በጠቅላይ ቤተ ክህነቱ የስም ማጥፋት ክሥ: ቅዱስ ፓትርያርኩ ምስክርነት እንዲሰጡ ፍ/ቤቱ በየነ

  • ቅዱስነታቸው፣ ካሉበት የምስክርነት ቃላቸውን በጹሑፍ እንዲሰጡ ታዟል
  • “በሕግ የእኩልነት መርሕና የተከሣሽ መብት እንጂ ስሕተት አይደለም”/ፍ/ቤቱ/
  • “ለፍትሕ ያላቸውን ከበሬታ ከማሳየት ባለፈ የሚጎዳው አካል አይኖርም”/ተከሣሹ/

*                     *                    *

his-holiness-abba-mathias

ብፁዕ ወቅዱስ ፓትርያርክ አቡነ ማትያስ

የመንበረ ፓትርያርክ ጠቅላይ ቤተ ክህነት ጽ/ቤት፣ በሰንደቅ ጋዜጣ ዋና አዘጋጅ ላይ አሻሽሎ ባቀረበው የስም ማጥፋት የፍትሐ ብሔር ክሥ፣ ተከሣሽ፥ ፓትርያርክ አቡነ ማትያስን በምስክርነት መቁጠሩ፣ ኹለቱን ወገኖች ያከራከረ ሲኾን፤ ፍ/ቤቱ በዛሬው ዕለት ባዋለው ችሎት፦ ፓትርያርኩ ሊመሰክሩ ይገባል፤ በማለት ብይን ሰጠ፡፡

የፌዴራሉ የመጀመሪያ ደረጃ ፍ/ቤት ቂርቆስ ምድብ 2ኛ ፍትሐ ብሔር ችሎት፣ ተከሣሽ የሰንደቅ ጋዜጣ ዋና አዘጋጅ አቶ ፍሬው አበበ፤ በጠቅላይ ቤተ ክህነት ጽ/ቤት በቀረበበት የስም ማጥፋት ክሥ ጉዳይ ቀርበው እንዲመሰክሩለት፣ የቤተ ክርስቲያኒቱን ፓትርያርክ ብፁዕ ወቅዱስ አቡነ ማትያስን በመከላከያ ምስክርነት መቁጠሩን ተከትሎ፣ በጠቅላይ ቤተ ክህነቱ ነገረ ፈጅ በኩል፦ “ፓትርያርኩ በምስክርነት ሊቀርቡ አይገባም፤” የሚል ተቃውሞ ባለፈው ሳምንት ማክሰኞ ቀርቧል፡፡

ነገረ ፈጁ ስለ ተቃውሞው ለችሎቱ ባሰማው ማብራሪያ፦ ፓትርያርኩ፥ የቤተ ክርስቲያን መሪ በመኾናቸው፤ ከፍ ያለ ማኅበራዊ ሓላፊነት ስላለባቸው፤ በኮር ዲፕሎማት ደረጃ የሚንቀሳቀሱ በመኾናቸው፤ ቅዱስነታቸው ቀርበው ቢመሰክሩ የቤተ ክርስቲያኒቱን ክብርና የአማኞቿን ሞራል መንካት ስለሚኾን ቀርበው መመስከር የለባቸውም፤ በሚል አስረድቷል፡፡

አያይዞም፣ ፍ/ቤቱ፥ ፓትርያርኩ መመስከር አለባቸው፤ ብሎ የሚበይን ከኾነም፣ ጥያቄዎች ወዳሉበት በጹሑፍ ተልኮላቸው በጹሑፍ መልስ እንዲሰጡ እንዲደረግ ፍ/ቤቱ ትእዛዝ እንዲሰጥለት አማራጭ ሐሳብ አቅርቧል፡፡

በተጨማሪም፣ ጠቅላይ ቤተ ክህነቱ፣ ክሡን አሻሽሎ ካቀረበ በኋላ ተከሣሽ በሰጠው መልስ ላይ ማቅረብ የነበረበት አስተያየት እንጂ አዲስና ቀድሞ ያልነበረ ማስረጃ ማቅረብ አልነበረበትም፡፡ ፓትርያርኩን ምስክርነት የጠራው፣ ከክሡ መሻሻል በኋላ እንጂ በቀድሞ ክሥ የቀረበ አልነበረም፤ በማለት ፍ/ቤቱ ውድቅ እንዲያደርግለት ጠይቋል፡፡

ተከሣሽ በበኩሉ፦ ፓትርያርኩ ቢቀርቡ፣ የተከሠሠበትን፥ በቤተ ክርስቲያኒቱ ውስጥ የሚታይ የሙስናና ብልሹ አሠራር፣ የመልካም አስተዳደር ችግር፣ የመናፍቃን እንቅስቃሴ በስፋት መኖሩን በምስክርነት ያስረዱልኛል፤ ምንም እንኳን ፓትርያርኩ ትልቅ የሃይማኖት አባት ቢኾኑም፣ በሕግ ፊት እንደ ማንኛውም ሰው በመኾናቸው፣ ቅዱስነታቸው ፍ/ቤት መቅረባቸው ለፍትሕ ሥርዓቱ ያላቸውን ከበሬታ ከማሳየት ባለፈ የሚነካ ሞራል አለመኖሩን በመጥቀስ ተከራክሯል፡፡

በተጨማሪም፣ ከሣሽ ክሥ አሻሽል ሲባል፣ አዲስ ጭብጦችን ይዞ መቅረቡን ተከሣሹ አስታውሶ፣ አዲስ ለቀረቡት ክሦች አዲስ ማስረጃዎችን ማቅረቡ ተገቢ መኾኑን ለፍ/ቤቱ አስረድቷል፡፡

ፍ/ቤቱ፣ ግራና ቀኙን ከአከራከረ በኋላ ዛሬ፣ ሰኞ፣ ታኅሣሥ 24 ቀን ከቀትር በኋላ በሰጠው ብይን፣ ሦስት ጭብጦችን መለየቱን አስረድቷል፡፡

ተከሣሽ፣ ፓትርያርኩን በምስክርነት ቆጥሮ ማቅረቡ ሕጋዊ ነው ወይስ አይደለም? ፓትርያርኩ፣ የኮር ዲፕሎማት መብት ወይም በሀገር መሪ ደረጃ የሚከበሩ መኾናቸው መገለጹና በፍ/ቤት ለምስክርነት መቅረባቸው ሞራል ይነካል? እንዲኹም፣ ምስክርነቱን በአካል ቀርበው ይስጡ ወይስ ባሉበት ኾነው በጹሑፍ ይስጡ? የሚሉ ጭብጦችን መርምሯል፡፡

በዚኽ መሠረት፡- ፓትርያርኩ በተከሣሽ በኩል በምስክርነት መጠራታቸው፣ መብት እንጂ ስሕተት አለመኾኑን፤ በዲፕሎማትና በሀገር መሪ ደረጃ የሚከበሩ ሰው መኾናቸው ተጠቅሶ የተደረገው ክርክር፣ ሕገ መንግሥቱ ጭምር እኩል ጥበቃ ያደረገለትን የእኩልነት የሕግ መርሕ የሚጥስ በመኾኑ ፍ/ቤቱ አልተቀበለውም፡፡

ፓትርያርኩ እንዴት ምስክርነታቸውን ይስጡ፤ ለሚለው፣ ሕጉ፡- ምስክርነት በአካል ቀርቦ በመሐላ እንዲሰጥ ቢደነግግም፤ ፍ/ቤቱ ሲያምንበት ምስክርነቱ በጽሑፍ እንዲሰጥ ሊያዝ እንደሚችል በመጥቀስ፤ በተጨማሪም፣ ኹለቱም ወገኖች ባደረጉት ክርክር፣ ብፁዕ ወቅዱስ አቡነ ማትያስ ባሉበት ኾነው በጹሑፍ መልስ እንዲሰጡ የግራ ቀኙ ተከራካሪ ወገኖች በመስማማታቸው፣ ፍ/ቤቱም ይህን አማራጭ ሐሳብ በመያዝ፣ ፓትርያርኩ የምስክርነት ቃላቸውን ባሉበት ኾነው በጹሑፍ ይስጡ፤ በሚል ብይን ሰጥቷል፡፡

ፓትርያርኩ በምስክርነታቸው ስለሚያስረዷቸው ጉዳዮች በተመለከተ፣ በተከሣሽ በኩል ለታኅሣሥ 27 ጥያቄዎች ተዘጋጅተው ለችሎቱ እንዲቀርቡ፤ ጥር 2 ቀን ደግሞ፣ ከሣሽ በጥያቄዎቹ ላይ አስተያየት እንዲሰጥበት ፍ/ቤቱ ትእዛዝ ሰጥቷል፡፡

ለክርክሩ መነሻ የኾነው፣ ተከሣሹ ዋና አዘጋጅ ኾኖ የሚሠራበት ሰንደቅ ጋዜጣ፣ መጋቢት 21 ቀን 2008 ዓ.ም፣ «ፓትርያርኩ ለኢትዮጵያ የደኅንነት፣ ለምእመናን የድህነት ስጋት» በሚል ርዕስ በዲያቆን ዳንኤል ክብረት የተጻፈውን ጹሑፍ በማተሙ ምክንያት፣ ስማችን ጠፍቷል፤ በሚል በጠቅላይ ቤተ ክህነቱ በኩል ክሥ በመቅረቡ መኾኑ ይታወሳል፡፡

Advertisements

2 thoughts on “በጠቅላይ ቤተ ክህነቱ የስም ማጥፋት ክሥ: ቅዱስ ፓትርያርኩ ምስክርነት እንዲሰጡ ፍ/ቤቱ በየነ

  1. Anonymous January 3, 2017 at 7:07 am Reply

    ተከሣሽ በበኩሉ፦ ፓትርያርኩ ቢቀርቡ፣ የተከሠሠበትን፥ በቤተ ክርስቲያኒቱ ውስጥ የሚታይ የሙስናና ብልሹ አሠራር፣ የመልካም አስተዳደር ችግር፣ የመናፍቃን እንቅስቃሴ በስፋት መኖሩን በምስክርነት ያስረዱልኛል፤ ምንም እንኳን ፓትርያርኩ ትልቅ የሃይማኖት አባት ቢኾኑም፣ በሕግ ፊት እንደ ማንኛውም ሰው በመኾናቸው፣ ቅዱስነታቸው ፍ/ቤት መቅረባቸው ለፍትሕ ሥርዓቱ ያላቸውን ከበሬታ ከማሳየት ባለፈ የሚነካ ሞራል አለመኖሩን በመጥቀስ ተከራክሯል፡፡

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: