ለዕጩ ፓትርያሪክነት ከተለዩት አባቶች ሁለቱ በዕጩነት መካተታቸውን አልተቀበሉትም

  • አቡነ ማትያስ አሜሪካዊ ዜግነታቸውን የመለሱበትን ሰርቲፊኬት እንዲያቀርቡ ይጠበቃል
  • የእነንቡረ እድ ኤልያስን ጫና አንቀበልም ያሉ መራጮች እንዲቀየሩ እየተደረገ ነው
  • የጨለማው ቡድን በአቅምና በሰው ኀይል ተጠናክሮ በአራራት ሆቴል ዳግም እየተደራጀ ነው
  • የአስመራጭ ኮሚቴው አንዳንድ አባላት በተናጠል ማስፈራሪያ ተደርጎባቸዋል
  • ‹‹በሃይማኖት አክራሪነት ለኦርቶዶክስ የበላይነት ብቻ የሚቆሙ ናቸው፡፡›› /ብፁዕ አቡነ ሳሙኤል የመንግሥትን ድጋፍ ያጡበት ምክንያት/
  • ‹‹አዲስ ዐቃቤ መንበረ ፓትርያሪክ ተመርጦ ምርጫው ለሌላ ጊዜ መተላለፍ አለበት፡፡›› /አስተያየት ሰጭዎች/

የስድስተኛው ፓትርያሪክ አስመራጭ ኮሚቴ ለዕጩ ፓትርያሪክነት የለያቸውን አምስት ሊቃነ ጳጳሳት ነገ፣ የካቲት 16 ቀን 2005 ዓ.ም ለሚሰበሰበው የቅዱስ ሲኖዶስ ምልአተ ጉባኤ ያቀርባል፡፡ አስመራጭ ኮሚቴው የካቲት 14 ቀን ለይቶና አጣርቶ ከተፈራረመባቸውና በነገው ዕለት ለቅዱስ ሲኖዶሱ ለማቅረብ ካዘጋጃቸው አምስት ዕጩ ፓትርያሪኮች መካከል ሁለቱ ግን በዕጩነት በመካተታቸው እንደማይስማሙ ነው ከወዲሁ እየተነገረ የሚገኘው፡፡ በዕጩነት መካተታቸውን እንደማይቀበሉት የተነገረላቸው ሁለቱ የኮሚቴው ዕጩ ፓትርያሪኮች የሰሜን ጎንደር ሀ/ስብከት ሊቀ ጳጳስ ብፁዕ አቡነ ኤልሳዕ፣ የወላይታና ዳውሮ ሀ/ስብከት ሊቀ ጳጳስ ብፁዕ አቡነ ማቴዎስ ናቸው፡፡

የዜና ምንጩ እንደሚለው፣ ሁለቱ ብፁዓን ሊቃነ ጳጳሳት በኮሚቴው ዕጩነት መካተታቸውን የተቃወሙበት ምክንያት አንድና ተመሳሳይ ነው፤ እርሱም÷ ብፁዕ አቡነ ማትያስን ለማስመረጥ የጠቅላይ ቤተ ክህነቱ የፅልመት ቡድን የመንግሥት የደኅንነት ኀይሎች ናቸው በተባሉ ግለሰቦች እየታገዘ በመራጮች ላይ ያካሄደውና አሁንም ያላቋረጠው ኀይል፣ ዛቻና ማስፈራራት የተቀላቀለበት ግልጽ ዘመቻ ነው፡፡ በአዲስ አበባ አራራት ሆቴል እየተሰበሰበ ይመክራል የተባለው ይኸው የጨለማ ቡድን በአህጉረ ስብከት ደረጃ ከመንግሥት የዞን ደኅንነት መዋቅር ጋራ የሚሠራ ቅርንጫፍ ያለው ሲኾን ለመራጭነት የተመዘገቡ ካህናትን፣ የሰንበት ተማሪዎችንና ምእመናን ስም ዝርዝርና አድራሻ ከአህጉረ ስብከት ጽ/ቤቶች እየወሰደ በመራጮች ውሳኔ ላይ ጫና በመፍጠር ላይ ይገኛል፡፡

ጫናው ቀደም ሲል ሲዘገብ እንደቆየው፣ ‹‹መንግሥት ብፁዕ አቡነ ማትያስ በፓትርያሪክነት እንዲመረጡ ይፈልጋል፤ ድምፅ መስጠት ያለባችኹ ለብፁዕ አቡነ ማትያስ ነው፤ አቡነ እገሌ እንዲህ ናቸው፤ አቡነ እገሌ ደግሞ እንዲያ ናቸው፤ ለአቡነ ማትያስ ድምፅ የማትሰጡ ከኾነ እናስራችኋለን፤ ከሥራ እናባርራችኋለን፤›› የሚል ነው፡፡ የጫናው መጠንከርና የብፁዕ አቡነ ማትያስ በፓትርያሪክነት መመረጥ ከምርጫው ቀን አስቀድሞ የተረጋገጠ መምሰሉ በዕጩነት የተካተቱት ሌሎች አባቶች ‹‹አጃቢ፣ አሯሯጭ፣ አዳማቂ›› እንዲባሉ አድርጓቸዋል፡፡ በአምስተኛው ፓትርያሪክ ብፁዕ ወቅዱስ አቡነ ጳውሎስ ምርጫ ወቅት በዕጩነት ቀርበው ከነበሩት አንዱ ብፁዕ አቡነ ኤልሳዕ፣ ‹‹ፊትም አሟይ ነበርኹ፤ አሁንም ማሟያ አልኾንም፤›› ማለታቸው የተዘገበ ሲኾን፣ ብፁዕ አቡነ ማቴዎስም ‹‹አጫፋሪ አይደለኹም፤›› በማለት የምርና ከመንፈስ ቅዱስ አይደለም በሚባለው ምርጫ ሐዘናቸውን ገልጸዋል ተብሏል፡፡

ከየአህጉረ ስብከቱ የሚወጡት ዘገባዎች እንደሚያሳዩት፣ የጨለማው ቡድን የመንግሥትን የደኅንነት መዋቅር/ኀይል በመጠቀም በጫና ያወረደውን መመሪያ ባለመቀበል በራሳቸው ምርጫና ውሳኔ ለመጽናት የቆረጡ መራጮች በሌሎች እንዲቀየሩ እየተደረገ ነው፡፡ በአስመራጭ ኮሚቴው የምርጫ መርሐ ግብር መሠረት በሀገር ውስጥ የሚገኙ 53ቱም አህጉረ ስብከት በምርጫ ሕጉ በተወሰነው መሠረት÷ በየአህጉረ ስብከቱ ሊቃነ ጳጳሳት ሰብሳቢነት በሀገረ ስብከቱ አስተዳደር ጉባኤ ውሳኔ ከካህናት አራት፣ ከምእመናን አራት፣ ከሰንበት ት/ቤት ወጣቶች አራት በድምሩ 12 መርጠው የሀ/ስብከቱን ሥራ አስኪያጅ ጨምሮ 13 አባላት ዝርዝራቸውን እስከ ነገ የካቲት 16 ቀን በአካል ወይም በፋክስ እንዲልኩ ማሳሰቢያ ሰጥቷል፡፡ እንግዲህ ሰሞኑን በአህጉረ ስብከት ሥራ አስኪያጆችና ጽ/ቤቶቻቸው ላይ የመራጮችን ዝርዝር እንዲሰጡ፣ እነርሱም ራሳቸው መራጮቹን እየሰበሰቡ የጫናውን መልእክት እንዲያስተላልፉ ርብርብ የተደረገው÷ ይህ ቀነ ገደብ አልቆ በወጣው ፕሮግራም መሠረት መራጮች የካቲት 19 ቀን አዲስ አበባ የሚገቡበት ቀን ከመድረሱ በፊት ነው፡፡

በቅዱስ ሲኖዶሱ አባላት ዘንድም መንግሥት በፓትርያሪክነት ሊያስመርጣቸው ነው በሚባሉት ብፁዕ አቡነ ማትያስ ላይ አለ የሚባለው የተከፋፈለ አቋም ቀደም ሲል ለተገለጸው የውስጥ ሕገ ቡድኖች ዘመቻና የውጭ አካል የከፋ ተጽዕኖ የተመቸ ኾኗል፡፡ በአስመራጭ ኮሚቴ ውስጥ ያሉ አንድ አባት፣ ‹‹የእኛው መከፋፈል ተመቸ›› ብለዋል፡፡

ብፁዕ አቡነ ማትያስ በፓትርያሪክነት ቢመረጡ በእጅጉ የሚደግፉትና ቢኾኑ በሚል የማይቃወሙት÷ ብፁዕ አቡነ ጢሞቴዎስ (ባላቸው ከፍተኛ መቀራረብ የብፁዕነታቸውን ደመወዝ ላለፉት ኻያ ዓመታት በውክልና ሲቀበሉ እንደነበር ተነግሯል)፣ ብፁዕ አቡነ እስጢፋኖስ፣ ብፁዕ አቡነ ኢሳይያስ፣ ብፁዕ አቡነ መቃርዮስ፣ ብፁዕ አቡነ ጎርጎሬዎስ እና ብፁዕ አቡነ ሳዊሮስ (በብፁዕነታቸው ምትክ በኢየሩሳሌም መመደብ ይፈልጋሉ፤ ከዚህ ቀደም ለመመደብ ሞክረው አልተሳካላቸውም፤ የወ/ሮ እጅጋየሁን የጉዞ ወኪል ቢዝነስ ለማጧጧፍ ይኾን?) ናቸው፡፡

በአንጻሩ የሚጠቀሱ በርካታ ብፁዓን ሊቃነ ጳጳሳት ደግሞ የብፁዕ አቡነ ማትያስ በፓትርያሪክነት መመረጥ ቅር ያሰኛቸዋል፤ ለምን? ብፁዕ አቡነ ማትያስ ለሦስት ዐሥርት ዓመታት ከአገሩ ርቀው በሂደት ለተለዋወጡት ኹኔታዎች እንግዳ መኾናቸውን መሠረት ያደርጋል፡፡ አንድ ብፁዕ አባት እንዲህ ይላሉ÷ ‹‹የአገር ቤቱን ወቅታዊ ኹኔታ፣ የቤተ ክርስቲያኒቱን አቋም፣ የጠቅላይ ቤተ ክህነቱን ችግር የረሳ ሰው እንዴት ይመረጣል? እዚህ ፓትርያሪክ የሚኾን ጠፍቶ ነው ወይ?›› ሌሎቹም ብፁዓን ሊቃነ ጳጳሳት ብፁዕነታቸው ለኻያ ዓመት ይዘውት የቆዩትን አሜሪካዊ ዜግነትና ዕድሜያቸው ምናልባት ከ75 ያልፋል በሚል ጥርጣሬ ብፁዕነታቸው ከፓትርያሪክነቱ መመዘኛ መስፈርት በመፃረር በጫና መሾማቸውን ይቃወማሉ፡፡ በፓትርያሪክ ምርጫ ሕገ ደንቡ አንቀጽ 5/1 እና 2 መሠረት በዕጩ ፓትርያሪክነት የሚቀርብ ተወዳዳሪ በዜግነቱ ኢትዮጵያዊ መኾን አለበት፤ የውጭ አገር ዜግነት ያለው ከኾነም የውጭ ዜግነቱን ሰርዞ ወደ ኢትዮጵያዊነቱ የተመለሰ መኾን አለበት፤ ይህም ኢትዮጵያዊነትና ኦርቶዶክሳዊነት ያላቸውን ጥብቅ ቁርኝት በማመንና ኢትዮጵያዊነት በራሱ እሴት መኾኑን በመቀበል የሰፈረ ድንጋጌ ነው፡፡ ከዚህ አኳያ በዕጩነት የተካተቱት ብፁዕ አቡነ ማትያስ በዕጩነታቸው የተስማሙ ከኾነ ለሁለት ዐሥርት ዓመታት ይዘውት የቆዩትን አሜሪካዊ ዜግነት የመለሱበትን ሰርቲፊኬት በዛሬው ዕለት ለአስመራጭ ኮሚቴው እንዲያቀርቡ መጠየቃቸው ነው የተሰማው፤ እንደሚባለው የብፁዕነታቸው ሰነዶች ጠፍተዋል የሚል ማመኻኛ ካልተሰጠ በቀር፡፡

የዐቃቤ መንበረ ፓትርያሪኩን በዕድሜ መግፋት፣ ጥቂት የማይባሉ አሠራሮችና ውሳኔ ለውጭ ተጽዕኖ ይበልጥ እንዲጋለጥ ማድረጉን በሰበብነት የሚጠቅሱ የተወሰኑ ብፁዓን አባቶች በበኩላቸው፣ ‹‹የሚፈለገው የሚሠራ ሰው ነው፤ የሥራ ሰው ነው፤ መንግሥትማ ፓትርያሪክ ሊመርጥልን አይችልም፤ ሌላ ዐቃቤ መንበር ተሠይመው ምርጫው በሌላ ጊዜ እንዲካሄድ መደረግ ይኖርበታል፤ ይህንንም አገልጋዩና ምእመኑ ሁሉ እንዲያውቀው መደረግ ይኖርበታል፤›› ይላሉ፡፡

በአሁኑ ወቅት የመንግሥትን የደኅንነት መዋቅር እየተጠቀመ በአቅሙ ተጠናክሮ፣ በሰው ኀይሉ ጨምሮ የተደራጀው የጨለማው ቡድን በዕጩነት ሊካተቱ ይችላሉ የተባሉ ብፁዓን አባቶችን ሳይቀር ግልጽ ማስጠንቀቂያ እንዲሰጣቸውና ‹‹ዐርፈው እንዲቀመጡ›› አድርጓል፤ ቀጥተኛ ማስፈራሪያ ከደረሳቸው አንዱ ብፁዕ አቡነ ገብርኤል፣ ከእርሳቸውም ጋራ ለብፁዕነታቸው የምርጫ ድጋፍ እንቅስቃሴ አድርገዋል የተባሉ፣ በፀረ – ፕሮቴስታንታዊ ተሐድሶ አቋማቸው የሚታወቁ የሐዋሳ ደ/ኀ/ቅ/ገብርኤል የሰላምና ልማት ኮሚቴ ታዋቂ ምእመናን ይገኙበታል፡፡

በዕጩዎች ዝርዝር ቢካተቱ ከትምህርት ዝግጅታቸው፣ ከችሎታቸውና ልምዳቸው አንጻር ከሌሎች ጋራ ሲነጻጸሩ ‹‹ውጤቱ የማይፈለግ ይኾናል›› በሚል እንዲወጡ የተደረጉት ብፁዕ አቡነ ገብርኤል÷ ከካህናትና ምእመናን በተሰበሰቡ ጥቆማዎች ከብፁዕ አቡነ ሳሙኤል በመቀጠል ከፍተኛውን ብልጫ ያገኙ አባት ናቸው፡፡ የጨለማው ቡድን ብፁዕነታቸውን ከዝርዝሩ እንዲወጡ ሲያደርግ ብፁዕነታቸው በአሜሪካ ቆይታቸው ነበራቸው የሚለውን ‹ፖሊቲከኝነት›ና መሰል ምክንያቶች በመንሥኤነት በማጋጋል መኾኑ ተገልጧል፡፡

አካሄዱን ተቃውመዋል የተባሉትን የአስመራጭ ኮሚቴውን አባላት በተናጠል በማስፈራራትና ተስማምተው እንዲፈርሙ በማድረግ ብፁዕ አቡነ ሳሙኤል ከዕጩነት ዝርዝር እንዲወጡ የተደረገበት ዋነኛው ምክንያት ደግሞ ብፁዕነታቸው ‹‹በሃይማኖት አክራሪነት ለኦርቶዶክስ ተዋሕዶ ሃይማኖት የበላይነት ብቻ ነው የሚሠሩት›› የሚለው የተዛባ አመለካከት፣ ቂምና ጥላቻ የወለደው ክሥ ነው፡፡ የመንግሥትን የደኅንነት መዋቅር የሚታከከው የጨለማው ቡድን ይህን ክሡን ያጠናከረው ብፁዕነታቸው የአዲስ አበባ ሀ/ስብከት ሊቀ ጳጳስ በነበሩበት ወቅት በጅማና በኢሉ አባ ቦራ በጽንፈኞች የተፈጸመውን አሠቃቂ ሽብር በሀ/ስብከቱ ጋዜጣ – ኆኅተ ጥበብ – እንዲዘገብ አድርገዋል፤ በሃይማኖት መቻቻልና በእስላማዊ አክራሪነት ዙሪያ ያሳተሟቸውን መጻሕፍት በመጥቀስ ነው፡፡

የጨለማውን ቡድን እኒህን ክሦቹን በማጠናከር፣ ብፁዕ አቡነ ሳሙኤል ከዕጩዎች ዝርዝር ተካተው በፓትርያሪክነት ለመመረጥ ከበቁ ‹‹የሃይማኖት መቻቻል እንዳይኖር ያደርጋሉ›› የሚል ለመንግሥት የሚስብ መስሎ የሚታይ፣ በሐቀኛ ገጹ ግን አንድም÷ የአድርብዬ ጠባይ የተጠናወተው፣ አንድም በቡድኑ ለፕሮቴስታንታዊ ተሐድሶ አቀንቃኞች ድጋፍ የሚሰጡ ሕገ ወጥ ግለሰቦችና ቡድኖች መሠሪ ተንኰል በተገፋ አቋሙ ለጊዜውም ቢኾን ያሰበው የተሰካለት መስሎ ታይቷል፡፡ ታድያ ብፁዓን ሊቃነ ጳጳሳቱ ይህ ቡድን ነፍስ ዘርቶ ሊጠናከርበት ያደባበት የምርጫ ሂደትና የምርጫ ውጤት አካል አንኾንም፤ አናደምቅም ቢሉ ቅር ያሰኛልን? የብዙዎች ጥያቄ ነው፡፡

16 thoughts on “ለዕጩ ፓትርያሪክነት ከተለዩት አባቶች ሁለቱ በዕጩነት መካተታቸውን አልተቀበሉትም

  1. Anonymous February 22, 2013 at 11:48 pm Reply

    ኣሁንስ ይህ መንግስት ሳንደርስበት ለምን እንደሚተናኮለን ኣልገባኝም፥፥ በኣለፉት ኣመታት ምዕመና ስ

    ገደሉ ማንም ኣቤት ኣንዳይል ነው፥፥ ኣባቶች ከኣሁን በዋላስ ቤተክርስቲያንን ኣሳልፈው ኣይሰጡም፥፥

  2. ግእዝ በመሥመር-ላይ February 22, 2013 at 11:54 pm Reply

    “ታድያ ብፁዓን ሊቃነ ጳጳሳቱ ይህ [የጨለማ] ቡድን ነፍስ ዘርቶ ሊጠናከርበት ያደባበት የምርጫ ሂደትና የምርጫ ውጤት አካል አንኾንም፤ አናደምቅም ቢሉ ቅር ያሰኛልን?”

    እንዲያ አላሉም እንጂ እንዲያ ቢሉ ኑሮ ስንኳን ቅር ሊያሰኝ ደስፈቅ ያደርግ ነበር!

    “እንዴት?” ብትሉ፤ “እንዴት” ማለት ጥሩ። እኔ እንደሚገባኝ እሊህ አባቶች’ኮ የኺደቱም የውጤቱም አካል አንኾንም የሚሉት በተወዳዳሪነት እንጂ፤ እንደ ሲኖዶስ አባልነታቸው እነሱን አልቦ (እነሱ በተወዳዳሪነት የማይሳተፉበት ማለቴ ነው) የሚከናውን ከኾነ ኺደቱም እንዲኼድ፥ ውጤቱም እንዲወጣ ባሥር ጣታቸው ፈርመዋል ወይም ሊፈርሙ ተዘጋጅተዋል። አልፈረሙም፤ አይፈርሙም ካላችኹን ሌላ ነገር ነው። ፋይዳ ቢስ እንጉርጉሮ ግን ሰልችቶናል! ስንኳን የነሱ የኹላችንም አቋም በጣይ በጉባይ መታየት ያለበት አኹን ነው። መዐልቱን ጽልመት ሙሉ በሙሉ ሳይገዛው።

  3. Anonymous February 22, 2013 at 11:58 pm Reply

    እረ ጉድ ነው ድረ ገጾች መቼ ይሆን መልካምን ነገር ልናወራ የምንታደለው? ስለራስችን ጉድ እንደ ሌላ ሰው አድርገን በየቀኑ ስናቀርበው ሁላችንም ችግር አለብን ማለት ነውና እስቲ ሚዛናዊ አእምሮ እንዳለው ሰው ለማሰብ ጥረት ብናደርግ ይሻላል እንጂ እንደዚህ መዓትን በመዘገብ ብቻ ማንን መጥቀም እንደፈልግን ወይም ማንን ለመጉዳት አስበን እንደሆነ እንኳን ለኔ ለተመልካቹ ለናንተው ም የገባችሁ አይመስለኝም። ድረ ገጹ በዚሁ በውጪው ዓለም ስለሚጻፍ አንባቢውም እዚሁ ያለው በመሆኑና የኢትዮጵያው ሕዝብ ብዙም የማይመልከተው ስለሆነ ትልቅ ነገር ነው። ስለቤተክርስቲያን ይህን ያህል ከተባለማ ለሌላው ለዓለማዊው ጉዳይ ምንስ ቢባል ምን ያስገርማል። እስከአሁን የማነበው ነገሩ አንድም መንፈሳዊነት የሌለው ስለጸሎት ኃይል የማይነገርበት በመሆኑ አሳዛኝም ከዛም ባለፈ ለቤተ ክርስቲያናዊ ሥነ ምግባር ከእያንዳንዱ ልቡና ተሸርሽሮ እያለቀ ለመሆኑ ትልቅ ማሳይ እየሆነ ነው። በዚህ ተጠቃሚ ሊሆኑ የሚችሉት ዲያብሎስና በዚሁ መንፈስ የሚመሩ ብቻ ናቸው። የራስን ችግር አጋኖ መናገር ለአጽራረ ቤተ ክርስቲያን እርዳታ ማድረግ ነውና በተቻለ መጠን ለማረጋጋት እንጅ ለጥፋት ብቻ እንዳይሆን እናስብበት። ከህሉም በላይ የእግዚአብሔር ፍርድም እንዳለ አንርሳ።

  4. Anonymous February 23, 2013 at 5:59 am Reply

    Hi HARA
    Please use PDF for your message because we can not read I iPd and others devices

  5. ትሕትና አበበ February 23, 2013 at 6:42 am Reply

    ነገሩ ሁሉ በጣም ያሳዝና ግን እግዚአብሔር አለ

  6. February 23, 2013 at 6:51 am Reply

    ሕዝብ የመረጠውን አባት ማስቀመጥ አይሻልም ነበር አሁንም አልረፈደም ለመንጋው የሚያስብ መልካም አባት ለመምረጥ ሁላችንም መረባረብ ገባናል፡፡

  7. Anonymous February 23, 2013 at 8:52 am Reply

    ወሬኞች ናችሁ! በቤተ ክርስትያኒቱ ሰላም እንዲኖርም ኣትፈልጉም!
    ለምን ግን ቤተ ክርስትያኒቱን ስም ታጠፋላችሁ
    ሓራውያን ኦርቶዶክስ ስለ መሆናችሁ እጠራጠራለሁኝ!

  8. ስምዓ ጽድቅ ዝበኣማን February 23, 2013 at 9:49 am Reply

    ወገን ጉጋዩ ኣሳሳቢ ነው
    ሙስሊሙ ህብረተሰብ የሃይማኖት መሪያውን ሲመርጥ መንግስት ጣልቃ መግባቱን እስከኣሁን ድረስ ኣልተዋጠልኝም ነበር ኣሁን ግን መቶ በመቶ ምንግስት በሙስሊሙ ህብረተሰብ የሃይማኖት ምርጫ ላይ ጣልቃ መግባቱን ግልጽ ሁኖልኛ።
    ታድያ ምን ማድረግ ነው ያለብን ?
    መንግስት ግን ለምንድር ነው ህዝቡን የሚያሰቃየው?
    ህዝቡ የግድ ማምጽ ኣለበት ?
    ወይስ የሃይማኖት ንጻነት ማለት ትርጉሙ ኣለገባው ይሆን ?
    ከኣሁን በፊት የቤተክርስቲያንዋ ምሪዎች ከምንግስት በተላኩ ደህንነቶች መድብደባቸው ሆን ብሎ መንግስት የፈጸመው መሆኑን የኣሁኑ ሁኔታ ጉልህ ኣድርጎ ያሳያል።
    መንግስት ኣስብበት ኣስብበት ኣስብበት በሃይማኖታችን ጣልቃ ኣትግባብን በሃይማኖታችን ጣልቃ ኣትግባብን በሃይማኖታችን ጣልቃ ኣትግባብን በሃይማኖታችን ጣልቃ ኣትግባብን
    መጽሐፋችን የሚያስተምረን ምከረው ምከረው ምከረው እንቢ ካለ ግን መካራ ይምከረው።
    መንግስት ትዕግስታችንን ዋጋ ሊሰጠው ይገባል ።

  9. Solomon February 23, 2013 at 11:46 am Reply

    Yemidregw negr be mengest atasabu ebakachu

  10. Haile Gebriel February 23, 2013 at 12:35 pm Reply

    Your comments are far from christian ethics.

  11. Gebremikael February 25, 2013 at 9:38 pm Reply

    PDF PDF PDF PDF pleeeeeeeeeeease?

  12. alebachew February 26, 2013 at 9:10 pm Reply

    እኛ ከናንተ ምን እንማረን ??????????????

  13. Anonymous March 12, 2015 at 9:11 am Reply

    ኸረ ጉድ ሰው አይስማን እኛ ከናንተ ምን እንማራለን እግዚያብሔር የሊዲያን ልብ ይስጠን ቆብ አድርጐ በሰው ፊት ቢታይ ምን ዋጋ አለው የኤሊ ክህነት ነው

  14. Anonymous March 12, 2015 at 9:14 am Reply

    እኔ የሚገርመኝ አሪፍ ነጋዴ ሆናችሁልናል ለወደፊት ደግሞ በፖለቲካው ዘርፍ ተመራጮች እንድትሆኑ ተግታችሁ ፀልዩ ሳይሆን ተግባታችሁ አውሩ

  15. Anonymous March 12, 2015 at 9:16 am Reply

    አዘጋጆችም ብትሆኑ ከምታወሩበት ወይም ከምትፅፋበት ጊዜ ቀንሳችሁ ፀልዩበት ፍሬ የሚገኘው ከማውራት ሳይሆን ከመፀለይ ነው፡፡

  16. Anonymous March 12, 2015 at 9:21 am Reply

    በእናንተ በፍፁም የሰማይን መንግስት አትወርሱም ህዝቡንም አታድኑም እ/ር ይታደገን እንጂ ከናንተ ክህነት የሚሰጠው ንስሀ እራሱ ጥፋት ነው አሽሙር ፣ ሽሙጥ ነው ለእግዚያብሔር ለወደፊት ታያላችሁ አንድም ህዝብ በእናንተን የሚመራ አይኖርም ብቻችሁን ትቀራላችሁ እኛ የፈጠረን አምላክ ያውቅልናል፡፡

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: