ቅድስት ቤተ ክርስቲያን የቅዱሳን አሠያየም ቀኖና ከአፈጻጸም መመሪያው ጋራ ልትደነግግ ነው

  • የመንበረ ፕትርክናው ነጻነት በተገኘበትና ብሔራዊ ቅዱስ ሲኖዶስ በተቋቋመበት ባለፈው ግማሽ ምእት በተነሡ ቅዱሳን ጥናትና አሠያየም ላይ ትኩረት ይሰጣል፡፡
  • ቀኖናው ተደጋጋሚ ራእይና ተኣምራት በማሳየት የተመሠረተውን የቤተ ክርስቲያናችንን የቅዱሳን አሠያየም ትውፊት ሲኖዶሳዊ በማድረግ የሚያጠናክር ነው ተብሏል፡፡
  • የኮፕት ኦርቶዶክስ ቤተ ክርስቲያን ብፁዕ ወቅዱስ ፖፕ አቡነ ቄርሎስ ስድስተኛንና ሊቀ ዲያቆን ሐቢብ ጊዮርጊስን በቅድስና ለመሠየም በምታደርገው ዝግጅት ቅድስናቸውን ዐውቃላቸዋለች፡፡
  • ኹለተኛው ፓትርያርክ ብፁዕ ወቅዱስ አቡነ ቴዎፍሎስ ሐምሌ ፬ ቀን ፲፱፻፹፬ ዓ.ም. ‹‹ቴዎፍሎስ ቅዱስ ሰማዕት››፤ ብፁዕ አቡነ ጴጥሮስ ሊቀ ጳጳስ በ፲፱፻፺፯ ዓ.ም. ‹‹ሰማዕተ ጽድቅ ዘኢትዮጵያ›› ተብለው እንዲጠሩ ከቅዱስ ሲኖዶስ ዐዋጅ ወጥቷል፡፡
  • ወላዲተ አእላፍ ቅዱሳን – ቅድስት ኢትዮጵያ፡- በሰማይ በዐጸደ ነፍስ ተጋድሏቸውን ፈጽመው የጽድቅና የድል አክሊል ተቀዳጅተው የሚኖሩ ማኅበረ ቅዱሳን ብቻ ሳይኾን በምድር በሕይወተ ሥጋ ከከሐድያን፣ ከመናፍቃን፣ ከፍትወታት እኩያትና ከኃጣውእ የሚጋደሉ የቃል ኪዳን ቅዱሳን አገርም ናት!

(አዲስ ጉዳይ፤ ቅጽ ፰ ቁጥር ፪፻፳፩፤ ሰኔ ፳፻፮ ዓ.ም.)

patriarchate officeየኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የቅድስና አሠያየምን የተመለከተ ቀኖና (ደንብ) እንደሚያወጣ ተገለጸ፡፡ በርክበ ካህናት ቅዱስ ሲኖዶስ ምልዓተ ጉባኤ መደበኛ ስብሰባ ላይ ለውይይት የቀረበው የ፲፱፻፺፩ ዓ.ም. ሕገ ቤተ ክርስቲያን ማሻሻያ ረቂቅ እንዳመለከተው፣ በመንፈስ ቅዱስ የሚመራው ቅዱስ ሲኖዶሱ ስለ ቅድስና አሠያየም ጉዳይ ዝርዝር ደንብና መመሪያ ያወጣል፤ በቤተ ክርስቲያኒቱ ስለሚሠየሙ ቅዱሳን ውሳኔ የመስጠት ተግባርና ሓላፊነትም የመንበረ ሐዋርያት ወራሽ በኾነው በቅዱስ ሲኖዶሱ ሥልጣን እንደሚፈጸም በማሻሻያ ረቂቁ ላይ ተመልክቷል፡፡

አዲስ ጉዳይ ያነጋገራቸው አንድ የቅዱስ ሲኖዶሱ አባል፣ የቅድስና አሠያየም ቀኖናው(ደንብ) እና የአፈጻጸም መምሪያውን የማዘጋጀት አስፈላጊነት አስመልክተው ሲያስረዱ፡- ‹‹እስከ አኹን ተወስነን ያለነው ቤተ ክርስቲያናችን በግብጽ ኮፕት ኦርቶዶክስ ቤተ ክርስቲያን ቅዱስ ሲኖዶስ ሥር በነበረችባቸው ዓመታት ከውጭ ወደ ኢትዮጵያ መጥተው በተቀበልናቸውና ከኻያው መቶ ክፍለ ዘመን በፊት በነባር ትውፊታችን ባወቅናቸው ብሔራውያን ቅዱሳን ነው፤ በመንበረ ፕትርክና መንፈሳዊ ነጻነት ከተቀዳጀንና ብሔራዊ ሲኖዶስ ከተቋቋመ ከኃምሳ ዓመት በላይ ስለተቆጠረ ከዚያ ወዲኽ የተነሡ ቅዱሳን ታውቀውና ተጠንተው ልናውቃቸው/ዕውቅና ሊሰጣቸው ይገባል፤›› ብለዋል፡፡

የቅድስና አሠያየም ቀኖናውና የአፈጻጸም መምሪያው ከመሠረቱ ሲታሰብ፣ ከቤተ ክርስቲያናችን ጋራ የትምህርተ ሃይማኖት አንድነት ያላቸው አኃት አብያተ ክርስቲያናትና የሌሎች ጥንታውያን አብያተ ክርስቲያናት ቀኖናትና ተሞክሮ በዝርዝር መታየቱንና ለተግባራዊ ዝግጅቱም ከፍተኛ እገዛ እንደሚኖረው የቅዱስ ሲኖዶሱ አባል ጠቅሰዋል፡፡ በቅዱሱ/በቅድስቲቱ ሥያሜ ላይ የመጨረሻ ውሳኔ የመስጠቱ ሥልጣን የቅዱስ ሲኖዶሱ ቢኾንም፣ የአሠያየሙ መነሻ ከምእመናኑ በሚቀርብበትና ‹‹ይሾም ይገባዋል፤ የለም ይቆይ›› በሚለው ጉዳይ የምእመናነ ክርስቶስ ተሳትፎ ስለሚኖርበት አግባብ ደንቡ የሚያካትታቸው ድንጋጌዎች እንደሚኖሩም የቅ/ሲኖዶስ አባሉ ለአዲስ ጉዳይ ተናግረዋል፡፡

Ethiopian Monk reading Manuscripts

ስንክሳር ከገድል ይለያል፡፡ ዲያቆን ያረጋል አበጋዝ ‹‹ፍኖተ ቅዱሳን›› በሚል ርእስ ፲፱፻፺፫ ዓ.ም. ባሳተሙት መጽሐፍ የስንክሳርንና የገድልን ልዩነት ያስረዳሉ፡፡ ገድል÷ ትግል፣ ፈተና፣ ውጊያ፣ ሰልፍ፣ ድልና አክሊል እስኪገኝ ድረስ የሚደክሙት ድካም፣ የሚሠሩት ሥራ፣ የሚቀበሉት መከራ ነው፡፡ ስለኾነም ገድል(በላቲኑ አክታ በግሪኩ ሃግዮስ)፡- የአንዱን ጻድቅ ወይም ሰማዕት ታሪክና የተቀበለውን ጸዋትወ መከራ ዝርዝር፣ ከጌታ የተቀበለውን ጸጋና ቃል ኪዳን፣ በምድር ወይም በዐጸደ ነፍስ የፈጸማቸውን ተኣምራት፣ ስለክብሩ የተደረሰለትን መልክእ የሚይዝ ነው፡፡ ስንክሳር (Synaxarium) ደግሞ መሠረተ ቃሉ ስብስብ(እስትግቡዕ) ማለት ነው፡፡ ስብስብ የተባለበትም በእያንዳንዱ ቀን የሚዘከረውን ቅዱስ ታሪክ ጠቅለል ባለ መልኩ የያዘ ስለኾነ ነው፡፡ የብዙ ቅዱሳንን ገድልና ዜና ሕይወት በአንድ ላይ የያዘ መጽሐፍ ነው፡፡ ከታሪኩም መጨረሻ ታሪኩን ጠቅለል አድርጎ የሚያስረዳ በግጥም መልክ የተዘጋጀ ድርሰት አለ፡፡ ይኸውም አርኬ ይባላል፡፡ ስንክሳር ቅዱሳኑን የሚያነሣው ያ ዕለት የተወለዱበት፣ ያረፉበት፣ ቃል ኪዳን የተቀበሉበት ወይም በዚያ ዕለት እንዲዘከሩ የሚያደርጋቸው ሥራ የሠሩበት ዕለት ከኾነ ነው፡፡ ስለኾነም በአንድ ቀን ብዙ ቅዱሳን ይዘከራሉ፤ እንዲኹም ስንክሳር አንዱን ቅዱስ በተለያዩ ቀናት ሊያዘክረው ይችላል፡፡ ዲያቆን ኤፍሬም እሸቴ ‹‹የገድላት አዝማናዊ አከፋፈል›› በሚል ርእስ በ፲፱፻፺፪ ዓ.ም. ባቀረቡት ጥናት÷ የቤተ ክርስቲያናችን ገድላት ክርስትና ብሔራዊ ሃይማኖት ኾኖ ከታወጀበት ከአራተኛው መ/ክ/ዘ ጀምሮ የመጨረሻዎቹ ገድሎች ተጽፈውባቸዋል እስከሚባልበት እስከ ፲፰ኛው መ/ክ/ዘ ድረስ የተጻፉትን ያጠቃልላሉ፤ በይዘቶቻቸውም ገድላቱ በሚያተኩሩባቸው የታሪክ ክሥተቶች፣ የታሪክ ለውጦችና የአጻጻፍ ዘዴዎቻቸው በአራት አዝማናት ተከፍለው ሊጠኑ ይችላሉ – የዘመነ አኵስም፣ የዘመነ ዛጔዌ፣ የዘመነ ዘርዓ ያዕቆብ(ወርቃማው የግእዝ ሥነ ጽሑፍ ዘመን) እና ሀገራችን በጦርነት የታመሰችበት ፲፮ኛው መ/ክ/ዘ፡፡ አጥኚው በርካታ አብነቶችን በመጥቀስ እንዳመለከቱት፣ በኢትዮጵያ የቅዱሳን አሠያየም በመጨረሻ የተነሡና ገድላት የተጻፉላቸው ኢትዮጵያውያን ቅዱሳን የኤርትራው ዘርዓ ቡሩክና ጻድቁ ዮሐንስ ሲኾኑ ከእነርሱ በኋላ የተነሣ ገድል የተጻፈለት ቅዱስ አልተገኘም፡፡ ምናልባት ገድለ ቅዱሳንን መጻፉ ሞቶ የተቀበረው በዚህ ዘመን ሳይኾን አይቀርም፡፡ ‹‹ገድል›› እያንዳንዱ ቅዱስ ከፍትወታት እኩያትና ከአጋንንት ጋራ ያደረገውን ተጋድሎና ያሸነፈበትን ኹኔታ የሚያሳይ ነው ብለናል፡፡ ጠላት ሰይጣን እያንዳንዱን ሰው የሚፈትነው ሊያሸንፈው በሚችልበት መልኩ ስለኾነ የእያንዳንዱን ቅዱስ ገድል ማንበብ የሰይጣንን ልዩ ልዩ አመጣጥ ያስተምራል፡፡ ታሪክ መጻፉ ካለፈው ለመማር ነውና ከቅዱሳን ሕይወት ጠቃሚ ትምህርት፣ ታላቅም በረከት ይገኛል፡፡ የቅዱሳንን ዜናቸውንና ሥራቸውን በየዕለቱ መስማት እነርሱን ወደ መምሰል የሚያነሣሣ፣ ረድኤታቸውን የሚያስገኝ በበረከታቸውም የሚያስጎበኝ ነውና ቤተ ክርስቲያን ሳይሳለሙ፣ ዜና ቅዱሳን ሳይሰሙ መዋል እንደማይገባ አበው ተናግረዋል፡፡

ራሱን ችሎ በሚወጣው የአሠያየም ቀኖናና ዝርዝር የአፈጻጸም መመሪያው መሠረት ተለይተውና ተጠንተው የቅዱስ ሲኖዶሱን ዕውቅና ያገኙ ቅዱሳን÷ ዜና ሕይወታቸው፣ ብሂላቸው፣ ምክራቸውና ትሩፋታቸው እንዲጻፍ ይደረጋል፤ ይህም ለቅዱሳኑ መታሰቢያነት ብቻ ሳይኾን በቤተ ክርስቲያናችን የነገረ ቅዱሳን አስተምህሮ መሠረት፣ ትውልዱ ፈለጋቸውን እንዲከተል እንዲመስላቸውም መንገዳቸውን የሚያውቅበትና የሚማርበት፣ በረከትም የሚያገኝበት ኾኖ እንደሚያገለግል ብፁዕ ሊቀ ጳጳሱ ገልጸዋል፤ የቅዱሳኑ ታሪክ የሚመዘገበው የብዙ ቅዱሳንን ዜና ሕይወት በአንድነት እንደያዘው የስንክሳር ዓይነት አጻጻፍ እንደሚኾንና ይኸውም ከገድላት አጻጻፍ እንደሚለይ ብፁዕነታቸው አስረድተዋል፡፡

የነገረ ቤተ ክርስቲያን ተመራማሪና ጸሐፊ ዲያቆን ዳንኤል ክብረት፣ የቤተ ክርስቲያኒቱ መዓዛ ስለኾኑት ቅዱሳን አሠያየም ቀኖና ማውጣትና በመሳሰሉት ጉዳዮች ላይ ቅዱስ ሲኖዶሱ መነጋገሩ አጀንዳዎቹን ታላቅ ያደርጋቸዋል ይላሉ፡፡

የቅዱሳን አሠያየም፡- በሲኖዶሳዊ (formal/official canonization) እና በሕዝብ ዕውቅናና አጽድቆት(popular acclaim) እንደሚፈጸም የሚያስረዱት ጸሐፊው፣ በኢትዮጵያ ቤተ ክርስቲያን ትውፊት እስከ ሕይወታቸው ፍጻሜ በገድል ተቀጥቅጠው ላረፉና ከዕረፍታቸውም በኋላ ምትሐት ያይደለ እውነተኛና ተደጋጋሚ ተኣምራትን በማድረግ ለሚታወቁ ቅዱሳን ዕውቅናና አጽድቆት ሲሰጥ የቆየው ሕዝበ ክርስቲያኑ እንደነበር አውስተዋል፤ የቀኖና ዝግጅቱ ምእመኑ ትውፊቱን እንዲያስታውስና ለዘመናት የተወበትን ምክንያት እንዲመረመር የሚያደርግ በመኾኑ የሌሎች አብያተ ክርስቲያናትን አሠራር ብቻ ሳይኾን የምእመኑ የቀድሞ ትውፊትም በአግባቡ ተጠንቶ መያዝ እንዳለበት ይመክራሉ፡፡

‹‹አራቱ ኃያላን›› በሚለውና የመካከለኛው መቶ ክፍለ ዘመን ቅዱሳንን ታሪክ በጥልቀት ባስነበቡት መጽሐፋቸው፣ በቤተ ክርስቲያኒቱ ኹለት ዓይነት ዕውቅና እንዳለ የሚያብራሩት ተመራማሪው፣ አንድ ሰው ለቤተ ክርስቲያን ላበረከተው በጎ ነገር የሚሰጠው የአስተዋፅኦ ዕውቅና እና ለቅድስና ኑሮ የሚሰጠው ዕውቅና እንዳለ ጠቅሰዋል፡፡ የአስተዋፅኦ ዕውቅና በታላላቅ አድባራት ላይ በነገሥታት በሚሾሙት የሚሰጥ ሲኾን በመጻሕፍት ኅዳጎችና በሥዕሎች ግርጌ አስተዋፅኦዋቸውን በማሣልና በመጻፍ የሚገለጽ ነው፡፡ ዋነኛው የማዕርገ ቅድስና ዕውቅና ግን የቅዱሱ ዕረፍት/ኅልፈት ቢያንስ ኃምሳ ዓመት ከሞላው በኋላ በሚገለጥ ራእይ፣ በሚደረጉ ተኣምራትና መንክራት የሚሰጥ ሲኾን የሚወሰነውም የመላእክትን አኗኗር በሚመስሉ፣ ከዊነ ምንኵስናን ሥርዓተ ገዳምን ባጸኑ ገዳማውያን አባቶች ነው፡፡

The Four Saints of Zagwe Dynast

ቅዱስ ይምርሐነ ክርስቶስ፣ ቅዱስ ሐርቤ(ገብረ ማርያም)፣ ቅዱስ ላሊበላ፣ ቅዱስ ነአኵቶ ለአብ – እነዚህ ቅዱሳን የነበሩበት ዘመን ከ፲፩ኛው – ፲፪ኛው መ/ክ/ዘ ሲኾን ምስፍናን ከክህነት፣ ክህነትን ከምስፍና ጋራ አስተባብረው በመያዝ ለክርስትና መስፋፋት፣ ለቤተ ክርስቲያን ዕድገት፣ ለአገር አንድነት የከፈሉት መሥዋዕትነት፣ ያቆዩት መንፈሳዊ ቅርስ፣ በዐይን የሚታይ፣ በእጅ የሚዳሰስ ከመኾኑም በላይ ለሀገር ኢኮኖሚ የደም ሥርና የጀርባ አጥንት ኾነው የሚታዩት ውቅር አብያተ ክርስቲያናት ሕያው ምስክሮች ናቸው፡፡ በመኾኑም እናት ቤተ ክርስቲያን ለአራቱ መንፈሳውያን ነገሥታት፡- የቅድስና ማዕርግ ሰጥታ፣ ገድላቸውን ጽፋ ለትውልደ ትውልድ አቀቆይታለች፡፡ (የኢትዮጵያ ኦርቶዶክስ ተዋሕዶ ቤተ ክርስቲያን ታሪክ ከልደተ ክርስቶስ እስከ ፳፻ ዓ.ም.)

የቤተ ክርስቲያኒቱ የቅድስና ቀኖና በሥርዓተ ምንኩስና ወይም በሥርዓተ ጋብቻ መጽናትን እንደ ዋነኛ መስፈርት ይቆጥራል የሚሉት ዲ/ን ዳንኤል፣ ለቤተ ክርስቲያን ብዙ ከደከሙት ነገሥታት እንደ ዐፄ ዳዊትና እንደ ዐፄ ዘርዐ ያዕቆብ ያሉት በአንድ ሚስት ባለመጽናታቸው የተሰጣቸው ዕውቅና ከመታሰቢያ ያላለፈ የአስተዋፅኦ( የክብር) ዕውቅና ነው፡፡ ሰሎሞናውያን ተብለው ከሚጠሩት ነገሥታት ዐፄ ቴዎድሮስ አንደኛ በአንድ ሚስት በመጽናታቸው፣ ዐፄ ገላውዴዎስ ቤተ ክርስቲያንን ለመጠበቅ ሲዋጉ በሰማዕትነት በማረፋቸው የቅድስና ዕውቅና ሰጥታቸዋለች፤ በ፫፻፴፫ ዓመታት ውስጥ ከተነሡት የዛጔዌ ነገሥታት ውስጥም በአንዲት ሚስት በመጽናት ክህነትን ከንግሥና ያስተባበሩትን ካህናት ወነገሥታት ሐርቤ፣ ይምርሐነ ክርስቶስ፣ ነአኵቶ ለአብና ላሊበላን በቅድስና መሠየሟን አስረድተዋል፡፡

St-Takla-org_Coptic-Pope-Kyrillos-Cyril-VI-031

ባሕታዊ፣ ጸሎተኛና ገባሬ ተኣምር ብፁዕ ወቅዱስ ፓትርያርክ አቡነ ቄርሎስ ፮ኛ (እ.አ.አ ከ፲፱፻፶፱ – ፲፱፻፸፩)

 

ገዳማዊና ብሕትውናዊ ሕይወትን ለዓለም እንዳበረከተች የምትታመነው የግብፅ ኦርቶዶክስ ቤተ ክርስቲያን በቅዱሳን አሠያየም ቀኖናዋ÷ የጥናትና ምርመራ (Investigation)፣ የዕውቅና(Recognition) እና የቀኖና (Canonization) ደረጃዎች እንዳሏት ዲ/ን ዳንኤል ይዘረዝራሉ፡፡ እንደ ዲያቆን ዳንኤል ገለጻ፣ የቤተ ክርስቲያኒቱ የሥያሜ ቅዱሳን ሒደት አኹንም ያላቋረጠ ሲኾን÷ እ.አ.አ ከ፲፱፻፶፱ – ፲፱፻፸፩ የመንበረ ማርቆስ ፻፲፮ኛ ፖፕ የነበሩት ባሕታዊ፣ ጸሎተኛና ገባሬ ተኣምር ብፁዕ ወቅዱስ ፓትርያርክ አቡነ ቄርሎስን ፮ኛ እና በ፲፱ኛው መ/ክ/ዘ መጨረሻና በ፳ኛው መ/ክ/ዘ መጀመሪያ ካህናትና ምእመናን በትምህርተ ሃይማኖታቸውና በመንፈሳዊ ሕይወታቸው ተጠናክረው ቤተ ክርስቲያኒቱን ከጥፋት እንዲታደጉ ያደረገውን ሊቀ ዲያቆን ሐቢብ ጊዮርጊስን(፲፰፻፸፮ – ፲፱፻፶፩) ባለፈው ዓመት ሰኔ ወር ለተጋድሏቸው የዕውቅና (Recognition) የቅድስና ደረጃ በቅ/ሲኖዶሱ እንደተሰጣቸው አውስተዋል፡፡

 

 

 

www-St-Takla-org--St-Takla-Haymanot-The-Ethopian-03-05

በግብጽ አሌክሳንደርያ ኤል – ኢብራሂም በተባለ ሥፍራ የሚገኘው የጻድቁ አቡነ ተክለ ሃይማኖት ቤተ ክርስቲያን

ኢትዮጵያ ባፈራቻቸው ቅዱሳንና በመሠረተቻቸው ገዳማት ብዛት ከግብፃውያን የማያንስ ታሪክ እንዳላት የሚያምኑት ዲ/ን ዳንኤል÷ በግብፅ ቤተ ክርስቲያን ዘንድ በተጋድሏቸው የሚከበሩ እንደ ሙሴ ፀሊም፣ በሲኖዶሳቸውም ሳይቀር ቅድስናቸው የታወቀላቸው፣ ሕንፃ ቤተ ክርስቲያን የታነፀላቸው እንደ ጻድቁ አቡነ ተክለ ሃይማኖት* የመሳሰሉ ቅዱሳን መኖራቸውን ጠቅሰዋል፡፡

የግብፅ ሲኖዶስ ለጻድቁ አቡነ ተክለ ሃይማኖት ቅድስና ዕውቅና የሰጠው ከዕረፍታቸው ኹለት መቶ ዓመታት በኋላ መኾኑን የሚጠቅሱት ተመራማሪው፣ መሠረቱ ግን ጻድቁን በተጋድሏቸው የሚያውቃቸው ሕዝብና በእግራቸው ተተክተው ሥርዐተ ምንኵስናን፣ ገዳማዊ ሕይወትንና ስብከተ ወንጌልን ያስፋፉት አርድእቶቻቸው እንደነበሩና ይህም በየወሩ በ፳፬ ለሚታሰበው በዓለ ዕረፍታቸውና በየዓመቱ ግንቦት ፲፪ ለሚከበረው ፍልሰተ ዓፅማቸው መነሻ እንደኾነም ገልጸዋል፡፡

የአሠያየም ድንጋጌው የሕዝበ ክርስቲያኑን መነሻና ሒደታዊ ተሳትፎ ታሳቢ ማድረጉ የሚገባ ነው የሚሉት የነገረ ቤተ ክርስቲያን ጸሐፊና ተመራማሪው÷ ‹‹ቅዱሱን በቅድሚያ ማክበር የሚጀምረው ሕይወቱን በተጋድሎ ባሳለፈበት፣ በስሙ ጠበል በፈለቀበት፣ ተደጋጋሚ ተኣምራት በሚፈጸሙበት፣ አንድ ዓይነት ራእይ ለተለያዩ ሰዎች በሚታይበት ሥፍራ የሚኖረው የአካባቢው ሰው ነው፤ ሕዝቡም የቅዱሱን ገድል ይጽፋል፤ ዝናውን የሰሙ ምእመናን ወደ አካባቢው ይጓዛሉ፤ ዜና ሕይወቱና ገድሉ የሰፈረበትን መዝገብ እየገለበጡ ወደየአካባቢያቸው በመውሰድ ስሙን እያዘከሩበትና እየጸለዩበት በቃል ኪዳኑ ይማፀናሉ፤ የቅዱሱ ስምና ሥራም በዚኽ መልኩ እየተወረሰና እየተስፋፋ ይቀጥላል፤›› በማለት ልምዱ ለሚዘጋጀው ቀኖናና ዝርዝር የአፈጻጸም መምሪያ መነሻ መደረግ እንዳለበት ሐሳባቸውን ያካፍላሉ፡፡
***************************************************************************
ቤተ ክርስቲያን በቅድስና የምታውቃቸውና የምታሳውቃቸው

ቤተ ክርስቲያን ለዕሥራ ምእት(ሚሌኒየም) በዓል አከባበር ባሳተመችው ‹‹የኢትዮጵያ ኦርቶዶክስ ተዋሕዶ ቤተ ክርስቲያን ታሪክ ከልደተ ክርስቶስ እስከ ፳፻ ዓ.ም.›› መጽሐፍ ‹‹የኢትዮጵያ ቤተ ክርስቲያን ቅዱሳን›› የምንላቸው÷ (1)ብሔራውያን ቅዱሳንን፣ (2)ከውጭ ወደ ኢትዮጵያ መጥተው በፈጸሙት ሐዋርያዊ አገልግሎታቸውን ፈጽመው ዘላለማዊ ዕረፍታቸውን በኢትዮጵያ ምድር በማድረጋቸው ቅድስና ሰጥታ፣ በየስማቸው ቤተ ክርስቲያን አንፃ፣ ጽላት ቀርፃ፣ ገዳም ገድማ ያከበረቻቸውንና ያስከበረቻቸውን ቅዱሳን ያጠቃልላል፡፡

Saint Aba Samuel ZeWaldiba

ጻድቅ አባ ሳሙኤል ዘገዳመ ዋሊ፣ መነኰስ ፍጹም፣ ምዑዝ ምንኵስናኹ፣ ንጹሕ ድንግልናኹ፣ አካለ አንበሳ ግሩመ ይሜጥን በእዴኹ፤

የኢትዮጵያ ኦርቶዶክስ ተዋሕዶ ቤተ ክርስቲያን መሠረታዊ አለኝታ የኾኑትን ከፍተኛ የትምህርት ተቋማትና ዐበይት መምህራንን፣ በቤተ ክርስቲያናችን ስም በየአረፍተ ዘመናቱ መላ ሕይወታቸውን የሰው ዘር የኾነውን ኹሉ በሥራና በጸሎት በማገልገል፣ እግዚአብሔርን በማመስገን ሕይወታቸውን መሥዋዕት አድርገው ያቀረቡትንና እጅግ በጣም ከፍተኛ ገድል የፈጸሙትን ኹሉ ቤተ ክርስቲያኛችን የጾታ ልዩነት ሳታደርግ በገድላቸው ጽናትና በትሩፋታቸው ብዛት ‹‹ብፁዕ እና ብፅዕት፣ ቅዱስና ቅድስት›› ሊያሰኝ ከሚችል የብፅዕናና የቅድስና ማዕርግ የደረሱ መኾናቸውን በማረጋገጥ፡- በስማቸው ቤተ ክርስቲያን እንዲታነፅ፣ ገዳም እንዲገደም፣ ደብር እንዲደበር፣ ገድልና ድርሳን እንዲጻፍላቸው፣ ወርኃዊና ዓመታዊ በዓላቸው እንዲታሰብና እንዲዘከር በማድረግ በቅድስና ታውቃቸዋለች፤ ታሳውቃቸዋለች፡፡

Kidist Kirstos Semera

እምነ ቅድስት ክርስቶስ ሠምራ

ማኅበረ ቅዱሳን ለከፍተኛ ትምህርት ተቋማት ግቢ ጉባኤያት ማስተማርያ ባሳተመውና መልአከ ሰላም ቀሲስ ደጀኔ ሺፈራው ባዘጋጁት ‹‹ነገረ ቅዱሳን – ፩›› መጽሐፍ የቅዱሳን ሰዎች አሠያየምን (Canonization of Saints) አስመልክተው፣ ‹‹በኦርቶዶክሳዊት ተዋሕዶ ቤተ ክርስቲያን የቅዱሳን አሠያየም በድምፅ ብልጫ አይደለም፤›› ይላሉ፡፡ ቅዱሳንን ቅዱስ የሚያሰኛቸው ሕይወታቸው ነው፡፡ በውስጥም በአፍኣም በቅድስና ወርቅ የተለበጡ በመኾናቸው እንደ ካህኑ ዘካርያስና እንደ ቅድስት ኤልሳቤጥ ‹‹በጌታ ትእዛዛትና ሕግጋት ኹሉ ያለነቀፋ እየሔዱ በእግዚአብሔር ፊት ጻድቃን ነበሩ፡፡›› ተብሎ ይመሰከርላቸዋል፡፡ (ሉቃ.፩÷፮) ከኹሉ በላይ የሚመሰክርላቸው ደግሞ እግዚአብሔር ነው፡፡ (ኤር.፩÷፬-፭፤ ማቴ.፲፩÷፲፩፤ ፪ኛነገ. ፬÷፱፤ መጽ.ሶስና ፩÷፵፬፤ ዘኊ.፲፪÷፩-፰)

በመኾኑም ኦርቶዶክሳዊት ተዋሕዶ ቤተ ክርስቲያን ቅዱሳንን የምትሠይምባቸውን መሠረቶች መልአከ ሰላም ቀሲስ ደጀኔ ሺፈራው እንደሚከተለው ይዘረዝራሉ፡-

  1. ‹‹እስከ ሞት ድረስ የታመንክ ኹን፤››(ራእይ ፪÷፲) እንደተባለ እስከ ሕይወታቸው ፍጻሜ ድረስ በጾም በጸሎት ተወስነው፣ በገድል ተቀጥቅጠው በአምልኮተ እግዚአብሔር የጸኑትን፤
  2. በጌታችን በአምላካችንና በመድኃኒታችን በኢየሱስ ክርስቶስ ደም ላይ የተመሠረተችውን ቤተ ክርስቲያን እምነትና ሥርዓት ጠብቀው በማስጠበቅ በአገልግሎት የተጉትንና የተጋደሉትን፤
  3. የእግዚአብሔርን ቃል ንባብ ትርጓሜና ምሥጢር ሳያፋልሱ በማስተማር በሃይማኖት ያጸኑትን፣ ምእመናንንም ያበዙትን፤
  4. በሕይወታቸው ነውር በሃይማኖታቸው ነቀፌታ ያልተገኘባቸውን፤
  5. ከዓለም ተለይተው፣ በርሓ ወድቀው፣ ደንጊያ ተንተርሰው፣ ጤዛ ልሰው፣ ዋሻ ዘግተው፣ ጸብኣ አጋንንትን ድምፀ አራዊትንና ግርማ ሌሊትን ሳይሠቀቁ የኖሩትን፣ ስለ ሃይማኖታቸው በመመስከር በሰማዕትነት ያረፉትን፤
  6. ምትሐት ያይደለ እውነተኛ ተኣምራት በማድረግ የሚታወቁትን፤
  7. በአጠቃላይ ከፍጹምነት ማዕርግ የደረሱትን ቅዱሳን እግዚአብሔር እንዳከበራቸው ታከብራቸዋለች፤ ቅዱሳን ብላ በቅድስና ስም ትጠራቸዋለች፡፡

ከእነርሱ አስቀድሞ የቅድስና ማዕርግ በተሰጣቸው ሰዎች መዝገብ ስማቸውን በክብር ትጽፋለች፤ ሕዝቡም እንዲያውቀው ታደርጋለች፡፡ ዐፅማቸው ያለበት ቦታ የሚታወቅ እንደኾነ ሰብስባ በክብር ታስቀምጣለች፡፡ ተኣምራቸውን ወይም ገድላቸውን ትጽፍላቸዋለች፡፡ ለጸሎት፣ ለልመናና ለምስጋና የሚኾን መልክእ ትደርስላቸዋለች፡፡ የሚታሰቡበት ዕለት ትሰጣቸዋለች፡፡ የመታሰቢያ ሥዕል ትሥልላቸዋለች፡፡ ጽላት ትቀርፅላቸዋለች፤ ሕንፃ ቤተ ክርስቲያን ታንፅላቸዋለች፡፡ ስማቸውንም እየጠራች ትማፀንባቸዋለች፡፡ ምእመናንም በስመ ክርስትና ኃይለ ጊዮርጊስ፣ ወለተ ጊዮርጊስ፣ ገብረ ተክለ ሃይማኖት፣ ወለተ ተክለ ሃይማኖት. . . እየተባሉ እንዲጠሩ ታደርጋለች፡፡

ቅዱሳን እንደ ግብራቸውና ሥምሪታቸው ይለያሉ

ቅዱሳን ሰዎች ለተለያየ ተግባር ነገር ግን ለአንድ ዓላማ በእግዚአብሔር የተጠሩ ሰዎች ናቸው፡፡ መጠራት ብቻ ሳይኾን ከተጠሩት መካከል ተለይተው የተመረጡ ናቸው፡፡ ‹‹የተጠሩ ብዙዎች የተመረጡ ጥቂቶች ናቸውና፡፡›› (ማቴ.፳፪÷፲፬) የተባለው ለዚኽ ነው፡፡ ስለኾነም ‹‹እኔ እግዚአብሔር አምላካችኹ ቅዱስ ነኝና እናንተም ቅዱሳን ኹኑ›› (ዘሌ.፲፬÷፪) ብሎ በቀጥታ የተናገረ ቅድስና የባሕርይው የኾነ እግዚአብሔር ከብዙዎች መካከል ለይቶ የመረጣቸውን ቅዱሳንን መልሶ ከብዙኃኑ መቀላቀል አይገባም፡፡

ቅዱሳን በግእዝ ርትእት አንድ ቢኾኑም በግብራቸውና ሥምሪታቸው የተለያዩ ናቸውና እግዚአብሔር የልጁን መልክ እንዲመስሉ ወስኖ የጠራቸው፣ የመረጣቸው፣ ያጸደቃቸውና ያከበራቸው ነቢያት፣ ሐዋርያት፣ ጻድቃን፣ ሰማዕታት፣ ነገሥታት፣ ካህናት፣ አበው፣ አርድእት፣ ጳጳሳት፣ ሊቃውንት፣ ደናግል፣ ምእመናን ቅዱሳን ናቸው፡፡

የቅዱሳን የፍጹምነትና የቅድስና ደረጃዎች

የእግዚአብሔር ወዳጆች የኾኑ ቅዱሳን በአንድ ጊዜ የፍጹምነትና የቅድስና ደረጃ ላይ አይደርሱም፤ ነገር ግን የተወለደ ሕፃን ቀስ በቀስ በመዳኽ ወደ መቆም፣ ከመቆም ወደ መራመድ ከዚያም መሮጥና መዝለል እንደሚጀምር ኹሉ ቅዱሳንም ከወጣኒነት ጀምረው በጸጋ እግዚአብሔር እየተጎበኙ ወደ ፍጹምነት ይደርሳሉ፡፡ ‹‹ለጥቂት ጊዜ መከራን ከተቀበላችኹ በኋላ ራሱ ፍጹማን ያደርጋችኋል፤ ያጸናችኋል፤ ያበረታችኁማል፡፡›› እንዲል፡፡ (፩ኛጴጥ.፩÷፭ – ፲፩)፡፡

በወጣኒነት ጀምረው ፈተናውን እያሸነፉ ሲሔዱ በማዕከላዊነት ደረጃ አድርገው በመጨረሻ ከፍጹም ብቃት ላይ ይደርሳሉ፡፡ እነዚኽ ሦስቱ መንፈሳውያን ደረጃዎች፡- ወጣኒነት፣ ማዕከላዊነት እና ፍጹምነት ሲኾኑ ንጽሐ ሥጋ፣ ንጽሐ ነፍስ እና ንጽሐ ልቡና በመባልም ይታወቃሉ፡፡ በዚኽም መሠረት ቅዱሳን ደረጃ በደረጃ የሚደርሱባቸው መዓርጋት በዝርዝራቸው ዐሥር ናቸው፡፡ እነዚኽም ሦስቱ በንጽሐ ሥጋ፣ አራቱ በንጽሐ ነፍስ፣ ሦስቱ በንጽሐ ልቡና ይገኛሉ፡፡

በንጽሐ ሥጋ የሚገኙት ሦስቱ ማዕርጋት፡-

  1. ጽማዌ
  2. ልባዌ
  3. ጣዕመ ዝማሬ ናቸው፡፡

በንጽሐ ነፍስ የሚገኙት አራቱ ማዕርጋት፡-

  1. አንብዕ
  2. ኵነኔ
  3. ፍቅር
  4. ሑሰት ናቸው፡፡

በንጽሐ ልቡና የሚገኙት ሦስቱ ማዕርጋት፡-

  1. ንጻሬ መላእክት
  2. ተሠጥሞ ብርሃን
  3. ከዊነ እሳት ናቸው፡፡

እኒኽ ማዕርጋት የሚገኙትና የሚደረስባቸው በቅደም ተከተላቸው ነው፡፡ ከላይ ያለውን ማዕርግ የሚይዝ ታችኛውን ማዕርግ እንደያዘ በዚያው ላይ እየተጨመረለት ይሔዳል፡፡ (ዲ/ን ያረጋል አበጋዝ፣ ፍኖተ ቅዱሳን፣ ገጽ 197 – 198)፡፡ የፍጹማን መነኰሳት ሕይወት ይህን ይመስላል፡፡ የአባቶቻችን ማዕርግ እስከዚኽ ነው፤ የሰውን ልቡና ይመረምራሉ፤ ያለፈውንም የሚመጣውንም በእግዚአብሔር ኃይልና ቸርነት ያውቃሉ፡፡

የቅድስና ቀጣይነትና የገድላት አስረጅነት

የቅዱሳን ገድላት ጌታ በወንጌል የተናገረው ቃልና ያዘዘው ትእዛዝ ሊፈጸም የሚችልና አማናዊ መኾኑን በተግባር የሚያሳዩና የሚያስረዱ ናቸው፡፡ ወንጌል ትእዛዝ ሲኾን የቅዱሳን ገድል ደግሞ ገቢራዊ ትርጓሜው ነው፡፡ እነዚኽን የሚጠራጠር ጌታችን መድኃኒታችን ኢየሱስ ክርስቶስ የተናገረውን ማሳበሉ ነውና ይህ የክርስቶስ ተቃዋሚ መንፈስ ነው፡፡ መፈጸሙን የሚያምን ደግሞ ይህን የሚያገኘው በቅዱሳን ታሪክና ገድል ነው፡፡ ቅዱሳን ራሳቸውን ክደዋልና የእግዚአብሔርን ትእዛዝ መፈጸም ተችሏቸዋል፡፡ የራሱን ፈቃድ የካደ የእግዚአብሔርን ትእዛዝ መፈጸም አይከብደውም፡፡››/፩ዮሐ.፭÷፫፤ ዘዳግ. ፴÷፲፩-፲፬/፡፡

‹‹ገድል›› እያንዳንዱ ቅዱስ ከፍትወታት እኩያትና ከአጋንንት ጋራ ያደረገውን ተጋድሎና ያሸነፈበትን ኹኔታ የሚያሳይ ነው፡፡ ጠላት ሰይጣን እያንዳንዱን ሰው የሚፈትነው ሊያሸንፈው በሚችልበት መልኩ ስለኾነ የእያንዳንዱን ቅዱስ ገድል ማንበብ የሰይጣንን ልዩ ልዩ አመጣጥ ያስተምራል፡፡ ታሪክ መጻፉ ካለፈው ለመማር ነውና ከቅዱሳን ሕይወት ጠቃሚ ትምህርት፣ ታላቅም በረከት ይገኛል፡፡

Aba Yohannes Kema  writing Gadla Tekla Haimanot00

ምንጭ፡- አራቱ ኃያላን

የቅዱሳን ገድል የሚጻፈው የዚኽ ዓለም ተጋድሏቸውን ፈጽመው ወደ ፈጣሪያቸው ለዕረፍት ከሔዱ በኋላ ነው፤ ምክንያቱም ሥራቸው የሚፈጸመውና የሚታተመው በሞት ነው፡፡ ‹‹ይወድሰከ አፈ ነኪር – ሌላ ሰው ያመስግንኽ›› እንዲል ካረፉ በኋላ እግዚአብሔር የፈቀደለትና የገለጸለት ሰው ይጽፈዋል፡፡

ከተጻፈም በኋላ ደገኛነቱን ለማወቅ ከውኃ ላይ ይጥሉታል፡፡ በውኃው ካልተበላሸና በደኅና ከወጣ በእሳት ላይ ይጥሉታል፡፡ በእሳት ካልተቃጠለ ደግሞ በድዉይ ላይ ይጥሉታል፡፡ ድዉይ ከፈወሰ ይቀበሉታል፤ በክብር ይይዙታል፡፡ ነብዩ ዳዊት ‹‹ቃለ እግዚአብሔር ቃል ንጹሕ ከመ ብሩር ጽሩይ ንጡፍ ወፍቱን እምድር ዘአጽረይዎ ምስብዒት – በምድር ላይ እንደተፈተነ ሰባት ጊዜ እንደተጣራ ብር የእግዚአብሔር ቃላት የነጹ ቃላት ናቸው›› እንዳለ ገድላትም ለምስክርነትና ለጉባኤ የሚበቁት በእንደዚኽ ያለ ኹኔታ ተፈትነው ካለፉ በኋላ ነው፡፡

የሰማዕትነት ቅድስና አሠያየም በኻያኛው ምእት

abunepetros-2

ብፁዕ አቡነ ጴጥሮስ ቀዳማዊ ሊቀ ጳጳስ ሰማዕተ ጽድቅ ዘኢትዮጵያ

 

 

ከጳጳሳቱም ታሪካቸው ለኢትዮጵያ ክርስቲያን መመኪያ የኾነው አቡነ ጴጥሮስ ቀዳማዊ ሐምሌ ፳፪ ቀን ፲፱፻፳፰ ዓ.ም. ‹‹ኢትዮጵያ የኢትዮጵያውያን ናት›› ብለው የኢጣልያን ፋሽስት ወራሪነትና አረመኔነት ፊት ለፊት ከገለጹ፣ መሬቷና ሕዝቧም እንዳይገዙለት ካወገዙ በኋላ በአራዳ ገበያ በፋሽስቱ መትረየስ ጥይት ተደብድበው ሰማዕት ኾነዋል፡፡

ፋሽስቶች የብፁዕነታቸውን አስከሬን የት እንዳደረሱት እስከ ዛሬ ባይታወቅም ‹ብፁዕ አቡነ ጴጥሮስ ሊቀ ጳጳስ ሰማዕተ ጽድቅ ዘኢትዮጵያ›› ተብለው እንዲጠሩ በ፲፱፻፺፯ ዓ.ም. ከቅዱስ ሲኖዶስ ዐዋጅ ወጥቷል፡፡

 

 

ለኢትዮጵያ ቤተ ክርስቲያን ራስን መቻል፣ መንፈሳዊና ዘመናዊ ትምህርት መስፋፋት፣ ከዓለም አብያተ ክርስቲያናት ጋራ ለመቀራረብ፣ ለክርስቲያናዊ ተግባርና ልማት፣ ለኦርቶዶክስ ተዋሕዶ ሃይማኖት ጽናት ይጥሩ የነበሩትን ብፁዕ ወቅዱስ አቡነ ቴዎፍሎስን ደርግ የካቲት ፱ ቀን ፲፱፻፷፯ ዓ.ም. ከመንበረ ፓትርያርክ በጨለማ አፍኖ ወስዶ በኢዮቤልዩ ቤተ መንግሥት በዙፋን አዳራሽ ሥር የሚገኝ የወይን ጠጅ ማቀዝቀዣ ክፍል አስገብቶ ለብቻቸው አሰራቸው፡፡

‹‹ሲጠበቅ የቆየው ፍርድ›› በሚል ርእስ መግለጫ አወጣባቸው፡፡ ሐምሌ ፯ ቀን ፲፱፻፸፩ ዓ.ም. በልዑል ራስ ዐሥራተ ካሳ ግቢ ውስጥ በሰዋራ ስፍራ የተደበቁ ሥልጡን ኮማንዶዎች በገመድ አንቀው ከገደሏቸው በኋላ በዘግናኝ ኹኔታ ከተገደሉ ሌሎች እስረኞች ጋራ በአጥሩ ካባ ሥር በእርድ መልክ በተቆፈረው ጉድጓድ ውስጥ ጥለው አፈር አለበሷቸው፡፡ የቅዱስነታቸውን መቃብርና አሠቃቂ አሟሟት ያውቁ የነበሩ በሰጡት ጥቆማ መሠረት ነበር ቦታው ከ፲፯ ዓመታት የታወቀው፡፡ መቃብሩ ጥልቀት ስለነበረው ቁፋሮው ከሚያዝያ ፳ – ፳፪ ቀን ፲፱፻፹፬ ዓ.ም. ቆይቷል፡፡ ዐፅማቸው ሚያዝያ ፳፫ ቀን ሣጥኑ በወርቀ ዘቦ የተጌጠ መጎናጸፊያ ተላብሶ፣ በብፁዓን ሊቃነ ጳጳሳት ትክሻ ተይዞ በመንበረ ፓትርያርክ ቅድስተ ቅዱሳን ማርያም ገዳም ለጊዜው እንዲያርፍ ተደርጓል፡፡

His Holiness Abune Theophilos, second patriarch of Ethiopia and Martyrሐምሌ ፫ ቀን ደግሞ ዐፅማቸው ወደ መንበረ ጸባዖት ቅድስት ሥላሴ ካቴድራል ተወስዶ ጸሎተ ፍትሐት ሲደረስበት አድሯል፡፡ በማግሥቱ ሐምሌ ፬ ቀን ከውጭ አገር ለበዓሉ በመጡ የአብያተ ክርስቲያን ልኡካን፣ የልዩ ልዩ እምነት ማኅበሮች መሪዎችና ካህናት በርካታ ምእመናን በተገኙበት በዐውደ ምሕረቱ ልዩ ሥነ ሥርዓተ ተደረገ፡፡

የቅዱስነታቸው ትሩፋትና ገድል በወቅቱ የኢትዮጵያ ኦርቶዶክስ ተዋሕዶ ቤተ ክርስቲያን ዐቃቤ መንበር ብፁዕ አቡነ ያዕቆብ ባደረጉት ንግግር ከተገለጸ በኋላ የሚከተለውን የቅድስና ሥያሜ ዐዋጅ አሰሙ፡- ‹‹ብፁዕ ወቅዱስ አቡነ ቴዎፍሎስ ከዛሬ ጀምሮ ‹ቴዎፍሎስ ቅዱስ ሰማዕት ተብለው እንዲጠሩ ቅዱስ ሲኖዶስ ወስኗል፡፡›› በሥነ ሥርዓቱ ላይ የተገኙት ኹሉ ‹‹ይደልዎ›› በማለት መንፈሳዊ ዐዋጁን እንደተቀበሉት በወቅቱ ተዘግቧል፡፡ የቅዱስነታቸው ዐፅም ዕለቱኑ ተወስዶ በክብር ያረፈው ራሳቸው ባሠሩት በጎፋ መካነ ሕያዋን ቅዱስ ገብርኤል ካቴድራል ነው፤ በቅፅሩም በቅዱስነታቸው ስም የተሰየመ ቤተ መዘክር ይገኛል፡፡

***************************************************************************

www-St-Takla-org--Abune-Paulos-in-Alex-15-July-2007-096

ብፁዕ ወቅዱስ አቡነ ጳውሎስ በግብጽ የሐምሌ ወር ፲፱፻፺፱ ዓ.ም. ሐዋርያዊ ጉብኝታቸው በአሌክሳንደርያ ኤል – ኢብራሂም ጻድቁ አቡነ ተክለ ሃይማኖት ቤተ ክርስቲያን እንደደረሱ

*በግብጽ እስክንድርያ ‹‹ኤል ኢብራሂም›› በተባለ ቦታ ነው፡፡ በስፍራው ሦስት ኦርቶዶክሳውያን ክርስቲያን ወንድማማቾች በአንድነት የሚኖሩበት በዐጸዶች የተዋበ ቪላና ከጎኑም ጋራዥ ያለበት አንድ ግቢ ነበር፡፡ ከወንድማማቾቹ መካከል በስሙ “Takla” የተባለውና የጻድቁ አቡነ ተክለ ሃይማኖት ወዳጅ የነበረው በድንገተኛ አደጋ በሞት ይለያል፤ በሕይወት ለቀሩትም ‹‹ከይዞታው ለእኔ የሚገባኝ ድርሻ ለቤተ ክርስቲያን ይሰጥልኝ›› የሚል የሟች ወንድማቸው መልእክት በሕልም ይመጣላቸዋል፤ ስለ ሕልሙ የተነገራቸው የአቅራቢያው የቅዱስ ጊዮርጊስ ካቴድራል ካህን ቄስ ቢሾይ ካሜል ጉዳዩን በወቅቱ የመንበረ ማርቆስ ፻፲፮ኛ ፖፕ ለኾኑት ብፁዕ ወቅዱስ ፓትርያርክ አቡነ ቄርሎስ ፮ኛ ያደርሳሉ፡፡

www-St-Takla-org--Abune-Paulos-in-Alex-15-July-2007-018

ብፁዕ ወቅዱስ አቡነ ጳውሎስና ብፁዓን ሊቃነ ጳጳሳት የጻድቁ አቡነ ተክለ ሃይማኖት ክፍለ ዐፅም በሚገኝበት የቤተ ክርስቲያኑ መቅደስ ጸሎት ሲያደርሱ

በብሕትውናቸው፣ በጸሎታቸውና በተኣምራታቸው የታወቁት ብፁዕ ወቅዱስ አቡነ ቄርሎስም 20×14 ሜትር ካሬ ስፋት ባለው የሟች ተክለ ይዞታ ላይ በኢትዮጵያዊው ጻድቅ አቡነ ተክለ ሃይማኖት ስም ቤተ ክርስቲያን እንዲታነፅ ይፈቅዳሉ፤ ቅዳሴ ቤቱም የጻድቁ ጠባቂ መልአክ ሊቀ መላእክት ቅዱስ ሚካኤል ክብረ በዓል በሚውልበት ሰኔ ፲፪ ቀን ፲፱፻፷፩ ዓ.ም. ብፁዕ ወቅዱስ አቡነ ቄርሎስ ፮ኛ በተገኙበት ተደርጓል፡፡ ቆይቶ አገልግሎቱ እየተጠናከረ መሔዱን የተመለከቱትና ግብፅን ጨምሮ በተለያዩ አህጉር በርካታ አብያተ ክርስቲያንን የማስፋፋት ጥረታቸው የሚጠቀስላቸው ቀሲስ ቢሾይ የዐጸዱን ስፍራ በመጠቀም ሕንፃ ቤተ ክርስቲያኑ ወደ 35×24 ሜ.ካ እንዲስፋፋ አድርገዋል፡፡

www-St-Takla-org--Abune-Paulos-in-Alex-15-July-2007-021

ብፁዕ ወቅዱስ አቡነ ጳውሎስ ቃለ ምዕዳንና ቡራኬ ሲሰጡ

በግብጽ እስክንድርያ የጻድቁ አቡነ ተክለ ሃይማኖት ቤተ ክርስቲያን በብፁዕ ወቅዱስ አቡነ ሺኖዳ ሣልሳዊ ዘመነ ፕትርክናም የተለያዩ የውስጥ ግንባታዎች ተካሒደውለታል፡፡ ቤተ ክርስቲያኑ በቅዱሱ ስም የሚጠራ የራሱ ይፋዊ ድረ ገጽ St-Takla.org አለው፡፡ ድረ ገጹ እንዳሰፈረው፣ የጻድቁ አቡነ ተክለ ሃይማኖት ዐፅም ክፋይ በቤተ መቅደሱ ይገኛል፡፡ ክፍለ ዐፅሙ በካይሮ ምስር ኤል – ቃዲማ በሚገኘው የቅድስት ባርባራ ቤተ ክርስቲያን የነበረ ሲኾን የመጣውም ከዋዲ ኤል – ናጥሩ ገዳም ነው፡፡

www-St-Takla-org--Abune-Paulos-in-Alex-15-July-2007-017

ብፁዕ አቡነ አረጋዊ፣ የብፁዕ ወቅዱስ ፓትርያርኩን ቃለ ምዕዳንና ቡራኬ በልሳነ ዓረብ እየመለሱ አሰምተዋል

ገዳሙ ኢትዮጵያውያን አበው የነበሩበትና የቅድስት ሀገር ኢየሩሳሌም ተሳላሚዎች ሲሔዱና ሲመለሱ የሚያርፉበት እንደነበር ይነገራል፡፡ የጻድቁ ክፍለ ዐፅም ከኢትዮጵያውያን የቅድስት ሀገር ተሳላሚዎች የተገኘ እንደኾነና በገዳሙ ላይ የአረማውያን ጥፋት በተቃጣበት ወቅት፣ በዘመኑ የመንበረ ፓትርያርኩ መቀመጫ ወደ ነበረው የካይሮ ቅድስት ባርባራ ቤተ ክርስቲያን እንደተወሰደ ድረ ገጹ ጠቅሷል፤ ወደ አሌክሳንደርያ የጻድቁ ቤተ ክርስቲያን የመጣውም ካህናቱና ምእመናኑ በየገዳማቱ መዛግብትን አገላብጠው እውነታውን ካረጋገጡ በኋላ ለፓትርያርኩ አቡነ ሺኖዳ ባቀረቡት ጥያቄ መሠረት እንደኾነ ይገልጻል፡፡

www-St-Takla-org--Abune-Paulos-in-Alex-15-July-2007-024

አምስተኛው ፓትርያርክ ብፁዕ ወቅዱስ አቡነ ጳውሎስ ወደ ግብጽ ሐዋርያዊ ጉብኝት ባደረጉበት ሐምሌ ወር ፲፱፻፺፱ ዓ.ም.፣ ሐምሌ ፰ ቀን በቤተ ክርስቲያኑ ተገኝተው የጻድቁን ክፍለ ዐፅም መመልከታቸውን ድረ ገጹ (St-Takla.org) ዘግቧል፡፡

ለሌሎችም አብያተ ክርስቲያን የተከፋፈለው የጻድቁ ዐፅም ሽራፊ፣ ታኅሣሥ ፳፬ ቀን ከሚውለው ክብረ በዓላቸው ኹለት ቀን በፊት/ታኅሣሥ ፳፪ ቀን ፲፱፻፷፬ ዓ.ም./ ከካይሮ ተነሥቶ በታላቅ ሥነ በዓል ወደ መቅደሱ ገብቶ በክብር እንደተቀመጠ ድረ ገጹ አስፍሯል፡፡ አምስተኛው ፓትርያርክ ብፁዕ ወቅዱስ አቡነ ጳውሎስ ወደ ግብጽ ሐዋርያዊ ጉብኝት ባደረጉበት ሐምሌ ወር ፲፱፻፺፱ ዓ.ም.፣ ሐምሌ ፰ ቀን በቤተ ክርስቲያኑ ተገኝተው የጻድቁን ክፍለ ዐፅም መመልከታቸውን ድረ ገጹ (St-Takla.org) ዘግቧል፡፡ በድረ ገጹ÷ በእንግሊዝኛ፣ በዐረብኛና በፈረንሳይኛ የተዘጋጀ የጻድቁ ዜና ሕይወትና ተኣምራት፣ በተለያዩ አህጉር በስማቸው የተተከሉ ገዳማትና የታነፁ አብያተ ክርስቲያን ዝርዝር፣ ቅዱሳት ሥዕላትና ሌሎችም መረጃዎች ይገኛሉ፡፡

Advertisements

7 thoughts on “ቅድስት ቤተ ክርስቲያን የቅዱሳን አሠያየም ቀኖና ከአፈጻጸም መመሪያው ጋራ ልትደነግግ ነው

  1. የቅርብ ታዛቢ የውነት አሽከር June 21, 2014 at 10:17 pm Reply

    ከመጠምጠም መማር ይቅደም የሚለውን አስቡትና በሐዋርያት አበው ያልነበረን ሲኖዶሳዊ የቅድስና መሥፈሪያ አበጅቶ ሠፋሪ ለመኾን ከመንጠራራት በቅድስና ለመኖር ማሰብ ማሰላሰሉ ቢቀድም ምን አለ ነው እኔ የምለው !!!!! ስለ ኹለቱ በሲኖዶስ ቅድስና ተሰጣቸው ስለተባሉት አባቶች ደግሞ እመለስበታለሁ ።

  2. Anonymous June 22, 2014 at 2:08 am Reply

    Is there any plan to visit S. Sudan refugees in Ethiopia? This is something the church needs to orginize real quick. No preaching or teaching. Just feed and let them drink the hungry and thristy, kiss their chucks, wash their legs, sit, talk, laught and cry with them. Then, when their suffering subsides, they will remember the blessings they received in Jesus name. They really need an honest help, not politically motivated one. They suffered way too long. Apologies for my unrelated comment.

  3. Anonymous June 23, 2014 at 6:32 am Reply

    በጣም ሊታሰብበት የሚገባ ይመስለኛል፡፡ ይህ ለቅዱስ ሲኖዶስ የተሰጠ ኃላፊነት በጣም ፈታኝ ይመስለኛል፡፡ አሁን ያሉ የመንግስት ቅጥረኞች የሲኖዶስ አባላት አቡነ ጳውሎስንና መለስ ዜናዊን ቅዱሳን ብለን ካልሰየምን አይሉም ብላችሁ ነው?

    እቺ ዳር ዳር አላማረችኚም

    ምነው መጀመሪያ አገልግሎታቸውን በሚገባ ለማገልገል ቢሞክሩ !!!!!!!!

  4. Anonymous June 23, 2014 at 6:35 am Reply

    በጣም ሊታሰብበት የሚገባ ይመስለኛል፡፡ ይህ ለቅዱስ ሲኖዶስ የተሰጠ ኃላፊነት በጣም ፈታኝ ይመስለኛል፡፡ አሁን ያሉ የመንግስት ቅጥረኞች የሲኖዶስ አባላት አቡነ ጳውሎስንና መለስ ዜናዊን ቅዱሳን ብለን ካልሰየምን አይሉም ብላችሁ ነው?
    እቺ ዳር ዳር አላማረችኚም
    ምነው መጀመሪያ አገልግሎታቸውን በሚገባ ለማገልገል ቢሞክሩ !!!!!!!!

  5. Kidus June 23, 2014 at 6:54 am Reply

    በጣም ሊታሰብበት የሚገባ ይመስለኛል፡፡ ይህ ለቅዱስ ሲኖዶስ የተሰጠ ኃላፊነት በጣም ፈታኝ ይመስለኛል፡፡ አሁን ያሉ የመንግስት ቅጥረኞች የሲኖዶስ አባላት አቡነ ጳውሎስንና መለስ ዜናዊን ቅዱሳን ብለን ካልሰየምን አይሉም ብላችሁ ነው?
    እቺ ዳር ዳር አላማረችኚም
    ምነው መጀመሪያ አገልግሎታቸውን በሚገባ ለማገልገል ቢሞክሩ !!!!!!!!

    • Anonymous June 24, 2014 at 11:32 am Reply

      The issue raised is interesting. However, this is not the right time for the church since the administration as a whole is not capable of doing this. Yes EPRDF can twist our fathers’s hands to decide for his <> to give . Every where the party is under the ocean of corruption.

      Simply see the respected Cabine members of Hageremariam Kesem woreda, North Shewa Zone Amhara region. they are caught by having forged diploma and degrees from Alfa University. Along with them other more than 80 civil servants are being sentenced to prison.

      When you go up, the corruption is advanced. EPRDF had a wish to promote,…. to to higher levels, why not to

      Therefore, our fathers should take care.

  6. Anonymous June 25, 2014 at 12:41 am Reply

    በጣም ሊታሰብበት የሚገባ ይመስለኛል፡፡ ይህ ለቅዱስ ሲኖዶስ የተሰጠ ኃላፊነት በጣም ፈታኝ ይመስለኛል፡፡ አሁን ያሉ የመንግስት ቅጥረኞች የሲኖዶስ አባላት አቡነ ጳውሎስንና መለስ ዜናዊን ቅዱሳን ብለን ካልሰየምን አይሉም ብላችሁ ነው?
    እቺ ዳር ዳር አላማረችኚም
    ምነው መጀመሪያ አገልግሎታቸውን በሚገባ ለማገልገል ቢሞክሩ !!!!!!!
    ለ እውነተኞቹ አባቶች መልካሙን ያመላክታቸው :ከ ቀደሙት አባቶቻችን ና ከሐዋርያት እግዚአብሔር ያስተማረውን መንገድ እንዲከተሉ አምላክ ይምራቸው !!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: