ፓትርያርኩ: የቤተ ክርስቲያን ሰላም ሉዓላዊነቷን በሚያስቀደምና መልካም አስተዳደርን በሚያሰፍን የኅሊና መሥዋዕትነት ይረጋገጣል

his-holiness-at-civil-service-college

የውስጣዊ ሰላማችን ጠንቆች÷ ግልጽነትና ተጠያቂነት የሌለው አሠራር፤ ሕግን ማእከል ያላደረገ የሥራ አፈጻጸም፤ የቤተ ክርስቲያንን ሳይኾን የራስን ጥቅም ማስቀደም ናቸው፤ የኅሊና መሥዋዕትነትን በድል በመፈጸም፣ የመምሰል ሳይኾን የመኾን አለቃ በመኾን ተልእኳችንን እንወጣ (ፎቶ፡ አ/አ ሀገረ ስብከት)

የፌዴራል ጉዳዮች ሚኒስቴር፣ ነሐሴ ፳፱ እና ፴ ቀን ፳፻፯ ዓ.ም. በሲቪል ሰርቪስ ኮሌጅ ባዘጋጀው የምክክር መድረክ መዝጊያ ላይ ተገኝተው፣ ሰላም የቤተ ክርስቲያን ተቀዳሚ ተልእኮ መኾኑን የጠቀሱት ብፁዕ ወቅዱስ ፓትርያርክ አቡነ ማትያስ፤ ሓላፊዎች፣ ሠራተኞች እና አገልጋይ ካህናት ከማንም በፊት የሰላም ጠበቆች እና አምባሳደሮች ሊኾኑ እንደሚገባቸው መክረዋል፡፡

ስለ ሰላም ነገር ሌላውን ለማስተማር እና በሌላው ዘንድ ተቀባይነት እንዲኖረን ለማድረግ አስቀድመን እኛው ራሳችን ሰላምን በውስጣችን ማረጋገጥ እንዳለብን የተናገሩት ቅዱስነታቸው፣ ውስጣዊ ሰላምን ለማረጋገጥ መሥዋዕትነት መክፈል የማይቀር መኾኑንና እርሱም ኅሊናን የማስወሰንና የማሳመን – የኅሊና መሥዋዕትነት እንደኾነ አመልክተዋል፡፡

“ዛሬ በሰላም ውለው በሰላም የሚያድሩ የቤተ ክርስቲያናችን ሹማምንት፣ ሠራተኞች እና አገልጋዮች ስንት ናቸው?” ሲሉ የጠየቁት ብፁዕ ወቅዱስ ፓትርያርኩ፣ የውስጣዊ ሰላማችን ጠንቆች÷ ግልጽነትና ተጠያቂነት የሌለው አሠራር፤ ሕግንና ሥርዐትን ማእከል ያላደረገ የሥራ አፈጻጸም፤ የምእመናንንና የቤተ ክርስቲያንን ሳይኾን የራስን ጥቅም ማስቀደም እንደኾኑ አብራርተዋል፡፡

መድኃኒቱም÷ ‹‹አስቀድመኽ በዓይንኽ ውስጥ ያለውን ምሶሶ አውጣ፤ ከዚኽ በኋላ በወንድምኽ ዓይን ያለውን ጉድፍ ታወጣለኽ፤›› ብሎ ጌታችን ያስተማረውን መሪ ቃል በማድረግ፣ እኛው አስቀድመን የኅሊና መሥዋዕትነት በድል በመፈጸም፣ የመምሰል ሳይኾን የመኾን አለቃ በመኾን የሰላም ተልእኳችንን መወጣት ነው፡፡

ቅዱስነታቸው በንግግራቸው እንዳሳሰቡት፣ የመምሰል ሳይኾን የመኾን አለቃ ለመኾን የኅሊና መሥዋዕትነትን የሚጠይቁት÷ መልካም አስተዳደርን ማስፈን፣ ግልጽነትንና ተጠያቂነትን ማረጋገጥ፣ የቤተ ክርስቲያናችንንና የሕዝብ ሉዓላዊነትን ያለማወላወል ማስቀደም፣ ብክነትንና ዝርክርክነትን መጸየፍ ናቸው፡፡


በስመ አብ ወወልድ ወመንፈስ ቅዱስ አሐዱ አምላክ፤ አሜን፡፡

የሰላም አምላክ ጌታችንና መድኃኒታችን ኢየሱስ ክርስቶስ በዚህ ጉባኤ ተገኝተን የሰላም እና የመቻቻል መልእክት ለማስተላለፍ ስለ ፈቀደልን ምስጋና፣ አምልኮት እና ክብር ለእርሱ ይኹን፡፡

‹‹ኅሥሣ ለሰላም ወዴግና፤ ሰላምን አጥብቀህ ፈልጋት፤ ባገኘሃትም ጊዜ ተከተላት እንጂ አትለያት››
(መዝ.33÷14)

ኹላችንም እንደምናውቀው የሰላም አምላክ እግዚአብሔር ፍጥረታትን ሲፈጥር በሕይወት፣ በነጻነት እና በደስታ እንዲኖሩ ነው፡፡ የሕይወት፣ የነጻነት፣ የደስታ እና የብልጽግና ዋስትና ሰጭ ደግሞ ከፈጣሪ የተገኘች ሰላም ናት፡፡ ሰላም ሰውን ብቻ ሳይኾን ከሰው ጋር ያሉ እንስሳት፣ አራዊት፣ አዕዋፍ፣ ዓሣት፣ ዕፀዋት፣ አዝርዕት፣ ነፍሳት… ወዘተ ኹሉ ይፈልጓታል፡፡ ከዚህም ሌላ ሰማዩም ምድሩም ሰላምን ይፈልጋል፤ ምክንያቱም ሰላም ከሌለ ኹሉም ተጎጂዎች ናቸውና፡፡

ዛሬ የሰማዩ አየር በአየር ብክለት እየተጎዳ ሰላምን አጥቶአል እየተባለ በየጊዜው ሲነገር እንሰማለን፤ ምድርም እንደ ልብስ የሚያገለግሏት ዕፀዋት እየተመነጠሩ ባዶ ወደ መኾን እየተቃረበች ስለኾነ በተፈጥሮ መዛባት ሰላምን አጥታለች እየተባለ ነው፡፡ ሰማይ እና ምድር በዚህ ኩነት ሰላምን ሲያጡ የሚኖሩባቸው ፍጥረታት በአጠቃላይ ሰላምን አጥተው ይሠቃያሉ፡፡ ከዚህ እውነት ተነሥተን ስናስተውል ሕያዋንም ኾኑ ግኡዛን፣ ሰማያውያንም ኾኑ ምድራውያን ፍጥረታት ኹሉ የሰላም ተጠቃሚዎች መኾናቸውን እንገነዘባለን፡፡

እግዚአብሔር የሰላም አምላክ ነው ሲባል የተጠቀሱ ፍጥረታት ኹሉ ገንዘቦቹ ናቸውና፣ ያመጣቸውም በሕይወት እንዲኖሩ እንጂ በሰላም ዕጦት እንዲጠፉ አይደለምና፣ ሰላም እንዲያገኙ አምላካዊ ፈቃዱ ከመኾኑም ባሻገር እርሱ ራሱ በባሕርዩ ሰላም እና ፍቅር ስለኾነ ነው፡፡ (1ዮሐ. 4፡16) ሰዎች በበደላቸው ብዛት ሰላም እንዲደፈርስ ባደረጉ ጊዜም ሰላምን ለመመለስ ሲል በሰው መካከል በተገኘ ወቅት ‹‹ወሰላም በምድር፤ በምድርም ሰላም ይኹን›› ብለው መላእክት መዘመራቸው እግዚአብሔር ለሰላም የሰጠው ዋጋ ምን ያህል ታላቅ እንደ ኾነ የሚያመለክት ነው (ሉቃ.2፡14)፡፡

ለሰላም ሲባል አምላክ ሰው ኾኖአል፤ ለሰላም ሲባል አምላክ በሥጋ ሞቶአል፤ በዚህም ሰማይንና ምድርንም አስታርቆ ሰላምን አድርጎአል፤ ‹‹ወገብረ ሰላመ በደመ መስቀሉ ለዘበሰማይ ወለዘበምድር፤ በሰማይና በምድር ያሉትን በመስቀል ላይ ኾኖ ባፈሰሰው ደሙ ሰላምን አደረገላቸው›› (ቈላ 1፡20)፡፡

ሓላፊነት ያለባችኹ አካላት ዛሬ በዚህ ስፍራ ስለ ሰላምና ስለ መቻቻል ጠቃሚነት ለመወያየት ይህን ዓቢይ ጉባኤ ስታዘጋጁ የእግዚአብሔር ልዩ መልእክተኞች እና አገልጋዮች ኾናችሁ እንደ መጣችሁ እንቈጥራለን፤ የሰላም እና የመቻቻል ህልውና ለአንድ ማኅበረሰብ በእምነቱም ኾነ በኑሮው ምን ያህል ትልቅ ዋጋ እንዳለው፣ የሚያመጣውም ለውጥ ምን ያህል ግዙፍ እንደኾነ የኢትዮጵያ ሕዝብ ከምንም ጊዜ በላይ የተገነዘበበት ወቅት ዛሬ እንደ ኾነ በተግባር አስመስክሯል፡፡ ይህ ሰላም እና መቻቻል እስከተጠበቀ ድረስ የተወጠነውና ሊወጠን የታሰበው ኹሉ እውን የማይኾንበት ምክንያት ይኖራል ብለን አንገምትም፡፡

ስለኾነም ሰላም የቤተ ክርስቲያን ተቀዳሚ ተልእኮ እንደመኾኑ መጠን ለሰላም መጠበቅ እና ተቻችሎ በአንድነት ለመኖር በሚደረገው ጥረት ኹሉ ቤተ ክርስቲያናችን በግንባር ቀደም ተሰልፋ የሚጠበቅባትን ከማድረግ ወደ ኋላ እንደማትል በዚህ አጋጣሚ ለመግለጽ እንወዳለን ፡፡

ሰላም እና መቻቻል ለሰው ልጅ ያላቸው ጠቀሜታ ላይ ጥያቄ ያለው ሰው ይኖራል ብለን አንገምትም፡፡ ይኹንና ደጋግመን መነጋገር ያለብን የሚመስለን ሰላምን እንዴት እንጠብቅ? መቻቻልን በኅብረተሰቡ ውስጥ እንዴት እናሥርጽ? የሚለውን ነው፡፡

ኹሉም እንደሚያውቀው ሰላም ስለተፈለገች ብቻ እንዲሁ የምትገኝ አይደለችም፡፡ ከላይ ለመግለጽ እንደተሞከረው፣ ጌታችን እንኳ ለሰላም መረጋገጥ መሥዋዕትነት የሚያስፈልገው ከኾነ እኛም ለሰላም ሲባል መሥዋዕትነት መክፈል እንደማይቀርልን ጥርጥር የለውም፡፡

በተጨባጭ እንደምናየውም፤ አሁን ያገኘነው ሰላም በመሥዋዕትነት እንደተገኘ ኹላችንም እናውቃለን፡፡ ዛሬም ልጆቻችን ለጎረቤት ሀገር ወገኖቻችን ሰላም ሲሉ መሥዋዕትነት በመክፈል ላይ እንደሆኑ የምንዘነጋው አይደለም፡፡ የአሁኑ ጥያቄአችን ለሰላም መሥዋዕትነት መከፈል ያለባቸው ጥቂት ወገኖች ብቻ ናቸውን? ወይስ በሓላፊነት የተቀመጡ ባለሥልጣኖች ብቻ ናቸውን? የሚለውን ነው፤ ይህ በፍጹም ሊሆን አይችልም፤ ኹሉም ሰው ይልቁንም የሃይማኖት መሪዎች እና አገልጋዮች ከማንም በላይ ቀድመው የሰላም ጠበቆች እና አምባሳደሮች ሊኾኑ ይገባቸዋል፡፡

ካህናት በጸሎት ጊዜ ‹‹ሰላም ለኵልክሙ፤ ሰላም ለኹላችሁ ይኹን›› በማለት በተደጋጋሚ የሚያስተጋቡትን ኃይለ ቃል በተግባርም ቀድመው ሊፈጽሙት ይገባል፡፡ ሰላም ከውጭ ተገዝቶ ወይም ተጎትቶ የሚመጣ ቁሳዊ ነገር አይደለም፤ ሰላም ከኅሊናችን ውስጥ መንጭቶ በአእምሮ ዳብሮ በተግባር የሚገለጽ ነገር ነው፡፡

እኛ ካህናት ሰላምን በምድር ላይ ለማስፈንና ለመጠበቅ ከኹሉ በፊት ጌታችን፣ ‹‹ቅድመ አውጽእ ሠርዌ ዘሀሎ ውስተ ዓይንከ ወእምዝ ትሬኢ ኃሠረ ዘውስተ ዓይነ ቢጽከ፤ አስቀድመኽ በዓይንኽ ውስጥ ያለውን ምሶሶ አውጣ፤ ከዚኽ በኋላ በወንድምኽ ዓይን ያለውን ጉድፍ ታወጣለኽ፤›› ብሎ ያስተማረውን መሪ ቃል አድርገን መውሰድ አለብን፡፡

ስለ ሰላም ነገር ሌላውን ለማስተማር እና በሌላው ዘንድ ተቀባይነት እንዲኖረን ለማድረግ አስቀድመን እኛው ራሳችን ሰላምን በውስጣችን ማረጋገጥ አለብን፡፡

እውነት ለመናገር ዛሬ በሰላም ውለው በሰላም የሚያድሩ የቤተ ክርስቲያናችን ሹማምንት፣ ሠራተኞች እና አገልጋዮች ስንት ናቸው? ይህስ ለምን ሆነ? ብለን ብንጠይቅ ብዙ ነገሮች በውስጣችን እንዳሉ እኛው እናውቀዋለን፡፡

ታዲያ ይህን በውስጣችንና በጓዳችን ያለውን ሰላም እና መቻቻል ሳናረጋግጥ ወደ ውጭ ወጥተን ሰላምን ብንሰብክ ማን ነው የሚሰማን? የዚህ መድኃኒቱስ ምንድን ነው? የሚለውን ጥያቄ በዚህ ጉባኤ የተካሔደው ውይይት ግንዛቤን ያስጨብጣል ብለን እንጠብቃለን፡፡

የዚኽ መድኃኒት መገኛ ከባድ እና ገንዘብ የሚከፈልበት ባይኾንም ኅሊናን የማሳመንና የማስወሰን ከባድ ጀግንነትን ግን ሳይጠይቅ አይቀርም፡፡ እርሱም ‹‹በቃ፣ በውስጣችን ሰላምን እናስፍን›› የሚለው ቁርጥ ውሳኔ ይጠይቃል፤ ይህ እንዲኾንም እንጠብቃለን፡፡

የውስጣችን የሰላም እና የመቻቻል ጠንቅ የኾኑት፡-

  • ግልጽነት እና ተጠያቂነት የሌለው አሠራር፤
  • ሕግንና ሥርዓትን ማእከል ያላደረገ የሥራ አፈጻጸም፤
  • የሕዝብንና የቤተ ክርስቲያንን ሳይሆን የራስን ጥቅም ማስቀደም… ወዘተ

የመሳሰሉ አስተሳሰቦች የውስጥ ሰላማችንን ለማናጋት እየተፍጨረጨሩ ነው፡፡ እነዚህን ታግለን ለማስተካከል ወደ ቁርጥ ውሳኔ የሚያደርሰው የኅሊና መሥዋዕትነት ይጠይቀናል፡፡ ይህን መሥዋዕትነት በድል ካጠናቀቅን የሰላም አለቆች መኾናችን በተግባር ይረጋገጣል፡፡

በመጨረሻም፤

ሰላም እና መቻቻል የሃይማኖታችንና የሀገራችን ህልውና ማረጋገጫዎች፣ የዕድገታችንና የብልጽግናችን ከለላዎች ናቸው፡፡ እነዚህን ለማስፈንና ለመጠበቅም መጀመር ያለብን ከውስጣችን ስለሆነ በቤተ ክርስቲያናችን ውስጥ መልካም አስተዳደርን በማስፈን፣ ግልጽነትንና ተጠያቂነትን በማረጋገጥ፣ የቤተ ክርስቲያናችንንና የሕዝብ ሉዓላዊነትን ያለማወላወል በማስቀደም፣ ብክነትንና ዝርክርክነትን በመጸየፍ፣ እኛ አስቀድመን የመምሰል ሳይኾን የመኾን አለቆች ኾነን ሰላማችንን የመጠበቅ ተልእኮአችንን እንድንወጣ አደራ በማለት አባታዊ መልእክታችንን እናስተላልፋለን፡፡

እግዚአብሔር ይባርካችኹ፤ ይቀድሳችኹ፤ አሜን!

አባ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኵሱም ወዕጨጌ ዘመንበረ ተክለ ሃይማኖት
ነሐሴ ፴ ቀን ፳፻፯ ዓ.ም.
አዲስ አበባ፣ ኢትዮጵያ

Advertisements

2 thoughts on “ፓትርያርኩ: የቤተ ክርስቲያን ሰላም ሉዓላዊነቷን በሚያስቀደምና መልካም አስተዳደርን በሚያሰፍን የኅሊና መሥዋዕትነት ይረጋገጣል

  1. Anonymous September 29, 2015 at 12:26 pm Reply

    በጣም ጡሩነው

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: