ለብፁዕ አቡነ ቀሌምንጦስ አቀባበል ተደረገ፤ የሀገረ ስብከቱ እና የአጥቢያ ሓላፊዎች ቤተ ክርስቲያንን በማስቀደምና ፍቅረ ንዋይን በማሸነፍ ከሊቀ ጳጳሱ ጋራ በመመካከር እንዲሠሩ ማሳሰቢያ ተሰጠ

  • ‹‹የቤተ ክርስቲያን ሓላፊነት የአገር ነው፤ ቤተ ክርስቲያንን ልናስቀድም ይገባል›› ፓትርያርኩ  
  • ‹‹ገንዘብን አሸንፉት፤ መቃብርን አትርሱት›› /ብፁዕ አቡነ ቀውስጦስ/
  • ‹‹ሕዋሳት ድርሻ አላቸው፤ ሕዋሳቱ ካልታዘዙ ግን ችግር ይፈጠራል›› /አቡነ ቀሌምንጦስ/
  • ‹‹ሀገረ ስብከቱን የሚያመሰቃቅለው አሉባልታና ሐሰት መወገዝ አለበት›› /ዋ/ሥራ አስኪያጁ/
  • ‹‹ያልምዶት እንጂ እንኳን ደስ ያለዎት አንልዎትም›› /አስተያየት ሰጭ የደብር አለቃ/
  • ‹‹ንግግር ከማብዛት ይልቅ ወደፊት በየሥራችን ብንመዘን›› /ሌላው የደብር አለቃ/
His Grace Abune Kelemntos

ብፁዕ አቡነ ቀሌምንጦስ፤ በአዲስ አበባ ሀገረ ስብከት የፓትርያርኩ ረዳት ሊቀ ጳጳስ እና የከምባታ ሐዲያ ጉራጌና ስልጤ አህጉረ ስብከት ሊቀ ጳጳስ የሰንበት ት/ቤቶች ማደራጃ መምሪያ የበላይ ሓላፊ

ቅዱስ ሲኖዶስ በወርኃ ጥቅምት የመጀመሪያ ዓመታዊ መደበኛ የምልአተ ጉባኤ ስብሰባው፣ የከንባታ ሐዲያ ጉራጌና ስልጤ አህጉረ ስብከት ሊቀ ጳጳስ እና የሰንበት ት/ቤቶች ማደራጃ መምሪያ የበላይ ሓላፊ ብፁዕ አቡነ ቀሌምንጦስ፣ በአዲስ አበባ ሀገረ ስብከት የፓትርያርኩ ረዳት ሊቀ ጳጳስ ኾነው እንዲሠሩ መድቧቸዋል፡፡ በምደባ ውሳኔው መሠረት ኅዳር ፱ ቀን ፳፻፯ ዓ.ም. በሀገረ ስብከቱ የስብሰባ አዳራሽ በተከናወነ መርሐ ግብር ለብፁዕ አቡነ ቀሌምንጦስ አቀባበል ተደርጎላቸዋል፡፡

His Holiness Abune Mathias

‹‹የመጣነው ሥራቸውን በቡራኬ ለማስጀመር ነው፤ብፁዕነታቸው ደግ አባትና ጠንቃቃ መነኵሴ በመኾናቸው ይህን ከተማ ያስተካክሉታል ብለን እናምናለን፤ ኹላችኁም ትተባበሯቸዋላችኹ፤ ኹሉም መሪውን ይከተላልና፡፡››/ብፁዕ ወቅዱስ ፓትርያርክ አቡነ ማትያስ/

ከብፁዕ ወቅዱስ ፓትርያርኩ ጋራ ስምንት ብፁዓን ሊቃነ ጳጳሳት፣ የሀገረ ስብከቱ እና የሰባቱም ክፍላተ ከተማ ቤተ ክህነት የሥራ ሓላፊዎችና ሠራተኞች፣ ከ160 በላይ ገዳማትና አድባራት አስተዳዳሪዎች፣ ምክትል ሊቃነ መናብርትና ጸሐፊዎች የተገኙበት ይኸው የአቀባበል መርሐ ግብር፣ ‹‹ለብፁዕነታቸው በተደራቢነት የተሰጠውን ሥራ በቡራኬ ለማስጀመር›› የተዘጋጀ መኾኑን ብፁዕ ወቅዱስ አቡነ ማትያስ ተናግረዋል፡፡ ብፁዕነታቸው ደግ አባትና ጠንቃቃ መነኵሴ መኾናቸው እንደሚታወቅ የጠቀሱት ቅዱስነታቸው፣ ‹‹ትልቅና ጥንቃቄ የሚፈልግ ከተማ›› ያሉትን የአዲስ አበባ ሀገረ ስብከት እንደሚያስተካክሉት እምነታቸውን ገልጸዋል፡፡

ችግሮች ሲፈጠሩ ከሐሜትና መነቃቀፍ ይልቅ ግራና ቀኝ አስፍቶ በማየት እየተወያዩ መሥራት ቅድስትና ልዕልት ለኾነችው ቤተ ክርስቲያናችን እንደሚበጅ ቅዱስነታቸው አመልክተው÷ ‹‹የቤተ ክርስቲያን ሓላፊነት የአገር ሓላፊነት በመኾኑ ከኹሉም በፊት ቤተ ክርስቲያንን ልናስቀድም ይገባል፤ የተሠየምነው ቅድስናዋንና ሕጓን ጠብቀን ለመኖር ነው፤›› በማለት አስገንዘበዋል፡፡ የአዲስ አበባ ገዳማትና አድባራት የተቸገሩ የገጠር አብያተ ክርስቲያንን ለመርዳት ቅርበት እንዳላቸውና ሊኖራቸውም እንደሚገባ በመግለጽ ስለ አስተዋፅኦዋቸው አመስግነዋቸዋል፤ ‹‹አዲስ አበባ ሰላም ከኾነች ኹሉም ሰላም ይኾናል›› ያሉት አቡነ ማትያስ የአህጉረ ስብከት ኹሉ ማእከል በኾነው አዲስ አበባ ለሰላም፣ ለልማትና መልካም አስተዳደርን ለማስፈን ሊቀ ጳጳሱን በመደገፍና ከሊቀ ጳጳሱ ጋራ በመመካከር መሥራት እንደሚያስፈልግ አሳስበዋል – ‹‹ኹላችኁም ትተባበሯቸዋላችኹ፤ ኹሉም መሪውን ይከተላልና፡፡›› Continue reading

በደ/ኦሞ: በሀ/ስብከቱ እና በማኅበረ ቅዱሳን መተባበር ከ16 ሺሕ በላይ ምእመናን ወደ ኦርቶዶክሳዊት ተዋሕዶ ሃይማኖት ተጨመሩ፤ ‹‹ለቤተ ክርስቲያን ታላቅ ደስታ ነው›› /ብፁዕ ወቅዱስ አቡነ ማትያስ/

baptism and church inaguration Jinka 2007the newly consecrated Jinka Dabre Keraniyo Medhanielm church

  • ከ1300 በላይ አዲስ አማንያን በቅዱስ ፓትርያርኩ እና በብፁዓን ሊቃነ ጳጳሳት ተጠመቁ
  • በዓመቱ 17‚000 አዲስ አማኞችን ለማፍራት በመርሐ ግብር የተያዘው ዕቅድ አካል ነው
  • ከተጠማቂዎቹ፣ ከባዕድ አምልኮ የተመለሱ አርብቶ አደሮች እንደሚገኙበት ተመልክቷል

*              *              *

ተጠማቂዎች ከየስብከት ኬላዎች ወደ ጂንካ ለጥምቀተ ክርስትና ሲገጓዙ

ተጠማቂዎች በታላቅ መንፈስ ከየስብከት ኬላዎች ወደ ጂንካ ለጥምቀተ ክርስትና ሲያመሩ

ተጠማቂዎች ወደ ጥምቀተ ክርስትና በጉዞ ላይበዲዛይን ሥራው የማኅበረ ቅዱሳን ሞያዊ አስተዋፅኦ ከተገለጸበት አዲሱ የጂንካ ደብረ ቀራንዮ መድኃኔዓለም ቤተ ክርስቲያን ቅዳሴ ቤት (ምረቃ) ጋራ ጥምቀተ ክርስትና የተፈጸመላቸውና ከሰባት የስብከት ኬላዎች የተውጣጡት 1350 ምእመናን ጂንካ የደረሱት ከየስብከት ኬላዎቻቸው (ሼፒ ጋኢላ፣ አልጋ ኪለት፣ ዛቢ፣ ጉርጨት፣ ሰንሰለት፣ አይዳ እና ጋራ) ለሰዓታት በእግራቸው ተጉዘው ነው፡፡

የሀገረ ስብከቱን ነባር አብያተ ክርስቲያን በመደገፍና አዲስ ሕንፃ ቤተ ክርስቲያን በማነፅ ላይ አተኩሮ የሚንቀሳቀሰው የደቡብ ኦሞ የስብከተ ወንጌል፣ የልማት እና ሕንፃ አሠሪ ኮሚቴ ለጥምቀተ ክርስትናው መከናወን የገንዘብና ከፍተኛ የቁሳቁስ እገዛ አድርጓል፡፡

ኮሚቴው በጂንካ ጻድቁ አቡነ ተክለ ሃይማኖት ገዳም በ45 ሚልዮን ብር ወጪ ለሚያሠራው የአብነት ት/ቤት ግንባታ እና ለሚያከናውናቸው የልማት ተግባራት ፓትርያርኩ የመሠረት ድንጋይ አስቀመጠዋል፡፡

*                *               *

the newly convert cathecumen being baptized

ብፁዕ ወቅዱስ ፓትርያርኩ በጥምቀተ ክርስትና

ጠረፋማ የአገራችን አካባቢዎች አተኩሮ በሚካሔደውና ከ፳፻፫ – ፳፻፲፩ ዓ.ም. የተዘረጋው የማኅበረ ቅዱሳን የስብከተ ወንጌል ማስፋፊያ ፕሮግራም ከተጀመረ ወዲህ ወደ ኦርቶዶክሳዊት ተዋሕዶ ቤተ ክርስቲያን የተጨመሩት አዲስ አማኞች ጠቅላላ ቁጥር ከ26 ሺሕ በላይ መድረሱ ተገልጧል፡፡

በ፳፻፭ ዓ.ም. የአገልግሎት ዓመት መርሐ ግብሩ በሸፈናቸው የጉምዝ፣ ካፋ(ጫራ) እና ደቡብ ኦሞ አካባቢዎች በተከናውነው ጥምቀት ክርስትና 8,744 አዲስ አማኞች የቅድስት ሥላሴ ልጅነት እንዲያገኙ የተደረገ ሲኾን በተያዘው የ፳፻፯ ዓ.ም. የአገልግሎት ዓመት በአምስት ቦታዎች 17‚000 አዲስ አማንያንን ለማፍራትና የተጨመሩትን ምእመናን ለማጽናት ከብር አምስት ሚልዮን በላይ በጀት በመርሐ ግብሩ ተይዟል፡

being baptized

ብፁዕ አቡነ ጎርጎርዮስ በጥምቀተ ክርስትና

ሀብተ ውልድና ጥምቀተ ክርስትና አግኝተው ወደ እናት ቤተ ክርስቲያን የተመለሱትን ምእመናን የሚያጸኑ የትግበራ ዕቅዶች ከአህጉረ ስብከት፣ ከአጥቢያ አብያተ ክርስቲያንና ከሰንበት ት/ቤቶች ጋራ በመቀናጀት ይፈጸማሉ፡፡

ተጠማቅያኑ የሚገለገሉበት ቤተ ክርስቲያን መትከል፣ በቋንቋቸው የሚያስተምሯቸውን ሰባክያንና ካህናት ማሠልጠን፣ በቋንቋቸው የሚማሩባቸውን ጉባኤያት እና ሐዋርያዊ ጉዞዎች ማካሔድ፣ የተለያዩ የኅትመት ውጤቶችን (የትምህርት መጻሕፍትንና በራሪ ጽሑፎችን፣ የስብከት እና የመዝሙር ካሴቶችንና ሲዲዎችን) ማዘጋጀትና ማሰራጨት ተጠቃሽ የመተግበርያ ስልቶች ናቸው፡፡

one of sibket kelas(Merafe Sibket)

ቤተ ክርስቲያን ባልተተከለባቸው የገጠር ቀበሌዎች የሚቋቋሙት የስብከት ኬላዎች÷ በቅድመ ጥምቀት የተጠማቂ ምእመናን ቅስቀሳና ሥልጠና፤ በጊዜ ጥምቀት የተጠማቂ ምእመናን ዝግጅት እና በድኅረ ጥምቀት ተጠማቂ ምእመናንን በተከታታይ ትምህርትና የአብነት ትምህርት የማጽናት አገልግሎት ከፍተኛ አስተዋፅኦ ያበረክታሉ፡፡ የስብከት ኬላዎች/ምዕራፈ ስብከት/ የተሟላ አገልግሎት መስጠት እንዲችሉ የሚያስፈልጓቸው የትግበራ ቁሳቁሶች በማስፋፊያ መርሐ ግብሩ ወጪ የሚሸፈን ሲኾን አዲስ ምእመናን እንዲጨመሩና የተጨመሩትም እንዲጸኑ በየቋንቋው የሚያስተምሩ ሰባክያነ ወንጌልም የገንዘብ ድጎማ ይደረግላቸዋል፡፡


አዲስ አማኞችን በማጥመቅ፣ ያሉትን በማጽናትና የካዱትን በመመለስ ላይ ባተኮረው የማስፋፊያ መርሐ ግብሩ÷ የምእመናንን ቁጥር ጨምሯል፤ በቋንቋ የሚያገለግሉና ለስብከተ ወንጌል የሚፋጠኑ ካህናትን ለማፍራትና የሰባክያንን ቁጥር ለማሳደግ ተችሏል፤ የሰንበት ት/ቤቶች አገልግሎት ተጠናክሯል፡፡ በቋንቋ የሚያስተምሩ ደቀ መዛሙርት እጥረት፣ የገንዘብ አቅም ማነስና በቂ መጓጓዣ አለመኖር የፕሮግራሙ ዋነኛ ችግሮች ናቸው፡፡

*               *                *

Lique Tiguhan Wondewosen Gabre Sellassieይህ ያለእግዚአብሔር ርዳታ ከፍጻሜ አይደርስም፡፡ በክንዳችን ውስጥ የእግዚአብሔር ክንድ ስላለ በኻያ ዓመት የማያልቀውን ይህን ሕንፃ በአምስት ዓመት ለማጠናቀቅ የረዳን እግዚአብሔር ነው፡፡

ሌላም ብሥራት አለ! የሚገርመው ነገር፣ ሕንፃ ቤተ ክርስቲያኑ በሚመረቅበት በዚኽ ዕለት 1350 ሕንፃ ሥላሴ በዛሬው ዕለት ተጠምቀው የእናት ቤተ ክርስቲያን ልጆች ኾነዋል፡፡ ይህ ቀላል አይደለም፡፡ ሕንፃ ሥላሴን ሊባርኩ፣ ሕንፃ ቤተ ክርስቲያኑን ሊመርቁ የመጡት ቅዱስ አባታችን ከዚኽ የበለጠ ደስታ የላቸውምና እግዚአብሔር የተመሰገነ ይኹን፡፡

እንደምታውቁት ስብከተ ወንጌሉን በዞኑ[በሀገረ ስብከቱ] ኹሉ ለማዳረስ ሀገረ ስብከታችን አቅም የለውም፤ ነገር ግን የማኅበረ ቅዱሳን ጂንካ ማእከል ከብፁዕነታቸው[አቡነ ኤልያስ] መመሪያ በመቀበልና ከሀገረ ስብከቱ ጋራ በመተባበር ከ፳፻፬ – ፳፻፯ ዓ.ም. 16‚630 ሰዎች በኦርቶዶክሳዊት ተዋሕዶ ሃይማኖት ተጠምቀዋል፡፡ ደስ ይበላችኹ! በደቡብ ኦሞ ሀገረ ስብከት ከ፳፻፬ – ፳፻፯ ዓ.ም. የዛሬውን ጨምሮ 16‚630 ሰዎች ወደ ኦርቶዶክሳዊት ተዋሕዶ ቤተ ክርስቲያን ተጨምረዋል፡፡ እግዚአብሔር የተመሰገነ ይኹን፡፡

/የደቡብ ኦሞ ሀገረ ስብከት ሥራ አስኪያጅ
ሊቀ ትጉሃን ቀሲስ ወንድወሰን ገብረ ሥላሴ/


the convert fathfuls being baptizedበዛሬው ዕለት ሀብተ ውልድና ጥምቀተ ክርስትና የተቀበላችኹ ወገኖች ኹሉ፣ እንኳን ደስ አላችኹ፡፡ ሰላም፣ ፍቅር፣ አንድነት፣ ትብብር ስላለ ነው ለዚኽ ውጤት የበቃችኹት፡፡ ዛሬ የቤተ ክርስቲያን ደስታዋ የተፈጸመበት ቀን ነው፡፡ ይኸውም አንደኛ፡- ገንዘባችኹን፣ ዕውቀታችኹን፣ ጊዜአችኹንና ጉልበታችኹን መሥዋዕት አድርጋችኹ ግሩም ድንቅ የኾነ ቤተ ክርስቲያን በመሥራታችኹ ደስ ብሎናል፤ ደስ ሊላችኹ ይገባል፡፡ ከዚኽ በላይ ደግሞ 1350 አዲስ ክርስቲያኖች ተጨምረዋል፡፡ ይህ ለቤተ ክርስቲያናችን ታላቅ ደስታ ነው፡፡ ነገ ከነገ ወዲያ ደግሞ እንዲኹ እያለ ያድጋል ማለት ነው፡፡ በእውነቱ ብፁዕ አቡነ ኤልያስ እናንተን ይዘው ብዙ ሥራ ሠርተዋል፡፡ ትጉህ አባት፣ ትጉህ ሐዋርያ ናቸው፤ በእናንተ ፊት ላመሰግናቸው እወዳለኹ፡፡

ጂንካ ደብረ ቀራንዮ መድኃኔዓለም ቤተ ክርስቲያን Jinka dabre Keraniyo Medhanialem

ቅዳሴ ቤቱ የተከናወነው የደ/ኦሞ ደብረ ቀራንዮ መድኃኔዓለም ቤተ ክርስቲያን

ምእመናን ከእግዚአብሔር ጋራ የሚገናኙበት ቤተ ክርስቲያን አምሮ ሠምሮ በመሠራቱ አዲስ ምእመናን መጨመራቸው ይቀጥላል ብለን ተስፋ እናደርጋለን፡፡ ሰባክያን፣ መምህራንና ሊቃውንተ ቤተ ክርስቲያን ሕዝቡን ጠንክራችኹ ማስተማርና ወደ ክርስቶስ ጉባኤ እንዲጨመሩ ማድረግ አለባችኹ፡፡ ትልቁ ሥራችኹ ስብከተ ወንጌል ነው፡፡ የቤተ ክርስቲያን ተቀዳሚ ሥራዋ ስብከተ ወንጌል ስለኾነ በስብከተ ወንጌል ኹላችን መጠንከር አለብን፡፡ ሕዝብን ኹሉ ወደ እግዚአብሔር ቤት የመሳብ፣ የእግዚአብሔር የመንግሥቱ ዜጎች እንዲኾኑ የማድረግ ሓላፊነት አለብን፡፡ ሃይማኖታችኹ ጸንቶ ምግባራችኹ ቀንቶ ስናይ ለእኛ ሕይወት መድኃኒት ነው፤ በየጊዜው እንዲጨመሩ ማድረግም ሓላፊነታችን ነው፡፡

የሠራችኹት ሕንፃ ቤተ ክርስቲያን ለእናንተ ብቻ ሳይኾን ለልጅ ልጆቻችኹ የሚተላለፍ ሥራ ስለኾነ እንኳን ደስ አላችኹ፡፡ ከዚኽ በኋላ ሐሳባችኹ ትምህርት ቤት ወደ መሥራት መኾን አለበት፡፡ ልጆቻችኹ ቋንቋቸውን አጥንተው የጸናችውንና የቀናችውን የኢትዮጵያ ኦርቶዶክስ ተዋሕዶ ቤተ ክርስቲያን አምልኮቷን፣ ሥርዐቷን፣ ቀኖናዋን፣ ምስጢሯን እንዲጠይቁና እንዲያውቁ ማድረግ ይኖርባችኋል፡፡

/ብፁዕ ወቅዱስ ፓትርያርክ አቡነ ማትያስ፤ ጥቅምት ፴ ቀን ፳፻፯ ዓ.ም. ከስድስት ብፁዓን ሊቃነ ጳጳሳት ጋራ በደቡብ ኦሞ ሀገረ ስብከት ተገኝተው የጂንካ ደብረ ቀራንዮ መድኃኔዓለም ቤተ ክርስቲያን ቅዳሴ ቤትና የ1350 ምእመናን ጥምቀተ ክርስትና በተፈጸመበት ወቅት ከተናገሩት/

የማያለቅስ ልጅ…

  • አባቶቻችን በቤተ ክርስቲያን ላይ ግለሰባዊ ዓምባገነንነትን አልፈቀዱም የቤተ ክርስቲያን አሠራርና አመራር ማኅበራዊና ጉባኤያዊ ነው፡፡
  • ግለሰባዊ አመራር÷ ክሕደትንና ኑፋቄን ለማስገባት፣ ለሌሎች አካላት ቁጥጥር እና ዘመን የፈቀደለት ኹሉ ልቡ የወደደውን በቤተ ክርስቲያን ላይ እንዲጭን ያመቻል፡፡
  • ቤተ ክርስቲያን እንደ መኪና መሪውን የያዘ መኪናውን ወደ ፈለገው ሊወስደው የሚችልባት ቦታ ብትኾን ኖሮ ዘመነ ሱስንዮስን መሻገር ባልቻለች ነበር፡፡

*             *             *

  • የቅዱስ ሲኖዶስ አባላት÷ በቤተ ክርስቲያን ላይ፣ በቅዱስ ሲኖዶስ ላይና በሊቃነ ጳጳሳት መብት ላይ፣ ቤተ ክርስቲያንን ሊያገለግሉ በተነሡ ማኅበራትና ወጣቶች ላይ፣ በየገጠሩ በተሠማሩና የመከራ ገፈት በሚቀምሱ ካህናትና ምእመናን ላይ የሚደርሰውን በደልና ጫና እየሰሙና እያዩ ዝም ቢሉ በእናታቸው ጀርባ ላይ ኾነው መሞታቸው የማይቀር ነው፡፡ የቤተ ክርስቲያኒቱን መብት ለማስከበር ደግሞ አስቀድሞ የቅዱስ ሲኖዶሱ ሥልጣንና መብት መከበር አለበት፡፡
  • የኢትዮጵያ ቤተ ክርስቲያን ቅዱስ ሲኖዶስ÷ ቤተ ክርስቲያኒቱን ወደ ግለሰባዊ ዐምባገነንነት የሚወስደውን መንገድ በማረም የቤተ ክርስቲያኒቱ ራስ ክርስቶስ፣ የቤተ ክርስቲያኒቱም የበላይ ወሳኝ አካል ቅዱስ ሲኖዶስ መኾኑን በሕገ ቤተ ክርስቲያን አጽንቶታል፡፡
  • የቅዱስ ሲኖዶስ አባላት በምልአተ ጉባኤያቸው አንድ ኹነው የቅዱስ ሲኖዶሱን ሉዓላዊ ሥልጣን እንዳስጠበቁትና ቤተ ክርስቲያንንም ከግለሰብ አገዛዝ እንደታደጓት ኹሉ ለዘለቄታውም፣ በመንበረ ፓትርያርክ አጠቃላይ ሰበካ መንፈሳዊ ጉባኤ የቀረቡትንና በቅዱስ ሲኖዶስ ምልአተ ጉባኤ መክረው የወሰኑበትን በቤተ ክርስቲያን ላይ እየደረሱ ያሉ ችግሮችን አንድ ኹነው ለመፍታት መነሣት አለባቸው፡፡

*             *             *

(የዳንኤል ክብረት እይታዎች፤ ኅዳር ፪ ቀን ፳፻፯ ዓ.ም.)

eotc holy synod fathers

የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ

ቅዱስ ሲኖዶስ የቤተ ክርስቲያንን ሕግ በተመለከተ አሰረ ሐዋርያትን የተከተለ ኾኖ እንዲጸድቅ አድርጓል፡፡ አባቶቻችን በቤተ ክርስቲያን ላይ ግለሰባዊ ዓምባገነንነትን አልፈቀዱም፡፡ ጸሎተ ሃይማኖቱም ‹‹ነአምን በአሐቲ ቅድስት ቤተ ክርስቲያን እንተ ላዕለ ኵሉ ጉባኤ ዘሐዋርያት›› በማለት ቤተ ክርስቲያን ጉባኤ ዘሐዋርያት መኾንዋን ያመለክታል፡፡ በ፶/፶፩ ዓ.ም. በኢየሩሳሌም የተሰበሰበችው ሲኖዶስም ‹‹እኛና መንፈስ ቅዱስ›› አለች እንጂ ‹እኔ› የሚል ግለሰባዊ ድምፅ አልተሰማባትም፡፡

ኢትዮጵያውያን አበው የቅዱስ ሲኖዶስን ሥርዐት ብቻ ሳይኾን ሌሎችን የቤተ ክርስቲያን የአመራር ሥርዐቶች ከግለሰብ ዐምባገነንነት ለማውጣት መልካም የኾነ ሥርዐት ሠርተዋል፡፡ ቅዳሴው በአምስት ልኡካን እንዲኾን፣ አጥቢያው በሰበካ መንፈሳዊ ጉባኤ እንዲመራ፣ ገዳማት በምርፋቅ(ጉባኤ አበው) ወይም በማኅበር እንዲመሩ፣ ሢመተ ኤጲስ ቆጶስን አንድ ጳጳስ (ፓትርያርክ እንኳ ቢኾን) ብቻውን እንዳይሰጥ፣ ቢያንስ ሦስት አበው ሊኖሩ እንደሚገባ፤ አንድ አባት ብቻውን ሥርዐተ ቤተ ክርስቲያንን እንዳይለውጥ፤ አድርገው የሠሩበት አንዱ ምክንያት ግለሰባዊ ዐምባገነንነትን ለመቋቋም እንዲቻል ነው፡፡

ይህን ማኅበራዊና ጉባኤያዊ የኾነ የቤተ ክርስቲያን አሠራርና አመራር ለማስወገድ በየዘመናቱ ጥረት ተደርጓል፡፡ የዚኽም ምክንያቱ ግልጽ ነው፡፡ ግለሰባዊ አመራር ለሦስት ነገሮች የተጋለጠ ነው፡፡ የመጀመሪያው፡- ክሕደትንና ኑፋቄን ለማስገባት ይመቻል፡፡ አንዱ ወሳኝ ሌላው ‹ኦሆ በሃሊ› ስለሚኾን እርሱ ትክክል ነው ያለው ትክክል፤ ስሕተት ነው ያለው ደግሞ ስሕተት ይኾናል፡፡ ቤተ ክርስቲያን ጉባኤያዊት በመኾንዋ አንዳንድ ግለሰቦች በየዘመናቱ ያመጡትን ክሕደት በጉባኤ ተመልክታ በጉባኤ ለማውገዝ ጠቅሟታል፡፡ ደገኛ ትምህርትና ድርሰት ሲገኝ ደግሞ እንዲሁ በጉባኤ ተመልክታ ለመቀበል ረድቷታል፡፡ አባ ጊዮርጊስ ዘጋሥጫ መጽሐፈ ምስጢርን ጽፎ በጨረሰ ጊዜ ጉባኤ ሊቃውንቱ ተመልክተው ‹‹አማንኬ ዮሐንስ አፈ ወርቅ ወቄርሎስ አፈ በረከት ተንሥኡ በመዋዕሊነ፤ ኢትዮጵያ ተመሰለት በቁስጥንጥንያ፤ ወተአረየታ ላዕለ እስክንድርያ – በእውነት ዮሐንስ አፈ ወርቅና አፈ በረከት የኾነው ቄርሎስ በዘመናችን ተነሥተዋል፡፡ ኢትዮጵያም ቁስጥንጥንያን መስላለች፤ ከእስክንድርያም ልቃ ከፍ ከፍ ብላለች፤›› ብለው ምስክርነታቸውን ሰጥተው ነበር፡፡

ለተኛው፡- ለሌሎች አካላት ቁጥጥር ስለሚመች ነው፡፡ ጌታችን አስቀድሞ ኃይለኛውን ማሰር እንዳለው መሪውን የያዘ ቤተ ክርስቲያኒቱን እንደ ልቡ ለመዘወር እንደሚመቸው ተደርጎ ይታሰባል፡፡ ይኼ ነገር በዘመነ ሱስንዮስ ጊዜ ታይቷል፡፡ ሮማውያን ግብጻዊውን ጳጳስ በሮማዊ ጳጳስ በመተካት ቤተ ክርስቲያኒቱን በሮማዊ ጳጳስ ለማስመራትና ለመቆጣጠር ፈልገው ነበር፤ ነገር ግን የኢትዮጵያ ቤተ ክርስቲያን ጠባይ ማኅበራዊና ጉባኤያዊ በመኾኑ ጉባኤ ሊቃውንቱ ከግብጹ ጳጳስ ጋራ ኾኖ ተቃወማቸው፤ ጳጳሱና ሊቃውንቱም እስከ ደም ማፍሰስ ድረስ መሥዋዕት ኾኑ፡፡

ጥቅምት ፲፱ ቀን ፲፮፻፳፩ ዓ.ም. በምዕራብ ጎጃም በምትገኘው ደብረ መዊዕ የተሰበሰቡት የቤተ ክርስቲያን ማኅበርተኞች ለዚህ ማስረጃ ናቸው፡፡ በዚኽ የደብረ መዊዕ ጉባኤ እስከ 7000 የሚደርሱ ምእመናን፣ ካህናት፣ መነኮሳትና ሊቃውንት ተሰባስበው ነበር፡፡ የጉባኤው መሪዎችም እነ አባ ተስፋ ኢየሱስ፣ አባ ዘጊዮርጊስ ዘዋሸራ፣ አባ እንጦንዮስ፣ አባ ግርማ ሥሉስ ዘውይት ነበሩ፡፡ የጉባኤው አፈ ጉባኤ ደግሞ አባ ግርማ ሥሉስ ነበሩ፡፡ በዚህ ጉባኤ የተገኙት ኹሉ ንጉሡንና አዲሶቹን ሮማውያን የሃይማኖት መሪዎች ተቃውመው እንደ አንድ ልብ መክረው እንደ አንድ ቃል ተናግረው በተዋሕዶ ጸኑ፤ የንጉሥ ሱስንዮስም ጦር ጥቅምት ፲፱ ቀን ከብቦ ፈጃቸው፡፡

እነዚህ ጽኑአን ጉባኤተኞች ነበሩ በኋላ ዐፄ ሱስንዮስ ሐሳባቸውን እንዲቀይሩና ‹‹ፋሲል ይንገሥ፣ ሃይማኖት ይመለስ›› እንዲሉ ያደረጋቸው፡፡ ቤተ ክርስቲያን እንደ መኪና መሪውን የያዘ መኪናውን ወደ ፈለገው ሊወስደው የሚችልባት ቦታ ብትኾን ኖሮ ዘመነ ሱስንዮስን መሻገር ባልቻለች ነበር፡፡

ሦስተኛው ምክንያት፡- ዘመን የፈቀደለት ኹሉ ልቡ የወደደውን በቤተ ክርስቲያን ላይ እንዳይጭን ነው፡፡ በተለያዩ ዘመናት የተነሡ መንግሥታት ለራሳቸው የሚመቻቸው መሪ በቤተ ክርስቲያን ላይ ለማስቀመጥ ሞክረው ነበር፡፡ የቤተ ከርስቲያን አሠራር፣ ሕግና ሥርዐት ግን በአንድ ሰው የሚዘወር ባለመኾኑ ገመዱን ከመበጣጠስ ያለፈ ጀነሬተሩን ማቋረጥ አልተቻላቸውም፡፡ የቤተ ክርስቲያን ውሳኔዎችም በጉባኤ እንጂ በአንድ ሰው ኅሊና ብቻ የሚወሰኑ ባለመኾናቸው አስተዳደራዊ ጥቅም ከማግኘትና በደል ከማድረስ ባለፈ አጥንቷን ለመስበር ዐቅም አላገኙም፡፡

His Holiness Abune Mathias with thier Graces the Archbishops

ይህን ታሪካዊና ቤተ ክርስቲያናዊ ሐሳብ ጠንቅቆ በመረዳት፣ የኢትዮጵያ ቤተ ክርስቲያን ቅዱስ ሲኖዶስ÷ ቤተ ክርስቲያኒቱን ወደ ግለሰባዊ ዐምባገነንነት የሚወስደውን መንገድ በማረም የቤተ ክርስቲያኒቱ ራስ ክርስቶስ፣ የቤተ ክርስቲያኒቱም የበላይ ወሳኝ አካል ቅዱስ ሲኖዶስ መኾኑን በሕገ ቤተ ክርስቲያን አጽንቶታል፡፡


የአገራችን ሰው ሲተርት ‹‹የማያለቅስ ልጅ በእናቱ ጀርባ ይሞታል›› ይላል፤ ይራበው አይራበው፣ ይታፈን አይታፈን፣ ይመመው አይመመው፣ ይመቸው አይመቸው አይታወቅምና፡፡ ምናልባትም ዝምታው እንደ ጨዋነት ታስቦለት ዘወር ብሎ የሚያየው ላይኖርም ይችላል፡፡ የቅዱስ ሲኖዶስ አባላት በቤተ ክርስቲያን ላይ፣ በቅዱስ ሲኖዶስ ላይና በሊቃነ ጳጳሳት መብት ላይ፣ ቤተ ክርስቲያንን ሊያገለግሉ በተነሡ ማኅበራትና ወጣቶች ላይ፣ በየገጠሩ በተሠማሩና የመከራ ገፈት በሚቀምሱ ካህናትና ምእመናን ላይ የሚደርሰውን በደልና ጫና እየሰሙና እያዩ ዝም ቢሉ በእናታቸው ጀርባ ላይ ኾነው መሞታቸው የማይቀር ነው፡፡ የቤተ ክርስቲያኒቱን መብት ለማስከበር ደግሞ አስቀድሞ የቅዱስ ሲኖዶሱ ሥልጣንና መብት መከበር አለበት፡፡ ያልቆመ አንገት ራስን አይሸከምም እንዲሉ፡፡

የቅዱስ ሲኖዶስ አባላት በምልአተ ጉባኤያቸው አንድ ኹነው የቅዱስ ሲኖዶሱን ሉዓላዊ ሥልጣን እንዳስጠበቁትና ቤተ ክርስቲያንንም ከግለሰብ አገዛዝ እንደታደጓት ኹሉ ለዘለቄታውም፣ በመንበረ ፓትርያርክ አጠቃላይ ሰበካ መንፈሳዊ ጉባኤ የቀረቡትንና በቅዱስ ሲኖዶስ ምልአተ ጉባኤ መክረው የወሰኑበትን በቤተ ክርስቲያን ላይ እየደረሱ ያሉ ችግሮችን አንድ ኹነው ለመፍታት መነሣት አለባቸው፡፡

የጥቅምት ፳፻፯ ዓ.ም. የቅዱስ ሲኖዶስ ምልአተ ጉባኤ የመጀመሪያ ዓመታዊ መደበኛ ስብሰባ ጋዜጣዊ መግለጫ

Holy Synod00holy synod press release 2007 tikmit

ቅዱስ ሲኖዶስ 141 ሚልዮን ብር ዓመታዊ በጀት አጸደቀ፤ የምልአተ ጉባኤው ስብሰባ ነገ ይጠናቀቃል፤ ጋዜጣዊ መግለጫም ይሰጣል

  • የቤተ ክርስቲያናችን የበጀት ዓመት÷ የአህጉረ ስብከት የፐርሰንት ፈሰስ ተጠቃሎ ገብቶ፣ በመንበረ ፓትርያርክ ጠቅላይ ቤተ ክህነት ተቀምሮና ተደልድሎ፣ በቅዱስ ሲኖዶስ ምልአተ ጉባኤ ከሚጸድቅበት ወቅት አንጻር ቢጤንስ?
Holy Synod Fathers

ብፁዕ ወቅዱስ ፓትርያርኩ፣ ብፁዓን ሊቃነ ኤጲስ ቆጶሳት፣ ጳጳሳትና ኤጲስ ቆጶሳት ኹሉ የቅዱስ ሲኖዶስ አባላት ናቸው፡፡ ከፓትርያርኩ ጀምሮ እያንዳንዱ ሊቀ ኤጲስ ቆጶስ፣ ጳጳስና ኤጲስ ቆጶስ ተጠሪነታቸው ለቅዱስ ሲኖዶሱ ነው፡፡

ውጥረት በተመላበት ኹኔታ ተጀምሮ ተጋግሎ የሰነበተውና በመጨረሻም ወደ መግባባትና አንድነት የመጣው የቅዱስ ሲኖዶስ ምልአተ ጉባኤ÷ ለኹለት ሱባዔ ያኽል ሲያካሒድ የቆየውን የመጀመሪያ ዓመታዊ መደበኛ ስብሰባውን ነገ፣ ጥቅምት ፳፯ ቀን ፳፻፯ ዓ.ም. ከቀትር በፊት ያጠናቅቃል፡፡

his holiness abune Mathias

ብፁዕ ወቅዱስ ፓትርያርኩ በቅዱስ ሲኖዶስ የወጡ ሕጎችን፣ የተላለፉ መመሪያዎችንና የተሰጡ ውሳኔዎችን ለሚመለከታቸው ኹሉ በፊርማቸው ያስተላልፋሉ

በስብሰባው ማጠናቀቂያ÷ ቅዱስ ሲኖዶስ መሰንበቻውን ስለተነጋገረባቸው ጉዳዮች፣ ስላሳለፋቸው ውሳኔዎችና ስለወሰዳቸው አቋሞች የምልአተ ጉባኤው ርእሰ መንበር ብፁዕ ወቅዱስ ፓትርያርኩ በንባብ የሚያሰሙት ጋዜጣዊ መግለጫ የሚሰጥ ሲኾን የቅዱስ ሲኖዶሱ ቃል አቀባይ በኾኑት በቅዱስ ሲኖዶሱ ዋና ጸሐፊ የሚመራ ጋዜጣዊ ጉባኤም ይኖራል ተብሎ ይጠበቃል፡፡

001kklkkk 003

የቅዱስ ሲኖዶሱ ዋና ጸሐፊና ቃል አቀባይ፣ የቅዱስ ሲኖዶስ ውሳኔዎች በተግባር ላይ መዋላቸውን ይከታተላሉ፤ ውሳኔዎቹ በሥራ ላይ ካልዋሉ ኹኔታዎቹን በመከታተል ከነምክንያቶቹ ለቅ/ሲኖዶሱ ሪፖርት ያቀርባሉ፡፡

 

ምልአተ ጉባኤው በትላንት ከቀትር በኋላና በዛሬው ውሎው፣ በሥራ ላይ በቆየባቸው ቀናት የመከረባቸውንና ውሳኔ ያሳለፈባቸውን ቃለ ጉባኤዎች በመናበብ የአባላቱ ፊርማ እንዲያርፍባቸው አድርጓል፡፡ በቅዱስ ሲኖዶሱ የተወሰኑ ውሳኔዎች፣ የወጡ ሕገጋት፣ ደንቦችና መመሪያዎች በቅዱስ ሲኖዶሱ ጽ/ቤት አማካይነት ለመንበረ ፓትርያርክ ጠቅላይ ቤተ ክህነት ጽ/ቤትና ለሚመለከታቸው አካላት የሚተላለፉ ሲኾን በተግባር ላይ ስለመዋላቸው በቅዱስ ሲኖዶሱ ዋና ጸሐፊ ክትትል ተደርጎ ስለአፈጻጸማቸው ለቅዱስ ሲኖዶሱ የሥራ አፈጻጸም ዘገባ የሚቀርብባቸው ይኾናል፡፡

ጥቅምት ፲፩ ቀን በመክፈቻ ሥርዐት ጸሎት በተጀመረው የምልአተ ጉባኤው ስብሰባው ለቀናት ሲመክር የሰነበተው ቅዱስ ሲኖዶስ፣ ተወያይቶ ካጸደቃቸው ዐበይት አጀንዳዎች አንዱ ለኢትዮጵያ ኦርቶዶክስ ተዋሕዶ ቤተ ክርስቲያን ጠቅላላ አስተዳደርና ለልዩ ልዩ አገልግሎት የሚውለው ዓመታዊ በጀት ነው፡፡

በሕገ ቤተ ክርስቲያን መሠረት÷ የቤተ ክርስቲያናችንን አጠቃላይ የምጣኔ ሀብትና የሙዓለ ንዋይ አስተዳደር መመሪያዎችን (ፖሊሲዎችን) የመወሰን፣ ዓመታዊ በጀቷን የማጽደቅና ተግባራዊነቱን የመቆጣጠር ሥልጣን የቅዱስ ሲኖዶስ ነው፡፡

 

 

ዓመታዊ የሥራ ዕቅዱንና በጀቱን በየደረጃው ከሚገኙ የቤተ ክርስቲያናችን አካላትና የሥራ ዘርፎች ተሰብስቦ በሒሳብና በጀት መምሪያ አማካይነት እንዲዘጋጅ የሚያደርገው፣ በቅዱስ ሲኖዶሱ ሲጸድቅም በበጀት የተመደበውን ከቅዱስ ሲኖዶስ ዋና ጸሐፊውና ከፋይናንስ መምሪያው ሓላፊ ጋራ በመኾን በፊርማው የሚያንቀሳቅሰው የቤተ ክህነቱ ዋና ባለሥልጣን ደግሞ ጠቅላይ ሥራ አስኪያጁ ነው፡፡

በጠቅላይ ቤተ ክህነቱ ተጠንቶና ተዘጋጅቶ በቋሚ ሲኖዶሱ በቀረበለት የ፳፻፯ ዓ.ም. የሥራ ዕቅድና በጀት ላይ የመከረው የቅዱስ ሲኖዶስ ምልአተ ጉባኤ ታዲያ፣ ለኢትዮጵያ ኦርቶዶክስ ተዋሕዶ ቤተ ክርስቲያን ጠቅላላ አስተዳደርና ለልዩ ልዩ አገልግሎት የሚውል ብር 141 ሚልዮን ዓመታዊ በጀት ማጽደቁ ነው የተገለጸው፡፡

His Grace Abune Mathewos

ለመላዋ የኢትዮጵያ ኦርቶዶክስ ተዋሕዶ ቤተ ክርስቲያን የሥራ አስፈጻሚ፣ የገንዘብና ንብረት አስተዳደር የበላይ ሓላፊ በጠቅላላው የቤተ ክህነት ዋና ባለሥልጣን የኾኑት ብፁዕ ጠቅላይ ሥራ አስኪያጁ÷ የቅዱስ ሲኖዶሱን ሕጎች፣ ደንቦች፣ መመሪያዎችና ውሳኔዎች ያስፈጽማሉ፤ በበጀት የጸደቀውን የጠቅላይ ቤተ ክህነቱን ገንዘብና ንብረት በፊርማቸው ያንቀሳቅሳሉ፤ በየሦስት ወሩ ለቋሚ ሲኖዶስ፣ በየዓመቱ ለአጠቃላይ ሰበካ መንፈሳዊ ጉባኤ፣ በዓመት ኹለት ጊዜ ለቅዱስ ሲኖዶስ ምልአተ ጉባኤ የሥራ አፈጻጸም ዘገባና በበጀት የተደገፈ የቀጣይ ዓመት ዕቅድ ያቀርባሉ፡፡

በምልአተ ጉባኤው ላይ በጠቅላይ ቤተ ክህነቱ ሒሳብና በጀት መምሪያ ሓላፊዎች ከተሰጠው ማብራሪያ ለመረዳት እንደተቻለው÷ ከበጀቱ በአመዛኙ ከሐዋርያዊ ተልእኮ (ስብከተ ወንጌልን ከማስፋፋትና ከማጠናከር) ጋራ ለተያያዙ ተግባራት፤ ለአብነት ት/ቤቶች እና ለገዳማት ድጋፍ እንዲኹም ለአህጉረ ስብከት የሥራ ማስኬጃ ድጎማ መደልደሉ የተመለከተ ሲኾን በካፒታል በጀት አንጻር የቤቶችና ሕንፃዎች አስተዳደርና ልማት ድርጅት በቸርችል ጎዳና ባንኮ ዲሮማ የሚያስገነባው ሕንፃ ማስጨረሻና የአኵስም ጽዮን ቤተ መዘክር ዲዛይን ክፍያም ተጠቃሽ ወጪዎች እንደኾኑ ተጠቅሷል፡፡

በበጀት ድልድሉ የሐዋርያዊ ተልእኮ እንቅስቃሴ ቀዳሚውን ድርሻ መያዙ÷ አዲስ አማንያንን በየጊዜው ወደ ቤተ ክርስቲያን ለመጨመርና የምእመናንን ፍልሰት ለመግታት ዋናው መፍትሔ ስብከተ ወንጌልን ማስፋፋትና ምእመናን በእምነታቸው እንዲጸኑ ማድረግ ከመኾኑ አኳያ፣ የስብከተ ወንጌል አገልግሎታችን ተጠናክሮ የሚቀጥልበት አስፈላጊው ጥረት ኹሉ እንዲደረግ በአጠቃላይ ሰበካ መንፈሳዊ ጉባኤ ከተያዘው አቋም የሚነሣ ነው፡፡

የአህጉረ ስብከት የበጀት ድጎማን በተመለከተ፣ በ፳፻፮ ዓ.ም. ከእያንዳንዱ ሀገረ ስብከት በቀረበው የዘመኑ የገቢ ሪፖርት መሠረት÷ ከኃምሳው አህጉረ ስብከት ኻያ ሦስቱ ራሳቸውን በገቢ ችለው ትርፍ የሚያስገቡ ሲኾኑ ራሳቸውን ያልቻሉት ኻያ ሰባት አህጉረ ስብከት ከጠቅላይ ቤተ ክህነቱ ድጎማ እንደሚደረግላቸው ተገልጧል፡፡

የትምህርተ ሃይማኖት፣ የሥርዐተ አምልኮት፣ የፍልስፍና፣ የታሪክ፣ የማንነት፣ የሀገር በቀል ዕውቀቶች መሠረትና ምንጭ የኾኑ የአብነት ት/ቤቶቻችንን ከመጠበቅ፣ ከማሳደግና ከማስፋፋት አንፃርም በቅዱስ ሲኖዶስ የተወሰነው አምስት ከመቶና ከመንበረ ፓትርያርክ የተመደበው ለመምህራኑና ለተማሪዎቹ ብቻ በትክክል እንዲደርስ ክትትሉና ቁጥጥሩ ተጠናክሮ መቀጠል እንደሚኖርበት በአጠቃላይ ጉባኤ ደረጃ አቋም ተይዞበታል፡፡

በመንበረ ፓትርያርክ ጠቅላይ ጽ/ቤት ደረጃ የቤተ ክርስቲያናችን ዓመታዊ በጀት መሠረት የኾኑት ገቢዎች አጠቃላይ ምንጮች፡-

በቃለ ዓዋዲው እንደተደነገገው፡-

  • አህገረ ስብከት ከሰበካ ጉባኤ ክፍያና ከማናቸውም ገቢያቸው የሚከፍሉት 35 በመቶ ፈሰስ፤
  • የአ/አበባ ሀ/ስብከት ከሰበካ ጉባኤ ክፍያና ከማናቸውም ገቢው የሚከፍለው 65 በመቶ ፈሰስ፤

የልማት ድርጅቶች/ተቋማት ገቢ፡-

  • የቤቶችና ሕንፃዎች አስተዳደርና ልማት ድርጅት የኪራይ ገቢ
  • የቁልቢ ደ/ኃ/ቅ/ገብርኤል ገዳም ንዋያተ ቅድሳት ማደራጃ መምሪያ
  • የትንሣኤ ማሳተሚያ ድርጅት የመጽሐፍ ሽያጭ
  • የትንሣኤ ዘጉባኤ ማተሚያ ቤት
  • የአልባሳት ማደራጃና ምርት ሥርጭት መምሪያ
  • የጎፋ ጥበበ እድ ካህናት ማሠልጠኛ፤
  • የአዲስ አበባ ሀገረ ስብከት የበጀት ድጎማ (እስከ አንድ ሚልዮን ብር)
  • የመንበረ ፓትርያርኩ ልዩ ልዩ የውስጥ ገቢዎች
  • ከመንግሥት የሚሰጥ ኹለት ሚልዮን ብር ድጎማ (ስላልተመለሱ ቤቶች) ናቸው፡፡

ይኹንና ከእኒኽ አጠቃላይ የገቢ ምንጮች ውስጥ÷ የአህጉረ ስብከትና የአዲስ አበባ ሀገረ ስብከት ፈሰስ፣ የቁልቢ ንዋያተ ቅድሳት ማደራጃ መምሪያ እንዲኹም የቤቶችና ሕንፃዎች አስተዳደርና ልማት ድርጅት የኪራይ ገቢ እንደ ቅደም ተከተላቸው በየዓመቱ ቀጣይ ዕድገት የሚመዘገብባቸውና ከፍተኛ ገቢ የሚገኘባቸው ኾነዋል፡፡

በአጠቃላይ ጉባኤው የጠቅላይ ሥራ አስኪያጁ ሪፖርት እንደተደመጠው÷ በቤቶችና ሕንፃዎች አስተዳደርና ልማት ድርጅት በኩል በ፳፻፮ ዓ.ም. በጀት ዓመት ከቤት ኪራይና ከልዩ ልዩ ገቢዎች ከብር 23 ሚልዮን በላይ /23‚634‚388.245.21/ ገቢ አድርጓል፡፡ ከሐምሌ ፳፻፭ ዓ.ም. እስከ ታኅሣሥ ፳፻፮ ዓ.ም. ድረስ በቁልቢ ደብረ ኃይል ቅዱስ ገብርኤል ገዳም ከብር 41 ሚልዮን በላይ /41‚680‚951.52/ ዓመታዊ ገቢ የተገኘ ሲኾን በጀታቸው ከገዳሙ ለኾኑ ተቋማት ከ14 ሚልዮን ብር በላይ /14‚365‚423.68/ ወጪ ተደርጎ በአኹኑ ወቅት 27 ሚልዮን ብር ያኽል/27‚315‚527.84/ በማደራጃ መምሪያው ሣጥን ውስጥ ይገኛል፡፡

the miraculous kulubi saint gabriel church

ተኣምራት ወመንክራት የሚታዩበት የቁልቢ ደብረ ኃይል ቅዱስ ገብርኤል ቤተ ክርስቲያን፤ ከሐምሌ ፳፻፭ ዓ.ም. እስከ ታኅሣሥ ፳፻፮ ዓ.ም. ድረስ በስእለትና መባዕ የገቡ ንዋያተ ቅድሳትን፣ ወርቅና ጌጣጌጦችን ሳይጨምር ከ41 ሚልዮን ብር በላይ ገቢ አስገኝቷል፡፡

ብዙውን ጊዜ ከመደበኛው በጀት ሌላ ድንገተኛ ወጪ በሚያስፈልግበት ጊዜ ጠቅላይ ሥራ አስኪያጁ በቋሚ ሲኖዶስ እያስወሰኑ ወጪ በማድረግ በሥራ ላይ የሚውል የመጠባበቂያ በጀት ኾኖም ያገለግላል፡፡ ከጥሬ ገንዘቡ በተጨማሪ በተጠቀሱት ወራት በደብሩ ክብረ በዓላት በስእለት የገባው ወርቅ ተመርምሮ በብሔራዊ ባንክ እንዲቀመጥ ሲደረግ፣ ልዩ ልዩ ጌጣጌጦችም በማደራጃ መምሪያው ሣጥን እንዲቀመጡ ተደርገዋል፡፡ በስእለት የተገኙት ንዋያተ ቅድሳቱም እንደ ገበያው ኹኔታ በዓመት ሦስት ጊዜ የዋጋ ጥናትና ትመና ወጥቶላቸው በመሸጥ ላይ ይገኛሉ፡፡

በ፴፫ኛው አጠቃላይ ሰበካ መንፈሳዊ ጉባኤ በ፳፻፮ ዓ.ም. በጀት ዓመት ከእያንዳንዱ አህጉረ ስብከት የቀረበውን ሪፖርት መነሻ በማድረግ፣ ከኃምሳው አህጉረ ስብከት ከ95 ሚልዮን ብር በላይ የፐርሰንት ገቢ ተገኝቷል፤ ይህም ከአምናው ጋራ ሲነጻጸር ከ16 ሚልዮን ብር በላይ ብልጫ የተመዘገበበት ነው፡፡ የጠቅላይ ቤተ ክህነቱ ገቢ በዚኽን ያኽል ካደገ የአህጉረ ስብከትና የአጥቢያ አብያተ ክርስቲያን ገቢም ከዚኽ በበለጠ እያደገ ለመኾኑ አያጠያይቅም፡፡

በቃለ ዐዋዲው ድንጋጌ አንቀጽ ፶ ንኡስ አንቀጽ (፬) እና (፭) መሠረት፣ በማናቸውም ደረጃ የሚገኘው የሰበካ አስተዳደር የበጀት ዓመት ሐምሌ ፩ ቀን ተጀምሮ ሰኔ ፴ ቀን ይዘጋል፡፡ በበጀት ዓመቱ መጨረሻ በየደረጃው የተጠናቀረው የንብረት አያያዝና አጠባበቅ፣ የገንዘብ ገቢና ወጪ ሒሳብና የሥራ ክንውን ሪፖርት እስከ ሐምሌ ፴ ቀን ድረስ መንበረ ጵጵስና ሀገረ ስብከት ጽ/ቤት መድረስ አለበት፤ ሀገረ ስብከት ጽ/ቤትም የበኩሉን አጥንቶና አጣርቶ ዓመታዊው ሪፖርት እስከ ነሐሴ ፴ ቀን መንበረ ፓትርያርክ ጠቅላይ ቤተ ክህነት ጽ/ቤት እንዲደርስ ያደርጋል፡፡

የአህጉረ ስብከቱ ዓመታዊው የፈሰስ ሒሳብ መመዝገቢያ ቅጻቅጾችና ሪፖርቶች እስከ ነሐሴ ፴ ቀን ለጠቅላይ ቤተ ክህነቱ ይድረሱ እንጂ አህጉረ ስብከቱ ፈሰሱን ወደ መንበረ ፓትርያርክ ጠቅላይ ቤተ ክህነት ገቢ የሚያደርጉትና ገቢ ያደረጉበትን ቼክ እንደ ሥራ ፍሬ የሚያቀርቡት በጥቅምቱ የአጠቃላይ ሰበካ መንፈሳዊ ጉባኤ ወቅት ነው፡፡ የመንበረ ፓትርያርክ ጠቅላይ ጽ/ቤትም ከኹሉም አህጉረ ስብከት ባሰባሰበው ገቢ የቤተ ክርስቲያኒቱ ዓመታዊ በጀት ከላይ እስከ ታች እንዲጠና አድርጎና ቀምሮ ለጥቅምቱ የቅዱስ ሲኖዶስ ምልአተ ጉባኤ የመጀመሪያ ዓመታዊ መደበኛ ስብሰባ በማቅረብ ሲወሰንለት ለልዩ ልዩ ሥራዎች ያውለዋል፡፡

እዚኽ ላይ የቤተ ክርስቲያናችንን የበጀት ዓመት (budget calendar) እና የበጀት ድጎማና ክፍፍል (budgetary accounting) የተመለከተ ጥያቄ መነሣቱ አልቀረም፡፡ ይኸውም በቃለ ዐዋዲው ድንጋጌ መሠረት በማናቸውም ደረጃ የሚገኘው የሰበካ አስተዳደር የበጀት ዓመቱ ሐምሌ ፩ ቀን በሚጀምርበት ኹኔታ፣ በጀቱ የሚጸድቀው ግን መደበኛውን የጥቅምት ቅዱስ ሲኖዶስ ምልአተ ጉባኤ ስብሰባ ጠብቆና በሦስት ወራት ዘግይቶ መኾኑ ጥያቄ እየተነሣበት ይገኛል፡፡ የበጀት ዓመቱ በቃለ ዓዋዲው ድንጋጌ መሠረት በሐምሌ ቢጀመርም በጀቱ እስከሚጸድቅበት ጥቅምት ወር ድረስ በታሳቢና በማብቃቃት እየሠሩ እንደሚቆዩ በመግለጽ አስተያየት የሰጡ የጠቅላይ ቤተ ክህነቱ ሓላፊዎች ‹‹ባልገባና ባልጸደቀ በጀት እንዴት ሥራ ማስጀመር ይቻላል?›› በማለት ይጠይቃሉ፡፡

አማራጭ የመፍትሔ ሐሳብ ከማቅረብ አኳያ÷ የአህጉረ ስብከት የፈሰስ አስተዋፅኦ እስከ ግንቦት ተሰብስቦ በርክበ ካህናት ቅዱስ ሲኖዶስ ምልአተ ጉባኤ ኹለተኛ ዓመታዊ መደበኛ ስብሰባ ተቀምሮ የሚጸድቅበት፣ ሰኔ የዝግጅት ወር ኾኖ በሐምሌ የበጀት ዓመቱ የሚጀምርበት አሠራር እንዲጤን ይጠይቃሉ፤ አልያም የዘመን አቆጣጠር ባለቤት የኾነች ቤተ ክርስቲያን የራስዋ የበጀት ዓመት ሊኖራት እንደሚችል በመጠቆም፣ የበጀት ዓመቱ በጥቅምት መባቻ የሚጀመርበትና መስከረም ፴ የሚዘጋበት አማራጭ ሊታይ እንደሚችልም ያመለክታሉ፡፡ ይህም በተሻሻለው ሕገ ቤተ ክርስቲያን የየዓመቱ የጠቅላይ ቤተ ክህነቱ የሥራ ዕቅድ፣ በግንቦት የርክበ ካህናት ቅዱስ ሲኖዶስ ምልአተ ጉባኤ እንዲቀርብ በሰፈረው ድንጋጌ የተደገፈ መኾኑን ያስረዳሉ፡፡

በሌላ በኩል ጠቅላይ ቤተ ክህነታችን፣ በጀመርነው በጀት ዓመት ዘመናዊውንና ለቁጥጥር አመቺ የኾነውን የኹለትዮሽ የሒሳብ መዝገብ አያያዝ ሥርዐት ዝግጅትና ትግበራ የሚጀምርበት ሲኾን ከዚኹ ጋራም የመምሪያዎች ገቢዎች በአንድ ቋት የሚሰበሰብበት (የገቢ ማእከላዊነት) አሠራርም በቋሚ ሲኖዶስ በተወሰነው መሠረት ተፈጻሚ ለማድረግ እየተዘጋጀ ይገኛል፡፡

በዚኽም መሠረት ከኅዳር መጀመሪያ አንሥቶ የሰበካ ጉባኤ ማደራጃ መምሪያ፣ የስብከተ ወንጌልና ሐዋርያዊ ተልእኮ መምሪያ፣ የሰንበት ት/ቤቶች ማደራጃ መምሪያ፣ የቅርሳ ቅርስ ቤተ መጻሕፍትና ወመዘክር መምሪያ እና የትንሣኤ ማሳተሚያ ድርጅት ለየራሳቸው የነበራቸው የሒሳብ ቋት ታጥፎ ገቢያቸው ወደ ማእከላዊ ቋት ገብቶ በበጀት እየወጣ እንዲጠቀሙ መመሪያ ተሰጥቷል፡፡

መምሪያዎቹ የገቢ ማእከላዊነቱን ቢደግፉትም የሥራ ማስኬጃ በጀታቸውን ግን በራሳቸው እንዲያስተዳድሩ አለመደረጉ ለቢሮክራሲያዊ ውጣ ውረድ እንደሚዳርጋቸው ይናገራሉ፡፡ የተተከለው የኹለትዮሽ የሒሳብ መዝገብ አያያዝ ሥርዐት ለቁጥጥርና ለተጠያቂነት አመቺ በመኾኑ የሥራ ማስኬጃ በጀቱን የሚጠቀሙበት አሠራር ከዚኹ የሒሳብ መመሪያ ጋራ እንዲጣጣም ይጠይቃሉ፡፡ ጠቅላይ ቤተ ክህነታችን ለመግባት እየተንደረደረበት ላለው ዘመናዊው የኹለትዮሽ የሒሳብ ሥርዐት ውጤታማ አተገባበር የግንዛቤ ማስጨበጫ መድረኮች እንዲዘረጉና ለየመምሪያዎቹ የተመደበላቸው በጀት በየዕቅዳቸው ከሚያስፈጽሙት ተልእኮ አንጻር ያለው ተገቢነት በሚገባ የሚታይበት አሳታፊ አሠራር እንዲኖር ያሳስባሉ፡፡

ይህም በብፁዕ ጠቅላይ ሥራ አስኪያጁ አጠቃላይ ሪፖርት እንደተመለከተው÷ በያዝነው በጀት ዓመት በጠቅላይ ቤተ ክህነት ደረጃ የሚሠሩ ሥራዎች በመምሪያዎቹና ድርጅቶቹ የታቀዱ፣ በአስተዳደር ጉባኤ የሚገመገሙና በተቋም ደረጃ ውጤት የሚያመጡ እንዲኾኑ ለማድረግ የሚያስችል የመልካም አስተዳደር የግልጽነትና የተጠያቂነት መርሖ መሠረት የሚጣልበት ነው፡፡ በውጤቱም በተዋረድ በሚገኙት መዋቅሮች÷ ለአማሳኞች ሕገ ወጥ ጥቅምና ለፕሮቴስታንታዊ ተሐድሶ አቀንቃኞች መተላለፊያ በር በመክፈት የቤተ ክርስቲያንን ህልውና እየተፈታተነ ያለውን የመልካም አስተዳደር ችግራችንን በማስወገድ የቤተ ክርስቲያናችንን ክብርና ልዕልና ለመጠበቅ የሚያስችል አርኣያነት ነው፡፡

በዚኽ ረገድ ቅዱስ ሲኖዶስ የቤተ ክርስቲያን አገልግሎት በስትራተጅያዊ ዕቅድ ላይ ተመሥርቶ እንዲሠራ፣ የገንዘብ ሒሳብና ንብረት አጠባበቅም በዘመናዊው የፋይናንስ አሠራር ተግባራዊ እንዲደረግ ያሳለፈው ውሳኔ ለመላዋ የኢትዮጵያ ኦርቶዶክስ ተዋሕዶ ቤተ ክርስቲያን የሥራ አስፈጻሚ፣ የገንዘብና ንብረት አስተዳደር የበላይ ሓላፊ ዋና ባለሥልጣን ለኾነው ለመንበረ ፓትርያርክ ጠቅላይ ጽ/ቤቱ የሥራ አመራርና አቅጣጫ የሚሰጠው ነው፡፡

በአጠቃላይ ብፁዕ አቡነ ቀውስጦስ በአጠቃላይ ሰበካ መንፈሳዊ ጉባኤ ስብሰባ ላይ እንዳወሱት፣ በኃምሳ ሳንቲም የጀመረው የሰበካ ጉባኤ አስተዋፅኦ ዛሬ በሀገር አቀፍ ደረጃ በብዙ ሚልዮን የሚቆጠር ገንዘብ መሰብሰብ መቻሉ የቅድስት ቤተ ክርስቲያንን የአቅም ማደግ፣ የራሷን አገልግሎትና የልማት ዕቅዶች በራሷ ጥሪት የመፈጸም ትልሟን የሚጠቁም ነው፡፡ ገንዘብ መሰብሰብ ብቻ ሳይኾን ደግሞ የተገኘውን የእግዚአብሔር ገንዘብ በተገቢው የሒሳብ መዝገብ አያያዝ ሥርዐት በጥንቃቄ በማንቀሳቀስ ለሚገባው አገልግሎትና ልማት ለማዋል፤ የቤተ ክርስቲያንን የፋይናንስ አቅም አኹን በበጀት ከተመለከተው ብር 141 ሚልዮን በላይም ለማሳደግና በራሷ ምእመናንና ልማት ላይ የተመሠረተ ሉዓላዊ ክብሯን ለመጠበቅም ተግተን መሥራት ይጠበቅብናል፡፡


 

በ፳፻፮ ዓ.ም. ለየአህጉረ ስብከቱ የጠላከ በጀት እና በ፳፻፮ ዓ.ም. የመንበረ ፓትርያርክ 35 በመቶ የዘመኑ ገቢ የልዩነት ደረጃ የሚያሳይ ዝርዝርYeTekelat betekihinet bedget reportYeTekelat betekihinet bedget report02ምንጭ፡- የሰበካ ጉባኤ ማደራጃ መምሪያ፤ ቃለ ዐዋዲ መጽሔት፤ ፯ኛ ዓመት ቁጥር ፲፤ ፳፻፯ ዓ.ም.

ቅ/ሲኖዶስ: በምዕራብ ወለጋ እና ቄለም ወለጋ የተሐድሶ መናፍቃን ፈተናና በጋምቤላ የጸጥታ ችግሮች ጉዳይ ውሳኔ አሳለፈ

በቅዱስ ሲኖዶስ የተወገዙ የተሐድሶ መናፍቃን (አላውያን) ድርጅቶችና ግለሰቦች አስተዳደራዊ ችግርንና ጎሳዊ ርእዮታዊ ጥላቻን ሰበብ በማድረግ ቤተ ክርስቲያናችንን ከሕዝቡ ነጥሎ ለማዳከም በኅቡእ እና በገሃድ የሚያራምዱትን ክሕደት በትምህርት ማረም እንዲኹም የመከፋፈልና የጥላቻ ዘመቻቸውን ማጋለጥ ጠንካራ የጋራ መግባባትና አቋም ተይዞበታል፡፡

በምልመላና ቅበላ ክፍተት ሳቢያ ወደ ቤተ ክርስቲያናችን የትምህርት ተቋማት ሰርገው ገብተው እንጀራዋን እየበሉ ለፕሮቴስታንታዊ ተሐድሶ አራማጅ ድርጅቶች እንደሚሠሩ የተጠረጠሩ ተቋማቱንና ብዙኃን ደቀ መዛሙርቱን የማይወክሉ ግለሰቦች ጉዳይ ተጣርቶ ለውሳኔ የሚቀርብበት አቅጣጫ ተሰጥቷል፡፡

his-holiness-abune-henok-nashhvi

ብፁዕ አቡነ ኄኖክ፤ የምዕራብ ወለጋና አሶሳ አህጉረ ስብከት ሊቀ ጳጳስ (ፎቶ: ናሽቪል ሐመረ ኖኅ ኪዳነ ምሕረት)

በተለይ በምዕራብ ወለጋ እና ቄለም ወለጋ አህጉረ ስብከት ብሔራዊት፣ ጥንታዊትና ሐዋርያዊት የኾነችውን ኦርቶዶክሳዊት ተዋሕዶ እምነትን ‹‹የምኒልክ ሃይማኖት›› እያሉ የአንድ አካባቢ በማድረግ ሕዝቡን ለሚከፋፍሉ የተሐድሶ አላውያንና የጎሰኝነት ርእዮታዊ ጥላቻ አራማጆች ምላሽ የሚሰጥ እና ምእመኑን በእምነቱና በአንድነቱ የሚያጸና መጠነ ሰፊ ስምሪት ይካሔዳል፡፡

በምዕራብ ወለጋና አሶሳ አህጉረ ስብከት ሊቀ ጳጳስ ብፁዕ አቡነ ኄኖክ የሚመራ ሀገር አቀፍ ትብብር ይቋቋማል፤ በአህጉረ ስብከቱ በጥቂት አባወራዎች የሚጠበቁ የገጠር አብያተ ክርስቲያንይረዱበታል፤ ምእመኑን በቋንቋው የሚያስተምሩ ሰባክያነ ወንጌል ይመደባሉ፤ መጻሕፍትና በራሪ ወረቀቶች ይዘጋጃሉ፡፡

his grace abune filpos, archbishop of Illubabor and Gambela

ብፁዕ አቡነ ፊልጶስ፤ የጋምቤላ እና ኢሉባቦር አህጉረ ስብከት ሊቀ ጳጳስ

በጋምቤላ ካህናትና ማእመናን ለኅልፈተ ሕይወት በተዳረጉበትና በእርስ በርስ ግጭት ለተጎዱ ኹሉም ወገኖች ጸሎት የምታደርግበትንና የሰላም መልእክቷን የምታደርስበትንከኑሯቸው ለተፈናቀሉትም ድጋፍ የምታደርግበትን የማስተባበር ሥራ ትሠራለች፡፡

ቤተ ክርስቲያን ጌታችን ኢየሱስ ክርስቶስ የመሠረታት በምድር ያለች መንግሥተ እግዚአብሔር እንደመኾኗ መጠን ስለ ሀገርና ስለ ሰላም ትጸልያለች፡፡ ሕዝቦች በፍቅር፣ በሰላምና በአንድነት እንዲኖሩና ወደተሻለ የኑሮ ደረጃ እንዲደርሱ በተለይም የድኾች ወገኖች ችግር እንዲቃለል ከበጎ አድራጊዎች ጋራ በመተባበር ያልተቆጠበ ጥረት ታደርጋለች፡፡ በሰዎች መካከል የሚፈጠር የእርስ በርስ አለመግባባትና ግጭት እንዲኹም በሕዝቦች መካከል ጦርነት እንዳይኖር የማስተማርና የማስታረቅ ሓላፊነት አለባት፡፡ በአጠቃላይ በምትመራበት ሕግ መሠረት÷ የሀገር ሰላም፣ አንድነትና ዕድገት፤ የወገን ነፃነትና ብልጽግና፤ ለሰው ልጆች እኩልነትና ፍትሕ ርትዕ እንዲሰፍን መንፈሳዊና ማኅበራዊ ተልእኮዋን ታከናውናለች፡፡

ቅዱስ ሲኖዶስ ለኹለት ብፁዓን ሊቃነ ጳጳሳት ምደባ ሰጠ

የቅዱስ ሲኖዶስ ምልአተ ጉባኤ በዛሬ፣ ጥቅምት ፳፬ ቀን ፳፻፯ ዓ.ም. የቀትር በፊት ውሎው በተመለከተው የሊቃነ ጳጳሳት ዝውውርና ምደባ አጀንዳ፣ የሦስት ብፁዓን ሊቃነ ጳጳሳትን ጉዳይ በመመልከት ለኹለት ብፁዓን ሊቃነ ጳጳሳት ምደባ ሰጥቷል፡፡

His grace abune daniel, archbishop of Dire Dawa and West Harerghe

ብፁዕ አቡነ ዳንኤል፤ የድሬዳዋ እና ምዕራብ ሐረርጌ አህጉረ ስብከት ሊቀ ጳጳስ

በዚኽም መሠረት በቅድስት ሀገር ኢየሩሳሌም የኢትዮጵያ ገዳማት ሊቀ ጳጳስ የነበሩት ብፁዕ አቡነ ዳንኤል÷ የድሬዳዋ እና ምዕራብ ሐረርጌ አህጉረ ስብከት ሊቀ ጳጳስ ኾነው እንዲሠሩ መድቧቸዋል፡፡

his grace abune hizkiel

ብፁዕ አቡነ ሕዝቅኤል፤ የከፋ ሸካ ቤንች ማጂ አህጉረ ስብከት ሊቀ ጳጳስና የሰዋስወ ብርሃን ቅዱስ ጳውሎስ መንፈሳዊ ኮሌጅ የበላይ ሓላፊ

የከፋ ሸካ ቤንች ማጂ አህጉረ ስብከት ሊቀ ጳጳስ ብፁዕ አቡነ ሕዝቅኤል፣ አህጉረ ስብከታቸውን እንደያዙ የሰዋስወ ብርሃን ቅዱስ ጳውሎስ መንፈሳዊ ኮሌጅ የበላይ ሓላፊ ኾነው እንዲሠሩ መድቧቸዋል፡፡

ብፁዕነታቸው የተተኩት፣ የኮሌጁ የበላይ ሓላፊ ኾነው ሲሠሩ በቆዩትና ተደራራቢ ሓላፊነት በነበራቸው የሶማሌ/ጅግጅጋ/ ሀገረ ስብከት ሊቀ ጳጳስ እና የሰበካ ጉባኤ ማደራጃ መምሪያ የበላይ ሓላፊ በኾኑት ብፁዕ አቡነ ያሬድ ምትክ ነው፡፡

ለ፴፫ኛው የመንበረ ፓትርያርክ አጠቃላይ ሰበካ መንፈሳዊ ጉባኤ በቀረበው የጠቅላይ ሥራ አስኪያጁ ሪፖርት እንደተመለከተው፣ ኮሌጁ በቀን የሴሚናሪ እና የትርጓሜ ትምህርት መርሐ ግብሮቹ የሚያስተምራቸው ደቀ መዛሙርት በማታው መርሐ ግብር ከሚቀበላቸው በቁጥር በእጅጉ ያነሱ መኾናቸው በተቋሙ አስተዳደር ሊጤን የሚገባው ነው፡፡ ተቋሙ ያለፈውን ዓመት ደቀ መዛሙርት ባስመረቀበት ወቅት ከአስተዳደራዊ ነፃነት፣ ከሥርዐተ ትምህርት ዝግጅትና በመሰሏቸው ጉዳዮች ረገድ በግልጽ ያቀረባቸው ችግሮች ሳይዘነጉ የደቀ መዛሙርቱ ቁጥር ማሽቆልቆል አፋጣኝ ትኩረት ሊሰጠው ያስፈልጋል፡፡

በይበልጥም አኹን በበላይ ሓላፊነት የተመደቡትና በደቀ መዝሙርነት ይኹን በመምህርነት የቤተ ጉባኤያቱ ጣዕምና አስፈላጊነት በሚገባ የሚያውቁት ብፁዕነታቸው፣ በቀን መርሐ ግብሩ ላይ የሚታየውን የቁጥር ማሽቆልቆል ከሚመለከታቸው ተባባሪ አካላት ጋራ በመነጋገር እንደሚያሻሽሉት ይታመናል፡፡

ተቋሙ ከውጭ ሀገሮች ለመጡ ደቀ መዛሙርት የነፃ ትምህርት ዕድል መስጠቱ፣ የማታውን የትምህርት መርሐ ግብር የሚከታተሉ በልዩ ልዩ ሥራ ላይ የተሰማሩ የሰንበት ት/ቤቶች ወጣቶችና ሊቃውንት ቁጥር በየጊዜው ዕድገት ማሳየቱ ሊበረታታ የሚገባው ነው፡፡

በሪፖርቱ እንደተጠቀሰው፣ ባለፈው በጀት ዓመት የኮሌጁ የመምህራንና የደቀ መዛሙርት ማደርያዎች በተሟላ ኹኔታ ታድሰዋል፡፡ በኮሌጁ ቅጥር ግቢ በከፈተው ዐጸደ ሕፃናት የአካባቢው ነዋሪዎች በአቅራቢያቸው ት/ቤት የሚያገኙበትን ዕድል ከመፍጠሩም በላይ ኮሌጁም ተጨማሪ ገቢ እንዲያገኝ አድርጓል፡፡ በ፳፻፯ ዓ.ም. የትምህርት ዘመንም የአንደኛ ደረጃ ትምህርት ለመስጠት የሚያስችል ዕውቅና ከመንግሥት አግኝቷል፡፡

Follow

Get every new post delivered to your Inbox.

Join 13,712 other followers