የአ/አበባ ሰንበት ት/ቤቶች ለቅ/ሲኖዶሱ ባቀረቧቸው ጥያቄዎች እንቅስቃሴያቸውን አጠናክረው ቀጥለዋል

  • የሰንበት ት/ቤቶቹን አንድነት ለማገድ እና አመራሩን ለመበተን መታቀዱን ተቃውመዋል
  • በአጥቢያዎች የተቀናጀ ፀረ ሙስና እና ፀረ ኑፋቄ እንቅስቃሴ እንደሚካሔድ ተጠቁሟል
  • ‹‹የቤተ ክርስቲያን ተረካቢ እንጂ የበዓላት ማድመቂያ ብቻ ቄጤማ አይደለንም››/ወጣቶቹ/

(ሰንደቅ፤ ፲ኛ ዓመት ቁጥር ፭፻፮፤ ግንቦት ፲፪ ቀን ፳፻፯ ዓ.ም.)

aassd5

የሰንበት ት/ቤቶቹ ሊቃነ መናብርት በሀገረ ስብከቱ አንድነት መሪነት ሲወያዩ

በምዝበራ ላይ የተሰማሩ አማሳኝ የገዳማት እና የአድባራት ሓላፊዎች የሀብት ምንጭ እንዲመረመር፣ ማስረጃ በቀረበባቸው የተሐድሶ መናፍቃንበሕገ ወጥ ሰባክያን እና ዘማርያን ላይ ርምጃ እንዲወሰድ እንዲኹም ሕገ ቤተ ክርስቲያንን የሚጥሱ አካሔዶች እንዲታረሙና የቅዱስ ሲኖዶሱ ውሳኔዎች ተፈጻሚ እንዲኾኑ ያቀረቧቸው ጥያቄዎች ተገቢ ምላሽ እስኪያገኙ ድረስ እንቅስቃሴያቸውን አጠናክረው እንደሚቀጥሉ በኢትዮጵያ ኦርቶዶክስ ተዋሕዶ ቤተ ክርስቲያን የአዲስ አበባ ሀገረ ስብከት አብያተ ክርስቲያናት ሰንበት ት/ቤቶች ገለጹ፡፡

የርክበ ካህናት ቅዱስ ሲኖዶስ ምልዓተ ጉባኤ የመክፈቻ ጸሎት ሥነ ሥርዐት በመንበረ ፓትርያርክ ቅድስተ ቅዱሳን ማርያም ገዳም በተካሔደበት ዕለት፣ ዕቅበተ እምነትንና መልካም አስተዳደርን የተመለከቱ አምስት ዐበይት ጥያቄዎችን ለፓትርያርኩ እና ለቅዱስ ሲኖዶስ አባላት ማቅረባቸውን ሰንበት ት/ቤቶቹ አስታውሰዋል፡፡

ከ160 በላይ የአጥቢያ አብያተ ክርስቲያናት ሰንበት ት/ቤቶች የተውጣጡ ሦስት፣ ሦስት ሊቃነ መናብርት የተሳተፉበት የግማሽ ቀን ውይይት ባለፈው ሳምንት ቅዳሜ በሀገረ ስብከቱ ሰንበት ት/ቤቶች አንድነት መሪነት የተካሔደ ሲኾን ጥያቄዎቹ የተስተናገዱበትን ኹኔታ በመገምገም ቀጣይ የእንቅስቃሴ አቅጣጫዎች መቀመጣቸው ተገልጧል፡፡

ከተለመደው በተለየ በአራት ቀናት በተጠናቀቀው የቅዱስ ሲኖዶሱ ስብሰባ ጥያቄዎቻቸው እንደተጠበቀው በአጀንዳ ተይዘው ውሳኔ አለማግኘታቸው እንዳሳዘናቸው በውይይታቸው የገለጹት ሰንበት ት/ቤቶቹ፣ የቤተ ክርስቲያኒቱን ቅድስና እና ሀብት የማስጠበቅ ትውልዳዊ ግዴታቸውን አስፈላጊ እና ሕጋዊ ርምጃዎችን በሙሉ በመጠቀም እንደሚቀጥሉበት አስታውቀዋል፡፡

Addis Ababa Sunday Schools at the Holy Synod Opening Prayer
ጥያቄዎቻቸው፣ በቃለ ዐዋዲው እና በሰንበት ት/ቤቶች አንድነት መተዳደርያ ደንብ አግባብ መቅረባቸውን ሰንበት ት/ቤቶቹ አረጋግጠው÷ በመደጋገፍ እና በመተባበር ላይ በተመሠረተው የሀገረ ስብከቱ የሰንበት ት/ቤቶች አንድነት መርሕ መሠረት በሰባት ክፍላተ ከተማ(ወረዳዎች) የተዋቀረው 69 አባላት ያሉት ሥራ አስፈጻሚ እና 11 አባላት ያሉት የሀገረ ስብከቱ አመራር ከሚመለከታቸው የቤተ ክህነት፣ የመንግሥት እንዲኹም ኅብረተሰብ አካላት ጋራ እየተገናኘ ተከታትሎ እንዲያስፈጽም መስማማታቸውን አስታውቀዋል፡፡

ሰንበት ት/ቤቶቹ÷ በቅዱስ ሲኖዶሱ የምልዓተ ጉባኤ ስብሰባ መክፈቻ ባቀረቧቸው ጥያቄዎች እና ወጣቱ ባሳየው ፀረ ኑፋቄ እና ፀረ ሙስና መነሣሣት ተደናግጧል ያሉት ‹‹አማሳኝ ቡድን››፣ ከአንዳንድ የሀገረ ስብከቱ እና የቤተ ክህነቱ ሓላፊዎች ጋራ በማበር የሀገረ ስብከቱን የሰንበት ት/ቤቶች አንድነት አመራር አባላት ለማስፈራራት እና ለማሳሰር ሙከራ ማድረጉን ጠቅሰዋል፤ ከዚኽም አልፎ ከመጪው ጥቅምት የቅዱስ ሲኖዶስ ምልዓተ ጉባኤ በፊት የሀገረ ስብከቱንና የክፍላተ ከተማ አመራሩን ከሓላፊነቱ ለማገድና በሀገረ ስብከቱ ጽ/ቤት የሚገኘውን ቢሮውን ለማሸግ መታቀዱ የሰንበት ት/ቤቶቹ ከፍተኛ ቁጣ እና ተቃውሞ የተገለጸበት እንደነበር ተናግረዋል፡፡

የቤተ ክርስቲያኒቱ እምነት፣ ሥርዐት እና ትውፊት ተጠብቆ ከትውልድ ወደ ትውልድ እንዲተላለፍ የማድረግ እና የቅዱስ ሲኖዶስ መመሪያዎችን የማስፈጸም ጥያቄዎቻቸው፣ ደንባዊ ብቻ ሳይኾኑ ፓትርያርኩ በቃለ ምዕዳኖቻቸው ያወጁት የብዙኃኑ አገልጋይ እና ምእመን ሮሮዎች መኾናቸውን ሰንበት ት/ቤቶቹ ይናገራሉ፡፡ ለቅዱስ ሲኖዶሱ ለማቅረብ የተገደዱትም ‹‹በየደረጃው ያሉ ሓላፊዎችም መፍትሔ ለመስጠት የሚቸገሩ መኾናቸውን በየጊዜው ባደረግናቸው ጥረቶች ያረጋገጥን በመኾኑ ነው፤›› ብለዋል፡፡

aassdሰንበት ት/ቤቶች፣ ‹‹የቤተ ክርስቲያኒቱን አስተዳደራዊ እና መንፈሳዊ አገልግሎት የሚረከብ በሥነ ምግባር የታነፀ ብቁ ትውልድ የሚፈሩበት የትምህርት እና የልማት ማእከላት እንጂ የበዓላት ማድመቂያ ቄጤማ ብቻ ተደርገን መታየት የለብንም፤›› ያሉት ተወያዮቹ፣ ፓትርያርኩ የብዙኃን አባት እንደመኾናቸው በልጅነታችን ጠርተው ሊያወያዩን ይገባ ነበር በሚል የተሰማቸውን ቅሬታ ገልጸዋል፡፡

እንደሰንበት ት/ቤቶቹ ገለጻ፣ በቤተ ክርስቲያን ውስጥ አጥፊው የሚሾምበት፣ መልካም ሠሪው የሚታገድበት የጎጠኝነትና የጥቅመኝነት አሠራሮች መንሰራፋታቸው ለአገልግሎት ትልቅ ዕንቅፋት ፈጥሮአል፡፡ አኗኗራቸው ከደመወዛቸው የማይመጣጠን ጥቂት የማይባሉ ሓላፊዎችና ሠራተኞች ከግብር አበሮቻቸው ጋራ በመኾን ቤተ ክርስቲያኗን ሰላም እየነሱ ነው፡፡ በምትኩ በየአጥቢያው ሙስናንና ኑፋቄን የሚያጋልጡ የሰንበት ት/ቤት ወጣቶች ‹‹ሽብርተኞች ናቸው፤ መንግሥትን ለመገልበጥ አሲረዋል›› በሚሉ ሰንካላ ምክንያቶች እየተዋከቡ ነው፡፡

የሀብታም ልጆችና የድኻ ልጆች ብለው ከፋፍለው ትምህርተ ሃይማኖት እናስተምራለን የሚሉ ግለሰቦችና ሓላፊዎች እንዲታረሙ የቀረቡት አቤቱታዎች ሰሚ ጆሮ አላገኙም፡፡ ኹኔታው የቤተ ክርስቲያኗን አስተምህሮ የሚፃረሩና ማስረጃ ቀርቦባቸው ጉዳያቸው በእንጥልጥል የተያዘ ግለሰቦች ሳይቀር ስማቸውን ቀይረው በመዋቅሯ ውስጥ በመስረግ በጥፋት ተልእኳቸው ለመግፋት ምቹ ኹኔታ ፈጥሮላቸዋል፡፡ በአጠቃላይ ፓትርያርኩ ሙስናንና ብልሹ አሠራርን ከቤተ ክርስቲያን በማጥፋት ቅድስናዋን፣ ልዕልናዋንና ክብርዋን እንደሚያስመልሱ በተደጋጋሚ የገለጡ ቢኾንም እስከ አኹን ምንም የታየ ለውጥ ባለመኖሩ ችግሩ እየከፋ አቤቱታዎች ተጠራቅመው አቅጣጫቸውን እንዳይስቱ ምላሽ እንዲሰጣቸው ሰንበት ት/ቤቶቹ ድምፃቸውን አሰምተው ይጠይቃሉ፡፡

‹‹ለቤተ ክርስቲያን ተልእኮ የማይመጥኑና ቅድስናዋን የሚፃረሩ አሳፋሪ ድርጊቶች አንገታችንን እያስደፉና እያሳፈሩን አይተን እንዳላየን፣ ሰምተን እንዳልሰማን ለማለፍ ሃይማኖታችንም ኾነ ሕሊናችን ስለማይፈቅድ፣ በእግዚአብሔር ዘንድ ስለሚያስጠይቁንና በታሪክም ስለሚያስወቅሱን ጩኸታችን ሰሚ እስኪያገኝና የሚታረምበት አሠራር እስኪዘረጋ ድረስ አማሳኞችን ከቢሮ ለማስወጣት፣ መናፍቃንን ከዐውደ ምሕረት ለማውረድ በየአጥቢያው መንቀሳቀሳችንን አጠናክረን እንቀጥላለን፤ በዚኽም የሚመጣውን መሥዋዕትነት እንቀበላለን እንጂ ቤተ ክርስቲያናችንን ለአማሳኞች እና ለተሐድሶ መናፍቃን አሳልፈን አንሰጥም፤›› ይላሉ፡፡

Advertisements

11 thoughts on “የአ/አበባ ሰንበት ት/ቤቶች ለቅ/ሲኖዶሱ ባቀረቧቸው ጥያቄዎች እንቅስቃሴያቸውን አጠናክረው ቀጥለዋል

  1. Anonymous May 20, 2015 at 1:53 pm Reply

    yes

  2. aberham May 20, 2015 at 2:09 pm Reply

    I like everyday news

  3. Anonymous May 20, 2015 at 2:17 pm Reply

    bertaten yesten.
    benegerachen lay beteleyayeu deriget endhum bemnegest meserya bet yemnsera wotatoch alen egnam yetkeblenwun adera lemfetsem yechalen zende leyu merha gebr tezegajeto besnebt tmehrt betoch takefen abern yemnserabet bemechache lenufake tmehert sechewoch enkefat enfetralen. ayezachehu. wotatoch. begubzenahi worat fetarehen aseb kegonachehu neen

  4. Anonymous May 20, 2015 at 8:44 pm Reply

    realy let us work fore the truth,

  5. Anonymous May 20, 2015 at 11:18 pm Reply

    egezabher amlak bertatwen yestach !! ydengle Maryam ysret legwech !! aman!!

  6. Anonymous May 21, 2015 at 9:11 am Reply

    le hulu gize alew! boo gize le kulu! endamibal gize sidersi amlak yesu yehunutin betun yemitebikutin yasnessal. bertu! bertatin yestachew.

  7. Anonymous May 21, 2015 at 9:25 am Reply

    semaitinenet yelijoch chewata aderachihut ende? wefefewoch

  8. Anonymous May 21, 2015 at 1:41 pm Reply

    ገአንድነቱ ከተደበቀበት ወጥቶ እንዲህ የእቅበተ እምነት ስራ መስራት መጀመሩ ይበል የሚያሰኝ ነው፡፡የበለጠ ውጤታማ እንድንሆን ግን እንቅስቃሴው ወደ ተራው የሰንበት ትምህርት ቤት አባላትም መተላለፍ አለበት፡፡ብዙዎች ጋር የመድረስ እድል ስላላችሁ በተለይ ተሐድሶን ከቤተክርስቲያናችን ለማስወገድ ከማህበረ ቅዱሳንም በላይ እናንተ ጋር ዕድሉ አለና ተጠቀሙበት፡፡ እኛም ከጎናችሁ ነን፡፤

  9. Anonymous May 22, 2015 at 5:36 am Reply

    God is loard

  10. Anonymous May 25, 2015 at 12:07 pm Reply

    ኤዲያ! እናንተ ደግሞ በቅጡ ሳታጣሩ በግርግርታ ሰማዕትነት ላይ አትንጠራሩ፡፡ችግርን ተቀራርቦና ተነጋግሮ በውስጥ እንደመፍታት በየአደባባዩ የጋዜጣ ማድመቂያ መሆን የማይሰለቻችሁ አትሁኑ፡፡አድማን በአድማ ከእጅ አይሻል ዶማ፡፡ኤዲያ!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: