ዝክረ መስቀል በሀገረ መስቀል ኢትዮጵያ

  • በዓመት ለ5 ጊዜ በዐደባባይ ትዘክረዋለች፤ ታከብረዋለች፤ በመስከረም ብቻ ለ4 ጊዜ ይከበራል
  • “መስቀለ ኢየሱስ፣ መስቀለ ክርስቶስ፣ መስቀል ክብራ” እያለች ገዳማትና አብያተ ክርስቲያናት
  • ወንዱ፥ ወልደ መስቀል፣ ገብረ መስቀል፣ ኃይለ መስቀል፣ ብርሃነ መስቀል በመባል፤
  • ሴቷን፥ ወለተ መስቀል፣ አመተ መስቀል በማለት በመስቀል ስም እየሰየመ፤
  • በግንባሩ መስቀል ያለበትን በሬ/ወይፈን – መስቀል፤ ላሟን/ጊደሯን – መስቀሌ
  • በየዓመቱም “የመስቀል ወፍ” አለች
  • የዓዲግራት ሰማይ ጠቀስ የመስቀል ተከላ
  • የመቐለ 52 ሜ. ከፍታ መዘክረ መስቀል

†††

(መጋቤ ምሥጢር ወልደ ሩፋኤል ፈታሒ፤ መስከረም ፲፮ ቀን ፳፻፲ ዓ.ም.)

ሀገራችን ኢትዮጵያ፣ በዘመኑ ፍጻሜ ከሦስቱ አካላት አንዱ አካል እግዚአብሔር ወልድ፣ ከሰማየ ሰማያት ወርዶ ከቅድስት ድንግል ማርያም ተወልዶ፣ ስለ ሰው ልጆች ኃጢአት ተሰቅሎ በመሞት በክቡር ደሙ ዓለምን ለዋጀበትና ለመላው የሰው ዘር ሰላምን ላደረገበት ለመስቀል የምትሰጠው ክብርና ልዕልና ከሌላው ዓለም የላቀና የተለየ ነው፡፡ ከቀደሙት የሀገሪቱ መሪዎች እነ ዐፄ ዳዊት ከኢየሩሳሌም የመጣውን ግማደ መስቀሉን ከእስክንድርያ ለማምጣት ስናር ላይ ተሠውተውበታል፡፡ የግብጽ ሡልጣኖች በመስቀሉ ፈንታ በ፲፪ እልፍ ወቄት ወርቅ ሊደልሏቸው ቢሞክሩም ለሀገራቸው ሰላም፣ በረከትና ጤንነት ሲሉ መስቀሉን ነው የመረጡት፡፡

በኋላም ልጃቸው ዐፄ ዘርዐ ያዕቆብ በነገሡ ጊዜ የአባታቸውን ክርስቲያናዊ ፈለግ በመከተል፣ ስናር ላይ የነበረውን ግማደ መስቀል ከአባታቸው ከዐፄ ዳዊት ዐፅም ጋራ ወደ ኢትዮጵያ አምጥተው፣ “አንብር መስቀልየ በዲበ መስቀል” ማለት “መስቀሌን በመስቀለኛ ቦታ ላይ አስቀምጥ” የሚለውን በራእይ የተነገረውን አምላካዊ ቃል በተግባር በመተርጐም በተፈጥሮ አቀማመጧ የመስቀል ቅርፅ ባላት በግሸን ደብረ ከርቤ ተራራ ላይ ቤተ ክርስቲያን አሳንፀው እንዲሠለስብት፣ እንዲቀደስበት አድርገው አስቀምጠውበታል፡፡ ከዚያም ወዲህ እስከ ፲፱፻፷፮ ዓ.ም. ድረስ የተነሡት የሀገሪቱ መሪዎችና ሕዝቦች ለመስቀሉ የሚሰጡት ክብርና ልዕልና እጅግ በጣም ከፍ ያለ ነበር፡፡

በየዓመቱ መስከረም ፲፮ እና ፲፯ ቀን የሚከበረው የመስቀል ደመራ በዓል፣ መላው የኢትዮጵያ ሕዝብ ከልሂቅ እስከ ደቂቅ በሚገኝበት በመላ ኢትዮጵያ አስደናቂ በኾነ ድምቀት ይከበራል፡፡ በተለይ በዐዲስ አበባ፣ በርእሰ አድባራት ወገዳማት አኵስም ጽዮን፣ በቅዱስ ላሊበላ እና በጎንደር የሀገሪቱ መሪዎች፣ የየክልሉ ባለሥልጣናትና ዓለም አቀፍ የሀገር ጎብኚዎች በሚገኙበት፣ ሕዝቡ በነቂስ ወጥቶ እጅግ በሚያስገርምና በሚያስደምም ኹኔታ ነው ሲያከብረው የኖረው፡፡ በይበልጥም በዐዲስ አበባ የሚከበረው የመስቀል ደመራ በዓል፣ የሀገሪቱ የጦር ኃይልም የኃይሉን መጠን የሚለካበትና የሚያሳይበት ልዩ በዓል ነበር፡፡ የሚገርመው፣ የስድስት ኪሎ አንበሶችም ጭምር ሳይቀሩ ከጦር ኃይሉ ጋራ አብረው ያከብሩት ነበር፡፡

ሀገራችን ኢትዮጵያ፣ የጌታችን የመድኃኒታችን የኢየሱስ ክርስቶስ መስቀል፣ በቤተ ክርስቲያን አማካይነት በዓመት ውስጥ ለአምስት ጊዜያት ያኽል በዐደባባይ ትዘክረዋለች፤ ታከብረዋለች፡፡ በመስከረም ወር ብቻ ለዐራት ጊዜ ያኸል ይከበራል፡፡ መስከረም ፲ ቀን፦ ዐፄ ዘርዐ ያዕቆብ ከስናር ወደ ኢትዮጵያ ያስገቡበት ዕለት ከ፲፱፻፷፮ ዓ.ም. በፊት የዐፄ መስቀል በዓል ተብሎ በቤተ መንግሥት በታላቅ ሥነ ሥርዓት ይከበር ነበር፡፡ ከ፲፱፻፷፮ ዓ.ም. ወዲህ ግን በቤተ ክርስቲያን ብቻ ይከበራል፡፡ መስከረም ፲፮ ቀን፦ ንግሥት ዕሌኒ በዕጣን ጢስ አመልካችነት አስቈፍራ ከተቀበረበት ያስወጣችበት የመታሰቢያ ዕለት የደመራ በዓል ተብሎ በዐደባባይ ሕዝበ ክርስቲያን በሚገኙበት በመላ ኢትዮጵያ በታላቅ ድምቀት ይከበራል፡፡

በማግስቱ መስከረም ፲፯ ቀንም፣ ቅዳሴ ቤቱ በዝማሬ፣ በማሕሌት፣ በሥርዐተ ንግሥ በቤተ ክርስቲያን ይከበራል፡፡ መስከረም ፳፩ ቀን ደግሞ፣ ግሸን ደብረ ከርቤ ማርያም የገባበት ዕለት፣ ስፍር ቁጥር የሌለው ሕዝበ ክርስቲያንና በርካታ ዓለም አቀፍ የሀገር ጐብኚዎች በሚገኙበት በግሸን ደብረ ከርቤ ማርያም በታላቅ በዓለ ንግሥ ይከበራል፡፡ መጋቢት ፲ ቀንም፣ ንግሥት ዕሌኒ በመጀመሪያ መስቀሉን ያገኘችበት ዕለት በውዳሴ፣ በቅዳሴ፣ በሥርዐተ ንግሥ ደረጃ በቤተ ክርስቲያን ይከበራል፡፡

ከዚያም ባለፈ፣ የቀደሙት የሀገር መሪዎችና ሕዝቦች፣ “መስቀለ ኢየሱስ፣ መስቀለ ክርስቶስ፣ መስቀል ክብራ” በሚል ስያሜ በመስቀሉ ስም ገዳማትን እየገደሙ፣ አብያተ ክርስቲያናትን እየተከሉ መንፈሳዊውን አገልግሎትና በረከት ሲያገኙበት፣ ሃይማኖታቸውን ሲያጠናክሩበት፣ አንድነትን፣ ፍቅርንና ሰላምን ሲቀዳጁበት ኖረዋል፡፡

ሕዝበ ክርስቲያኑ በበኩሉ፣ ለመስቀሉ ካለው ጥልቅ ፍቅር የተነሣ፣ ወንድ ወንዱ ወልደ መስቀል፣ ገብረ መስቀል፣ ኃይለ መስቀል፣ ብርሃነ መስቀል በመባል፤ ሴት ሴቱ ደግሞ ወለተ መስቀል፣ አመተ መስቀል በመባል የራሱን ስም በመስቀል እየሰየመ፤ ሰውነቱን በመስቀል ቅርጽ እየተነቀሰ፤ በመስቀል ቅርጽ የተቀረጸ የወርቅ፣ የብርና የነሐስ ወይም የመዳብ ጌጣጌጥ በጆሮው በማንጠልጠል፣ በአንገቱ በማሰር፣ በጣቱ በማጥለቅ፣ በልብሱና በቤቱ ጉልላትም ላይ የመስቀል ቅርጽ በማሠራት በኹለንተናዊ መልኩ መስቀልን ከማሰብና ከመዘከር አቋርጦ አያውቅም፡፡

ሌላው ቀርቶ በግንባራቸው ላይ የመስቀል ምልክት ያለባቸውን እንስሳትም ጭምር፣ ወንዱን በሬ ወይም ወይፈን – መስቀል፤ ሴቷን ላም ወይም ጊደር – መስቀሌ ብለው በመጥራት በእንስሳቱም ስም ላይ ሳይቀር መስቀልን በማስታወስ ለመስቀሉ ያላቸውን ጥልቅ ፍቅርና ክብር ይገልጣሉ፡፡ ለመስቀሉ ካላቸው ጽኑ ፍቅር የተነሣ፣ በየዓመቱ በመስቀል አካባቢ የምትታይ “የመስቀል ወፍ” ብለው የሚጠሯት የሰማይ ወፍም አለች፡፡

እንዲያውም በአንድ ወቅት አንድ ጥንታዊ የቅኔ ሊቅ፣ ይህችኑ የመስቀል ወፍ ግማደ መስቀሉ ከተቀበረበት ከግሸን ደብረ ከርቤ መስቀለኛ ተራራ ጋር አመሳስሎና አመሥጥሮ፡-

“ወበበመዓት ትትረአይ ወአኮ ዘዘልፍ

ደብረ ከርቤ ዘመስቀል ዖፍ፡፡”

የሚለውን ኅብር ቅኔ ተቀኝቶባታል፡፡

በደፈናው ሀገራችን ኢትዮጵያ፣ በመስቀሉ ኃይል፣ ዳር ድንበሯ ታፍሮና ተከብሮ፣ ሰላሟ ተጠብቆ የኖረችና ለመስቀሉ ልዩ ፍቅር ያላት ሀገረ መስቀል ለመኾኗ ከዚኽ በላይ በዝርዝር የተጠቀሱት በመስቀል ቅርጽ የተሠሩት ጌጣጌጦችና የሰዎቹም፣ የእንስሳቱም፣ የወፏም ስሞች በቂ ማስረጃዎች ናቸው፡፡

ኾኖም ከ፲፱፻፷፮ ዓ.ም. ወዲህ የተነሣው እግዚአብሔር አልባ ትውልድ ግን፣ ይህ ዓለም በመስቀሉ ያገኘውን ፈወስና ሰላም ዘንግቶ፣ በተለይም ሀገራችን ኢትዮጵያ ተጠብቃ የኖረችው በመስቀል ኃይል መኾኑን ረስቶ ለመስቀሉ ደንታ ስላልነበረው፣ በዓለ መስቀሉ ይከበርበት የነበረው ቦታ ተከልክሎ የመስቀሉ ክብርና ልዕልና እስከ ቅርብ ጊዜ ድረስ(ለዓመታት) ተቀብሮ ይኖር ነበር፡፡

የሰላም ባለቤት የኾነው መስቀሉም በበኩሉ፣ ክብሩና ልዕልናው ለዓመታት እንዲቀበር ያደረጉትን ወገኖች በውጭ ኃይል ሳይኾን በውስጥ ኃይል ድል እንዲነሱና ሰላምን እንዲያጡ አደርጎአቸዋል፡፡ ዛሬም ቢኾን የመስቀሉን ክብርና ልዕልና የሚጋፋና “እኔ ነኝ የበላይ” የሚል አካል ካለ፣ መስቀሉ አኹንም እንደዚያው እንደበፊቱ ኃይሉን የሚያሳይ መኾኑን በጥልቀት ሊገነዘብ ይገባዋል፡፡

በዚያም ኾነ በዚህ፣ ባለፈው ዓመት በተከበረው የመስቀል ደመራ በዓል ላይ፣ ለክርስቲያኖች አንድ ደስ የሚል ነገር ታይቷል፡፡ ይኸውም ከቅርብ ጊዜ ወዲህ፣ በዐዲስ አበባ በመስቀል ዐደባባይ በሚከበረው የመስቀል ደመራ በዓል ላይ ብቻ ነበር የሀገሪቱ ፕሬዝዳንት ወይም የመንግሥት ተወካይ የሚገኙት፡፡ ባለፈው ዓመት በተከበረው የመስቀል ደመራ በዓል ላይ ግን፣ ያለመስቀል ሰላም እንደማይገኝ በተግባር አምነውበት፣ በመላ ሀገሪቱ የሚገኙት የክልል መንግሥታት ባለሥልጣናት በየክልሉ በተከበረው የመስቀል ደመራ በዓል ላይ ተገኝተው እንደ ጥንቱ መስቀልን አክብረዋል፤ መልእክትም አስተላልፈዋል፡፡ ይህም ለሀገራችን ታላቅ የምሥራች ነው፤ አንዱ የሰላም ምልክትም ነው፡፡ በዓለም ላይ ከክርስቶስ መስቀል በስተቀር ሌላ ሰላም አስገኚ ነገር ስለሌለ፣ “ጨው ለራስህ ስትል ጣፍጥ” እንዲሉ ወደፊትም በዚኹ መቀጠል ይገባቸዋል፡፡

በመስቀሉ ክብርና ልዕልና ዙሪያ፣ ባለፈው ዓመት፣ ሌላም ደስ የሚል ነገር በሀገራችን ተከሥቷል፡፡ ይኸውም፣ የመስቀል በዓል፥ በዐዲስ አበባ፣ በርእሰ አድባራት ወገዳማት አኵስም ጽዮን፣ በቅዱስ ላሊበላና በጎንደር እንደሚሰጠው ክብርና ልዕልና፤ ብፁዕ ወቅዱስ ፓትርያርኩ፣ ርእሰ መስተዳድሩና ሹማምንቱ፣ ከየአቅጣጫው የተሰባሰቡ በርካታ ምእመናንና ዓለም አቀፍ የሀገር ጐብኚዎች በብዛት በተገኙበት ሰማይ ጠቀስ የመስቀል ተከላ በተደረገበት በዓዲ ግራት ተራራ ላይ በታላቅ ድምቀት መከበሩ ነው፡፡ በቀጣዩም በመቐለ በጮምአ ተራራ ላይ በተመሳሳይ ኹኔታ የመስቀልን በዓል ለማክበር ብፁዕ ወቅዱስ ፓትርያርኩ መስከረም ፲፬ ቀን ፳፻፲ ዓ.ም.፣ በ52 ሜትር ከፍታ በከፍተኛ ወጪ የተገነባውን መዘክረ መስቀል መርቀው መክፈታቸው ደግሞ ሌላ አስደሳች ዜና ነው፡፡

በአጠቃላይ በአኹኑ ጊዜ፣ ሀገራችን ኢትዮጵያ፣ ከመስቀሉ ጋራ ጥላቻን አስወግዳ ዕርቅን እየፈጠረች ስለኾነ፣ ታላቁ ሐዋርያ ቅዱስ ጳውሎስ በመጀመሪያዪቱ የቆሮንቶስ መልእክቱ፣ “አወቅን ብለን መስቀሉን እንዳንሽረው ጥንቃቄ ማድረግ ይገባናል፤ የመስቀሉ ነገር በሚጠፉት ወገኖች ዘንድ እንደ ስንፍና የሚቈጠር ሲኾን፤ በእኛ በዳንበት ዘንድ ግን የእግዚአብሔር ኃይል ነውና፤” ብሎ ባስተማረው መሠረት፤ ሀገራችን ኢትዮጵያ በመስቀሉ ኃይል ተጠብቃ እንደኖረች ኹላችንም ኢትዮጵያውያን ካመንና እንደ ጥንቱ ለመስቀሉ ክብርና ልዕልና መስጠት ከጀመርን፣ መጪው ጊዜ ለሀገራችን ለኢትዮጵያና ለእኛ ለመላው ሕዝቦቿ፥ የሰላም፣ የጤና፣ የስምምነትና የልማት ጊዜ እንደሚኾን ወይም የልማት እንጂ የጥፋት ጊዜ እንደማይኾን ተስፋ እናደርጋለን፡፡

Advertisements

3 thoughts on “ዝክረ መስቀል በሀገረ መስቀል ኢትዮጵያ

  1. Anonymous September 27, 2017 at 9:20 am Reply

    መፅሐፍቅዱስማወቅመናፍቅነትአያሰኝምነገርግንማሀበረቅዱሳበማለትየቅዱሳንስምበመያዝመሄድየቁመጋቤ ብሉይአዕመረአሸብርስም ማጥፋትአይቻልም

  2. Amanuel September 27, 2017 at 2:15 pm Reply

    ግሩም ነው!! ሁሉ ነገር በምክንያት እና በስርዓት የሚከወንባትን እና የእውነት መንፈስም የሚመራትን የቅድስት ቤተክርስቲያንን ዶግማና ቀኖናዋንም ማክበር ለትውልዱ ይጠቅማል!!! , ቅድስት ቤተክርስቲያን የክርስቶስ አካል እንደመሆኗ የምታከብራቸው በዓላትም የክርስቶስን ክብር ይገልጣሉ ። ከበርካታ አበይት በዓላቷ አንዱ ይኸው የክርስቶስ መስቀል ክብረ በዓል አንዱ ነው።
    ጠላት ሰይጣንን ጠርቆ ከመንገድ ያስወገደበት እና ጥልንም የገደለበት መስቀሉ በእውነት ክቡር ነው ። ስለዚህ ቅድስት እና ክብርት ኦርቶዶክሳዊት ተዋሕዶ ቤተ ክርስቲያን እንደ አምላኳ ክርስቶስ መስቀሉን መሳሪያዋ በማድረግ ጠላት ዲያብሎስን ስትቀጠቅጥበት ኖራለች ትኖራለችም።
    ‘ በመስቀል በመመካቷ(ገላ 6:14) መስቀሉን በማክበርዋ እንደተሳሳተች አድርገው በማሰብ “የአባታችንን ገዳይ” በአንገታችን አናስርም ይሉ የነበሩ ወደረኞቿ ዛሬ ዛሬ በአዳራሻቸው የአባታችን ገዳይ ያሉትን የመስቀል ምልክት ያደርጋሉ። እኛም ስህተታቸውን በሁለት መልክ እናያለን። 1ኛ = በመስቀሉ የተገደለው “ጥል” የተባለው “ሰይጣን” ስለሆነ የአባታችን ገዳይ ማለታቸው እነርሱ የማን ልጆች እንደሆኑና አባታቸው ማን እንደሆነ በግልፅ ነገሩን ። እኛ ግን የክርስቶስ መስቀል ትምክህታችን መሆኑን ከቅዱስ ጳውሎስ ጋር ተባብረን እንመሰክራለን!!!
    ‘ 2ኛ = የማያምኑበትን እና የማይመሰክሩለትን የማይመኩበትን መስቀል በየ አዳራሹ ማቆሙ ጥቅሙ ምንድን ነው? በርግጥም አንድ ነገር እናውቃለን ። በጌታችን ሞት ጊዜ በቀራንዮ ጎልጎታ የተተከሉት ሶስት መስቀሎች ሲሆኑ አንዱ በዕለተ ዓርብ ዙፋኑ አድርጎ ሰባቱን ቃላት ተናግሮ ተፈፀመ ብሎ ዓለምን የድህነት ስራ የፈፀመበት እና በደሙ የቀደሰው የጌታችን መስቀል ሲሆን ያም እኛ የምንመካበት እና የምናከብረው ቤዛችንም የሆነውና ቅድስት ቤተክርስቲያንም አክብራ በጉላቷ በመንበሯ የሁሉ ነገሯም ምልክት ያደረገችውና ከብፁዓን ሊቃነ ጳጳሳት እስከ ንዑዳን ዲያቆናት ጨብጠውት የምናየውና የምንባረክበት የምንመካበት እርሱ ነው። ‘ ሌላው በቀኝ የተተከለው የጥጦስ መስቀል ሲሆን ይህ መስቀል ለጥፋቱ መቀጫነት የሚገባው መሆኑን አምኖ በተሰጠችው ጥቂት የንስሃ ጊዜ ጥጦስ የጌታችንን ንፅሕና መስክሮ የራሱን ግን በደል አምኖ ሃይልና ትምክህት ከማይሆነው የራሱ መስቀል ወርዶ በሃይማኖት ወደክርስቶስ መስቀል የተሸጋገረበት ነው ።በዚህም የሚወደኝ ቢኖር ራሱን ይካድ መስቀሌን ተሸክሞ ይከተለኝ ያለውን የጌታ ቃል በመስቀል ላይ ሆኖ የፈፀመ ድንቅ ሰው ነው ። ‘ ‘ የመጨረሻው ዳክርስ የተባለው አመፀኛው የግራው ወንበዴ የተሰቀለበት መስቀል ነው። የመስቀሉ ቅርፁ የጌታችንን መስቀል ቢመስልም ተርታ መስቀል ነው ። አልተባረከም አልተቀደሰም ኃይል የለውም ትምክህትም አይሆንም። ይህን መስቀል የሚሸከሙ ምልክት የሚያደርጉ አይጠቀሙም ይልቁንም በግብራቸው ዳክርስን (የግራውን ክፉ ወንበዴ) ከመምሰላቸውም በላይ የሚጠቀሙትም” የግራውን ወንበዴ መስቀል” እንጂ የክርስቶስን አይደለምና እንንቃባቸው ።” ይልቁንም ለንስሃ ራሳቸውን ያላዘጋጁና: ዳክርስ ክርስቶስን እንደተቃወመውና እንደተፈታተነው እኒህም የክርስቶስ መስቀል ጠላቶች ናቸው እንጂ በክርስቶስ መስቀል የሚመኩ አማንያን ያይደሉ ከሀዲያን ናቸው። እነኚህን ሰዎች ቅዱስ ጳውሎስ እንዲህ ይገልጣቸዋል: — ብዙዎች ለክርስቶስ መስቀል ጠላቶቹ ሆነው ይመላለሳሉና ብዙ ጊዜ ስለ እነርሱ አልኳችሁ አሁንም እንኳ እያለቀስኩ እላለሁ መጨረሻቸው ጥፋት ነው ሆዳቸው አምላካቸው ነው ክብራቸው በነውራቸው ነው ሃሳባቸው ምድራዊ ነው …(1ኛ ፊሊ 3:18-20)
    ስለዚህ የጌታን መስቀሉን ማክበር እና ትምክህትም ማድረግ ይገባል። በቅርቡ በአዲግራት እና በመቀለ በጮምአ ተራራ የተሰሩት መስቀላት ሃገሪቱ ለመስቀል ያላትን ክብር የሚያንፀባርቁ በመሆናቸው ኢትዮጵያ ካሏት በርካታ ተራሮች አንፃር በትግራይ ብቻ ሳይወሰን በሌሎችም ክልሎች ቢስፋፉ ጥቅሙ ጉልህ ነው ። መስቀሎቹ መጽሐፍ ቅዱሳዊዉን መሰረታዊ ክብር አማክለው የተሰሩ ከሆነም ተመስገን ያሰኛል። ምክንያቱም የኤፌሶን ምዕ 4:5 ክቡር የሆነውና የታመነው የጌታ የወንጌል ቃል በቆረጣ የሚታይበት ሁኔታ ቀርቶ ወንጌል ከእስራት ይፈታል ማለት ነውና ፍፃሜውን ያሳምርልን!!! ‘ መስቀል ሃይላችን ነው መስቀል ቤዛችን ነው መስቀል የነፍሳችን መዳኛ ነው አይሁድ ይክዱታል እኛ እናምነዋለን ያመንነውም እኛ በመስቀሉ እንድናለን ድነንማል !!!
    ‘ መልካም በዓል ይሁንልንይሁንልን!!!!!

  3. Getachew Dejen September 28, 2017 at 8:51 am Reply

    bizu yaltemechugn tsuhufoch alu. Bemeskelu sim Mengist min eyesera
    endehone mezegebun lemin tewachuhit???

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: