የአ/አበባ ሀ/ስብከት ጽ/ቤት በተሐድሶ ኑፋቄ አደጋ ውስጥ! ‘አባ’ አፈ ወርቅ ዮሐንስ በምክትል ሥራ አስኪያጅነት ተመደበ፤15 አለቆችና ጸሐፊዎችም ተዛውረዋል

ከሆሮ ጉድሩና ወሊሶ በምግባር ብልሽትና በእምነት ሕፀፅ ቢባረርም፤ በቀድሞው የሀገረ ስብከቱ አስተዳደር በኮልፌ ቀራንዮ ክፍለ ከተማ ሥራ አስኪያጅነት ተመድቦ በምዝበራ የቆየውና፤ ከውጭ ጉዳዩ ‘አባ’ ቃለ ጽድቅ ሙሉጌታ ጋር ባለው የዓላማና የጥቅም ግንኙነት፤ ከፓትርያርኩ በተሰጠ ቀጥተኛ አመራርና በሥራ አስኪያጁ ጎይትኦም ያይኑ በተፈረመ ደብዳቤ፣ በዛሬው ዕለት፣ በሀገረ ስብከቱ ምክትል ሥራ አስኪያጅነት የተመደበው፣ መናፍቁ እና ዋልጌው መልአከ ገነት ’አባ’ አፈ ወርቅ ዮሐንስ

• በምደባው፥ የውጭ ጉዳዩ ‘አባ’ ቃለ ጽድቅ፣ ፓትርያርኩን በመማለድ ሚና ተጫውቷል
• በአሜሪካ ያሉት፣ ረዳት ሊቀ ጳጳሱ ብፁዕ አቡነ ሕዝቅኤል ስለማወቃቸው አጠያያቂ ኾኗል
• ከወሊሶ በብልሹነቱ ሲባረር፣ በኮልፌ ቀራንዮ ክ/ከተማ በሥ/አስኪያጅነት ተመድቦ ቆይቷል
• በክፍለ ከተማው፣ በአጥቢያዎች የቦታ ኪራይ ሙስና፣ በእምነት ሕፀፅና በዘለፋው ይታወቃል
• ከጎይትኦም ቀጥሎ፣ በከፍተኛ ሓላፊነት የተቀመጠ የተሐድሶ መናፍቅ መኾኑ ነው!!!
  

*               *             *

• ዝውውሩ፥ ጎይትኦም ያይኑ፣ ከአስተዳደሩ ይልቅ ከንቡረ እድ ኤልያስጋ የመከረበት ነው
• ሀገረ ስብከቱ፣ “ተሸጠናል” በሚሉት እና ዝውውሩን በሚደግፉት መካከል እየታመሰ ነው
• እነንቡረ እድ ኤልያስ ኣብርሃ፣ በሥራ አስኪያጁ አማካይነት በመቶ ሺሕዎች አጋብሰውበታል
• በኑፋቄ፣ በሙስና እና በአቅም ማነስ መጠየቅ‘ጂ ዕድገቱ እና ዝውውሩ የማይገባቸውም አሉበት
  
• ከደ/ሲና እግዚአብሔር አብ የተባረሩትና የተጠያቂነታቸው ጉዳይ ያልተቋጨው አለቃም ይገኙበታል፡፡

*               *              *

ረዳት ሊቀ ጳጳሱ ባልተገኙበት፣ የሀገረ ስብከቱን የሰው ኃይል አስተዳደርና የካህናት አስተዳደር ዋና ክፍሎች ሓላፊዎችን በመጫንና ለአስተዳደር ጉባኤው ዱብ ዕዳ በኾነ የሥራ አስኪያጁ ጎይትኦም ያይኑና የንቡረ እድ ኤልያስ ኣብርሃ ምክርና ተጽዕኖ የተደረገው የአድባራት አለቆች ዝውውር፤

• የደብረ ሲና እግዚአብሔር አብ ወደ ቃሊቲ ቅዱስ ገብርኤል
• የቃሊቲ ቅዱስ ገብርኤል ወደ ደብረ አሚን አቡነ ተክለ ሃይማኖት
• የደብረ አሚን አቡነ ተክለ ሃይማኖት ወደ ጽርሐ አርያም ቅዱስ ሩፋኤል
• የጽርሐ አርያም ቅዱስ ሩፋኤል ወደ ቃሊቲ ቁስቋም
• የቃሊቲ ቁስቋም ወደ ደብረ ይድራስ ቅዱስ ጊዮርጊስ
• የደብረ ይድራስ ቅዱስ ጊዮርጊስ ወደ ጃቲ ኪዳነ ምሕረት
• የጃቲ ኪዳነ ምሕረት ወደ አንቀጸ ምሕረት ቅዱስ ሚካኤል
• የአንቀጸ ምሕረት ቅዱስ ሚካኤል በጡረታ ተገልለዋል፤
  
• ወደ ውጭ ጠፍተው የነበሩትና ፓትርያርኩን ይቅርታ ጠይቀው በመመለሳቸው ትእዛዝ የተሰጠላቸው የቀድሞው የመንበረ ጸባዖት ቅድስት ሥላሴ ካቴድራል ሊቀ ሥልጣናት አባ ኪሮስ ጸጋዬ በአያት ኪዳነ ምሕረት ሲመደቡ፤ የአያት ኪዳነ ምሕረቱ ወደ ደብረ ሲና እግዚአብሔር አብ፤
• የቱሉ ዲምቱ ቅዱስ ጊዮርጊስ ወደ አየር ማረፊያ ቅዱስ ጊዮርጊስ
• የአየር ማረፊያ ቅዱስ ጊዮርጊስ ወደ ሰሚት ቅዱስ ጊዮርጊስ
• የሰሚት ቅዱስ ጊዮርጊስ ወደ ሉቂ አቡነ ገብረ መንፈስ ቅዱስ
• የሉቂ አቡነ ገብረ መንፈስ ቅዱስ ከአስተዳዳሪነት ተነሥተው በክህነት ደረጃ እንዲያገለግሉ ተደርገዋል፡፡

---

*“ሕዝብን ሳንሰማ የአለቆችን የበላይነት እናረጋግጣለን” ሲባል የነበረበት የቀድሞው አስተዳደር ዘይቤ ተሽሮ ለምእመናንና ለሰበካ ጉባኤያት ጥያቄ ምላሽ የተሰጠበት ዝውውር እንደኾነ ቢነገርም፤“ተሸጠናል፤ ያለደረጃችን ተመድበናል፤ ቦታችንን ተነጥቀናል” በሚሉትና “ከ80ሺሕ እስከ 150ሺሕ ለንቡረ እዱ የከፈለንበት ነው፤ መጽድቅ አለበት” በሚሉት መካከል ከፍተኛ ፍጥጫ አስከትሎ ሰንብቷል፡፡

ለቋሚ ሲኖዶሱ በቀረበበት ወቅትም፣ እንደ መልአከ ሰላም አባ ገብረ ሚካኤል ወልደ ሳሙኤል ካሉትና፣ በአማሳኝነታቸው ጉዳያቸው በእንጥልጥል ላይ ከሚገኙት አለቆች አንፃር፣ ከፓትርያርኩ ጋር ከፍተኛ ጭቅጭቅ አስነሥቶ ነበር፡፡

ከአማሳኝነቱም ጋር፣ በሃይማኖት አቋማቸው በተነሣባቸው ጥያቄ፤ ከደብረ ብርሃን ሀ/ስብከት ቢባረሩም፤ በአኹኑ ዝውውር በቱሉ ዲምቱ ቅዱስ ጊዮርጊስ የተመደቡት እንደ መልአከ ብርሃናት አባ ማርቆስ ብርሃኑ ዓይነቱም የሚገኙበት ነው፡፡

*                *               *

ሥራ አስኪያጁ፣ ከአስተዳደር ጉባኤው ዕውቅና ውጭ መክረውና ወስነው ያዛወሯቸው ጸሐፊዎች፤

• የየካ ደብረ ሣህል ቅዱስ ሚካኤል ወደ ደብረ አሚን አቡነ ተክለ ሃይማኖት
• የደብረ አሚን አቡነ ተክለ ሃይማኖት ወደ የካ ደብረ ሣህል ቅዱስ ሚካኤል
• የጽርሐ አርያም ቅዱስ ሩፋኤል ወደ ጎላ ጽርሐ ጽዮን ቅዱስ ሚካኤል
• የጎላ ጽርሐ ጽዮን ቅዱስ ሚካኤል ወደ ደብረ ሲና እግዚአብሔር አብ
• *የደብረ ሲና እግዚአብሔር አብ ወደ ጃቲ ኪዳነ ምሕረት
• የጃቲ ኪዳነ ምሕረት ወደ ሰሚት ቅዱስ ጊዮርጊስ*
• የሰሚት ቅዱስ ጊዮርጊስ ወደ ፈረንሳይ ለጋስዮን ቅዱስ ጊዮርጊስ
• የፈረንሳይ ለጋስዮን ቅዱስ ጊዮርጊስ ወደ ቡልቡላ መድኃኔዓለም
• የቡልቡላ መድኃኔ ዓለም ወደ ሰዓሊተ ምሕረት ቅድስት ማርያም
• የሰዓሊተ ምሕረት ቅድስት ማርያም ወደ ቦሌ ቅድስት ማርያም
• የቦሌ ቅድስት ማርያም ወደ ጽርሐ አርያም ቅዱስ ሩፋኤል
• *የቱሉ ዲምቱ ቅዱስ ጊዮርጊስ ወደ ቲሊ ዶሮ አቡነ ተክለ ሃይማኖት
• የቲሊ ዶሮ አቡነ ተክለ ሃይማኖት ወደ ቱሉ ዲምቱ ቅዱስ ጊዮርጊስ፤

---

*ዝውውሩ በዋናነት፤ በየአድባራቱ ያለውን አለመግባባትና ብጥብጥ፤ ለመፍታት የታሰበበት ነው ቢባልም፤ ለሀገረ ስብከቱ የአስተዳደር ጉባኤ ቀርበው የታዩት፣ የሦስት አድባራት ጉዳዮች ብቻ እንደኾኑ ተገልጧል፡፡

የተቀሩት፣ ለአስተዳደር ጉባኤው ሳይቀርቡና ሳያውቀው፣ ሥራ አስኪያጁ፣ ጸሐፊዪቱንና መዝገብ ቤቷን፣ ባለፈው ቅዳሜ በድንገት በመጥራት፣ ደብዳቤአቸው ተዘጋጅቶና ተፈርሞ በዛሬው ዕለት ወጪ የተደረጉ ናቸው፡፡

ያለብቃታቸውና ያለደረጃቸው ዕድገት ያገኙ፤ ስማቸውን እንኳ በአግባቡ መጻፍ የማይችሉ፤ በፎርጅድ የትምህርት ማስረጃ በማጭበርበራቸው ርምጃ የተወሰደባቸው፤ አስከፊ ሙስናን ጨምሮ ከአገልጋይ ሰብእና በራቁ እንደ ጫት መቃም ባሉ ሱሶችና የሥነ ምግባር ችግሮች ተጠምደው፤ የተመደቡባቸውን ቦታዎች በመረበሽና በማስረበሽ የሚታወቁ ጸሐፊዎችም እንዳሉበት ተመልክቷል፡፡