የማኅበራት ኅብረቱ: ሲኖዶሳዊው ዕርቀ ሰላም ወደኋላ እንዳይመለስ ተማፀነ፤ ከአኃት የኤርትራ ቤተ ክርስቲያን ጋራ ግንኙነቱ እንዲጠናከር ጠየቀ

Maheberat on synodal reconciliation

ለአንዲት ኦርቶዶክሳዊት ተዋሕዶ ቤተ ክርስቲያን አንድ ቅዱስ ሲኖዶስ

~~~~~~

  • ልዩነቱ፣በታሪካችን ጥቁር ነጥብ የጣለ አሳዛኝ ድርጊት ነው፤
  • ስደት፣ኑፋቄ፣ቡድነኝነትና ጣልቃ ገብነት እንዲሰፋ አድርጓል፤
  • አባቶቻችን፣በይቅርታ የተግባር አርኣያ እንዲኾኑን እንሻለን፤
  • ግራ የተጋቡትንና የተበተኑትን ለመሰብሰብ ተስፋ ይሰጣል፤
  • /ሚኒስትሩ ለአንድነታችን ያሳዩትን ፍላጎት እናደንቃለን
  • ለዕርቀ ሰላሙ ስኬት የድርሻችንን ለመወጣት ዝግጁ ነን፤

†††

  • ለአኃት የኤርትራ ቤተ ክርስቲያን የጋራ አገልግሎት ጥሪ እናቀርባለን
  • የሊቢያ ሰማዕታት ዐፅም፣ በሀገር በክብር እንዲያርፍ እንጠይቃለን፤
  • የአዲስ አበባ ሀገረ ስብከትን፣ጅምር የለውጥ ርምጃዎች እንደግፋለን፤
  • በሥራ አስኪያጁ የተነገሩ ተስፋዎች፣ ተተግብረው ለማየት እንሻለን
  • በሞያና በአስፈላጊው ነገር ኹሉ ለመደገፍ መወሰናችንን እንገልጻለን፤
  • የአገልግሎት ማኅበራትለተጨባጭ ለውጥ በጋራ እየተናበቡ ይሥሩ

†††

የቤተ ክርስቲያናችን ሲኖዶሳዊ አንድነት፣በልዩነቱ ግራ የተጋቡትንና የተበታተኑትን ምእመናን በፍቅር ለመሰብሰብ የሚያስችል በመኾኑ ሒደቱ ወደኋላ እንዳይመለስ፤ ብፁዓን አባቶች፣ የዕርቀ ሰላም ኮሚቴ አባላት በአጠቃላይ በሀገር ውስጥና በውጭ የሚገኙ መላው ምእመናን በጸሎትም በሐሳብም የበኩላቸውን ጥረት እንዲያደርጉ፣የመንፈሳዊ አገልግሎት ማኅበራት ኅብረት ጥሪ አቀረበ፡፡

Maheberat Hibret Recon

ከመቶ በላይ የአገልግሎት ማኅበራትን ያቀፈው የኅብረቱ ሥራ አስፈጻሚ፣ ዛሬ ሰኞ፣ ሐምሌ 2 ቀን 2010 ዓ.ም. በአዲስ አበባ ዮድ አቢሲኒያ የባህል አዳራሽ፣ “ለአንዲት ኦርቶዶክሳዊት ተዋሕዶ ቤተ ክርስቲያን አንድ ሲኖዶስ” በሚል ርእስ በሰጠው መግለጫ፣የተጀመረው የዕርቀ ሰላም እንቅስቃሴ ከግብ እንዲደርስ ለመደገፍና ለዕርቀ ሰላሙ ከሚጥሩ አካላት ጎን ለመቆም ዝግጁነቱን ያስታወቀ ሲኾን፤ ይቅርታን የሚያስተምሩን አባቶቻችን ራሳቸው ይቅር ተባብለው መልካም አርኣያነታቸውን ለእኛ ለልጆቻቸው እንዲያሳዩን እንፈልጋለን፤ ብሏል፡፡

የዶግማና የቀኖና ልዩነት ሳይኖር ሲኖዶሳዊ አንድነታችን የተከፈለበት አሳዛኝ ድርጊት፣ የቤተ ክርስቲያን አገልግሎት በሚፈለገው ደረጃ ላይ እንዳይደርስና ውጥረት የተመላበት እንዲኾን፣ ልማቷም እንዲጓተት ማድረጉን የጠቀሰው መግለጫው፤ ለአብነት መምህራንና ተማሪዎች መሰደድ፣ ለምእመናን ወደ መናፍቃን ጎራ መኮብለል፣ ለሕገ ወጥነትና ግለሰባዊነት መስፋፋት፣ ለቡድነኝነትና ጣልቃ ገብነት መስፈን ምቹ ኹኔታ መፍጠሩን ይልቁንም፣ በአስመሳይ አገልጋዮች የተሐድሶ ኑፋቄ መሰራጨትን በማስከተሉ፣ በቀደመ ታሪኳ ታላቅ በኾነችው ቤተ ክርስቲያናችን ላይ ጥቁር ነጥብ የጣለ ድርጊት እንደኾነ አስገንዝቧል፡፡

“የአንዲት፣ ቅድስት፣ ሐዋርያዊትና ዓለም አቀፋዊት ቤተ ክርስቲያናችን አባቶች በኾኑ ሊቃነ ጳጳሳት መካከል የተፈጠረው የልዩነት ግድግዳ ፈርሶ፣ ይቅርታን የሚያስተምሩን አባቶቻችን ራሳቸው ይቅር ተባብለው መልካም አርኣያነታቸውን ለእኛ ለልጆቻቸው እንዲያሳዩን እንፈልጋለን፤” ያለው ኅብረቱ፣ ይህም፣ ግራ የተጋቡትንና የተበታተኑት ምእመናን በፍቅር ለመሰብሰብ እንደሚያስችል እምነቱንና ተስፋውን ገልጿል፡፡

በሀገር ውስጥም በውጭም ያሉት ብፁዓን አባቶች ለዕርቀ ሰላም ጥሪው አዎንታዊ አቋም በመያዝ የተግባር እንቅስቃሴ ማድረጋቸው ኅብረቱ ምስጋናውን አቅርቧል፤ የተቀደሰውን ዓላማ ይዘው የተነሡ የዕርቀ ሰላም ኮሚቴ አባላትንም አድንቋል፤ ሒደቱን በተፈላጊው አገልግሎት ለመደገፍና ለዕርቀ ሰላሙ ከሚጥሩ አካላት ጎን ለመቆም ኅብረቱ እንደ አካል፣ አባል ማኅበራቱም እንደ ግል ዝግጁ መኾናቸውን አስታውቋል፡፡

የሀገርንና የሕዝብን ሰላም ለማረጋገጥ መንግሥት የሚያደርጋቸውን ጥረቶች እንደሚደግፍ የገለጸው ኅብረቱ፣ በተለይ ጠቅላይ ሚኒስትር ዐቢይ አሕመድ፣ የቤተ ክርስቲያናችንን ሲኖዶሳዊ አንድነት ለመመለስ ያሳዩትን ፍላጎት እንደሚያደንቅ ሳይጠቅስ አላለፈም፡፡ በሀገር ውስጥና በውጭ የሚገኙ ምእመናንም፣የተጀመረው የዕርቀ ሰላም ጥረት በምንም ምክንያት ወደ ኋላ እንዳይመለስ፣ በጸሎትም በሐሳብም የበኩላቸውን አስተዋፅኦ እንዲያደርጉ ጥሪውን አስተላልፏል፡፡

ሌሎች ተያያዥ ወቅታዊ ጉዳዮችን የዳሰሰው ይኸው ባለ8 ነጥብ የኅብረቱ የአቋም መግለጫ፡- ስለ ኢትዮጵያ እና ኤርትራ ኦርቶዶክሳውያን አኃት አብያተ ክርስቲያን ግንኙነት መጠናከር፤ የሊቢያ ሰማዕታት ዐፅማቸው ወደ ሀገር ቤት እንዲመለስና ሊደረግ ስለሚገባው ክብር፤ አድሏዊነትንና ብልሹ አሠራርን በሥር ነቀል ሲኖዶሳዊ ርምጃ ስለማስወገድና የአዲስ አበባ ሀገረ ስብከትን ጅምር የለውጥ ርምጃዎች እንዲሁም፣ የአገልግሎት ማኅበራት ለተጨባጭና ኹለንተናዊ ለውጥ በጋራ ዐቅደው እንዲሠሩ ያስተላለፋቸውን ጥሪዎች አካቷል፡፡


