ብፁዕ ወቅዱስ ፓትርያርኩ የ፳፻፯ ዓ.ም. በዓለ ልደትን አስመልክቶ ያስተላለፉት መልእክት

  • ጌታችን አምላካችንና መድኃኒታችን ኢየሱስ ክርስቶስ ሥጋን ተዋሕዶ በተወለደ ጊዜ በቃል ርስትነት ሰው እግዚአብሔር ኾነ፤ በሥጋ ርስትነት አካላዊ ቃል ሰው ኾነ፤ ዕፁብ ድንቅ የኾነ ይህን ተዋሕዶ የተመለከቱ የሰማይ ሠራዊትም አካለ ሰብእን በተዋሕዶተ ቃል ለአምላካዊ ክብር ላበቃ ለእርሱ ‹‹ክብር ለእግዚአብሔር በአርያም ይኹን፤ ሰላምም በምድር ይኹን፤ በጎ ፈቃዱም ለሰው ይኹን›› ብለው በደስታ ዘመሩ፡፡
  • የኢትዮጵያ ኦርቶዶክስ ተዋሕዶ ቤተ ክርስቲያን ከሌሎች አብያተ ክርስቲያናት በተለየ ኹኔታ በስሟ ላይ ተዋሕዶ የሚለውን ቃል መጠቀሟ የድኅነታችን መሠረት፤ የቃልና ሥጋ ተዋሕዶ መኾኑን ለማሳየት ነው፤ ምክንያቱም ቃል ሥጋን ካልተዋሐደ አይሞትምና፤ ቃል በሥጋ ካልሞተ ደግሞ እኛ ከሞትና ከኃጢአት ዕዳ ነፃ መኾን አንችልምና ነው፡፡
  • ጌታችን ኢየሱስ ክርስቶስ ልደቱን ያደረገው በትሑታኑ መኖርያ ማለትም በእንስሳቱ በረትና በእረኞቹ ሠፈር እንደነበር ልናስታውስ ይገባል፡፡ ስለኾነም የእርሱ ደቀ መዛሙርት የኾን እኛም ከልደቱ መልእክት ትምህርትን ወስደን በዚኽ ቀን በጤና፣ በዕውቀት፣ በሀብትና በልዩ ልዩ ምክንያት አካላዊ፣ ሥነ ልቡናዊ መንፈሳዊ ድኽነት ከተጫናቸው ወገኖች ጋራ አብረን በመዋል፣ አብረን በመመገብና እነርሱን ዘመድ በማድረግ በዓሉን ልናከብር ይገባል፡፡

*               *               *

His Holiness Patriarch Abune Mathias

ብፁዕ ወቅዱስ ፓትርያርክ አቡነ ማትያስ መልእክቱን ባስተላለፉበት ወቅት (ፎቶ: ማኅበረ ቅዱሳን)

ቃለ በረከት ዘእምኀበ ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአኵስም ወእጨጌ ዘመንበረ ተክለ ሃይማኖት ዘተናገረ በእንተ በዓለ ልደት ዓቢይ ዘእግዚእነ ወአምላክነ ወመድኃኒነ ኢየሱስ ክርስቶስ ሎቱ ስብሐት፡፡

በስመ አብ ወወልድ ወመንፈስ ቅዱስ አሐዱ አምላክ አሜን፡፡
  • በሀገራችን በኢትዮጵያ በገጠርና በከተማ የምትኖሩ፤
  • ከሀገር ውጭ በተለያዩ አህጉር የምትገኙ፤
  • የሀገራችንን ዳር ድንበር ለመጠበቅና ለማስከበር በየጠረፉ የቆማችኹ፤
  • በሕመም ምክንያት በየሆስፒታሉ ያላችኹ፤
  • እንዲኹም የሕግ ታራሚዎች ኾናችኁ በየማረሚያ ቤቱ የምትገኙ ኢትዮጵያውያንና ኢትዮጵያውያት፤

የዘለዓለም አባት፤ የሰላም አለቃ፤ ስሙም ድንቅ መካርና ኃያል አምላክ የኾነው ጌታችን አምላካችንና መድኃኒታችን ኢየሱስ ክርስቶስ እንኳን ለ፳፻፯ ዓ.ም. በዓለ ልደቱ በሰላም አደረሳችኹ!!

‹‹ውውእቱ ቃል ሥጋ ኮነ ወኃደረ ላዕሌነ፤ ያ ቃል ሥጋ ኾነ፤ በእኛ ላይም አደረ›› (ዮሐ.፩÷፲፬)

የተወደዳችኹ የመንፈስ ቅዱስ ልጆቻችን ምእመናንና ምእመናት፤

የጌታችን የአምላካችንና የመድኃኒታችን የኢየሱስ ክርስቶስን በዓል ልደት ስናከብር ከኹሉ በፊት የእርሱን ማንነት በማውሳት፤ በመረዳትና የእምነት ግብረ መልስን በመስጠት ልናከብር እንደሚገባ መገንዘቡ ተገቢ ነው፡፡ ከዚህ አኳያ ለመኾኑ የተወለደው ማን ነው? ለምንስ ተወለደ? በልደቱ ዕለት ለዓለም የተላለፈው አጠቃላይ መልእክትስ ምንድን ነው? የሚለውን ማየት በእጅጉ አስፈላጊ ነው፡፡

ቅዱሳት መጻሕፍት በግልጽ እንደሚያስተምሩን፣ ከሦስት አካላተ እግዚአብሔር አንዱ የኾነው እግዚአብሔር ወልድ የአብና የመንፈስ ቅዱስ ቃል ስለኾነ በተለየ ኩነቱ ቃል፤ ቃለ አብ፤ ቃለ እግዚአብሔር፤ አካላዊ ቃል ተብሎ ይጠራል፤ (መዝ.፴፪÷፮፤ ዮሐ.፩፣፩ – ፪፤ ራእ.፲፱፣፲፫) ቃል ከልብ እንደሚገኝ አካላዊ ቃልም ከአብ የተገኘ ነው፡፡ ይኹንና ቃል ከልብ በመገኘቱ ደኃራዊ አይባልም፤ ልብም ቃልን በማስገኘቱ ይቀድማል አይባልም፡፡ በህልውናም በተመሳሳይ አካላዊ ቃል ከአብ በመገኘቱ ደኃራዊ አይባልም፤ የአካላዊ ቃል አስገኝ በመኾኑ ከወልድ ይቀድማል አይባልም፡፡ በህልውናው (በአነዋወር) ከቃል የተለየ ወይም የቀደመ ልብ እንደማይኖር ኹሉ፣ ከአካላዊ ቃል የተለየ ወይም የቀደመ የአብ ህልውና (አነዋወር) የለም፤ ቃል የሚለው ስም እኩል የኾኑ የሦስቱ አካላተ እግዚአብሔር ቅድምና እና ህልውና በምስጢር ያገናዘበና በትክክል የሚገልጽ በመኾኑ ወንጌላዊው ዮሐንስ ጌታችን ኢየሱስ ክርስቶስን በመለኰታዊና በቀዳማዊ ስሙ ቃል ብሎታል፡፡

ወንጌላዊው ቅዱስ ዮሐንስ ‹‹በመጀመሪያው ቃል ነበረ፤ ቃልም በእግዚአብሔር ዘንድ ነበረ፤ ቃልም እግዚአብሔር ነበረ፤ ይህ በመጀመሪያው በእግዚአብሔር ዘንድ ነበረ፤ ኹሉ በእርሱ ኾነ፣ ከኸነውም አንዳች ስንኳ ያለእርሱ አልኾነም›› በማለት የጌታችን የኢየሱስ ክርስቶስን እግዚአብሔርነት በማያሻማ መልኩ ያረጋግጣል፤ (ዮሐ.፩÷፩-፫)፡፡ እግዚአብሔር አብ አካላዊ በኾነ ቃሉ በእግዚአብሔር ወልድ ፍጥረታትን ኹሉ እንደፈጠረ፣ አካላዊ በኾነ እስትንፋሱ በእግዚአብሔር መንፈስ ቅዱስም ለሕያዋን ፍጥረታት ኹሉ ሕይወትን እንደሰጠ በቅዱስ መጽሐፍ በብዙ ቦታ በግልጽ ተቀምጦአል፤ (ዘፍጥ.፩፣፩-፫፤ መዝ.፴፪÷፮፤ ዘፍ.፪÷፯፤ ሮሜ ፰÷፲፩)፡፡

በመኾኑም ከጊዜ በኋላ ሥጋችንን በመዋሐድ ሰው ኾኖ ተወለደ እየተባለ ያለው ፍጥረታትን በሙሉ የፈጠረ፣ ከተፈጠረው ፍጥረት አንዳች ስንኳ ያለእርሱ የተፈጠረ ምንም እንደሌለ የተነገረለት አካላዊ ቃል ማለትም ቃለ እግዚአብሔር ወልድ ነው፡፡

አካላዊ ቃል ከዘመን መቆጠር በፊት በመለኮታዊ ርቀትና ምልአት ከፍጡራን አእምሮ በላይ በኾነ ዕሪና፣ ዋሕድና፣ ቅድምና፣ ኩነትና ህልውና እንደ አብና እንደ መንፈስ ቅዱስ የነበረ ሲኾን፤ በሞቱ የእኛን ዕዳ ኃጢአት ተቀብሎ ከሞተ ኃጢአት ሊያድነን በአምስት ሺሕ አምስት መቶ ዓመተ ዓለም መጋቢት ፳፱ ቀን መዋቲ የኾነውን ሥጋችንን በማኅፀነ ማርያም ተዋሕዶ ሥጋ ኾነ፤ (ዮሐ.፩÷፲፬)፡፡

ዘጠኝ ወር ከአምስት ቀን ሲኾነው ታኅሣሥ ፳፱ ቀን እንደ ትንቢቱ ቃል በዳዊት ከተማ በቤተ ልሔም ተወለደ፤ የምሥራቹም ‹‹ዛሬ መድኅን ክርስቶስ ተወልዶላችኋል›› ተብሎ በመላእክት አንደበት ተበሠረ፤ (ሉቃ. ፪፣፲-፲፪፤ ማቴ.፪፣፩-፲፩)፡፡

ጌታችን አምላካችንና መድኃኒታችን ኢየሱስ ክርስቶስ ሥጋን ተዋሕዶ በተወለደ ጊዜ በቃል ርስትነት ሰው እግዚአብሔር ኾነ፤ በሥጋ ርስትነት አካላዊ ቃል ሰው ኾነ፤ ዕፁብ ድንቅ የኾነ ይህን ተዋሕዶ የተመለከቱ የሰማይ ሠራዊትም አካለ ሰብእን በተዋሕዶተ ቃል ለአምላካዊ ክብር ላበቃ ለእርሱ ‹‹ክብር ለእግዚአብሔር በአርያም ይኹን፤ ሰላምም በምድር ይኹን፤ በጎ ፈቃዱም ለሰው ይኹን›› ብለው በደስታ ዘመሩ፡፡ (ሉቃ.፪፣፲፫-፲፭)

የተወደዳችኹ የመንፈስ ቅዱስ ልጆቻችን ምእመናንና ምእመናት፤

እግዚአብሔር አምላክ ለሰው ልጅ ያደረገው በጎ ፈቃድ፣ በሰማይም ኾነ በምድር ላሉ ፍጥረታት ለማንም ያልተደረገ ነው፤ (ዕብ. ፩÷፩-፲፬)፡፡ ምንም እንኳ ፍጥረታትን ኹሉ በቸርነቱ የሚመግብና የሚጠብቅ እርሱ ብቻ መኾኑ ቢታወቅም፣ አካሉን አካል አድርጎ በተዋሕዶ ወደ አምላክነት ደረጃ ከፍ ያደረገው፣ በመንበረ መለኰት ያስቀመጠውና የሰማይና የምድር ገዢ ያደረገው ግን ከሰው በቀር ከፍጡር ወገን ሌላ ማንም የለም፤ (መዝ.፰÷፬-፮፤ ዕብ.፪÷፲፮፤ ኢሳ.፱÷፮-፯)፡፡

የኢትዮጵያ ኦርቶዶክስ ተዋሕዶ ቤተ ክርስቲያን ከሌሎች አብያተ ክርስቲያናት በተለየ ኹኔታ በስሟ ላይ ተዋሕዶ የሚለውን ቃል መጠቀሟ የድኅነታችን መሠረት፤ የቃልና ሥጋ ተዋሕዶ መኾኑን ለማሳየት ነው፤ ምክንያቱም ቃል ሥጋን ካልተዋሐደ አይሞትምና፤ ቃል በሥጋ ካልሞተ ደግሞ እኛ ከሞትና ከኃጢአት ዕዳ ነፃ መኾን አንችልምና ነው፡፡

የአምላክ ሰው ኾኖ መወለድ ለሰው ልጅ ያስገኘለት ክብር እስከዚኽ ድረስ መኾኑን መገንዘብና ማወቅ ለሰው ልጅ በጣም አስፈላጊ ነው፤ ክርስቶስ የተዋሐደው ሥጋችን ዛሬ በመለኰት ዙፋን ተቀምጦ ዓለምን ማለትም ሰማያውያኑንና ምድራውያኑን በአጠቃላይ እየገዛ ይገኛል፤ (ዕብ. ፪÷ ፭-፰)፡፡

ይህ ታላቅና ግሩም ምስጢር የተከናወነው በሰው ብልሃትና ጥበብ ሳይኾን በእግዚአብሔር ፍቅር ብቻ የተፈጸመ አስደናቂ ጸጋ ነው፡፡ በዚኽ ፍጹም የተዋሕዶ ፍቅር ሰማያውያኑና ምድራውያኑ እውነተኛውን ሰላም ማለትም በጌታችን ልደት የአምላክና የሰው ውሕደት እውን ኾኖ ስላዩ ‹‹ሰላም በምድር ኾነ›› አሉ፡፡ ሰማያውያኑ ፍጡራን ዛሬም ያለማቋረጥ ሰው ለኾነ አምላክ ይህን የሰላም መዝሙር ይዘምራሉ፤ እኛ ምድራውያኑም የዘወትር መዝሙራችን ‹‹ሰላም በምድር ይኹን›› የሚለው ሊኾን ይገባል፡፡

ምክንያቱም በሰላም ውስጥ ሃይማኖትን መስበክና ማስፋፋት አለ፤ በሰላም ውስጥ ልማት፣ ዕድገትና ብልጽግና አለ፤ በሰላም ውስጥ መቻቻል፣ መከባበርና መተማመን አለ፤ በሰላም ውስጥ መደማመጥና መግባባት አለ፡፡ ስለኾነም በልደተ ክርስቶስ ከተዘመረው መዝሙር የሰማነው ዓቢይ መልእክት ‹‹ሰላም በምድር ይኹን›› የሚለው ነውና ከኹሉ በላይ ለእርስ በርስ መፋቀርና ለሰላም መጠበቅ ቅድሚያ መስጠት የዘወትር ግዳጃችን ሊኾን ይገባል፡፡

የተወደዳችሁ የመንፈስ ቅዱስ ልጆቻችን ምእመናንና ምእመናት፤

ጌታችን ኢየሱስ ክርስቶስ ልደቱን ያደረገው በትሑታኑ መኖርያ ማለትም በእንስሳቱ በረትና በእረኞቹ ሠፈር እንደነበር ልናስታውስ ይገባል፡፡ (ማቴ. ፲÷፳፱-፴፩) ስለኾነም እርሱ ደቀ መዛሙርት የኾን እኛም ከልደቱ መልእክት ትምህርትን ወስደን በዚኽ ቀን በጤና፣ በዕውቀት፣ በሀብትና በልዩ ልዩ ምክንያት አካላዊ፣ ሥነ ልቡናዊ መንፈሳዊ ድኽነት ከተጫናቸው ወገኖች ጋራ አብረን በመዋል፣ አብረን በመመገብና እነርሱን ዘመድ በማድረግ በዓሉን ልናከብር ይገባል፤ (ማቴ. ፳፭÷፵)፡፡

በመጨረሻም፤

ልደተ ክርስቶስ መለያየትንና ጥላቻን ያስወገደ፤ በምትኩ እግዚአብሔርንና ሰውን በማዋሐድ ለሰው ልጅ አዲስ የድኅነት ምዕራፍን የከፈተ እንደኾነ ኹሉ፣ እኛ ኢትዮጵያውያንና ኢትዮጵያውያትም ድህነትን በአጠቃላይ ለመቀነስ የጀመርነው አዲስ የልማትና የዕድገት መርሐ ግብር ከግብ ለማድረስ አኹንም ሌት ተቀን ጠንክረን በመሥራት ሀገራችንን በልማት እንድናሳድግ አባታዊ መልእክታችንን እናስተላልፋለን፡፡

እግዚአብሔር ኢትዮጵያንና ሕዝባችንን ይባርክ፤ይቀድስ፡፡ አሜን፡፡

አባ ማትያስ ቀዳማዊ
ፓትርያርክ ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአኵስም ወእጨጌ ዘመንበረ ተክለ ሃይማኖት
ታኅሣሥ ፳፱ ቀን ፳፻፯ ዓ.ም.
አዲስ አበባ፣ ኢትዮጵያ

5 thoughts on “ብፁዕ ወቅዱስ ፓትርያርኩ የ፳፻፯ ዓ.ም. በዓለ ልደትን አስመልክቶ ያስተላለፉት መልእክት

  1. Fish Debebe January 7, 2015 at 8:21 am Reply

    ‹‹አባ›› ማትያስ የኢትዮጵያ ኦርቶዶክስ ተዋህዶን ቤተክርስቲያንን ወክለው እንኳን ደስ አላችሁ ማለቱ፤ ፍጹም ስድብ ነው፡፡ ምክንያቱም የቤተክርስቲያኒቷን ዶግማ፣ ቀኖና፣ ሥርዓት … አይቀበሉምና፡፡ የቤተክርስቲያኒቷን የበላይ አካል ቅዱስ ሲኖዶስን እኋላ ቀር፣ ጊዜ ያለፈበት፣ ጸረ-ዲሞክራሲ … ብላው በፊርማቸው ያወጁ፣ የቤተክርስቲያኒቷን ልዋላዊነት ጥያቄ ውስጥ የከተቱ፣ ከዕምነት ይልቅ ለፓለቲካ፣ ከክርስቶስ ይልቅ ለጎሳ፣ ከቤተክርስቲያን ጥቅም ክብር ይልቅ የግል ፍላጎትን የሚያስተጋባ የዘመኑ የቤተክርስቲያን የውስጥ ‹‹ጠላት›› ‹‹ይሁዳ›› … በሚል ሊገለጽ፣ ሊትወገዝ የሚገባው ነውና፡፡
    ስለዚህ ለጊዜው ፓለቲካ … ስልጣን ላይ አውጥቶህ መግለጫ ስጥ… ለዘላለሙ ደግሞ የበላዩ አምላክ የስራህን ፍርድ መግለጫ ይሰጥሃል፡፡ ስለዚህ ሐራዎች ‹‹አባ›› ማትያስ የኢትዮጵያ ኦርቶዶክስ ተዋህዶን ቤተክርስቲያንን ይወክላል ብላችሁ መግለጫውን ማውጣታችሁ ፍጹም ስህተት መሆኑን እንድትረዱ፣ ከስህተታችሁም ልትታረሙ ይገባል፡፡ ይህንን የማታደርጉ ከሆነ ግን የቅዱስ ሲኖዶስን ልዕልና ከማስጠበቅ ይልቅ፣ የቤተክርስቲያኒቷን ህልውናም እየተገዳደራችሁ መሆናችሁን እንድታውቁት ይገባል፡

  2. Gebrehiwet January 9, 2015 at 3:11 pm Reply

    @Fish Debebe E/r yetelah erkus sew neh

  3. Anonymous January 14, 2017 at 4:34 am Reply

    Liar

  4. Anonymous January 14, 2017 at 4:35 am Reply

    Weyane

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: