ብፁዕ አቡነ ቀሌምንጦስ የአዲስ አበባ ሀገረ ስብከት ሊቀ ጳጳስ ኾኑ

ብፁዕ አቡነ ቀሌምንጦስ፤ የከምባታ ሐዲያ ጉራጌና ስልጤ አህጉረ ስብከት ሊቀ ጳጳስና የሰንበት ት/ቤቶች ማ/መምሪያ የበላይ ሓላፊ

የቅዱስ ሲኖዶስ ምልአተ ጉባኤ በዛሬ፣ ጥቅምት ፳፩ ቀን ፳፻፯ ዓ.ም. ዐሥረኛ ቀን የቀትር በፊት ውሎው ብፁዕ አቡነ ቀሌምንጦስን በአዲስ አበባ ሀገረ ስብከት የፓትርያርኩ ረዳት ሊቀ ጳጳስ ኾነው እንዲሠሩ መደበ፡፡

ብፁዕነታቸው፣ ትላንት በተጠናቀቀው የሕገ ቤተ ክርስቲያን ማሻሻያ፣ የፓትርያርኩ ልዩ ሀገረ ስብከት ኾኖ በተደነገገው የአዲስ አበባ ሀገረ ስብከት፣ የፓትርያርኩ ረዳት ሊቀ ጳጳስ ኾነው እንዲሠሩ በምልአተ ጉባኤው የተመደቡት ከርእሰ መንበሩ ብፁዕ ወቅዱስ አቡነ ማትያስ በቀረበው ጥቆማ ነው፡፡

ምደባው አስመራጭ ኮሚቴ ተቋቁሞ ሦስት ዕጩዎች ከተለዩ በኋላ በዕጣ እንዲከናወን ታስቦ እንደነበር ተገልጧል፡፡ ይኹንና የፓትርያርኩን ጥቆማ መነሻ በማድረግ እንዲወሰን የተደረገው፣ የመንበረ ፓትርያርኩ መቀመጫ የኾነው አዲስ አበባ የፓትርያርኩ ልዩ ሀገረ ስብከት በመኾኑ ጥቆማውም በብፁዕ ወቅዱስ አቡነ ማትያስ እንዲሰጥ ምልአተ ጉባኤው ከተስማማበት በኋላ ነው፡፡

በኤጲስ ቆጶስነት ከመሾማቸው በፊት የደብረ ሊባኖስ ገዳም ጸባቴ እንዲኹም የጥንታዊው ደብረ ብርሃን ሥላሴ ቤተ ክርስቲያን አለቃ የነበሩት ብፁዕነታቸው፣ በነሐሴ ወር ፲፱፻፺፯ ዓ.ም. በብፁዕ ወቅዱስ አቡነ ጳውሎስ አንብሮተ እድ ከተሾሙ በኋላ በምሥራቅ ሐረርጌና በወላይታና ዳውሮ አህጉረ ስብከት ያገለገሉ ሲኾን በአኹኑ ወቅት የከምባታ ሐዲያ ጉራጌና ስልጤ አህጉረ ስብከትን እየመሩ በመንበረ ፓትርያርክ ጠቅላይ ቤተ ክህነት የሰንበት ት/ቤቶች ማደራጃ መምሪያን በበላይ ሓላፊነት እያገለገሉ ይገኛሉ፡፡ 

የአዲስ አበባ ሀገረ ስብከት ጽ/ቤት

የአዲስ አበባ ሀገረ ስብከት የሀገሪቱ ርእሰ ከተማ ስለኾነና ከሌሎች አህጉረ ስብከት የሚለይባቸው ልዩ ኹኔታዎች በመኖራቸው እኒኽን ከግምት ያስገባ የተለየ አወቃቀርና የፐርሰንት አከፋፈል ሥርዐት እንደሚኖረው በተሻሻለው ሕገ ቤተ ክርስቲያን ሰፍሯል፡፡

በሀገረ ስብከቱ የገዳማትና አድባራት አስተዳዳሪዎች በቅዱስ ፓትርያርኩ የሚሾሙት በሕጉ÷ ስለ ትምህርት ዝግጅት፣ የአገልግሎት ልምድ፣ ግብረ ገብነት፣ የካህናትና ምእመናን አመኔታና ተቀባይነት የተዘረዘሩ የብቃት መስፈርቶች በሊቀ ጳጳሱ ሰብሳቢነት በሚመራው በሀገረ ስብከቱ አስተዳደር ጉባኤ ተመርጠው የምርጫው ውጤት ለቋሚ ሲኖዶስ ቀርቦ ከጸደቀ በኋላ መኾኑ ተደንግጓል፡፡

ከ160 በላይ ገዳማትና አድባራት የሚገኙበት አዲስ አበባ፣ በአራት አህጉረ ስብከት ተከፍሎ ከነበረበት ወደ አንድ ሀገረ ስብከት ከተመለሰበት የግንቦት ፳፻፭ ዓ.ም. ውሳኔ በኋላ፣ በሰባት ክፍላተ ከተማ በማዋቀርና የሥራ ክፍፍል በማድረግ በበጀት ዘመኑ በርካታ ሥራዎች እንደተከናወኑበት በ፴፫ኛው የመንበረ ፓትርያርክ አጠቃላይ ሰበካ መንፈሳዊ ጉባኤ የቀረበው የሀገረ ስብከቱ ሪፖርት ያስረዳል፡፡ 

እንደ ሪፖርቱ÷ በሀገረ ስብከቱና በክፍላተ ከተማ ጽ/ቤቶች አስተባባሪነት በቅርብ የሚገናኙ ገዳማትና አድባራት በአንድ ላይ በመቀናጀት ልዩ የአንድነት የስብከተ ወንጌል ጉባኤያት በሰፊው ተካሒደዋል፡፡ በተለያዩ ገዳማትና አድባራት የአብነት መምህራን ተመድበው ደቀ መዛሙርት እንዲያወጡ ሰፊ ሥራ ተሠርቷል፤ ጥሩ ውጤትም ተገኝቷል፡፡ የሰንበት ት/ቤቶች ወጣቶች በአገር አቀፍና በዓለም አቀፍ ደረጃ በሚከበሩ በዓላት ላይ በመገኘት ከፍተኛ አገልግሎት አበርክተዋል፡፡

በተለያየ ምክንያት ከሥራቸው ተፈናቅለው የነበሩ ከሰማኒያ በላይ የቤተ ክርስቲያን መምህራን፣ ቀሳውስትና ዲያቆናት በሀገረ ስብከቱ አስተዳደር ጉባኤ በማስወሰንና ጉዳያቸውን የሚያጠና ከሀገረ ስብከቱ እንዲኹም የክፍላተ ከተማ ሥራ አስኪያጆች የተካተቱበት የጥናት ኮሚቴ በማቋቋም ወደ ሥራ እንዲመለሱ መደረጋቸው ተዘግቧል፡፡ በአዲስ አበባ ከተማ ሕንፃ ቤተ ክርስቲያን ለመትከል ከፍተኛ ችግር የሚያጋጥም ቢኾንም በሀገረ ስብከቱ ከፍተኛ ክትትል የተለያዩ የመንግሥት አካላትን በማሳመን ስምንት አብያተ ክርስቲያን ተተክለዋል፡፡

ሀገረ ስብከቱ፣ ከከተማው አስተዳደር ቦታ በሊዝ ወይም በነፃ በመጠየቅ ኹለገብ ሕንፃ ለመሥራት አልያም በቀድሞው የሀገረ ስብከቱ ሕንፃ ላይ በአካባቢው የግንባታ ደረጃ (ስታንዳርድ) መሠረት ባለሰባት ፎቅ ኹለገብ ሕንፃ ለመሥራት ዕቅድ አውጥቶ እየተንቀሳቀሰ መኾኑን በሪፖርቱ አስታውቋል፡፡

በ፳፻፮ ዓ.ም. በጀት ዓመት ሀገረ ስብከቱ 445‚596‚486.80 ጠቅላላ ገቢ ያገኘ ሲኾን ከዚኽ ውስጥ የመንበረ ፓትርያርክ ጠቅላይ ቤተ ክህነት ድርሻ (65 በመቶ) የኾነውን ከኃምሳ ሚልዮን ብር በላይ /50‚236‚305.27/ ገቢ አድርጓል፡፡ ይህም ከአምናው ፈሰስ ጋራ ሲነጻጸር ከአምስት ሚልዮን ብር በላይ ብልጫ እንደተመዘገበበት ተመልክቷል፡፡

የአዲስ አበባ ሀገረ ስብከት ከዓመት ዓመት ከፍተኛ የገቢ ዕድገት እንዳስመዘገበና አስተዳደራዊ አሠራሩም እንደተሻሻለ በሪፖርቱ መሰማቱ የሚያበረታታ ነው፡፡ እንደ አዲስ አበባ ተጨባጭ ኹኔታ ሲታይ ገዳማቱና አድባራቱ ከፍተኛ የሀብት ክምችት ያለባቸው የብዙ ባለሀብትና ንብረት ባለቤቶች ከመኾናቸው የተነሣ በቃለ ዐዋዲው ሕግና መመሪያ ተደግፎ በታማኝነት ከልብ ከተሠራ በኹሉም የሥራ ዘርፍ ተኣምር መፍጠር እንደሚቻል ይታመናል፡፡

ይኹን እንጂ ከሀገረ ስብከቱ ጽ/ቤት ጀምሮ በገዳማትና አድባራት በተደጋጋሚ እንደታዩ በሪፖርቶች ለተገለጹት፡-

• ከሙስና ጋራ የተያያዘ የሥራ አለመቀላጠፍና የመልካም አስተዳደር ዕጦት
• በጎሳ ላይ ያተኮረ የቅጥር፣ የዕድገትና የዝውውር አፈጻጸም ችግር
• የሰበካ ጉባኤ በቃለ ዐዋዲው ድንጋጌ መሠረት አለመደራጀት
• የአባላት አስተዋፅኦ በትክክል አለመክፈል
• የገንዘብና ንብረት አያያዝን ለማጎልበት የተላለፈውን መመሪያ በአግባቡ ተግባራዊ አለማድረግ
• የሒሳብ ምርመራን በጊዜውና በትክክል አለማከናወን
• የፐርሰንት ገቢውም በየደረጃው በቅጽ ተሞልቶ በጊዜው አለመቅረብ

እና የመሳሰሉት አሳሳቢ ችግሮች የማያዳግም ሥር ነቀል መፍትሔ እንዲሰጣቸው በመንበረ ፓትርያርክ አጠቃላይ ሰበካ መንፈሳዊ ጉባኤ ደረጃ በተደጋጋሚ ሲጠየቅ ቆይቷል፡፡

ለተቋማዊ ችግሮቹ የማያዳግም ሥር ነቀል መፍትሔ ለማስገኘት፣ በቅዱስ ሲኖዶሱ ይኹንታና አቅጣጫ የተሰጠበትና የማኅበረ ካህናቱን፣ ማኅበረ ምእመናኑንና የሰንበት ት/ቤት ወጣቶችን ድጋፍ ያረጋገጠው የመዋቅር፣ የአደረጃጀትና የአሠራር ጥናት በቋሚ ሲኖዶስ እየታየ ተግባራዊ እንዲደረግ ውሳኔ የተላለፈበት ቢኾንም መለካውያን አማሳኞችና አድርባይ ፖሊቲከኞች ልዩ ጽ/ቤቱን ተቆጣጥረው በፈጠሩት ሳንክ ትግበራው በእጅጉ ዘግይቶ ይገኛል፡፡

ብፁዕ አቡነ ቀሌምንጦስ፣ በሰንበት ት/ቤቶች ማደራጃ መምሪያ የበላይ ሓላፊነታቸው በሀገር አቀፍ ደረጃ ለተቋቋመው የሀገር አቀፍ አንድነት ጉባኤ የወጣው የአምስት ዓመት ስትራተጅያዊ ዕቅድ ጸድቆ ወደ ትግበራ እንዲገባ በማድረግ ባላቸው አባታዊ የአመራር ልምድ ተጠቅመው÷ በቅዱስ ሲኖዶስ ትእዛዝ ለአዲስ አበባ ሀገረ ስብከት የተዘጋጀውና በካህናቱ፣ ሊቃውንቱ፣ ሠራተኞቹና ምእመናኑ ‹‹የቤተ ክርስቲያን ትንሣኤ ብሥራት›› የተባለውን የአደረጃጀትና አሠራር ጥናት ወደ ትግበራ ምዕራፍ በማሸጋገር አዲስ አበባ የአህጉረ ስብከቱ ኹሉ ሞዴል ኾኖ የሚታይበትን የተቋማዊ ለውጥ ጥናት እንደሚያሳኩና ብዙ ክፍተቶችን እንደሚሞሉ ተስፋ እናደርጋለን፡፡

ለብፁዕነታቸው ውጤታማ የሥራ ዘመን እንመኝላቸዋለን፡፡