በትላንቱ የኢፌዴሪ ጠቅላይ ሚኒስትር የአሥመራ ጉብኝት፣ ኤርትራውያን ወገኖቻችን በድምቀት በመቀበል ፍቅራቸውን ለገለጹበት እጅግ ልብ የሚነካ ኹኔታ ኅብረቱ አክብሮቱን ገልጿል፡፡ ከ20 ዓመታት ልዩነት በኋላ የኹለቱን ሀገራትና ሕዝቦች ግንኙነት ለመመለስ መንግሥት ከሚያደርገው ጥረት ጎን ለጎን፣ አባቶቻችን ሊቃነ ጳጳሳትም፣ በኹለቱ አኃት አብያተ ክርስቲያናት መካከል ያለው ግንኙነት ተጠናክሮ የቤተ ክርስቲያንን አገልግሎት በጋራ በምናካሒድበት ኹኔታ ላይ ጉልሕ ድርሻ እንዲኖራቸው ጥሪውን አስተላልፏል፡፡

በሊቢያ በአይ ኤስ የሽብር ቡድን በጥይት ተደብድበውና በሰይፍ ተቀልተው ሰማዕትነትን የተቀበሉ ኢትዮጵያውያን አዕፅምት፣ እንደ ግብጻውያኑ ሰማዕታት፣ ተገቢውን ትኩረት አግኝተው ዐፅማቸው በሀገራቸው በክብር እንዲያርፍና እንደ ቤተ ክርስቲያን ሥርዐት ተገቢው መታሰቢያ እንዲደረግላቸው ኅብረቱ ጠይቋል፤ የድርሻውን ለመወጣትም ዝግጁ መኾኑን ገልጿል፡፡

በቤተ ክህነታችን መዋቅር የሚታየው አድሏዊነት፣ ሌብነትና ብልሹ አሠራር፣ የቤተ ክርስቲያናችንን አቋም እንደማይገልጽና ክብሯን እንደማይመጥን የገለጸው ኅብረቱ፣ ቅዱስ ሲኖዶስ፣ ሥር ነቀልና የማያዳግም የለውጥ ርምጃዎችን እንዲወስድ ጠይቋል፡፡ ከዚህም አንጻር፣ በቅርቡ በአዲስ አበባ ሀገረ ስብከት የተደረገውን የአመራር ለውጥ እንደሚደግፍና በሥራ አስኪያጁ የተነገሩ ተስፋዎች ተተግብረው ማየት እንደሚሻ ገልጿል፤ በሞያና በሚያስፈልገው ኹሉ ለመደገፍም ዝግጁነቱን አስታውቋል፡፡

Maheberat Hibret Reconciliation Meglecha

በተለያዩ መዋቅሮች የሚያገለግሉ ማኅበራት፣ ተጨባጭና ኹለንተናዊ ለውጥ ሊያመጡ የሚችሉት፣ የጋራ ዕቅድ ቀርፀው በመናበብ ሲሠሩ መኾኑን ያስገነዘበው መግለጫው፣ ለቤተ ክርስቲያን ዕድገት በአንድነት እንዲያገለግሉ ጥሪውን አስተላልፏል፡፡ የኢትዮጵያ ኦርቶዶክስ ተዋሕዶ ቤተ ክርስቲያን የመንፈሳዊ ማኅበራት ኅብረት፣ በቤተ ክርስቲያን መዋቅር ውስጥ ዕውቅና ተሰጥቷቸው የሚያገለግሉና በመቶ ሺሕዎች የሚቆጠሩ አባላት ያሉባቸውን ከመቶ በላይ መንፈሳውያን ማኅበራትን ያቀፈ ነው፡፡ 
‡‡‡‡‡‡‡‡‡‡‡

ለአንዲት ኦርቶዶክሳዊት ተዋሕዶ ቤተ ክርስቲያን አንድ ሲኖዶስ!

በኢትዮጵያ ኦርቶዶክስ ተዋሕዶ ቤተ ክርስቲያን የማኅበራት ኅብረት በቤተ ክርስቲያን አባቶች መካከል ስለሚካሄደው እርቀ ሰላምና ተያያዥ ጉዳዮች ላይ የተሰጠ መግለጫ

ቅዱስ ሲኖዶስ፣ ከቅዱሳን ሐዋርያት ጀምሮ የሊቃነ ጳጳሳት፤ የጳጳሳት እና የኤጲስ ቆጶሳት አንድነት ጉባኤ ነው፡፡ የዚህ መሠረቱ ደግሞ ጌታ በቅዱስ ወንጌል፣‹‹ከእናንተ ሁለቱ በምድር ላይ ስለሚለምኑት ነገር ሁሉ ቢተባበሩ በሰማያት ባለው አባቴ ዘንድ ይደረግላቸዋል ሁለት ወይም ሦስት በስሜ በሚሰባሰቡበት በዚያ በመካከላቸው እሆናለሁና፤›› (ማቴ 18፡19) የሚለው አምላካዊ ቃል ነው፡፡

የቅዱስ ሲኖዶስ መሠረታዊ ዓላማ፡-

• የቤተ ክርስቲያን ዶግማና ቀኖና መጠበቅና ሥርዓተ ቤተ ክርስቲያንን ማጽናት፤
• ምዕመናንን በመጠበቅ የእግዚአብሔር መንግሥት ወራሾች እንዲሆኑ ማብቃት (ዮሐ 21፡19)
• ቅድስት ቤተ ክርስቲያን የዲያብሎስን ውጊያ ተቋቁማ በመንፈስ ቅዱስ መሪነት ገድሏን እንድትፈጽም በፍቅር፣ በአንድነትና በትህትና በመቆም የቤተ ክርስቲያንን አንድነት መጠበቅ ነው፡፡

ይኹንና ላለፉት ሁለት ዐሥርት ዓመታት በስንዴው መካከል እንክርዳድ የሚዘራው ጠላት ዲያቢሎስ የኢ/ኦ/ተ/ቤተ ክርስቲያን የአስተዳደር አንድነትን በማፋለስ በአበው ሊቃነ ጳጳሳት መካከል ልዩነት በመፍጠር የዶግማና ቀኖና ልዩነት ሳይኖር ሲኖዶሱን እስከ መክፈል የደረሰ አሳዛኝ ተግባር መፈጸሙ መላውን ማኅበረ ምዕመናን ሲያሳዝን የኖረ ተግባር ከመሆኑም በላይ በቀደመ ታሪኳ ታላቅ በሆነችው ቤተ ክርስቲያናችን ላይ ጥቁር ነጥብ የጣለ ድርጊት ሆኖ በትውልድ የሚታወስ ነው፡፡

ይህ ተግባር የቤተ ክርስቲያን አገልግሎት በሚፈለገው ደረጃ ላይ እንዳይደርስ ፣ ቅሬታዎች እንዲነሡ፣ አገልግሎቷ ውጥረቶች የተሞሉበት እንዲሆንና ልማቷ እንዲጓተት ያደረገ ሲሆን የዚህ ውጤት ደግሞ የቤተ ክርስቲያን የእውቀት ምንጭ የሆኑት የአብነት ትምህርት ቤት መምህራንና ተማሪዎች መሰደድ፤ ምዕመናን ወደ መናፍቃን ጎራ መቀላቀል፤ ሕገ ወጥነትና ግለሰባዊነት እንዲስፋፋና የቡድን አመራርና ጣልቃ ገብነት እንዲሰፍን አድርጓል፡፡ ይባስ ብሎም በአስመሳይ አገልጋዮች የተሐድሶ ኑፋቄ መሰራጨትን አስከትሏል፡፡

በመሆኑም እኛ በቁጥር ከ100 በላይ የሆኑ ማኅበራትን የያዝን የኢ/ኦ/ተ/ የመንፈሳዊ ማኅበራት ኅብረት ሥራ አስፈጻሚዎች፣ በቤተ ክርስቲያን በተለያየ መዋቅር ውስጥ እውቅና ተሰጥቶን የምናገለግልና በመቶ ሺዎች የሚቆጠሩ በተለያየ ሞያ የተሠማሩ አባላትን የያዝን ሲሆን በቤተ ክርስቲያን እርቀ ሰላምና በተያያዥ ወቅታዊ ጉዳዮች ዙሪያ የሚከተለውን የአቋም መግለጫ አውጥተናል፡፡

1. በአንዲት፣ ቅድስት፣ ሐዋርያዊት እና ዓለም አቀፋዊት ቤተ ክርስቲያናችን ውስጥ ባሉ አባቶቻችን ሊቃነ ጳጳሳት መካከል የነበረው የልዩነት ግድግዳ ፈርሶ፣ ይቅርታን የሚያስተምሩን አባቶቻችን ራሳቸው ይቅር ተባብለው መልካም አርዓያነታቸውን ለእኛ ለልጆቻቸው እንዲያሳዩን እንፈልጋለን፡፡ ሰላምንና ይቅር መባባልን የሚሰብኩን አባቶቻችን እንዲሁም ደግሞ ራሳቸው በተግባር ኑረውት እንዲያሳዩን እኛ የመንፈስ ልጆቻቸው አጥብቀን እንሻለን፡፡ በአባቶቻችን ዕርቀ ሰላም ቀደም ሲል በተፈጠረው መለያየት ግራ የተጋቡትና የተበታተኑት ምዕመናን በፍቅር ለመሰብሰብ እንዲችሉ ትልቅ ተስፋ እንዳለው እናምናለን፡፡

2. በሀገር ውስጥም ሆነ በውጭ ያሉ አባቶች ይህን የእርቀ ሰላም ጥሪ ተቀብለው ተግባራዊ እንቅስቃሴ በመጀመራቸው ምስጋናችንን እናቀርባለን፡፡ ይህን የተቀደሰ ዓላማ ይዘው የተነሡ የዕርቀ ሰላም ኮሚቴ አባላትን እናደንቃለን፡፡ እኛም በቤተ ክርስቲያን በተለያየ መዋቅር አገልግሎት የምንሰጥ ማኅበራት አባላት በግልም እንደ ማኅበርም እንደ ቤተ ክርስቲያን ልጅነታችን የተጀመረው የዕርቀ ሰላም እንቅስቃሴ ከግብ እንዲደርስ በማንኛውንም አገልግሎት ለመደገፍና ለዕርቀ ሰላሙ ከሚጥሩ አካላት ጎን ለመቆም ዝግጁ መሆናችንን እንገልጻለን፡፡

3. ይህን የቤተ ክርስቲያን አንድነት ለመመለስና የሀገራችንን ሕዝቦች በሰላም መኖር ለማረጋገጥ የሚደረጉ ማንኛቸውንም ጥረቶች ሁሉ እንደግፋለን፤ መንግሥት ይልቁንም የኢፌዲሪ ጠቅላይ ሚኒስትር ክቡር ዶ/ር ዐቢይ አሕመድ በዚህ ረገድ እያሳዩ ያለውንም ፍላጎት እናደንቃለን፡፡

4. በኢትዮጵያና በኤርትራ መካከል በተፈጠረ አለመግባባት ለ20 ዓመታት ያህል ተለያይቶ የቆየውን የሁለቱ ሀገር ህዝቦች አንድ ለማድረግ እየተደረገ ያለውን ጉልህ እንቅስቃሴና ሐምሌ 1/2010 ዓ.ም በአስመራ ከተማ ላይ የኤርትራውያን ወገኖቻችን የኢፌዲሪ ጠቅላይ ሚኒስትር ክቡር ዶ/ር ዐቢይ አሕመድን በደማቅ ሁኔታ በመቀበል ለኢትዮጵያውያን ያላቸውን ፍቅር የገለጹበት መንገድ እጅግ ልብ የሚነካ በመሆኑ ያለንን አክብሮት በታላቅ ትሕትና እንገልጻለን፡፡ መንግሥት ከሚያደርገው ጥረት ጎን ለጎን በሁለቱም ሀገር ያሉ አባቶቻችንም ሊቃነ ጳጳሳትም በሁለቱ ሀገር ሕዝቦች መካከል የተጀመረው ግንኙነትና በሁለቱ አኃት አብያተ ክርስቲያናት መካከል ያለው ግንኙነት ተጠናክሮ የቤተ ክርስቲያንን አገልግሎት በጋራ በምናካሄድበት ሁኔታ ላይ ጉልህ ድርሻ እንዲኖራቸው ጥሪያችንን እናስተላልፋን፡፡

5. የኢትዮጵያ መንግሥትና የኢ/ኦ/ተ/ቤተ ክርስቲያን ቅዱስ ሲኖዶስ በሊቢያ ሰማእትነት የተቀበሉ ኢትዮጵያውያን እንደ ግብፅ ሰማእታት ተገቢውን ትኩረት አግኝተው ዐፅማቸው በሀገራቸው በክብር የሚያርፍበትና እንደ ቤተ ክርስቲያን ሥርዓት ተገቢው መታሰቢያ የሚደረግበት ሁኔታ እንዲኖር አበክረን ጥሪ እያስተላለፍን በዚህ ረገድ የማኅበራት ኅብረትን የድርሻውን ለመወጣት ዝግጁ መሆኑን ለመግለጽ ይወዳል፡፡

6. የቅድስት ቤተ ክርስቲያናችንን አቋምና አስተምህሮ በማይመጥን መልኩ የሚካሄዱትን አድሏዊነት፣ ሙስናና ብልሹ አሠራር ለማስወገድ ቋሚ ሲኖዶስና ቅዱስ አባታችን የጀመሩትን በተለይም በአዲስ አበባ ሀገረ ስብከት ውስጥ የተደረገውን ጅምር አስተዳደራዊ ለውጥ እንዲሁም የአዲስ አበባ ሀገረ ስብከት ሥራ አስኪያጅ የተናገሩትን ተስፋ ሰጪ ቃላት እንደግፋለን፡፡ በቀጣይም ከችግሮች ውስብስብነት አንጻር በአስተዳደር በኩል ያለውን ክፍተት አባቶቻችን በቅዱስ ሲኖዶስ መክረውበት የማያዳግም ሥር ነቀል ለውጥ እንደሚያመጡ የምናምን ሲሆን እኛ የኅብረቱ አባላት በሞያም ይሁን በሌላ አስፈላጊ በሆነ መልኩ ድጋፍ ለመስጠት ዝግጁ መሆናችንን እንገልጻለን፡፡

7. በአጠቃላይ በሀገር ውስጥና በውጭ ሀገር የሚገኙ የኢትዮጵያ ኦርቶዶክስ ተዋሕዶ በቤተ ክርስቲያን ምዕመናንም ይህ የተጀመረው የዕርቀ ሰላም ጥረት በምንም ምክንያት ወደኋላ እንዳይመለስ በጸሎትም በሐሳብም የበኩላቸውን አስተዋጽኦ እንዲያደርጉ ጥሪ እናስተላልፋለን፡፡

8. በዚሁ አጋጣሚ በቅድስት ቤተ ክርስቲያን ስም የተቋቋሙ የተለያዩ የአገልግሎት ማኅበራት ሁሉ የጋራ መናበብና ዕቅድ ኖሯቸው ተጨባጭ ለውጥ በሚያመጡበት ስልት ለሁለንተናዊ የቤተ ክርስቲያናችን እድገት በጋራ እንዲያገለግሉ ጥሪአችንን እናስተላልፋለን፡፡

ወስብሐት ለእግዚአብሔር

በኢ/ኦ/ተ/ቤተ ክርስቲያን የመንፈሳዊ
አገልግሎት ማኅበራት ኅብረት
ሐምሌ 2 ቀን 2010 ዓ.ም፣ አዲስ አበባ

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: