ቤተ ክርስቲያን ከ290 ሚልዮን ብር በላይ በኾነ ውጭ ሁለገብ የሥልጠና ማዕከል ልትገነባ ነው

Ethio-Mihdar WedEthio Mihdar coverage on A.A.D Change mgt

  • የአደረጃጀትና አሠራር ጥናት ሰነዱ አካል የኾነው የሥልጠናና የሰው ሀብት ልማት ፖሊሲው ከአፈጻጸም ዝርዝር መመሪያው ጋራ ተዘጋጅቷል
  • የአደረጃጀትና አሠራር ለውጥ ጥናታዊ ውይይቱ ተጠናቅቋል

የኢትዮጵያ ኦርቶዶክስ ተዋሕዶ ቤተ ክርስቲያን÷ ከአድልዎና ሙስና የጸዳ፣ ሥርዐተ እምነትዋን የሚጠብቅ፣ መንፈሳዊ ዕሴቶችዋን የሚያንጸባርቅ፣ ሞያዊ ብቃትን ማዕከል ያደረገ፣ ዘመኑን የዋጀና የተቀላጠፈ አሠራር እንዲኖራት ያስችላል የተባለ ሁለገብ የማሠልጠኛ ማዕከል ለመገንባት የፕሮጀክት ጥናቱን አጠናቅቃ ማዘጋጀቷ ተገለጸ፡፡

በአዲስ አበባ ዙሪያ ካሉት የኦሮሚያ ወረዳዎች በአንዱ ለመገንባት ጥናቱ ተጠናቅቆ እንደቀረበ ለተገለጸውና ብር 292,260,281 ያህል በጀት የተያዘለት ለዚህ ሁለገብ የሥልጠና ማዕከል ግንባታ ፕሮጀክት ተፈጻሚነት፣ በአዲስ አበባ ሀገረ ስብከት የፓትርያርኩ ረዳት ሊቀ ጳጳስና የጅማ ሀገረ ስብከት ሊቀ ጳጳስ ብፁዕ አቡነ እስጢፋኖስ ከኦሮሚያ ክልል ፕሬዝዳንት ጋራ መነጋገራቸውንም የሀ/ስብከቱ ምንጮች ለኢትዮ ምኅዳር ዝግጅት ክፍል አስታውቀዋል፡፡

በቤተ ክርስቲያኒቱ ባለሞያዎች ተጠንቶ ሰሞኑን ለውይይት የቀረበው የአዲስ አበባ ሀ/ስብከት የመዋቅር፣ የአደረጃጀትና የአሠራር ጥናት ሰነድ ረቂቅ አካል የኾነው ሁለገብ የማሠልጠኛ ማእከል ፕሮጀክቱ÷ የኢትዮጵያ ኦርቶዶክስ ተዋሕዶ ቤተ ክርስቲያን ቀድሞ የነበራትን መንፈሳዊ፣ ማኅበራዊና ኢኮኖሚያዊ አስተዋፅኦ አጠናክራ ለመቀጠል ትችል ዘንድ ዘመኑን የዋጀና የተቀላጠፈ አሠራር እንዲኖራት የማድረግ አጠቃላይ ዓላማ ይዞ የተነሣ ነው፡፡

ለጥናቱ በተደረገው የኹኔታዎች ዳሰሳ÷ ስብከተ ወንጌልንና ትምህርተ ወንጌልን ከማጠናከርና ከማስፋፋት ይልቅ በደጋፊ ተግባራት ላይ ማተኮር፣ የአገልጋዮች የሥራ ትጋት መቀነስና ተነሣሽነት ማጣት፣ ምእመናን ሓላፊነት ለመውሰድ ያለመቻል፣ የቤተ ክርስቲያን ችግር በዓለማዊ ፍ/ቤት መታየቱ ለቤተ ክርስቲያኒቱ ክብረ ነክና የአገልግሎት ጊዜን አባክኗል ተብሏል፡፡

በዳሰሳው ግኝቶች÷ ጥፋተኞች ያለአንዳች ተጠያቂነት በሹመትና በዝውውር መታለፍ፣ በሰበካ ጉባኤያትና በአስተዳደር ሠራተኞች፣ በካህናትና ምእመናን መካከል አለመግባባቶች መፈጠር የመሳሰሉ የመዋቅር፣ አደረጃጀትና አሠራር እንዲሁም ሥነ ምግባራዊ ችግሮች፤ የቅጥር፣ ዝውውር፣ ሹመት፣ ዕድገትና ጥቅማጥቅም ጋራ የተገናኙ የሰው ኃይል አስተዳደር ችግሮች መኖራቸው ታውቋል፡፡

ከፋይናንስና ቁጥጥር ድክመቶች ጋራ በተያያዙ ብልሹ አሠራሮች ደግሞ የቤተ ክርስቲያን ሀብትና ንብረት አላግባብ መባከናቸው በዋናነት የተለዩ ሲኾኑ ችግሮቹን÷ የጥናቱ አካል በኾነውና የቤተ ክርስቲያኒቱን ዕሴቶች ያንጸባርቃል በተባለው የአገልጋዮች ማስተዳደርያ ፖሊሲና ዝርዝር የአፈጻጸም መመሪያ ከመፍታት ባሻገር በሥልጠናና የሰው ሀብት ልማት ፖሊሲውና ዝርዝር የአፈጻጸም መመሪያው መሠረት በአገልጋዮች አመለካከት፣ ክህሎትና ዕውቀት ላይ አተኩሮ በሚሠራበት የሁለገብ ማዕከሉ የአቅም ማጎልበቻ ሥልጠናዎችም ለመቅረፍ መታሰቡ ተመልክቷል፡፡

በብዙ ሚልዮን የሚቆጠሩ ምእመናንና በብዙ መቶ ሺሕ የሚታሰቡ ካህናት ያሏት ቤተ ክርስቲያኒቱ፣ ዘመኑን የዋጀና ሁለ አቀፍ የኾነ የሥልጠና ማዕከል በመገንባት በመንፈሳዊና ማኅበራዊ ተቋሞቿ መልካም አስተዳደርን፣ ምቹና ቀልጣፋ አሠራርን ማስፈኗ ለአገር ዕድገትና ልማት እጅግ ከፍተኛ አስተዋፅኦ እንደሚያበረክት በፕሮጀክቱ ዝርዝር ዓላማዎች ላይ ተገልጧል፡፡

ፕሮጀክቱ የሥልጠና ማዕከል ብቻ ሳይኾን ወላጆቻቸውን በኤች.አይ.ቪ እና በተለያየ ምክንያት ያጡ ጎዳና ተዳዳሪ ሕፃናትን በማሰባሰብ ተከባክቦ በሥነ ምግባር የማሳደግ፣ ከቀለም ትምህርታቸው ጎን ሞያዊ ክሂሎታቸውን በማዳበር ራሳቸውን ችለው ሥራ ፈጣሪ እንዲኾኑ በማስቻል ብቁ ዜጋ የማድረግ፤ ጧሪ ቀባሪ የሌላቸውን አረጋውያንና አካል ጉዳተኞችን በማሰባሰብ ኑሯቸውን የማሻሻል ዝርዝር ዓላማዎች እንዳሉትም ተዘግቧል፡፡

በተያያዘ ዜና ከኅዳር 17 – ታኅሣሥ 14 ቀን 2006 ዓ.ም ድረስ በአዲስ አበባ ሀገረ ስብከት የመዋቅር፣ አደረጃጀትና አሠራር ጥናት ረቂቅ ላይ በሰባት ተከታታይ ዙሮች ሲካሄድ የቆየው ውይይት ተጠናቅቋል፡፡

የጥቅምት ቅዱስ ሲኖዶስ ምልአተ ጉባኤ በሰጠው የአፈጻጸም አቅጣጫ መሠረት መካሄዱ የተገለጸውና በቁጥር ከ2500 በላይ ተሰብሳቢዎች ተገኝተውበታል የተባለው ይኸው ውይይት÷ የጠቅላይ ቤተ ክህነት የድርጅትና የመምሪያ ሓላፊዎች፣ የሀ/ስብከቱና የክፍላተ ከተማ ቤተ ክህነት ጽ/ቤት ሓላፊዎች፣ የ169 ገዳማትና አድባራት አለቆች፣ ጸሐፊዎች፣ የአስተዳደር ሠራተኞች፣ የአብነት መምህራን፣ የካህናት፣ የሰንበት ት/ቤት አመራሮችና የምእመናን ተወካዮች እንደተሳተፉበት ተነግሯል፡፡

የመዋቅር፣ አደረጃጀትና አሠራር ለውጥ ጥናት ረቂቁ÷ በሕገ ቤተ ክርስቲያንና በቃለ ዐዋዲው ለአዲስ አበባ ሀገረ ስብከት ተለይቶ በተሰጠው ልዩ መተዳደርያ ደንብ የማዘጋጀት ድንጋጌና የቅዱስ ሲኖዶስ ምልአተ ጉባኤ በግንቦት 2005 ዓ.ም ባስተላለፈው ውሳኔ መሠረት በሀ/ስብከቱ የፓትርያርኩ ረዳት ሊቀ ጳጳስ ትእዛዝ በተቋቋመ የቤተ ክርስቲያኒቱ ባለሞያዎች ቡድን የተሠራ መኾኑ ተገልጦአል፡፡

በድምሩ ከአንድ ሺሕ ገጾች በላይ ያሉትን 13 የአስተዳደር ፖሊሲዎችና የአሠራር ዝርዝር መመሪያዎች ሠርቶ ያቀረበው 15 አባላት ያሉት የባለሞያ ቡድኑ÷ በመንፈሳዊው ከዲቁና እስከ ማዕርገ ክህነት ያላቸው፣ በሰበካ ጉባኤያት ለረጅም ጊዜ ያገለገሉና በማገልገል ላይ ያሉ፣ ከሀገረ ስብከቱም የተውጣጡ፣ ዘመናዊውን ትምህርት በከፍተኛ ደረጃ የቀሰሙና የተለያየ ሞያዊ ልምድ ያካበቱ መኾናቸው በሁሉም የውይይት ዙሮች ሲገለጽ ሰንብቷል፡፡

ምንም ዐይነት ክፍያ ሳይፈጸምለት ለስድስት ወራት ባከናወነው ጥናትም ቤተ ክርስቲያኒቱን ከብር ሁለት ሚልዮን በላይ ወጭ መታደጉ የለውጡ ከፍተኛ ተጠቃሚዎችና ግንባር ቀደም አስፈጻሚዎች ይኾናሉ ከተባሉት ከካህናቱና ምእመናኑ ‹‹የቤተ ክርስቲያኒቱ የልደት ቀን ነው፤ የአስተዳደር ትንሣኤዋን የምናይበት ነው፤›› አሰኝቷል፡፡

በአንዳንድ አድባራት በእልቅናና በአስተዳደር ሠራተኝነት የሚገኙ ጥቂት ሓላፊዎች፣ ‹‹ጥናቱ ሊቃውንተ ቤተ ክርስቲያንን አላካተተም፤ የአጥኚዎቹ ማንነት አይታወቅም፤›› በሚል እያሰሙት ከሚገኙት ተቃውሞ በስተቀር የተቋማዊ ለውጥ ጥናቱ በመድረክ፣ በቡድን ውይይትና በቅጽ በተሰበሰበው የተሳታፊዎች መመዘኛ አስተያየት መሠረት ከ92 – 99 በመቶ የካህናት፣ ሊቃውንት፣ የሰንበት ት/ቤት ተወካዮችን ከፍተኛ ድጋፍ ማግኘቱ ተነግሯል፡፡ በቀጣይም በቅ/ሲኖዶስ ምልአተ ጉባኤ ውሳኔ በተሰጠው የአፈጻጸም አቅጣጫ መሠረት ከውይይቱ በተገኘው ግብዓት ታርሞና ተስተካክሎ በቋሚ ሲኖዶስ ከጸደቀ በኋላ የማስተግበርያ ዕቅድ ወጥቶለት ደረጃ በደረጃ ተፈጻሚ እንደሚኾን ተገልጦአል፡፡

 

17 thoughts on “ቤተ ክርስቲያን ከ290 ሚልዮን ብር በላይ በኾነ ውጭ ሁለገብ የሥልጠና ማዕከል ልትገነባ ነው

  1. Annonyname December 24, 2013 at 8:56 am Reply

    ዕድሜና ፀጋውን ያብዛላችሁ፡፡ ይበል የሚያሰኝ ጅምር ነዉ፡፡ እግዚአብሔር ለፍጻሜ ያብቃልን፡፡ ጥሩ ነገር ሲሰራ መሰናክል መግጠሙ የማቀር ነው፡፡ እናንተ ደግሞ የምትሰሩት ከአሸናፊው እግዚአብሔር ጋር ሆናችሁ ነውና ውጤቱ ያሚራል፡፡ ቤተ ክርስቲያናችንን ታደጓት፡፡ ለጠፉት ወገኖቻችንም ድረሱላቸው እኛም ምዕመናን በሚያሳትፈን ሁሉ ከጎናችሁ እንቆማለን፡፡ የበኩላችንን አስተዋፅዖ እናደርጋለን፡፡

  2. Anonymous December 24, 2013 at 9:41 am Reply

    ይበል የሚያሰኝ ስራ ነው። ማኅበረ ቅዱሳን ያጠናውን ጥናት አንቀበልም ምናምን ማለት ምን አመጣው ዋናው ለቤተ ክርስቲያን ጠቃሚ የሆነ ስራ መስራት የሚያስችል ስራ ከተሰራ እኛ ከተሰራው ስራ እንጂ ከማኅበረ ቅዱሳን ጋር ምን አለን። አሁንም ማኅበሩን የአባቶቻችን አምላክ ይጠብቅልን። የጋራ ልፋታችን በጋራ ለምንሰራው ስራ ወሳኝ ነው። ሁላችንም ከጎናቸው በመሆን እናግዛቸው።

  3. ደጉ December 24, 2013 at 11:48 am Reply

    አንች ቅድስት
    ቤተክርስቲያን እውነት ትንሳኤሽን
    ሊያሳየን ነው ይሆን?

  4. Anonymous December 24, 2013 at 12:35 pm Reply

    እባክህ አምላኬ በአንዳንድ አባቶች ላይ የሚታየውን የፍቅረ ንዋይና የቤተክርስቲያን እንቅፋት የሆኑ አባቶች እና ምዕመናን አእምሮ ልቦና ሰጣህቸው ከእኩይ ሃሰብና ተግባር መልሳቸው፡፡

  5. Anonymous December 24, 2013 at 2:21 pm Reply

    ሰይጣን መጥፎ ነገርን ተቃውሞ አያውቅም ሁል ግዜ የምቃወመው መልካም ነገርን ነው እግዚአብሔር ለአባቶቻችን ጥንካሬን ለማኅበር ቅዱሳን ደግሞ የአገልግሎት ዘመኑን ያብዛልን ::ጠላት ቢያወራም ማህበሩ ለቤተክርስቲያን የቁርጥ ቀን ልጅ መሆኑን እያየን ነው::

  6. ግእዝ በመሥመር-ላይ December 24, 2013 at 3:25 pm Reply

    “…ከ290 ሚልዮን ብር በላይ…” ይኸ በርእሱ መገለጡ፤ ነገር ግን ስንኳን በርእሱ በዝርዝሩ እንኳ የአንድ ጳጳስ ስም ከምናይ በቀር ተጠና የሚባለውን ማን እንዳጠናው፤ ሥልጠና የሚባለውን ማን እንደሚያቀርበው አለመገለጹ፤ አምነታችንን የጣልነው ገንዘብ ባለው ጉልበት ላይ እንደኾነ ያሳብቃል። ወይም ደግሞ እኛ ምንም ማወቅ ሳያሻን ኹሉን የሚያከናውኑልን ኅቡኣን አሉን ማለት ነው። ለገንዘቡ’ማ ለቅድስት ሥላሴ መንፈሳዊ ኮሌጅ ስንትና ስንት ሚሊዮን የጨረሰ ሕንፃ ተሠርቶ ሲያበቃ አንድ ጳጳስ ለንግድ ባንክ፥ ለካፌ፥ ለቡቲክ፥ ለኪዮስክ ወዘተ አከራይተው የግል ካዝናቸውን ሲያዳብሩበት ተማሮች ግን በችጋር አለንጋ እየተገረፉ ያረጁ ያፈጁ መጻሕፍትን ከጭስ ቤት ታኮ በሚኖር ቤተ መጻሕፍት ውስጥ ዐይናቸውን እየዳጡ ከማንበብ በቀር አንዳችም ጥቅም እንዳላገኙበት ለዓመታት የታዘብነው ጕዳይ ነው። የዚኽስ ዕጣ ፈንታ እንዲያ ቢኾን? ኾነም ቀረም… ቍዝምዝም ጠፋ እንጂ ፍየሎቹ የሚራገጡት በአንድ ገጥ ሳይኾን በየአግጣጫው መኾኑ ስውር አይደለም።

  7. Anonymous December 24, 2013 at 4:26 pm Reply

    ቤተ ክርስቲያናችንን ታደጓት፡፡ ለጠፉት ወገኖቻችንም ድረሱላቸው እኛም ምዕመናን በሚያሳትፈን ሁሉ ከጎናችሁ እንቆማለን፡፡ የበኩላችንን አስተዋፅዖ እናደርጋለን፡፡

    • Anonymous December 25, 2013 at 3:47 am Reply

      ምን ዋጋ አለው ማቅ እያለ… …………

      • Ben December 25, 2013 at 2:14 pm

        ማቅማ ይሄን የጴንጤ ልብህን ልቡ እስኪጠፋ እየገረፈልህ ነው።

  8. Annonyname December 25, 2013 at 6:13 am Reply

    አዎ ምን ዋጋ አለው !! መስረቅ፣መቀሰጥ አትችሉም፤ ዋጋ የላችሁም፤ዱሮስ በሌብነት ምን ዋጋ ሊኖራችሁ አስባችሁ ኖሯል? ግን እናንተ ያያችሁት ማቅን ብቻ ነው፤ እግዚአአብሔርንማ በምን ዓይናችሁ ታዩት? ማቅ ብቻውን መስሏችሁ ይሆን? አባቶቹን ተከትሎ ከእግዚአብሔር ጋር ነው፡፡

    • Anonymous December 25, 2013 at 7:58 pm Reply

      አይ ወንድሜ/ እህቴ/ ማቅ የሚከተላቸው አባቶቹ ለመሆኑ እነማን ይሆኑ ጉዳቸውን ይዞ የሚያስፈራራቸው ናቸው ወይስ ገንዘብ እና ልዩ ልዩ ስጦታ እየሰጠ እንደ ፈረስ አፋቸውን የሚለጉማቸውን ነው ወይስ ዲ/ ዳንኤል እንደነገረን የራሱ ስውር አመራሮች የምትሉት ምንም አልገባኝም ግን አንድ ነገር ልንገራችሁ ለውጡ ከእናንተ ይጀምር ንብረታችሁን አስመዝግቡ, ሂሣባችሁን አስመርምሩ, ገቢያችሁን አሳውቁ ከዚያ የምትሉት ሁሉ አድማጭ ያገኛል።

      • Annonyname December 26, 2013 at 8:55 am

        ጉድ ያለባቸውማ የአንተ/ቺ/ አባቶች ናቸው፡፡ አዋልደ ኃጎል!!

  9. Anonymous December 25, 2013 at 4:02 pm Reply

    እግዚአብ ሄር አምላክ የተመሰገነ ይሁን…….ማህበራችንን ማህበረ ቅዱሳንን ይጠብቅልን

    • Annonyname December 26, 2013 at 8:56 am Reply

      አሜን

  10. Anonymous December 26, 2013 at 1:41 pm Reply

    amen

  11. Yohannes Bayisassie December 26, 2013 at 5:48 pm Reply

    Ameen Yibel yemiyasegn naw

  12. Beko January 6, 2014 at 6:10 pm Reply

    ኦ…. አምላኬ በመንፈሳዊ ጥበብ የተቃኘ ምድራዊ ብልጽግናን ስጠኝ!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: