ቤተ ክርስቲያን አማሳኞችን አሳልፋ እንደምትሰጥ ፓትርያርኩ ለዋና ሥራ አስኪያጁ አረጋገጡ፤“ለማንም ከለላ አልኾንም፤ ለአንተም ጭምር”

  • ጥናታዊ ሪፖርቱን እና የጠቅላይ ቤተ ክህነቱን ውሳኔ ለቋሚ ሲኖዶሱ ይኹንታ ያቀርባሉ
  • አማሳኝ ሓላፊዎች፤ በካህናት እና ሠራተኞች ስም የሚያቀርቡት አቤቱታ ተቀባይነት የለውም
  • ከብፁዕ ዋና ሥራ አስኪያጁ ጀምሮ ብፁዓን አባቶችን ለማስፈራራትና ለመደለል እየተሞከረ ነው
  • እጁ የተገኘበትን ኹሉ ቤተ ክርስቲያኒቱ አሳልፋ ትሰጣለች፤ ይኼ የመጨረሻ አቋሜ ነው

                                   /ብፁዕ ወቅዱስ አቡነ ማትያስ/

 *          *          *

ጉቦ መስጠት ይኹን ጉቦ መቀበል፤ በጎሰኝነት እና ጥቅመኝነት ላይ የተመሠረተ ቅጥር፣ ዕድገት እና ዝውውር መፈጸም፤ በልማት ስም ምዝበራ እና ዘረፋ ማጧጧፍ በሃይማኖታዊ አስተምህሮ ለኩነኔ የሚዳርግ ኃጢአት ከሕግም አኳያ የሚያስቀጣ ወንጀል እንደኾነ ይታወቃል፡፡

በስፋት እና በተደጋጋሚ እንደሚነገረው፣ የሃይማኖት ተቋማት፣ “የሥነ ምግባር እና የፀረ ሙስና አስተሳሰቦችን በምእመናን ዘንድ በማስፋፋት ሙስናንና ብልሹ አሠራርን የሚጸየፍ ዜጋ ለማፍራት” ከሌሎች የሲቪል ማኅበረሰብ ተቋማት የላቀ ድርሻ አላቸው፤ ከቆሙለት ዓላማ አንጻር የሥነ ምግባር (የሞራል) ጉዳይ ዋነኛ ትኩረታቸው ነውና፡፡

ቤተ ክርስቲያናችን ባሏት ብዙ ሚሊዮኖች ካህናት እና ምእመናን ሙስናን ለመዋጋት እና ሥነ ምግባርን ለማስፋፋት የምታበረክተው አገራዊ አስተዋፅኦ ጉልሕ እና ከፍተኛ ነው፡፡ የሙስናን አጸያፊነት በግልጽ ቋንቋ ከማስተማር ባሻገር በተግባርም ራስን ከተወገዙ መጥፎ ተግባራትና ከሕገ ወጥ ድርጊቶች በማራቅ በአርኣያነት መታየት፣ በምእመኑ ዘንድ ተቀባይነትንና ተአማኒነትን በማጎናጸፍ ማኅበረሰቡን ለመለወጥ የሚያበቃ ጉልበት ለማግኘት ያስችላል፡፡

ብፁዕ ወቅዱስ አቡነ ማትያስ እንዳሉት፣ ብልሹ አሠራር በወቅቱ አስፈላጊው እርማት ካልተደረገበት በምእመኑ ዘንድ የሚፈጥረው የተከማቸ ቅሬታ፣ የቤተ ክርስቲያናችንን ማኅበራዊ ተቀባይነት በማዳከም በአመራሯ እና በአስተዳደሯ ላይ እምነት ማጣትን እያሳደረ ይሔዳል፡፡ የጠቅላይ ቤተ ክህነቱ አስተዳደር ጉባኤ በውሳኔው እንዳተተው፣ ከሙስናው አጸያፊነት የተነሣ ከቤተ ክርስቲያን እየወጡ ወደ ሌላ እምነት የሚኮበልሉ ወገኖችን በቤታቸው ማጽናቱ አዳጋች ይኾናል፡፡ በአጠቃላይ ሙስና እና የአስተዳደር በደልን ለመሸፈን በሚሞክሩ እና ለማጋለጥ በሚጋደሉ ተፃራሪ አካላት መካከል በሚደረገው ትግል የሚፈጠረው ውስጣዊ ቀውስ፣ ማኅበራዊ ትስስርንና መረጋጋትን ያሳጣናል፡፡

በአስተዳደር ሓላፊዎች እና ሠራተኞች መካከል፤ የሥነ ምግባር ብልሹነት በዝቶ፣ የሙስና ወንጀል ተንሰራፍቶና የአገልጋዮቻችን ሞራላዊ ልዕልና ተሸርሽሮ÷ የጥንታዊትና ታሪካዊት ቤተ ክርስቲያናችን መንፈሳዊ ዕድገት እና ጉልሕ ማኅበራዊ ሚና አደጋ ላይ ከወደቀ የቤተ ክህነታችን አመራር እና አስተዳደር የታሪክ ተወቃሽ እና ተጠያቂ ከመኾን አይድንም፡፡

*           *           *

ከቤተ ክርስቲያናችን መሠረታዊ ተልእኮ ጋር ያልተቀናጀው፤ ከችሎታ፣ ዕውቀትና ልምድ ይልቅ በወገንተኝነት እና ሙስና የተሞላው እና የተለያዩ የሥነ ምግባር ብልሽቶች የሚንጸባርቅበት የወቅቱ የቤተ ክህነታችን አስተዳደር አስቸኳይ እና ቆራጥ የለውጥ ርምጃ ሊወሰድበት እንደሚገባ ብፁዕ ወቅዱስ ፓትርያርኩ በተደጋጋሚ ተናግረዋል፡፡

የቅዱስነታቸውን ማሳሰቢያ ተግባራዊ ለማድረግ፣ በመንበረ ፓትርያርክ ደረጃ የመሪ ዕቅድ ጥናት በባለሞያዎች ተዘጋጅቷል፡፡ ጥናቱ፣ ሙስናንና ለብክነት የተጋለጡ አሠራሮችን፣ ዘመኑን ያልዋጀ የፋይናንስ አያያዝንና የመልካም አስተዳደር ዕጦትን በወሳኝ መልኩ ለመቅረፍ እንደሚያስችል ያመነበት የቅዱስ ሲኖዶስ ምልአተ ጉባኤም፣ በሥራ ለመተርጎም በሚያስችል አኳኋን የመጨረሻ መልኩን ይዞ እንዲቀርብለት ትእዛዝ ሰጥቷል፡፡

በአዲስ አበባ ሀገረ ስብከት ደረጃም ለተጠናው የመዋቅር፣ የአደረጃጀት እና የአሠራር መመሪያ ጥናት፤ ምልአተ ጉባኤው በሰጠው ይኹንታ እና የአፈጻጸም አቅጣጫ መሠረት በማኅበረ ካህናት፣ በማኅበረ ምእመናንና የሰንበት ት/ቤቶች ወጣቶች ውይይት ከተካሔደበት በኋላ እጅግ ከፍተኛ ተቀባይነት ቢያገኝም፣ ትግበራው ሕገ ጥቅማቸውን በሚያስተጓጎልባቸው አማሳኞች ተሰነካክሎ ይገኛል፡፡

በመልካም አስተዳደር፣ በፋይናንስ አያያዝ፣ በስብከተ ወንጌል እና በአገልግሎት አሰጣጥ ሀገረ ስብከቱን ለሌሎች አህጉረ ስብከት በሞዴልነት ለመጠቀስ እንደሚያበቃው የታመነበት ጥናት፣ አማሳኝ የአድባራት ሓላፊዎች በፈጠሩት ተጽዕኖ ትግበራው መስተጓጎሉ የፓትርያርኩን ቁርጠኝነት ጥያቄ ውስጥ ከቶት ቆይቷል፡፡ ሀገረ ስብከቱ፣ በሰው ኃይል አመዳደብ እና በፋይናንስ አያያዝ የሕግ የበላይነትን አክብሮ እንዲሠራ አስፈላጊውን ክትትል እንዲያደርጉ በግንቦት ፳፻፭ ዓ.ም. የቅዱስ ሲኖዶስ ምልአተ ጉባኤ የታዘዙትን ቋሚ ሲኖዶሱንና መንበረ ፓትርያርኩንም ከማስፈጸም አቅም አኳያ ለትችት ማጋለጡ አልቀረም፡፡

*           *           *

ይኹንና በ58 የሀገረ ስብከቱ አድባራት እና አንዳንድ ገዳማት የመሬት፣ የሕንጻ እና የልዩ ልዩ ገቢ ማስገኛ ተቋማት ኪራይ ተመን ላይ ላለፉት ስድስት ወራት ሲካሔድ የቆየው ጥናት፣ በሐምሌ መጨረሻ ለውሳኔ መብቃቱን ተከትሎ ብፁዕ ወቅዱስ ፓትርያርኩ በአማሳኝ የአስተዳደር ሓላፊዎች ላይ የያዙት ቁርጠኛ አቋም፣ ለቤተ ክርስቲያን መብቶች እና ጥቅሞች መጠበቅ ከምር የሚቆረቆሩ ወገኖችን ተስፋ ዳግመኛ አለምልሟል፡፡

ፓትርያርኩ በዓመቱ መጀመሪያ ላይ፣ በቋሚ ሲኖዶስ በማስወሰን ለጠቅላይ ቤተ ክህነቱ የአስተዳደር ጉባኤ በሰጡት ትእዛዝ የተቋቋመው ኮሚቴ ሐምሌ ፳፰ ቀን ፳፻፯ ዓ.ም. ያቀረበው ጥናታዊ ሪፖርትቤተ ክርስቲያኒቱ ያለችበትን ተጨባጭ ኹኔታ የሚያመለክት፤ ንብረቶቿን በአስተማማኝ ኹኔታ ለመጠበቅ እና በሀብቷ የሚነግዱ ወገኖች ለመቆጣጠር ከፍተኛ ጥቅም የሚሰጥ እንደኾነ” ታምኖበታል፡፡ በብፁዕ አቡነ ማቴዎስ ሰብሳቢነት የሚመራው የጠቅላይ ቤተ ክህነቱ አስተዳደር ጉባኤም ሪፖርቱን በስፋት ከተወያየበት በኋላ በሙሉ ድምፅ በመቀበል ባለዐሥር ነጥብ ውሳኔዎችን አሳልፏል፡፡

his-grace-abune-mathewosዕለቱን “እንደተወለድኩባት ቀን እቆጥረዋለኹ” በማለት በጥናታዊ ሪፖርቱ ደስታቸውን የገለጹት ብፁዕ አቡነ ማቴዎስ፣ የኮሚቴው አባላት፣ ስም ማጥፋትን ጨምሮ ብዙ ውጣ ውረድ እና ፈተና በማለፍ ለከፈሉት መሥዋዕትነት እና ገድል በቅድስት ቤተ ክርስቲያን ስም አወድሰዋቸዋል፤ አማሳኞች የሚገባውን ቅጣት ያገኛሉ፤ ማንም ምንም ቢል ይህን ነገር ከዳር አደርሳለኹ”ማለት “የፀረ ሙስና ተጋድሎውን በወቅቱ ለተቀላቀሉ” የአስተዳደር ጉባኤው አባላት ቁርጠኝነታቸውን አስታውቀዋል፡፡

በቃለ ጉባኤው ተ.ቁ(፱) ላይ የሰፈረው የአስተዳደር ጉባኤው የውሳኔ ሐሳብ፣ በጥናቱ የተጠቀሱ ከፍተኛ እና ዝቅተኛ ችግሮች በባለሞያ ተጠንተው እና ከሕግ አንጻር ተገምግመው በቤተ ክርስቲያኒቱ ንብረቶች አለአግባብ ሀብት ያፈሩና ቤተ ክርስቲያኒቱን ለግል ጥቅማቸው ሲሉ ለምዝበራ ያጋለጡ የአድባራት ሓላፊዎች ያጠፉት ጥፋት እየተመዘነ በሕግ አግባብ ጉዳያቸው እንዲታይና ክሥ እንዲመሠረትባቸው እንዲደረግ፤ ይላል፡፡ ብፁዕ ዋና ሥራ አስኪያጁ ከአስተዳደር ጉባኤው አባላት ጋር በመኾን ጥናታዊ ሪፖርቱንና የውሳኔውን ቃለ ጉባኤ ለብፁዕ ወቅዱስ ፓትርያርኩ ባቀረቡበት ወቅት የተሰጠው ምላሽም፤ በውሳኔው መሠረት የአማሳኞችን የሕግ ተጠያቂነት አይቀሬነት ያረጋገጠ ነበር፡፡

ይኹንና በተለይም ከፍተኛ ችግር እንዳለባቸው የተጠቀሱት አድባራት ሓላፊዎች፣ በቀንደኛው አማሳኝ ኃይሌ ኣብርሃ አስተባባሪነት፣ ዘካርያስ ሐዲስ ባለበት የኮተቤ ደ/ጽባሕ ቅ/ሚካኤል እንዲኹም በየካፌው እና በየሆቴሉ በመሰብሰብ እንደለመዱት አፈጻጸሙን ለማሰናከል እየዶለቱ ይገኛሉ፡፡ በተቃውሟቸው ካህናቱንና ልዩ ልዩ ሠራተኞችን በማስፈራራትም በመደለልም ከጎናቸው ለማሰለፍ እየጣሩ ሲኾን በአንዳንድ ፕረሶችም የጥናታዊ ሪፖርቱን ይዘት እና የኮሚቴውን አባላት ለማጥላላት መሞከራቸው አልቀረም፡፡

አማሳኞቹ፣ ጥናቱን ለማስተባበል እና በማጣራቱ ሒደት ግንባር ቀደም ሚና የነበራቸውን የኮሚቴው አባላት ለማጥቆር በሞከሩ ቁጥር፣ ዘራፊነታቸውንና መዝባሪነታቸውን ይበልጥ እያረጋገጡ ይገኛሉ፡፡ በእነ ኃይሌ ኣብርሃ እና የማነ ዘመንፈስ ቅዱስ የመናገሻ ገነተ ጽጌ ቅዱስ ጊዮርጊስ አመራር፣ በዲዛይን ማሻሻያ ስም የ100 ሚሊየን ብር ልዩነት ስለታየበት የሕንጻ ግንባታ በሰንደቅ ጋዜጣ ለወጣው ዘገባ የደብሩ ሓላፊዎች የሰጡት እርስ በርሱ የሚጣረስ ምላሽ ይህንኑ ያረጋግጣል፡፡

corrupts-and-day-light-robbersየአማሳኞቹ ግንባር ቀደም መሪዎች በዚኽ ሳይወሰኑ፣ ብፁዕ ዋና ሥራ አስኪያጁን ከማስፈራራት እና የአስተዳደር ጉባኤ አባላቱንም ለመከፋፈል እየሠሩ ነው፤ ሥራውን ከነገ በስቲያ የሚጀምረው ቋሚ ሲኖዶስም ዛሬ፣ ነሐሴ ፲፰ ቀን ፳፻፯ ዓ.ም. በፓትርያርኩ በተመራለት የጠቅላይ ጽ/ቤቱ ጥናታዊ ሪፖርት እና ውሳኔዎች አፈጻጸም ላይ ይኹንታውን ከመስጠቱ በፊት፣ የወቅቱን ተለዋጭ አባላት ቀራቢዎች ነን በሚሉ ግለሰቦች ለመደለል መንቀሳቀስም ይዘዋል፤ ለዚኽም የአድባራቱን ተቀማጭ በሥራ ማስኬጃ ስም ወጪ በማድረግ እና በዘረፋ ያካበቱትን ገንዘብ በመርጨት ላይ ይገኛሉ፡፡

የአማሳኞቹ ግንባር ቀደም አስተባባሪዎች ከሚያደርጉት ግፊት በአንጻሩ፣ ብፁዕ ወቅዱስ ፓትርያርኩ ለብፁዕ ዋና ሥራ አስኪያጁ እና ለአስተዳደር ጉባኤ አባላቱ ባረጋገጡት አቋም እንደጸኑ ናቸው፡፡ ቅዱስነታቸው፣ በትእዛዛቸው መሠረት በተካሔደው እና የፀረ ሙስና አቋማቸውን ተግባራዊ ለማድረግ ታላቅ አስተዋፅኦ እንደሚኖረው በታመነበት ጥናት፣ የተዘረዘሩ የመፍትሔ ሐሳቦችን እና በጥናታዊ ሪፖርቱ መነሻነት የተላለፉ የጠቅላይ ጽ/ቤቱን ውሳኔዎች ለማስፈጸም “በቤተ ክርስቲያን ሀብት ከመዝባሪዎች ጋር አልደራደርም፤ ወደ ግራ ወደ ቀኝ የለም፤ ወደፊት ነው” ብለዋል፡፡

በቀንደኛው እና ልማደኛው አማሳኝ ኃይሌ ኣብርሃ እና የሀገረ ስብከት ዋና ሥራ አስኪያጅነትን ከደብር ዋና ጸሐፊነት ጋር ደርበው በያዙት የማነ ዘመንፈስ ቅዱስ ማስፈራሪያ እና ተጽዕኖ ‘ለአቤቱታ’ ለመጡ ካህናት እና ልዩ ልዩ ሠራተኞች የሰጡት ምላሽ፣ ሒደቱ በሕግ አግባብ የሚመዘን እንጂ በአሉባልታ ጋጋታ እንደማይገለበጥ ከማረጋገጥ አልፎ በካህናቱ ጀርባ የተደበቁትን እነኃይሌ ኣብርሃን የሚገሥጽም ነበር፡፡

አዲስ አድማስ በዘገባው እንዳሰፈረው፣ ባለፈው ሳምንት ማክሰኞም ብፁዕ ወቅዱስ አቡነ ማትያስ፣ የአማሳኞቹ መልእክተኛ በመኾን በዋና ሥራ አስኪያጅነት ካባ ላነጋገሯቸው የማነ ዘመንፈስ ቅዱስ ‹‹ለማንም ሰው ከለላ መኾን አልፈልግም፤ ሽፋንም አልሰጥም፤ ለአንተም ጨምሮ፤›› በማለት ነው የፍትሕ ጎማ መሽከርከር ሊጀምር እንደኾነ ያስታወቁት፡፡


  (አዲስ አድማስ፤ ቅጽ ፲፭ ቁጥር ፰፻፲፬፤ ቅዳሜ ነሐሴ ፲፮ ቀን ፳፻፯ ዓ.ም.)

በቤተ ክርስቲያኒቱ ሀብት፣ ዘረፋ እና ምዝበራ ጥፋታቸው በማጣራት የተረጋገጠባቸው የአድባራት እና የአዲስ አበባ ሀገረ ስብከት አማሳኝ ሓላፊዎች ለሕግ ተጠያቂነት ተላልፈው እንደሚሰጡ፣ ብፁዕ ወቅዱስ ፓትርያርክ አቡነ ማትያስ ተናገሩ፡፡

የጠቅላይ ቤተ ክህነቱ ምንጮች እንደጠቆሙት፣ ፓትርያርኩ ይህን የማረጋገጫ ቃል የተናገሩት፣ ስለ አድባራቱ የመሬት፣ የሕንጻ እና የልዩ ልዩ ገቢ ማስገኛ ተቋማት ኪራይ ተመን በተካሔደው ጥናታዊ ሪፖርት ላይ የሀገረ ስብከቱን ዋና ሥራ አስኪያጅ ሊቀ ማእምራን የማነ ዘመንፈስ ቅዱስን ባለፈው ማክሰኞ ጠዋት በጽ/ቤታቸው ባነጋገሩበት ወቅት ነው፡፡

ጥናታዊ ሪፖርቱ፣ ‹‹አድሏዊ እና ግለሰቦችን ለማጥቃት የተደረገ ነው›› በሚል በአንዳንድ አድባራት ተቃውሞ ማስነሣቱን ዋና ሥራ አስኪያጁ ለፓትርያርኩ ጠቅሰዋል፡፡ የጠቅላይ ቤተ ክህነቱ የአስተዳደር ጉባኤ፣ የጥናታዊ ሪፖርቱን የመፍትሔ ሐሳቦች በሙሉ ድምፅ በመቀበል፣ የአድባራቱ ሓላፊዎች ጥፋት በሕግ አግባብ እንዲታይና ክሥ እንዲመሠረትባቸው ያሳለፈው ውሳኔም ሌላ አማራጭ እንዲፈለግለት ፓትርያርኩን ጠይቀዋልም ተብሏል፡፡

ጥናቱ፣ ራሳቸው በሰጡት ትእዛዝ እና የጠቅላይ ቤተ ክህነቱ አስተዳደር ጉባኤ ባቋቋመው ኮሚቴ በይፋ መካሔዱን ያስታወሱት ፓትርያርኩ፣ ሪፖርቱን ለመቃወም በሚል ካህናትንና ልዩ ልዩ ሠራተኞችን በተለያዩ መንገዶች በማደራጀት በጎን የሚቀርብላቸውን አቤቱታ እንደማይቀበሉት ለዋና ሥራ አስኪያጁ ገልጸዋል፡፡

His Holiness warning the GM Yemane‹‹ለማንም ሰው ከለላ መኾን አልፈልግም፤ ሽፋንም አልሰጥም፤ ለአንተም ጨምሮ፤›› በማለት አቋማቸውን ያረጋገጡት ብፁዕ ወቅዱስ አቡነ ማትያስ፣ ‹‹በዚኽ አጸያፊ የዘረፋና የምዝበራ ሥራ ውስጥ እጁ የተገኘበትን ሰው ኹሉ ቤተ ክርስቲያኒቱ አሳልፋ ትሰጣለች፤ ይኼ የመጨረሻ አቋሜ ነው፤›› ሲሉ የሕግ ተጠያቂነቱ አይቀሬ መኾኑን አስታውቀዋል፡፡

በፓትርያርኩ ጠንካራ አቋም መደናገጥ ታይቶባቸዋል የተባሉት ዋና ሥራ አስኪያጁ፣ በሀገረ ስብከቱ ተከማችተው ለቆዩትና በየአድባራቱ እየተባባሱ ለመጡት የሙስና እና የመልካም አስተዳደር ዕጦት ችግሮች የአሠራር ማሻሻያዎች በመተግበር ላይ እንደሚገኝ በማስረዳት ጥናታዊ ሪፖርቱን እንደሚቀበሉትና እንደሚደግፉት ለፓትርያርኩ ማረጋገጣቸው ታውቋል፡፡

ላለፉት ስድስት ወራት በ58 አድባራት ላይ ሲካሔድ የቆየው ጥናት፣ ከሓላፊዎቹ ጋር የጥቅም ትስስር ለፈጠሩ ግለሰቦች በሚያደሉ ውሎች በቤተ ክርስቲያኒቱ መሬት፣ ሕንጻዎች፣ ሱቆች እና ልዩ ልዩ የገቢ ማስገኛ ተቋማት ላይ የተጧጧፈ ዘረፋና ምዝበራ መፈጸሙን አረጋግጧል፡፡ ቤተ ክርስቲያኒቱ ሀብትና ንብረቷን ከብክነት ለመታደግ ያወጣችውን የቃለ ዐዋዲ ደንብ ማስከበር የሚገባው የአዲስ አበባ ሀገረ ስብከትም፤ ከድንጋጌው ውጭ ለተሠሩ ሥራዎች ዕውቅና በመስጠት የሕግ ጥሰቱ አካል እንጂ የሕግ አስፈጻሚ መኾን አለመቻሉ የችግሩ ባለቤት እንደሚያደርገው በሪፖርቱ ተጠቁሟል፡፡

ብፁዕ ወቅዱስ አቡነ ማትያስ በፓትርያርክነት በተመረጡበት በዓለ ሢመት፣ በቤተ ክርስቲያኒቱ የሚታዩ አንዳንድ የሙስና ሒደቶችን ለማስወገድ የገቡትን ቃል መነሻ በማድረግ የተካሔደው ጥናቱ፣ የፀረ ሙስና አቋማቸውን ተግባራዊ ለማድረግ ትልቅ አስተዋፅኦ እንደሚኖረው የጠቅላይ ቤተ ክህነቱ አስተዳደር ጉባኤ በውሳኔው አመልክቷል፡፡ ቤተ ክርስቲያኒቱ ከአስተዳደር አኳያ ያለችበትን ተጨባጭ ኹኔታ የሚያመለክት በመኾኑም ጥናቱን መነሻ ያደረገ የፀረ ሙስና እንቅስቃሴ በማድረግ የቤተ ክርስቲያኒቱን ክብር ወደ ጥንቱ ጊዜ ለመመለስ በግንባር ቀደምነት እንደሚሰልፍም አስታውቋል፡፡

11 thoughts on “ቤተ ክርስቲያን አማሳኞችን አሳልፋ እንደምትሰጥ ፓትርያርኩ ለዋና ሥራ አስኪያጁ አረጋገጡ፤“ለማንም ከለላ አልኾንም፤ ለአንተም ጭምር”

  1. ታዛቢው August 25, 2015 at 7:20 am Reply

    1. የቦታ ኪራይ፣ የሙዳየ-ምጽዋት ገንዘብ አገባብና አወጣጥ፣ የመቃብራትና የፉካ አሰራር ጉዳይ፣ ቅጥርና የእድገት አሰራር ዋና ዋናዎቹ የሙስናና የብልሹ አሰራር መስኮቶች ናቸው፡፡ ግን ዛሬ የተፈጠሩ አይደሉም፡፡ እናንተ ቀንደኛና ቀንድ-አልባ በማለት እንደምትከፋፍሉት የአንድና የሁለት አለቆች ብቻ ጥፋትም አይደለም፡፡ ችግሩ እንደ ሥርዓት ያንፈራጠጠ ችግር ነው፡፡ ስለዚህ ስንታገለው እንደ ሥርዓትና እንደ ሁለንተናዊ የአሰራር ችግር ወስደን እንታገለው፡፡ እስማማለሁ!!

    2. የእናንተ የመረጣና ችክ ያለ የአንድን ወገን ነጥሎ የማሳደድ ፍጹም ወገንተኛ አካሄድ ችግሩን ያወሳስበዋል እንጂ አይፈታውም፡፡ ያጓትተዋል እንጂ አያፋጥነውም፡፡ ስለዚህ ምንም ብትደባብቁት የቤተ ክሕነትን ዘር ፖለቲካ ለሚያውቅ ሰው በጉልህ የሚነበበውን ዘረኝነታችሁን ትታችሁ ችግሩን እንደ ስፋቱ በምልዓት ያለአድልዎ አቅርቡት፡፡ ልጅ እና እንጀራ ልጅ ፈጥራችሁ ጉዳዩን ወደ ተራ ብሽሽቅ አታውርዱት፡፡ ድምጹን አጥፍቶ ከሚያጭደው እየበላ እስከሚያወራው ሁሉንም እናውቀዋለን፡፡ ከዘረዘራችሁ ሁሉንም በሚዛናዊነት ደርድራችሁ መውቀስ ነው፡፡

    3. ከእናንተም ብሶ ጋዜጦች የግራ ቀኙን አነጋግረው ለምን ዘገባ አወጡ ብሎ መንጨርጨር አሳፋሪ ነው፡፡ አንባቢውን መናቅ ነው፡፡ የግድ ተደብቆ በብሎግ ብቻ ከአንድ ወገን የተጻፈ መረጃ መስማት የለበትም፡፡ እነሱ ግራ ቀኙን አጣርቶ ማቅረብ ስራቸው ነው፡፡ በአድራሻና በኃላፊነት የሚሰራ ጋዜጣ እስከ ሆነ ድረስ እንደ ብሎግ እንዳሻው አድራሻዬ አይታወቅምና ስለማልከሰስ እንዳሻኝ ላውጋ አይባልም፡፡ ያስጠይቃል፡፡ አበሳውን ሁሉ የማነ ላይ መደፍደፍ እናንተን ትዝብት ላይ ከመጣል በቀር የሚፈይደው ነገር የለም፡፡

    4. ሁላችንም በአንድ ነገር እንስማማለን፡፡ ቅድስት ቤተ ክርስቲያን ደክማ እና ተቸግራ ከመበለታት መቀነት በሚፈታ ገንዘብና በልጆቿ ተጋድሎ ያቆየቺው ጥሪት በራስ ወዳድ ልጆቿ እየተመዘበረ ነው፡፡ እስካሁን ድረስ አባታችን የተናገሩትንና የተመኙትን ያህል ሙስናን ማዳከም አልተቻላቸውም፡፡ ለዚህ እንደ መሪነታቸው የሚወስዱት ኃላፊነት አለባቸው፡፡ ብፁዐን የቅ/ሲኖዶስ አባቶችም ለትልቁ ስእል ለቅድስት ቤተ ክርስቲያን ሁለንተናዊ አስተዳደራዊ መሻሻል የበኩላቸውን በማድረግ ፓትርያርኩን ማገዝ ሲገባቸው ጥቅምትና ግንቦት በመጣ ቁጥር ከማኅበረ ውዱሳንና ከአዲስ አበባ ሀ/ስብከት ስራ አስኪያጅ ሹመት የዘለለ አጀንዳ ሳይኖራቸው ላለፉት 2 አመታት መቆየታቸው አሳዛኝ ነው፡፡ ለድክመቱ የድርሻቸውን ይወስዳሉ፡፡

    5. ካሕኑም ዐይኑ ስር ይሄ ሁሉ የቤ/ክ ይዞታ ሲቸበቸብ እንዳላየ ከማየትም አልፎ በ400 መቶ እና በ500 መቶ ብር የአበል ድርጎ አፉን እየተዘጋ በሚሊዮናት ሲዘርፍ አርምሞን መምረጡ አሳዛኝ ነው፡፡ እነ ብሔረ ፅጌ ማርያም፣ እነ ምስራቀ-ፀሐይ ገብርኤል፣ እነ ቡልቡላ መድኃኔዓለም ወዘተርፈ… የቦታዎቹ ኪራይ እጅግ አሳዛኝ መሆኑ ሳያንስ፣ የኪራዩ ውል እንደተፈለገ የሚራዘም መሆኑ ሳያንስ፣ ኪራዩ ከቤ/ክ አገልግሎት ጋር የማይጣጣም መሆኑ ሳያንስ፣በውሉ ላይ 500 ካ.ሜ ተከራዩ እየተባለ በውስጠ-ታዋቂ ግን እስከ 1500ካ.ሜ አጥረው በብላሽ ይጠቀማሉ፡፡

    6. ሰ/ተማሪዎች ይሄን ሁሉ ያውቃሉ፡፡ ዛሬ አጩዋጩኋቸው መልካም ቢሆንም ለእስከ ዛሬ ዝምታቸውና የማስረጃ ማሰባሰብ ድክመታቸው የድርሻቸውን ኃላፊነት ይወስዳሉ፡፡ አሁንም ቢሆን ጥያቄያቸውን ተጨባጭና ከላስፈላጊ የጀርባ ተጽእኖ የጸዳ ማድረግ ይጠበቅባቸዋል፡፡ ‹ጃስ› ሲባሉ ለበለው-ፍለጠው-ቁረጠው የሚነሱ ሳይሆኑ ለዘላቂ የቤ/ክ ዓላማ በራሳቸው እግር ቁመው የሚታገሉ መሆን አለባቸው፡፡ ማኅበረቅዱሳን ሲያስለውና ብሎግ ሲበርደው ማስነጠሱን በቅጡ ያድርጉት፡፡ የቤ/ክ ጥቅም በአሉባልታ ብዛትና በዘመቻ አይፈታም፡፡ በማስረጃ፣ በአሳታፊነት በመመካከር፣ በሕግ፣ በጾም፣ በጸሎት ብቻ፡፡ እዚህ ጋር መኪና ሰበሩ፣ እዛ ጋር በብረት በየዱ፣ እዚህ ጋር አለቃውን አገቱት፣ ወዘተ ወዘተ ኢ-ሥርዓታዊ ብሎግ እና ስሜት መራሽ አካሄድ አይጠቅምም፡፡ መርህ!መርህ!መርህ!

    7. ሐራዎችም ቅኝታችሁን ቃኙት!! ዘተዋሕዶ የሚል ቅጽል በስማችሁ ጫፍ እስካለ ድረስ ለዚህና ለዚያ ጠቅላይ ግዛት ሳትሉ ካሕናቱን በበጎም በደግም እኩል በሚዛናዊነት መዝኑ!!! በበኩሌ ከዘረኝነት ነጻ ናችሁ ብዬ አላምንም!! ለዚህ ነው ተቆርቋሪነታችሁን ብወደውም ዘገባችሁን ሁልጊዜ በመንታ ልብ የምመለከተው!! ከዚህ ደዌ ራሳችሁን አርቁ!!!

  2. TIRSIT WUBIE August 25, 2015 at 7:42 am Reply

    ስንት አብያተ ክርስትያናት ቀዳሽ እና ንዋያተ ቅድሳት አጥተው እየተዘጉ ሌሎቹ በቤተክርስትያን ሀብት መኪና ይሸላለማሉ
    ይሄ ሁሉ ምዝበራ ማብቂያው መቼ ይሆን?

  3. Birhanu August 25, 2015 at 8:47 am Reply

    እግዚአብሄር ከእናንተ ለቤተክርስትያን ቀና ለምታስቡት ጋር ይሁን። በመጀመርያ ችግሩን ማግኘት የመፍትሄው ዋና ቁልፍ በመሆኑ ከእግዚአብሄር ጋር የሚሳካ ስራ እንደምትሰሩና ከዳር እንደምታደርሱት ተስፋ አለን። ለ አማሳኞችም ልብ ይስጣቸው።

  4. rahel Eshetu August 25, 2015 at 11:26 am Reply

    የቅዱሳ አምላክ እግዚአብሄር። ከናንተ ጋር ይሁን

  5. Anonymous August 26, 2015 at 9:17 am Reply

    Lehulum gize alew………………

  6. Anonymous August 29, 2015 at 2:13 pm Reply

    በቤተክርስቲያ ሁለንተናዊ ጉዳይ ላይ እየተፈፀመ ያለው ምዝበራና የመልካም አስተዳደር እጦት የመንበረ ፓትርያርክ ጠቅላይ ቤተክህነት መቀመጫ በሆነው አዲስ አበባ ከተማ ላይ ብቻ የተወሰነ አይደለም ይልቁንም በየሀረስብከቱ የስጋ ዘመዶቻቸውን ና የስጋ ዘመዶቻቸውን የትዳር አጋሮች የትውልድ መንደራቸውን ሰዎች በተገኘው ክፍት የስራ መደብ ያለውድድር በመቅጥር ችሎታና ብቃት የሌላቸውን ሲታዘዙ ሀግወጥ ተግባር ለመፈጸም ወደ ላ የማይሉትን ምላስ ና ወሬ አቀባዮቻቸውን በኃላፊነት ቦታ በመሾም የግል ጥቅማቸውን በማሳደድ ደክመውና ለፍተው የተማሩትን የቤተክርስቲያን ሊቃውንት በማግለል ና በማንገላታት የሚያሰቃዩ ለእውነት የሚቆሙትን አንዳንድ ስራአስኪያጆችን እንደቤት ሰራተኞቻቸው በፈለጉት ሰአት የሚያባባርሩ ከጠቅላይ ቤተክህነቱ መመሪያ ና እውቅና ውጭ ለረጅም ጊዜ በአንድ ሀገረስብከት ሳይዘወሩ በመቀመጣቸው ምክንያት ሀገረስብከቱን የግል እርስታቸው አድርገው በመቆጠር ያሻቻን እየፈጸሙ ፍጹም በሆነ አምባገነናዊ አገዛዝ ከህገ ወንጌል ውጭ በከፍተኛ ሁኔታ በቤተክርስቲያን ውስጥ ይፈጸማል ተብሎ ሊታመን የማችል የአስተዳደር በደል እያደረሱ ያሉትን ከዚህ ተግባራቸው እንዲለዩ ማድረግ የመንበረፓተርያርክ ጠቅላይ ቤተከነቱ ሃላፊነት ነውና ዝምታው ለምነድን ነው መቼሰ ነው በዚች ቤተክረስቲያን እፈሰሰ ያለው የግፍ እንባ ማስቆም የሚቻለው?

  7. mekonnen September 5, 2015 at 8:48 am Reply

    egziabher mechereshawin yasamirilin….!!!!!!!
    ewinetaw hulu eyeweta memitatu yehulachinim desita new……

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: