ፓትርያርኩ ‹‹ቤተ ክርስቲያን በዩኒቨርስቲ ምሩቃን አትመራም›› ማለታቸው ቅሬታ ፈጠረ

  • ስለ ማኅበራት የሰጡትን አስተያየት መልሰው እንዲያጤኑት ተጠየቀ
  • ‹‹ማኅበራት በትኩረት ሊመሩና ጉዟቸውም እየተፈተሸ ሊስተካከል ይገባል›› (መንግሥት)

(አዲስ አድማስ፤ ቅጽ ፲፫ ቁጥር ፯፻፴፰፤ የካቲት ፳፱ ቀን ፳፻፮ ዓ.ም.)

His hHoliness00የኢትዮጵያ ኦርቶዶክስ ተዋሕዶ ቤተ ክርስቲያን ፓትርያርክ ብፁዕ ወቅዱስ አቡነ ማትያስ ‹‹ከዩኒቨርስቲ ተመርቀው ቤተ ክርስቲያንን እንምራ እያሉ ነው፤ ቤተ ክርስቲያኒቱ ትውፊትና ሥርዓት አላት፤ እንዲህ ማለት አይችሉም›› በማለት የሰጡትን አስተያየት መልሰው እንዲያጤኑት በንግግራቸው ቅር የተሰኙ የመንፈሳውያን ማኅበራት አገልጋዮች ጠየቁ፡፡

አገልጋዮቹ ለአዲስ አድማስ እንደተናገሩት፣ አቡነ ማትያስ ይህን አስተያየት የሰነዘሩት በመንበረ ፓትርያርክ ጠቅላይ ቤተ ክህነት ጽ/ቤት የስብከተ ወንጌልና ሐዋርያዊ ተልእኮ መምሪያ ከኢትዮጵያ መጽሐፍ ቅዱስ ማኅበር ጋራ በመተባበር የካቲት ፳፩ እና ፳፪ ያዘጋጁት ሀገር አቀፍ የስብከተ ወንጌል የምክክር ጉባኤ በተካሔደበት ወቅት ነው፡፡

በምክክር ጉባኤው መዝጊያ ላይ ባደረጉት ንግግር ‹‹በባዮሎጂና ኬምስትሪ እንቀድስ እያሉ ነው፤›› ያሉት አቡነ ማትያስ፤ ‹‹ምን እያልኹ እንደኾን ይገባችኋል›› በማለት ስለማን እንደ ኾነ የማሳየት ያህል የጠቆሙበት አስተያየት ያልተለመደና ጥቂት የማይባሉ የጉባኤውን ተሳታፊዎች ያሳዘነ እንደነበር የጉባኤው ምንጮች አመልክተዋል፡፡

በምክክር ጉባኤው ላይ ለውይይት በቀረቡ ጽሑፎች፣ በአዲስ አበባ እስከ ሰማንያ ሺሕ የሚገመቱ መንፈሳውያን ማኅበራት በቤተ ክርስቲያኒቱ ስም እንደሚንቀሳቀሱ የተጠቀሰ ሲኾን ቤተ ክርስቲያኒቱ ማኅበራቱ በሕግና በሥርዐት የሚመሩበት ደንብ አውጥታ እስካልተቆጣጠረቻቸው ድረስ እየተከሠቱና ሊከሠቱ የሚችሉ ችግሮች በቀላሉ እንደማይታዩ ተመልክቷል፡፡

ቅሬታ አቅራቢዎቹ በበኩላቸው፣ በማኅበር ሽፋን ለግል ጥቅማቸውና ፍላጎታቸው የሚሯሯጡ፣ የሃይማኖትና የሥነ ምግባር ሕጸጽ የሚታይባቸው ማኅበራት የመኖራቸውን ያህል ጥሩ ሥነ ምግባር ያላቸው፣ ምእመናንን በማትጋት ለበለጠ ሀብተ ጸጋ የሚያበቁ ጠንካራ ማኅበራትም እንዳሉ ገልጸዋል፡፡

ከቅርብ ጊዜ ወዲኽ በምክክር ስም በሚዘጋጁ መድረኮችና በቤተ ክህነቱ ጉባኤያት እየታየ ያለው ‹‹ማኅበራት አላሠራ አሉን›› በሚል በጅምላ የመፈረጅና የመኰነን ዝንባሌ፣ አብዛኞቹ ማኅበራት ለሀገር በአጠቃላይና ለቤተ ክርስቲያን በተለይ እያበረከቱ ያለውንና በቤተ ክህነቱ ቀጥተኛ አቅም ሊሸፈን የማይችለውን ዘርፈ ብዙ አገልግሎት በሚዛን ያላስቀመጠ ነው ብለዋል – የማኅበራት አገልጋዮቹ፡፡

‹‹በአሁኑ ጊዜ ማኅበራት የአባሎቻቸውን አስተዋፅኦና የበጎ አድራጊ ምእመናንን የገንዘብ፣ የዕውቀትና ሞያዊ አቅም በማስተባበር የገጠር አብያተ ክርስቲያናት፣ ገዳማት፣ አድባራትና የአብነት ት/ቤቶች በተቀናጀ መንገድ እንዲረዱ ያደርጋሉ፤ ለቤተ ክርስቲያንና ለሀገር ዕድገት የሚጠቅሙ ልዩ ልዩ ጥናቶችን ያካሒዳሉ፤ በጠረፍ የሀገሪቱ ክፍል በሚያከናውኑት የስብከተ ወንጌል እንቅስቃሴ ምእመኑ በቋንቋው የሚገለገልበትን ኹኔታ ያመቻቻሉ፤ የቅዱሳት መካናት ተሳላሚዎችን የክብረ በዓላት ጉዞዎች በማስተባበር ሕዝቡ ቅርሱንና ባህሉን ዐውቆ እንዲጠብቀውና እንዲከባከበው ከማስቻላቸው ባሻገር ለሀገር ውስጥ ቱሪዝም መስፋፋትና መጠናከርም ያላቸው አስተዋፅኦ በቀላሉ የሚታይ አይደለም፤›› ሲሉ በበጎ ፈቃድ የሚሰበሰቡ ማኅበራትን አገልግሎትና ድርሻ አብራርተዋል፡፡

ማኅበራቱ አብዛኞቹን ተግባራት የሚያከናውኑት በየደረጃው ከሚገኙ የቤተ ክርስቲያኒቱ ሓላፊዎችና አባቶች ፈቃድ እያገኙና መመሪያ እየተቀበሉ መኾኑን የሚገልጹት አገልጋዮቹ፣ በግንቦት ፳፻፬ ዓ.ም. የማኅበራትን ቁጥር ስለ መቆጣጠር ለቅዱስ ሲኖዶስ ቀርቦ በነበረ ጥናት መነሻነት ምልዓተ ጉባኤው ራሱን የቻለና ማኅበራቱን የሚያሠራ ሕግ እንዲዘጋጅ ሊቃነ ጳጳሳት፣ ሊቃውንተ ቤተ ክርስቲያንና የሕግ ባለሞያዎች ያሉበት ደንብ አዘጋጅ ኮሚቴ ሠይሞ እንደነበር ያስታውሳሉ፡፡ የማኅበራት አደረጃጀትና የፋይናንስ ቁጥጥር መርሖን ጠብቆ እንደሚወጣ ሲጠበቅ የቆየው ደንብ ከሚገባው በላይ መዘግየቱ ችግሩ ከቤተ ክህነቱ እንጂ ከማኅበራቱ አገልግሎትና ብዛት አለመኾኑን እንደሚያመለክት ይከራከራሉ፡፡

ፓትርያርኩ አድልዎ በሌለው መልኩ ቤተ ክርስቲያኒቱን ለማስተዳደር በዕለተ ሢመታቸው ቃለ መሐላ መፈጸማቸውን የሚናገሩት ቅሬታ አቅራቢዎቹ፣ በምክክር ጉባኤው ላይ በተጠቀሰው አኳኋን የመናገራቸው ግፊት የተለያየ መነሻ ሊኖረው እንደሚችል አስተያየታቸውን ሰንዝረዋል፡፡

የመጀመሪያው መንሥኤ፣ የሙስናንና ብልሹ አሠራርን ችግር ለመቅረፍና ለማድረቅ በቅዱስ ሲኖዶስ ምልዓተ ጉባኤ ውሳኔ መሠረት ለአዲስ አበባ ሀ/ስብከት የተሠራው የመዋቅር የአደረጃጀትና የአሠራር ጥናት ተቃዋሚዎች ‹የጥናቱ ባለቤት ነው› በማለት በሚከሡት ማኅበረ ቅዱሳን ላይ በቤተ ክርስቲያኒቱ ከፍተኛ አመራር አማካይነት እንዲፈጠር የሚሹት ጫና ነው፡፡

ኹለተኛው መንሥኤ ደግሞ በመንግሥት በኩል፣ ‹‹በኦርቶዶክስ ሃይማኖት ውስጥ አክራሪነትና ጽንፈኝነት የሚታየው ህልውናቸውና ዓላማቸው ሃይማኖታዊና በሃይማኖቱ የበላይ ጠባቂዎች ይኹንታ በተቋቋሙ የወጣት ማኅበራት አደረጃጀቶች ውስጥ በመሸጉ አካላት ነው፤ ስለዚህም ማኅበራት በትኩረት ሊመሩና ጉዟቸውም እየተፈተሸ ሊስተካከሉ ይገባል፤›› የሚለው [በአንድ ማኅበር ላይ እንዳነጣጠረ ግልጽ እየኾነ የመጣው] የአክራሪነት ውንጀላና ክሥ በብፁዓን ሊቃነ ጳጳሳት ላይ ያሳደረው ማኅበራቱን በምዝገባና ክትትል የመቆጣጠር ጫና ነው፡፡

የአክራሪነትንና ጽንፈኝነትን ምንነት መፍትሔዎችና ቀጣይ አቅጣጫዎች በሚያብራሩት የመንግሥት ሰነዶች፣ የሃይማኖት ተቋማትን ለአክራሪነትና ጽንፈኝነት ተጋላጭ ያደርጋቸዋል ከሚባሉት ኹኔታዎች ውስጥ÷ ‹‹የሃይማኖት ተቋማቱ የሰው ኃይል አስተዳደርና የፋይናንስ ሥርዐት ለተከታዩ ሕዝብ ግልጽነትና ተጠያቂነት የሌለው መኾኑና ከዚኹ ጋራ ተያይዞ በሙስናና በአስተዳደር በደል ሳቢያ የሚፈጠር ግጭት፣ የሰው ኃይል አስተዳደር በዘመድ አዝማድና በጉቦ እየኾነ የሥራ ብቃት በሌላቸው ሰዎች የሚሠራበት፣ የኦዲት ሪፖርት ቀርቦ የሚተችበትና አስተያየት የሚሰጥበት ሥርዐት አለመዳበሩ፣ ምእመናን የአክራሪነት ሰርጎ ገብ አስተሳሰቦችን የሚቋቋሙበት በሃይማኖት ዕውቀት የማስታጠቅ ክፍተት›› ይገኙበታል፡፡

በመንግሥት ትንታኔ መሠረት አክራሪነትን የመዋጊያው ቁልፍ መሣሪያ÷ የሀገር ልማትንና ዕድገትን ማፋጠን፣ የመልካም አስተዳደር ችግርን፣ የወጣቶችና ሴቶች ሥራ አጥነትን መቅረፍ፣ ሕዝቡን በሃይማኖታዊ ዕውቀቱ ማስታጠቅ ነው፡፡

የሃይማኖት ተቋማትን ለአክራሪነትና ጽንፈኝነት ተጋላጭ ያደርጓቸዋል የተባሉት የመልካም አስተዳደርና የብልሹ አሠራር ችግሮች÷ ማኅበረ ቅዱሳን እንደ ተቋም ባልተሳተፈበትና በተቃዋሚዎች አላግባብ የሚከሠሥበትን የመዋቅር የአደረጃጀትና የአሠራር ለውጥ ጥናት ትግበራ በማፋጠን እንዲኹም ማኅበረ ቅዱሳንን ጨምሮ በርካታ ማኅበራት በመቶ ሺሕ የሚቆጠሩ የገዳማትና የአብነት ት/ቤት ማኅበረሰቦችን በልማትና ተራድኦ ከመደገፍ ጀምሮ በሚያከናውኑት የሐዋርያዊ ተልእኮ ንቃት ሊወገድ እንደሚችል ቅሬታ አቅራቢዎቹ ያምናሉ፡፡

ከዚኽም አንጻር ፓትርያርኩ ንግግራቸውን[ከንግግራቸው ጥቂት ደቂቃዎች በፊት ከአዳራሹ ወጣ ብለው በተቀበሉት የስልክ ውይይት እንደተቀበሉት የተጠቆመውን] መልሰው በማጤን ማኅበራት አገልግሎታቸውን በተገቢው የአደረጃጀትና የፋይናንስ ቁጥጥር መርሖ መሠረት አጠናክረው ለመቀጠል የሚያስችላቸው ኹኔታ እንዲያመቻቹ ጠይቀዋል፡፡

Advertisements

7 thoughts on “ፓትርያርኩ ‹‹ቤተ ክርስቲያን በዩኒቨርስቲ ምሩቃን አትመራም›› ማለታቸው ቅሬታ ፈጠረ

  1. Anonymous March 9, 2014 at 3:12 pm Reply

    ያልታደለ ምዕመን፣ ያልታደለ ትውልድ፣ ያልታደለች ሀገር….
    ፓትርያርኩ የቤተ ክርስቲያኒቷን አስተዳደር የማሻሻል አቋሜ ‹‹አልተበረዘም፤ አልተከለሰም›› ማለታቸው እኮ እራሳቸውን ለማሰተዋወቅ ያህል ያለፈ የተግባር ሥራ እንዳልሆነ አሁን አሁን እውነት እየሆነ እየመጣ ይገኛል፡፡ ባይሆንማ ኖር ለምን ገና ከሞሾማቸው የቅዱስ ሲኖዶስን ውሳኔ ጥሰው ለሙሰኞች ቤተክርስቲያኒቷን አሳልፈው ሰጡ? የድሬደዋው ቅዱስ ገብርኤል ቤ/ክ ህንጻ ስራ በሙሰኞች ተዘርፏልና ቅዱስ ሲኖዶስ ሂሳቡ ይጣራ፣ ይመርመር ብሎ የወሰነው ውሳኔ እኮ በሳምንቱ ነው ያለ ቅድመ ሁኔታ በራሳቸው ስልጣን በአንድ ገጽ ደብዳቤ ሽረው ምርመራውን እንዲቋረጥ የወሰኑት፣ ሌላው በአዲስ አበባ ሀገረ ስብከት የሚታየውን ብልሹ አሰራር እና ሙስና እንዲጠፋ የሚሟገቱትን ብፁዕ አቡነ እስጢፋኖስን ከሙሰኞች፣ ከተሃድሶዎች ጋር አብረው ሲወቅሱ፣ ከማገዝ ይልቅ ስራቸውን ሲያደናቅፉ በግልጥ ታይቷል፣ እየታየም ነው፡፡
    ጎሰኝነትንስ እዋጋለሁ የሚሉትም እኮ ገና ከጅምራቸው በአዲስ አበባ አድባራት የጎሳ ‹‹መሳዮቻቸውን›› ያለ ስልጣናቸው እየሰገሰጉ ነው…. ብዙ መዘርዘር ይቻላል…፡፡
    ግን ለእኚህ አባት እግዚአብሔር አገልግሎታቸውን እንዲባርክላቸው፣ መንጋውን በአግባቡ እንዲጠብቁት በጽኑ እንመኛለን፡፡ ይህን ኃላፊነታችን ግን በአግባቡ ከብፁአን አባቶች ጋር በህብረት በአንድ ቃል … የማይወጡት ከሆነ እምነታችንን፣ ቤተክርስቲያናችንን፣… ከተሀድሶ መናፍቃን፣ ከሙሰኞች፣ ከአረማውያን ‹‹ካድሬዎች›› …. የመጠበቅ የሁሉም ኦርቶዶክሳዊ ምዕመን የውዴታ ግደታችን ነው፡፡
    ላቆብ ብዬ ሌላ አንዱን ሃሳቤን እንድገልጥ ውስጤን አስገደደኝ፤ እኚህ አባታ 45 ሚሊኖን ተከታይ ምዕመናንን የመምራት፣ የማስተዳደር… አቅማቸውስ ምን ያህል ነው? ብዙዎች እኮ ገና ከጅምሩ በስራቸው በጣም ግራ እየተጋቡ ከአጠገባቸው መሸሽ ጀምረዋል፣ በአንድ ‹‹የካድሬ›› የስልክ መልዕክት በርግጎ ይህንን ሁሉ ውርጅብኚ በመረጣቸው ምዕመን ላይ ማውረድስ ምን ይሉታል፣ የመረጣቸው እኮ ኦርቶዶክሳዊ ተዋህዶ ምዕመኑ እንጂ የፌዴሬሽኑ አቶ ‹‹…›› አይደለም ግን እኚህ አባት ይህንን እንኳን መገንዘብ፣ ማገናዘብ አልቻሉም፤ በአጠቃላይ ይህችን ቀጥተኛ፣ ቅድስት፣ ጥንታዊ፣… ቤተክርስቲያን የማስተዳደር ብቃታቸው ፍጹም አጠራጣሪ፣ አስፈሪ ነው፡፡ ያልታደለ ምዕመን፣ ያልታደለ ትውልድ፣ ያልታደለች ሀገር….

  2. Sewmehon March 10, 2014 at 7:32 am Reply

    If he has to stay respected and liked he has to listen to the people not to the corrupt individuals from the laity and government! Otherwise what happened to his predecessor shall unfold

  3. Anonymous March 10, 2014 at 7:50 am Reply

    Hey, MK leaders please wake up!!settling differences within internal means is better than labeling fathers through the so called independent media.

  4. Anonymous March 11, 2014 at 7:30 am Reply

    ቤተ ክህነቱ መብላት እንጂ መምራት አልቻለም፡፡ ከዩኒቨርስቲ የተመረቁትስ ይቅሩ፡፡ ለምን ከአብነት ትምህርት ቤት የተመረቁት እውነተኞቹ ሊቃውንት እንዲመሩ ዕድል አይሰጣቸውም? በየአሜሪካውና አውሮፓ ሲዞሩ የነበሩ የሁለት ዓለም ድሆች፤ ከዩኒቨርስቲውም ከአብነቱም የሌሉበት አስመሳዮችና እዚሁ ሲያውደለድሉ የነበሩ ነጭ ሌቦችና ተላላኪዎች አይደሉም እንዴ ዋናውን ቦታ ይዘው ቅዱስ ሲኖዶስንና የሊቃውንት ጉባኤን ሳይቀር በመጥለፍ ቤተ ክርስቲያንን እያዳከሙ ያሉት? ፓትርያርኩ የተማሩ ሰዎችን ምነው ፈሩ? ችግር አለ እንዴ? የተማሩት አበው ቤተ ክርስቲያንን ይምሩ፡፡ ያልተማሩት ደግሞ ይመከሩ፡፡ እንደ ብጹዕ አቡነ ኤልሳዕ ያሉ አባቶች የሚሰጡት ምክር ተግባራዊ ቢሆን ቤተ ክርስቲያን እውነተኛ ባሕርይዋን ትይዝ ነበር፡፡ በቤተ ክርስቲያን ቀርቶ በዘመናዊ ፖለቲካ እንኳ የትግል ጓድ ከሥጋ ወንድም በላይ ነው፡፡ በቤተ ክርስቲያን ግን አሁን እየሆነ ያለው ያስደነግጣል፡፡ አባቶች ከዱርዬዎች ጋር ቁጭ ብለው ይመካከራሉ፡፡ በጣም ያስነውራል፡፡

    • Anonymous March 12, 2014 at 11:43 am Reply

      ወዳጄ የኢንተርኔትና የጋዜጣ አሉባልታ እየሰማህ የገደል ማሚቶ አትሁን.ከነንቡረዕድ በላይ በአብነቱም በዘመናዊውም ትምህርቱም የበለጸገ የለም.የሰዎቹ ጩኸት ለምን እኛ አንመራም፣አናማክርም ነው.እሱ ደግሞ አይቻልም.ቤ/ክ መቅደስ ነው ያላት.የኬሚስትሪ ላቦራቶሪ የላትም.ባይሆን ኮሌጆቹ ኬሚስት ስለሚፈልጉ ቅ/ልደታ ኮሌጅ እንዲሄዱ ምከራቸው.
      ቤ/ክ እውነተኛ ባህርይዋን ለመያዝ በአቶዎች መመራት አለባት ካልክ የዲያስፖረዎች ቦርድ ተብየ የባለከረባቶች ጋንጊስተር እየፈጠረ ያለውን ውጥንቅጥ ለማየት ያልታደልክ መሆን አለብህ.ብትችል ሳታይ አትናገር.ባትችል ለሰማሀው ነገር ተጨባጭ ማረጋገጫ ይዘህ ተናገር.መድረክ አገኘሁ ብለህ በእድሜና በእውቀት እንዲሁም በክህነት የሚበልጡህን አባቶች አታጣጣል.እሱ እውቀት ሳይሆን ውድቀት ነው.

  5. ሐ/ጊዮርጊስ March 13, 2014 at 2:50 pm Reply

    ምነዉ ብጹዕ አቡነ ማቲያስ
    የዩኒቨርሲቲ ምሩቃን ልጆችዎ አይደለንም እንዴ፡፡ ምነዉ በእንዲህ ዓይነት ንግግር ዉስጣችንን ጎዱብን፡፡ በባዮሎጂ እንቀድስ አሉ የሚለዉ ንግግርዎን መልዕክቱን መልሰዉ ቢያጠኑት ዉስጥዎ እንደሚጎዳ አስባለሁ፤፤ እንዲህ የሚል ግለሰብ የለምና፤ ፈጽሞ ፈጠራ ነዉና፡፡
    አባት ልጁን ጠርቶ ቢመክር እንጂ እንዲህ ያለዉን ንግግር ፈጽሞ አይናገርም፡፡

    • Anonymous March 14, 2014 at 9:32 am Reply

      ሐ/ጊዮርጊስ አንተ በባይሎጅ ልምራ ካላልክ ጉዳዩ ሊያስጨንቅህና ውስጥህን ሊነካው አይገባም.ከፈለክም ሰ/ጉባኤ ተመርጠህ መምራት ትችላለህ.መልእክቱ ለሚመለከታቸው ነው.ለእነሱ ደርሱዋል.ምክር የሚመከረው ላውቆ አጥፊ አይደለም.ላውቆ አጥፊ የሚገባው ተግሳጽ ስለሆነ አባታችን እሱን አድረገዋል.ያደረጉት ሊደረግ የሚገባውን ነው.እንዲህ የሚል ግለሰብ የለም፣ፈጠራ ነው እያልን በግምት አንናገር.የተናገሩት የታዘቡትን ታዝበው ነው.አንተ ራስህን በግምት አትጉዳ.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: