት” በማለቱ፣ በዜጎች መካከል የተፈጠረን አለመግባባት አስወግዶ ወደ አንድነት ለማምጣት አባቶች ሓላፊነት እንዳለባቸው አዘክረዋል፡፡

His Holinessበመክፈቻ ጸሎት መርሐ ግብሩ፣ ቃለ ምዕዳንና ቡራኬ የሰጡት ብፁዕ ወቅዱስ ፓትርያርክ አቡነ ማትያስ፣ ወረርሺኙን ለመግታት በተጣሉ ገደቦች እና አስገዳጅ አሠራሮች ምክንያት በቅዱስ ሲኖዶሱ መደበኛ ስብሰባ/ርክበ ካህናት/ ላይ ለመገኘት ያልቻሉ ብፁዓን አባቶች በያሉበት በጸሎት እንዲበረቱ አሳስበዋል፡፡

እግዚአብሔር በቸርነቱ፣ በከሃሊነቱ እና በረድኤቱ ችግሩን እንዲያርቅልን ከዐቢይ ጾም ጀምሮ በጸሎት ላይ እንደምንገኝ ቅዱስነታቸው አስታውሰዋል፡፡ በሰብአዊ ፍጡር ላይ ኹሉ ያነጣጠረ በሽታ እንደ መኾኑ፣ በአንድ ልብ በአንድ ሐሳብ ተስማምተን አጥብቀን መጸለይ ይገባናል፤ ብለዋል፡፡

አያይዘውም፣ ጉባኤው፣ እንደተለመደው በርካታ አጀንዳዎችን በመያዝ ለቀናት የሚሰነብት እንደማይኾን ቅዱስ ፓትርያርኩ በቃለ ምዕዳናቸው አስታውቀዋል፡፡ “እንደ ወትሮው ሰፋ ያለ አይደለም፤ ለአጭር ጊዜ ነው፤” ብለዋል፡፡ ከጥቅምቱ የመጀመሪያ ዓመታዊ መደበኛ ስብሰባ በመቀጠል ለኹለተኛ ጊዜ፣ ትንሣኤ በዋለ በኻያ አምስተኛው ቀን እንዲካሔድ በፍትሕ መንፈሳዊ የታዘዘ ቀኖናዊ ጉባኤ በመኾኑ እንዳይቀር፣ እንዳይታጎል፣ የቅዱስ ሲኖዶሱን የመክፈቻ ጸሎት ሥርዐት ማድረሳቸውን ቅዱስነታቸው ገልጸዋል፡፡

“አዲስ አጀንዳዎችን ለማየት አልያም ባደሩ ሪፖርቶች ላይ ለመወያየት አንችልም፤” ያሉ ሌላ የቅዱስ ሲኖዶስ አባል፣ በጣም አስፈላጊ እና ወቅታዊ ተብሎ በቋሚ ሲኖዶሱ የተያዘው መነጋገርያ ነጥብ፣ ለወረርሺኙ ቅድመ መከላከል በሚል የቤተ ክርስቲያን መዘጋት ጉዳይ እንደኾነ ገልጸዋል፡፡

ይህንም ተከትሎ፥ ጥምቀተ ክርስትና፣ ቁርባንና ፍትሐት ለምእመናን በአግባቡ እንዳይፈጸም መሰናክል ፈጥሯል፤ አድባራቱም ርምጃው ለገቢ መቀነስ እንደዳረጋቸውና ለአገልጋዮች የሚከፈል የደመወዝ እጥረት እንዳጋጠማቸው በመጥቀስ አስቸኳይ መፍትሔ እንዲሰጣቸው በመጠየቃቸው፣ ምን እናድርግ የሚለው “የማይቀር ጉዳይ ነው” ብለዋል፡፡ የበጀት ድጋፍ የሚያስፈልጋቸው ካሉም ሊመለከተው እንደሚችል አስተያየት ሰጥተዋል፡፡ በአጠቃላይ፣ ከመንግሥት የአስቸኳይ ዐዋጅ ጋራ በተገናዘበ መልኩ ቤተ ክርስቲያን ፈተናውን እንደምን ልትሻገረው እንደምትችል ምልዓተ ጉባኤው በአጽንዖት ተነጋግሮ የመፍትሔ አቅጣጫ እና መመሪያ እንደሚሰጥ ጠቁመዋል፡፡

በአኹኑ ወቅት ቅዱስ ሲኖዶስ፣ ብፁዕ ወቅዱስ ፓትርያርክ አቡነ ማትያስን ጨምሮ 73 ብፁዓን ሊቃነ ጳጳሳትን በአባልነት የያዘ ሲኾን፣ እኒኽም፣ በ55 የሀገር ውስጥ እና በ12 ገደማ የውጭ አህጉረ ስብከት በማገልገል ላይ ይገኛሉ፡፡

የርክበ ካህናት ቅዱስ ሲኖዶስ ምልዓተ ጉባኤ መክፈቻ ጸሎት እየተካሔደ ነው

Holy Synod Ginbot2012 Opening Prayer0

ቅዱስ ሲኖዶስ፥ የርክበ ካህናት ምልዓተ ጉባኤ መደበኛ ስብሰባ መክፈቻ ጸሎት፣ በመንበረ ፓትርያርክ ቅድስተ ቅዱሳን ማርያም ገዳም እያካሔደ ነው፡፡ በፍትሕ መንፈሳዊ አንቀጽ 5 ቁጥር 164 በታዘዘው መሠረት፣ ቅዱስ ሲኖዶስ በዓመት ኹለት ጊዜያት መደበኛ ስብሰባን የሚያካሒድ ሲኾን፣ ኹለተኛው ዓመታዊ መደበኛ የምልዓተ ጉባኤ ስብሰባ፣ በዓለ ትንሣኤ በዋለ በኻያ አምስተኛው ቀን/ርክበ ካህናት/ የሚካሔደው ነው፡፡

ከብፁዕ ወቅዱስ ፓትርያርኩ ጋራ ከኻያ ያልበለጡ ብፁዓን ሊቃነ ጳጳሳት የተገኙበትንና በወረርሽኙ ሳቢያ በዝግ ደጅ የሚካሔደውን የመክፈቻ ጸሎት መርሐ ግብር፣ ብዙኀን አገልጋዮች እና ምእመናን፣ በቴሌቪዥን መስኮት የቀጥታ ሥርጭት ለመከታተል ተገደዋል፡፡

መደበኛ ስብሰባው፥ ዓለም በኮሮና ቫይረስ ወረርሺኝ ማዕበል በተመታችበት እና ከወረርሽኙ ጋራ የተያያዙ የጉዞ፣ የለይቶ ማቆየት እና የተሰብሳቢዎች ቁጥር አስገዳጅ ዕቀባዎች በተጣሉበት ወቅት የሚካሔድ ጉባኤ ነው፡፡ በዚህም ሳቢያ፣ በመንበረ ፓትርያርኩ በአካል ተገኝተው ስብሰባውን ሊሳተፉ የሚችሉ ብፁዓን አባቶች፣ ከጠቅላላው 75 አባላት ከግማሽ እንደማይበልጡና በአገር ውስጥ አህጉረ ስብከት ያሉቱ ብቻ እንደሚኾኑ ተጠቁሟል፡፡ 

Holy Synod Ginbot2012 Opening Prayer

የምልአተ ጉባኤውን አጀንዳዎች አስቀድሞ የማዘጋጀት ሓላፊነት ያለበት ቋሚ ሲኖዶስ፣ ባለፈው ሳምንት ባደረገው ምክክር፣ አራት ነጥቦችን ብቻ በመነጋገሪያነት ለይቷል፡፡ የኮቪድ -19 ወረርሽኝን በመግታት ረገድ የቤተ ክርስቲያን እንቅስቃሴን ማጠናከር፤ ከመከላከል ርምጃዎች ጋራ የተያያዙ ልዩ ልዩ እግዳት፣ በምእመናንዋ የምስጢራት ሱታፌ እና በምጣኔ ሀብትዋ ላይ ያሳደራቸውን ጫናዎች ገምግሞ መፍትሔ ማበጀት ዋነኞቹ እንደኾኑ ተመልክቷል፡፡

የርክበ ካህናት ዓመታዊ መደበኛ ስብሰባ፣ የቅዱስ ሲኖዶስ ጽ/ቤት፣ በሥራ ዘመኑ የተከናወኑ ተግባራትንና ያልተከናወኑትን በመዘርዘር ለምልዓተ ጉባኤው ሪፖርት የሚያቀርብበት ነው፡፡ ኾኖም፣ የአኹኑ መደበኛ ስብሰባ፣ በተለይ በውጭ አህጉረ ስብከት ያሉቱ ብፁዓን አባቶች ተሟልተው ስለማይገኙበት ላይታይ ይችላል፡፡

ነገ ረቡዕ፣ ግንቦት 5 ቀን 2012 ዓ.ም. ርእሰ መንበሩ ብፁዕ ወቅዱስ ፓትርያርክ አቡነ ማትያስ በሚያሰሙት የመክፈቻ ንግግር የሚጀመረው የዘመነ ኮቪድ-19 ወረርሺኝ መደበኛ ስብሰባ፣ እስከ መጪው ዓመት ጥቅምት፣ የቋሚ ሲኖዶስ አባላት ኾነው የሚያገለግሉ ብፁዓን አባቶችን በመሠየም በአጭሩ እንደሚጠቃለል፣ ከነገ በስቲያ ኀሙስም መግለጫ እንደሚሰጥ ተጠቁሟል፡፡

የደብረ አሚን አቡነ ተክለ ሃይማኖት ቤተ ክርስቲያን አስተዳደር: ለተከራዮች የወር ክፍያ በመሰረዝ እፎይታ ሰጣቸው

  • ወረርሽኙን ለመከላከል ቤተ ክርስቲያን በጸሎት ትማፀናለች፤የተቸገሩትንም ትረዳለች”/ደብሩ/
  • በአንጻሩ፣ ተከራዮችን ሲያስጨንቁ የተያዙት የአራዳ ቅ/ጊዮርጊስ አስተዳዳሪ ሺሕ ብር ተቀጡ!
  • ተከራዮቹ፥የአስተዳደሩን ብልሽትና ምዝበራ በማጋለጣቸው አለቃው የሚያሳድዷቸው ናቸው
  • ከ47.5 ሚ ብር በላይ የታሪካዊው ደብር ገንዘብ፣በግንባታ ስም በተደራጀ ስልት ተመዝብሯል!!

***

በአዲስ አበባ ሀገረ ስብከት የደብረ አሚን ጻድቁ አቡነ ተክለ ሃይማኖት ቤተ ክርስቲያን አስተዳደር፣ በዙሪያው ለሚገኙና የኮሮና ቫይረስ/ኮቪድ-19/ ዓለም አቀፍ ወረርሽኝን ለመከላከል የሚደረገው ጥረት በቢዝነሳቸው ላይ ተጽዕኖ ላደረሰባቸው 84 ያህል የንግድ ቤቶች፣ የሚያዝያ ወር 2012 ዓ.ም. የኪራይ ክፍያን በመሰረዝ እፎይታ ሰጠ፡፡

በንቁ እና ጠንካራ እንቅስቃሴው የታወቀው የደብሩ ሰበካ መንፈሳዊ ጉባኤ፣ ከልማት ኮሚቴው በቀረበለት የመነሻ ሐሳብ ላይ ባለፈው ሚያዝያ 1 ቀን 2012 ዓ.ም. በስልክ ባካሔደው ውይይት፣ በቅጽረ ቤተ ክርስቲያኑ ዙሪያ የተሠሩ የደብሩን ሱቆች ለተከራዩ 84 የንግድ ቤቶች በሙሉ፣ ከኹለት ሚሊዮን ብር በላይ የሚያዝያ ወር የኪራይ ክፍያ እንዲነሣላቸው በመወሰን እፎይታ መስጠቱን አስታውቋል፡፡

Debre Amin Abune TekleHaimanot

በደብሩ ዋና ጸሐፊ ሊቀ ሥዩማን ጥሩነህ  ሸዋዬ ተፈርሞ የወጣው ይኸው የክፍያ እፎይታ ውሳኔ፣ በወረርሽኙ ሳቢያ ለተጎዱ ወገኖች በየአጥቢያው ማኅበራዊ እና ቁሳዊ እገዛ እንዲደረግ ቅዱስ ሲኖዶስ መመሪያ መስጠቱንና መንግሥትም አገራዊ ጥሪ ማስተላለፉን አስታውሷል፡፡ በመላው ዓለም የተስፋፋውን የኮሮና ቫይረስ ወረርሽኝ ለመከላከል፣ ቤተ ክርስቲያን በጸሎት እና ምሕላ እግዚአብሔርን ከመማፀን በተጨማሪ፣ አቅምዋ በሚፈቅደው የተቸገሩትን ለመርዳት እና ምእመናንዋን ለመታደግ እየጣረች መኾኗን ገልጿል፡፡

በሌላ በኩል፣ በሀገረ ስብከቱ የገነተ ጽጌ ቅዱስ ጊዮርጊስ ካቴድራል አስተዳዳሪ መልአከ መንክራት ኀይሌ ኣብርሃ፣ የደብሩ ተከራዮች አላግባብ ከንግድ ቦታዎቻቸው እንዲለቁ በማስጨነቅ የአስቸኳይ ጊዜ ዐዋጁን በመጣሳቸው በፖሊስ ተይዘው ከታሰሩ በኋላ ፍ/ቤት ቀርበው በአንድ ሺሕ ብር ቅጣት መለቀቃቸው ታውቋል፡፡

Genete Tsigue Arada St. Giyorgis

አስተዳዳሪው፣ “ወረርሽኙን ለመከላከል” በሚል ሽፋን የጀበና ቡና ንግድ ላይ የተሰማሩ የአንድ ተከራይን ውል፣ ተመሳሳይ አገልግሎት እየሰጡ ካሉ ሌሎች ዘጠኝ ተከራዮች ለይተው በቂም በቀል በማቋረጥ፣ በአስቸኳይ ጊዜ ዐዋጅ ቁጥር 3/2012 ማስፈጸሚያ የሚኒስትሮች ም/ቤት ያወጣውን ደንብ ቁጥር 466/2012 አንቀጽ 17 በመጣሳቸው፣ ባለፈው ማክሰኞ፣ ሚያዝያ 20 ቀን በፖሊስ ቁጥጥር ሥር ውለዋል፡፡ በማግሥቱ ወደ ፌዴራሉ መጀመሪያ ደረጃ ፍ/ቤት አራዳ ምድብ 5ኛ ወንጀል ችሎት ቀርበው፣ ጉዳያቸው በመዝገብ ቁጥር 191499 በታየበት ወቅት፣ አስተዳዳሪው ወንጀል መፈጸማቸውን አምነው በሰጡት የእምነት ክሕደት ቃል መሠረት ችሎቱ የጥፋተኝነት ብይን አሳልፎባቸዋል፤ የግራ ቀኙን የቅጣት ማቅለያ እና ማክበጃ በማዳመጥ በአንድ ሺሕ ብር የገንዘብ ቅጣት እንዲቀጡ ወስኗል፤ ቅጣታቸውንም ፈጽመው ከኹለት ቀናት እስር በኋላ ወጥተዋል፡፡  

Haile Abreha

አስተዳዳሪው መልአከ መንክራት ኀይሌ ኣብርሃ

በጣም በትንሹም ቢኾን የሕግ ተጠያቂነትን ያዩት ዓምባገነኑ አስተዳዳሪ፣ የኪራይ ውል ለማቋረጥ የተከተሉት አካሔድ፣ ተመሳሳይ አገልግሎት በሚሰጡ ተከራዮች መካከል በአድልዎ ልዩነት በማድረግ በምዝበራቸው የሚቃወሟቸውንና የሚያጋልጧቸውን ለመበቀል የሞከሩበት እንደነበር በመረጃው ተመልክቷል፡፡ በደብሩ ሕንፃዎች ውስጥ ኪራይ ሳይከፍሉ ከአስተዳዳሪው ጋራ በመግባባት የሚኖሩ፣ በነፃ ይዘው ሲያበቁ ለሦስተኛ ወገን የሚያከራዩ ግለሰቦች መኖራቸውን እንዲሁም፣ ተከራዮች ቤቶቹን ከተከራዩ በኋላ በነፃ እንዲገለገሉባቸው በማድረግ፣ የደብሩን የፓርኪንግ ቦታ በማሳጣት የግንባታ ፕላኑን በሚጎዳ ኹኔታ መብቱንና ጥቅሙን የሚያሳጣ አመራር እየሰጡ እንዳሉ ተጠቁሟል፡፡

በተጨማሪም፣ የደብሩ ጠቅላላ የሒሳብ እንቅስቃሴ በአንድ ሰው ቁጥጥር ሥር ወድቆ በተለያዩ ግንባታዎች ሽፋን ከፍተኞ ውሎች አላግባብ እየተፈረሙ እና ከፍተኛ ክፍያዎች እየተከፈሉ አስከፊ ምዝበራ እየተፈጸመ እንዳለ በሰነድ ማስረጃዎች ለማረጋገጥ ተችሏል፡፡ ለማሳያ ያህል፥ ከሚያዝያ 2010 እስከ ጥቅምት 2011 ዓ.ም. ድረስ ያለክፍያ ማረጋገጫ ሰርቲፊኬት እና ያለአማካሪ ውሳኔ፣ ብር 13ሚሊዮን 778ሺሕ 469 መከፈሉ፤ በዚሁ ተመሳሳይ ወቅት፣ ያለሰበካ ጉባኤ እና የልማት ኮሚቴ ውሳኔ፣ ቃለ ጉባኤም ሳይያዝ፣ ብር 24ሚሊዮን 298ሺሕ 143 ክፍያ ለተቋራጭ ያለአግባብ መከፈሉ፤ በተለያዩ ጊዜያትም፣ ብር 9.4 ሚሊዮን ያህል ብድር፣ ተገቢውን የፋይናንስ ሥርዓት ሳይከተል ለተቋራጮች ከመሰጠቱም በላይ፣ ብድሩ እስከ አሁን እንዳልተመለሰ ተገልጿል፤ ተበዳሪው፥ መጀመሪያ የወሰደውን ብድር ሳይመልስ፣ በላይ በላዩ ተጨማሪ ብድር እንዲወስድ አላግባብ መፈቀዱም ተጠቁሟል፡፡

በጠቅላላው፥ ከ47 ነጥብ 5 ሚሊዮን ብር በላይ ገንዘብ፣ በተደራጀ ስልት በመመዝበሩ፣ በአሁኑ ወቅት የታሪካዊው ደብር የፋይናንስ ሀብት መሟጠጡንና አገልግሎቱን በአግባቡ ለማስፈጸም አክል ማጋጠሙን፣ የአስተዳደር ብልሽቱንና ምዝበራውን የሚቃወሙ የሰበካ ጉባኤ አባላት አጋልጠዋል፡፡ ይህም እንዲታረም በየጊዜው ጥያቄ የሚያነሡ አካላት፣ ያለአግባብ ከሥራቸው እንደሚባረሩና ጥቃትም እንደሚፈጸምባቸው ገልጸዋል፡፡

አለቃውንና ጸሐፊውን አግዶ ሕጋዊ የውጭ ኦዲተር በመሠየም፣ ባለፉት ዓመታት ሲደርስ የቆየው ጥፋት ተመርምሮ ርምጃ እንዲወሰድ፣ የሕንፃ ተቋራጩም ውላቸው ታግዶ ማጣራት እንዲደረግ፣ በአጠቃላይ ታሪካዊውን የመናገሻ ገነተ ጽጌ ቅዱስ ጊዮርጊስ ደብርን፣ ጊዜው ያለፈበት አስተዳደር፣ በመተዳደሪያ ደንቡ መሠረት በማስተካከል፣ ችግሩ አፋጣኝ እልባት እንዲሰጠው አቤት ባዮቹ ጠይቀዋል፡፡

Arada Giyo Haile Abreha

የኮሮና ቫይረስን ለመከላከል: በአራት የመንግሥት ቴሌቪዥን ጣቢያዎች የጸሎት እና የትምህርት መርሐ ግብር ይተላለፋል

ከነገ መጋቢት 28 ጀምሮ በየምሽቱ ከ3፡00 እስከ 4፡00 ለአንድ ወር ይተላለፋል!

92243200_2863993273686567_2944056247248224256_n

የኢትዮጵያ የሃይማኖት ተቋማት ጉባኤ ሰባት አብያተ እምነት መሪዎች፣ ዛሬ እሑድ፣ መጋቢት 27 ቀን 2012 ዓ.ም. ከቀትር በኋላ 8፡00 ላይ፣ በሐያት ሪጀንሲ ሆቴል፣ ስለ ብሔራዊ የጸሎት እና የትምህርት መርሐ ግብሩ መግለጫ ሰጥተዋል፡፡

 

~~~

Anti COVID National Prayer by EIRC

  • ሰባቱ የኢትዮጵያ የሃይማኖት ተቋማት ጉባኤ አባል አብያተ እምነቶች በፈረቃ ይሳተፋሉ
  • የሃይማኖት ተቋማት ጉባኤ ጽ/ቤት፣ ከፌዴራል መንግሥት ጋራ መክሮ ያመቻቸው ነው፤
  • ከነገ መጋቢት 28 ጀምሮ ለአንድ ወር፣ ጸሎት እና የግንዛቤ ማጎልበቻ ትምህርት ይሰጣሉ
  • የተንሰራፋውን ግለኝነት፣ ኢፍትሐዊነት፣ ኢሰብአዊነትና ርኵሰት እያወገዙም ያስተምራሉ፤
  • ጤናማ እና ሰላማዊ ማኅበራዊ ግንኙነት፣መከባበር እና መተዛዘን እንዲጎለብት ይመክራሉ፤

***

92317298_3067035316691886_7157063700245905408_n

  • ኢቴቪ፣ ፋና፣ ዋልታ እና አዲስ ቴቪ፥ መርሐ ግብሩ የሚተላልፋባቸው ጣቢያዎች ናቸው
  • ነገ በመክፈቻው፣ባለሥልጣናት ከቤተ መንግሥት በሚሳተፉበት መርሐ ግብር ይጀመራል፤
  • አብያተ እምነቶቹ፥ ለትምህርት መርሐ ግብሩ ብቁ መምህራን እንዲመድቡ ጽ/ቤቱ ጠየቀ፤
  • የክልል የሃይማኖት ተቋማት ጉባኤ ጽ/ቤቶች፣ መርሐ ግብሮቹን በየቋንቋው ያስተባብራሉ፤  
  • በቫይረሱ ከቤተ እምነቱ የራቀውን ምእመን ልብ፥ ከፈጣሪው እንዳይርቅ ያግዛል/ጽ/ቤቱ/

***Ethiopia Inter Religious Council Anti COVID Prayer

የቋሚ ሲኖዶስ – የኮሮና ቫይረስ መከላከል ውሳኔ: የአፈጻጸም ማብራሪያ እየተዘጋጀለት ነው

  • ማብራሪያውን ከማስገንዘብ በኋላ፣ ጠንካራ የአፈጻጸም ክትትል ይደረጋል፤
  • ከውጭ ሀገራት የገቡ ሦስት ብፁዓን ሊቃነ ጳጳሳት በለይቶ ማቆያ ይገኛሉ፤
  • ከቦሌ በቀጥታ ወደ ማረፊያቸው በሔዱት አባት ጉዳይ ማጣራቱ ቀጥሏል፤
  • ምግባረ ሠናይ ሆስፒታል ለተመላሽ አባቶች ለይቶ ማቆያ ተጠቁሞ ነበር፤

***

3421

ዓለም አቀፉን የኮሮና ቫይረስ ወረርሽኝ ለመግታት እና የኮቪድ-19 በሽታን ለመከላከል፣ ቋሚ ሲኖዶስ ትላንት ያሳለፋቸው የጥንቃቄ ውሳኔዎች፣ የአፈጻጸም ዝርዝር/ማብራሪያ/ እየተዘጋጀላቸው እንደኾነ፣ የቅዱስ ሲኖዶስ ዋና ጸሐፊ ብፁዕ አቡነ ዮሴፍ ገለጹ፡፡

በሰዎች መሰባሰብ እና ንክኪ የሚስፋፋውን የኮሮና ቫይረስ ወረርሽኝ ለመከላከል፣ ቋሚ ሲኖዶስ፣ ትላንት መጋቢት 23 ቀን 2012 ዓ.ም. ባካሔደው ስብሰባ፣ ባለአምስት አናቅጽ የጥንቃቄ ውሳኔዎችንና ድጋፎችን የያዘ መግለጫ አውጥቷል፡፡ ከእኒኽም ውስጥ፣ በቤተ ክርስቲያን ቅጽር የሚቆዩ እና በቤተ መቅደሱ መንፈሳዊ አገልግሎቱን የሚፈጽሙ ካህናት፣ በጣም ውስን መኾን እንዳለባቸው፣ ሌሎች ካህናት እና ምእመናን ግን፣ ለጊዜው በየቤታቸው በጸሎት እንዲወሰኑ የሚያዝዘው ይገኝበታል፡፡

ከምስጢራተ ቤተ ክርስቲያንና ወቅታዊ ከኾኑ ሌሎች አገልግሎቶች አፈጻጸም አኳያ፣ “ውሳኔው የተፍታታ ማብራሪያ አልሰጠም” በማለት ከአገልጋዮች እና ምእመናን እየተነሡ ስላሉ ጥያቄዎች፣ ሸገር ኤፍ.ኤም ራዲዮ 102.1 በስልክ ያነጋገራቸው ብፁዕ አቡነ ዮሴፍ፣ የቋሚ ሲኖዶሱን ውሳኔ ዝርዝር ማብራሪያ የሚያዘጋጅ ልኡክ ተሠይሞ በሥራ ላይ እንደሚገኝ ገልጸዋል፡፡

“ወረርሽኙ ከሚያመጣው አበሳ ለመጠበቅ፣ በየአጥቢያ አብያተ ክርስቲያኑ የሚሰበሰበውን ሰው ቁጥር መቀነስ፣ አልፎም መገደብ ግድ የሚልበት ወቅት መጥቷል፤” ያሉት ብፁዕ ዋና ጸሐፊው፣ ከውሳኔው ዝርዝር አፈጻጸም አኳያ፣ ጉዳዩ ይበልጥ የሚመለከታቸው መክረው ለውሳኔ እንዲያቀርቡ ሥራ እንደ ተሰጣቸውና የተደረሰበትን ዝርዝር ውሳኔም በተመለከተ ቋሚ ሲኖዶስ እንደሚያሳውቅ ለሸገር ኤፍ.ኤም ተናግረዋል፡፡

የባሕር ዳር ሀገረ ስብከት ሊቀ ጳጳስ እና የወቅቱ የቋሚ ሲኖዶስ አባል ብፁዕ አቡነ አብርሃም በበኩላቸው፣ ቅዱስ ሲኖዶስ ሥርዓትን የማሻሻል ሥልጣን እንዳለውና በዚህ ረገድ የሚያሳልፈውን ውሳኔም፣ የቤተ ክርስቲያኒቱ አገልጋይ እና ምእመን የኾነ ወገን፣ ለመረዳት መጠየቅ እና መፈጸም እንጂ መቃወም እና አፈጻጸሙን ማስታጎል እንደማይችል፣ ቋሚ ሲኖዶስ የኮሮና ቫይረስን ለመከላከል ትላንት ያሳለፈውን የጥንቃቄ ውሳኔ አስመልክቶ፣ ከኢኦተቤ-ቴቪ ጋራ ባደረጉት ቃለ ምልልስ አሳስበዋል፡፡

Quwami Synod COVID Restriction

በተያያዘም፣ የካህናት እና የምእመናንን ቁጥር ከመወሰኑ ውጭ፥ የሚቋረጥ የቤተ ክርስቲያን መንፈሳዊ አገልግሎት እንደማይኖር፣ የመንበረ ፓትርያርክ ጠቅላይ ጽ/ቤት የሕዝብ ግንኙነት መምሪያ ለኢኦተቤ-ቴቪ ገልጿል፡፡

ከወረርሽኙ አደገኛነት አንጻር ለጥንቃቄ የተወሰነ ሲኖዶሳዊ ውሳኔ በመኾኑ፣ በኹሉም የቤተ ክርስቲያን አካላትና አባላት ዘንድ መፈጸም ይኖርበታል፤ ያሉት የመምሪያው ዋና ሓላፊ ሊቀ ሥዩማን እስክንድር ገብረ ክርስቶስ፣ ማብራሪያ ያስፈልጋቸዋል ለተባሉ የውሳኔው ነጥቦች፣ ብፁዓን አባቶች እና ሊቃውንት ዝርዝር ማብራሪያ እንደሚሰጡና ይህም በቤተ ክርስቲያን ሚዲያዎች እንደሚገለጽ አስታውቀዋል፡፡ ከዚህ ውጭ፣ ከቋሚ ሲኖዶሱ ውሳኔ የተነሣ፥ ቤተ ክርስቲያን እንደተዘጋች፣ ጥምቀት፣ ቊርባንና ፍትሐት እንደተከለከለ ተደርጎ የሚናፈሰው አረዳድ ፈጽሞ የተሳሳተ ነው፤ ብለዋል፡፡

የውሳኔው ማብራሪያ ከተዘጋጀ እና በስፋት የማስገንዘብ ሥራ ከተሠራ በኋላ፣ በየደረጃው በተቋቋመው ግብረ ኃይል አማካይነት ጠንካራ የአፈጻጸም ክትትል ይደረጋል፤ ወረርሽኙን ለማስቆም የተላለፈውን ውሳኔ በማይፈጽሙት እና ለአፈጻጸሙ ዕንቅፋት በሚኾኑ ሓላፊዎች፣ ሠራተኞች እና አገልጋዮች ላይ፣ ከአስተዳደራዊ እስከ ቀኖናዊ ርምጃ እንደሚወሰድም ተመልክቷል፡፡

ቋሚ ሲኖዶሱ፣ ለካህናት እና ለሕዝበ እግዚአብሔር ደኅንነት ሲባል፣ ባለፈው መጋቢት 14 ቀን 2012 ዓ.ም. ለመጀመሪያ ጊዜ ባወጣው መግለጫ፥ ሥርዐተ ቅዳሴን ጨምሮ እንደ ስብሐተ ነግህ፣ ሰዓታት፣ ማሕሌት፣ ጥምቀተ ክርስትና፣ ጸሎተ ፍትሐት የመሳሰሉት፣ ለሥርዓቱ በሚያስፈልገው ቁጥር ብቻ እና በውሱን ሊቃውንት በተራ እንዲፈጸም ወስኗል፡፡

በዕለት የሚቆርቡ ምእመናን ብቻ ወደ ሕንፃ ቤተ ክርስቲያን ገብተው ዘርዘር ብለው በመቆም እንዲያስቀድሱ፤ በጸሎት እና በሕክምና በቤት የሚቆዩ ሕሙማንም፣ የሚያስፈልጋቸውን መንፈሳዊ አገልግሎት በልዩ ኹኔታ እንዲያገኙ አዟል፡፡ አክሎም፣ ከቅዳሴ ጋራ የተያያዙ ዝርዝር የአፈጻጸም ጉዳዮች፣ በግብረ ኃይሉ ተዘጋጅቶ በቅዱስ ሲኖዶስ በማጸደቅ ለአህጉረ ስብከት በሚላከው መመሪያ መሠረት ተግባራዊ እንዲደረግ ማሳሰቡ ይታወሳል፡፡

ቅድስት ቤተ ክርስቲያንን፣ በበላይነት የመምራት እና የመቆጣጠር ሓላፊነት ያለበት ቅዱስ ሲኖዶስ፣ ፍትሕ መንፈሳዊ በሚፈቅደው መሠረት፣ ሕጎችን፣ ደንቦችንና መመሪያዎችን፥ የማውጣት፣ የማሻሻል እና የመሻር ሥልጣን አለው፡፡ ቋሚ ሲኖዶስ፣ ከቅዱስ ሲኖዶሱ አካላት አንዱ ሲኾን፣ በቅዱስ ሲኖዶስ የጸደቁ ሕግጋት፣ ደንቦች፣ መመሪያዎች እና ውሳኔዎች፣ በሥራ ላይ መተርጎማቸውን ይከታተላል፤ ይቆጣጠራል፡፡

በሌላ በኩል፣ ከተለያዩ የውጭ አገሮች፣ በልዩ ልዩ ቀናት ወደ ኢትዮጵያ የገቡ ሦስት ብፁዓን ሊቃነ ጳጳሳት፣ በለይቶ ማቆያ ማዕከላት እንደሚገኙ ተጠቆመ፡፡ ብፁዓን ሊቃነ ጳጳሳቱ፣ ከአሜሪካ እና ከእስራኤል እንደተመለሱ የተጠቆመ ሲኾን፣ በደርዘን ከሚቆጠሩ ሌሎች መነኰሳት እና ካህናት እንዲሁም መምህራንና አገልጋዮች ጋራ፣ ለ14 ቀናት ለይቶ ማቆያ በተወሰኑት የስካይ ላይት እና ግዮን ሆቴሎች፣ የጥንቃቄ ቆይታ ጊዜአቸውን በመፈጸም ላይ እንደሚገኙ ታውቋል፡፡

ከሦስቱ ብፁዓን አባቶች መካከል፣ ትላንት ከአሜሪካ ወደ ኢትዮጵያ እንደገቡ፣ በቀጥታ ወደ መንበረ ፓትርያርኩ ማረፊያቸው ደርሰው ብዙም ሳይቆዩ የተመለሱት ብፁዕ አባት ይገኙበታል፡፡ “ከቤት የምይዘው ዕቃ ስላለ ነው፤” በማለት በሕክምና ባለሞያዎች እና በአየር መንገዱ ሰዎች ታጅበው እንደ መጡና ወዲያው ከማረፊያቸው ይዘዋቸው ወደ ለይቶ ማቆያው እንዳስገቧቸው ተገልጿል፡፡

በአገራችን የወረርሽኙ ተጠቂዎች ይዞታ፣ በአመዛኙ የተጓዥነት ታሪክ ካላቸው ጋራ በመያያዙ፣ እኒህ ብፁዕ አባት፣ ከአየር ማረፊያው በቀጥታ ወደ መንበረ ፓትርያርኩ እንዲገቡ የተፈቀደበት ኹኔታ፣ ከትላንት ማምሻውን ጀምሮ ብዙዎችን እያነጋገረና እያጠያየቀ ይገኛል፡፡ በአየር መንገዱ መኪና ከአየር መንገዱ ሰዎች እና የሕክምና ባለሞያዎች ጋራ ወደ ጠቅላይ ጽ/ቤቱ ማረፊያቸው መምጣታቸውን የጠቀሰው ሙሐዘ ጥበባት ዲን. ዳንኤል ክብረት፣ የአየር መንገድ ሰዎች ማን ሥልጣን ሰጣቸው? ሐኪሙስ እንዴት ተባበረ? የጸጥታ አካላትስ እንዴት አሳለፉ? መኪናውንስ ማን ፈቀደ?” በሚሉ በርካታ ጥያቄዎች መነሻነት ማጣራት እየተካሔደ እንደ ኾነ በፌስቡክ ገጹ አስፍሯል፡፡

አዎ፥ ጽርሐ መንበረ ፓትርያርኩ፣ ቅዱስነታቸውን ጨምሮ በዕድሜም የገፉ በርካታ ብፁዓን አባቶች የሚኖሩበት እንደመኾኑ፣ ለኮሮና ቫይረስ ወረርሽኝ በቀላሉ ተጋላጭ እንዳይኾኑ የተጠናከረ ጥበቃ እና ጥንቃቄ ሊደረግ ይገባል፡፡ ወረርሽኙ እስኪገታ ድረስ፣ በቀጣይ ከውጭ ወደ አገር ቤት ለሚመጡ ብፁዓን አባቶችም፣ እንደ ምግባረ ሠናይ ሆስፒታል ያሉትን ምቹ ቦታዎቿን፣ ቤተ ክርስቲያን በራሷ እንድታዘጋጅ በሚመለከተው አካል የተጠየቀችውንም ልታጤነው ትችላለች፡፡

ቋሚ ሲኖዶስ: መንፈሳዊ አገልግሎቱ በውስን ልኡካን ብቻ እንዲከናወንና ቅ/ፓትርያርኩ ለጊዜው ከሕዝብ ከመገናኘት ተለይተው ለብቻቸው እንዲቆዩ ወሰነ

ቋሚ ሲኖዶስ covid 19

  • ቀኖና ቤተ ክርስቲያንንና የጤና ባለሞያዎችን ምክር መሠረት በማድረግ የኮረና ቫይረስን ወረርሽኝ ለመግታት፣ የቤተ ክርስቲያን መንፈሳዊ አገልግሎት፣ በተመደቡ ልኡካን ካህናት ብቻ እንዲከናወንና የተቀሩት ካህናት እና ምእመናን በቤታቸው ተወስነው እንዲጸልዩ አዘዘ፤
  • ለአገልግሎት የተመደቡ አገልጋይ ካህናትም፣ በቤተ ክርስቲያኑ ቅጽረ ግቢ እንዲወሰኑ ኾኖ አስፈላጊው ሠርከ ኅብስት(የምግብ አቅርቦት) እንዲዘጋጅላቸው አዘዘ፤
  • በመላው አህጉረ ስብከት ያሉ የቤተ ክርስቲያኒቱ መንፈሳዊ ዩኒቨርሲቲዎች እና ኮሌጆች፣ የካህናት ማሠልጠኛዎች እና የአድባራት ዘመናዊ ትምህርት ቤቶች፥ ወረርሽኙን ለመግታት እስኪቻል ድረስ፣ አስፈላጊው ዝግጅት ተደርጎላቸውና ግብአት ተሟልቶላቸው የሕሙማን ማቆያ ቦታ ኾነው እንዲያገለግሉ ወሰነ፤
  • የኮሮና ቫይረስ ወረርሽን ለመግታት እና ኮቪድ-19 በሽታን ለመከላከል ለተቋቋመው የመንግሥት ርዳታ አሰባሳቢ አካል፣ የሦስት ሚሊዮን ብር ድጋፍ እንዲደረግ ወሰነ፤
  • የቤተ ክርስቲያናችን የሕፃናት ማሳደጊያ ማዕከላት እና ችግረኞች፣ በምግብ እና በንጽሕና መጠበቂያ እንዲደጎሙና ለዚኸም አስፈላጊውን ርዳታ የማሰባሰብ ሥራ እንዲሠራ፤ ይህንም የማስተባበር ሥራ በተስፋ ልኡክ ግብረ ኃይል አማካይነት እንዲከናወን መመሪያ ሰጠ፤
  • ቅዱስ ፓትርያርኩ፣ ከዛሬ መጋቢት 23 ቀን ጀምሮ፣ ከሕዝብ ከመገናኘት ታቅበው፣ በልዩ የጾም እና የጸሎት የሱባዔ ጊዜ ለብቻቸው እንዲቆዩ ቋሚ ሲኖዶሱ፣ ዛሬ መጋቢት 23 ቀን 2012 ዓ.ም. ባካሔደው ስብሰባ ወስኗል፡፡

############

በዓለም እና በአገራችን ኢትዮጵያ ውስጥ እየተስፋፋ ያለውን የኮሮና ቫይረስ ወረርሽኝ እና የኮቪድ-19 በሽታ ምክንያት በማድረግ ከኢትዮጵያ ኦርቶዶክስ ተዋሕዶ ቤተ ክርስቲያን የተሰጠ መግለጫ
በስመ አብ ወወልድ ወመንፈስ ቅዱስ አሐዱ አምላክ፤ አሜን፡፡
91456069_861217517730034_5528512118506127360_o

በዓለም ላይ ተስፋፍቶ የቆየው እና በአሁኑ ጊዜ በአገራችን ኢትዮጵያ የገባው የኮረና ቫይረስ ወረርሽኝ እና የኮቪድ-19 በሽታ ዕለት ዕለት እየተስፋፋ ጥቂት የማይባሉ ወገኖቻችን በወርሽኙ መያዛቸው ታውቋል፡፡ በመኾኑምይህ ወረርሽኝ እንዳይስፋፋ እና በቀጣይም ሌሎች ወገኖቻችን እንዳይያዙ መከላከሉ፣ ጊዜ የማይሰጠው ጉዳይ በመኾኑቋሚ ሲኖዶስ በዛሬው ዕለት ስብሰባ በማድረግ የሚከተለውን ውሳኔ አሳልፏል፡፡

1. በአሁኑ ጊዜ እየደረሰ ያለው የወረርሽኝ በሽታን አስመልክቶ ከሚመለከታቸው ባለሞያዎች እየተሰጠ ያለውን የጤና አጠባበቅ ምክር እና ትምህረት እንዲሁም፣ በፍትሕ መንፈሳዊ እንደተደነገገውቀኖና ቤተ ክርስቲያን መሠረት በማድረግ ወረርሽኑን ማስቆም እንዲቻል፣ በመላ የኢትዮጵያ ኦርቶዶክስ ተዋሕዶ ቤተ ክርስቲያን በጣም በተወሰኑ ካህናት መንፈሳዊ አገልግሎቱ እንዲሰጥሌሎች ካህናት እና ምእመናን ለጊዜው በየቤታቸው በጸሎት እንዲወሰኑ፣ በአገልግሎት ላይ ለሚገኙ አገልጋይ ካህናትም በቤተ ክርስቲያኑ ቅጽረ ግቢ እንዲወሰኑ ኾኖ አስፈላጊው ሠርከብስት(የምግብ አቅርቦት) እንዲዘጋጅላቸው እንዲደረግ፤

እግዚአብሔር አምላካችንየሕዝቡን ኹሉ ምሕላ እና ጸሎት፣ የካህናቱን አስተበቊዖት በርኀራኄው ሰምቶ፣ በቅዱሳኑ ቃል ኪዳን፣ በወላዲተ አምላክ ድንግል ማርያም አማላጅነት ቁጣውን በምሕረቱ መዓቱን በትግዕሥቱ አሳልፎ ፍጹም ደኅንነትን እንደሚሰጠን እያመንን፡-

2. በአሁኑ ጊዜ የወረርሽኙን ፍጥነት ለመቀነስ የሚደረገው ጥረት እንዳለ ኾኖ በቀጣይበበሽታው እየተያዙ ለሚመጡ ወገኖቻችን ማቆያ ቦታ ማዘጋጀቱ አስፈላጊ ኾኖ ተገኝቷል፡፡ በመኾኑም፣ በኢትዮጵያ ኦርቶዶክስ ተዋሕዶ ቤተ ክርስቲያን ሥር ከአዲስ አበባ ጀምሮ በመላው አህጉረ ስብከት የሚገኙ፡

. መንፈሳዊ ኮሌጆች

. የካህናት ማሠልጠኛዎች

. ዘመናውያን ት/ቤቶች አስፈላጊው ዝግጅት እንዲደረግላቸውና መሟላት የሚገባው ኹሉ ተሟልቶ ወረርሽኙ እስከሚያበቃ ድረስ የሕሙማን ማቆያ አገልግሎት መስጫ እንዲኾኑ የሚመለከተው አካል ተረክቦ እንዲያስተናግድባቸው

3. በአሁኑ ጊዜ በወረርሽኙ ምክንያት መንግሥት ሕሙማንና የተቸገሩ አካላትን ለመርዳት እያደረገ ያለውን ጥረት ለማገዝከመንበረ ፓትርያርክ ጠቅላይ ጽ/ቤት፣ ለጊዜው፣ ብር 3,000,000(ሦስት ሚሊየን ብር) በመንግሥት ደረጃ ለተቋቋመውርዳታ አሰባሳቢ በቤተ ክርስቲያናችን ስም እንዲሰጥ፤

4. በቤተ ክርስቲያናችን ሥር ለሚገኙ የሕፃናት ማሳደጊያ ቦታዎች የሚገኙ ሕፃናትንና ችግረኞችን፣ በምግብ እና በንጽሕና መጠበቂያ መደጐም የሚያስፈልግበት ጊዜ በመኾኑአስፈላጊው ርዳታ የማሰባሰብ ሥራ እንዲሠራና እንዲረዱ፣ በቤተ ክርስቲያናችን ሥር በተቋቋመውተስፋ ልኡክ ግብረ ኃይል በኩል የማስተባበሩ ሥራ እንዲሠራ፤

91534650_861216847730101_3963332663254712320_o

5. ብፁዕ ወቅዱስ ፓትርያርክአሁን የያዝነውን የጾምና የጸሎት ጊዜ ምክንያት በማድረግ፣ በቤተ ክርስቲያን ጸሎተ ቅዳሴውን በመምራት እና በመባረክ መቆየታቸውን ቋሚ ሲኖዶስ ተገንዝቧል፡፡ ይኹን እንጂ በአሁኑ ጊዜ፣ በአገራችን ያለው ወረርሽኝ በእጅጉ እየተስፋፋ በመኾኑና የተለየ አባታዊ ጸሎት እና ሱባኤ የሚያስፈልግ ኾኖ በመገኘቱብፁዕ ወቅዱስ ፓትርያርኩ፣ ከዛሬ መጋቢት 23 ቀን 2012 .. ጀምሮ ለዓለም ሰላም እና ለሕዝቦች ደኅንነት ሲባል ለጊዜው ለብቻቸው በልዩ የጾም እና የጸሎት የሱባዔ ጊዜ እንዲቆዩ ቋሚ ሲኖዶስ ወስኗል፡፡

እግዚአብሔር አምላክ፥ ዓለማችንንና አገራችን ኢትዮጵያን ይጠብቅልን፤

ለሕዝባችንም ምሕረትንና ፈውስን ይስጥልን

አሜን፡፡

መጋቢት 23 ቀን 2012 ዓ.ም.

አዲስ አበባ

የብሪታኒያ እና የአየርላንድ አህጉረ ስብከት ሊቀ ጳጳስ ብፁዕ አቡነ ጎርጎርዮስ ዐረፉ

HIs Grace Abune Gorgorewos Archbishop of Britania and Ireland

በኢትዮጵያ ኦርቶዶክስ ተዋሕዶ ቤተ ክርስቲያን የብሪታኒያ እና የአየርላንድ አህጉረ ስብከት ሊቀ ጳጳስ ብፁዕ አቡነ ጎርጎሬዎስ ዐረፉ፡፡

ብፁዕነታቸው፣ ቀደም ሲል ጀምሮ በነበረባቸው ሕመም ሕክምና ሲከታተሉ እንደቆዩ የተገለጸ ሲኾን፣ ትላንት እሑድ፣ መጋቢት 20 ቀን 2012 ዓ.ም.[Edit] በሎንዶን ማረፋቸው ታውቋል፡፡

ብፁዕነታቸውን ለመሸኘት እና የቀብር ሥነ ሥርዓታቸውን በተመለከተ፣ የሀገረ ስብከቱ ጽ/ቤት፣ ወቅቱን ያገናዘበ ዝግጅት በማድረግ ላይ እንደኾነ ተጠቁሟል፡፡
በፊት ስማቸው መጋቤ፥ ኃይለ ኢየሱስ ከበደ ይባሉ የነበሩት ብፁዕነታቸው፣ በአራተኛው ፓትርያርክ ብፁዕ ወቅዱስ አቡነ መርቆሬዎስ አንብሮተ እድ፣ ጥቅምት 18 ቀን 1983 ዓ.ም. ከተሾሙት ስድስት ኤጲስ ቆጶሳት አንዱ ነበሩ፡፡

የፀረ ኮቪድ-19 የተስፋ ልዑክ ዐቢይ ግብረ ኃይል የመጀመሪያ መግለጫውን ሰጠ፤በቅዱስ ሲኖዶስ መመሪያ አተገባበር ክፍተት ባሳዩ አድባራት ላይ የእርምት ርምጃ እየወሰደ ነው!

ከነገ ጀምሮ፥ ለነዳያንና ለተቸገሩ ወገኖች ደረቅ ምግቦችንና የጽዳት መጠበቂያ ቁሶችን በየአጥቢያው ይሰበስባል፤ ለምእመናን የድጋፍ ጥሪ አቅርቧል፡፡

~~~et-600x387

  • ካህናት፣ መምህራንና ሐኪሞች የተካተቱበት፥ እስከ አጥቢያ ድረስ የተዘረጋ ግብረ ኃይል ነው፤
  • ወጥ መዋቅር አዘጋጅቶ፥ለኹሉም አህጉረ ስብከት፣ወረዳ አብያተ ክህነትና አጥቢያዎች ልኳል፤
  • ከቀኖና ጋራ የተያያዙ ጉዳዮችንና የማስተማሪያ ሰነዶችን አዘጋጅቶ ለቋሚ ሲኖዶስ አቅርቧል፤
  • ትምህርትና ማብራሪያዎችን፣ በመደበኛና ማኅበራዊ ሚዲያዎች እንደሚሰጥ አስታውቋል፤
  • ዛሬ ከቀትር በኋላ፣ ለአዲስ አበባ አድባራት አስተዳዳሪዎች እና ሰባክያን ሥልጠና ይሰጣል፤
  • በቅ/ሲኖዶስ መመሪያ አተገባበር አድባራቱ ባሳዩት ክፍተት የእርምት ርምጃ እየወሰደ ነው!

***

#የፀረ ኮቪድ_19_የተስፋ_ልዑክ

በኢትዮጵያ ርቶዶክስ ተዋሕዶ ቤተ ክርስቲያን
በፀረ ኮቪድ-19 የተስፋ ልዑክ ግብረ ኃይል የተሰጠ መግለጫ

____________

በስመ አብ ወወልድ ወመንፈስ ቅዱስ አሐዱ አምላክ፤ አሜን፡፡

በአገራችን በኢትዮጵያ በገጠር እና በከተማ እንዲሁም በመላው ዓለም ለምትገኙ የኢትዮጵያ ኦርቶዶክስ ተዋሕዶ እምነት ተከታዮች እና መላው ኅብረተሰብ በሙሉ

እንደሚታወቀው ኹሉ ቋሚ ሲኖዶስ፣ መጋቢት 14 ቀን 2012 ዓ.ም. ባካሔደው አስቸኳይ ስብሰባ፣ የወረርሽኙን አሳሳቢነት በመመልከት፣ ከጠቅላይ ቤተ ክህነት ጀምሮ በየደረጃው የተስፋ ልዑክ ግብረ ኃይል እንዲቋቋም በወሰነው መሠረት፣ ካህናት አባቶች፣ መምህራነ ወንጌል እና የሕክምና ባለሞያዎች ያሉበት የተስፋ ልዑክ ዐቢይ ግብረ ኃይል ተቋቁሟል፡፡

Bete Kihinet Anti COVID 19

ግብረ ኃይሉ ከተቋቋመበት ጊዜ ጀምሮ የተለያዩ ሥራዎችን በመሥራት ላይ ይገኛል፡፡ ይኸውም፡-

1. ግብረ ኃይሉ በሥሩ፣ አራት ንዑሳን ኮሚቴዎችን አዋቅሯል። ለንዑሳን ኮሚቴዎቹ ተግባር እና ሓላፊነት አዘጋጅቶ ሰጥቷል፤ በግብረ ኃይሉ የተዋቀሩት ንዑሳን ክፍሎችም የሚከተሉት ናቸው።

፩. የትምህርት፣ ሚዲያ እና ሕዝብ ግንኙነት ንዑስ ግብረ ኃይል፣

፪. የድጋፍ አሰባሳቢ እና ፋይናንስ ንዑስ ግብረ ኃይል፣

፫. የቴክኒክ፣ አደጋ ዝግጁነት እና ትንበያ ንዑስ ግብረ ኃይል፣

፬. የአጥቢያ የፀረ ኮቪድ 19 ተስፋ ልዑክ ግብረ ኃይል ክትትል ንዑስ ግብረ ኃይል ናቸው፡፡

2. ንዑሳን ኮሚቴዎቹ፣ በተሰጣቸው ሓላፊነት መተግበር ያለባቸውን ጉዳዮች ዐቅደው ወደ ሥራ ገብተዋል።

3. በአዲስ አበባ ሀገረ ስብከት የተስፋ ልዑክ ግብረ ኃይል እንዲቋቋም ተደርጓል፤ በየደረጃውም ተመሳሳይ ሥራዎች እንዲሠሩ እና ሥራዎች በአግባቡ እንዲቀናጁ ከጠቅላይ ቤተ ክህነት ጀምሮ እስከ አጥቢያ ድረስ ሊያስተሳስር የሚችል፣ ወጥነት ያለው የሥራ መዋቅር እና ሓላፊነት ተዘጋጅቶ ለኹሉም አህጉረ ስብከት፣ ወረዳ ቤተ ክህነት እና አጥቢያዎች ተልኳል።

4. በጠቅላይ ቤተ ክህነት ጽ/ቤት፣ የኮሮና ቫይረስ መከላከል ቡድን አቋቁሞ፣ ወደ ቅጽሩ የሚገቡ ሠራተኞችንም ኾነ ባለጉዳዮችን እየመረመረ ይገኛል።

5. ከቀኖና ቤተ ክርስቲያን ጋራ የተያያዙ ጉዳዮችንና የማስተማሪያ ሰነዶችን አዘጋጅቶ ለማጸደቅ ለቋሚ ሲኖዶስ አቅርቧል።

6. ከጤናው ጋራ የተያያዙ የማስተማሪያ ፓወር ፖይንት እና ተለጣፊ ወረቀቶች ተዘጋጅተዋል።

7. ዛሬ ቅዳሜ፣ መጋቢት 19 ቀን በስምንት ሰዓት፣ በአዲስ አበባ ላሉ ለሁሉም አጥቢያ ቤተ ክርስቲያን አስተዳዳሪዎች እና የስብከተ ወንጌል ሓላፊዎች:-

  • በበሽታው መተላለፊያ መንገዶች
  • መከላከያ መንገዶቹ
  • ቤተ ክርስቲያን ያላትን ጉልሕ ሚና
  • እነርሱም የበኩላቸውን የሚወጡበትን መንገድ ለማሳየት ሥልጠና ይሰጣል።

8. በብዙኀን መገናኛ ስለ በሽታው ትምህርት እየሰጠ ይገኛል፣ ይህንም አጠናክሮ ይቀጥላል።

9. በአንዳንድ አድባራት ላይ የሚታዩ ክፍተቶች ላይ የእርምት ርምጃ እንዲወሰድ ከሚመለከተው አካል ጋራ ሠርቷል፤ ወደ ፊትም ይቀጥላል።

10. ቅዱስ ሲኖዶስ የወሰናቸውን ውሳኔዎች ያለመሸራረፍ እንዲተገበሩ ያግዛል፤ ያስተገብራል።

11. ግብረ ኃይሉ ባስቀመጠው ዕቅድ መሠረት ጉዳዮችን እያከናወነ አስፈላጊ በሚኾንበት ጊዜ በብዙኀን መገናኛ እና ማኅበራዊ ሚድያዎችን (በቴሌግራም፣ ዩቲዩብ እና ፌስቡክ) ላይ አስፈላጊ ማብራሪያ ይሰጣል። ከግብረ ኃይሉ የሚወጡ የተለያዩ ጉዳዮችንና ትምህርቶችን ከዚያ ማግኘት ይቻላል።

12. ኹሉም ምእመን፣ ለተቸገሩ ወገኖቹ መድረስ እንዳለበት በቅዱስ ሲኖዶስ ተወስኗል።

13. ስለኾነም፣ ለነዳያንና ለተቸገሩ ወገኖቻችን የሚኾን ደረቅ ምግቦች፣ የጽዳት መጠበቂያ ቁሶችን ከነገ ጠዋት ጀምሮ በየአጥቢያ ቤተ ክርስቲያኑ ተመድበው ለሚሰበስቡ የቤተ ክርስቲያን አካላት እንድትወስዱ በእግዚአብሔር ስም ጥሪያችንን እናስተላልፋለን።

በዚሁ አጋጣሚ፣ ለመላው የኢትዮጵያ ሕዝብ በሙሉ፣ ቅዱስ ሲኖዶስ እና የጤና ሚኒስቴር እንደወሰኑት፡-

  • አካላዊ ርቀታችንን በመጠበቅ፣
  • እጃችንን ደጋግመን በመታጠብ፣
  • አስፈላጊ ከኾኑ ጉዳዮች ውጭ ከቤት ውስጥ ባለመውጣት እና
  • ሰዎች በብዛት በሚሰበሰቡበት ቦታ ባለመሔድ

ራሳችንንና ወገናችንን ከዚህ ክፉ ወረርሽኝ እንድንጠብቅ በእግዚአብሔር ስም ጥሪያችንን እናስተላልፋለን።

_____________________

እንግዲህ እንደ ጥበበኞች እንጅ ጥበብ እንደሌላቸው ሳይኾን እንዴት እንድትመላለሱ በጥንቃቄ ተጠበቁ፡፡” (ኤፌ.5÷15)

የእግዚአብሔር ቸርነት አይለየን፤ አሜን፡፡