የቀሲስ ዶ/ር ምክረ ሥላሴ ገብረ ዐማኑኤል ሥርዐተ ቀብር ተፈጸመ፤ “ሓላፊነታቸውን የተወጡ ሙሉ አገልጋይና ታላቅ ሰው ነበሩ” – ፓትርያርኩ

Kesis Dr Mikre

  • ከቀዳማዊ ኃይለ ሥላሴ ዩኒቨርሲቲ፣ የረዳት ፕሮፌሰርነት ማዕርግ ተሰጥቷቸዋል፤
  • በመጽሐፍ ቅዱስ ማኅበር የትርጉም ኤክስፐርት አማካሪነት ለ25 ዓመት ሠርተዋል፤
  • ለዓለም አቀፉ የፍትሕ ጥምረትበሀገር ውስጥ አስተባባሪነት በመሥራት ላይ ነበሩ፤
  • አብያተ ክርስቲያናትን አሳንፀዋል፤ አሳድሰዋል፤ የአረጋውያን መጦርያ አሠርተዋል፤
  • ለእመቤታችን ታላቅ ፍቅር ነበራቸው፣ በሰንበት እና በበዓላት ከደጇ አይለዩም ነበር፤
  • የእመቤታችን ሕንፃ ቤተ ክርስቲያን ግንባታ እንዳይቋረጥ አደራየፍጻሜ ቃላቸው

†††

በተወለዱ በ88 ዓመታቸው፣ ትላንት ሚያዝያ 2 ቀን ያረፉት፣ የነገረ መለኰት ሊቁና የቤተ ክርስቲያን ታሪክ ምሁሩ፣ የቀሲስ ዶ/ር ምክረ ሥላሴ ገብረ ዐማኑኤል ሥርዐተ ቀብር ተፈጸመ፡፡

ዛሬ ረቡዕ፣ ሚያዝያ 3 ቀን 2010 ዓ.ም.፣ ብፁዕ ወቅዱስ ፓትርያርክ አቡነ ማትያስ፣ ብፁዓን ሊቃነ ጳጳሳት፤ የጠቅላይ ጽ/ቤት መምሪያዎችና ድርጅቶች፣ የአዲስ አበባ ሀገረ ስብከት ገዳማትና አድባራት ሓላፊዎችና ሠራተኞች፣ ያገለገሉባቸው አብያተ ክርስቲያናት ካህናትና ምእመናን፣ በሥራቸው የሚያውቋቸው ወዳጆቻቸውና ቤተ ሰዎቻቸው፣ በመንበረ ጸባኦት ቅድስት ሥላሴ ካቴድራል ተገኝተው ሥርዐተ ቀብራቸውን በማስፈጸም በከፍተኛ ሐዘን ሸኝተዋቸዋል፡፡

ለቤተሰዎቻቸውና ለወዳጆቻቸው፣እግዚአብሔር ጽናቱንና መረጋጋቱን ይስጣችሁ፤ ያሉት ብፁዕ ወቅዱስ ፓትርያርኩ፤ ቀሲስ ዶ/ር ምክረ ሥላሴ ገብረ ዐማኑኤል፣ ከቤተ ክርስቲያን ምሁራን ልጆች አንዱ እንደነበሩና ከልጅነት እስከ ዕለተ ዕረፍት፣ በክህነታቸውና በሞያቸው ረጅምና ብርቱ አገልግሎት የፈጸሙ “ደግና ታማኝ ገብርኄር” እንደኾኑ ቃል ወንጌሉን በመጥቀስ ተናግረዋል፡፡ ሓላፊነታቸውን የተወጡ ሙሉ አገልጋይና ታላቅ ሰው ናቸውና ዛሬ በሞተ ሥጋ ሲለዩን፣ ከዚህ ዓለም ድካምና መከራ ዐረፉ እንጅ ሞቱ የማይባል በመኾኑ፣ ዕረፍታቸው ክብራቸው ነው፤ “በጥቂቱ ታመነሃልና በብዙ እሾማሃለሁ” ከተባሉት የሚደመሩበት ጥሪ በመኾኑ፣ እግዚአብሔር በመንግሥቱ ይቀበላቸው ብለን ነው የምንሸኛቸው፤ ብለዋል፡፡

ለመርሐ ግብሩ የተዘጋጀውን ዜና ሕይወታቸውንና ሥራቸውን ከእንባ ጋራ በንባብ ያሰሙት የሥርዐተ ትምህርት ከፍተኛ ባለሞያው ቀሲስ መምህር ሰሎሞን ወንድሙ፤በዛሬው ዕለት የሸኘናቸው ታላቁ የነገረ መለኰት ምሁርና የቤተ ክርስቲያናችን አገልጋይ፣ ቀሲስ ዶ/ር ምክረ ሥላሴ ገብረ ዐማኑኤል በዕረፍተ ሥጋ ከዚህ ዓለም ስለተለዩን፣“አንድ ትልቅ የቤተ ክርስቲያንና የሀገር ቅርስ እንደጠፋ ስለምንቆጥረው ሐዘናችን የከፋ ነው፤” ብለዋል፡፡

ከብፁዕ አቡነ ቴዎፍሎስ ሥልጣነ ቅስናን የተቀበሉት ቀሲስ ዶ/ር ምክረ ሥላሴ፣ በቤተ ክርስቲያናችን የአብነት ትምህርት በገበዩት ቅኔና የጸዋትወ ዜማ፣ በመዘምርነት አገልግለዋል፡፡ በግሪክ፣ በአሜሪካ እና በእንግሊዝ ዩኒቨርሲቲዎች፥ ነገረ መለኰትን፣ የግሪክንና የዕብራይስጥ ቋንቋዎችን እንዲሁም እስከ ዶክትሬት ዲግሪ ባጠኑት የቤተ ክርስቲያንን ታሪክ ሞያቸው፤ ከመንፈሳዊ ኮሌጅ መምህርነት አንሥቶ በምክትል ዲንነት፣በኋላም በአዲስ አበባ ዩኒቨርሲቲ የፕሬስ መምሪያ ተባባሪ አርታዒነት፤ በዓለም አቀፉ የተባበሩት የመጽሐፍ ቅዱስ ማኅበር ለምሥራቅ አፍሪቃ የትርጉም ሥራ ኤክስፐርት አማካሪ ኹነው ጡረታ እስከ ወጡበት እስከ 1999 ዓ.ም. ድረስ ለ25 ዓመታት ሲሠሩ እንደቆዩ በዜና ሕይወታቸው ተገልጿል፡፡

በዓለም አብያተ ክርስቲያናት እና በመላው አፍሪቃ አብያተ ክርስቲያናት ምክር ቤቶች በልዩ ልዩ ኮሚሽኖች በአባልነት መሥራታቸውንና በሊቀ መንበርነት መምራታቸውን፤ የኢትዮጵያ መጽሐፍ ቅዱስ ማኅበር በቦርድ አባልነትና በምክትል ሊቀ መንበርነት ለአምስት ዓመታት ማገልገላቸውን ዜና ሕይወታቸው አትቷል፡፡

በዘመናዊ ትምህርት ባሳዩት ጉብዝና፣ ከግርማዊ ንጉሠ ነገሥት ቀዳማዊ ዐፄ ኃይለ ሥላሴ በተደጋጋሚ ለመሸለም ከመብቃታቸው በተጨማሪ፣ ባደረጉት ጥናትና ምርምር መሠረት በቀዳማዊ ኃይለ ሥላሴ ዩኒቨርሲቲ የረዳት ፕሮፌሰርነት ማዕርግ ተሰጥቷቸዋል፤ ለኅትመት ካደረሷቸውና ካበቋቸው መጻሕፍትም አራት ያህሉ ተዘርዝረዋል፡፡

ምሁሩ፣ በሞያቸውና በአስተዳደር ሓላፊነት በብሔራዊ እና በዓለም አቀፍ ደረጃ ከአከናወኗቸው ተግባራት ባሻገር በበጎ ፈቃድም፣ ለብዙዎች መካሪና አስተማሪ፣ ቤተ ክርስቲያንን በገንዘባቸውና በዕውቀታቸው ያገለገሉ መንፈሳዊና የዋህ አባት እንደነበሩ ተወስቷል፡፡

የአረጋውያን መጦሪያ አሠርተዋል፤ ጥቂት የማይባሉ አብያተ ክርስቲያንን አሳንፀዋል፤ እንዲታደሱም አድርገዋል፡፡ ከእኒህም አንዱ እስከ ኅልፈታቸው የኖሩበትና በሰበካ ጉባኤ ምክትል ሊቀ መንበርነት ያገለገሉበት የሐያት ደብረ በረከት ቅድስት ማርያም ቤተ ክርስቲያን ሲኾን፤ ለእመቤታችን ቅድስት ድንግል ማርያም በነበራቸው ታላቅ ፍቅርም፣ ዘወትር በሰንበት እንዲሁም በበዓላት ቀን ከደጇ አይለዩም ነበር፡፡

ሕንፃ ቤተ ክርስቲያኑ ተጠናቆ ለማየት ከነበራቸው ጉጉት የተነሣ፣ ግንባታቸው የደረሰበትን ደረጃ በየጊዜው በቅርበት እየተገኙ ይከታተሉ ነበር፡፡ በሕመማቸው ወቅት በቅርብ የሚያውቋቸውን አባቶች አስጠርተው፣ “የእመቤታችን ሕንፃ ቤተ ክርስቲያን ግንባታ አደራ፤ እንዳይቋረጥ፤ በቅርበት ተከታትላችሁ ከፍጻሜ እንዲደርስ አድርጉ፤ አደራ፤ አደራ፤ አደራ” በማለት አስረክበዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ በሥርዐተ ተክሊልና ቅዱስ ቊርባን ካገቧቸው ባለቤታቸው ወ/ሮ ዕፀ ገነት ድረስ፣ አንድ ወንድ ልጅ ወልደው ለቁም ነገር አብቅተዋል፡፡ በተጨማሪም በርካታ ልጆችን አስተምረው ለታላቅ ደረጃ አድርሰዋል፡፡

ልዑል እግዚአብሔር፣ የቀሲስ ዶ/ር ምክረ ሥላሴ ገብረ ዐማኑኤልን ነፍስ፣ ከቅዱሳን አንድነት ይደምርልን፡፡ ኦ እግዚኦ አዕርፍ ነፍሰ አቡነ ምክረ ሥላሴ፡፡ ለቤተሰቦቻቸውና ለወዳጆቻቸው መጽናናትን ይስጥልን፡፡ አሜን፡፡

‡‡‡‡‡‡‡‡‡‡‡‡‡‡‡‡‡‡

የቀሲስ ዶ/ር ምክረ ሥላሴ ገብረ ዐማኑኤል አጭር የሕይወት ታሪክ

Dr Mikre Silassie Gebra Ama

በዛሬው ዕለት የምንሸኛቸው ታላቁ የነገረ መለኰት ምሁርና የቤተ ክርስቲያናችን አገልጋይ፣ ቀሲስ ዶ/ር ምክረ ሥላሴ ገብረ ዐማኑኤል ይባላሉ፡፡ ቀሲስ ዶ/ር ምክረ ሥላሴ ገብረ ዐማኑኤል፣ በዕረፍተ ሥጋ፣ ከዚህ ዓለም በሥጋ ስለተለዩን፣ አንድ ትልቅ የቤተ ክርስቲያንና የሀገር ቅርስ እንደጠፋ ስለምንቆጥረው ሐዘናችን የከፋ ነው፡፡

ቀሲስ ዶ/ር ምክረ ሥላሴ ገብረ ዐማኑኤል፣ ከአባታቸው ከቄሰ ገበዝ ገብረ ዐማኑኤል እንዳልካቸው እና ከእናታቸው ወ/ሮ ማዘንጊያ ገብረ ሥላሴ ባዩ፣ ዛሬ በነፋስ ስልክ ላፍቶ ክፍለ ከተማ በሚገኘውና ቀድሞ ፉሪ ፈረስ ማሰሪያ ይባል በነበረ ቦታ፣ ጥር 7 ቀን 1923 ዓ.ም. ተወለዱ፡፡

አባታቸው ቄሰ ገበዝ ገብረ ዐማኑኤል እንዳልካቸው፣ አጐታቸውን መምሬ ዘቁስቋምን ተከትለው ወደ አዲስ አበባ በመምጣት በመንበረ መንግሥት(ግቢ) ቅዱስ ገብርኤል ገዳም ተመድበው ያገለግሉ ነበር፡፡ ቀሲስ ዶ/ር ምክረ ሥላሴ ገብረ ዐማኑኤልም ከወላጆቻቸው ሳይለዩ በፉሪ ጽርሐ ንግሥት ቅድስት ሐና ቤተ ክርስቲያን፣ የደብሩ አስተዳዳሪ ከነበሩት ከመምህር ገብረ ጻድቅ እና ከመሪጌታ ገብረ ሚካኤል፣ በኋላም ከግራ ጌታ ወልደ ሐና ዘንድ የንባብና የመጀመሪያ ዜማ ትምህርታቸውን ተምረዋል፡፡ በመቀጠልም በታዕካ ነገሥት በኣታ ለማርያም ገዳም የአብነት ት/ቤት ገብተው በመማር ጸዋትወ ዜማ ማለት ጾመ ድጓ፣ ድጓ እና ምዕራፍ አጠናቅቀው ተምረዋል፡፡

በ1941 ዓ.ም. ወደ ደብር ቅዱስ ደብረ ጽጌ ማርያም ገዳም ሔደው ከታወቁት የቅኔ መምህር ከአለቃ( በኋላ መልአከ አርያም) ይትባረክ መርሻ ዘንድ ቅኔ ከነአገባቡ ተምረዋል፡፡ በተማሩትም የጸዋትወ ዜማ እና የቅኔ ሞያ በመንበረ መንግሥት ቅዱስ ገብርኤል ገዳም በመዘምርነት ሲያገለግሉ ቆይተዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ ከቅኔ ትምህርት ቤት ከተመለሱ በኋላ በ1943 ዓ.ም. ወደ ቅድስት ሥላሴ መንፈሳዊ ት/ቤት ገብተው የአንደኛ እና የኹለተኛ ደረጃ ትምህርታቸውን በ1950 ዓ.ም. አጠናቀዋል፡፡ በአንደኛ እና በኹለተኛ ደረጃ ት/ቤቶች በሚማሩበት ወቅት፣ በትምህርታቸው አንደኛ ይወጡ ስለነበር ከግርማዊ ንጉሠ ነገሥት ቀዳማዊ ዐፄ ኃይለ ሥላሴ ዘንድ ሦስት ጊዜ የወርቅ ብዕሮችንና የተለያዩ መጻሕፍትን ተሸልመዋል፡፡ የኹለተኛ ደረጃ ትምህርታቸውን እንደጨረሱም ለከፍተኛ ዘመናዊና መንፈሳዊ ትምህርት ወደ ግሪክ ተልከው በአቴንስ ብሔራዊ ዩኒቨርሲቲ ከመደበኛው የነገረ መለኰት ትምህርት በተጨማሪ የግሪክኛ የዕብራይስጥ ቋንቋዎችን አጥንተዋል፡፡

በ1955 ዓ.ም.፣ ከአቴንስ ዩኒቨርሲቲ ትምህርታቸውን በከፍተኛ ማዕርግ በማጠናቀቅ በነገረ መለኰት የመጀመሪያ ዲግሪያቸውን(Bachelor of Divinity) አግኝተዋል፡፡ በማስከተልም ከአሜሪካው ዬል ዩኒቨርሲቲ የድኅረ ምረቃ ትምህርት ስኮላርሽፕ አግኝተው ከፍተኛ ትምህርታቸውን በመቀጠል፣ በአንድ ዓመት በቤተ ክርስቲያን ታሪክ የማስትሬት ዲግሪአቸውን አግኝተዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ በቅድስት ሥላሴ መንፈሳዊ ኮሌጅ 8 ዓመት በመምህርነትና በአካዳሚ አስተዳደር አገልግለዋል፡፡ በ1965 ዓ.ም. በቀዳማዊ ኃይለ ሥላሴ ዩኒቨርሲቲ ለሦስተኛ ዲግሪ ወደ እንግሊዝ አገር ተልከው፣ በ1969 ዓ.ም. ከአበርዲን በታሪክ ትምህርት የዶክትሬት ዲግሪያቸውን አግኝተዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ በቀድሞው የቀዳማዊ ኃይለ ሥላሴ ዩኒቨርሲቲ ሥር ይተዳደር በነበረው በቅድስት ሥላሴ መንፈሳዊ ኮሌጅ፡- ጠቅላላ የቤተ ክርስቲያን ታሪክ፣ የሐዲስ ኪዳንና የግሪክኛ ቋንቋ መምህር ኾነው አገልግለዋል፡፡ የነገረ መለኰት ምሁሩ ባደረጉት ጥናትና ምርምር መሠረት በቀዳማዊ ኃይለ ሥላሴ ዩኒቨርሲቲ የረዳት ፕሮፌሰርነት ማዕርግ ተሰጥቷቸዋል፤ የኮሌጁም ምክትል ዲን ኹነው ተሾመዋል፡፡

በቅድስት ሥላሴ መንፈሳዊ ኮሌጅ በሚያስተምሩበት ወቅት፣ ከጀግናው ደጃዝማች ድረስ ሺፈራው ልጅ ከወ/ሮ ዕፀገነት ድረስ ጋራ በመንበረ መንግሥት ቅዱስ ገብርኤል ገዳም፣ በብፁዕ አቡነ ቴዎፍሎስ ጸሎተ ቡራኬ፣ በሥርዐተ ተክሊል እና ቅዱስ ቊርባን ጋብቻ ፈጽመዋል፡፡ ጋብቻቸውንም እንዲፈጽሙ ያስተምሯቸው ለነበሩት የመንፈሳዊ ኮሌጅ ተማሪዎች አርኣያ ለመኾን፣ ከብፁዕ አቡነ ቴዎፍሎስ እጅ ሥልጣነ ክህነት ተቀብለዋል፡፡

ብፁዕ ወቅዱስ አቡነ ቴዎፍሎስ ቤተ ክርስቲያንን ለማሻሻል በነበራቸው ጽኑ ፍላጎት መሠረት፣ ቀሲስ ዶ/ር ምክረ ገብረ ዐማኑኤልን፣ የመንበረ ፓትርያርክ ቅድስተ ቅዱሳን ማርያም ገዳም አስተዳዳሪ አድርገው ሾመዋቸው ነበር፡፡ ለዶክትሬት ትምህርት ወደ ውጭ አገር እስከ ሔዱ ድረስ፣ በመንበረ ፓትርያርክ ቅድስተ ቅዱሳን ማርያም ገዳም፣ በአስተዳዳሪነት ሲያገለግሉና ሲያስገለግሉ ቆይተዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ የዶክትሬት ዲግሪያቸውን አግኝተው ወደ ውድ አገራቸው ሲመለሱ፣ በኢትዮጵያ በተከሠተው የፖሊቲካ ለውጥ የተነሣ፣ የቅድስት ሥላሴ መንፈሳዊ ኮሌጅ እንዲዘጋ ተወስኖ ስለነበር፣ እርሳቸው የዩኒቨርሲቲው ፕሬስ(የሥነ ጽሑፍ ክፍል) ተባባሪ የመጽሐፍ አርታዒ(Associate Editor) ኾነው ተመድበው ሠርተዋል፡፡

ከዚያም የጠቅላይ ቤተ ክህነት ጠቅላይ ሥራ አስኪያጅ ኾነው እንዲሠሩ በመንግሥት ተሹመዋል፡፡ በሥራ አስኪያጅነትም ለአንድ ዓመት ከሦስት ወር ከሠሩ በኋላ፣ ወደ አዲስ አበባ ዩኒቨርሲቲ ተመልሰው የዩኒቨርሲቲው ፕሬስ መምሪያ ተባባሪ የመጽሐፍ አርታዒ( Associate Editor) ኾነው ሠርተዋል፡፡ ይኹንና ምድብ ሥራቸው ከትምህርታቸውና ከእምነታቸው ጋራ ተቃራኒ ኹኖ ስላገኙትም በሥራቸው ደስተኛ አልነበሩም፡፡ ስለዚህም ለእምነታቸውና ለትምህርታቸው ተስማሚ ሥራ እንዲሰጣቸው ለፈጣሪያቸው በጸሎት ያመለክቱ ነበር፡፡

ልዑል እግዚአብሔር ጸሎታቸውን ሰምቷቸው፣ በዓለም አቀፉ የተባበሩት የመጽሐፍ ቅዱስ ማኅበር ለምሥራቅ አፍሪቃ የትርጉም ሥራ ኤክስፐርት አማካሪ ኹነው የሚሠሩበት ኹኔታ ስላገኙ፣ የቀረበላቸውን ጥሪ በደስታ ተቀብለው ሥራውን ጀምረዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ የነገረ መለኰት ሊቅ፣ መጽሐፍ ቅዱስ የተጻፈባቸውን የግሪክኛ እና የዕብራይስጥ ቋንቋዎችን አጣርተው የሚያውቁ ምሁር በመኾናቸው ሥራቸውን ለመጀመር ወደ ኬንያ-ናይሮቢ ሔደዋል፡፡ በዚያም በዓለም አቀፉ የተባበሩት የመጽሐፍ ቅዱስ ማኅበር ለምሥራቅ አፍሪቃ የትርጉም ሥራ ኤክስፐርት አማካሪ ኹነው ጡረታ እስከ ወጡበት እስከ 1999 ዓ.ም. ድረስ ለ25 ዓመታት ሲሠሩ ቆይተዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ በነበራቸው ዕውቀትና ታዋቂነት፣ በተለያዩ ዓለም አቀፍ ድርጅቶች አባል በመኾን የበጎ ፈቃድ አገልግሎት ፈጽመዋል፡፡ ለአብነት ያህል፡-

  1. ከ1960 እስከ 1968 ዓ.ም.፣ በዓለም አብያተ ክርስቲያናት ማኅበር፣ የዓለም ሐዋርያዊ እና የወንጌል ተልእኮ ኮሚሽን አባል(Commission on World Mission and Evangelism)
  2. ከ1961 እስከ 1966 ዓ.ም.፣ በመላ አፍሪቃ አብያተ ክርስቲያናት ማኅበር፣ በኢትዮጵያ የከተማና የኢንዱስትሪ ሐዋርያዊ አገልግሎት ኮሚሽን(Urban and Industrial Mission of AACC) በአባልነትና በሊቀ መንበርነት፤
  3. ከ1970 እስከ 1974 ዓ.ም.፣ የኢትዮጵያ መጽሐፍ ቅዱስ ማኅበር በቦርድ አባልነትና በምክትል ሊቀ መንበርነት፤
  4. ከ1983 ዓ.ም. ጀምሮ፣ የዓለም የቅዱሳት መጻሕፍት ሥነ ጽሑፍ ማኅበር በአባልነት አገልግለዋል፤
  5. በመንበረ መንግሥት ቅዱስ ገብርኤል ገዳም፣ በዓምደ ሃይማኖት የሰንበት ት/ቤት እየተገኙም ወጣቶችን ያስተምሩ ነበር፡፡
  6. በፋሽስት ጣልያን ወረራ ወቅት የሮም ቤተ ክርስቲያን ላደረግችው ድጋፍ፣ የኢጣልያ መንግሥት ኢትዮጵያን ይቅርታ እንዲጠይቅና እንዲክስ፣ በዓለም አቀፍ ደረጃ ለተጀመረው እንቅስቃሴ በሀገር ውስጥ አስተባባሪነት በመሥራት ላይ ነበሩ፡፡

በተለያዩ ጊዜያት በማኅበረ ቅዱሳን ጥናትና ምርምር ማእከል በተዘጋጀው መድረክ ተገኝተው የተለያዩ ጥናቶችን በማቅረብ ወጣቶችን ያስተምሩ ነበር፡፡

ቀሲስ ዶ/ር ምክረ ሥላሴ ገብረ ዐማኑኤል፣ ይማሩባቸውና ያስተምሩባቸው በነበሩት ከፍተኛ የትምህርት ተቋማት፣ የተለያዩ መጻሕፍትን በአማርኛ እና በእንግሊዝኛ ቋንቋዎች አዘጋጅተዋል፡፡ ለአብነት ያህልም፡-

  • በ1964 ዓ.ም.፣ Cyril and Methodius and the Slavonic MIssion(ቄርሎስ እና ሜቶድዮስ በስላቭ አገሮች የፈጸሙት ሐዋርያዊ አገልግሎት)(ያልታተመ)፤
  • Western Christian Missions in Ethiopia since the 16th century(የምዕራብ አገሮች ሚስዮናውያን በኢትዮጵያ ከ16ኛው መ/ክ/ዘ ጀምሮ)(ያልታተመ በእንግሊዝኛ ቋንቋ)
  • በ1969 ዓ.ም.፣ Church and Missions in Ethiopia in Relation to the Ethio-Italian War and the Italian Occupation of Ethiopia and the Second World War(PhD thesis,1976) later published as Church and Missions in Ethiopia during the Italian Occupation(ቤተ ክርስቲያንና ሚስዮናውያን በኢትዮጵያ እና በኢጣልያ ጦርነት ጊዜና በኢጣልያ ወረራ ጊዜ እንዲሁም በኹለተኛው የዓለም ጦርነት)(ያልታተመና በእንግሊዝኛ ቋንቋ ለዶክትሬት ዲግሪ የቀረበ መጽሐፍ)
  • በ2000 ዓ.ም.፣ በኢትዮጵያ የመጀመሪያው የመጽሐፍ ቅዱስ ትርጉም በግእዝ ቋንቋ በአማርኛ እና በእንግሊዝኛ ይጠቀሳሉ፡፡

ቀሲስ ዶ/ር ምክረ ሥላሴ ገብረ ዐማኑኤል፣ የደብረ ጽጌ ቅድስት ማርያም ገዳም ቤተ ክርስቲያን ሙሉ እድሳት እንዲደረግለት እንዲሁም የአረጋውያን መጦርያ እንዲሠራለት፣ በኮሚቴ አባልነት መመሪያ በመስጠትና የገንዘብ ድጋፍ በማድረግ አስተዋፅኦ አበርክተዋል፡፡ በተጨማሪም፣ ቤተሰቦቻቸውን በማስተባበርና ገንዘብ በመስጠት በቡልጋ አውራጃ በጠራ ወረዳ ልዩ ስሙ እረገት ማርያም የተባለችዋን ቤተ ክርስቲያን ሙሉ እድሳት እንዲደረግላት አድርገዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ በሚኖሩበት በሐያት መንደር አቅራቢያ፣ የሐያት ደብረ በረከት ቅድስት ማርያም (ገመናዬ ማርያም) ቤተ ክርስቲያን ከተተከለችበት ጊዜ ጀምሮ በነበራቸው ከፍተኛ ጉጉት፣ በርካታ መንፈሳዊ ተግባራትን ሲያከናውኑ ቆይተዋል፡፡ የቤተ ክርስቲያኗ መቃኞ ቤት በዘመናዊ ዐቅድ እንዲታነፅ፤ የዋናውም ቤተ ክርስቲያን ግንባታ በፍጥነት እንዲከናወን ባለሞያዎችን በማበረታታትና ምእመናንን በማስተባበር፣ በገንዘባቸውና በዕውቀታቸው ከፍተኛ ድጋፍ አድርገዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ የሐያት ደብረ በረከት ቅድስት ማርያም ቤተ ክርስቲያን የሰበካ ጉባኤ ምክትል ሊቀ መንበር በመኾን አገልግለዋል፡፡ ለእመቤታችን ቅድስት ድንግል ማርያም በነበራቸው ታላቅ ፍቅርም፣ ዘወትር በሰንበት እንዲሁም በበዓላት ቀን ከደጇ አይለዩም ነበር፡፡ ሕንፃ ቤተ ክርስቲያኑ ተጠናቆ ለማየት ከነበራቸው ጉጉት የተነሣ፣ ግንባታቸው የደረሰበትን ደረጃ በየጊዜው በቅርበት እየተገኙ ይከታተሉ ነበር፡፡ በሕመማቸው ወቅት በቅርብ የሚያውቋቸውን አባቶች አስጠርተው፣ የእመቤታችን ሕንፃ ቤተ ክርስቲያን ግንባታ አደራ፤ እንዳይቋረጥ፤ በቅርበት ተከታትላችሁ ከፍጻሜ እንዲደርስ አድርጉ፤ አደራ፤ አደራ፤ አደራ በማለት አስረክበዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ ለብዙዎች መካሪና አስተማሪ፣ ቤተ ክርስቲያንን በገንዘባቸውና በዕውቀታቸው ያገለገሉ መንፈሳዊ እና የዋህ አባት ነበሩ፡፡

ከባለቤታቸው ከወ/ሮ ዕፀ ገነት ድረስ ጋራ የተረጋጋ ቤተሰብ መሥርተው፣ አንድ ወንድ ልጅ ወልደው አሳድገው ለቁም ነገር አብቅተዋል፡፡ በተጨማሪም በርካታ ልጆችን አስተምረው ለታላቅ ደረጃ አድርሰዋል፡፡

ቀሲስ ዶ/ር ምክረ ሥላሴ ገብረ ዐማኑኤል፣ በአደረባቸው ሕመም፣ በጸሎትና በሕክምና ሲረዱ ቆይተው ክርስቶስ ተሰቅሎ፣ ተቀብሮ በትንሣኤው ዓለምን ባዳነበት በዓለ ትንሣኤ ማግሥት፣ ማክሰኞ፣ ሚያዝያ 2 ቀን 2010 ዓ.ም. በተወለዱ በ88 ዓመታቸው በዕረፍተ ሥጋ ተለይተውናል፡፡

ልዑል እግዚአብሔር፣ የአባታችንን የቀሲስ ዶ/ር ምክረ ሥላሴ ገብረ ዐማኑኤልን ነፍስ፣ ከቅዱሳን አንድነት ይደምርልን፡፡ ኦ እግዚኦ አዕርፍ ነፍሰ አቡነ ምክረ ሥላሴ፡፡

የአባታችንን የቀሲስ ዶ/ር ምክረ ሥላሴ ገብረ ዐማኑኤልን ሥርዐተ ቀብር ለማስፈጸም ከተለያየ ቦታ የመጣችሁ አባቶች፣ ዘመድ ወዳጆችና የአጥቢያችን ምእመናንና ምእመናናት፤ እግዚአብሔር ዋጋችሁን ይክፈላችሁ፤ ያክብራችሁ፡፡ ለቤተሰቦቻቸውና ለወዳጆቻቸው መጽናናትን ይስጥልን፡፡ አሜን፡፡

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: