ክርስትና፥ አምላካዊ ጽኑ መሠረት ያለው፤ መነሻውና መድረሻው በረከት የኾነና ዘላለማዊነትን የሚያውጅ ሃይማኖት ነው/ቅዱስ ፓትርያርኩ/

ቃለ በረከት ዘብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት
ዘተናገረ በእንተ በዓለ ልደቱ ለእግዚእነ ወአምላክነ ወመድኃኒነ ኢየሱስ ክርስቶስ ሎቱ ስብሐት!!
his-holiness-abba-mathias-on-eotc-tv

የብፁዕ ወቅዱስ ፓትርያርኩ የበዓለ ልደት መልእክት፣ ዛሬ፣ ታኅሣሥ ፳፱ ቀን መደበኛ ሥርጭቱን በጀመረው ኢኦተቤ-ቴቪ/EOTC TV/ እንደተላለፈ፤

በስመ አብ ወወልድ ወመንፈስ ቅዱስ አሐዱ አምላክ አሜን!!

  • በሀገራችን በኢትዮጵያ በገጠርና በከተማ የምትኖሩ፤
  • ከሀገር ውጪ በተለያዩ አህጉር የምትገኙ፤
  • የሀገራችንን ዳር ድንበር ለመጠበቅና ለማስከበር በየጠረፉ የቆማችኹ፤
  • በሕመም ምክንያት በየፀበሉና በየሆስፒታሉ ያላችኹ፤
  • እንዲኹም የሕግ ታራሚዎች ኾናችኁ በየማረሚያ ቤቱ የምትገኙ ኢትዮጵያውያንና ኢትዮጵያውያት፤

እኛን ለማዳን በለበሰው ሥጋ በቤተ ልሔም ተወልዶ በመካከላችን የተገኘው፣ በመለኰታዊ ባሕርዩ የማይወሰነው አካላዊ ቃል እግዚአብሔር ወልድ ጌታችን አምላካችንና መድኃኒታችን ኢየሱስ ክርስቶስ እንኳን ለኹለት ሺሕ ዘጠኝ ዓመተ ምሕረት በዓለ ልደቱ በሰላም አደረሳችኹ!!

“ወበዘርዕከ ይትባረኩ ኵሎሙ አሕዛበ ምድር፤ የምድር አሕዛብ ኹሉ በዘርኽ ይባረከሉ፤” (ዘፍ ፳፪÷፲፰)፡፡

በኹሉም ዘንድ እንደሚታወቀው፣ በረከት የመልካም ነገር ኹሉ ምንጭ ነው፤ እግዚአብሔር በጥንተ ፍጥረት ለሰው ልጅ የሰጠው የመጀመሪያው ጸጋ ብዝኃ በረከት ነው፡፡ ቅዱስ መጽሐፍ ይህን አስመልክቶ እንዲህ ይላል፦ “እግዚአብሔርም ባረካቸው፤ እንዲኽም አላቸው፤ ብዙ ተባዙ ምድርንም ሙሉአት፤ ግዙአትም፤ የባሕርን ዓሣዎችና የሰማይን ወፎች በምድር ላይ የሚንቀሳቀሱትንም ኹሉ ግዙአቸው፤” ይላል(ዘፍ.፩÷፳፰)፡፡

ለሰው የተሰጠው በረከት በኃጢአት ምክንያት መሰናክል ቢገጥመውም፣ እግዚአብሔር በፍጡሩ ጨርሶ አይጨክንምና ሙሉና ፍጹም የኾነው በረከት እንደገና ተመልሶ ለሰው ልጅ እንዴት እንደሚሰጥ ለበረከት በጠራቸውና በመረጣቸው ቅዱሳን አበው አማካይነት ሲያስታውቅ ኖሮአል፡፡

በተለይም የበረከት አባት ተብሎ በሚታወቀው በአብርሃም ዘር በኩል መጻኢው በረከት እውን እንደሚኾን፥ “በዘርኽ የምድር አሕዛብ ኹሉ ይባረካሉ፤” ተብሎ በእግዚአብሔር አንደበት በማያሻማ ኹኔታ ተነግሮ ነበር፡፡

ከእውነተኛው በረከት ተራቁታ የቆየችው ዓለመ ሰብእ፣ እግዚአብሔር በራሱ ቃል የገባላት ዘላቂውና እውነተኛው በረከት እስኪመለስላት ድረስ ለአምስት ሺሕ አምስት መቶ ዓመታት በተስፋ ስትጠባበቅ ቆይታለች፡፡

የተናረውን የማያስቀር እግዚአብሔር በረከቱን ለሕዝቡ የሚያድልበት ጊዜ ሲደርስ ቅዱስ መንፈሱን ባሳደረባት ቅድስት እናት በኤልሳቤጥ አንደበት የበረከቱ ሙዳይ ቅድስት ድንግል ማርያም፣ በረከቱ ኢየሱስ ክርስቶስ መኾኑንና በረከቱን ለምድር አሕዛብ ኹሉ ሊያድል እንደ መጣ፣ “ከሴቶች ኹሉ ተለይተሽ አንቺ የተባረክሽ ነሽ፤ የማኅፀንሽ ፍሬም የተባረከ ነው፤” ሲል የምሥራቹን ለዓለም አሰማ፤ (ሉቃ.፩÷፵፩-፵፫)፡፡

ቀዳማዊ የኾነ እግዚአብሔር ወልድ በድንግል ማርያም ማኅፀን ዘጠኝ ወር ከአምስት ቀን በፅንስ ቆይቶ የዛሬ ኹለት ሺሕ ዘጠኝ ዓመተ ምሕረት ታኅሣሥ ኻያ ዘጠኝ ቀን በቤተ ልሔም ተወለደ፡፡ ጌታችን በተወለደ ጊዜ የሰማይ ሠራዊት ማለትም መላእክትና የመላእክት አለቆች፦ “ወናሁ ተወልደ ለክሙ መድኅን ዘውእቱ እግዚእ ቡሩክ = እነኾ መድኅን ተወልዶላችኋል፤ ይኸውም ቡሩክ የኾነ ጌታ ነው፤” በማለት የሕፃኑን ማንነት ከገለጹ በኋላ፣ “በሰማያት ለእግዚአብሔር ክብር ይኹን፤ በምድርም ሰላም ይኹን፤ ለሰውም በጎ ፈቃድ ይደረግለት፤” እያሉ የተወለደው ሕፃን ለሰው ልጅ የሚያስገኘውን ሰላም እና መልካም በረከት በመግለጽ ደስታቸውን በቃለ መዝሙር በቤተ ልሔም ዙሪያ አስተጋብተዋል፡፡

ከሰው ወገንም ቅድስት ድንግል ማርያም፣ ከእርስዋ ጋር የነበሩ ወገኖች፣ እንደዚኹም በአካባቢው የነበሩ የከብት እረኞች በመላእክት የምስጋና መዝሙር ተሳታፊዎች ነበሩ፤ (ሉቃ ፪÷፰-፳)፡፡

እንግዲኽ ከጥንት ጀምሮ በአበው ሲነገርና ሲጠበቅ የነበረው የበረከት ተስፋ በቃልም፣ በመልእክትም፣ በሐሳብም፣ በምሥጢርም ተፋልሶ ሳያጋጥመው፣ ከላይ ጀምሮ እስከ ታች ፍሰቱና ምሥጢሩ ተጠብቆ በተነገረው መሠረት ተፈጽሞ መገኘቱ፣ የክርስትና ሃይማኖት ምን ያኽል አምላካዊ የኾነ ጽኑ መሠረት እንዳለው ያረጋግጣል፡፡

የክርስትና ሃይማኖት መሠረቱ÷ “ባርኮ እባርከከ፤ መባረክን እባርክሃለኹ” ከሚል ተነሥቶ፣ “የአባቴ ቡሩካን መንግሥተ ሰማያትን ትወርሱ ዘንድ ወደኔ ኑ!” በሚል የሚጠናቀቅ፣ መነሻውና መድረሻው በረከት የኾነ ሃይማኖት ነው፡፡

የክርስትና ሃይማኖት÷ “ለሰላሙም ፍጻሜ የለውም” ከሚል ተነሥቶ “በምድርም ሰላም ይኹን” በሚል ተንደርድሮ፣ በምስጋና፣ በክብርና በሰላም፣ በማያልፍም ሕይወት ዘላለማዊነትን የሚያውጅ ሃይማኖት ነው፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት

መድኃኒታችን ኢየሱስ ክርስቶስ በተወለደበት ዕለት ከወደላይ የተላለፈው ዓቢይ መልእክት፦ ሰላምና በረከት በምድር ላይ ኾነ፤ የሚል እንደኾነ ማስተዋል አለብን፡፡

ታላቁ ሊቅና ኢትዮጵያዊው አባት ቅዱስ ያሬድ ስለዚህ በረከት ሲናገር፦ “በእንተ ልደቱ ለክርስቶስ አድባር ኮኑ ኅብስተ ሕይወት፤ ወዕፀወ ገዳምኒ ፈረዩ አስካለ በረከት፤ ወማየ ባሕርኒ ኮነት ሐሊበ ወመዓረ = ክርስቶስ በተወለደ ጊዜ ተራሮች የሕይወት እንጀራ ኾኑ፤ የበረሓ ዛፎችም የበረከት እሸትን አፈሩ፤ የባሕር ውኃም ወተትና ማር ኾነች፤” ይላል፡፡

የቅዱስ ያሬድ ቃለ ዝማሬ ሕያዋኑም ግኡዛኑም ኹሉ በልደተ ክርስቶስ ምክንያት በበረከት እንደተንበሸበሹ ይመሰክራል፡፡

ከዚኽ አኳያ በበዓለ ልደተ ክርስቶስ የሚበላ እንጀራ እና የሚጠጣ ውኃ አጥቶ በረኃብና በጥም ተጐሳቊሎ የዋለ አልነበረም ብቻ ሳይኾን፤ እንጀራውም ወተቱም ማሩም ፍጥረቱ ኹሉ እንደ ፈለገው እየተመገበ በሰላምና በደስታ ቀኑን ኹሉ ማሳለፉን እንገነዘባለን፡፡

የልደተ ክርስቶስ በረከት ገደብ የለሽ መኾኑን ያወቅን፣ የኢየሱስ ክርስቶስ ተከታዮች ነን፤ የምንል ክርስቲያኖች÷ በዚኽ ቀን ርቦትና ጠምቶት፣ አዝኖና ተክዞ የሚውል ሰው እንዳይኖር ያለውን በማካፈልና በጋራ በመመገብ፤ የታረዘውን በማልበስ የታመመውን በመጠየቅ፤ የበዓሉን ሃይማኖታዊና ሥነ ምግባራዊ ገጽታ መጠበቅና ማስጠበቅ ይኖርብናል፡፡

በዓለ ልደተ ክርስቶስ የበረከት ቀን ከመኾኑም ሌላ የዕርቅ፣ የእኩልነትና የአንድነት በዓልም ነው፡፡ ከብዙ ጊዜ መለያየትና መራራቅ በኋላ፣ ፈጣሪ የሰዎችን ሥጋ አካሉ አድርጎ በሰዎች መካከል በአካል መገኘት ከዕርቅ ኹሉ የበለጠ ዕርቅ መኾኑን መዘንጋት የለበትም፡፡

በዕለተ ልደት ክርስቶስ መላእክትና ሰዎች ፈጣሪያቸው በተወለደበት ዙሪያ ተሰባስበው በእኩልነትና በአንድነት ሲዘምሩና ሲያመሰግኑ ማየትና መስማትም የፍጡራንን እኩልነትና አንድነት ያረጋገጠ ሌላው ክሥተት ነበረ፡፡

ሰማያውያንና ምድራውያን ለሰው ልጅ ህልውና ወሳኝ የኾነውን፣ “ሰላም በምድር ይኹን” እያሉ በአንድ ቃል መዘመራቸውም፣ ለሰማያውያኑም ኾነ ለምድራውያኑ ከሰላም የበለጠ ትልቅ ጸጋ የሌለ መኾኑን የሚያስገነዝብ ነበረ፡፡

እንዲኽም ስለኾነ፣ ከልደተ ክርስቶስ ያልተማርነው ትምህርት የለም፤ ማለት ይቻላል፤ እግዚአብሔር በልደተ ክርስቶስ ዕለት ያስተማረንን ብቻ አጥብቀን ብንይዝና ይህንኑ ብንፈጽም፣ ከበቂ በላይ ነው፤ ቢባል ፍጹም እውነት ነው፡፡

ተራራው ኹሉ የሕይወት እንጀራ ኾነ፤ የበረሓ ዛፍ ኹሉ የበረከት እሸት ኾነ፤ የባሕር ውኃም ማርና ወተት ኾነች፤ ተብሎ ሲነገር በዓለ ልደተ ክርስቶስ የልማት፣ የዕድገትና የብልጽግና አስተማሪ መኾኑን ያስገነዝባል፡፡

ከዚኽ አንፃር ዛሬም ቤተ ክርስቲያን የምታስተምረው፦ ተራራው ይልማ፣ በረሓው በደን ይሸፈን፤ ውኃው ከብክለት ድኖ ለምግብነት የሚያገለግሉ ሕይወታውያን ፍጡራን በብዛት ይኑሩበት፤ የሚለው በልማትና በበረከት የተሞላው የልደተ ክርስቶስ አስተምህሮ ነው፤ ሕዝበ ክርስቲያኑ ይህን አምላካዊ አስተምህሮ በምልአት ተቀብሎ ወደ ልማት ከተሠማራ በዚያው መጠን በረከቱን በገፍ ያፍሳል፡፡

ከዚኽም ጋር፣ “የሺሕ ፍልጥ ማሠሪያው ልጥ” እንደሚባለው የኹሉም ማሠሪያ ሰላም ስለኾነ፣ የድሮ ነጋዴ ለንግድ ሲወጣ ስንቁን በትከሻው ተሸክሞ እንደሚጓዝ ኹሉ፣ ዛሬም የልማት ነጋዴ ሕዝባችን ሰላምን በልቡ ቋጥሮ መጓዝ ይኖርበታል፡፡

ኹሉም ችግሮች ከሰላም በታች መኾናቸውን ኹሉም ማኅበረሳባችን መገንዘብ አለበት፤ ኹሉም ለአንድነት፣ ለእኩልነት፣ ለፍትሕ ለወንድማማችነት፣ ለመተማመንና ለመከባበር መስፈን የማያወላውል አቋም ሊይዝ ይገባል፡፡

የቀደሙት አባቶቻችን ኢትዮጵያን ታላቅ ሀገር እንድትኾን ያበቋት፣ አንድነታቸውን ጠብቀው በጋራ ስለሠሩ ነው፤ ያለአንድነት ታላቅነትም፣ ኃያልነትም፣ ልማትና ዕድገትም ፈጽሞ እንደማይገኝ ሳይታለም የተፈታ ነውና ሕዝባችን ይህን በውል ማጤን ይኖርበታል፡፡

በመጨረሻም

ከላይ ለመግለጽ እንደተሞከረው፣ የክርስቶስ መወለድ ዋና ዓላማ መለያየትንና መቃቃርን፤ መነታረክንና በጥላቻ ዓይን መተያየትን አስወግዶ በምትኩ ዕርቅን፣ ዘላቂ ሰላምንና አንድነትን በሰው ኹሉ አእምሮ ውስጥ ማስፈን እንደኾነ እናውቃለን፡፡

በመኾኑም ይህ ነገረ ሕይወት ከተሰበከባቸው የዓለማችን ሀገራት ኢትዮጵያ ቀዳሚዋ ሀገር እንደ መኾኗ መጠን፣ በእግዚአብሔር ከተሰጣት የቅድሚያ ሓላፊነት አንፃር በሀገር ውስጥ ብቻ ሳይኾን በዓለም አቀፍ ደረጃም ኹሉ፣ እንደ ድሮው ደማቁ የአንድነት ታሪኳና ተደናቂው ሥልጣኔዋ፣ እንደዚኹም ጽኑ ሰላምዋንና ልማቷን ጠብቃ በማስጠበቅ አስተማሪነትዋ ጎልቶ እንዲወጣ፣ “ችግሮች ኹሉ ከሰላም በታች ናቸው” የሚለውን ጠንካራ የሰላም አስተሳሰብ መርሕ በማድረግ ኹሉም በአንድነት፣ በሓላፊነት፣ በቅንነትና በተቈርቋሪነት ሀገሩን እንዲጠብቅና እንዲያለማ መልእክታችንን በእግዚአብሔር ስም እናስተላልፋለን፡፡

መልካም የልደት በዓል ያድርግልን፤
እግዚአብሔር ኢትዮጵያንና ሕዝባችንን ይባርክልን፤
ወስብሐት ለእግዚአብሔር፤
አሜን፡፡

አባ ማትያስ ቀዳማዊ
ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት፤
ታኅሣሥ ፳፱ ቀን ፳፻፱ ዓ.ም.
አዲስ አበባ፤ ኢትዮጵያ

Advertisements

2 thoughts on “ክርስትና፥ አምላካዊ ጽኑ መሠረት ያለው፤ መነሻውና መድረሻው በረከት የኾነና ዘላለማዊነትን የሚያውጅ ሃይማኖት ነው/ቅዱስ ፓትርያርኩ/

  1. samuel asfaw January 11, 2017 at 9:47 am Reply

    god bless our church am happy and my family continue this media

  2. Anonymous January 13, 2017 at 5:04 pm Reply

    አጭበርባሪ ፣ ሀገር እየተራበና እያለቀ እየተሰደደ ብጹዕ አባታችንን የቸገራቸው የልማት ጉዳይነው። ሆዳም ምንደኛ ብር አምላኩ!
    ትንቢተ ኤርምያስ ምዕ 23

    1 የማሰማርያዬን በጎች ለሚያጠፉና ለሚበትኑ እረኞች ወዮላቸው! ይላል እግዚአብሔር።

    2 ስለዚህ የእስራኤል አምላክ እግዚአብሔር ሕዝቤን ስለሚጠብቁ እረኞች እንዲህ ይላል። በጎቼን በትናችኋል አባርራችኋቸውማል አልጐበኛችኋቸውምም፤ እነሆ፥ የሥራችሁን ክፋት እጐበኝባችኋለሁ፥ ይላል እግዚአብሔር።

    3 የመንጋዬም ቅሬታ ካባረርኋቸው ምድር ሁሉ ወደ በረታቸው ሰብሰቤ እመልሳቸዋለሁ፤ እነርሱም ያፈራሉ ይበዙማል።

    4 የሚጠብቋቸውን እረኞች አስነሣላቸዋለሁ፥ ዳግመኛም አይፈሩምና አይደነግጡም፥ ከእነሱም አንድ አይጐድልም፥ ይላል እግዚአብሔር።

    5 እነሆ፥ ለዳዊት ጻድቅ ቍጥቋጥ የማስነሣበት ዘመን ይመጣል፥ ይላል እግዚአብሔር፥ እርሱም እንደ ንጉሥ ይነግሣል፥ ይከናወንለታልም፥ በምድርም ፍርድንና ጽድቅን ያደርጋል።

    6 በዘመኑም ይሁዳ ይድናል እስራኤልም ተዘልሎ ይቀመጣል፥ የሚጠራበትም ስም። እግዚአብሔር ጽድቃችን ተብሎ ነው።

    7 ስለዚህ፥ እነሆ። የእስራኤልን ልጆች ከግብጽ ምድር ያወጣ ሕያው እግዚአብሔርን! ዳግመኛ የማይባልበት ዘመን ይመጣል፥ ይላል እግዚአብሔርነገር ግን። የእስራኤልን ቤት ዘር ከሰሜን አገርና ካሰደድኋቸውም አገር ሁሉ ያወጣና የመራ ሕያው እግዚአብሔርን! ይባላል፤ በምድራቸውም ይቀመጣሉ።

    9 ስለ ነቢያት፤ ልቤ በውስጤ ተሰብሮአል አጥንቶቼም ሁሉ ታውከዋል፤ ከእግዚአብሔር የተነሣ ከቅዱስ ቃሉም የተነሣ የወይን ጠጅ እንዳሸነፈው እንደ ሰካራም ሰው ሆኛለሁ።

    10 ምድር ከአመንዝሮች ተሞልታለችና፥ ከመርገምም የተነሣ ምድር አልቅሳለች፤ የምድረ በዳ ማሰማርያ ደርቆአል፤ አካሄዳቸው ክፉ ነው፥ ብርታታቸውም ቅን አይደለም።

    11 ነቢዩና ካህኑም ረክሰዋልና፥ በቤቴም ውስጥ ክፋታቸውን አግኝቻለሁ፥ ይላል እግዚአብሔር።

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: