የመንበረ ፓትርያርክ ቅድስተ ቅዱሳን ማርያም ገዳም ሰበካ ጉባኤ: “ለሕይወት የሚያሰጋ የአድማ እንቅስቃሴ እየተደረገብኝ ነው” አለ

  • በ7 ወራት ውስጥ ከብር 1.5 ሚልዮን በላይ የሙዳይ ምጽዋት ገንዘብ ተመዝብሯል
  • የፓትርያርኩ የኦዲት ክንውን ትእዛዝ “ከቃለ ዐዋዲው ውጭ ነው” በሚል ተጓትቷል
  • “ታማኝ እና ብቁ የኾነ የሰው ኃይል ምደባ ቅድሚያ ሊሰጠው ይገባል” (ሰበካ ጉባኤው)

(አዲስ አድማስ፤ ቅጽ ፲፭ ቁጥር ፰፻፯፤ ቅዳሜ ሰኔ ፳፯ ቀን ፳፻፯ ዓ.ም.)

st-mary church aaየብፁዕ ወቅዱስ ፓትርያርኩ መቀመጫ የኾነችው የቅድስተ ቅዱሳን ማርያም ገዳም ሰበካ መንፈሳዊ ጉባኤ፥ ጥፋቶች ታርመው ግልጽነትና ተጠያቂነት ያለው አሠራር እንዳይሰፍን በሚሹ ጥቂት የአስተዳደር ሠራተኞች፣ በሕይወት ላይ ተጽዕኖ የሚያሳድር ከአድማ ያልተናነሰ እንቅስቃሴ እየተደረገበት መኾኑን አስታወቀ፡፡ የመልካም አስተዳደር ጅምሩን ከፍጻሜ ለማድረስ የቤተ ክርስቲያን ከፍተኛ የአስተዳደር ክፍሎች እገዛ እንዲያደርጉለትም ጠይቋል፡፡

ለብክነት፣ ለዘረፋ እና ለሙስና ከተመቻቸ አሠራር እንዲኹም ከመልካም አስተዳደር ዕጦት የተነሳ በገዳሟ ቀደም ሲል የተከሠቱ ጥፋቶችን ለማረም ልዩ ልዩ መመሪያዎችንና የውስጥ ደንብ ረቂቆችን ማዘጋጀቱን ሰበካ ጉባኤው ለሀገረ ስብከቱ የዋና ሥራ አስኪያጅ ጽ/ቤት ባቀረበው ሪፖርት ገልጿል፡፡

ይኹንና ለቁጥጥር የሚያመች ግልጽነትና ተጠያቂነት ያለበትን አሠራር ለማስቀጠልና ለማስፈጸም እንዳይቻል ጥቂት የአስተዳደር ሠራተኞች፣ ማኅበረ ካህናቱን በመከፋፈል፣ “ከሰበካ ጉባኤው ጋር ተባብራችኋል” በሚል ከሥራ እና ከደመወዝ በማገድ፣ በማስጠንቀቂያዎች በማሸማቀቅ፤ መረጃዎችን በማዛባት የሚፈጥሩት ግጭት ኹኔታውን አስቸጋሪ አድርጎብኛል ብሏል፡፡

መመሪያዎቹ እና የውስጥ ደንቡ “ቀድሞ ሲዘርፉበት የነበረውን አካሔድ የሚያስቀር እና አለአግባብ የሚያካብቱትን ጥቅም የሚያስቆም ነው፤” ያለው ሰበካ ጉባኤው፤ ለሕይወት አስጊ ባላቸው ተጽዕኖዎች ሳቢያ በገዳሟ ጽ/ቤት ተገኝቶ በሰላማዊ መንገድ ሥራዎቹን ለማከናወንና ሓላፊነቱን ለመወጣት ከማይችልበት ደረጃ መድረሱን በሪፖርቱ አስታውቋል፡፡  

እንደ ሰበካ ጉባኤው ገለጻ፥ ቃለ ዐዋዲውን መሠረት አድርጎ ለቤተ ክርስቲያን በሚበጅ መልኩ ያዘጋጃቸው፡-

  • የሰው ኃይል አስተዳደር፣
  • የፋይናንስ አሠራር፣
  • የንብረት አጠባበቅ እና
  • የግዥ መመሪያዎች

በጽ/ቤቱ ልዩ ትርጉም እየተሰጣቸው በመደበኛ ስብሰባ ላይ እንኳን አስተያየት እንዳይሰነዘርባቸው  ዕንቅፋት ተፈጥሯል፤ ማኅበረ ካህናት እና ሠራተኞች ገንዘብንና ንብረትን የሚቆጣጠር አካል ቢመርጡም፣ የቆጠራ ሥርዐትን አስመልክቶ ከወራት በፊት በሀገረ ስብከቱ የተላከው መመሪያ ለኮሚቴው ቀርቦ ወደ ተግባር ሳይተረጎም በቢሮ ተሸሽጎ እንደተቀመጠ ነው፤ እርሱን መነሻ በማድረግ ተጣጥሞ የተዘጋጀውን የቆጠራ ደንብና መመሪያ ከማስፈጸም ይልቅ ከመመሪያው የተነሣ ሕገ ወጥ ጥቅማቸው የቀረባቸውን ግለሰቦች በማነሣሣት ለተቃውሞ እንዲቆሙ ይደረጋል፡፡

የገዳሟ ቋሚ እና ወቅታዊ ንብረቶች ምዝገባ መመሪያ እንዲተገበር ሲጠየቅ “ምን አገባችኹ፤ እናንተን የሚመለከት አይደለም” የመሳሰሉ ሞራልን የሚነኩ ንግግሮች የተለመዱ ኾነዋል፤ ለዕለት ገንዘብ አሰባሰብ በኮምፒዩተር የታገዘ፣ ግልጽነትንና ተጠያቂነትን የሚያሰፍን የተሻለ የአሠራር ሥርዐት ለመዘርጋት ቢታሰብም በግዴለሽነት ወደ ጎን ተገፍቷል፤ ከፍተኛ የአቅም ማነስ ያለባቸው የሒሳብ ሹሙ ቼኮች ሲዘጋጁ ከነማዘዣቸው እና ከነሙሉ ምክንያታቸው ከተሟላ ሰነድ ጋር አይቀርቡም፤ ገዳሟ በውዝፍ ዕዳ እንዳትዘፈቅና ለሒሳብ አሠራር ክትትል አመቺነት ሲባል የሀገረ ስብከቱ የ20% ፈሰስ፣ የሙዳይ ምጽዋት ቆጠራው በተጠናቀቀ ማግስት በወቅቱ እንዲከፈል መመሪያ ቢሰጥም በሒሳብ ክፍሉ ሓላፊ በኩል ፈቃደኝነት አይታይም፡፡

ያለፉት ስድስት ዓመታት የገንዘብ እና ንብረት እንቅስቃሴ በገለልተኛ ኦዲተር እንዲመረመር በፓትርያርኩ ቢታዘዝም “ከቃለ ዐዋዲው ውጭ ነው” በማለት ሒደቱ በሒሳብ ክፍሉ እና በጽ/ቤቱ ተጓትቷል፤ ይልቁንም የሒሳብ ፍተሻ ሒደቱ እና የሰበካ ጉባኤው የተሻሻሉ አሠራሮች ትግበራ ከሚያስከትሉት ተጠያቂነት ለማምለጥ የአስተዳደር ሐላፊዎቹ፣ “ሰበካው እየረበሸን ነው፤ የደመወዝ እና ጥቅማጥቅሞች ዕድገት እንዳናደርግላችሁ ዕንቅፋት ኾኖብናል፤ ከእኛ ጎን ከቆማችኹ ቢሮ አካባቢ እንመድባችኋለን፤ ወዘተ…” በማለት ከማኅበረ ካህናቱ ጋር ማጋጨትና መከፋፈል ሥራዬ ብለው ከመያዛቸውም በላይ በዓመት ፈቃድ ሰበብ ከቢሯቸው ይሸሻሉ፡፡

Financial Report

ገዳሟ÷ በ2006 ዓ.ም ከየካቲት እስከ ነሐሴ ባሉት ሰባት ወራት ብቻ ከሙዳይ ምጽዋት ገቢ ከብር 1.5 ሚሊዮን በላይ ተመዝብራለች፤ ከታኅሣሥ ወር 2007 ዓ.ም በፊት ባሉት ጊዜያት ከንዋያተ ቅድሳት ሽያጭ በየወሩ በአማካይ ከብር 100 ሺሕ በላይ ስትመዘበር ቆይታለች

በግንቦት ወር መጨረሻ ለአዲስ አበባ ሀገረ ስብከት የሥራ አስኪያጅ ጽ/ቤት የተላከው ይኸው የሰበካ ጉባኤው ሪፖርት፤ ከተደጋጋሚ ጥያቄ በኋላ በቁጥጥር ክፍሉ እና በሒሳብ ክፍሉ በቀረቡ የገዳሟ የፋይናንስ አቋም ማሳያ ሪፖርቶች ላይ የተካሔደው ንጽጽራዊ ግምገማ፤ ገዳሟ በ2006 ዓ.ም ከየካቲት እስከ ነሐሴ ባሉት ሰባት ወራት ብቻ ከብር 1.5 ሚሊዮን በላይ ተመዝብራለች፤ በዚኽ ከፍተኛ የገንዘብ ጉድለት እንቅስቃሴ በማኅደረ ስብሐት ልደታ ለማርያም በነበራቸው ሓላፊነት የአምስት ሺሕ ብር የገንዘብ ቅጣት እና የኹለት ዓመት እስራት በገደብ የተፈረደባቸው ጸሐፊውን ኃይለ ጊዮርጊስ ዕዝራን ጨምሮ ሒሳብ ሹሙ፣ ገንዘብ ያዡ፣ ቁጥጥሩ እና የቀድሞው አስተዳዳሪ ተጠያቂዎች እንደኾኑ በሪፖርቱ ተገልጿል፡፡

በተጨማሪም ከንዋያተ ቅድሳት ወርኃዊ ሽያጭ ጋር በተያያዘ ገዳሟ ከታኅሣሥ ወር 2007 ዓ.ም በፊት ባሉት ጊዜያት በየወሩ በአማካይ ከብር 100 ሺሕ በላይ ስትመዘበር መቆየቷን የጠቆመው ሪፖርቱ፣ ለዚኽም በዋናነት ተጠያቂው የንብረት ክፍል ሐላፊው እንደኾኑ ገልጿል፡፡

በገዳሟ በገንዘብ ዝውውር እና በንብረት አጠባበቅ የሚታየው ከፍተኛ የአሠራር ድክመት እና የሠራተኞች የአቅም ማነስ የመግባባት ችግር ከመፍጠሩም ባሻገር በልዩ ልዩ የአስተዳደር ክፍሎች ላይ ተጽዕኖ ማሳደሩን ሪፖርቱ አክሎ አብራርቶ፡-

  • የዕለት ገቢ አሰባሰብ አሠራሩ ግልጽነትንና ተጠያቂነትን በሚያሰፍን አኳኋን እንዲስተካከል፤
  • የፐርሰንት ክፍያ አሠራር በወቅታዊነቱ እና በማስተላለፉ ዙሪያ መመሪያ እንደሚያስፈልገው፤
  • የኹለገብ የልማት እንቅስቃሴው የገቢ እና የወጪ አሠራር ኦዲት እንደሚያሻው፤
  • በሞያ እና በታማኝነት ብቁ የኾነ የሰው ኃይል መመደቡ ቅድሚያ ሊሰጠው እንደሚገባ አሳስቧል፡፡

የገዳሟ ጸሐፊ መጋቤ ሥርዐት ኃይለ ጊዮርጊስ ዕዝራ በበኩላቸው፣ ሪፖርቱ እንዳልደረሳቸው ቢናገሩም የተጠቀሰውን የገንዘብ ጉድለት ጨምሮ የሪፖርቱ ይዘት “ሙሉ በሙሉ ውሸት ነው” በሚል አስተባብለዋል፤ ተጨማሪ ጥያቄዎችንም በስልክ ለመመለስ ፈቃደኛ ሳይኾኑ ቀርተዋል፡፡  

2 thoughts on “የመንበረ ፓትርያርክ ቅድስተ ቅዱሳን ማርያም ገዳም ሰበካ ጉባኤ: “ለሕይወት የሚያሰጋ የአድማ እንቅስቃሴ እየተደረገብኝ ነው” አለ

  1. Anonymous July 8, 2015 at 1:17 pm Reply

    aye Yihich Betekerstian Minew edawa beza

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: