የቅ/ሲኖዶስ አስቸኳይ ምልአተ ጉባኤ የዕርቀ ሰላም አጀንዳ ዋና ዋና የውሳኔ ነጥቦች

በዕርቀ ሰላም ሂደቱ ላይ በማተኰር ጥር 6 ቀን 2005 ዓ.ም የተጀመረው የቅ/ሲኖዶስ ምልአተ ጉባኤ አስቸኳይ ስብሰባ÷ ዋነኛ የመነጋገሪያ ነጥብ ባደረገው የዕርቀ ሰላም ሂደት ላይ የደረሰበትን ውሳኔ ዛሬ፣ ጥር 8 ቀን 2005 ዓ.ም በዘጠኝ ሰዓት በሚሰጠው ጋዜጣዊ መግለጫ ያሳውቃል ተብሎ ይጠበቃል፡፡

በትላንትናው ዕለት ለመግለጫው በተዘጋጀው ረቂቅ እና በጋዜጣዊ መግለጫው አሰጣጥ ላይ በተፈጠረ አለመግባባት ከፍተኛ ውዝግብ ታይቶበት የነበረው ምልአተ ጉባኤው÷ ከጥቂት ደቂቃ በኋላ እንደሚሰጠው በሚጠበቀው ጋዜጣዊ መግለጫ÷ በሰሜን አሜሪካ በስደት የሚገኙት ብፁዓን አባቶች በፓትርያሪክ ምርጫው እንዲሳተፉ በጊዜ የተገደበ ጥሪ እንዲደረግ መወሰኑ ተሰምቷል፡፡ የልዩነቱ ማእከላዊ ጉዳይ ኾኖ የኖረው የአራተኛው ፓትርያሪክ ወደ አገር የመመለስ ጉዳይ ላይ ቀድሞ ከተወሰነው ውሳኔ የተለወጠ ነገር አለመኖሩ ተመልክቷል፡፡

ትላንት ውዝግብ ቀስቅሶ የነበረው የመግለጫው ረቂቅ÷ ከፓትርያሪክ ምርጫው አስቀድሞ ለዕርቀ ሰላሙ ሥምረት መሠራት የሚገባቸውን ተግባራት እና በውጭ በስደት ያሉ ብፁዓን አባቶችን ተሳትፎ ጨርሶ ከግምት ባለማስገባት ለምርጫው ብቻ ትኩረት በመስጠት የተዘጋጀ ነበር ተብሏል፡፡ በዚህም ሳቢያ የቅ/ሲኖዶሱ የዕርቀ ሰላም ልኡካን ጨምሮ ‹‹በምርጫው ለውጮቹም ጥሪ ተደርጎ በአንድነት እንሳተፍ›› የሚል አቋም የያዙት የቅ/ሲኖዶሱ ዋና ጸሐፊ ብፁዕ አቡነ ሕዝቅኤል÷ የመግለጫውን ረቂቅ ካቀረቡት ከእነ ብፁዕ አቡነ ሳሙኤል ጋራ ከፍተኛ ክርክር ውስጥ ገብተው እንደነበር ተገልጧል፤ በመግለጫው ዝግጅት ንቡረእድ ኤልያስ ኣብርሃ ተሳትፈዋል፤ ዋና ጸሐፊውም ስብሰባውን ጥለው መውጣታቸው ተዘግቧል፡፡ በኀባር የተደረሰበት የስምምነት አቋም ሳይኖር ከቀኑ 11፡00 ላይ በእነ ብፁዕ አቡነ ሳሙኤል በጎን ተጠርቶ ነበር ለተባለው ጋዜጣዊ መግለጫ ጋዜጠኞች ተገኝተው የነበረ ቢኾንም መግለጫው በዋና ሳይሰጥ ቀርቷል፡፡

ከዚህ በኋላ ነው እንግዲህ ምልአተ ጉባኤው የልዩነት ነጥቦቹን በማገናዘብ መግለጫውን ዳግመኛ አዘጋጅተው እንዲያቀርቡ ሦስት ብፁዓን አባቶችን (ብፁዕ አቡነ ኤልሳዕ፣ ብፁዕ አቡነ ገብርኤል፣ ብፁዕ አቡነ አብርሃም) የመደበው፡፡ ከዛሬው መግለጫ መካተተቸው ከተገለጹት ዋና ዋና ነጥቦች መካከል፡-

  • በስደት የሚገኙት አባቶች በምርጫው እንዲሳተፉ በጊዜ የተገደበ ጥሪ ይደረግላቸዋል
  • ብፁዓን አባቶች ለጥሪው ምላሽ እስኪሰጡ የምርጫው ዝግጅት ሙሉ በሙሉ ይቆማል
  • ለጥሪው አዎንታዊ መልስ ተገኝቶ በአንድነት ወደ ምርጫው ከተገባ የዕርቀ ሰላም ሂደቱ ፍጻሜ ይኾናል፤ የፓትርያሪክ ምርጫ ሕገ ደንቡና አስመራጭ ኮሚቴው ዳግመኛ በጋራ ሊታይ ይችላል
  • የቅ/ሲኖዶሱን ጥሪ የሚያደርሱ ሽማግሌዎችና ታዋቂ ሰዎች ይመደባሉ የሚሉት ይገኙባቸዋል፡፡

የመግለጫውን ሙሉ ይዘት እንደደረሰን እናቀርባለን፡፡

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: