ቅ/ሲኖዶስ: ለአማሳኞቹ ቀኖናዊ ቅጣትና የመጨረሻ ማስጠንቀቂያ እንዲሰጣቸው ወሰነ፤ ፓትርያርኩ ‹‹ልዩ ጸሐፊዬን ከምታነሡ እኔን አውርዱኝ፤ ጥዬ እሔዳለኹ፤ ገዳሜ እገባለኹ›› ሲሉ ለንቡረ እድ ኤልያስ ተከላከሉ

  • ውሳኔው በዋናነት ሊቀ ትጉሃን ዘካርያስ ሐዲስንና መልአከ ገነት ኃይሌ ኣብርሃን ይመለከታል
  • በቀጣይ ክትትልና ቁጥጥር በተቀጡበት ድርጊታቸው ከተገኙ ክህነታቸው እንዲያዝ ተወስኗል
  • ፓትርያርኩ ‹‹አጀንዳው መያዙን አላውቅም›› በሚል ውይይት እንዳይካሔድ ተቃውመው ነበር

*          *         *

  • ‹‹እምነት አለው ለማለት ይከብዳል፤ የሙስና አባትና የሰላም ጠንቅ ነው፤›› የተባሉት ንቡረ እድ ኤልያስ የነበሩትም ያሉትም ፓትርያርኮች ችግር ዋነኛ መንሥኤ እንደኾኑ ተሠምሮበታል
  • በብፁዕ አቡነ ቀሌምንጦስ መሾም የበሸቁትና በቀኖናዊ ውሳኔው የተደናገጡት እነሊቀ ትጉሃን ዘካርያስ ሐዲስ ‹‹ይኼ ይዞ ሟች፤ለሸዋ አሳልፎ ሰጠን›› እያሉ ፓትርያርኩን ሲዘልፏቸው ዋሉ

*           *         *

የቅዱስ ሲኖዶስ ምልአተ ጉባኤ በዛሬ፣ ጥቅምት ፳፩ ቀን ፳፻፯ ዓ.ም. ዐሥረኛ ቀን የቀትር በፊት ውሎው ‹‹በሌብነት ላይ ተሠማርተው ቤተ ክርስቲያኗን እያወደሙ ነው›› ባላቸው ኹለት የአማሳኙ ቡድን መሪዎችና ግብረ አበሮቻቸው ላይ ውሳኔ አሳለፈ፡፡

the heavily corrupt Lique Tiguhan Zekarias Haddis

የሲ.ኤም.ሲ ደብረ ምሕረት ቅዱስ ሚካኤል ቤተ ክርስቲያን አስተዳዳሪ ሊቀ ትጉሃን ዘካርያስ ሐዲስ

በአዲስ አበባ ሀገረ ስብከትና በሥሩ በሚገኙ ገዳማትና አድባራት ስለሚታየው የመልካም አስተዳደር ችግር የተወያየው ምልአተ ጉባኤው÷ ‹‹ቤተ ክርስቲያኗን አዋርደዋል›› ባላቸው የአማሳኞች መሪዎች ላይ ባሳለፈው ውሳኔ፣ ቀኖናዊ ቅጣት እንዲፈጸምባቸውና ከባድ ማስጠንቀቂያ እንዲሰጣቸው ትእዛዝ አስተላልፏል፡፡

the heavily corrupt Melake Genet haile abreha

የደብረ ጽጌ ቅዱስ ጊዮርጊስ ቤተ ክርስቲያን አስተዳዳሪ መልአከ ገነት ኃይሌ ኣብርሃ

ቀኖናዊ ቅጣቱና ከባድ ማስጠንቀቂያው በተለይ የአማሳኞቹን ቡድን እንቅስቃሴ በመደገፍ፣ በማስተባበርና በመምራት ተጠቃሽ በኾኑት የሲ.ኤም.ሲ ደብረ ጽባሕ ቅዱስ ሚካኤል ቤተ ክርስቲያን አስተዳዳሪ ሊቀ ትጉሃን ዘካርያስ ሐዲስ እና የገነተ ጽጌ ቅዱስ ጊዮርጊስ ቤተ ክርስቲያን አስተዳዳሪ መልአከ ገነት ኃይሌ ኣብርሃ ላይ ተፈጻሚ እንደሚኾን ታውቋል፡፡

Nebured Elias Abreha, special secretary of the patriarch Aba Mathias

የፓትርያርኩ ልዩ ጸሐፊ ንቡረ እድ ኤልያስ ኣብርሃ

ኹለቱን የአማሳኞች መሪዎች እንደ አቀባባይ ደላሎች በመጠቀም ቀድሞም የነበራቸውን የምዝበራ ሰንሰለት አጠናክረው በቀጠሉት የፓትርያርኩ ልዩ ጸሐፊ ንቡረ እድ ኤልያስ ኣብርሃ ጉዳይ ምልአተ ጉባኤው የተነጋገረ ቢኾንም ፓትርያርኩ ‹‹የእኔ የግሌ ጸሐፊ ነው›› በሚል ተከላክለውለታል፡፡

‹‹እርሱን ብታነሡ ጦር ያማዝዛል›› በማለት ብፁዓን አባቶችን ፈገግ ያሰኙት ፓትርያርኩ፣ ልዩ ጸሐፊአቸው ከሓላፊነት ከሚነሡ ይልቅ የእርሳቸው ከፓትርያርክነት መውረድ እንደሚቀል ሲገልጹ ‹‹እኔም አብሬ ልነሣ›› በማለት የምልአተ ጉባኤውን አባላት አስደምመዋል፡፡

ንቡረ እዱ ‹‹እምነት አለው፤ የሃይማኖት ሰው ነው ለማለት ያዳግታል›› ያሉት የምልአተ ጉባኤው አባላት÷ በ፳፻፩ ዓ.ም. ሕገ ቤተ ክርስቲያን እንዲከበር፣ ዐምባነናዊና ቤተሰባዊ አስተዳደር እንዲወገድ በተንቀሳቀሱ ብፁዓን አባቶች ላይ ከተካሔደው እንግልት ጀርባም እንደነበሩ ተወስቷል፡፡ የልዩ ጽሕፈት ቤታቸውን አወቃቀር መነሻ በማድረግም ንቡረ እድ ኤልያስ÷ ‹‹የሙስና አባትና የቤተ ክህነቱ የሰላም ጠንቅ›› እንደኾኑ የተሠመረበት ከመኾኑም ባሻገር የነበሩት ፓትርያርክና የቅዱስነታቸውም ችግር ዋነኛ መንሥኤ እንደኾኑ በመጥቀስ መታለፍ እንደሌለባቸው የብዙኃኑ አቋም ተይዞባቸው ነበር፡፡

ፓትርያርኩ ‹‹የእኔ የግሌ ጸሐፊ ነው፤ እንደዛ ከኾነ እኔም አብሬ ልነሣ፤ መነኵሴ ነኝ፤ ገዳም የኖርኩ ሰው ነኝ፤ ገዳሜ እገባለኹ፤›› ከማለት በቀር ይህንኑ የብዙኃኑን ብፁዓን አባቶች አስተያየትና የጥፋተኝነት ብያኔ ማስተባበል አልተቻላቸውም፡፡ በመጨረሻም ‹‹ማንኛውም ነገር ላይ እንዳይገባ አደርጋለኹ፤ እመክረዋለኹ፤አስተካክለዋለኹ›› የሚል ሓላፊነት በመውሰዳቸው ለጊዜው ሊታለፍ እንደቻለ ተገልጧል፡፡

‹‹አጀንዳው መኖሩን አላውቅም›› በሚል በሀገረ ስብከቱ የአስተዳደርና የሰላም ችግሮች ላይ ውይይት መካሔዱን ቢቃወሙም አጀንዳው ተይዞ በተላለፈው ውሳኔ ኹለቱን የአማሳኝ መሪዎች ይግባኝ ከማይጠየቅበት የቅዱስ ሲኖዶሱ ብያኔና ፍርድ ማዳን አልተቻላቸውም፡፡

የሙስናዎቹ አበጋዞች በመጨረሻ ማስጠንቀቂያና ለጥፋታቸው በሚመጥን ቀኖናዊ ቅጣት እንዲታለፉ የተደረገው ተጨርሰው እንዲጠረጉ የፍርድ ሐሳብ ከቀረበ በኋላ ነው፡፡ ግለሰቦቹ በውሳኔው የመታረማቸው ጉዳይ በቀጣይ ክትትልና ቁጥጥር የሚታይ ሲኾን በተቀጡበት የቤተ ክርስቲያንን ሰላም በአማሳኝነትና በአድመኝነት የማወክ ድርጊት ተመልሰው ከተገኙ፣ ክህነታቸው እንዲያዝ ምልአተ ጉባኤው ትእዛዝ ሰጥቷል፡፡ ውሳኔውንና ትእዛዙን በመመሪያ የማስተላለፍና ተከታትሎ የማስፈጸም ሓላፊነትም ከፓትርያርኩ የሚጀምር ሲኾን መላው ኦርቶዶክሳውያንም በጥብቅ የሚከታተሉት ጉዳይ ይኾናል፡፡

ብፁዕ አቡነ ቀሌምንጦስ የአዲስ አበባ ሀገረ ስብከት ሊቀ ጳጳስ ኾኑ

abune-qelemntos2

ብፁዕ አቡነ ቀሌምንጦስ፤ የከምባታ ሐዲያ ጉራጌና ስልጤ አህጉረ ስብከት ሊቀ ጳጳስና የሰንበት ት/ቤቶች ማ/መምሪያ የበላይ ሓላፊ

የቅዱስ ሲኖዶስ ምልአተ ጉባኤ በዛሬ፣ ጥቅምት ፳፩ ቀን ፳፻፯ ዓ.ም. ዐሥረኛ ቀን የቀትር በፊት ውሎው ብፁዕ አቡነ ቀሌምንጦስን በአዲስ አበባ ሀገረ ስብከት የፓትርያርኩ ረዳት ሊቀ ጳጳስ ኾነው እንዲሠሩ መደበ፡፡

ብፁዕነታቸው፣ ትላንት በተጠናቀቀው የሕገ ቤተ ክርስቲያን ማሻሻያ፣ የፓትርያርኩ ልዩ ሀገረ ስብከት ኾኖ በተደነገገው የአዲስ አበባ ሀገረ ስብከት፣ የፓትርያርኩ ረዳት ሊቀ ጳጳስ ኾነው እንዲሠሩ በምልአተ ጉባኤው የተመደቡት ከርእሰ መንበሩ ብፁዕ ወቅዱስ አቡነ ማትያስ በቀረበው ጥቆማ ነው፡፡

ምደባው አስመራጭ ኮሚቴ ተቋቁሞ ሦስት ዕጩዎች ከተለዩ በኋላ በዕጣ እንዲከናወን ታስቦ እንደነበር ተገልጧል፡፡ ይኹንና የፓትርያርኩን ጥቆማ መነሻ በማድረግ እንዲወሰን የተደረገው፣ የመንበረ ፓትርያርኩ መቀመጫ የኾነው አዲስ አበባ የፓትርያርኩ ልዩ ሀገረ ስብከት በመኾኑ ጥቆማውም በብፁዕ ወቅዱስ አቡነ ማትያስ እንዲሰጥ ምልአተ ጉባኤው ከተስማማበት በኋላ ነው፡፡

በኤጲስ ቆጶስነት ከመሾማቸው በፊት የደብረ ሊባኖስ ገዳም ጸባቴ እንዲኹም የጥንታዊው ደብረ ብርሃን ሥላሴ ቤተ ክርስቲያን አለቃ የነበሩት ብፁዕነታቸው፣ በነሐሴ ወር ፲፱፻፺፯ ዓ.ም. በብፁዕ ወቅዱስ አቡነ ጳውሎስ አንብሮተ እድ ከተሾሙ በኋላ በምሥራቅ ሐረርጌና በወላይታና ዳውሮ አህጉረ ስብከት ያገለገሉ ሲኾን በአኹኑ ወቅት የከምባታ ሐዲያ ጉራጌና ስልጤ አህጉረ ስብከትን እየመሩ በመንበረ ፓትርያርክ ጠቅላይ ቤተ ክህነት የሰንበት ት/ቤቶች ማደራጃ መምሪያን በበላይ ሓላፊነት እያገለገሉ ይገኛሉ፡፡  Continue reading

የሕገ ቤተ ክርስቲያን ማሻሻያው የቅዱስ ሲኖዶሱን ልዕልና በማጽናት ተጠናቀቀ፤ የፓትርያርኩ ምሬትና ብስጭት ያሳሰባቸው ብፁዓን አባቶች ሲያረጋጓቸው አመሹ

His Holiness Abune Mathias with thier Graces the Archbishops

  • ‹ከሕዝብ አጋጫችኹኝ፤ ከወንድሞቼ አንድነት ለያችኹኝ፤ ከነገራችኹኝ አንዱንም የተቀበለኝ የለም›› በሚል የተመረሩት አቡነ ማትያስ ምክራቸው ያልሠመረላቸውን ሦስት አማሳኝ አማካሪዎችን በከፍተኛ ድምፅ ‹‹ውጡልኝ›› በማለት ከፊታቸው አበረሯቸው፡፡
  • ከትላንትናው የስብሰባ ውሎ መጠናቀቅ በኋላ ፓትርያርኩ የነበሩበት የምሬትና የብስጭት ኹኔታ ተነግሯቸው ወደማረፊያቸው የተጠሩት በሹመት ቅድምና ያላቸው ብፁዓን አባቶች÷ አቡነ ማትያስ በተጠሪነት ጉዳይ የተሟገቱለት አቋም የቤተ ክርስቲያን እንዳልኾነ፣ ለአጭር ዕድሜ የኖረው የቤተ ክርስቲያን ሕግ መለወጥ እንደሌለበት ይልቁንም የአማሳኞችንና የባዕዳንን ምክር ከመስማትና ከመቀበል ተጠብቀው ትላንት ከቅዱስ ሲኖዶስ አባላት ጋራ ኹነው የተከላከሉለትን ሕገ ቤተ ክርስቲያን ማስከበራቸውን ቢቀጥሉ በእርሳቸውና በአባቶች መካከል ያለው ውጥረት ሊረግብና ሊተራረቅ እንደሚችል አመልክተዋቸዋል፡፡
  • ፓትርያርኩ በትላትናው ምሽት አማሳኞቹን በብስጭትና በምሬትም ቢኾን ከአበረሯቸውና በብፁዓን አባቶች ምክር ከተጽናኑ በኋላ በዛሬው የምልአተ ጉባኤው ውሎ ስብሰባውን በተረጋጋና በመግባባት መንፈስ ሲመሩና ‹‹እናንተ ካላችኁት አልወጣም›› እያሉ በጋራ ሲወስኑ ውለዋል፡፡
  • የቅዱስ ሲኖዶሱን የበላይነት(ልዕልና) በማረጋገጥ በተጠናቀቀው የሕገ ቤተ ክርስቲያን ማሻሻያ ረቂቅ አጀንዳ፣ ከፓትርያርኩ ጀምሮ እያንዳንዱ ሊቀ ጳጳስና ኤጲስ ቆጶስ(ጳጳስ) ተጠሪነቱ ለቅዱስ ሲኖዶሱ እንደኾነ ጸንቷል፤ የአዲስ አበባ ሀገረ ስብከት የፓትርያርኩ ልዩ ሀገረ ስብከት ኾኖ ሲሠራበት የቆየው ልምድ በማሻሻያው ተካትቶ እንዲደነገግ ተወስኗል፡፡ በልዩነት ነጥቦቹ ላይ በተላለፉት ውሳኔዎች መሠረት ረቂቁ ተስተካክሎ ሲቀርብ በምልአተ ጉባኤው አባላት ፊርማ እንደሚጸድቅ ይጠበቃል፡፡
  • በደቡብ አፍሪቃ በሊቀ ጳጳሱ ብፁዕ አቡነ ያዕቆብና በምእመናን መካከል ለተፈጠረው አለመግባባት መፍትሔ ለመስጠት በቀረበው የአጣሪ ልኡክ ሪፖርት ላይ የመከረው ምልአተ ጉባኤው÷ ብፁዕነታቸው ለጊዜው መንበረ ጵጵስናቸውን በናይሮቢ አድርገው በኬንያ፣ በጅቡቲና በሱዳን ተወስነው እንዲሠሩ፤ በደቡብ አፍሪቃ ደግሞ አገልግሎቱ በአድባራት አለቆችና በሰባክያነ ወንጌል ላይ ተመሥርቶ እንዲቀጥል ተወስኗል፡፡ ምልአተ ጉባኤው በሰሜን አሜሪካ በሚገኙት ብፁዕ አቡነ ኤዎስጣቴዎስ ጉዳይ መምከር ጀምሯል፡፡
  • ለአዲስ አበባ ሀገረ ስብከት ራሱን የቻለ ሊቀ ጳጳስ ስለመመደብና በሀገረ ስብከቱ የተፈጠሩ የመልካም አስተዳደር ችግሮች ዙሪያ በነገው ዕለት በመምከር ውሳኔ እንደሚያሳልፍ ይጠበቃል፡፡

ቅዱስ ሲኖዶስ: ‹‹እነማን ናቸው ከጀርባዎ ያሉት?›› ሲል ፓትርያርኩን ጠየቃቸው፤ በቅዱስ ሲኖዶስ አባላት ተጠሪነት አንቀጽ ላይ የተጀመረው ውይይት በመካረር አደረ

Holy Synod in session

  • አቡነ ማትያስ÷ የሊቃነ ጳጳሳትንና ኤጲስ ቆጶሳትን ተጠሪነት ለፓትርያርኩ በማድረግ በኦርቶዶክሳዊት ተዋሕዶ ሃይማኖት ሕገ ቤተ ክርስቲያን የመጨረሻው ከፍተኛ ሥልጣን ባለቤት የኾነውን የቅዱስ ሲኖዶሱን የበላይነት በፓትርያርኩ የበላይነት ለመተካት ከምልአተ ጉባኤው ጋራ መሟገታቸውን አጠናክረው ውለዋል፡፡
  • የቅዱስ ሲኖዶስ አመራር ያላትን ኦርቶዶክሳዊት ተዋሕዶ ቤተ ክርስቲያንን፣ በፓትርያርኩ ዐምባገነናዊ አመራር ሰጪነት በመርገጥ በስም እንጂ በግብር የሥልጣን ልዕልና የሌለው ሲኖዶስ ለመፍጠር እየተጣጣሩ ነው፡፡
  • ቤተ ክርስቲያን አንድነትን በሚጠይቅና ከፍተኛ የጥንቃቄ ርምጃዎችን በሚሻ የህልውና ጥያቄ ላይ እንዳለች ያጤኑ የምልአተ ጉባኤው አባላት፣ ፓትርያርኩ የልዩነት ነጥቦችን በማክረር ቤተ ክርስቲያኗን ለኹለት ለመክፈል ላደፈጡ ኃይሎች መሣርያ ሊኾኑ እንደሚችሉ ተገንዝበዋል፡፡
  • ‹‹ቅዱስነትዎ በጣም ተቀይረዋል፤ እነማን ናቸው ከጀርባዎ ያሉት?›› ሲልም ጠቅላላውን ጉዳይ በጥልቅ አስተውሎት በመመርመር በቤተ ክርስቲያኗ እና በቤተ ክርስቲያኗ ላይ ብቻ አጠንጥኖ መሥራት እንደሚገባ አጽንፆት ሰጥቶበታል፡፡  
  • ልዩነት በተያዘባቸው የመነጋገርያ ነጥቦች ላይ ከሌላ አካል የተመከሩበት የሚመስለውን ብቻ እየተናገሩ አቋማቸውን ከማክረር በቀር ማብራራትና መተንተን በእጅጉ እንደተሳናቸው የተነገረባቸው ርእሰ መንበሩ፣ ‹‹የነበረው ሕግ እንዳይሠራ የማሻሻያ ረቂቁም እንዳይጸድቅ›› የሚመስል ‹‹ሲኖዶሱን የመበተን›› አዝማሚያ እያሳዩ እንደመጡ ተስተውሏል፡፡

*              *             *

  • በሥራ ላይ የሚገኘው የ፲፱፻፺፩ ዓ.ም. ሕገ ቤተ ክርስቲያን÷ ቅዱስ ሲኖዶስ ማለት ፓትርያርክ፣ ሊቃነ ጳጳሳት፣ ጳጳሳትና ኤጲስ ቆጶሳት የሚያደርጉት ዓቢይ ጉባኤ እንደኾነ ይገልጻል፡፡ በአኹኑ የማሻሻያ ረቂቅም ቅዱስ ሲኖዶስ ማለት ‹‹ቅዱስ ፓትርያርክ፣ ሊቃነ ጳጳሳትና ኤጲስ ቆጶሳት የሚገኙበት ዐቢይ ጉባኤ ኾኖ ከፍተኛው የቤተ ክርስቲያኒቱ መንፈሳዊ፣ ሕግ አውጭና አስተዳደራዊ አካል ነው፡፡›› ይላል፡፡
  • ከቅዱስ ፓትርያርኩ ጀምሮ እያንዳንዱ ሊቀ ጳጳስና ኤጲስ ቆጶስ(ጳጳስ) ተጠሪነቱ ለቅዱስ ሲኖዶስ እንደኾነ ‹‹የቅዱስ ሲኖዶስ አባላት›› በሚለው የማሻሻያ ረቂቁ አንቀጽ ፰(፪) ተቀምጧል፡፡ የኢትዮጵያ ኦርቶዶክስ ተዋሕዶ ቤተ ክርስቲያን ርእሰ አበው (አበ ብዙኃን) የኾነው ፓትርያርኩ፣ የቅዱስ ሲኖዶስ ጉባኤንና የመንበረ ፓትርያርክ አጠቃላይ ሰበካ መንፈሳዊ ጉባኤን በሊቀ መንበርነት(በርእሰ መንበርነት) ይመራል፡፡ ይኸውም ለመላዋ የኢትዮጵያ ኦርቶዶክስ ተዋሕዶ ቤተ ክርስቲያን ‹‹የበላይ ጠባቂ፣ ለአንድነትዋና ለአስተዳደርዋ ከፍተኛ ሓላፊና ባለሙሉ ሥልጣን›› በመኾኑ እንደኾነ በሰበካ ጉባኤው ቃለ ዐዋዲ ደንብ አንቀጽ ፶፪(፩) ሰፍሯል፡፡
  • ይህም ሲባል ጠቅላላው የቤተ ክርስቲያን ጉባኤ ከፖፑ ሥልጣን በላይ ነው የሚለውን መነሣሣት (anti-papal concilliarism) በመቃወም፣ ፖፑ ‹‹የማይሳሳት የክርስቶስ እንደራሴና የአብያተ ክርስቲያናት ኹሉ የበላይ›› አድርጋ የፖፑን የሥልጣን የበላይነት (Primacy) በቫቲካን የመጀመሪያው ጉባኤ እንዳጸደቀችው የሮም ካቶሊክ አይደለም፡፡ በኢትዮጵያ ኦርቶዶክስ ተዋሕዶ ቤተ ክርስቲያን የመጨረሻው ከፍተኛ የሥልጣን ባለቤት በመንፈስ ቅዱስ የሚመራውና የመንበረ ሐዋርያት ወራሽ የኾነው ቅዱስ ሲኖዶስ ነው፡፡ ቅዱስ ሲኖዶስ ቤተ ክርስቲያንን በበላይነት የመምራት፤ የማስተዳደር፤ የመጠበቅ፤ ፍትሕ መንፈሳዊ በሚፈቅደው መሠረት ሕጎችን፣ ደንቦችንና ልዩ ልዩ መመሪያዎችን የማውጣት፣ የማሻሻል፣ የመሻር የዳኝነት ሥልጣን አለው፡፡ ቤተ ክርስቲያንንና የቤተ ክርስቲያን ጉዳዮችን በተመለከተ ቅዱስ ሲኖዶስ የሚሰጠው ውሳኔ የመጨረሻ ነው፡፡
  • በኢትዮጵያ ኦርቶዶክስ ተዋሕዶ ሃይማኖት ሕገ ቤተ ክርስቲያን አተረጓጎም፣ ‹‹የቅዱስ ሲኖዶስ አመራር›› ሲባል የኢትዮጵያ ኦርቶዶክስ ተዋሕዶ ቤተ ክርስቲያን የበላይ አካል የኾነውን በየደረጃው የቅዱስ ሲኖዶስ ምልአተ ጉባኤ፣ ቅዱስ ፓትርያርክ፣ ቋሚ ሲኖዶስ እና የቅዱስ ሲኖዶስ ጽ/ቤት ሥልጣንና ተግባር፣ አሠራርና ዓላማ ለቤተ ክርስቲያን ዓላማዎች ማስፈጸሚያ፣ አስተዳደራዊ መዋቅሮችና ተቋማት ማቋቋሚያና ማሠርያ መመሪያ የሚሰጥበት ነው፡፡
  • ፓትርያርኩ የቅዱስ ሲኖዶሱን አካላትና የቤተ ክርስቲያንን አጠቃላይ ስብሰባ (አጠቃላይ ሰበካ መንፈሳዊ ጉባኤ) በሰብሳቢነት ይምራ እንጂ በዐበይት ጉዳዮች ላይ ኹሉ ሲሠራ በቅዱስ ሲኖዶሱ ማስወሰን ይኖርበታል፡፡ በፊርማው የሚያስተላልፋቸው ሕጎች፣ መመሪያዎችና ውሳኔዎች ኹሉ በቅዱስ ሲኖዶሱ የወጡ መኾን አለባቸው፡፡ ሃይማኖትንና ቀኖና ቤተ ክርስቲያንን ከመጠበቅና ከማስጠበቅ ሓላፊነቱ ጎን ለጎን ቅዱስ ሲኖዶሱ ያወጣቸው ሕጎች፣ ያስተላለፋቸው መመሪያዎችና ውሳኔዎች በሥራ ላይ መዋላቸውን በመከታተልና በመቆጣጠር የቅዱስ ሲኖዶሱን የበላይነት(ልዕልና) የማስከበር ከፍተኛ ሓላፊነት አለበት፡፡

‹‹እነማን ናቸው ከጀርባዎ ያሉት?›› …

Zekarias Addis a day light robberየአማሳኞች ዋነኛ ቡድን መሪ የኾነው ሊቀ ትጉሃን ዘካርያስ ሐዲስ÷ ትላንት ተሲዓት ስብሰባው በድንገት ከተቋረጠ በኋላ ምሽት ላይ ፓትርያርኩን አግኝተዋቸው እንደነበር ተናገረ፡፡ እንደ ሊቀ ትጉሃን ዘካርያስ አነጋገር፣ ፓትርያርኩ ከስብሰባው የወጡት ተብረክርከው ነበር፡፡ ‹‹ለማይኾን ነገር አሠቃያችኁኝ›› ብለው እንዳማረሯቸውም አልሸሸገም፡፡ ‹‹የወሰዱት አቋም ታሪካዊ ነው፤ በተለይ በማኅበረ ቅዱሳን ላይ›› በማለት ‹‹መብረክረክ›› ሲል የገለጸውን አካላዊና ሥነ ልቡናዊ ቁመናቸውን ‹‹ሲያክሟቸው እንዳመሹ›› የጠቀሰው ሊቀ ትጉሃን ዘካርያስ፣ መንግሥት የማኅበሩ ገንዘብ ወደ ጠቅላይ ቤተ ክህነቱ ማእከላዊ ካዝና መግባቱን እንደሚፈልግና በጉዳዩ የጀመሩትን ጠንክረው እንዲገፉበት አበረታተናቸው ደስ ተሰኝተዋል ብሏል፡፡

የአዲስ አበባ ሀገረ ስብከትን የፓትርያርኩ ልዩ ሀገረ ስብከት በማድረግም በፀረ ተቋማዊ ለውጥ እና በፀረ ማኅበረ ቅዱሳን ቅስቀሳቸው ሆ ብለው አልነሣ ያሏቸውንና ‹‹በሸዋ ጳጳሳት በተለይ በአቡነ ማቴዎስ ይመካሉ›› ያሏቸውን የገዳማትና የአድባራት አለቆች ‹ከአዲስ አበባ ለማንኮታኮት›› ማቀዳቸውን ገልጧል – ‹‹እያንዳንዱ ጳጳስ ተሸማቅቆ እንዲሔድ እናደርጋለን፤ ማኅበረ ቅዱሳን የሸዋ ስብስብ ነው፤ ነገ ጠዋት የሸዋ አለቃ ከያለበት ደብር ሲጠፋ የምትገቡበት እናንተ ናችኹ፡፡››

ሰበር ዜና – ቅ/ሲኖዶሱን ያነጋገረው የማኅበራት ተጠሪነት በጊዜያዊነት ለሰንበት ት/ቤቶች ማደራጃ መምሪያ በማድረግና የቁጥጥር ሥርዐት በመዘርጋት ተቋጨ፤ የማኅበራት ማደራጃ መምሪያን የማቋቋም አስፈላጊነት በጥናት ይወሰናል

Holy Synod00

የቅዱስ ሲኖዶስ ምልአተ ጉባኤ

  • ለቁጥጥሩ ማኅበራት የመንበረ ፓትርያርክ ጠቅላይ ቤተ ክህነቱን ሞዴላሞዴል ይጠቀማሉ
  • ዕውቅና የመስጠት፣ ደንባቸውን የማጽደቅና የመሰረዝ ሥልጣን የቅ/ሲኖዶሱ ኾኖ ጸንቷል
  • በሰ/ት/ቤቶች ማ/መምሪያው የማኅበራትን ጉዳይ የሚከታተለው የመምሪያ ሊቀ ጳጳሱ ነው
  • ማኅበረ ቅዱሳን በውሳኔው ማህቀፍ ውስጥ በሚሻሻልለት መተዳደርያ ደንብ ይመራል
  • ስብሰባው የሊቃነ ጳጳሳትን ተጠሪነት በሚወስኑና በሌሎች የማሻሻያው ልዩነቶች ላይ  ቀጥሏል

አቡነ ማትያስ በቤተ ክርስቲያን ውስጥ ያለን አካል አክራሪና አሸባሪ ካሉ በውግዘት እንደሚለዩ ቅዱስ ሲኖዶሱ በጥብቅ አስጠነቀቃቸው! የዕለቱ የምልአተ ጉባኤው ውሎ በድንገት ተቋረጠ

  • ያደረውን የሕገ ቤተ ክርስቲያን አጀንዳ በፈቃዳቸው ትተው ሌላ ርእሰ ጉዳይ አንሥተዋል
  • የተቃወሟቸውን አባቶች በአሳፋሪ ንግግሮች በመዝለፍ ለማሸማቀቅ ሙከራ አድርገዋል
  • የሕገ ቤተ ክርስቲያኑ አጀንዳ ቀጣይነት በድምፅ ሊወሰንበት እንደሚችል ተመልክቷል
  • እንደ ሕጉ ስብሰባውን በአግባቡ ካልመሩ ምልአተ ጉባኤው ሌላ ሰብሳቢ መርጦ ይቀጥላል

*                *               *

Aba Mathias

  • ‹‹ተጠሪነትዎ ለቅዱስ ሲኖዶስ ነው፤ በቤተ ክርስቲያን ሕግ ቢመሩ፣ ቅዱስ ሲኖዶሱን ቢያከብሩ ይሻልዎታል፤ ሕግ አይገዛኝም ካሉ ወዳልተፈለገ አቅጣጫ እንሔዳለን፡፡›› /ቅዱስ ሲኖዶሱ/
  • በቅ/ሲኖዶስ ከተወሰነው በተፃራሪ ማኅበሩ ለልዩ ጽ/ቤታቸው ሳያሳውቅ አንዳችም መርሐ ግብር እንዳያከናውንና ከስብሰባው መጠናቀቅ በኋላ የሚወስዷቸውን ሕገ ወጥ ርምጃዎች መከላከልን በተመለከተ መመሪያ እንዲሰጥ ብፁዕ ዋና ጸሐፊው እና ብፁዕ ዋና ሥራ አስኪያጁ ጠይቀዋል፡፡
  • ‹‹ማኅበራት ገንዘባቸውን ወደ ማእከላዊ ካዝና ያስገቡ ይላሉ፤ የማኅበራት ዓላማ ገንዘብ ማሰባሰብ አይደለም፤ ገንዘብ አሰባሳቢ አይደሉም፤ ለተቋቋሙበት ዓላማ ያሰባሰቡትን ገንዘብ ግን እንዴት ሥራ ላይ እንዳዋሉት መቆጣጠር ይገባል፡፡››
  • ‹‹ዓላማዎ ማኅበሩን መዝጋት ነው፤ አይደለም? አይዘጋም!››

/የምልአተ ጉባኤው አባላት/

*               *             *

በቤተ ክርስቲያን ውስጥ አክራሪና አሸባሪ ሊባል የሚችልና የሚገባው አካል እንደሌለ የቅዱስ ሲኖዶስ ምልአተ ጉባኤ አባላት ገለጹ፡፡ ፓትርያርክ አቡነ ማትያስም በማንኛውም መድረክ በቤተ ክርስቲያን ውስጥ ያለን አካል/ተቋም አክራሪና አሸባሪ ከማለት እንዲቆጠቡ ምልአተ ጉባኤው በጥብቅ አስጠንቅቋቸዋል፡፡

‹‹በቤታችን ውስጥ አክራሪና አሸባሪ የሚባል አንድም አካል የለንም፤›› ያሉት ብፁዓን ሊቃነ ጳጳሳቱ፣ ፓትርያርኩ ሌሎች በሌላ መድረክ እንደሚሉት፣ በቤተ ክርስቲያን ውስጥ ያለን አካል አክራሪና አሸባሪ የሚሉ ከኾነ ‹‹ተወጋግዘን እንለያያለን›› ሲሉ በአጽንዖት አሳስበዋቸዋል፡፡

ፓትርያርኩ በትላንቱ የስብሰባ ውሎ፣ በጽሑፍ ተዘጋጅቶ የተሰጣቸውን እየጠቀሱ ማኅበራትን ከአክራሪነትና አሸባሪነት ጋራ እያቆራኙ ማብራሪያ ለመስጠት ሞክረዋል፡፡ በምልአተ ጉባኤ መክፈቻ ንግግራቸውም ቤተ ክርስቲያን በአክራሪነት የምትፈረጀው፣ ‹‹ማኅበራት በመንግሥትና በቤተ ክርስቲያን የማይታወቅ ሀብት ስለሚሰበስቡ ነው፤›› በማለት ‹‹በሕግ ማስተካከል አለብን›› ሲሉ ተናግረዋል፡፡

ለዚኽም በሕገ ቤተ ክርስቲያኑ ውስጥ ‹‹ሕጋዊና ዘላቂ መፍትሔ አስቀምጣለኹ›› በሚል ለውይይት በቀረበው የማሻሻያ ረቂቅ÷ ማኅበራት ገንዘባቸውን ወደ መንበረ ፓትርያርኩ ገቢ እንዲያደርጉ የሚያስገድድና ተጠሪነታቸውም ለቅዱስ ሲኖዶሱ መኾኑ ቀርቶ ለፓትርያርኩ እንዲኾን የሚደነግግ አንቀጽ ካልገባ በሚል የምልአተ ጉባኤውን ሒደት ለተከታታይ ኹለተኛ ቀን እግዳት ውስጥ ከተውት ውለዋል፡፡ Continue reading

ሰበር ዜና – ‹‹አቦይ ስብሐት ጎበዝ ነኽ አለኝ›› ያሉት ፓትርያርኩ የማኅበራትን ተጠሪነትና የገንዘብ እንቅስቃሴ በሚመለከተው የሕጉ ረቂቅ ከብፁዓን ሊቃነ ጳጳሳቱ ተፋጠው ዋሉ

Aba Mathiasoo

ርእሰ መንበሩ ስለማኅበራት በያዙት አቋም ከምልአተ ጉባኤው ስብሰባ በፊት ‹ከአ/አ አድባራትና ገዳማት አስተዳዳሪዎች› ጋራ ብዙ ሲሠሩበትና ሲደክሙበት የሰነበቱ መኾኑን ‹‹ስንት የደከምኹበት ነው፤ በቀላሉ የምተወው አይደለም›› በማለት ፍርጥም ብለዋል፡፡

  • ፓትርያርኩ የማኅበራት ገንዘብ ወደ ጠቅላይ ቤተ ክህነት ገቢ ኾኖ በማእከል ካልተመራ በሚል ከማኅበራት የበጎ ፈቃድ አገልግሎት ጋራ የሚቃረን ግትር አቋም ይዘው ውለዋል፡፡
  • አቋማቸው ተቀባይነት ካላገኘ ስብሰባውን ለመምራት እንደሚቸገሩ በመግለጽ ምልአተ ጉባኤን ለማስገደድ ያደረጉት ሙከራ በብፁዓን ሊቃነ ጳጳሳቱ ጽኑ አቋም ሳቢያ አልተሳካላቸውም፡፡
  • ጉዳዩ ‹‹ከአዲስ አበባ የገዳማትና አድባራት አስተዳዳሪዎች ጋራ ብዙ የሠራኹበትና የደከምኩበት ነው፤ በቀላሉ የምተወው አይደለም›› በሚል ከአክራሪነት ጋራ የተገናኘ ጽሑፍ ሲያነቡ ውለዋል፡፡
  • ፓትርያርክ አቡነ ማትያስ ‹አቦይ› ስብሐት ተናገረኝ እንዳሉት፣ ‹‹አንተ ጎበዝ ነኽ፤ ጽናት አለኽ፤ እንዲኽ ዐይነት ፓትርያርክ አይተን አናውቅም፡፡››

ከተጀመረ ስድስተኛ ቀኑን ያስቆጠረው የቅዱስ ሲኖዶስ ምልአተ ጉባኤ የመጀመሪያ ዓመታዊ መደበኛ ስብሰባ በዛሬ፣ ጥቅምት ፲፯ ቀን ፳፻፯ ዓ.ም. ሙሉ ቀን ውሎው፣ የ፲፱፻፺፩ ዓ.ም. ሕገ ቤተ ክርስቲያን ለማሻሻል በቀረበውና የልዩነት አቋም በተያዘባቸው የረቂቁ አንቀጾች ላይ ጠንካራ ውይይት ሲያደርግ አምሽቷል፡፡

የማሻሻያ ረቂቁ፣ ባለፈው ዓመት ግንቦት የርክበ ካህናት ቅዱስ ሲኖዶስ ኹለተኛ ዓመታዊ መደበኛ ስብስባ ወቅት አንቀጽ በአንቀጽ ከተወያየበት በኋላ ተጨማሪ እርማትና ማስተካከያ አድርጎ ለአኹኑ ምልአተ ጉባኤ እንዲያደርስ የሠየመው ስድስት አባላት ያሉት የብፁዓን ሊቃነ ጳጳሳት፣ የሊቃውንትና የምሁራን ኮሚቴ ያቀረበው ነው፡፡

የማሻሻያ ረቂቁንና በኮሚቴው አባላት መካከል የልዩነት አቋም የተያዘበትን ቃለ ጉባኤ ባለፈው ቅዳሜ ከቀትር በፊት ውሎው የተናበበው ምልአተ ጉባኤው፣ ለዛሬ ባሳደረው መሠረት ነው ፓትርያርኩ በአንድ በኩል፣ መላው የቅዱስ ሲኖዶስ አባላት በሌላ በኩል ፍጥጫ የተቀላቀለበት ውይይት ሲያካሒዱበት የዋሉት፡፡

የልዩነት አቋሞች የተያዘባቸው ነጥቦች፡-

  • የሊቃነ ጳጳሳትን ተጠሪነት(ዝውውር እና ምደባ)
  • የማኅበራትን ተጠሪነትና የገንዘብ እንቅሰቃሴ ማእከላዊነት
  • የአዲስ አበባ ሀገረ ስብከት አመራር የተመለከቱት ይገኙበታል፡፡

Continue reading

Follow

Get every new post delivered to your Inbox.

Join 13,057 other followers