የብፁዕ አቡነ ሚካኤል ሐውልተ ስምዕ በፓትርያርኩ ተመረቀ፤ በሙርሌ ታጣቂዎች ተወስደው የተመለሱ ሕፃናትን ባርከዋል

  • የሰማዕትነታቸው መታሰቢያ ሙዝየም ዕብነ መሠረት፣ በፓትርያርኩ ተቀምጧል
  • የክልሉን የፖሊስ ኮሚሽነር ጨምሮ ለ87 ምእመናን ጥምቀተ ክርስትና ተፈጽሞላቸዋል
  • በሙርሌ ታጣቂዎች ወላጆቻቸውን ያጡትን ቤተ ክርስቲያን ታሳድጋለች፤ታስተምራለች

/ፓትርያርኩ እና የጋምቤላ ሀገረ ስብከት/

the memorial statue of Abune Michael the martyr

በጎሬ ከተማ የተመረቀው የሰማዕቱ ብፁዕ አቡነ ሚካኤል ሐውልተ ስምዕ

የሰማዕቱ ብፁዕ አቡነ ሚካኤል የምስክርነት ሐውልት ትላንት ግንቦት 14 ቀን 2008 ዓ.ም. ብፁዕ ወቅዱስ ፓትርያርክ አቡነ ማትያስ፣ ብፁዓን ሊቃነ ጳጳሳት፣ የአርበኞች ማኅበር ፕሬዝዳንት፣ ማኅበረ ካህናት እና ማኅበረ ምእመናን በተገኙበት ሰማዕትነትን በተቀበሉበት በጎሬ ከተማ ተመርቋል፡፡

የብፁዕነታቸው ዐፅም ከነበረበት ሐውልታቸው ወደቆመበት ስፍራ በክብር ያረፈ ሲኾን፤ በስማቸው የሚገነባ ቤተ መዘክር ዕብነ መሠረትም በብፁዕ ወቅዱስ ፓትርያርኩ ተቀምጧል፡፡

ግፈኛው የኢጣልያ ፋሽስት፣ ኢትዮጵያን በወረረ ጊዜ፣ ሕዝቡን ሰብስበው ለጠላት እንዳይገዛ በማስተባበር፣ የቤተ ክርስቲያኑን ክብር እንዲጠብቅ በማደፋፈር ላይ ሳሉ ኅዳር 17 ቀን 1929 ዓ.ም. በፋሽስቱ እጅ የወደቁት ብፁዕነታቸው፥ ሕዝቡን እንዲያባብሉ፤ ኢጣልያም የኢትዮጵያ ገዥ እንደኾነች እንዲናገሩ፤ ፋሽስቱ በትልቅ ሹመት እና ሽልማት አግባብቷቸው ነበር፡፡

ብፁዕነታቸው ግን፡- “እኛ ጌታችን እግዚአብሔር ብቻ ነው፤ ሌላ ገዥ የለንም፤ ሰዉም ምድሪቷም እንዳትገዛ ገዝቻለኹ!” ብለው ከሌሎች ኹለት አርበኞች – ግራዝማች ተክለ ሃይማኖት እና ቀኛአዝማች ይነሡ – ጋር ከጎሬ ደብረ ገነት ቅድስት ማርያም ቤተ ክርስቲያን ወረድ ብሎ በሚገኝ ስፍራ፣ ኅዳር 24 ቀን 1929 ዓ.ም. በመትረየስ ጥይት ተደብድበው በተወለዱ በ55 ዓመታቸው ሰማዕት ኾነዋል፡፡

ብፁዕ ወቅዱስ ፓትርያርኩ፡- “ለሀገራቸው በነበራቸው ፍቅር በከፈሉት መሥዋዕትነት የአኹኑ ትውልድ ትልቅ ትምህርት ሊወስድ ይገባል፤” ብለዋል፡፡ የአርበኞች ማኅበር ፕሬዝዳንት ልጅ ዳንኤል ጆቴ መስፍን ደግሞ፣ “አባቶቻችንና አገራችንን ለጠላት አሳልፈን አንሰጥም፤ ብለው መሥዋዕትነት እንደከፈሉ ኹሉ እኛም ሀገራችንና ራሳችንን ለድኅነት አሳልፈን መስጠት የለብንም፤” ማለታቸውን ፋና ብሮድካስቲንግ ኮርፖሬት ዘግቧል፡፡

ብፁዕ ወቅዱስ ፓትርያርኩ ከጎሬ የሰማዕቱ ብፁዕ አቡነ ሚካኤል ሐውልተ ስምዕ ምረቃ መልስ፤ የኢሉ አባ ቦራ ሀገረ ስብከት በመቱ ከተማ ለሚያሠራው ባለአምስት ፎቅ ኹለገብ ሕንፃ የመሠረት ድንጋይ ማስቀመጣቸው ተጠቅሷል፡፡


Abune Mikael the martyrሰማዕቱ ብፁዕ አቡነ ሚካኤል፣ ከአባታቸው ከቄስ ገብረ ክርስቶስ እና ከእናታቸው ወ/ሮ ትኩዬ በ1874 ዓ.ም የተወለዱት፤ በቀድሞው አጠራር በጎንደር ጠቅላይ ግዛት በደብረ ታቦር አውራጃ አፈረዋናት ድምበር ወረዳ፣ ልጨ መስቀለ ክርስቶስ ነው፡፡ የጥንት ስማቸው ኃይለ ሚካኤል ነው፡፡ ግንድ አጠመም ቅዱስ ሚካኤል ቤተ ክርስቲያን ክርስትና ተነሥተውና በዚኹ አድገው፣ ለትምህርት በቅተው ለቁም ነገር በደረሱም ጊዜ ወላጆቻቸው መምህር ዋሴ ከሚባሉ አስተማሪ እንዲማሩ ሰጧቸው፡፡

ፊደል ከጀመሩበት እንደ ልጅ አንድም ቀን ጥፋት ሳይኖራቸው ትምህርታቸውን ሲከታተሉ ለማዕርገ ዲቁና እንደበቁ፤ መምህራቸው፣ የዜማ ትምህርት እንዲቀጥሉ መካነ ሰማዕት ገላውዴዎስ ለነበሩት መምህር ተድላ ሰጥተዋቸው ጾም ድጓ እና ምዕራፍ በሚገባ አደላድለዋል፡፡ ዝማሬ እና መዋስዕት፣ ድጓ፣ መዝገብ ቅዳሴ ከነትርጓሜው፣ አቋቋም እና ቅኔ በተለያዩ ቦታዎች በመዘዋወር ከታላላቅ መምህራን ተምረዋል፡፡

ማዕርገ ዲቁና እና ማዕርገ ቅስና ከግብፃዊው ሊቀ ጳጳስ ብፁዕ አቡነ ማቴዎስ ከተቀበሉ በኋላ ቤተ ክርስቲያንን በንጽሕና እና በድንግልና በጥሩ ሕይወት አገልግለዋል፡፡

ግንቦት 25 ቀን 1921 ዓ.ም ከአራት አባቶች ጋር ለመጀመሪያ ጊዜ ወደ ግብፅ በማቅናት ብፁዕ አቡነ ሚካኤል ተብለው ወደ ኢትዮጵያ ተመልሰዋል፡፡ ከብፁዕነታቸው ጋር ጵጵስናን የተቀበሉት ብፁዕ አቡነ ጴጥሮስ፣ ብፁዕ አቡነ ይሥሐቅ፣ ብፁዕ አቡነ አብርሃም ናቸው፡፡

ከግብፅ እንደተመለሱም ብፁዕ አቡነ ሚካኤል የምዕራብ ኢትዮጵያ/የኢሉባቦር፣ ካፋ እና የወለጋ ጠቅላይ ግዛት/፤ ብፁዕ አቡነ ጴጥሮስ የምሥራቅ ኢትዮጵያ፤ ብፁዕ አቡነ ይሥሐቅ የትግራይ እና የሰሜን ኢትዮጵያ፤ ብፁዕ አቡነ አብርሃም የጎንደር እና የጎጃም ጠቅላይ ግዛት ሊቃነ ጳጳሳት ኾነው ተሹመው ቅድስት ቤተ ክርስቲያንና ሀገርን አገልግለዋል፡፡

ግፈኛው የኢጣልያ ፋሽስት ኢትዮጵያን በወረረ ጊዜ ሀገራቸውን በአጥንታቸው እሾኽነት አስከብበው፣ በደማቸው የኦርቶዶክሳዊት ተዋሕዶ ሃይማኖትን ክብር አስጠብቀዋል፡፡ በሀገረ ስብከታቸው፣ ሕዝቡን ሰብስበው ለጠላት እንዳይገዛ በማስተባበር፣ የቤተ ክርስቲያኑን ክብር እንዲጠብቅ በማደፋፈር የአርበኝነት ተግባር ፈጽመዋል፡፡

ከብዙ አርበኛ ወንድሞቻቸው ጋር ከሀገር ወደ ሀገር በመዞር ቃለ ወንጌል በማስተላለፍ ሲፋጠኑ፣ የፋሽስት ጦር ሰቢ ከሚባል ጫካ ደርሶ ከበባቸው፡፡ በዚኹ ቦታ አድረው በማግሥቱ በጠላት ጦር ተያዙ፡፡

His Grace Abune Michael ZeGore
በጠላት እጅ እና በሞት ፊት በመቅረብ፡-
“እኔ የክርስቶስ ባሪያ የኾንኩ አባ ሚካኤል የማውቀው፤ ከላይ በሰማይ በምድር በመላ ፈጣሪዬ ኢየሱስ ክርስቶስን፤ በምድር ላይ እግዚአብሔር የቀባውን ኃይለ ሥላሴን እንጂ ሌላ ንጉሥ ከቶ አላውቅም፡፡ ይህች ሀገር በእምነት ቅድምናዋ የተነገረላት፤ ከጥንት ጀምራ ወልድ ዋሕድ በማለት ጸንታ ፈጣሪዋን ስታመሰግን የኖረች ናትና ለሮም ፓፓ እና ንጉሥ ልትገዛ አትፈቅድም፡፡ የሚፈቅድም ቢኖር የተወገዘ ይኹን፡፡ እንኳ ቃሌ አጥንቴ አይፍታው፡፡”

ብለው ሲጨርሱ ፋሽስቶች፣ ለስምንት ቀናት ከፀሐይ እና ከውርጭ አውለው እያሳደሩ አሰንብተው በፍፃሜ ዕረፍታቸው፣ ከተማሰ/ከተቆፈረ/ ጉድጓድ አግብተው በመትረየስ ጥይት ደብድበው ገደሏቸው፡፡

ፊቱኑም፣ በሰማዕትነት ክብር ማለፍን ይሹ የነበሩት ብፁዕ አቡነ ሚካኤል፤ ሰማዕቱ ብፁዕ አቡነ ጴጥሮስ አዲስ አበባ ላይ በፋሺስት ኢጣሊያ ከተገደሉ ከአራት ወራት በኋላ ጎሬ ላይ የሀገራቸውን ገናናነት እና የሃይማኖታቸውን ክብር መስክረው ፋሺስትን በማውገዝ ሰማዕትነትን ተቀብለዋል፡፡

“ብፁዕ አቡነ ሚካኤል ከማልዘነጋቸው ቆራጥ ኢትዮጵያውያን አርበኞች አንዱ ናቸው፤ ጳጳሱ በሞት ፊት ያሳዩት ድፍረት እና የሀገር ፍቅር ስሜት ምንጊዜም አይረሳኝም፤” ብሏል ስዊድናዊው ኮሎኔል ካውንት ካርል፡፡

በአርበኝነታቸው ለሃይማኖታቸው እና ለሀገራቸው ክብር ሲሉ ከፋሽስት ኢጣልያ ጋር ፊት ለፊት ተዋግተው የሞቱትን ክርስቲያኖች ሳይጨምር በየአድባራቱ እና በየገዳማቱ፤ በደብረ ሊባኖስ፣ በላሊበላ፣ በአኵስም፣ በጎንደር እና በዝቋላ ብዙ ባሕታውያንና ካህናት ለሃይማኖታቸው እና ለሀገራቸው መሥዋዕት ኾነዋል፤ በተባበሩበት መንግሥታት የስታቲስቲክስ ክፍል እንደተመዘገበው፣ 2 ሺሕ አብያተ ክርስቲያናት ተቃጥለው ከጥቅም ውጭ ኾነዋል፤ ፋሽስቱ፥ ቤተ ክርስቲያን ከብዙ ወራሪና ዘራፊ እየተከላከለች ያቆየቻቸውን የታሪክ እና የሃይማኖት ቅርሶች ዘርፎ ወስዶ ለቫቲካን አስረክቧል፡፡


በተያያዘ ዜና፣ በዚያው በጋምቤላ የክሉልን ፖሊስ ኮሚሽን ኮሚሽነር ጨምሮ ከተለያዩ አካባቢዎች ለመጡ 87 ምእመናን ግንቦት 14 ቀን 2008 ዓ.ም.ጥምቀተ ክርስትና እንደተፈጸመላቸው ተገልጧል፡፡

በከተማው በአዲስ ይዞታ የተሠሩት የመድኃኔዓለም እና የቅድስት አርሴማ ሕንፃ አብያተ ክርስቲያን እንዲኹም በነባሩ የጻድቁ አቡነ ተክለ ሃይማኖት ገዳም እና በቦንጋ የጻድቁ አቡነ ገብረ መንፈስ ቅዱስ አብያተ ክርስቲያን በፓትርያርኩ ቅዳሴ ቤት ተደርጎላቸዋል፤ የአንድ ት/ቤት እና ኹለገብ ሕንፃ ምረቃ የተካሔደ ሲኾን፤ ከጋምቤላ ዩኒቨርሲቲ አጠገብ በሚገኘው የጻድቁ አቡነ ተክለ ሃይማኖት ገዳምም፣ ለካህናት ማሠልጠኛ ግንባታ የመሠረት ድንጋይ ማስቀመጣቸው ታውቋል፡፡

በሌላ በኩል፤ ብፁዕ ወቅዱስ ፓትርያርኩ፣ ከብፁዓን ሊቃነ ጳጳሳት እና ከተለያዩ ባለድርሻ አካላት ጋር በመኾን በጋምቤላ ባካሔዱት ጉብኝት፤ በደቡብ ሱዳን ሙርሌ ጎሳ ታጣቂዎች ተወስደው የተመለሱ 56 ሕፃናትን በተሰበሰቡበት ማዕከል ተገኝተው ባርከዋቸዋል፡፡ ቅዱስነታቸው ስለ ጉብኝታቸው ለኢ.ቢ.ሲ እንደተናገሩት፣ “ጤንነታቸው ደኅና መኾኑን ተመልክተናል፤ የቀሩትንም ለማስመለስ መንግሥት ጥረት እያደረገ መኾኑ ተነግሮናል፤” ብለዋል፡፡

ቤተ ክርስቲያን፣ ለሕፃናቱ የተለያዩ አልባሳትንና አልሚ ምግቦችን ያበረከተች ሲኾን በቀጣይም፤ ወላጆቻቸውን በታጣቂዎቹ በግፍ ያጡ ሕፃናትን አሳድጎ ከማስተማር ጀምሮ የተለያዩ ድጋፎችን እንደምታደርግ ፓትርያርኩ እና የሀገረ ስብከቱ ሥራ አስኪያጅ አስታውቀዋል – “የኹላችን ግዴታ ስለኾነ ተመካክረን የምናደርገው ነገር ይኖራል፤ የምንችለውን ነገር ለማድረግ ወደኋላ የምንል አይደለንም፡፡”  የክልሉ መንግሥት፣ ቤተ ክርስቲያን ላደረገችው ሰብአዊ ረድኤት ምስጋናውን አቅርቧል፡፡

 

 

 

 

Advertisements

One thought on “የብፁዕ አቡነ ሚካኤል ሐውልተ ስምዕ በፓትርያርኩ ተመረቀ፤ በሙርሌ ታጣቂዎች ተወስደው የተመለሱ ሕፃናትን ባርከዋል

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: