ትንሣኤ የአሸናፊነትና የድል አድራጊነት በዓል ነው! ከሴኩላሪዝምና ግሎባላይዜሽን ከባድ ጫናዎች ሃይማኖታችንንና ዕሴቶቹን መጠበቅና ማጽናት ይገባል(ፓትርያርኩ)

የዘመናችን ትልቁ የሃይማኖት ተግዳሮት፡-

  • ቴረሪዝም፣ ሴኩላሪዝምና ግሎባላይዜሽን፥ በማንነትና በሃይማኖት ላይ ከባድ ጫና እየፈጠሩ ነው
  • ሃይማኖትንና የማንነት ዕሴቶችን አጽንቶ በመያዝ ካልተመከቱ በቀር ፈተናው ቀላል አይኾንም
  • ምእመኑ ለሃይማኖቱ እንዲጋደልና ማንነቱን እንዲጠብቅ ቤተ ክርስቲያን አጥብቃ ትመክራለች

+++

  • የሞት እና የመቃብር ምንጩ ሕገ ተፈጥሮ ሳይኾን ግብረ ኃጢአት ነው፤ የበደል ውጤት ነው
  • አለመታዘዝ እና የተሳሳተ ምርጫ ኃጢአትን ወልዶ የሞት እና የመቃብር ቅጣትን አስፈርዷል
  • ዲያብሎስ በኃጢአት ጦር ሰውን ሲገድል፤ መቃብር ሙታንን ሲማግድ ፭ሺ፭፻ ዓመታት አለፉ

+++

  • ኃያል ድል አድራጊ ዘር የተሸነፈውን ሊታደግ ከሴት እንደሚወለድ ተስፋ ድኅነት ተሰጥቷል
  • በኃጢአት፣ በዲያብሎስ፣ በሞት እና በመቃብር ላይ ሙሉ ሥልጣኑን በትንሣኤው አረጋግጧል
  • በትንሣኤው የተሸነፉት ሞትና መቃብር፣ በዳግም ምጽአቱ ህልውናቸውን አጥተው ያከትማሉ

+++

christ riseየአሸናፊነትና የድል አድራጊነት በዓል – ትንሣኤ፡-

  • በእግዚአብሔር አርኣያ እና ምሳሌ የተፈጠረው ሰው በመጨረሻ በአምላኩ ቸርነት አሸናፊ እንደኾነ ያስገነዝበናል፤
  • ዲያብሎስን፣ ኃጢአትን፣ ሞትንና መቃብርን የሚያሸንፉ መስተጋድላንና መዋዕያን ቅዱሳንን በብዛት አስገኝቷል፤
  • ክርስቶስ ተነሣ ብለን የምሥራች በመናገር ብቻ ሳይኾን ተስፋ ትንሣኤያችንን በማስተጋባት ልናከብረው ይገባል፡፡

+++

በዓለ ትንሣኤን ስናከብር፡-

  • ጧሪ የሌላቸውን አረጋውያን፣ አሳዳጊ የሌላቸውን ሕፃናት፣ በድርቅ የተጎዱ ወገኖችንና ሕሙማንን በመጠየቅና በመርዳት፤
  • በተለይም የግድያና የአፈና ሠቆቃ የደረሰባቸውን የጋምቤላ ልጆቻችንንና ወገኖቻችንን በኹሉም ነገር ከጎናቸው ኾነን በማገዝ፣ በመመገብ፣ በማጠጣትና በማልበስ፤
  • ሃይማኖታችንንና ከሃይማኖት የተወረሱ ዕሴቶቻንን እየጠበቅን ለሃይማኖታችንና ለማንነታችን በመቆም ፍጹም የደስታና የድል ቀን አድርገን ልናከብረው ይገባል፡፡

+++

ብፁዕ ወቅዱስ ፓትርያርክ አቡነ ማትያስ

ብፁዕ ወቅዱስ ፓትርያርክ አቡነ ማትያስ

በስመ አብ ወወልድ ወመንፈስ ቅዱስ አሐዱ አምላክ፤ አሜን፡፡
  • በሀገራችን በኢትዮጵያ በገጠርና በከተማ የምትኖሩ፣
  • ከሀገር ውጭ በተለያዩ አህጉር የምትገኙ፤
  • የሀገራችንን ዳር ድንበር ለመጠበቅና ለማስከበር በየጠረፉ የቆማችኹ፤
  • በሕመም ምክንያት በየጠበሉና በየሆስፒታሉ ያላችኹ፤
  • እንዲሁም የሕግ ታራሚዎች ኾናችሁ በየማረሚያ ቤቱ የምትገኙ ኢትዮጵያውያንና ኢትዮጵያውያት፤

ሞትንና መቃብርን ድል አድርጎ የተነሣው፣ የሕይወት ራስና የኹሉ ፈጣሪ የኾነው፣ ጌታችን አምላካችንና መድኃኒታችን ኢየሱስ ክርስቶስ እንኳን ለ፳፻ወ፰ ዓ.ም. በዓለ ትንሣኤው በሰላም አደረሳችኹ!!

‹‹ዓይቴ እንከ ቀኖትከ ሞት፤ ወዓይቴ እንከ መዊዖትከ ሲኦል = ሞት ሆይ፥ መውጊያኽ የት አለሲኦል ሆይ፥ ድል መንሣትኽ የት አለ?›› /1ቆሮ. 15÷55/

የተወደዳችኹ የመንፈስ ቅዱስ ልጆቻችን ምእመናንና ምእመናት፤

ሞት እና መቃብር የኃጢአት እና የበደል ውጤቶች እንጂ የተፈጥሮ ዕድል ፈንታ ኾነው ለሰው የተሰጡ አይደሉም፡፡ ሰው በራሱ ምርጫ ካልኾነ በቀር የሚሞት ኾኖ እንዳልተፈጠረ ቅዱስ መጽሐፍ ሲገልጽ፥ ‹‹እግዚአብሔር አምላክም ሰውን እንዲኽ ብሎ አዘዘው፡ከገነት ዛፍ ሁሉ ትበላለኽ፤ ነገር ግን መልካምንና ክፉን ከሚያስታውቀው ዛፍ አትብላ፤ ከእርሱ በበላኽ ቀን ሞትን ትሞታለኽ፤›› ይላል፤ (ዘፍ.2÷16-17)፡፡ ሔዋንም የእግዚአብሔርን ትእዛዝ መሠረት አድርጋ ስትናገር፥ ‹‹እግዚአብሔር እንዳትሞቱ ከእርሱ አትብሉ፤ አትንኩትም፤›› ብሎናል ብላ አረጋግጣለች(ዘፍ.3፡3)፡፡

ከዚኽ አምላካዊ ቃል መረዳት እንደሚቻለው፣ አዳም አትብላ የተባለውን ዛፍ ባይበላ ኖሮ አይሞትም ነበር ማለት ነው፡፡ ከዚህ አንጻር የሞት እና የመቃብር ምንጩ ሕገ ተፈጥሮ ሳይኾን ግብረ ኃጢአት ኾኖ እናገኘዋለን ፡፡

በመሠረቱ ግብረ ኃጢአት የሚመነጨው ለእግዚአብሔር ካለመታዘዝ እንደኾነ ከዚኽ መረዳት እንችላለን፤ ምክንያቱም አዳም እና ሔዋን ኹለት ምርጫዎች ቀርበውላቸዋል፤ ማለትም በአንድ በኩል፣ ‹‹መልካም እና ክፉን ከሚያስታውቀው ዛፍ አትብሉ፤ ከበላችኹ ግን ትሞታላችኹ›› የሚል የእግዚአብሔር ትእዛዝ፤ በሌላ በኩል ደግሞ፣ ‹‹ብትበሉ ሞትን አትሞቱም፤ ነገር ግን ከዛፉ በበላችኹ ቀን ዓይኖቻችሁ ይከፈታሉ፤ እንደ እግዚአብሔርም መልካምንና ክፉን የምታውቁ ትኾናላችሁ፤›› የሚል የእባብ ወይም የሰይጣን ምክር ቀርቦላቸዋል፡፡

በዚኽ ጊዜ አዳም እና ሔዋን የእግዚአብሔርን ትእዛዝ ገሸሽ በማድረግ የእባቡን ምክር ተቀብለው ዛፉን በሉ፤ በዚኽም ከባድ በደልን ፈጸሙ፡፡ አዳም እና ሔዋን በዚኽ ድርጊታቸው እግዚአብሔርን ሐሰተኛ አድርገውታል፤ ምክንያቱም የእርሱን ትእዛዝ ትተው የእባቡን ምክር ሲቀበሉ፥ እግዚአብሔርን እንደ ሐሰተኛ፣ እባብን እንደ እውነተኛ አድርገው መቀበላቸው እንደኾነ ግልጽ ነውና፡፡

ኃጢአትን ወልዶ፣ ለልጅ ልጅ የሚተርፍ ከባድ የሞት እና የመቃብር ቅጣትን ያስፈረደ በደል፣ ይህ ለእግዚአብሔር ያለመታዘዝና የተሳሳተ ምርጫ ነው፤ የሞት ቅጣቱ ድሮውም ከዛፉ በበላኽ ቀን ትሞታለኽ ተብሎ በግልጽ የተነገረ ስለነበረ አዳም ዛፉን በበላ ቀን ቅጣቱ ወዲያውኑ ተግባራዊ ኾኖአል፤ ማለትም አዳም ‹‹ዛፉን እንደ በላ ወዲያውኑ ራቁቱን ወጥቶአል››፤ በመራቆቱም ከእውነተኛው ልብስ ከእግዚአብሔር እና ከጸጋዎቹ መለየቱ በዚህ ተረጋግጦአል፤ ሞት ማለት መለየት ማለት ነውና፡፡

በአዳም ላይ የተፈረደው ሞት ብቻ አይደለም፤ ‹‹አፈር ነህና ወደ አፈር ትመለሳለህ›› ተብሎም በሞት ላይ ርደተ መቃብር ተፈርዶበታል(ዘፍ. 3÷19)፡፡ ከዚኽ ጊዜ ጀምሮ ሰው ከእግዚአብሔር በመለየቱ ሞት እና መቃብር ተረክበውታል፡፡

በይቀጥላልም ሰው ለእግዚአብሔር ያለመታዘዝ ልምዱን አጠናክሮ ሲቀጥልበት፣ ዲያብሎስም በኃጢአት ጦር ሰውን እየወጋ ሲገድል፣ መቃብርም ሙታንን እየተቀበለ ሲማግድ አምስት ሺሕ አምስት መቶ ዓመታት አለፉ ፡፡

ይኹን እንጂ እግዚአብሔር ከመዓቱ አንጻር ምሕረቱን አያርቅምና በዲያብሎስ ምክር ድል ኾኖ የተሸነፈውን ሰው የሚታደግና ዲያብሎስን ድል የሚያደርግ ብርቱ እና ኃያል ዘር ከጊዜ በኋላ ከሴት እንደሚወለድ በመግለጽ ወዲያውኑ ተስፋ ድኅነትን ሰጥቶአል(ዘፍ. 3፡15)፡፡

ይህ ዘር የጠላት ዲያብሎስን ደጅ በድል አድራጊነት እንደሚወርስ ‹‹ዘርኽ የጠላትን ደጅ ይወርሳል›› ተብሎ፤ የምድር አሕዛብ ኹሉ በዚኽ ዘር እንደሚባረኩና እንደሚድኑ ‹‹በዘርኽ የምድር አሕዛብ ኹሉ ይባረካሉ›› ተብሎ በትንቢት እየተብራራ፣ እየተገለጸ እና እየተነገረ ቆይቶአል(ዘፍ. 22÷17)፡፡

ይህ ድል አድራጊ ዘር እንደ ትንቢቱ ቃል ከሴት ማለትም ከእመቤታችን ቅድስት ድንግል ማርያም ተወልዶ በዚኽ ዓለም ተገለጸ፤ ቅዱስ ወንጌልን እያስተማረ በዚኽ ዓለም በተመላለሰ ጊዜም፡-

  • ሕሙማን በመፈወስ፣
  • ዕውራንን በማብራት፣
  • ለምጻሞችን በማንጻት፣
  • ሓንካሳንን በማቅናት አዳኝነቱን አስረዳ፡፡

በፈጣሪ ሥልጣን ካልኾነ በቀር በፍጡር ሊደረጉ የማይችሉና ከአእምሮ በላይ የኾኑትን ዓበይት ተኣምራት በማድረግ ኹሉን የሚችል አምላክ መኾኑን አሳየ፡፡

ዲያብሎስ በጾሙ ወቅት ያቀረበበትን ፈተና በመበጣጠስ፤ እንደዚኹም “አንተ ሰይጣን፣ ከእርሱ ውጣ” እያለ ከሰዎች በማስወጣት፤ “ኃጢአትኽ ተሰርዮልኻል” እያለ ኃጢአትን በማስወገድ ሥልጣነ መለኰቱን ገሃድ አደረገ፤ ‹‹አልዓዛር አልዓዛር ውጣ ከመቃብር›› እያለ ሙታንን በማስነሣት በሞት እና በመቃብር ላይ ሥልጣን ያለው መንሥኤ ሙታን መኾኑንም በተግባር አረጋገጠ፡፡ በአጠቃላይ በኃጢአት፣ በዲያብሎስ፣ በሞት እና በመቃብር ላይ ሙሉ ሥልጣን ያለው ድል አድራጊ ዘር መኾኑን በተጨባጭ አሳየ፡፡

የማስተማር ጊዜውን ካጠናቀቀ በኋላ፣ በሰው ፈንታ ስለሰው ቤዛ ተሰቅሎ፣ ሞቶ እና ተቀብሮ የሰውን ዕዳ – ኃጢአት በመክፈል አምስት ሺሕ ከአምስት መቶ ዘመን ሙሉ በሲኦል የነበሩትን ነፍሳት ወደ ጥንተ ቦታቸው ወደ ገነት መልሶ አስገባ(1ኛ ጴጥ. 3÷18-19፤ ሉቃ. 23÷43) ፡፡

እርሱም በተቀበረ በሦስተኛው ቀን መቃብር ክፈቱልኝ፣ መግነዝ ፍቱልኝ ሳይል በራሱ መለኰታዊ ሥልጣን ተነሣ፡፡ በዚኽ ጊዜ የሞት መውጊያ የኾነው ኃጢአት ተሻረ፤ ሞት ተሸነፈ፤ መቃብርም ድል ኾኖ ባዶውን ቀረ፡፡

በጌታችን ትንሣኤ የተበሠረው የሞት መሸነፍ እና የመቃብር ድል መኾን፣ በዳግም ምጽአተ ክርስቶስ ለሰው ዘር ኹሉ እውን ይኾናል፤ ያን ጊዜ ሞት እና መቃብር ለአንዴ እና ለመጨረሻ ጊዜ ህልውናቸውን አጥተው ያከትማሉ፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት፤

የክርስቶስ ትንሣኤ ለሰው ኹሉ ትንሣኤ በኵር ኾኖ ተፈጽሞአል፤ በመኾኑም የትንሣኤን በዓል ስናከብር ‹‹ክርስቶስ ተነሣ›› ብለን የምሥራች በመናገር ብቻ ሳይኾን እኛም እርሱ በተነሣው አኳኋን እንነሣለን እያልን ተስፋ ትንሣኤያችንን በማብሠር እና በማስተጋባት ጭምር ሊኾን ይገባል፡፡

የእኛ ትንሣኤ በክርስቶስ ተበሥሮ አኹን በሒደት ላይ ያለ ሲኾን፣ መድኃኒታችን ኢየሱስ ክርስቶስ ዳግመኛ ተመልሶ ሲመጣ የኹላችን ትንሣኤ እውን ይኾናል፤ የሰው የመጨረሻ ዕድሉ ሞት ሳይኾን ትንሣኤ መኾኑም በዚያን ጊዜ ይረጋገጣል፡፡

በዚኽም ሰው በእግዚአብሔር መልክእ እና አምሳል የተፈጠረ ታላቅ ፍጡር እንደ መኾኑ መጠን ለዘለቄታው ተሸናፊ ሳይኾን በአምላኩ ቸርነት በመጨረሻ አሸናፊ እንደኾነ መገንዘብ እንችላለን፡፡ ዛሬም ቢኾን የሰው አሸናፊነት በመንፈሳዊም ኾነ በሥጋዊ ሕይወቱ በግልጽ የሚታይ ነው፡፡ ይኸውም፡

በሥጋዊ ሕይወቱ በኩል፤ ከጥንት ጀምሮ በተፈጥሮ ሀብት ላይ በሚያደርገው የምርምር እና የተግባር ጥረት ከጊዜ ወደ ጊዜ እያደገና ድል በድል እየተጓዘ ዛሬ ለደረሰበት የቴክኖሎጂ ብልጽግና በቅቶአል፡፡

በመንፈሳዊ ሕይወቱ በኩልም፤ ከአምልኮ ጣዖት ተላቆ በአንድ እውነተኛ አምላክ በማመንና ከእርሱ ጋር ግንኙነት በማድረግ በሞራል፣ በሥነ ምግባር እና በሃይማኖት የበለጸገ ማኅበረ ሰብ በዓለም እንዲኖር አስችሎአል፡፡

የክርስቶስ ትንሣኤ፥ ዲያብሎስን፣ ኃጢአትን፣ ሞትንና መቃብርን የሚያሸንፉ መስተጋድላንና መዋዕያን ቅዱሳን በብዛት እንዲገኙ አድርጎአል፤ አኹንም በዓለም ዙሪያ ኹሉ ስፍር ቁጥር የሌላቸው መንፈሳውያን አርበኞችና ድል አድራጊዎች አሉ፤ ባለፈው ዓመት በሊቢያ የተሠዉ ልጆቻችን በዚኽ መንፈሳዊ አርበኝነት የቅድስና ድልን የተጎናጸፉ ተጠቃሽ ሰማዕታት ናቸው፡፡

የክርስቶስ ትንሣኤ፥ ዲያብሎስን፣ ኃጢአትን፣ ሞትንና መቃብርን የሚያሸንፉ መስተጋድላንና መዋዕያን ቅዱሳን በብዛት እንዲገኙ አድርጎአል፤ አኹንም በዓለም ዙሪያ ስፍር ቁጥር የሌላቸው መንፈሳውያን አርበኞችና ድል አድራጊዎች አሉ፤ በሊቢያ የተሠዉ ልጆቻችን በመንፈሳዊ አርበኝነት የቅድስና ድልን የተጎናጸፉ ተጠቃሽ ሰማዕታት ናቸው፡፡

ስለኾነም ዲያብሎስን፣ ኃጢአትን፣ ሞትንና መቃብርን የሚያሸንፉ መስተጋድላንና መዋዕያን ቅዱሳን በብዛት እንዲገኙ አድርጎአል፤ አኹንም በዓለም ዙሪያ ሁሉ ስፍር ቁጥር የሌላቸው መንፈሳውያን አርበኞች እና ድል አድራጊዎች አሉ፤ ባለፈው ዓመት በሊቢያ የተሠዉ ልጆቻችን በዚኽ መንፈሳዊ አርበኝነት የቅድስና ድልን የተጎናጸፉ ተጠቃሽ ሰማዕታት ናቸው፡፡

የተወደዳችሁ የመንፈስ ቅዱስ ልጆቸቻችን ምእመናንና ምእመናት፤

የምንኖርባት ዓለም የትግል ሜዳ ናት፤ የዕለት ተዕለት ኑሮአችን ኹሉ በትግል የተሞላ በመኾኑ በሥጋዊም ሆነ በመንፈሳዊ ኑሮአችን ከትግሉ ማምለጥ አንችልም፤ እውነቱ ይህ ከኾነ የሚያዋጣው ከትግሉ መሸሽ ሳይኾን ታግሎ ማሸነፍ ነው፡፡

የጌታችን ነገረ መስቀልም የሚያስተምረን ዘይፈቅድ ይፀመደኒ ያጥብዕ ወይንሣእ መስቀለ ሞቱ ወይትልወኒ፤ ወዘኢፆረ መስቀለ ሞትየ ኢይክል ይፀመደኒ ወኢይደሉ ሊተ = ሊከተለኝ የሚወድ መስቀለ ሞቱን ይዞ በቆራጥነት ይከተለኝ፤ መስቀለ ሞቴን ተሸክሞ የማይከተለኝ ሊያገለግለኝም የኔ ሊኾንም አይችልም፤እያለ ነው(ማቴ.10÷38)፡፡

በዚኽ ክርስቶሳዊ የተጋድሎ ጥሪ ቅዱሳን ሐዋርያት እና ቅዱሳን ሰማዕታት በአጠቃላይም ክርስቲያኖች ኹሉ ወደ ትግሉ ሜዳ ተቀላቅለውና በድል አድራጊነት ግዳጃቸውን ተወጥተው ለቅዱሳን አንድ ጊዜ የተሰጠች ሃይማኖትን አስረክበውናል፡፡

ጌታችን አምላካችንና መድኃኒታችን ኢየሱስ ክርስቶስ በመስቀሉ፥ ዲያብሎስንና ኃጢአትን፣ በትንሣኤው፥ ሞትንና መቃብርን ድል አድርጎ እንደተነሣ፣ የእርሱ ተከታዮች የኾኑ ቅዱሳን ክርስቲያኖችም በዚያው ፍኖተ መስቀል እየተጓዙና ድልን እየተቀዳጁ ከኛ ዘንድ ያደረሱትን ሃይማኖታዊ ተልእኮ በተለመደው መንፈሳዊ ትግል በመጠበቅ፣ ለቀጣዩ ትውልድ ማስረከብ የእኛ ፈንታ ነው፡፡

የሃይማኖት ትግል በየወቅቱ የሚለዋወጥ ከሚኾን በቀር የሚቆም አይደለም፡፡ የዘመናችን ትልቁ የሃይማኖት ተግዳሮት፥ ቴረሪዝም፣ ሴኩላሪዝም እና ግሎባላይዜሽን በማንነት እና በሃይማኖት ህልውና ላይ እየፈጠሩ ያሉት ከባድ ጫና ነው፡፡ ሕዝበ ክርስቲያኑ፣ በአጠቃላይም በሀልዎተ እግዚአብሔር የሚያምኑ ኹሉ ሃይማኖት እና ዕሴቶቹ የፈጠሯቸውን የማንነት ጸጋዎች አጽንተው በመያዝ ካልመከቱ በቀር የሴኩላሪዝም እና የግሎባላይዜሽን ፈተና ቀላል አይኾንም፡፡

ስለኾነም ሕዝበ ክርስቲያኑ በዚኽ ረገድ ማለትም ሃይማኖቱንና ከሃይማኖት የተወረሱ ዕሴቶቹን፣ እንደዚኹም የተቀደሰ ባህሉን እየጠበቀ ለሃይማኖቱ እና ለማንነቱ እንዲቆም ቤተ ክርስቲያን አጥብቃ ትመክራለች፤ ታስተምራለችም፡፡

እኛ ክርስቲያኖች በሱባኤው ወቅት በጾም፣ በጸሎት፣ በምጽዋት፣ በንሥሐ፣ በቅዱስ ቊርባን፣ ፍቅርንና ሰላምን ገንዘብ በማድረግ ዲያብሎስንና ኃጢአትን ስንታገላቸው እንደቆየን ኹሉ፣ አኹንም በበዓለ ፋሲካው ቀን ጧሪ የሌላቸውን አረጋውያንን፣ አሳዳጊ የሌላቸውን ሕፃናት፣ በድርቅ የተጎዱትን ወገኖች በተለይም በአኹኑ ወቅት የግድያ እና የአፈና ሠቆቃ ደርሶባቸው በሐዘንና በችግር ላይ የሚገኙት የጋምቤላ ብሔረ ሰብ ልጆቻችንንና ወገኖቻችንን በኹሉም ነገር ከጎናቸው ኾነን በማገዝ፣ በመመገብ፣ በማጠጣት እና በማልበስ፤ በሽተኞችን በመጠየቅ እና በመርዳት ፍጹም የደስታ እና የድል ቀን አድርገን ማክበር ይገባናል፡፡ በዚኽ መልካም ሥራችንም የትንሣኤ ልጆች መኾናችንን ማስመስከር ይኖርብናል፡፡

በመጨረሻም ሕዝበ ክርስቲያኑ በዓለ ትንሣኤን ሲያከብር ማስታወስ ያለበት የክርስቶስን አሸናፊነት ነው፡፡ በአንጻሩ ደግሞ የክርስቶስ ተከታዮች የኾኑ ኹሉ አሸናፊዎች መኾን ይጠበቅባቸዋል፤ አሸናፊነታቸውም በሃይማኖት እና በልማት ላይ የተመሠረተ መኾን ይኖርበታል፡፡

በመኾኑም የሀገራችን ሕዝቦች በአጠቃላይ በድህነት ላይ የጀመሩትን ትግል በድል ማጠናቀቅ ይችሉ ዘንድ ሰላማቸውንና አንድነታቸውን በመጠበቅ የሀገራችንን ሕዳሴ አጠናክረው እንዲቀጥሉ ጥሪያችንን በእግዚአብሔር ስም እናስተላልፋለን፡፡

መልካም የትንሣኤ በዓል ያድርግልን፤

እግዚአብሔር ኢትዮጵያንና ሕዝቦቿን ይባርክ፤ ይቀድስ፤

ወስብሐት ለእግዚአብሔርአሜን፡፡

 

አባ ማትያስ ቀዳማዊ

ፓትርያርክ ርእሰ ሊቃነ ጳጳሳት ዘኢትዮጵያ

ሊቀ ጳጳስ ዘአኵስም ወዕጨጌ ዘመንበረ ተክለ ሃይማኖት

ሚያዝያ ፳፫ ቀን ፳፻፰ ..

አዲስ አበባኢትዮጵያ

Advertisements

One thought on “ትንሣኤ የአሸናፊነትና የድል አድራጊነት በዓል ነው! ከሴኩላሪዝምና ግሎባላይዜሽን ከባድ ጫናዎች ሃይማኖታችንንና ዕሴቶቹን መጠበቅና ማጽናት ይገባል(ፓትርያርኩ)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: