ፌዴራል ጉዳዮች ሚኒስቴር አዲሱን ረቂቅ ሊፈትሽ ይገባል

/ሎሚ መጽሔት፤ ርእሰ አንቀጽ፤ ቅጽ 2 ቁጥር 52፤ ሚያዝያ 2005 ዓ.ም./

Lomi Magazine on MoFA Draft Directive01የኢትዮጵያ ፌዴራላዊ ዴሞክራሲያዊ ሪፓብሊክ ሕገ መንግሥት ‹‹መንግሥት በሃይማኖት፣ ሃይማኖት በመንግሥት ጣልቃ አይገባም›› ሲል በግልጽ መደንገጉ ይታወቃል፡፡ ላለፉት በርካታ ዓመታት ግን ከሕገ መንግሥቱ ድንጋጌዎች ያፈነገጡ በርካታ ጉዳዮች ተስተውለዋል፡፡ የሩቅ ጊዜውን ክሥተት ትተን በቅርብ ከተፈጸመው የመንግሥት በሃይማኖት ጣልቃ ገብነት መሀል አዲስ አበባ የግብረ ሰዶማውያን ስብሰባ ባስተናገደችበት ሰሞን የተስተዋለውን መጥቀስ ይበቃል፡፡

ታኅሣሥ 26 ቀን 2004 ዓ.ም. በአፍሪቃ ኢኮኖሚክ ኮሚሽን መሰብሰቢያ አዳራሽ ግብረ ሰዶማውያን ስብሰባ ሊያደርጉ መኾኑን የሰሙት የኢትዮጵያ የሃይማኖት አባቶች ስብሰባ በማድረግ ‹‹ጉባኤውን የሚያወግዝ›› መግለጫ ለመስጠት ጋዜጠኞችን በኖርዌይ ቤተ ክርስቲያን እንዲገኙ ይጠራሉ፡፡ መግለጫው ከመሰጠቱ ጥቂት ደቂቃዎች አስቀድሞ በስፍራው የተገኙት የያኔው የጤና ጥበቃ ሚኒስትሩ ዶ/ር ቴዎድሮስ አድሃኖም የሃይማኖት አባቶችን ሰብስበው ካነጋገሩ በኋላ ግን ‹‹መግለጫው ላልተወሰነ ጊዜ ተራዘመ›› ተብሎ የሃይማኖት አባቶችም፣ ጋዜጠኞችም በየፊናቸው ተበታተኑ፡፡ መንግሥት በሃይማኖት ጉዳይ ጣልቃ እንደሚገባ ከዚህ በላይ አስረጂ አያስፈልግም፡፡

የፌዴራል ጉዳዮች ሚኒስቴር በሃይማኖት ጉዳዮች የሚፈጠሩ ችግሮች አገራዊ ጉዳት እንዳያስከትሉ እንደሚሠራ ተገልጧል፡፡ ኾኖም ግን በኢትዮጵያ ኦርቶዶክስ ተዋሕዶ ቤተ ክርስቲያን አማኞችና በኢትዮጵያውያን ሙስሊሞች ጉዳይ በተደጋጋሚ ጣልቃ ሲገባ ነው የሚስተዋለው፡፡

ኢትዮጵያውያን ሙስሊሞች ‹‹መንግሥት የእኛ ያልኾነውን የሃይማኖት የአሕባሽ አስተምህሮ በግድ ሊጭንብን እየሞከረ ነው›› በማለት ተቃውሞ ማሰማት ከጀመሩ አንድ ዓመት አልፏቸዋል፡፡ ችግሩ መፈጠሩ በተገለጸ ሰሞን የፈየዴራል ጉዳዮች ሚኒስቴር ተቃውሞ ያሰሙት ወገኖች ተወካዮቻቸውን መርጠው ችግሩ በክብ ጠረጴዛ ዙሪያ እንዲፈታ አሳሰበ፡፡ በዚሁ መሠረት የእስልምና እምነት ተከታዮች ወኪሎቻችን ናቸው ያሏቸውን 17 ሰዎች መርጠው አሳወቁ፡፡ ወኪሎች የፌዴራል ጉዳዮች ሚኒስቴር ባለሥልጣናት ዕውቅና ተሰጥቷቸው ችግራቸውን ሲያስረዱ ቆዩ፡፡ በመጨረሻ ግን የሃይማኖቱ ተከታዮች ከመረጧቸው ወኪሎች አብዛኞቹ በሽብርተኝነት ሲንቀሳቀሱ ተደርሶባቸዋል በሚል ሰበብ ታስረው፣ ዛሬም ድረስ የወህኒ በር ተዘግቶባቸው የፍርድ ሂደታቸውን እየተከታተሉ ይገኛሉ፡፡ ኾኖም ግን ሕዝበ ሙስሊሙ በየመስጂዱ የሚያሰማውን ተቃውሞ አሁንም ድረስ ገፍቶበታል፡፡ ታዛቢዎች ‹‹መንግሥት ከእልከኝነት መሥመር ወጥቶ ችግሮችን መፍታት ይኖርበታል›› የሚል አስተያየት ይሰጣሉ፡፡ እኛም እንላለን፡- ‹‹አንድ ዓመት የዘለቀው ተቃውሞ በመንግሥት ወገን መላ ካልተሰጠው መፍትሔው ከወዴት ሊመጣ ይችላል?››

Lomi Magazine on MoFA Draft Directiveበቡሃ ላይ ቆረቆር እንዲሉ የሙስሊሞች ጥያቄ ምላሽ ባላገኘበት ኹኔታ የፌዴራል ጉዳዮች ሚኒስቴር ከሰሞኑ ‹‹በዐዋጅ ቁጥር 691/2003 አንቀጽ 14/1/ሸ የተሰጠውን ሥልጣንና ተግባራት ለመወጣት›› በሚል ያዘጋጀው የመመሪያ ረቂቅ ዙሪያ የሃይማኖት ተቋማት መወያየት መጀመራቸው ከወዲሁ ተቃውሞን እየፈጠረ በመኾኑ ጉዳዩ በጥንቃቄና በማስተዋል እንዲመራ ማድረግ ይገባል፡፡

በመመሪያው ረቂቅ መግቢያ ላይ መመሪያውን ማዘጋጀት ያስፈለገበትን ምክንያት ሲገልጽ፡- ‹‹ለሃይማኖት ወይም እምነት ተቋማት በሕገ መንግሥቱ የተረጋገጠው የሃይማኖት ነጻነት፣ እኩልነትና የመደራጀት መብትን ተግባራዊ እንዲያደርጉ ለማስቻልና ነጻነታቸው እንደተጠበቀ ኾኖ አሠራራቸው ከሕገ መንግሥቱና ከሌሎች የሃገሪቱ ሕጎች ጋራ በተጣጣመ ኹኔታ እንዲቀጥል ለማድረግ ነው፤›› ይላል፡፡

የሃይማኖት ወይም እምነት ተቋማት ጠባይ በመሠረቱ መንፈሳዊ፣ በየ‹‹መጽሐፋቸው›› የሚመሩ እና ከየ‹‹መጽሐፋቸው›› በሚመነጭ ሥርዐት የሚተዳደሩ መኾኑን በመግለጽ በቀረበው ረቂቅ ላይ ትችታቸውን ያቀረቡ ወገኖች ‹‹የእምነት ወይም ሃይማኖት ተቋማት አሠራራቸው ከሕገ መንግሥቱና ከሌሎች የአገሪቱ ሕጎች ጋራ በተጣጣመ ኹኔታ እንዲቀጥል ክትትልና ድጋፍ ማድረግ›› የሚለው በበጎ አድራጎት ድርጅቶችና ሲቪክ ተቋማት ላይ መንግሥት የሚያካሂደው ዐይነት ቁጥጥር እንዲሰፍን ለማመቻቸት መኾኑን ከወዲሁ እየገለጹ ነው፡፡ እንዲያውም ‹‹መንግሥት በሃይማኖት ጣልቃ አይገባም›› የሚለውን በገሃድ ይጥሳል ባዮች ናቸው፡፡

የኢትዮጵያ ኦርቶዶክስ ተዋሕዶ ቤተ ክርስቲያን በሕግ የተቋቋመችው በ1952 ዓ.ም በወጣው የፍት ብሔር ሕግ መኾኑን፣ የሕጉ አንቀጽ 3 ምዕራፍ 1 ቁጥር 398፡- ‹‹የኢትዮጶያ ኦርቶዶክስ ተዋሕዶ ቤተ ክርስቲያን በሕግ በኩል እንደ አንድ ሰው የምትቆጠር ናት›› ተብሎ መደንገጉን የገለጹ ወገኖችም ቤተ ክርስቲያኒቱ ደንቦችና መመሪያዎችን በማውጣት ራሷን ማደራጀትና መምራት እንደምትችል በሕግ መብት እንደተሰጣት፣ የፍትሐ ብሔር ሕጉ ባልተሻረበት ኹኔታ ሌላ የመቆጣጠሪያ መመሪያ ማውጣቱ ተገቢ አለመኾኑን እየገለጹ ነው፡፡

ስለዚህም የፌዴራል ጉዳዮች ሚኒስቴር የተቀሰቀሰው ውዝግብ ሳይበርድ ሌላ ዙር አተካሮ እንዳይፈጠር የመመሪያውን ረቂቅ በጥንቃቄ ሊፈትሽ ይገባዋል እንላለን፡፡

Advertisements

One thought on “ፌዴራል ጉዳዮች ሚኒስቴር አዲሱን ረቂቅ ሊፈትሽ ይገባል

  1. geezonline May 5, 2013 at 5:09 pm Reply

    ምን ችግር አለ? የፍትሐ ብሔር ሕጉ ይሻርና ዐዲስ “ፍትሐ ብሔር ብሔረሰቦች” ይወጣላ! ስንኳን ዓለማውያኑ ገዳማውያኑ እንኳ በየክልላችኍ ኺዱ እየተባሉ አይደለም እንዴ? ኹሉ ተንዶ እምን ላይ እንደምንቆም እሱ ይወቀው እንጂ ምን ይባላል! የነሱስ ይኸው ከሃያ ዓመት በላይ ያየነው ጉዳይ ነው፤ እኔን የሚገርመኝ የኛ ነገር!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: