ብፁዕ ወቅዱስ ፓትርያርክ አቡነ ማትያስ: የ፳፻፰ ዓ.ም የልደት በዓልን አስመልክተው ያስተላለፉት መልእክት

Pat Abune Mathias

ቃለ በረከት ዘብፁዕ ወቅዱስ አቡነ ማትያስ ቀዳማዊ ዘተናገረ በእንተ በዓለ ልደት ዓቢይ ዘእግዚእነ ወአምላክነ ወመድኃኒነ ኢየሱስ ክርስቶስ ሎቱ ስብሐት

በስመ አብ ወወልድ ወመንፈስ ቅዱስ አሐዱ አምላክ፤ አሜን፡፡

  • በሀገራችን በኢትዮጵያ በገጠር እና በከተማ የምትኖሩ፤
  • ከሀገር ውጭ በተለያዩ አህጉር የምትገኙ፤
  • የሀገራችንን ዳር ድንበር ለመጠበቅ እና ለማስከበር በየጠረፉ የቆማችኹ፤
  • በሕመም ምክንያት በየሆስፒታሉ ያላችኹ፤
  • የሕግ ታራሚዎች ኾናችኁ በየማረሚያ ቤቱ የምትገኙ ኢትዮጵያውያንና ኢትዮጵያውያት፤

የርስተ መንግሥቱ ወራሾች እንኾን ዘንድ በጌታችን በአምላካችንና በመድኃኒታችን በኢየሱስ ክርስቶስ ዳግመኛ የወለደን እግዚአብሔር አምላክ እንኳን ለኹለት ሺሕ ስምንተኛው የኢየሱስ ክርስቶስ በዓለ ልደት በሰላም አደረሳችኹ!!

“ወበዝንቱ ተዐውቀ ፍቅሩ ለእግዚአብሔር ላዕሌነ እስመ ለወልዱ ዋሕድ ፈነዎ ውስተ ዓለም ከመ ንሕየው በእንቲአሁ፤ የእግዚአብሔር ፍቅሩ በዚኽ በእኛ ላይ ታወቀ፤ በእርሱ በኩል በሕይወት እንኖር ዘንድ እግዚአብሔር አንድ ልጁን ወደ ዓለም ልኮታልና፤” (1ኛዮሐ.4÷9)፡፡

የእግዚአብሔር ባሕርይ ፍቅር እንጂ ጥላቻ አይስማማውም፤ ጽድቅ እንጂ ሐሰት አይዋሐደውም፤ ብርሃን እንጂ ጨለማ አይቀርበውም፤ ሕይወት እንጂ ሞት በእርሱ ዘንድ የለምና በፍጹም ፍቅሩ እኛን ለመፈለግ ሥጋችንን ለብሶ በመካከላችን ስለ ተገኘ ለእርሱ የሚገባ የአምልኮ ምስጋና እናቀርባለን፡፡

እግዚአብሔር ፍጹም በኾነ ፍቅሩ ሰማያትንና ምድርን እንደዚኹም በውስጣቸው የሚገኙትን፣ የሚታዩ እና የማይታዩትን ፍጥረታት ኹሉ ካለመኖር ወደ መኖር አምጥቶአል፤ ወይም አስገኝቶአል፤

ፈጣሬ ፍጥረታት የኾነ እግዚአብሔር አምላካችን በየዓይነቱ የፈጠራቸው ፍጥረታት በእርሱ ዘንድ ከሚታወቁ በስተቀር በፍጡራን አቅም ተቆጥረው የሚዘለቁ ባይኾኑም በጥቅሉ የሚታዩ እና የማይታዩ፣ ሕይወት ያላቸው እና የሌላቸው ተብለው ሊመደቡ ይችላሉ፡፡

ከፍጡራን መካከል ሕይወት ያለውና በግዙፋኑ በኩል ሊታይ የማይችለው የቀደመ ስሙ ሳጥናኤል የኋላ ስሙ ሰይጣን፣ ወይም ዲያብሎስ የተባለ ረቂቅ መልአክ፣ ከእግዚአብሔር የተሰጠውን ነጻ ፈቃድ ለክፉ ነገር በመጠቀም በፈጸመው ትልቅ በደል ለፍርድ እና ለቅጣት ተዳርጓል(ኢሳ.14÷12-15፤ ይሁዳ ቁ. 6)፡፡

ይህ ስሑት መልአክ በራሱ ስሕተት ሳያበቃ ሕያው ኾኖ በግዘፍ የሚታየውን ሰው በማሳሳት እንደ እርሱ ለፍርድ እና ለቅጣት እንዲጋለጥ አደረገ (ዘፍ 3÷1-24፤ ራእይ 12÷7-9)፡፡

በዚኽም ምክንያት ሰው ሕይወቱን ዐጣ፤ ሕይወት ማጣት ማለት እግዚአብሔርን ማጣት ወይም ከእግዚአብሔር እና ከመልካም ስጦታው መለየት፣ መራቅ፣ መወገድ ማለት ነው፡፡

ዲያብሎስ በዘረጋው ወጥመድ ተሰነካክሎ የወደቀው እና ሕይወቱን ያጣው ሰው ለድርብ የሞት ፍርድ ተዳረገ፡፡ በዚኽ ፍርድ መነሻነትም አዳም ከነልጆቹ በሞተ ሥጋ ላይ ሞተ ነፍስ፣ በርደተ መቃብር ላይ ርደተ ገሃነም ወይም ሥጋው በመቃብር ነፍሱ በገሃነም እንዲቀጣ ተፈረደበት (ዘፍ.2÷17፤ 3÷16-20)

ይህ ኹሉ ሊኾን የቻለው አዳም ከእግዚአብሔር በመለየቱ ነው፤ ከእግዚአብሔር የተለየች ሕይወት ለጊዜው ያለች እንኳ ብትመስል ለዘለቄታው የለችምና በቁም ሳለች የሞተች ናት፡፡

ጌታችን አምላካችንና መድኃኒታችን ኢየሱስ ክርስቶስ፣ ‹‹ከግንዱ የተለየ ዛፍ ፍሬን ማፍራት እንደማይችል ኹሉ በእኔ የማይኖርም እንደ ቅርንጫፍ ወደ ውጭ ይጣላል፤ ይደርቅማል፤ በእሳትም ያቃጥሉታል፤›› ሲል ያስተማረን ከእግዚአብሔር ውጭ የኾነ ኹሉ ሕይወትን ጨምሮ ምንም ምን ሊያገኝ የማይችል መኾኑን ለማስረዳት ነው (ዮሐ.15÷4-6)፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት፤

ከሰው ልጅ ቀዳማዊ ታሪክ በመነሣት የተፈጸመውን እውነታ ስናስተውል፣ ሰው የሕይወት ራስ የኾነውን እግዚአብሔርን በማጣቱ ከባድ የኾነ የሞት ቅጣት እንዳጋጠመው እናያለን፡፡ ከዚኽ በኋላ የተነሣው ጥያቄ፣ ሰው ከዚኽ የሞት ቅጣት እንዴት ሊድን ይችላል? የሚለው ነው፡፡

እግዚአብሔር በልጁ በኩል መልሱን እንደነገረን፣ ሰው ሊድን የሚችለው በፍቅረ እግዚአብሔር ነው፡፡ ጌታችን ኢየሱስ ክርስቶስ በቅዱስ ወንጌል፣ ‹‹እግዚአብሔር አንድያ ልጁን እስኪሰጥ ድረስ ዓለሙን እስከዚኽ ድረስ ወዶታል፤›› ብሎ የድኅነት መነሻው እና መድረሻው ፍቅረ እግዚአብሔር እንደኾነ ነግሮናልና ነው (ዮሐ.3፡16-18)፡፡

የጌታችን ደቀ መዝሙር የኾነው ሐዋርያው ቅዱስ ዮሐንስም ‹‹እግዚአብሔር ፍቅር ነው፤ በእርሱ በኩል በሕይወት እንኖር ዘንድ አንድ ልጁን ወደ ዓለም ልኳልና የእግዚአብሔርን ፍቅር በዚህ ዓውቀናል፤ በፍቅር የሚኖር በእግዚአብሔር ይኖራል፤ እግዚአብሔርም በእርሱ ይኖራል››ሲል የሕይወታችን ማግኛ ቁልፍ ነገር ፍቅረ እግዚአብሔር እንደሆነ ያረጋግጣል፤ (1ዮሐ.4÷16)

ኹሉን የፈጠረና ኹሉን የሚችል ቃለ እግዚአብሔር ወልድን ስቦ እና ጎትቶ ወደ እኛ ያመጣው ሌላ ባዕድ ኃይል ሳይኾን በባሕርዩ ውስጥ ያለው ፍጹም ፍቅር ነው፡፡ ቃለ እግዚአብሔር ወልድ በዚኽ ፍቅር ምክንያት ወደ እኛ መጣ፣ መጥቶም ሥጋችንን ከማይሞተው አካለ መለኰቱ ጋር በማዋሐድ መለያየትን አስወግዶ ወደ እርሱ አቀረበን፡፡

የመለኰት እና የሥጋ ተዋሕዶ መጋቢት 29 ቀን በማኅፀነ ማርያም ሲፈጸም፣ ከዚያን ጊዜ ጀምሮ ባሕርየ መለኰት፣ ባሕርየ ሥጋን ገንዘብ አደረገ፤ ባሕርየ ሥጋም፣ ባሕርየ መለኰትን ገንዘብ አደረገ፤ በዚኽም መሠረት የአምላክ እና የሰው ተዋሕዶ ተፈጸመ፡፡

ሰው የኾነው ቃለ እግዚአብሔር ወልድ በተፀነሰ በዘጠኝ ወር ከአምስት ቀን፣ በታኅሣሥ ወር፣ በዛሬው ዕለት ከቅድስት ድንግል ማርያም በቤተ ልሔም ተወለደ፤ በዳዊት ከተማ በቤተ ልሔም የተወለደው ቃለ እግዚአብሔር ወልድ ሥጋችንን ተዋሕዶ በፈጸመው የኃጢአት ካሣ፣ እኛ ከሞት ፍርድ ነጻ ወጥተን ወደ ሕይወት ለመሸጋገር በቅተናል፤ ይህም የኾነው በፍቅረ እግዚአብሔር ነው፡፡

በመኾኑም ዛሬ በማክበር ላይ የምንገኘው ዓቢይ በዓል፣ በእግዚአብሔር ፍቅር ተመሥርቶ ሰውን ለማዳን የተፈጸመው የጌታችን የአምላካችንና የመድኃኒታችን የኢየሱስ ክርስቶስ በዓለ ልደት ነው፤ (ሉቃ.2÷6-20)

Lidete Kirstos
የልደተ ክርስቶስ በዓል የሰላም እና የደስታ፣ የአንድነት እና የፍቅር፣ የነጻነት እና የእኩልነት በዓል ነው፡፡ በዚኽ ዕለት ሰማያውያን መላእክት እና ምድራውያን እረኞች በአንድነት እና በፍቅር፣ ‹‹በምድርም ሰላም ይኹን›› እያሉ ስለ ሰላም እና ደስታ ዘምረዋል፡፡

ይህ ዕለት ምድራውያን ነገሥታት እና በዝቅተኛ ኑሮ የሚኖሩ እረኞች ፈጣሪያቸውን በእኩልነት ያዩበት እና የሰገዱበት፣ በሰማያውያንና በምድራውያን ማለትም በእግዚአብሔር እና በሰዎች፣ በሰዎች እና በመላእክት መካከል ልዩ ግንኙነት እንደተፈጠረ የተገለጸበት፣ የተበሠረበት እና የተዘመረበት ቀን በመኾኑ በዓሉ የሰላም እና የደስታ፣ የአንድነት እና የፍቅር፣ የነጻነት እና የእኩልነት በዓል ተብሎ ይታወቃል፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት፤

የዚህ በዓል ዓቢይ መልእክት ‹‹ሰላም በምድር ይኹን›› የሚል መኾኑን በውል መገንዘብ አለብን (ሉቃ. 2÷14)

እግዚአብሔር ጥላቻን፣ መነቃቀፍን፣ መለያየትን፣ ራስ ወዳድነትን አይወድም፡፡ ባሕርዩ ፍቅር የኾነ እግዚአብሔር እነዚኽን የማይወድ መኾኑን በማወቃቸው ነው፣ ሰማያውያኑና ምድራውያኑ በአንድነት ኾነው ሰላም በምድር ይኹን ብለው የዘመሩ፡፡

ማንም ይኹን ማን፣ በየትኛውም ደረጃ ወይም አካባቢ ይኑር፣ ከሰላም ውጭ ጥቅሙን ማረጋገጥ የሚችል የለም፣ ሊኖርም አይችልም፤ በሰላም ውስጥ ኾኖ ግን ኹሉንም ማግኘት እንደሚቻል ባለፉት ኹለት ዐሥርት ዓመታት ውስጥ የታየው ውጤት ምስክር ነው፡፡

ዛሬም ዓለማችንም ኾነ ሀገራችን ከሰው ሠራሽ እና ከተፈጥሮ አደጋዎች በቀላሉ ማምለጥ የሚችሉት ከኹሉ በፊት ሰላምን በአስተማማኝ ኹኔታ ይዘው ሲጓዙ ነው፡፡ ጌታችን ኢየሱስ ክርስቶስ በዚኽ ዓለም ተመላልሶ ሰውን ከሞት ያዳነው ማንንም ሳይጎዳ በሰላም ጎዳና ብቻ ተጉዞ ነው፡፡

ጥላቻ እና ራስ ወዳድነት ሲያፈርሱና ሲያጠፉ እንጂ ሲያለሙና ሲገነቡ በየትኛውም የዓለማችን ክፍል ታይተውም፣ ተሰምተውም፣ በታሪክ ሲደገፉም አይተን አናውቅም፤ መላው ሕዝባችን በሚገባ ማጤን ያለበት ነገር ቢኖር ምንጊዜም የችግር መፍትሔ ሰላም እና ልማት እንጂ ሌላ አማራጭ መፍትሔ የሌለ መኾኑን ነው፡፡

ስለኾነም ኹሉም የሀገራችን ሕዝቦች የገናን የሰላም መዝሙር እየዘመሩ ለጋራ ዕድገት እና ለእኩልነት፣ ለሕዝቦች አንድነት እና ለዘላቂ ልማት በጽናት መቆም ይኖርባቸዋል፡፡ ሰላም ትልቁ የገና ስጦታ ነው፤ ልማትም የህልውና ማረጋገጫ ጸጋ ነው፤ ኹሉንም በእኩል እንጠብቃቸው፡፡

በመጨረሻም፤

በዚኽ ዓመት በሀገራችን በተከሠተው የዝናም እጥረት ምክንያት ለምግብ ዕጦት የተጋለጡ በርካታ ወገኖቻችን የወገንን እጅ በተስፋ እየተጠባበቁ ይገኛሉ፡፡ እነዚኽ ወገኖች ግማሽ አካላችን መኾናቸውን ተገንዝበንና ጌታችን እኛን ለመፈለግ ወዳለንበት የመጣበትን ፍቅር አብነት አድርገን፣ እኛም እነርሱ ወዳሉበት በፍቅር በመሔድ በኹሉም ነገር ልንረዳቸውና አለን ከጎናችሁ ልንላቸው ይገባል፤

አነሰ ሳንል በወቅቱ ፈጥነን እጃችንን ልንዘረጋላቸውና በአጠገባቸው ኾነን ልናበረታታቸው ይገባል፤ እግዚአብሔር ኹላችንን እንደ ወደደን እኛም ወንድሞቻችንን በመመገብ፣ በማልበስ እና ችግራቸውን ኹሉ በመጋራት ለእግዚአብሔር እና ለወንድሞቻችን ያለን ፍቅር ዛሬውኑ በተግባር እንድናሳይ መልእክታችንን በእግዚአብር ስም እናስተላልፋለን ፡፡

እግዚአብሔር ኢትዮጵያንና ሕዝባችንን ይባርክ

መልካም የልደት በዓል ያድርግልን

ወስብሐት ለእግዚአብሔር

አሜን::

አባ ማትያስ ቀዳማዊ

ፓትርያርክ ርእሰ ሊቃነ ጳጳሳት ዘኢትዮጵያ

ሊቀ ጳጳስ ዘአኵስም ወእጨጌ ዘመንበረ ተክለ ሃይማኖት

ታኅሣሥ 28 ቀን 2008 ዓ.ም.

አዲስ አበባ፤ ኢትዮጵያ

 

Advertisements

2 thoughts on “ብፁዕ ወቅዱስ ፓትርያርክ አቡነ ማትያስ: የ፳፻፰ ዓ.ም የልደት በዓልን አስመልክተው ያስተላለፉት መልእክት

  1. Anonymous January 7, 2016 at 10:26 pm Reply

    ምነው ፡ የተጸነሰበትን ቀን ፡ እና ፡ በማኅፀነ ፡ ማርያም ፡ የቆየበትን ፡ ጊዜ ፡ ተናግረው ፡ የተወለደበትን ፡ ቀን ፡ ታኅሣሥ ፡ ፳፱ ፡ ብሎ ፡ መናገር ፡ ፈሩና ፡ ሸፋፍነውት ፡ አለፉ ፡ እንዲኽ ፡ ከመሸማቀቅ ፡ ወደ ፡ እውነታው ፡ መመለስ ፡ አይሻልም ፡ ይኾን ፡ ወይ ?

    የመለኰት እና የሥጋ ተዋሕዶ መጋቢት 29 ቀን በማኅፀነ ማርያም ሲፈጸም፣ ከዚያን ጊዜ ጀምሮ ባሕርየ መለኰት፣ ባሕርየ ሥጋን ገንዘብ አደረገ፤ ባሕርየ ሥጋም፣ ባሕርየ መለኰትን ገንዘብ አደረገ፤ በዚኽም መሠረት የአምላክ እና የሰው ተዋሕዶ ተፈጸመ፡፡

    ሰው የኾነው ቃለ እግዚአብሔር ወልድ በተፀነሰ በዘጠኝ ወር ከአምስት ቀን፣ በታኅሣሥ ወር፣ በዛሬው ዕለት ከቅድስት ድንግል ማርያም በቤተ ልሔም ተወለደ፤ በዳዊት ከተማ በቤተ ልሔም የተወለደው ቃለ እግዚአብሔር ወልድ ሥጋችንን ተዋሕዶ በፈጸመው የኃጢአት ካሣ፣ እኛ ከሞት ፍርድ ነጻ ወጥተን ወደ ሕይወት ለመሸጋገር በቅተናል፤ ይህም የኾነው በፍቅረ እግዚአብሔር ነው፡፡

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: