ከእመቤታችን የእናትነት ፍቅር ሊለዩን የሚሞክሩትን፥ በእግዚአብሔር ቃል፣ በኦርቶዶክሳዊና በኢትዮጵያዊ መንፈስ ልንቋቋማቸው ይገባል – ብፁዕ ወቅዱስ ፓትርያርኩ

the assumption of the virgin mary Ed

  • ነገረ ፍልሰታዋንቃለ እግዚአብሔርን በማስታወስና ለቃሉ ተገዥ በመሆን እንፈጽማለን
  • ትውልድ ኹሉ፣ የጌታ እናትነቷን አምኖ ብፅዕት ነሽ እያለ እንዲያመሰግናት በቃሉ ታዟል
  • ወላዲተ አምላክ ሳንላት፣ ጌታችንን አምላክ ወሰብእ ብለን ማመንና መዳን አንችልም
  • እነኋት እናትህ በሚለው ቃል፣ እመቤታችን በእያንዳንዱ አማኝ ቤት በመንፈስ ትኖራለች
  • በቤቱ፣ “እምዬ እናቴ፣ ብፅዕት ነሽ” እያለ በሥዕሏ የማይጸልይ እና የማይማፀን የለም
  • ከፍቅርዋ የሚለዩንን በቃሉ፣ በኦርቶዶክሳዊ እና በኢትዮጵያዊ መንፈስ እንቋቋማቸው!
  • ስለ እርስዋ ፍቅር ለድሆች የምንዘክርበት ተግባር ዛሬም ሳይቀዘቅዝ ሊቀጥል ይገባል፡፡

*               *               *

pat tsome filseta
በስመ አብ ወወልድ ወመንፈስ ቅዱስ አሐዱ አምላክ፤ አሜን፡፡

በሀገር ውስጥም ሆነ በተለያዩ ክፍላተ ዓለም የምትገኙ፣ የኢትዮጵያ ኦርቶዶክስ ተዋሕዶ ቤተ ክርስቲያን ምእመናን ወምእመናት፤ እንኳን ለሁለት ሺሕ ስምንት ዓመተ ምሕረት የቅድስት ድንግል ማርያም ጾመ ፍልሰታ በሰላም አደረሳችሁ!!

‹‹ቃለ እግዚአብሔር ንጹሕ ወያሐዩ ለዓለም = የእግዚአብሔር ቃል ንጹሕ ነው፤ ለዘላለሙም ያድናል›› (መዝ.18፥9)፡፡

ነቢየ እግዚአብሔር ዳዊት ስለ ቃለ እግዚአብሔር አስመልክቶ በዘመረው መዝሙር ሲናገር፣ ‹‹የእግዚአብሔር ቃል ንጹሕ ነው›› ይላል፤ በርግጥም የእግዚአብሔር ቃል የተለያዩ ፍጡራን ከሚናገሩዋቸው ቃላት ልዩ፣ ንጹሕ፣ ቅዱስ እና ክቡር ነው፡፡

የፍጡራን ቃል ከሐሰት፣ ከወላዋይነት፣ ካላዋቂነት፣ ከጥርጣሬ፣ ከአስመሳይነት፣ ከአታላይነትና ከዓቅም ውሱንነት ጋር ተቀላቅሎ ስለሚነገር ንጹሕ ነው ብሎ መናገር አይቻልም፤ የእግዚአብሔር ቃል ግን ከዚህ ሁሉ የተለየ በመሆኑ ፍጹም ንጹሕ ነው፤ እውነትም ነው፤ የእግዚአብሔር ቃል ንጹሕ ብቻ ሳይሆን ኃያልም ነውና በተናገረው መሠረት ከሚፈጸም በቀር ፍጹም የማይቀለበስ ነው፡፡

‹‹የእግዚአብሔር ቃል ከሚወድቅ፣ ሰማይና ምድር ቢያልፍ ይቀላል፤›› የሚለው የጌታችን የአምላካችንና የመድኃኒታችን የኢየሱስ ክርስቶስ ኃይለ ትምህርት፣ የእግዚአብሔር ቃል ከሁሉም በላይ የሆነ ክብር፣ ኃይል እና ጽናት ያለው መሆኑን ያስገነዝበናል፡፡ በመሆኑም፣ ንጹሕና እውነት የሆነውን የእግዚአብሔር ቃል በማጣመም፣ ወይም በመሸራረፍ፣ ወይም በመቀናነስ ወይም ለራስ ፍላጎት በሚያመች ሁኔታ እያዛቡ መናገርና ማስተማር በእግዚአብሔር መንግሥት ከሁሉ ይልቅ ታናሽ የሚያደርግ መሆኑን በቅዱስ ወንጌል ተጽፎአል፡፡ (ማቴ. 5፥19)፡፡

የእግዚአብሔር ቃል እውነተኛና ንጹሕ የመሆኑን ያህል ሕያውና ዘለዓለማዊ ነው፤ በሁለት ወገን ስለት ካለው ሰይፍም ይልቅ የሚቆርጥ እና የሚለይ ኃይል አለው፤ (ዕብ.4፥12)፡፡ ይህም ማለት የእግዚአብሔርን ቃል እንዳለ ተቀብለው የሚጠብቁትንና የሚታዘዙለትን ለዘለዓለሙ ሕያዋን የማድረጉን ያህል፣ የሚሸራርፉትንና የሚያጣምሙትን ደግሞ የመቅጣት ሥልጣን ያለው መሆኑን ያሳየናል፡፡ በመሆኑም የሰው ልጅ ድኅነት፣ ቃሉን በመጠበቅና ባለመጠበቅ ሚዛን ላይ ተቀምጦ እንዳለ መገንዘብ አለብን፡፡


የተወደዳችሁ የመንፈስ ቅዱስ ልጆቻችን ምእመናንና ምእመናት፤

ንጹሕና ሕያው የሆነው፣ ሰዎችንም ለዘለዓለሙ በሕይወት እንዲኖሩ የሚያደርገው የእግዚአብሔር ቃል፣ እመቤታችን ቅድስት ድንግል ማርያምን በተመለከተ የተናገረው እውነት አለ፡፡ በቀጣዮቹ ሁለት ሱባኤያት የቅድስት ድንግል ማርያምን ነገረ ፍልሰት ምክንያት በማድረግ የምንፈጽመው አምልኮተ እግዚአብሔር፣ የእግዚአብሔር ቃል ስለ እመቤታችን ቅድስት ድንግል ማርያም የተናገረውን በማስታወስና ለቃሉ ተገዥ በመሆን ነው፤ የእግዚአብሔር ቃል ስለ እመቤታችን ቅድስት ድንግል ማርያም ብዙ ተናግሮአል፤ ከተናገራቸውም መካከል፡-

  • ጸጋን የተሞላሽ ሆይ ደስ ይበልሽ፤
  • እግዚአብሔር ካንቺ ጋር ነው፤
  • ከሴቶች መካከል የተባረክሽ ነሽ፤
  • በእግዚአብሔር ፊት ጸጋን አግኝተሻል፤
  • መንፈስ ቅዱስ በአንቺ ላይ ይመጣል፣ የልዑልም ኃይል ይፀልልሻል፤
  • የጌታዬ እናት ወደኔ ትመጣ ዘንድ እኔ ማን ነኝ?
  • ብፅዕት ነሽ፤ ትውልድ ሁሉ ብፅዕት ይሉኛል፤
  • እነሆ ልጅሽ እነኋት እናትህ፤ የሚሉ ይገኙባቸዋል፡፡

ስለሆነም እግዚአብሔር ስለ ቅድስት ድንግል ማርያም የተናገረውን ቃል ጠቅለል አድርገን ስንመለከት፣ በዋናነት የሚያሳየው ቅድስት ድንግል ማርያም፣ የጌታ እናት መሆኗን አምነው በመቀበል፣ ‹‹ትውልድ ሁሉ ብፅዕት ነሽ›› እያሉ እንዲያከብሯት በእግዚአብሔር መታዘዙ ነው፤ ምክንያቱም የድንግል ማርያም ክብር፣ ከእግዚአብሔር ክብር ጋር የተያያዘ ባሕርይ አለውና ነው፡፡
ቅድስት ድንግል ማርያም፥

  • ምልእተ ጸጋ፣
  • ሙኃዘ ፍሥሐ፣
  • ምልእተ በረከት፣
  • የእግዚአብሔር ባለሟል፣
  • የመንፈስ ቅዱስ ማደሪያ፣
  • ከእግዚአብሔር ጋር ያለች ብፅዕት፤

ባትሆን ኖሮ ጌታን ለመውለድ የሚያስችል ንጽሕና እና ቅድስና አይኖራትም ነበር፤ እግዚአብሔር ንጹሐ ባህርይ እንደ መሆኑ መጠን በንጹሐንና በቅዱሳን አድሮ ይኖራልና፡፡

ቅድስት ድንግል ማርያም፡- ጸጋን፣ በረከትን፣ ባለሟልነትን፣ የመንፈስ ቅዱስ ማደሪያ መሆንን፣ በድንግልና መፅነስን፣ በእግዚአብሔር ኃይል መከለልን ገንዘብ አድርጋ መገኘቷ፣ ከእርስዋ የተወለደው ማን እንደ ሆነ በትክክል እንድናውቅ ያስችለናል፡፡

ቅዱስት ድንግል ማርያምን፣ ወላዲተ አምላክ ሳንል፣ ጌታችን ኢየሱስ ክርስቶስን አምላክ ወሰብእ ብለን ማመንና መዳን አንችልም፤ ቅድስት ድንግል ማርያምን፥ ምልእተ ጸጋ፣ ምልእተ በረከት፣ ሙኃዘ ፍሥሐ፣ ብፅዕት፣ ንጽሕት፣ ቅድስት ስንል ነው ከእርስዋ የተወለደውን ጌታ የባሕርይ አምላክ ነው፤ ማለት የምንችለው፣ ምክንያቱም የቅድስት ድንግል ማርያም ልዩ ጸጋና ቅድስና ለጌታችንና ለመድኃኒታችን ለኢየሱስ ክርስቶስ ማንነት አስረጅ በመሆኑ ትውልድ ሁሉ ‹‹ብፅዕት ነሽ›› እያልን እመቤታችንን እንድናከብር የእግዚአብሔር ቃል አዞናልና፤ (ሉቃ.1፥45-48)፡፡

ጌታችንና አምላካችን ኢየሱስ ክርስቶስ በእርሱና በቅድስት ድንግል ማርያም መካከል ያለው ግንኙነት የእናትነትና የልጅነት እንደ ሆነ ሁሉ፣ በምእመናንና በድንግል ማርያም መካከል ያለው ግንኙነትም በእናትነትና በልጅነት ደረጃ እንዲሆን አዞአል፤ (ዮሐ19፥26-27)፡፡

heaven-ethiopia
በሁሉም ዘንድ እንደሚታወቀው አንድን ልጅ አቅፋ፣ አዝላ፣ አጥብታ፣ መግባ፣ ንጽሕናውን ጠብቃ፣ በክብካቤ የምታሳድግ እናት ታስፈልገዋለች፤ እናትም የሚያከብራትና የሚያስከብራት ልጅ ያስፈልጋታል፤ እንደዚሁም ሁሉ ጌታችን እመቤታችንን የምእመናን እናት እንድትሆን ሲያደርግ፣ በሥጋዊም ሆነ በመንፈሳዊ ሕይወታችን ተጎሳቁለን እንዳንጎዳ በጸሎቷ፣ በልመናዋ፣ በአማላጅነቷ እያገዘችና እየደገፈች ወደ እግዚአብሔር መንግሥት ልታደርሰን ብሎ እንደ ሆነ ልብ ብሎ ማስተዋሉ ተገቢ ነው፡፡

ምእመናንም የእመቤታችን ልጆች እንድንሆን ማድረጉ፣ በዚህ ዓለም ስንኖር እርስዋን አክብረንና አስከብረን በስሟ እየተማፀን የበረከቷና የጸጋዋ ተካፋይ እንድንሆን ብሎ እንደሆነ በውል መገንዘብ ያስፈልጋል፡፡ ሐዋርያው ቅዱስ ዮሐንስ ‹‹እነኋት እናትህ›› ከተባለበት ሰዓት ጀምሮ እመቤታችንን ወስዶ በቤቱ አኑሮአታል፤ ከዚያን ጊዜ ጀምሮ እመቤታችን በእያንዳንዱ አማኝ ልጇ ቤት በመንፈስ እየገባች ትኖራለች፡፡

በዚህ የጌታችን ቃል፣ የሐዋርያት ትምህርትና ትውፊት መሠረት የኢትዮጵያ ኦርቶዶክስ ተዋሕዶ ቤተ ክርስቲያን ምእመናን ቤት፣ የእመቤታችን ቤት ሆኖ ይገኛል፤ ምክንያቱም በቤቱ የድንግል ማርያምን ሥዕል አስገብቶ “እምዬ እናቴ፣ ብፅዕት ነሽ” እያለ የማይጸልይና የማይማፀን የለምና፣ በዚህም የኢትዮጵያ ኦርቶዶክስ ተዋሕዶ ቤተ ክርስቲያን ምእመን የሆነ ሁሉ፣ የእግዚአብሔርን ቃል ሳይሸራርፍ፣ ሳይቀናንስና ሳያጣምም እንዳለ ተቀብሎ እየፈጸመ ይገኛል፤ ቃሉን በምልአት በመጠበቁና በመፈጸሙም እንደ ቃሉ ተስፋ ለዘለዓለም ሕያው ሆኖ ይኖራል፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት፤

እግዚአብሔር በቅድስት ድንግል ማርያም በኩል የሰጠን ትልቁ ስጦታ ፍጹም ፍቅር ነው፡፡ ይኸውም በእናት እና በልጅ መካከል ያለውን ፍቅር ነው፤ ያ ፍቅር ነው እስከ አሁን እመቤታችንንና እኛን አስተሳስሮ የሚገኘው፤ ከዚህ ፍቅር ሊለዩን የሚሞክሩትን ሁሉ በእግዚአብሔር ቃል፣ በኦርቶዶክሳዊ እና በኢትዮጵያዊ መንፈስ ልንቋቋማቸው ይገባል፡፡ ቅድስት ድንግል ማርያምን ብፁዕት ነሽ እያለ የሚያመሰግን ሁሉ፣ እንደ ኤልሳቤጥ በመንፈስ ቅዱስ የተሞላና የእግዚአብሔርን ቃል በምልአት የያዘ መሆኑን ርግጠኛ ይኹን፡፡

በእኛ እና በቅድስት ድንግል ማርያም ያለው ፍቅር ዓቢይና ጥልቅ እንደመሆኑ መጠን፣ ስመ ማርያምን ጠርቶ ቁራሽ እንጀራ የሚለምን ሁሉ፣ ስለ እርስዋ ፍቅር ብለን ለድሆች ስንዘክር፣ የነበረውን ሃይማኖታዊ ተግባራችን ዛሬም ሳይቀዘቅዝ ሊቀጥል ይገባል፡፡

በዚህ በጾመ ማርያም ወቅት የተራቡትን በማጉረስ፣ የታረዙትን በማልበስ፣ የታመሙትን በመጠየቅ፣ የታሠሩትን እግዚአብሔር ያስፈታችሁ በማለት፣ በማኅበረ ሰቡ መካከል መቻቻልን፣ መተማመንን፣ ወንድማማችነትን፣ ስምምነትን፣ ፍቅርንና ሰላምን በማስፈን ሱባኤውን ልንፈጽም ይገባል፤ ከዚህም ጋር በአሁኑ ጊዜ በስፋት እያጋጠመ ያለውን የትራፊክ አደጋ መቀነስ ይቻል ዘንድ፣ ምእመናን ሁሉ ወደ ቤተ ክርስቲያን ሲመላለሱም ሆነ በሌላ ቦታ እንቅስቃሴ ሲያደርጉ ጥንቃቄ ባልተለየው ሁኔታ እንዲሆን፣ ሹፌሮችም ሲያሽከረክሩ ሓላፊነት፣ ጥንቃቄና ማስተዋል ባልተለየው ሁኔታ እንዲሠሩ መንፈሳዊ መልእክታችንን እናስተላልፋለን፤ በየቤተ ክርስቲያኑ የሚገኙ መምህራንና ሰባክያንም የጉዳዩን አሳሳቢነት በማስገንዘብ ሕዝቡ ከትራፊክ አደጋ ጥንቃቄ ያደርግ ዘንድ በዚሁ ሱባኤ ሰፊ ትምህርት እና ምክር እንዲሰጡ አደራ ጭምር መልእክታችንን በእግዚአብሔር ስም እናስተላልፋለን፡፡

እግዚአብሔር ኢትዮጵያን ይባርክ፤ ይቀድስ፤
ወስብሐት ለእግዚአብሔር፤ አሜን፡፡

አባ ማትያስ ቀዳማዊ
ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት
ነሐሴ ፩ ቀን ፳፻፰ ዓ.ም.

5 thoughts on “ከእመቤታችን የእናትነት ፍቅር ሊለዩን የሚሞክሩትን፥ በእግዚአብሔር ቃል፣ በኦርቶዶክሳዊና በኢትዮጵያዊ መንፈስ ልንቋቋማቸው ይገባል – ብፁዕ ወቅዱስ ፓትርያርኩ

  1. Anonymous August 9, 2016 at 8:34 pm Reply

    Mothers in Ethiopia are pouring tear drops like winter rain. As a head of our church we expect prayers and condolences from you to those poor mothers who lost their hopes (sons) by your tyrant cousins. Writing about traffic is laughable and i don’t think you mean it. Well it depends how you see people. If you think only those from north are the one you writing to, it is understandable. But God sees injustice and he will give justice in his time and i pray that God sees the tears drops those mothers, fathers , sisters brothers as Rahel’s and give us liberty.
    May God comfort all those who lost loved ones.

  2. Anonymous August 10, 2016 at 9:11 am Reply

    Kale hiwot Yasemalin!!!!!!
    Tesfa alegn Ze-mehal shewa

  3. Anonymous August 15, 2016 at 9:51 pm Reply

    አስመሳየዬች ናቸው የሰለቹን፣ሰይጣን በሰው ተመስሎ ከተገለፀ በአባ ማትያ በሰረቀ በኤልያስ አብርሃ እና በመሰሎቻቸው የመናፍቃን ሎሌዎች ነው፣መንግስት ሀዝብን እየገደለ አትተንፍሱ የሚሉ የሃይማኖት መሪ!!!!!ወይ ዘመን አያሳየን የለ!!!!

    • Anonymous August 19, 2016 at 10:04 pm Reply

      ሃይማኖት ሌላ ፖለቲካና ዘረኝነት ሌላ
      አንተ ሃይማኖታዊ ዓይን ያለህ አትስመልም
      በፖለቲካና በዘረኝነት ታውረሃል

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: