የድሬዳዋ ቅ/ገብርኤል ሕንፃ ቤተ ክርስቲያን ሒሳብና የግንባታው ጥራት በብቁና ገለልተኛ ባለሞያዎች ይመረመራል፤ ምርመራው እንዲዘገይ የፓትርያርኩ ልዩ ጽ/ቤት ያስተላለፈው ትእዛዝ የከተማውን ምእመናን አስቆጥቷል

  • ምርመራው እስከ ግንባታው ፍጻሜ ታግዶ እንዲቆይ የፓትርያርኩ ልዩ ጽ/ቤት የጻፈው ደብዳቤ፣ ጥቅመኛ ግለሰቦች በማጭበርበር ያጻፉት እንጂ የፓትርያርኩ ሐሳብ እንዳልኾነ የተናገሩት ሊቀ ጳጳሱ ብፁዕ አቡነ ዕንባቆም፣ የደብሩ ሰበካ ጉባኤ የቤተ ክርስቲያኒቱን መብት ከማስጠበቅ ወደ ኋላ እንዳይል በጥብቅ አሳስበዋል
  • የደብሩ ሰበካ ጉባኤ በሕንፃ አሠሪ ኮሚቴው ላይ ቁጥጥሩን ማጥበቅ ጀምሯል፤ ሰበካ ጉባኤው በሌለበት የሚካሔድ የገንዘብ ቆጠራ እንደማይኖርና የተቆጠረ ገንዘብ ዕለቱኑ ሞዴል ተቆርጦለት ወደ ባንክ መግባት እንዳለበት የሚያሳስብ ደብዳቤ ዛሬ ለኮሚቴው ተጽፎለታል
  • የሕንፃ አሠሪ ኮሚቴውን በብቸኝነት ከሚቆጣጠሩት ብርሃኔ መሐሪ ጀምሮ ራሳቸውን በቋሚ ሠራተኝነት የተኩትና የሕግ ተጠያቂነት የሚጠብቃቸው ሦስት የኮሚቴው አባላት ለሰበካ ጉባኤው መመሪያ ተግባራዊ ምላሽ መስጠት ቢኖርባቸውም ብርሃኔ መሐሪ ‹‹ሊቀ ጳጳሱን አስነሣለኹ›› የሚል ዛቻ ይዘዋል
  • ‹‹ለቤተ ክርስቲያንና ለሕዝብ ቆሞ ስደት እንኳ ቢመጣ መቀበል ነው፡፡›› /የድሬዳዋና ምዕራብ ሐረርጌ አህጉረ ስብከት ሊቀ ጳጳስ ብፁዕ አቡነ ዕንባቆም/

???????????????????????????????በድሬዳዋ ሀገረ ስብከት የሳባ ደብረ ኃይል ቅዱስ ገብርኤል ቤተ ክርስቲያን ሰበካ መንፈሳዊ ጉባኤ፣ የሕንፃ ቤተ ክርስቲያኑን ገቢና ወጪ እንዲሁም የሕንፃ ግንባታውን ጥራት ብቃቱ በተመሰከረለትና ገለልተኛ በኾነ አማካሪ ድርጅት እንዲመረመር ወሰነ፡፡

የደብሩ ሰበካ ጉባኤ ውሳኔን ያሳለፈው፣ የሕንፃ ቤተ ክርስቲያኑ የገንዘብ ፍሰትና የግንባታ ጥራት ምርመራ እስከ ግንባታው ፍጻሜው ድረስ እንዲዘገይ የፓትርያርኩ ልዩ ጽ/ቤት በመዝባሪው ብርሃኔ መሐሪና ጥቅመኞቻቸው ሐሰተኛ መረጃ ላይ ብቻ ተመሥርቶ ያስተላለፈውን ትእዛዝ አስመልክቶ ትላንት፣ ጥር ፲፭ ቀን ፳፻፮ ዓ.ም. ማምሻውን በጠራው አስቸኳይ ስብሰባ ነው፡፡

በውሳኔው መሠረት፣ በውለታ ከተያዘለት ጊዜ በስድስት ዓመታት የዘገየውና ከስምንት ሚልዮን ብር በላይ የምእመናን ገንዘብ የተመዘበረበትን የሕንፃ ቤተ ክርስቲያን ሒሳብና የግንባታ ሒደት የሚመረምረው አማካሪ ድርጅት በጨረታ እንደሚለይና ለዚህም አስፈላጊው ዝግጅት መጀመሩ ተገልጧል፡፡

ሰበካ ጉባኤው በአስቸኳይ ስብሰባው የደረሰበት አቋም ቋሚ ሲኖዶስ መስከረም ፰ ቀን ፳፻፮ ዓ.ም. ያሳለፈው ውሳኔ የሚፈጸምበትና የፓትርያርኩ ልዩ ጽ/ቤት የቅ/ሲኖዶሱን አቋም በመጋፋት በመዝባሪው ብርሃኔ መሐሪ በኩል የጻፈውን ምርመራን የማዘግየት ትእዛዝ ውድቅ የሚያደርግ ነው፡፡

የምርመራው ግኝትም በሕንፃ አሠሪ ኮሚቴ ሊቀ መንበር ብርሃኔ መሐሪ እየተደፈረ ያለውን የቤተ ክርስቲያኒቱን መብት ለማስከበርና የተመዘበረውን የምእመናን ገንዘብ ለማስመለስ ሕጋዊ መሠረት እንደሚኾን በሀ/ስብከቱ አስተዳደር ጉባኤ፣ በደብሩ ሰበካ መንፈሳዊ ጉባኤና ሥራው ከተጀመረበት ከጥቅምት ወር ፲፱፻፺፰ ዓ.ም. አንሥቶ ምዝበራውን እየተከታተለ ሲያጋልጥ በቆየው የምእመናን ተሟጋች ቡድን ታምኖበታል፡፡

His Grace Abune Enbakom Archbishop of Dire Dawa and West Haraghe

ብፁዕ አቡነ ዕንባቆም
የድሬዳዋና ምዕራብ ሐረርጌ አህጉረ ስብከት ሊቀ ጳጳስ

የደብሩ ሰበካ መንፈሳዊ ጉባኤ አስቸኳይ ስብሰባ ከተካሔደበት ምሽት ቀደም ብሎ የፓትርያርኩ ልዩ ጽ/ቤት በጻፈው ትእዛዝ ቁጣቸው የተቀሰቀሰና ቁጣው ያስተባበራቸው በርካታ ምእመናን ከድሬዳዋና ምዕራብ ሐረርጌ አህጉረ ስብከት ሊቀ ጳጳስ ብፁዕ አቡነ ዕንባቆም ጋራ መወያየታቸው ተዘግቧል፡፡

በብፁዕ ወቅዱስ ፓትርያርኩ ልዩ ጸሐፊ በኩል በልዩ ጽ/ቤቱ ደብዳቤ ላይ ቅሬታቸውን ሲገልጹ የቆዩት ምእመናኑ፣ የቅ/ሲኖዶሱ ውሳኔ አማሳኝነቱ በተደጋጋሚ በተካሔዱ ኦዲቶች በተጋለጠ መዝባሪ ግለሰብ የተሳሳተ መረጃ ላይ ተመሥርቶ አፈጻጸሙ እንዲዘገይ መታዘዙ በእጅጉ አሳዝኗቸዋል፤ በቋሚ ሲኖዶሱ ውሳኔ መቋጫ ያገኛል ያሉትን የደብሩን ችግርንም ያወሳስባል፡፡

ሰበካ ጉባኤው ማስፈጸም የሚገባው የቅ/ሲኖዶሱን ውሳኔ መኾን እንዳለበት ያሳሰቡት ምእመናኑ፣ በሁለተኛ የምርጫ ዘመኑ ላይ የሚገኘው ሰበካ ጉባኤ ውሳኔውን በማስተግበር የቤተ ክርስቲያኒቱን መብት የሚያስከብርና የምእመናንን ገንዘብ የሚያስጠብቅ ካልኾነ በአዲስ ምርጫ ወደሚተኩበት ርምጃ እንደሚቀጥሉ በአጽንዖት ገልጸዋል፡፡

የሕንፃ ቤተ ክርስቲያኑ ገቢና ወጪ፣ የግንባታው ጥራት በብቁና ገለልተኛ ባለሞያዎች እንዲመረመር የተላለፈውን የቋሚ ሲኖዶሱን ውሳኔ የሚያግድ ደብዳቤ ማምጣት በራሱ ችግር መኖሩን እንደሚያሳይ የገለጹት ብፁዕ ሊቀ ጳጳሱ በበኩላቸው፣ ‹‹ኦዲት ይደረግ፤ ነጻ እናውጣችኹ ሲባል ይደረግ ይሉ ነበር፤›› ካሉ በኋላ ደብዳቤው የተጻፈው በጥቅም በተሳሰሩ ግለሰቦች የተንኰል አካሔድ እንጂ በሙስና ላይ ጠንካራ አቋም እንዳላቸው የሚያምኑባቸው ብፁዕ ወቅዱስ ፓትርያርኩ በሰጡት መመሪያ ነው ብለው እንደማያምኑ ተናግረዋል፡፡

በሕንፃ ቤተ ክርስቲያኑ ጉዳይ ላይ ሁለት ተፃራሪ ውሳኔዎችን ማስተናገድ እንደማይችሉ ብፁዕነታቸው ገልጸው ለቤተ ክርስቲያንና ለሕዝብ ቆሞ የሚመጣውን መከራ መቀበልን እንደሚመርጡ አስታውቀዋል፡፡ ‹‹ለቤተ ክርስቲያንና ለሕዝብ ቆሞ ስደት እንኳ ቢመጣ መቀበል ነው፤ ደግሞም አብረን ነው የምንሰደደው›› በማለት የመከሩት ብፁዕነታቸው፣ በመጨረሻ የሰጡት መመሪያ ሰበካ ጉባኤው የቋሚ ሲኖዶሱን ውሳኔ የሚያስፈጽምበትን መነሻ እንዲያቀርብ ነበር፡፡

በቋሚ ሲኖዶሱ ውሳኔና ብፁዕነታቸው መመሪያ መሠረት ሰበካ ጉባኤው ማምሻውን ለአስቸኳይ ስብሰባ ተቀምጦ ምርመራው ብቁና ገለልተኛ በኾነ አማካሪ ድርጅት እንዲካሔድ የጋራ አቋም ወስዶ ለሀ/ስብከቱ አስታውቋል፡፡ ብፁዕነታቸው የቃለ ዐዋዲውን አንቀጽ ፳፱ ድንጋጌ በማስታወስ በሰጡት የሥራ መመሪያ፣ ለሰበካ ጉባኤው ተጠሪ የኾነው የሕንፃ አሠሪ ኮሚቴ ከደብሩ አስተዳደር ለሚተላለፍለት መመሪያ ተግባራዊ ምላሽ መስጠት የሚጠበቅበት ሲኾን አስተዳደሩም አካሔዱን ኹሉ ለሀ/ስብከቱ ጽ/ቤት በግልባጭ ያስታውቃል፡፡

በዚኽም መሠረት የሕንፃ አሠሪ ኮሚቴው÷ በግንባታው ስም የሰበሰበውን ማንኛውንም ገቢ ቆጠራ የሰበካ ጉባኤው ተወካይ በሌለበት ማካሔድ እንደማይችልና የተቆጠረውን ገንዘብ ዕለቱኑ ሞዴል ፷፬ ቆርጦለት ወደ ባንክ ገቢ እንዲያደርግ በዛሬው ዕለት በደብሩ አስተዳዳሪ በተጻፈ ደብዳቤ መታዘዙ ተገልጦአል፡፡ የአስተዳዳሪው ደብዳቤ የደረሳቸው የሕንፃ አሠሪ ኮሚቴው ሊቀ መንበር ብርሃኔ መሐሪ ‹‹መጻጻፍ ተጀመረ ወይ?›› በሚል እንደማንገራገርም እንደማስፈራራትም ቢቃጣቸውም ‹‹እስከ አኹንም ለፍቅር ብለን ነው እንጂኮ ፊትም ፈርተን አይደለም›› የሚል ምላሽ ከአስተዳዳሪው ተሰጥቷቸዋል፡፡

ከፓትርያርኩ ልዩ ጽ/ቤት የደረሳቸውን የምርመራ ማዘግያ ደብዳቤ በመያዝ ‹‹ይህችን ደብዳቤ ይዘን ፍርድ ቤት እንሔዳለን እንጂ አናስመረምርም›› እያሉ ራሳቸውን ወደ ደመወዝተኝነት ከቀየሩ ሦስት የኮሚቴው ቅጥረኞቻቸው ጋራ መክረዋል የተባሉት ብርሃኔ መሐሪ፣ ሰበካ ጉባኤው በቋሚ ሲኖዶሱ ውሳኔ መሠረት የግንባታውን ሒሳብና ጥራት ለማስመርመር ከያዘው አቋም ባሻገር የሰበካ ጉባኤውን ተወካይ ሳይዙ የገቢ ገንዘብ ቆጠራ እንዳያካሒዱ መታዘዛቸው ትልቅ ራስ ምታት ኾኖባቸዋል፡፡

ብርሃኔ መሐሪ በሥራ አስኪያጅነት፣ በቁጥጥርነትና በገንዘብ ያዥነት ሠይመው ደመወዝተኛ ያደረጓቸውን ሦስት የኮሚቴውን አባላት ብቻ ይዘው የሚያካሒዱት ቆጠራ የሕንፃ አሠሪ ኮሚቴን ገቢ ለዘረፋና ብክነት እንዳጋለጠው የደብሩ ምንጮች ያስረዳሉ፡፡ ለዚህም የሕንፃ አሠሪ ኮሚቴው አምናና ዘንድሮ ታኅሣሥ ወር በቁሉቢ ርእሰ አድባራት ቅ/ገብርኤል ያገኘውን ገቢ በዚኹ ተመሳሳይ ወር የድሬዳዋ ኆኅተ ሰማይ ቅድስት ማርያም ካቴድራል ልማት ኮሚቴ ካገኘው ገቢ ጋራ በማነጻጸር ያስረዳሉ፡፡

ባለፈው ዓመት ታኅሣሥ ወር ሁለቱ አድባራት በቁሉቢ የቅ/ገብርኤል ክብረ በዓል ገቢ እንዲያሰባስቡ በተሰጣቸው ፈቃድ÷ የድሬዳዋ ቅድስት ማርያም ልማት ኮሚቴ ለሚያስገነባው ት/ቤት ብር 280‚000.00 ገቢ መሰብሰቡን ሪፖርት ሲያደርግ፣ በቅ/ገብርኤል ሕንፃ አሠሪ ኮሚቴ በኩል ተገኘ የተባለው ግን ብር 70‚000 ብቻ ነበር፡፡ የድሬዳዋ ኆኅተ ሰማይ ቅድስት ማርያም ካቴድራል ብር 300‚000 ገቢ በቁሉቢ መሰብሰቡን በገለጸበት በዘንድሮው ታኅሣሥ ወር የቅ/ገብርኤል ክብረ በዓል፣ የሳባ ደ/ኃ/ቅ/ገብርኤል ሕንፃ አሠሪ ኮሚቴ ከአምናው ባነሰ ኹኔታ አገኘኹት ያለው ብር 60‚000 ብቻ ነው፡፡

ለገቢው ለሚታየው ከፍተኛ ልዩነት በርካታ ምክንያቶችን መዘርዘር ቢቻልም እንኳ የድሬዳዋ ኆኅተ ሰማይ ቅድስት ማርያም  ካቴድራል  ልማት  ኮሚቴ  ካህናትንና  ምእመናንን  ያሳተፈና  ግልጽነት  የተመላበት  የገቢ  ቆጠራ ማካሔዱ፣  የሳባ ደብረ ኃይል ቅዱስ ገብርኤል ቤተ ክርስቲያን የገቢ  ቆጠራ  ደግሞ  ከመዝባሪው  ብርሃኔ  መሐሪና  ቅጥረኞቻቸው በቀር ተቆጣጣሪ የሌለው የመኾኑ ጉዳይ ግን   በአውራነት ሊጠቀስ ይገባል፡፡

ዘግይቶ እንደተሰማው፣ የመንበረ ፓትርያርክ ጠቅላይ ቤተ ክህነት የቁጥጥር አገልግሎት፣ የሕንፃ ቤተ ክርስቲያኑ የኦዲት ምርመራ የሕንፃ ሥራው እየተካሔደ ጎን ለጎን መከናወን እንደሚችል በመግለጽ የፓትርያርኩ ልዩ ጽ/ቤት ለሀ/ስብከቱ ያስተላለፈው እስከ ግንባታው ፍጻሜ  የማዘግየት ትእዛዝ እንዲስተካከል ለመ/ፓ/ጠ/ቤ/ክ ጽ/ቤት ደብዳቤ ጽፏል፡፡

የፓትርያርኩ ልዩ ጽ/ቤት የበላይ ሓላፊ የኾኑት ብፁዕ አቡነ ገሪማ የድሬዳዋ ሀ/ስብከት ሊቀ ጳጳስ በነበሩበት በ፳፻፫ ዓ.ም. የጠቅላይ ቤተ ክህነቱ የቁጥጥር አገልግሎት በሕንፃ ቤተ ክርስቲያኑ ሥራ ላይ ያካሔደውና በ47 ገጾች የተጠናቀረው የኦዲት ምርመራ ሪፖርት እንዳረጋገጠው፣ ከብር 1.8 ሚልዮን በላይ (1‚864‚372.33) ብር ከደንብና መመሪያ ውጭ ለተቋራጭ ክፍያ ተፈጽሟል፡፡

ከመዝባሪው ብርሃኔ መሐሪ ጋራ ባለመግባባት ራሳቸውን ከሕንፃ አሠሪ ኮሚቴው ባገለሉ ሐቀኛ ምእመናን ጥያቄና በወቅቱ ሊቀ ጳጳስ ብፁዕ አቡነ ገሪማ ፈቃድ በተካሔደው በዚኹ የኦዲት ምርመራ፣ ከደንብና መመሪያ ውጭ ለተቋራጩ የተከፈለው ብር 1‚864‚372.33 የአፈጻጸም ሕጋዊነት በአስቸኳይ እንዲስተካከልም ለሀ/ስብከቱ ጽ/ቤትና ለደብሩ ሰበካ ጉባኤ የማስፈጸም ሓላፊነት ተሰጥቶ ነበር፡፡

የማስተካከያ ርምጃውን ለመውሰድና የሕንፃ ቤተ ክርስቲያኑ ሥራ የሚጠይቀውን ቀሪ የገንዘብና ጊዜ መጠን ተጥንቶ እንዲቀርብ ስድስት አባላት ያሉት ኮሚቴ ተዋቅሮ የነበረ ሲኾን ይህም እስኪከናወን ድረስ በቀድሞው ዐይነት አሠራር ምንም ዐይነት አዲስ ክፍያ ለተቋራጩ እንዳይፈጸም ተወስኖም ነበር፡፡

ግና ምን ያደርጋል፤ የአንድ ሰው ዘርፍ ከኾነው የጠቅላይ ቤተ ክህነቱ ምሕንድስና አገልግሎት ጋራ በጥቅም የተሳሰረውና ራሱን ለሰበካ ጉባኤው ሳይኾን ለቀድሞው ፓትርያርክ ተጠሪ ያደረገው የመዝባሪው ብርሃኔ መሐሪ ሕንፃ አሠሪ ኮሚቴ የ1.8 ሚልዮን ብሩን ክፍያ ከደንብና መመሪያ ውጭ የፈጸመው በቀድሞው ፓትርያርክ ቀጥተኛ ትእዛዝ መኾኑን በመግለጽ ሪፖርቱ እንዲስተካከልለት እስከማስገደድ ደርሶ አመከነው እንጂ፡፡

የጠቅላይ ቤተ ክህነቱ ቁጥጥር አገልግሎት ኦዲት ልኡክ የተጠቀሰውን ምርመራ ከማከናወኑ ከወራት በፊት ከሕንፃ አሠሪ ኮሚቴው ተገንጥለው የወጡ ስድስት አባላትን ጨምሮ በከተማው ምእመናን ዘንድ መልካም ስም ያላቸው 10 አባላት ያሉት የተሟጋቾች ቡድን የሕንፃ ቤተ ክርስቲያኑ ሥራ ከተጀመረበት ጊዜ አንሥቶ ባካሔደው ኦዲት፡-

  • የሒሳብ ምርመራው እስከተደረገበት ግንቦት ወር ፳፻፫ ዓ.ም. ድረስ በውጭና በሀገር ውስጥ ከሚኖሩ ምእመናን የተሰበሰበው ብር 11‚388‚096.23 መኾኑን አረጋግጧል፤
  • ተቋራጩ ውል በተገባበት በመስከረም ፲፱፻፺፰ ዓ.ም. ተጨማሪ ዕሴት ታክስን ጨምሮ በ2‚984‚562.51 ወጪ በሁለት ዓመት ጊዜ ተጠናቅቆ በ፳፻ ዓ.ም. ማስረከብ የነበረበት ቢኾንም ከውለታው ውጭ የኾኑ የይገባኛል ጥያቄዎችን በማንሣትና ከሥራ ተቋራጭ የሚጠበቀውን የውል ግዴታ ሳይወጣ ደብሩን ለከፍተኛ ወጪ ዳርጎት ቆይቷል፤
  • የሒሳብ ምርመራው እስከተካሔደበት ጊዜ ድረስ አሳማኝ በኾነም ባልኾነም መንገድ በደረሰኝ የወጣው ወጪ 5 ሚልዮን ብር ሲኾን ይህ ስሌት ጠቅላላ ገቢ ከኾነው 11.8 ሚልዮን አንጻር ከ5 ሚልዮን ብር በላይ ለምዝበራ መጋለጡን አሳይቷል፡፡

የደብሩ ምእመናን ተሟጋች ቡድን ሦስት ወራት በፈጀው የግንቦት ፳፻፫ ዓ.ም. ኦዲት ምርመራ ሪፖርቱ ከጠቀሳቸው የኤፍሬም ተስፋዬ ዊነር ተቋራጭ ችግሮች መካከል የሚከተሉት አንኳር ነጥቦች በቀደምት ዘገባዎች የተነሡ ቢኾንም አንዳንድ ሐራውያን ላነሡት ጥያቄ ምላሽ ይኾን ዘንድ በድጋሚ ተጠቅሰዋል፡-

  1. በዋናው ውል መሠረት የቅድሚያ ክፍያ የተከለከለ ቢኾንም የሕንፃ አሠሪ ኮሚቴው የሥራ ተቋራጩ የሚያቀርበውን ጥያቄ በየወቅቱ የነበሩ የፕሮጀክቱ አማካሪ መሐንዲሶች ፈቃድና ይኹንታ ሳያገኝ በተጨማሪም ምንም ዐይነት ዋስትና (advance payment guarantee) ሳያቀርብ ከፍተኛ ገንዘብ በብድር ሰጥቷል፡፡ በተለይ ከነሐሴ ፳፻፪ ዓ.ም. መጨረሻ ጀምሮ እጃቸውን ባስገቡት የጠቅላይ ቤተ ክህነት መሐንዲስና በብፁዕ ወቅዱስ ፓትርያርኩ ልዩ ትእዛዝ ከውድድር ውጭ በተቀጠሩት ግለሰብ ሽፋን ሰጭነት ከፍተኛ ገንዘብ ለሥራ ተቋራጩ በቃል ትእዛዝ እንዲከፈል ተደርጓል፡፡
  2. በመደበኛ የኮንስትራክሽን ሥራዎች መተዳደርያ ደንብ አንቀጽ ፲ መሠረት ለመልካም ሥራ አፈጻጸም ዋስትና 10% (10% performance bond) ሥራ ተቋራጩ እንዲያሲዝ በተደጋጋሚ በነበሩ አማካሪ መሐንዲሶች ቢጠየቅም በሥራ ተቋራጩ እንቢተኝነትና በኮሚቴው ቸልተኝነት ተግባራዊ ሳይኾን ቀርቷል፡፡
  3. የዋጋ ግሽበትን በተመለከተ በታኅሣሥ ፲፱፻፺፬ ዓ.ም. ቋሚ የኮንስትራክሽን መተዳደርያ ደንብ አንቀጽ 70 መሠረት በተያዘው ውል የተፈቀደው የዋጋ ማስተካከያ የተፈቀደው ለሲሚንቶ፣ ብረትና ነዳጅ ሲኾን ጥያቄው በሥራ ተቋራጩ ከቀረበ በኋላ በአማካሪ መሐንዲስ ከውለታው ጋራ በማገናዘብ፣ በመመርመርና በማረጋገጥ ለአሠሪው የክፍያ ምስክር ወረቀቶችን ከማብራሪያ ጋራ መላክ ያለበት መኾኑን ይገልጻል፤ ነገር ግን ይህን ፕሮጀክት በተመለከተ ይቀርቡ የነበሩ ጥያቄዎች የተጠቀሱትን ዋና ዋና ግብዓቶች ብቻ ሳይኾን አጠቃላይ የነጠላ ዋጋ ይሻሻልኝ ጥያቄ ነው፡፡ ጥያቄው እስከ ነሐሴ ፳፻፪ የነበሩ መሐንዲሶች በአግባቡ ሠርተው ለሕንፃ አሠሪ ኮሚቴው ቢያቀርቡም በኮሚቴው ሊቀ መንበር ወገንተኝነት ጥረታቸው መና ቀርቷል፡፡
  4. የዋጋ ግሽበት ጥያቄ መቅረብ ያለበት በውለታ ጊዜ ውስጥ ለሚገኝ ፕሮጀክት መኾኑ ይታወቃል፤ ነገር ግን ከሦስት ዓመታት በላይ ያለበቂ ምክንያት ለዘገየ ሥራ በሚልዮን የሚቆጠር ገንዘብ ከላይ በተጠቀሱት ግለሰቦች ሽፋን ሰጭነት ለሥራ ተቋራጩ እንዲከፈል ተደርጓል፡፡
  5. በአኹኑ ወቅት ለሥራ ተቋራጩ የተከፈለው ገንዘብ መጠን 5‚302‚470.07 ሥራውን በአጠቃላይ ከነዋጋ ግሽበቱና አንዳንድ የለውጥ ሥራዎችን ጨምሮ ፕሮጀክቱን መጨረስ የነበረበት ቢኾንም እስከ መስከረም ፳፻፬ ዓ.ም. የተሠራው ሥራ መጠን በመቶኛ 65 በመቶ ላይ ነው የሚገኘው፡፡ ከዚኽም በኋላ በዚኽ አያያዙ የሕንፃ አሠሪ ኮሚቴው ቤተ ክርስቲያኒቱን ለከፍተኛ ወጪ ሊዳርጋት እንደሚችል ይታሰባል፡፡

5 thoughts on “የድሬዳዋ ቅ/ገብርኤል ሕንፃ ቤተ ክርስቲያን ሒሳብና የግንባታው ጥራት በብቁና ገለልተኛ ባለሞያዎች ይመረመራል፤ ምርመራው እንዲዘገይ የፓትርያርኩ ልዩ ጽ/ቤት ያስተላለፈው ትእዛዝ የከተማውን ምእመናን አስቆጥቷል

  1. Anonymous January 25, 2014 at 6:27 pm Reply

    some how good news!!! when i read the notice for the first time, i lost my confidence on our new Patriarch Abune Mathias consering corruption issues after signing convention or memorundom of understaning with the Federal Anti-corruption and ethics commission and promissing for the general people many times as will figh agains corrupted people and work procedure and so and so on. But, now i am re-storing my lost conffice a litile bit. even if it is first hand information and not known the final decion.

  2. Anonymous January 26, 2014 at 8:37 pm Reply

    ወይ መድኃንያለም !ምን አይነት ዘመን ላይ ደረስን ?ምድረ ካድሬና መናፍቅ ቤተክርስትያንን መጫወቻ አደረጝት እኮ :ለነገሩ እኛም ተኝተናል ማን እንደሚቀሰቅሰን ባናውቅም ::

    እግዚአብሔር መልካም ዘመን ያመጣልን ::

    መናፍቃንና ካድሬ ከቤተክርስትይ የሚጠፉበት ግዜ ያምጣለን :

    • Anonymous January 28, 2014 at 3:22 pm Reply

      ትክክል ነህ ወዳጄ ግን ካድሬዎቹ የመንግስት ብቻ ሳይሆኑ የተቃዋሚ ፓርቲ ደጋፊዎችም ቤተክርስቲያናችንን ምሽግ እያደረጉዋት ስለመሆኑ ልንገነዘብ ይገባል

  3. Anonymous January 28, 2014 at 3:22 pm Reply

    ትክክል ነህ ወዳጄ ግን ካድሬዎቹ የመንግስት ብቻ ሳይሆኑ የተቃዋሚ ፓርቲ ደጋፊዎችም ቤተክርስቲያናችንን ምሽግ እያደረጉዋት ስለመሆኑ ልንገነዘብ ይገባል

  4. Anonymous January 28, 2014 at 6:17 pm Reply

    just wait for a while, very near soon the truth will be revealed. And you will be understood who the menafik is, our beloved Patriarch His holiness Abune Mattiyas is really working hard day and night for the church, he knows very well what to do for church. stop judging because you will be judged .just wait. may the Almighty God opens your internal ears to hear His divine word.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: